Baptisma Chan Awmzia leh A Pawimawh Chhan

1. Baptisma chungchâng hi Bible zirtîrna bulpui a ni tih engin nge târ lang?

BAPTISMA chang tharte an awm hian kan va hlim thei tak êm! C.E. 33 Pentikost nîa mi tam takin baptisma an chan khân Kristian hmasate’n chutiang hlimna chu an nei a. Chu inkhâwmah chuan baptisma channa leh baptisma chungchânga zirtîrna bulpui hrilhfiahna thusawi a tel a ni. (Tirh. 2:38, 40, 41) Tirhkoh Paula chuan “Krista chungchâng thurin bulpuite” zîngah “baptisma chi hrang hrang chungchâng zirtîrna thu te” a tel tih a ziak a. (Heb. 6:1, 2) Baptisma chungchâng hi zirtîrna pângngai mai angin lang mah se, ṭha taka kan hriat chian a ngai a ni. Engvângin nge?

2. Engvângin nge baptisma chungchâng chu kan hriatthiam a ngaih?

² Lungphûm nghet tak chuan in nghet taka a dintîr angin, baptisma chungchâng hriatthiamna chuan rinna nghet tak nei tûrin min ṭanpui thei a. Baptisma chang tûrin hma kan la mêk emaw, baptisma kan channa chu kum tam tak a liam tawh emaw a nih pawhin, chu hriatthiamna chu kan neih a ngai a ni. Chuvângin, he thuziakah hian hêng zawhnate hi chhân a ni ang: Baptisma chan awmzia chu eng nge ni? Kristian baptisma channaah chuan eng nge tel? Engvângin nge Pa leh Fapa leh thlarau thianghlim hminga baptisma kan chan ang? tihte hi.

I BAPTISMA CHAN AWMZIA

3. Baptisma channa chuan eng nge a entîr?

³ Baptisma channa chuan Pathian Jehova leh Isua chungchânga thutak i pawm tawh tih te, i sualte i sim tawh tih te, Jehova rawngbâwl tûrin i nun kawng i thlâk danglam tawh tih te, Isua chu chhandamna atâna Pathian mi hman a ni tih i pawm tawh bâkah, Pathian inawpna pâwl rualin Jehova rawngbâwl i duhzia ṭawngṭaiin i hrilh tawh tih vântlâng hmaah a târ lang a ni. Chu thutiam, a nih loh leh inpumpêkna i neih tawh a, baptisma i chang tawh a nih chuan, chatuana nunnaa hruaitu nun kawng i zawh ṭan tihna a ni bawk.

4. Tuia hnim pil pumhlûmna chuan eng nge a entîr? (Milem en bawk rawh.)

⁴ Baptisma i chan hian tuia hnim pil pumhlûm i nih hnuah i rawn chhuak leh a;a chu chu phûm i nih hnua kaihthawh leh ang i ni. (Kolossa 2:12 nên khaikhin rawh.) Baptisma channa chuan i nunah inthlâk danglamna lian tak i siam tawh tih a târ lang a ni. Engtin nge? Tuia hnim pil i nih hian, i nun hlui chu i bânsan tawh tih i târ lang a. Tui aṭanga i lo chhuah hian, Pathian duh zâwng ti tûrin nun thar i zawh ṭan tih i târ lang bawk.

5. Engtin nge baptisma chang tûra i hma lâknate chu lawng tuk tûra Nova thil tihte nên kan khaikhin theih? (1 Petera 3:18-21)

⁵ Petera thawn khat 3:18-21 chhiar rawh. Baptisma chang tûra i hma lâknate chu lawng tuk tûra Nova thil tihte nên kan khaikhin thei a. Jehova chanchin i zîr ṭan chauh a nih chuan, i tih tûr hmabâkte chu Nova lawng tuk ang maia harsa leh huphurhawm angin a lang thei a ni. A nih leh, chutiang khawpa hma lâk chu a ṭûl kher em? Ṭûl teh meuh mai. Engvângin nge chutianga kan sawi theih? Han ngaihtuah teh. Pathianin lawng tuk dân tûr a khawhhmuh a, Nova chuan Tuilêta an dam khaw chhuah theih nân Pathian hrilh ang thlapa a tih a ngai a. Pathianin a ṭanpui ang tih ring tlatin, Nova chuan thu âwih takin lawng chu a tuk ta a. Nova’n “Pathianin a hnêna thu a pêk zawng zawng” anga hlawhtling taka a ti thei angin, nang pawhin i ti ve thei a ni.—Gen. 6:22.

