Baptisma Chang Tûrin Hma La Zawm Zêl Rawh

1. (a) Baptisma channa kan hlâwkpui dân kawng ṭhenkhat chu eng nge ni? (b) He thuziakah hian eng nge kan sawiho vang?

JEHOVA hnênah inpumpêkin, i inpumpêkna chu tuia baptisma channa hmangin i lantîr tawh em? I lantîr tawh a nih chuan, Pathian hnênah chhia leh ṭha hriatna thiang tak nei tûrin i dîl tawh tihna a ni a. (1 Pet. 3:21) Chutianga hma lain, ṭhalai unaute leh kohhran rawn bêl mi tharte tân entawn tûr ṭha i siam a ni. Chu chu thu tlûkna fing tak a va ni êm! A nih leh, baptisma i la chang lo a nih chuan engtin nge ni ang? Jehova i hmangaihin a duh zâwng tih chu i duh ngei ang a. Baptisma channa chu i sualte ngaihdam ni tûr leh Jehova duhsakna dawng tûra rahbi pawimawh tak a ni tih i hre bawk. (Tirh. 2:38-40) Chuti chung chuan, i la hreh cheu pawh a ni thei a ni. Engin nge ṭanpui thei che? He thuziakah hian, (1) mi ṭhenkhatte’n baptisma chan an hreh chhan, (2) tâwpna hun rilrua vawn reng a finthlâk chhan leh, (3) vuaicha lova baptisma chang tûra hma lâkna i hlâwkpui dân tûrte sawiho a ni ang.

MI ṬHENKHAT AN HREH CHHAN

2. Engvângin nge mi ṭhenkhatin baptisma chan an hreh?

² Mi ṭhenkhat chuan hlauhna avângin baptisma chan an hreh a. Entîr nân, Jehova rawngbâwl chu duh mah se, amah an tih lâwm theih loh an hlau a ni. Chutianga i awm a nih chuan, Jehova’n ṭha famkim tûrin a beisei lo che tih leh i neih ṭha ber i pêk chuan i biakna chu a pawm ang tih rinnghehtîr theitu che Bible chângte chu ngaihtuah nawn ang che. (Sâm 103:13, 14; Kol. 3:23) Dodâlna tawh i hlau a nih chuan: “LALPA chu ka lama ṭang a ni; ka hlau lo vang. Mihringin eng nge mi tih theih ang,” tia sawitu fakna hla phuahtu neih ang rinnghehna nei tûrin Jehova hnênah ṭanpuina dîl ang che.—Sâm 118:6.

3. Eng ngaih dânin nge mi ṭhenkhat chu baptisma chang tûra hrehna neihtîr? ( milem en rawh.)

³ Jehova hmangaihtu mi ṭhenkhat chuan hriatna nei tam tâwk lo nia an inngaih avângin baptisma chan an hreh a. A nih leh, engtianga tam nge i hriat ngai? Bible-a he chanchin hi han ngaihtuah teh. Lîrnghîngin tirhkoh Paula leh Silate awmna tân in a sâwi nghîn hnu chuan, anni chuan tân in vêngtu leh a chhûngte chu thu an hrilh a. Tân in vêngtu leh a chhûngte chuan chu thil mak thleng chu an hriat ngei a rinawm. Chu bâkah, chumi zân chuan Jehova leh Isua chungchânga zirtîrna pawimawh dangte pawh an zir belh a. Chuvângin, an thinlung chêttîra awmin, “baptisma an chang ta nghâl a.” (Tirh. 16:25-33) Jehova i hriat a, thinlung zawng zawnga i hmangaih a, Bible zirtîrna bulpuite i hriat tawh a, i sualte i sim tawh bâkah, Pathian tehnate mila nun i tum tlat tawh a nih chuan, baptisma chang tûrin i inpeih tawh tihna a ni.—Mk. 12:30.

