Leilung Hi Tihchhiat A Ni Ang Em?
Bible chhânna
Ni lo vang, Leilung hi tihchhiat, meia hâlral, a nih loh leh a thara thlâk a ni ngai lo vang. Bible chuan Pathianin lei hi chatuana awm tûrin a siam tih a zirtîr a ni.
“Mi felte chuan ram hi an luah ang a, a chhûngah hian kumkhuain an awm ang.”—Sâm 37:29.
“[Pathianin] leilung nghahchhante chu a phûm a, kumkhuaa a nghîn loh nân.”—Sâm 104:5.
“Lei hi erawh chu a awm reng mai.”—Thuhriltu 1:4.
“Leilung hi dina Siamtu chu a ni; ani chuan leilung hi a tinghet a, eng mah lovah a siam lo va, mihring awm nân a din zâwk a ni.”—Isaia 45:18.
Mihringte’n leilung hi an tichhia ang em?
Pathianin leilung hi boruak bawlhhlawh te, indona te, leh thil dangtea mihringte’n an tihchhiat a phal lo vang. Chu aiin, “lei tichhetute” a tichhe zâwk ang. (Thu Puan 11:18) Chu chu engtin nge a tih ang?
Pathianin leilung vênghim thei lotu mihring sawrkârte chu vân Ram ṭha famkimin a thlâk ang a. (Daniela 2:44; Matthaia 6:9, 10) Chu Ramah chuan Pathian Fapa Isua Krista’n ro a rêl ang. (Isaia 9:6, 7) Isua’n leia a awm lai khân leilung piankente chungah a thilmak tih theihna a hmang a. (Marka 4:35-41) Pathian Rama Lal a nih angin, Isua chuan lei leh a chhûnga thil awm zawng zawngte chu a thunun ang. Ani chuan lei dinhmun chu Eden huan ang khân siam lehin leilung chu a siam ṭha, a nih loh leh a siam thar ang.—Matthaia 19:28; Luka 23:43.
Bible-in lei hi meia kâng ral tûrin a zirtîr em?
Zirtîr lo. Chutiang ngaih dân dik lo chu 2 Petera 3:7-a: “Tûnah vânte leh lei awmte hi . . . hâl tûra khêk a ni,” tih hriatthiam dân dik lo aṭanga lo awm a ni ṭhîn. Hêng thute awmzia hre thiam tûra min ṭanpuitu thil pawimawh tak pahnih lo ngaihtuah ta ila:
Bible-in “vânte,” “lei,” leh “mei” tih thu hi thil pakhat aia tam sawi nân a hmang ṭhîn. Entîr nân, Sâm 97:1 chuan: “LALPA chu lalah a ṭhu a; lei hi hlim takin awm sela; thliarkâr tam tak takte chu lâwm takin awm rawh se,” tiin a sawi a. Heta “lei” tih hian mihringte a kâwk a ni.
Petera thawn hnih 3:7 thu chuan vânte, lei, leh mei te awmzia a târ lang. Châng 5 leh 6 chuan Nova hun laia Tuilêt chungchâng a sawi a. Chutih hun laia hmânlai khawvêl chu tihchhiat a ni a; mahse, kan chênna leilung erawh a awm reng a ni. Tuilêt chuan “lei,” a nih loh leh inpâwngnêk hmang mi sualte a nuai bo va. (Genesis 6:11) Chu bâkah, “vânte” anga sawi—leia mihringte chunga rorêltu—chu a tiboral bawk. Mi suaksualte tihboral an ni, leilung erawh tihboral a ni lo. Novate chhûngkua chu khawvêl tihboralnaah an dam khawchhuak a, Tuilêt hnuah leilung hi an luah chhunzawm zêl a ni.—Genesis 8:15-18.
Tuilêtin boralna a thlen ang bawkin, 2 Petera 3:7-a târ lan meia “hâl” tih hian Leilung tihchhiatna ni lovin, suahsualna khawvêl tihboralna a thlen ang. Pathian chuan “vân tharte leh lei thar, a chhûnga felna awmte” a tiam a. (2 Petera 3:13) “Lei thar,” a nih loh leh mihring pâwl tharte chungah “vân tharte,” a nih loh leh Pathian Rama hruaitu tharte’n ro an rêl ang. Chu Lalram rorêlna hnuaiah chuan leilung hi remnaa khat paradis-ah a chang ang.—Thu Puan 21:1-4.