6. Eng kawngin nge baptisma channain a chhandam theih che?

⁶ Châng 21-ah tirhkoh Petera chuan baptisma channain “a chhandam mêk che,” tiin a ziak a. Ni e, tuia hnim pilna mai chuan chhandamna a thlen lo chein, i sualte pawh a tlêng fai hek lo. Isua thisen chauhvin kan sualte chu a tlêng fai thei a ni. (1 Joh. 1:7) Chutih rualin, baptisma channa chu Pathian thupêkte kan zâwm tih lantîrna pawimawh tak leh “chhia leh ṭha hriatna thiang nei tûra Pathian hnêna ngenna” a ni. Jehova chuan i ngenna anga pêk che a duh a. Chutiang kawng chuan, baptisma channa chuan “a chhandam mêk che,” a nih loh leh chhandamnaah a hruai mêk che a ni.

KRISTIAN BAPTISMA CHANNAA TEL CHU

7. Baptisma channa chu eng anga neih tûr nge a nih?

⁷ Tuia inhnim pil tih bâk loh chu, Bible chuan baptisma chan chungchâng chipchiar taka sawi a nei lo va. Chuti chung chuan, Bible-in baptisma chan chungchânga a âwm leh mawite hre tûrin min ṭanpui a ni. Entîr nân, Bible thu bulte chuan baptisma chang tûrte chu thawmhnaw inbel dân tûr hre tûrte leh thlîrtute pawh awm dân thiam tûrin a ṭanpui a. (1 Kor. 14:40; 1 Tim. 2:9) Tûn laiah, baptisma chantîrtute chu kohhran upate an ni tlângpui a, chu chanvo hlu dawngtu unaupate ṭûl lo taka chawilâr chu kan pumpelh a ni. (1 Kor. 1:14, 15) Baptisma chan pawimawhna chu thlîrtute an tam leh tam lohvah a innghat lo.—Tirh. 8:36.

8. Baptisma changtu tûrte chu eng zawhnate nge zawh an nih a, engvângin nge? (Tirhkohte 2:38-42) (Milem en bawk rawh.)

⁸ Bible chuan kan rinna chu ‘chhandam kan nih theih nân vântlâng hmaah kan puang chhuak’ tûr a ni tih a târ lang a. (Rom 10:9, 10.) Baptisma kan chan huna chhandam kan nih theih nâna pawimawh tak chutianga puan chhuahna kan nei chu thil inâwm tak a va ni êm! Chuvângin, baptisma chang tûrte chu zawhna pahnih zawh an ni ṭhîn. Pakhatna chu, “I sualte sim a, Isua hmanga Pathian min pêk chhandamna kawng chu pawmin, Jehova hnênah i inpumpêk tawh em?” tih a ni a. He zawhna hian mi chu baptisma chang tûra a inbuatsaih dân a ngaihventîr a; hei hi Pentikost nîa Petera’n a thu ngaithlatu mipuite a fuihna nên a inang a ni. Zawhna pahnihna chu, “I baptisma channa hian Jehova inawpna pâwl zînga tel Jehova Thuhretu pakhat angin a chhinchhiah che tih i hria em?” tih a ni a. He zawhna hian Jehova inawpna pâwl aṭanga kan dawn kaihhruaina zawmna leh kum zabi khatnaa zirtîrte tih anga kan Kristian unaute ruala Pathian rawng kan bâwlna hmangin, kan inpumpêkna milin kan nung tih min hriat nawntîr a ni. (Tirhkohte 2:38-42 chhiar rawh.) Chûng zawhna pahnih ‘aw’ tia thinlung taka chhângtute chu baptisma chang tûrin an tling a ni.

9. Miin Pathian duhsakna dawn a duh chuan eng nge a tih ngai?

⁹ Thutak i zir hma aṭang tawhin, nun nuam pângngai tak i neiin, sual lian tak i ti ngai lo pawh a ni thei a. A nih loh leh, Jehova hmangaih tûra ṭanpuitu che Kristian nu leh pate enkawlna hnuaiah i seilian pawh a ni thei. Chuti chung chuan, simna i lantîra, Pathian duhsakna dawng tûra baptisma i chan a la ngai tho em? A ngai a ni. Kan ṭobul chu eng pawh ni se, Pathian nêna min hlattîrtu sual kan rochun tih kan pawm ṭheuh a ngai a. (Sâm 51:5) Mahse, Jehova kan hriat hnu chuan mahni duh zâwng aiin A duh zâwng chu kan dah pawimawh zâwk a. Chutiang chuan, simna lantîrin, kan nun hlui chu kan kalsan a, kan Pa vâna mi ti lâwmtu nun kawng kan zawh ṭanin, baptisma kan chang thei ta a ni.—Tirh. 3:19.