4. Mi ṭhenkhatin baptisma chang tûra hrehna an neih chhan dang leh chu eng nge ni? (Milem en bawk rawh.)

⁴ Mi ṭhenkhat chuan Pathian ti lâwm tûr leh baptisma chang thei tûra inthlâk danglamna an siam ngaite chu harsa lutuk niin an ngai a. Ni e, kan thu tlûkna siamin kan nuna nghawng a neih dân tûr ngaihtuah lâwk chu a finthlâk ngei mai. (Lk. 14:27-30) Mahse, mi ṭhenkhat chuan Pathian rawngbâwl tûra an chân ngaite ngaihtuahin lungkhamna an nei a ni. A naupan laia thutak lo hre ṭhîn, Candace-i chu a rawn puitlin hnua Bible a han zir leh chuan chutiang chuan a awm a. Ani chuan: “Jehova tâna ka tih ngaite chu hre mah ila, tûna ka nun dân chu nuam ka tih êm avângin hma lâk ka hreh a ni. Ka nun dân thlâk danglam chu a awlsam dâwn lo tih ka hria,” tiin a sawi. Mi dang lehte chuan baptisma changte tâna nungchang lama tehna sâng takte mila nun chu an huphurh a. Baptisma an chan hnuah, sual lian tak ti a, kohhran aṭanga chhuahtîr an nih an hlau a ni. Chutiang hlauhnate’n hma lâk a hrehtîr che a nih chuan, eng nge i tih theih?

5. Baptisma kan chan dâwn leh dâwn loh kan ngaihtuah hunah eng nge kan ngaihven tlat ang? (Matthaia 13:44-46)

⁵ Thil eng emaw lei kan duh hian, a sênso zât tûr chauh ni lovin, a hlutna pawh kan ngaihtuah tel ṭhîn a. Kan thil lei hlutna chu a sênso zât aia a tam zâwk a nih chuan, kan lei nghâl vat ṭhîn a ni. Chutiang bawkin, baptisma kan chan dâwn leh dâwn loh kan ngaihtuah hian, inthlâk danglamna kan siam ngaite chauh ni lovin, Jehova nêna inlaichînna ṭha neih a hlutzia pawh kan chhût tel tûr a ni a. Chumi pawimawhzia târ lan nân Isua’n tehkhin thu pahnih a hmang a ni. (Matthaia 13:44-46 chhiar rawh.) A tehkhin thu-ahte chuan, mi pakhatin, a thil hlu tak hmuh chhuah chu a lei theih nân a neih zawng zawng chu lâwm takin a hralh a. Nang pawh, chutianga thil hlu tak, Lalram chungchânga thutak chu i hmu tawh a ni. Thutak mila nun chu a hlâwkthlâk tak tak leh tak tak loh i chiang lo a nih chuan, Isua tehkhin thute chu ngun takin ngaihtuah ang che. Heti hian i inzâwt thei a ni: ‘Ka thil hmuh hi a hlu tak zet tih ka chiang em? Jehova nêna ka inlaichînna, beiseina min pêk leh, hmangaihna nei tak unaute nêna kan inpumkhatna hi ka ngaihlu tak zet em?’ tiin. I chhân dân azirin, thutak i ngaihhlutna ti pung tûrin hma i la thei a, a nih loh leh i thu hriatte nunpui tûra hma lâk hrehtîrtu che chu hmuh chhuah i tum thei a ni.

6. Engtin nge thinlung ṭha kan neih theih ang?

⁶ Buh chi thehtu tehkhin thu-ah, Isua chuan thlarau lam hmasâwnna dâl theitu thinlung dinhmunte a târ lang a. Chutih rualin, mi ṭhenkhatin Lalram thuchah chu “thinlung ṭha tak pu-a” ngaithlain, an chhâng lêt dâwn tih a sawi bawk. (Lk. 8:5-15) Thinlung sakhat nei lo nia i inhria a nih chuan, beidawng mai lo la. Pathian ṭanpuinain, a kaihhruaina chhâng lêt theitu “thinlung thar” i nei thei a ni. I nunah Lalram thutak a rah chhuah theih nân, i thinlung tih nêmsak tûr chein Jehova hnênah ṭawngṭaiin ṭanpuina dîl ang che.—Ezek. 18:31; 36:26.

