Isua chu sabengtung chungah chuangin Jerusalemah ropui takin a lût

Messia Chungchâng Hrilh Lâwknate Chuan Isua Chu Messia A Ni Tih A Finfiah Em?

Bible chhânna

Finfiah e. Isua chuan leia a awm laiin, “khawvêl Chhandamtua awm” tûr “Hriakthiha, Lal” chungchânga hrilh lâwkna tam tak a thlen famkimtîr a. (Daniela 9:25; 1 Johana 4:14) A thih hnuah pawh Isua chuan Messia chungchâng hrilh lâwkna tam tak a thlen famkimtîr a ni.—Sâm 110:1; Tirhkohte 2:34-36.

“Messia” tih awmzia chu eng nge ni?

Hebrai thu mal Ma·shiʹach (Messia) tih leh a tlukpui Grik thu mal Khri·stos (Krista) tih chu “Hriak Thiha” tihna a ni ve ve a. Chuvângin, “Isua Krista” tih chu “Hriak Thih Isua,” a nih loh leh “Messia Isua” tihna a ni.

Bible hun laiin, mi chu thuneihna sâng tak chelh tûra ruat a nih hunah a lu-ah hriak thih a ni ṭhîn a. (Leviticus 8:12; 1 Samuela 16:13) Isua chu Pathianin Messia, a nih loh leh thuneihna sâng tak chelh tûrin hriak a thih a. (Tirhkohte 2:36) Mahse, Isua chu hriak tak tak thih ni lovin, Pathianin thlarau thianghlimin hriak a thih a ni.—Matthaia 3:16.

Messia chungchâng hrilh lâwkna chu mi pakhat aia tamah a thleng famkim thei em?

Thei lo. Kut ziain mi pakhat nihna chauh a tichiang angin, Bible hrilh lâwknate thlen famkimna chuan Messia, a nih loh leh Krista pakhat chauh a kâwk a ni. Mahse, Bible chuan: “Krista derte leh zâwlnei derte an lo chhuak dâwn si a, chûng chuan thei ang sela thlante meuh pawh an tihder theih nân chhinchhiahna leh thilmak ropui takte an ti ang,” tiin vaukhânna thu a sawi a ni.—Matthaia 24:24.

Messia chu nakina lo la lang tûr chauh a ni em?

Ni lo. Bible chuan Messia chu Israel Lal Davida thlah aṭanga lo awm tûr a nih thu a sawi lâwk a. (Sâm 89:3, 4) Mahse, Davida thlenga Juda thlahtute chhuina lehkha chu C.E. 70-a Rom-in Jerusalem a tihchhiat khân a bo niin a lang.a Chumi hun aṭang chuan tumahin lal Davida thlah aṭangin a lo chhuak tih an finfiah thei tawh lo. Mahse, chumi nêna inkalh takin, Isua hun laia thlahtute chhuina lehkha a la awm avângin Isua chu Davida thlah aṭanga lo chhuak a nihna chu a hmêlhmate tân pawh phat theih rual a ni lo.—Matthaia 22:41-46.

Bible-ah Messia chungchâng hrilh lâwkna engzât nge awm?

Messia chungchâng hrilh lâwkna awm zât chiah chu sawi theih a ni lo va. Entîr nân, Messia chungchâng hrilh lâwkna tih chiang ngawih ngawihte pawh a zât chhiar dân chu a inang lo thei a ni. Isaia 53:2-7-ah hian Messia chungchâng hrilh lâwkna chi hrang hrang târ lan a ni a. Mi ṭhenkhat chuan he châng pum hi, hrilh lâwkna pakhat anga an chhiar laiin, mi dangte chuan hrilh lâwkna hmêlmang tinte chu a hran ṭheuh angin an chhiar pawh a ni thei a ni.

