Chhiartute Zawhna Siam
Jehova Thuhretute Chuan Anmahni Chauh Chhandam Ni Tûrah An Inring Em?
Jehova Thuhretute chuan sakhaw dik chhar fuh tawh niin an inhria a. Chutiangin inhre lo sela chuan, an sakhua chu an thlâk ang. Sakhaw dang vuantute ang bawkin, Jehova Thuhretute chuan chhandam nih an inbeisei ve a ni. Amaherawhchu, chhandam ni tûr leh ni lo tûrte lo sawi chu an hna niin an hre lo. A tâwpa Rorêltu ber chu Pathian a ni a. Ani’n thutâwp a siam ṭhîn a ni.—Isaia 33:22.
Pathian Thu chuan chhandam ni tûrte’n chhandam nih an duh mai bâkah, Chhamdamtu thu pawh an âwih bawk tûr a ni tih a târ lang a. Entîr nân: Tuihleuh thiam tak tuiah tla ta se la. Ani chuan ṭanpuina dawn chu a duh tak zet a ni. A thi dâwn nge, a dam khawchhuak dâwn? Chu chu ṭanpuina a dawnsawn dânah a innghat a ni. A chapona avângin, chhan chhuaktu, a nih loh leh chhandamtu ṭanpuina chu a hnâwl pawh a ni thei a. Kawng leh lamah chuan, inngaithlâwm taka ṭanpuina dawngsawngin, hmun him a thleng thei a ni.
Chutiang bawkin, chhandamna chu mihringte Chhan Chhuaktu, Pathian Jehova pêk ṭanpuina thuâwih taka pawmtute ta a ni. Chhandamna chu Pathian thilpêk a ni a; mahse, mi zawng zawng chuan an chang lo vang. Pathian Fapa, Isua chuan: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titu erawh chu an lût ang,” tiin a sawi a ni.—Matthaia 7:21.
Jehova Thuhretute chuan Isua hlan tlanna inthawina ringtute leh a zirtîrna zui tlattute chauh chu Pathianin a chhandam ang tih an ring a. (Tirhkohte 4:10-12) Pathian Thu-a târ lan chhandamna atâna thil phût pawimawh tak pathumte hi ngaihtuah ang che.
(1) Isua chuan, a ṭhiante hnênah: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti a. (Johana 13:35) Isua’n mi dangte tâna a nun a pêkna ngei pawh chuan hmangaihna a pawimawhzia a târ lang chiang hle. Mi dang hmangaihtute chuan chhandamna atâna pawimawh mizia an lantîr a ni.
(2) Isua chuan a Pa hnêna a ṭawngṭainaah: “An hnênah i hming ka hriattîr a,” a ti a. (Johana 17:26) Ani chuan Pathian hming bil, Jehova tih chu a Pa tâna a pawimawh dân a hria a ni. Isua chuan a Pa hming “zahawm,” a nih loh leh tihthianghlim ni tûrin a ṭawngṭai a. (Matthaia 6:9) Pathian hming tihthianghlimnaah chuan, chu mi hming hriat mai bâkah, pawimawh tak leh thianghlim taka cheibâwl a tel a ni. Isua angin, chhandamna zawngtute chuan Pathian hming an hman a ngai a. Mi dangte hnênah Pathian hming leh a miziate an zirtîr a ngai bawk a ni. (Matthaia 28:19, 20) Dik takin, Pathian hming lamtute chauh chu chhandam an ni ang.—Rom 10:13.
(3) Isua chuan Pontia Pilata hnênah: “Ka ram chu he khawvêla mi hi a ni lo,” tiin a sawi. (Johana 18:36) Tûn laia mi tlêm tê chauhvin, Isua Lal a nihna Pathian Ram, a nih loh leh sâwrkârna chu an ring a. A tam zâwkte chuan mihring pâwlte chu an ring a ni. Inkalh tak maiin, chhandamna chang tûrte chuan rinawm takin Pathian Ram an thlâwp a, chu Lalramin mi rinawmte a chhuah zalên dân tûr chu mi dangte an zirtîr bawk a ni.—Matthaia 4:17.
Isua zirtîrte chuan, chhandamna atâna thilphût ṭhenkhat an hriat hnuah: “Tunge chhandam ni thei ang le?,” an ti a. Isua chuan: “Mihring tih rual loh hi Pathian tih theih a ni,” tiin a chhâng a ni. (Luka 18:18-30) Jehova Thuhretute chuan hêng chhandamna atâna thilphûtte hi tlin an tum hrâm hrâm a. Chutih rual chuan, mi dangte pawh chhandam ni tûrin an ṭanpui hrâm hrâm bawk a ni. (w08 11/1)