7-8. Engvângin nge ṭhalai ṭhenkhat chu thlarau lama hma an sâwn theih loh? (Milem en bawk rawh.)

⁷ Jehova hmangaihtu ṭhalai ṭhenkhat chu mi dangte thununna avângin baptisma chang tûr khawpin hma an sâwn thei lo va. Entîr nân, school zirtîrtu ṭhenkhat chuan zirlaite chu Pathian tehnate nêna inkalh nungchang lama tehnate pawm tûra “rilru inhawng tak” ni tûrin thurâwn an pe mai thei a ni. Mahse, chutiang thurâwnte chuan buaina lian tak a thlen thei a. (Sâm 1:1, 2; Thuf. 7:1-5) Jehova hnêna: “Min zirtîrtu zawng zawng aiin finna ka nei zâwk a ni, I thuhriattîrte hi ka ngaihtuah a nih ṭhin avângin,” tia sawitu fakna hla phuahtu entawn tûr siam zuina hmangin, chûng dinhmun hlauhawmte chu i pumpelh thei a ni.—Sâm 119:99.

⁸ Thuhretu nu leh pa ṭhenkhat chuan an fate chu baptisma an channa tûrah harsatna an siam niin a lang a. Anni chuan an fate zirna leh eizawnna ringawt an ngaihtuah, a nih loh leh an fate tân thlarau lam thiltum an siamsak lo a ni. A nih leh, thlarau lama hmasâwn lehzual tûrin i nu leh pate’n tûn aia nasain an ṭanpui thei che nia i hria a nih chuan engtin nge ni ang? Engvângin nge chumi chungchâng chu i nu leh pate i sawipui loh vang? Jehova nêna inlaichînna ṭha siam tûrin i kum zât chu a pawimawh lo tih i chiang thei a ni.—Thuf. 20:11.

9. Engvângin nge mi ṭhenkhatin baptisma an chan duh lawk loh?

⁹ Baptisma chang tûra tling tawh mi ṭhenkhat chu chanpui tûr tu emaw an nghah avâng maia la chang rih lo an ni thei a. Entîr nân, an ṭhian ṭha tu emaw, a nih loh leh an hmangaih tak tu emaw nêna chan tlân chu an beisei a ni thei a ni. Ni e, i ṭhian ṭhate nên baptisma in chang tlâng thei ngei mai. Mahse, chan tlân i duh avâng maiin la chang rih lovin i awm tûr a ni em? Pathian hnêna i inpumpêkna chu mi mal taka i siam tûr thutiam a ni tih hre reng ang che. Chuvângin, baptisma i channa chu tu emaw thil tihah a innghat tûr a ni lo.—Rom 14:12.

TAWPNA HUN RILRUA VAWN RENG A PAWIMAWH CHHAN

10. Engvângin nge mi ṭhenkhat chu thlarau lama hmasâwn tûra ṭan an lâk duh lawk loh mai theih?

¹⁰ A chunga târ lan tâk chhante bâkah, mi ṭhenkhat chuan tâwpna chu a la thleng mai dâwn lo nia an ngaih avângin thlarau lama hmasâwn tûrin ṭan an la duh lawk lo thei a. Mahse, chutiang ngaih dân chu a finthlâk em? Isua’n a zirtîrte chu: “Inring rengin awm rawh u, in rin loh hunah mihring Fapa hi a lo kal dâwn si a,” tiin a vaukhân a ni.—Lk. 12:40.

