Vuaicha Lovin Baptisma Chang Rawh

1. Baptisma chan nachhan tûr ṭha ṭhenkhatte chu engte nge ni?

I NUNNA pawh tiamin thilpêk ṭha zawng zawng petu che Pathian Jehova chu i hmangaih em? Amah i hmangaih tih lantîr i duh em? Chutianga tih theih dân kawng ṭha ber chu a hnêna inpumpêk a, tuia baptisma changin i inpumpêkna lantîr hi a ni. Chûng rahbite i rah chuan Jehova chhûngkaw zînga mi i rawn ni ang a. Tichuan, a ta i nih tawh avângin i Pa leh i Ṭhian chuan a kaihruai chein a ngaihsak ang che. (Sâm 73:24; Is. 43:1, 2) Chu bâkah, inpumpêkna leh baptisma channa chuan chatuana nun beiseina a pe bawk ang che.—1 Pet. 3:21.

2. He thuziakah hian eng nge kan sawiho vang?

² Baptisma i channa tûr dâltu che i nei em? I nei a nih chuan, nangmah chauh i ni lo. Mi maktaduai tam takte pawhin baptisma chang thei tûrin an nungchang leh ngaihtuah dânte an lo thlâk danglam tawh a. Tûnah chuan hlim tak leh ṭhahnemngai takin Pathian rawng an bâwl tawh a ni. Kum zabi khatnaa baptisma chang mi ṭhenkhatte hnên aṭangin eng nge i zir theih? An harsatna tawhte chu ngaihtuahin an entawn tûr siam aṭanga kan zir theihte chu i lo sawiho vang u.

SAMARI MITE’N BAPTISMA AN CHANG

3. Samari mi ṭhenkhat chuan baptisma chang tûrin eng harsatnate nge an tawh mai theih?

³ Isua hun laia Samari mite chu Judai ram hmâr lama awm, hmân lai Sekem leh Samari khuatea chêng sakhaw pâwl pakhat vuantute an ni a. Baptisma an chan hmain, Pathian Thu hriatna tam lehzual an neih a ngai a ni. Anni chuan Bible bu hmasa panga—Genesis aṭanga Deuteronomy—leh Josua bute chauh chu Pathian thâwk khum angin an pawm a. Chutih rualin, Deuteronomy 18:18, 19-a Pathian thutiam ṭanchhanin Messia chu lo kal tûrin an beisei a ni. (Joh. 4:25) Chuvângin, baptisma chang thei tûr chuan Isua chu thutiam Messia a ni tih an pawm a ngai a ni. “Samari mi tam tak chuan” Isua chu an pawm a. (Joh. 4:39, NWT) An zînga mi tam tak chuan Samari mite leh Juda mite inkâra intuh nghet tawh inpâwng huatna chu an hneh a ngai pawh a ni thei.—Lk. 9:52-54.

4. Tirhkohte 8:5, 6, 14-a sawi angin, Samari mi ṭhenkhatin Philipa thu hrilhna chu engtin nge an chhân lêt?

⁴ Samari mite chu baptisma chang tûrin engin nge ṭanpui? Chanchin ṭha hriltu Philipa’n “Krista chanchin” an hnêna a hrilh chuan, Samari mi ṭhenkhatin ‘Pathian thu chu an pawm a ni.’ (Tirhkohte 8:5, 6, 14 chhiar rawh.) Philipa chu Juda mi ni mah se, a thusawite an lo ngaithla a. Pathianin thlei bîk a neih lohzia Bible bu hmasa pangatea inziak chu an hre chhuak pawh a ni thei. (Deut. 10:17-19) A chhan chu eng pawh ni se, “Philipa thusawi chu . . . an ngaithla a,” Pathianin a tîr tih finfiahna chiang takte chu an hmu a. Philipa chuan dam lote tidam a, ramhuaite hnawt chhuakin thil mak tam tak a ti bawk a ni.—Tirh. 8:7, NWT.