Isuaa thleng famkim Messia chungchânga hrilh lâwkna ṭhenkhat

Hrilh lâwkna	A lanna	A thlen famkimna
Abrahama thlah	Genesis 22:17, 18	Matthaia 1:1
Abrahama fapa Isaaka thlah	Genesis 17:19	Matthaia 1:2
Juda hnam aṭangin Israel mi niin a lo piang	Genesis 49:10	Matthaia 1:1, 3
Lal Davida thlah	Isaia 9:7	Matthaia 1:1
Nula thianghlim hrin	Isaia 7:14	Matthaia 1:18, 22, 23
Bethlehem-ah a piang	Mika 5:2	Matthaia 2:1, 5, 6
Immanuela tia hming sakb	Isaia 7:14	Matthaia 1:21-23
Bul ṭanna tlâwm tak	Isaia 53:2	Luka 2:7
A pian hnua naupangte tihhlum	Jeremia 31:15	Matthaia 2:16-18
Aigupta aṭanga koh chhuah	Hosea 11:1	Matthaia 2:13-15
Nazaret mi tia kohc	Isaia 11:1	Matthaia 2:23
A hmaah tirhkoh tirh a ni	Malakia 3:1	Matthaia 11:7-10
C.E. 29-ah Messia anga hriak thihd	Daniela 9:25	Matthaia 3:13-17
Pathianin A Fapa a nihzia a nemnghet	Sâm 2:7	Tirhkohte 13:33, 34
Pathian in tâna ṭhahnemngaihna	Sâm 69:9	Johana 2:13-17
Chanchin ṭha puangtu	Isaia 61:1	Luka 4:16-21
Galili rama êng nasa tak	Isaia 9:1, 2	Matthaia 4:13-16
Mosia anga thil mak titu	Deuteronomy 18:15	Tirhkohte 2:22
Mosia angin Pathian ngaihtuahnate a sawi	Deuteronomy 18:18, 19	Johana 12:49
Dam lo tam tak a tidam	Isaia 53:4	Matthaia 8:16, 17
Mi ngaihsakna lâk a tum lo	Isaia 42:2	Matthaia 12:17, 19
Pachhiate chungah khawngaihna a lantîr	Isaia 42:3	Matthaia 12:9-20; Marka 6:34
Pathian rorêlna dik a puang	Isaia 42:1, 4	Matthaia 12:17-20
Maka, Remruattua	Isaia 9:6, 7	Johana 6:68
Jehova hming a puang	Sâm 22:22	Johana 17:6
Tehkhin thuin a kâ a âng	Sâm 78:2	Matthaia 13:34, 35
Hruaitu	Daniela 9:25	Matthaia 23:10
Mi tam takin amah an ring lo	Isaia 53:1	Johana 12:37, 38
Tlûkna lung	Isaia 8:14, 15	Matthaia 21:42-44
Mite’n an hnâwl	Sâm 118:22, 23	Tirhkohte 4:10, 11
Chhan awm lovin an hua	Sâm 69:4	Johana 15:24, 25
Sabengtung chungah chuangin Jerusalemah ropui takin a lût	Zakaria 9:9	Matthaia 21:4-9
Naupangte’n an fak	Sâm 8:2	Matthaia 21:15, 16
Jehova hmingin a lo kal	Sâm 118:26	Johana 12:12, 13
A ṭhian rin takin a phatsan	Sâm 41:9	Johana 13:18
Tangka 30-a hralh a nie	Zakaria 11:12, 13	Matthaia 26:14-16; 27:3-10
A ṭhiante’n an thlahthlam	Zakaria 13:7	Matthaia 26:31, 56
Hretu derte’n dik lo takin an puh	Sâm 35:11	Matthaia 26:59-61
Hêktute hmaah a ngawi reng	Isaia 53:7	Matthaia 27:12-14
Chil an chhâk	Isaia 50:6	Matthaia 26:67, 68; 27:27, 30
A lu-ah an vua	Mika 5:1	Marka 15:19
Vuak a ni	Isaia 50:6	Johana 19:1
Amah vawtute a bei lêt lo	Isaia 50:6	Johana 18:22, 23
Thuneitute’n amah an phiar	Sâm 2:2	Luka 23:10-12
Banah a kut leh kea khen a ni	Sâm 22:16	Matthaia 27:35; Johana 20:25
A kawr atân ṭhum an vâwr	Sâm 22:18	Johana 19:23, 24
Bawhchhetute zînga chhiar a ni	Isaia 53:12	Matthaia 27:38
Nuihsawh, leh hmuhsit a ni	Sâm 22:7, 8	Matthaia 27:39-43
Mi sualte tân a tuar	Isaia 53:5, 6	1 Petera 2:23-25
Pathianin a kalsan angin a lang	Sâm 22:1	Marka 15:34
In tûr uain leh eng lo khâ pawlh an pe	Sâm 69:21	Matthaia 27:34
A thih hmain a tui a hâl	Sâm 22:15	Johana 19:28, 29
Pathian hnênah a thlarau a kawltîr	Sâm 31:5	Luka 23:46
A nunna a hlân	Isaia 53:12	Marka 15:37
Sual nuai bo nân tlanna a pe	Isaia 53:12	Matthaia 20:28
A ruhte tihtliah a ni lo	Sâm 34:20	Johana 19:31-33, 36
Chhun a ni	Zakaria 12:10	Johana 19:33-35, 37
Mi hausa thlâna phûm a ni	Isaia 53:9	Matthaia 27:57-60
Thihna ata kaihthawh a ni	Sâm 16:10	Tirhkohte 2:29-31
Phatsantu thlâk a ni	Sâm 109:8	Tirhkohte 1:15-20
Pathian ding lamah a ṭhu	Sâm 110:1	Tirhkohte 2:34-36

a McClintock and Strong’s Cyclopedia lehkhabu chuan: “Juda hnamte leh an chhûngkuate hming ziakna lehkha chu Jerusalem tihchhiat a nih khân a bo a ni tih rinhlelhna tûr a awm meuh lo. Chumi hma thleng chuan a la awm ngei si a,” tiin a sawi.

b Hebrai hming Immanuela tih hi “Kan Hnêna Pathian Awm,” tihna a ni a, hei hian Messia anga Isua chanvo a târ lang chiang hle. Leia a rawn kalna leh a hnathawhte chuan Pathian chu Amah betute hnênah a awm tih a nemnghet a ni.—Luka 2:27-32; 7:12-16.

c “Nazaret” tih hi Hebrai thu mal neʹtser tih aṭanga lo kal a ni a, a awmzia chu “chawrno” tihna a ni

d Messia lo lan hun C.E. 29 a ni tih kâwktu Bible hun chhuina chipchiar zâwka hriat nân, “Daniela Hrilh Lâwknain Messia Lo Lan Hun Tûr A Sawi Lâwk Dân,” tih thuziak en rawh

e He hrilh lâwkna hi Zakaria bua mi a ni a; mahse, Bible ziaktu Matthaia chuan ‘zâwlnei Jeremia sawi’ niin a târ lang a ni. (Matthaia 27:9, 10) ‘Zâwlnei Lehkhabute’ tia koh Pathian Lehkha Thu-ah Jeremia bu hi a hmasa berah dah châng a awm niin a lang. (Luka 24:44) Matthaia’n ‘Jeremia sawi’ anga a târ lan hian Zakaria bu telna zâwlnei lehkhabu infinkhâwm zawng zawng a sawina a nih ngei a rinawm.