11. Sâm 119:60-a sawi angin, Jehova kan rawn hriat chian hian, a thupêkte chu engtin nge kan thlîr?

¹¹ Jehova hnêna kan inpumpêkna chu hmangaihna chêttîrna avâng a ni tûr a ni a. Hmangaihna Pathian chu kan hriat chian poh leh, a thupêkte ngaina tûr leh chûngte chu kan hriat phat aṭanga zâwm nghâl tûra chêttîrin kan awm lehzual ang. (Sâm 119:60 chhiar rawh.) Zirtîr Jakoba chuan Jehova thupêkte kan zawm nghâl vatna tûr chhan dang pawh a sawi a: Naktûkah eng nge lo thleng dâwn tih tu mahin kan hre lo tih hi. ‘Thil dik ti tûrin’ ni khat dang kan dam tawh lo pawh a ni thei a, chuvângin, kan thu hriatte chu tûnah kan nunpui nghâl tûr a ni.—Jak. 4:13-17.

12. Isua sawi grêp huan neitu tehkhin thu aṭangin eng nge kan zir theih?

¹² Isua sawi grêp huan neitu tehkhin thu kha han ngaihtuah teh. Mi ṭhenkhat chuan dârkâr khat chauh thawk mah se, ni lênga thawkte nên an hlawh zât a inang reng tih min zirtîr a ni lâwm ni? Chu chu a dik a ni. Mahse, dârkâr khat chauh thawktute’n hma taka hna an thawh ṭan loh chhan kha chhinchhiah ang che. “Tu man min rawih loh vâng a ni,” tiin an sawi a. Anni chu mi thatchhia an ni lo, ruaitu an hmuh loh avâng maia ni lênga thawk lo kha an ni a. Rawih an nih veleh, hna an thawk ṭan nghâl a nih kha. (Mt. 20:1-16) Tûn laiah pawh, Isua’n a zirtîrte ni tûr leh Lalram rawngbâwlnaa tel tûrin min sâwm ṭheuh va. A sâwmna kan hriat veleh, kan chhâng lêt nghâl tûr a ni.

13. Lota nupui hnên aṭangin eng nge kan zir theih?

¹³ Thlarau lama hmasâwn tûra ṭan la lawk duh lote chuan tâwpna thlen hma lawka Pathian tih lâwm tum chu a harsa hle tih an la hria ang. Isua chuan a zirtîrte chu: “Lota nupui hre reng rawh u,” tiin a vaukhân a. (Lk. 17:31-35) Lota nupui chuan Sodom leh Gomorra khaw chunga Pathian rorêlna chu a lo thleng mai tawh dâwn tih chiang takin a hria a; mahse, a kalsan tâk thilte a ngainatna chu a thlah thei lo niin a lang. (Gen. 19:23-26) A thiltawn chuan chhandamna kawngka chu chatuanin a inhawng reng dâwn lo tih min hriat nawntîr a ni. Pathian hun ruatah, chu kawngka chu khâr a ni ang a, hawn leh a ni ngai tawh lo vang.—Lk. 13:24, 25.

14. Engvângin nge Bible hrilh lâwknate thlen famkimna chu i ngaihven tlat ang?

¹⁴ Hunte a liam zêl rual hian, khawvêla thilthlengte chuan he kalhmang tâwp hun tûr chungchânga Bible hrilh lâwknate chu a thlen famkimtîr a. Chûng thilthlengte chuan mi mal taka a nghawng lo che a nih pawhin, hmun hrang hranga thilthleng mêkte i hmuhna chuan baptisma chang tûra hma lâk a hmanhmawhthlâkzia a hriattîr ngei ang che. Kum zabi khatnaa thilthleng kha han ngaihtuah teh. Tirhkoh Petera chuan Kristiante chu ‘thil zawng zawng tâwpna a hnaih tawh” avângin “inpeih,” a nih loh leh “harhvâng” taka awm tûrin a fuih a. (1 Pet. 4:7.) Chu “tâwpna” chu Judate kalhmang tâwpna a ni tih a chiang a ni. Petera lehkhathawn chhiartute chu Jerusalem aṭanga hmun hla taka awmte an nih avângin, chu khawpui tih chhiatna chuan mi mal takin anni chu a nghawng dâwn lo va. (1 Pet. 1:1) Mahse, chu hrilh lâwkna chu a thleng famkim tih an hmuh chuan, Jehova thutiam dangte chunga an rinna chu a nghet lehzual sauh ngei ang. Chutiang bawkin, tâwpna lo thleng tûr nêna inkûngkaih hrilh lâwknate a thleng famkim mêk tih i hmuh chuan baptisma chang tûra i thiltum chu hlen tûra chêttîrin i awm ngei ang.