5. Samari mite hnên aṭangin eng nge i zir theih?

⁵ Chûng Samari mite chuan inpâwng huatna emaw, hriatna tlâkchhamna emaw chu an hmasâwnna tûr indâltîr nân an hmang thei a. Mahse, chutiang chuan an indâltîr lo. Philipa’n thutak a zirtîr tih an rin ngheh hnu chuan baptisma chang tûrin an vuaicha lo. Bible chuan: “Pathian Ram chanchin ṭha leh Isua Krista hming puangtu Philipa an rin hnu chuan, a hmei a pain baptisma an chang ta a,” tiin a sawi a ni. (Tirh. 8:12, NWT) A nih leh, Bible hi thutak a ni tih leh Jehova Thuhretute chuan inpâwng huatna chu hnehin hmangaihna dik tak—Kristian dikte chhinchhiahna—chu an inlantîr tawn tih i ring tlat em? (Joh. 13:35) I ring a nih chuan, Jehova’n mal a sâwm ang che tih ring nghet tlatin hma la vat ang che.

6. Engtin nge Ruben-a entawn tûr siam chu i hlâwkpui theih?

⁶ Germany rama awm Ruben-a chu Thuhretu chhûngkuaa seilian a ni a. Mahse, a tleirâwl chhoh chuan Pathian a awm tih a ringhlel ṭan a ni. Engtin nge a rinhlelhna chu a paih bo? Chumi chungchânga hriatna a tlachham tih a inhriat avângin zir belh a tum ta a. “Ka mi mal inzirnaahte chuan rinhlelhna ka neihte chu ka zir chian a ngai a. Chanchhâwnna chungchâng chu ka zir nawn fo a ni,” tiin a sawi. Is There a Creator Who Cares About You? tih lehkhabu chu a chhiar a. Chu lehkhabu chuan a chungah nghawng nasa tak a nei a ni. ‘Ehe! Pathian Jehova hi a awm tak tak a nih hi,’ tiin a inngaihtuah a. Chu bâkah, world headquarters a tlawh chuan khawvêl pum huapa kan inunauna chu a ngaihlu lehzual a. Tichuan, Germany-a a kîr leh chuan kum 17 mi niin baptisma a chang ta a ni. I thu zir tawhte chungchângah rinhlelhna i nei a nih chuan, kan thu leh hla chhuahte aṭangin zir bingna nei ang che. Rinhlelhna chu ‘hriatna dik tak’ hmanga paih bo theih a ni. (Eph. 4:11-14) Chu bâkah, khawvêl hmun danga Jehova Thuhretute inkâra awm hmangaihna leh inlungrualna chanchin i hriat a, i awmna kohhran ngeia i hmuh bawk chuan, khawvêl pum huapa kan inunauna chu i ngaihlu lehzual ngei ang.

TARSA KHAW MI SAULA’N BAPTISMA A CHANG

7. Saula chuan eng ngaih dân dik lo nge a thlâk danglam ngai?

⁷ Tarsa khaw mi Saula chanchin hi lo ngaihtuah ta ila. Juda dân hre tak leh Juda mite zînga challang tak a ni a. (Gal. 1:13, 14; Phil. 3:5) Chûng hun lai chuan, Juda mite chuan Kristiante chu kalpêng angin an en a. Chuvângin, Saula chuan nasa takin a tiduhdah a ni. Pathian duh zâwng ti angah a inngai a. (Tirh. 8:3; 9:1, 2; 26:9-11) Isua pawm a, Kristian anga baptisma chang tûr chuan amah ngeiin tihduhdahna tawrh a inhuam a ngai a ni.

8. (a) Saula chu engin nge baptisma chang tûra ṭanpui? (b)Tirhkohte 22:12-16-a sawi angin, Anania’n Saula chu eng ti tûrin nge a ṭanpui? (Milem en bawk rawh.)

