യേശുവിൽനിന്ന് പഠിക്കുക
ലോകമെങ്ങും സമാധാനം വരും!
സമാധാനം നിറഞ്ഞ ഒരു ലോകം. അതാണ് എല്ലാവരുടെയും ആഗ്രഹം. പോരാട്ടങ്ങളും യുദ്ധങ്ങളും ഒക്കെ അവസാനിപ്പിച്ച് സമാധാനം കൊണ്ടുവരാൻ ആയിരക്കണക്കിനു വർഷങ്ങളായി ലോകനേതാക്കന്മാർ ശ്രമിക്കുന്നുണ്ട്. അവരുടെ ശ്രമങ്ങൾകൊണ്ട് കുറച്ച് കാലത്തേക്ക് ഒരു ശാന്തതയൊക്കെ ഉണ്ടായേക്കാം. എന്നാൽ പ്രശ്നങ്ങൾ വീണ്ടും തലപൊക്കുന്നു. സമാധാനം നിറഞ്ഞ ഒരു ലോകം എന്നെങ്കിലും കാണാനാകുമോ? ഉറപ്പായും! കാരണം യേശു അതിന് ഉറപ്പു തരുന്നുണ്ട്.
യേശു എന്തു ചെയ്യും?
സമാധാനം കൊണ്ടുവരാനായി യേശു പെട്ടെന്നുതന്നെ എന്തു ചെയ്യുമെന്നു ബൈബിൾ പറയുന്നു.
‘സമാധാനപ്രഭു എന്നു യേശുവിനു പേരാകും. അവന്റെ ഭരണത്തിന്റെ വളർച്ചയ്ക്കും സമാധാനത്തിനും അവസാനമുണ്ടാകില്ല.’ (യശയ്യ 9:6, 7) ദൈവരാജ്യത്തിന്റെ രാജാവെന്ന നിലയിൽ യേശു ലോകമെങ്ങും സമാധാനം കൊണ്ടുവരും. അത് എന്നും നിലനിൽക്കുകയും ചെയ്യും.
‘സഹായത്തിനായി കേഴുന്ന ദരിദ്രനെയും ആരോരുമില്ലാത്തവനെയും അവൻ രക്ഷിക്കും.’ (സങ്കീർത്തനം 72:12-14) യേശു തന്റെ അധികാരം ഉപയോഗിച്ച് നീതി നടപ്പാക്കും. അതോടെ യുദ്ധവും അക്രമവും കഷ്ടതയും അവസാനിക്കും.
“ജനത ജനതയ്ക്കു നേരെ വാൾ ഉയർത്തില്ല, അവർ ഇനി യുദ്ധം ചെയ്യാൻ പരിശീലിക്കുകയുമില്ല.” (യശയ്യ 2:4) യേശു ഭൂമിയെ ഭരിക്കുമ്പോൾ പരസ്പരം പോരടിക്കാതെ എങ്ങനെ സമാധാനത്തോടെ ജീവിക്കാമെന്ന് ആളുകൾ പഠിക്കും.
യേശു എങ്ങനെ സമാധാനം കൊണ്ടുവരുമെന്നും അപ്പോൾ അവിടെയായിരിക്കാൻ നമ്മൾ എന്തു ചെയ്യണമെന്നും അറിയാൻ എന്താണ് ദൈവരാജ്യം? എന്ന ചെറിയൊരു വീഡിയോ കാണുക.
യേശു എന്താണു പഠിപ്പിച്ചത്?
യേശു പഠിപ്പിച്ച കാര്യങ്ങൾ സമാധാനത്തോടെ ജീവിക്കാൻ ലക്ഷക്കണക്കിന് ആളുകളെ ഇന്നുപോലും സഹായിക്കുന്നുണ്ട്. പരസ്പരം സമാധാനത്തോടെ ജീവിക്കാൻ ആളുകളെ സഹായിക്കുന്ന ചില കാര്യങ്ങൾ യേശു പ്രശസ്തമായ മലയിലെ പ്രസംഗത്തിൽ പഠിപ്പിച്ചു. അവയിൽ ചിലതു നോക്കാം.
“സമാധാനം ഉണ്ടാക്കുന്നവർ സന്തുഷ്ടർ.” (മത്തായി 5:9) പോരാട്ടങ്ങൾ ഒഴിവാക്കാൻ മാത്രമല്ല സമാധാനം ഉണ്ടാക്കാനും യേശു തന്റെ അനുഗാമികളെ പ്രോത്സാഹിപ്പിച്ചു.
“ആദ്യം പോയി നിന്റെ സഹോദരനുമായി സമാധാനത്തിലാകുക. പിന്നെ വന്ന് നിന്റെ കാഴ്ച അർപ്പിക്കുക.” (മത്തായി 5:23, 24) ആരെങ്കിലുമായി ഒരു പ്രശ്നമുണ്ടായാൽ എത്രയും പെട്ടെന്നുതന്നെ അതു പരിഹരിക്കാൻ യേശു തന്റെ കേൾവിക്കാരെ ഉപദേശിച്ചു. ദൈവവുമായി നല്ലൊരു ബന്ധമുണ്ടായിരിക്കണമെങ്കിൽ നമ്മൾ ആളുകളുമായി സമാധാനത്തിലായിരിക്കണമെന്നും യേശു പഠിപ്പിച്ചു.
“നിങ്ങളെ വിധിക്കാതിരിക്കണമെങ്കിൽ നിങ്ങളും വിധിക്കുന്നതു നിറുത്തുക!” (മത്തായി 7:1) ഒരു ദയയുമില്ലാതെ ആളുകളെ വിധിക്കുകയോ നമ്മൾതന്നെ ചെയ്യാത്ത കാര്യങ്ങൾ മറ്റുള്ളവർ ചെയ്യാൻ പ്രതീക്ഷിക്കുകയോ ചെയ്യരുതെന്നു യേശു പഠിപ്പിച്ചു. മറ്റുള്ളവരുടെ കുറ്റങ്ങൾ കണ്ടുപിടിച്ചുകൊണ്ടിരിക്കുന്നതിനു പകരം അവരുടെ തെറ്റുകൾ ‘എപ്പോഴും ക്ഷമിക്കാൻ’ ആണ് യേശു പറഞ്ഞത്.—ലൂക്കോസ് 6:37.
യേശു പഠിപ്പിച്ച കാര്യങ്ങൾ ലോകമെങ്ങുമുള്ള ആളുകൾ ഇന്ന് അനുസരിക്കുന്നുണ്ട്, അക്രമവും ഭിന്നതയും നിറഞ്ഞുനിൽക്കുന്ന സ്ഥലങ്ങളിൽ താമസിക്കുന്നവർപോലും. ദേഷ്യപ്പെടാതെ പ്രശ്നങ്ങൾ പരിഹരിക്കാനും പരസ്പരം ക്ഷമിക്കാനും ദയയില്ലാതെ ഇടപെടുന്നവരോടുപോലും സ്നേഹം കാണിക്കാനും അവർ പഠിക്കുന്നു.
യേശുവിന്റെ പഠിപ്പിക്കലുകൾ സമാധാനം കണ്ടെത്താൻ ചിലരെ സഹായിച്ചിരിക്കുന്നത് എങ്ങനെയെന്ന് അറിയാൻ “യുദ്ധങ്ങളും പോരാട്ടങ്ങളും ഉണ്ടെങ്കിലും സമാധാനം കണ്ടെത്തുന്നു” എന്ന ലേഖനം വായിക്കുക.