15. Engtin nge Jehova nî atân kan inbuatsaih theih ang? (2 Petera 3:10-13)

¹⁵ Thlarauva thâwk khum a lehkhathawn pahnihnaah, Petera chuan Jehova rorêlna nî lo thlen hun tûr chungchânga kan rilru put hmang tûr chu a sawi a. Kum zabi khatnaa Kristiante tân, chu nî chu lo thleng nghâl mai tûr ni lo mah se, Petera chuan chu nî chu “theihnghilh” lo tûrin, a nih loh leh “thlahlel” tûrin a hrilh a ni. (2 Petera 3:10-13 chhiar rawh.) Keini pawh, chu nî lo thleng tûr atâna inpeih reng leh thlahlel taka awmin, harhvâng takin kan awm tûr a ni. ‘Thianghlim taka nung a, Pathian ngaihsak mi nihna’ hmangin chumi nî kan thlâkhlelhzia kan lantîr tûr a ni a. ‘Pathian ngaihsak mi kan nihzia thil tihin’ kan lantîr tih Jehova’n a hmuh huna a lâwm dân tûr chu han ngaihtuah teh. A hnêna inpumpêk a, baptisma i chang a hmuh huna a hlim dân tûrzia mai chu!

TUN AṬANGA HMA LAK A HLAWKNATE

16. Baptisma chang tûra hma lâk hun ṭha ber chu eng nge ni? (2 Korinth 6:1, 2) (Milem en bawk rawh.)

¹⁶ Baptisma chang tûra hma lâkna hun ṭha ber chu tûn hi a ni. (2 Korinth 6:1, 2 chhiar rawh.) Philipa tawh Ethiopia mi tilreh chuan hma lâk vat a hmanhmawhthlâkzia a hria a. Ani chuan chanchin ṭha a hriat a, baptisma channa hun remchâng a neih khân: ‘Chanchin ṭha hi ka’n zir belh phawt ang e. Kan kal zêlna kawngah baptisma channa tûr tui a la awm êm ang chu,’ tiin a inngaihtuah lo. Chu aiin, Philipa hnênah, “Baptisma ka channa tûr engin nge mi dâl?” tiin a zâwt zâwk a ni. (Tirh. 8:26, 27, 35-39) Entawn tûr ṭha a va ni êm! Baptisma a chan zawh chuan, ani chu “lâwm takin a kal zêl a,” tiin kan chhiar a ni.

17. Eng nge kan chian theih?

¹⁷ Baptisma chan i hreh a nih chuan, Jehova’n amah nêna inlaichînna ṭha nei tûrin ṭanpui che a duh tih i chiang thei a. (Rom 2:4) Ani chuan i hmasâwnna dâl theitu i hlauhna te, lungkhamna te leh, mi dangte thununnate hneh tûrin a ṭanpui thei che a ni. Baptisma channa hmanga Pathian hmaa chhia leh ṭha hriatna thiang i neih tawh chuan, i “hnung lama thil awmte” chu i tân a pawimawh tawh lo tih i hriat ngei a rinawm. (Phil. 3:8, 13) Pathian hnêna inpumpêk tawh baptisma changte tâna Jehova thutiamte thlen famkimna, “hma lama thil awmte” chu i beisei tlat thei a ni.—Tirh. 3:19.