⁸ Engin nge Saula chu baptisma chang tûra ṭanpui? Chawimawia awm Lalpa Isua a hnêna a inlâr chuan a mit a del ta a. (Tirh. 9:3-9) Ni thum chaw a nghei chhûngin, a thiltawn chu chiang taka a ngaihtuah a rinawm. Ni e, Saula chuan Isua chu Messia a ni tih leh a hnungzuitute chu sakhaw dikah an awm tih a ring nghet ta a ni. Stephena tihhlum remtitute zînga a tel ve avângin hrehawm a ti hle ngei ang! (Tirh. 22:20) Ni thum hnuah chuan, zirtîr Anania chu Paula hnêna rawn kalin a mit a tihvârsak a, vuaicha lova baptisma chang tûrin a fuih a. (Tirhkohte 22:12-16 chhiar rawh.) Saula chuan ṭanpuina chu inngaitlâwm taka pawmin baptisma a chang a ni.—Tirh. 9:17, 18.

9. Saula hnên aṭangin eng nge i zir theih?

⁹ Saula hnên aṭangin zir tûr tam tak kan nei a. Chapona emaw, mihring hlauhna emaw chu baptisma chang lo tûrin a indâltîr thei a ni. Mahse, chutiang chuan a indâltîr lo. Krista chungchânga thutak a pawm chuan inngaitlâwm takin a inthlâk danglam a. (Tirh. 26:14, 19) Tihduhdahna a tuar dâwn tih hre mah se, Kristian nih a inhuam a. (Tirh. 9:15, 16; 20:22, 23) Baptisma a chan hnuah pawh, fiahna hrang hrang hmachhawn thei tûrin Jehova a rinchhan zawm zêl a ni. (2 Kor. 4:7-10) Jehova Thuhretu nia baptisma i chan hian rinna fiahna emaw, harsatna emaw i tâwk thei a; mahse, Pathian leh Krista’n an ṭanpui ang che tih i ring nghet tlat thei a ni.—Phil. 4:13.

10. Anna-i entawn tûr siam chu engtin nge i hlâwkpui theih?

¹⁰ Anna-i chu Eastern Europe-a awm Kurdish chhûngkuaa seilian a ni a. A nu baptisma chan hnuah, kum 9 mi a nihin, a pa phalnain Bible a zir ṭan a. Mahse, Anna-i chênpui a chhûngte chuan an dodâl a. Anni chuan pi leh pute sakhaw vawn chhuahsan chu thil zahthlâkah an ngai a ni. Anna-i kum 12 mi a nih chuan baptisma chang tûrin a pa hnênah phalna a dîl a. A pa chuan chu chu a mi mal thu tlûkna nge ni a, tu emaw nawr luihna vâng zâwk tih a lo zâwt a. Anna-i chuan: “Jehova ka hmangaih vâng a ni,” tiin a chhâng a. Tichuan, a pa chuan baptisma a chan chu a remti ta a ni. Chumi hnu aṭang chuan, nuihsawhna leh ṭha lo taka cheibâwlna chi hrang hrang a hmachhawn a. A pu chuan: “Jehova Thuhretu nih ai chuan bawlhhlawh taka nun a, zûk leh hmuam tih pawh a ṭha daih zâwk,” tiin a hrilh hial a ni. Engtin nge Anna-i chuan a tawrh chhuah? Ani chuan: “Pathian Jehova’n chakna min pe a, ka nu leh pate pawhin min thlâwp hle bawk,” tiin a sawi. A nuna Jehova ṭanpuina a dawn hunte chu a chhinchhiah thlap a. Tichuan, Jehova ṭanpuina a dawnte chu a theihngilh loh nân a en nawn leh ṭhîn a ni. Nang pawhin tihduhdahna tawrh i hlauh chuan Jehova’n a ṭanpui ang che tih i hre reng thei a ni.—Heb. 13:6.

KORNELIA’N BAPTISMA A CHANG

11. Kornelia chuan baptisma chan hreh nachhan tûr engte nge a neih?

¹¹ Bible chuan Kornelia chungchâng pawh a târ lang a. Ani chu Rom sipai pâwla “sipai za hotu a ni.” (Tirh. 10:1, NWT) Chuvângin, khawtlângah leh sipai rual zînga mi challang tak a nih hmêl a. “Mite hnênah khawngaih thilthlâwn pêk tam tak a pe ṭhîn” a ni. (Tirh. 10:2, NWT) Pathianin a hnêna chanchin ṭha hril tûrin tirhkoh Petera chu a tîr a. A nihna chelh avângin Kornelia chuan baptisma chan chu a hreh phah em?

