Isua’n Min Chhandam—Engtin Nge?
Bible chhânna
Isua’n tlanna inthawina atâna a nun a pêk khân mi rinawmte chu a chhandam a. (Matthaia 20:28) Chuvângin, Bible-in Isua chu ‘khawvêl Chhandamtu’ tiin a ko a ni. (1 Johana 4:14) Chu bâkah: “Mi dang tu ma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” tiin a sawi bawk.—Tirhkohte 4:12.
Isua chuan amaha rinna lantîrtu ‘mi tinte tân thihna a temsak’ a. (Hebrai 2:9; Johana 3:16) Chumi hnuah, “Pathianin ani chu mitthi zîng ata a kai tho leh a,” tichuan vânah thlarau thil siam angin a kîr leh a ni. (Tirhkohte 3:15) Isua chuan “amaha Pathian hnêna lo kalte chu a tâwpkhâwk thlengin a chhandam thei bawk a ni, anmahni ṭawngṭaisak tûrin chatuana a nun reng avângin.”—Hebrai 7:25.
Engvângin nge Isua’n min ṭawngṭaisak a ngaih?
Kan zain mi sual kan ni a. (Rom 3:23) Sual chuan Pathian nên min inmihrantîr a, chu chuan thihna a thlen a ni. (Rom 6:23) Mahse, Isua chu a tlanna inthawina chunga rinna lantîrtute tân “sawipuitu” a ni a. (1 Johana 2:1) Ani chuan an ṭawngṭaina ngaihthlâksak tûr leh an sualte ngaihdamsak tûrin Pathian hnênah a inthawina ṭanchhanin a dîlsak a ni. (Matthaia 1:21; Rom 8:34) Pathianin chûng Isua ṭawngṭainate chu A duh zâwng nêna a inmil avângin a chhânsak a. “Khawvêl amah avânga an dam theihna tûrin” Isua chu leiah a rawn tîr a ni.—Johana 3:17.
Chhandam kan nih theih nân Isua rin a tâwk mai em?
Tâwk mai lo. Chhandam kan nih theih nân Isua rin mai aia tam kan tih a ngai a. (Tirhkohte 16:30, 31) Bible chuan: “Thlarau tel lovin taksa chu thi a ni a, chutiang bawkin thiltih tel lovin rinna pawh chu thi a ni,” tiin a sawi. (Jakboa 2:26) Chhandam ni tûr chuan hêngte hi kan tih a ngai:
Isua leh a Pa Jehova chungchâng zir.—Johana 17:3.
An chunga rinna neih chhoh.—Johana 12:44; 14:1.
An thupêkte zâwma kan rinna lantîr. (Luka 6:46; 1 Johana 2:17) Isua chuan “Lalpa” tia amah kotu nazawng ni lovin, ‘[a] Pa vâna mi duh zâwng titute’ chauh chhandam an ni ang tih a zirtîr a ni.—Matthaia 7:21.
Harsatnate tâwk chunga pawh kan rinna lantîr zawm zêl. Isua chuan heti hian chiang takin a sawi a ni: “A tâwp thlenga tuar peih apiang chu, chu mi ngei chu chhandamin a awm ang,” tiin.—Matthaia 24:13.