12. Kornelia chu engin nge baptisma chang tûra ṭanpui?

¹² Kornelia chu baptisma chang tûrin engin nge ṭanpui? ‘An chhûngkuain Pathian an ṭih,’ tih kan chhiar a. Pathian hnênah a ṭawngṭai fo ṭhîn bawk a ni. (Tirh. 10:2, NWT) Petera’n a hnêna chanchin ṭha a hrilh khân an chhûngkuain an pawm a, baptisma an chang nghâl a ni. (Tirh. 10:47, 48) Kornelia chuan a chhûngte ruala Jehova be tûrin eng inthlâk danglamna pawh siam a inhuam tih a chiang hle.—Jos. 24:15; Tirh. 10:24, 33.

13. Kornelia hnên aṭangin eng nge i zir theih?

¹³ Saula ang bawkin, Kornelia chuan a nihna chelh chu Kristian a nihna tûr a indâltîr thei a. Mahse, a indâltîr lo. Thutak pawm tûrin i nunah inthlâk danglamna lian takte i siam a ngai em? A ngai a nih chuan Jehova’n a ṭanpui ang che. Bible thu bulte nêna inmila a rawngbâwl i tumna chu mal a sâwm dâwn a ni.

14. Tsuyoshi-a entawn tur siam chu engtin nge i hlâwkpui theih?

¹⁴ Japan rama awm Tsuyoshi-a chuan baptisma chang thei tûrin a hnaah insiamremna a neih a ngai a. Ani chu pangpâr khâwi dân zirna school Ikenobo-a an zirtîrtu lû ber ṭanpuitu (assistant) a ni a. Chu zirtîrtu lû chu mitthi vuinaa a tel theih loh apiangin, Tsuyoshi-a chuan a aiawhin Buddhist serh leh sângte chu a tihsak a ngai fo ṭhîn a ni. Mahse, mitthite chungchânga thutak a zir hnu chuan, chûng serh leh sângte chu a baptisma channa dâltu a lo ni a. Chuvângin, chûng thiltihnaahte tel tawh lo tûrin thu tlûkna a siam a. (2 Kor. 6:15, 16) Tichuan, chumi chungchâng chu an zirtîrtu lû chu a sawipui ta a ni. Eng nge a rah chhuah? Tsuyoshi-a chuan chûng serh leh sângtea tel ngai tawh lovin a hna chu a thawk chhunzawm thei a. Bible a zir aṭanga kum khat hnu vêlah baptisma a chang a ni. Jehova tilâwm tûrin i hnathawhah insiamremna i neih a ngai a nih chuan, nangmah leh i chhûngkaw mamawhte chu a pe ang che tih i ring nghet tlat thei a ni.—Sâm 127:2; Mt. 6:33.

KORINTH KHAW MITE’N BAPTISMA AN CHANG

15. Korinth khaw mite chuan baptisma channa tûr dâltu eng thilte nge an tawh?

¹⁵ Hmân lai Korinth khua chu sum leh pai âtchilhna leh nungchang bawlhhlawhna avânga hriat hlawh tak a ni a. Chuta mite chuan Pathian duh loh zâwng nun kawng chu an zawh a ni. Chuvângin, chutiang hmuna chêngte tân chuan Pathian Jehova rawngbâwl chu thil harsa tak a ni dâwn a. Chuti chung chuan, tirhkoh Paula’n chu khuaa kala Krista chungchâng a hrilh chuan, “Korinth khuaa chanchin ṭha hretu mi tam tak pawhin an ring a, baptisma an chang ta a.” (Tirh. 18:7-11, NWT) Tichuan, Lalpa Isua Krista chu Paula hnêna inlârin: “He khuaah hian mi tam tak ka nei a ni,” tiin a sawi a. Chuvângin, Paula’n chutah chuan kum khat leh a chanve vêl rawng a bâwl chhunzawm a ni.

16. Engin nge Korinth khaw mite chu an baptisma channa tûr dâl thei thilte hneh tûra ṭanpui? (2 Korinth 10:4, 5)

¹⁶ Korinth khuaa mite chu baptisma chang tûrin engin nge ṭanpui? (2 Korinth 10:4, 5 chhiar rawh.) Pathian Thu leh a thlarau thianghlim thiltithei tak chuan an nuna inthlâk danglamna lian tak siam tûrin a ṭanpui a. (Heb. 4:12) Krista chungchânga chanchin ṭha pawmtu chûng Korinth khaw mite chuan zu ruih te, rûk rûk te leh, mawngkawhurnate ang chi chîn dân ṭha lote chu an paih bo thei a ni.—1 Kor. 6:9-11.a

17. Korinth khaw mite hnên aṭangin eng nge i zir theih?

¹⁷ Korinth khaw mite chuan an nuna bet tlat chîn dân ṭha lote chu hneh ngai mah se, Kristian rawn nih chu an tâna thil harsa lutuk angin an thlîr lo tih chhinchhiah ang che. Chatuan nunnaa hruaitu kawngka zîma lût tûrin theih tâwp an chhuah a ni. (Mt. 7:13, 14) Baptisma chang thei tûrin mize ṭha lo emaw, chin dân ṭha lo emaw bânsan harsa tih i nei em? Beidawng suh! Thil ṭha lo tih châkna do lêt thei tûrin Pathian Jehova hnênah a thlarau thianghlim dîl ang che.

18. Monika-i entawn tûr siam chu engtin nge i hlâwkpui theih?

¹⁸ Georgia rama Monika-i chuan baptisma a chan theih nân ṭawngkam bawlhhlawh hman leh intihhlimna ṭha lo en chu bânsan tûrin theih tâwp a chhuah a. Ani chuan: “Ka tleirâwl lai chuan ṭawngṭaina chu ka chakna hnâr ber a ni a. Jehova chuan thil dik tih ka duhzia a hria a, min ṭanpuiin min kaihruai reng ṭhîn,” tiin a sawi. Kum 16 mi a nihin baptisma a chang a ni. Jehova pawm hlawha a rawngbâwl tûrin thiltih bânsan ngai i nei em? Inthlâk danglamna siam thei tûrin chakna dîl chhunzawm zêl ang che. Tichuan, phal takin a thlarau thianghlim a pe dâwn che a ni.—Joh. 3:34.

I RINNAIN TLANGTE A SAWN THEI

19. Tlâng anga lian harsatnate chu paltlang thei tûrin engin nge ṭanpui ang che? (Milem en bawk rawh.)

¹⁹ Baptisma chang tûrin eng harsatna pawh nei mah la, Jehova’n a hmangaih chein a chhûngkaw zînga mi ni tûrin a duh che tih ring nghet tlat ang che. Isua chuan kum zabi khatnaa a zirtîrte hnênah chuan: “Anṭam mu fang khat tiat rinna in neih chuan, he tlâng hnênah hian, ‘Heta ṭang hian sawtah sâwn va insawn rawh,’ in ti ang a, a insawn mai ang,” tiin a hrilh a ni. (Mt. 17:20, NWT) Chu a thusawi ngaithlatute chuan Isua chu kum rei lo te chhûng chauh an la zui avângin, an rinna a ṭhan chhoh zêl a la ngai a. Mahse, Isua chuan rinna chak tak an neih chuan tlâng anga lian harsatnate chu sawn thei tûrin a ṭanpui ang tih a tiam a ni. Nang pawh chutianga ti tûr chuan a ṭanpui ang che!

20. He thuziaka târ lan kum zabi khatna leh tûn laia Kristian-te entawn tûr siam chuan engtin nge a tihchak che?

²⁰ Baptisma i channa tûr dâltu harsatnate i neih chuan, paih bo tûrin vuaicha lovin hma la la. Kum zabi khatna leh tûn laia Kristian-te entawn tûr siam aṭangin thlamuanna leh chakna hmu ang che. An entawn tûr siam chuan tichak chein, Jehova hnêna inpumpêka baptisma chang tûrin chêttîr che rawh se. Chu chu i thu tlûkna siam theih azawnga ṭha ber a ni dâwn si a!