10. Sakhaw dangah baptisma i lo chang tawh a nih pawhin eng nge i tih ngai?

¹⁰ Sakhaw dangah baptisma i lo chang tawh a nih pawhin, Jehova Thuhretu pakhat rawn ni tûrin baptisma i chan a la ngai tho a ni. Engvângin nge? A chhan chu, khatih hun lai khân, Pathian Jehova leh Isua chungchâng thutak hriatthiamna i la neih tâwk loh vâng a ni a. Ṭawngṭaiin Pathian hnênah lo inpumpêk tawh pawh ni la, i thutiam chu Pathian duh zâwng hriatthiamna dikah a innghat lo a ni. Tirhkoh Paula’n Kristiante zirtîrna chungchâng hriatthiamna dik tak nei lova baptisma chang tawh Ephesi khuaa mite a tawh khân, baptisma chang leh tûrin an tân ruahmanna a siamsak a.b (Tirh. 19:1-5) Tûn laiah pawh, Pathian duh zâwng hriatna dik ṭanchhan baptisma channa chauh pawm tlâka ruat a ni.

“PA LEH FAPA LEH THLARAU THIANGHLIM HMINGIN”

11. ‘Pa leh Fapa leh thlarau thianghlim hminga’ baptis tih awmzia chu eng nge ni? (Matthaia 28:18-20)

¹¹ Isua chuan zirtîr tharte chu ‘Pa leh Fapa leh thlarau thianghlim hminga’ baptis tûrin thu a pe a. (Matthaia 28:18-20 chhiar rawh.) Chumi awmzia chu eng nge ni? Bible-a “hming” tih thu mal hian mi dangte’n a hming putu an thlîr dân a kâwk fo va. Chu bâkah, a hming putu nihna leh thuneihna a kâwk thei bawk. Chuvângin, tu emaw, a nih loh leh thil eng emaw “hminga” thil kan tih hian, chu hming putu thuneihna chu kan pawm tihna a ni. (Matthaia 10:41 nên khaikhin rawh.) A nih chuan, Pa leh Fapa nihna leh thuneihna bâkah, Pathian thlarau thinghlim kaihhruaina i pawm theih dân hi han ngaihtuah teh.

12. Engtin nge Pa hminga baptisma kan chan? (Thu Puan 4:11) (Milem en bawk rawh.)

¹² Pa hmingin. Jehova chu kan Pa vâna mi, a nih loh leh Nunna Petu a ni tih kan pawm a. Ani chu engkimtithei Pathian leh thil engkim Siamtu a ni. (Thu Puan 4:11 chhiar rawh.) Ṭawngṭaina Ngaithlatu a ni tih kan pawm bâkah, a hnêna kan ṭawngṭai hunah leh mi dangte hnêna a chanchin kan hrilh hunah a hming chu zah tak leh zalên takin kan hmang ṭhîn bawk. (Sâm 65:2) Mahse, Pa hminga baptisma channaah chuan chu aia tam a tel a. Pentikost nîa Petera thusawi ngaithlatute chuan Jehova chungchâng hre tawh mah se, Ani chu Isua Krista hmanga chatuan chhandamna Buatsaihtu nia an pawm a la ngai cheu a ni.—Rom 5:8.

13. Engtin nge Fapa hminga baptisma kan chan? (Milem en bawk rawh.)

¹³ Fapa hmingin. Isua chu Pathian Fapa mal neih chhun a ni tih kan pawm a. Ani chu Jehova nêna inlaichînna ṭha kan neih theihna “kawng” awm chhun a ni. (Joh. 14:6) Chu bâkah, nunna kan neih theih nâna kan aia thi, min Chhandamtu a ni bawk. Chûng hriatnate chuan baptisma kan chan hunah chauh ni lovin, kan dam chhûnga nî tin a hnungzui tûrin min chêttîr a ni. (1 Joh. 2:6) Chuvângin, amah angin, ṭhahnemngai taka kan thu hrilhna chu eng mah indâltîr kan phal lo. (Lk. 4:43) Rinawm taka Pathian rawng kan bâwl avânga tih duhdahna tawrh hial pawh kan inhuam a ni. (2 Tim. 3:12) Isua chu “kohhran lû” anga kan zah êm avângin, a hnungzuitute kaihruai tûr leh ngaihsak tûra a mi ruatte lakah lâwm takin kan intulût bawk.—Eph. 4:8, 11, 12; 5:23.

14. (a) Engtin nge thlarau thianghlim hminga baptisma kan chan? (Milem en bawk rawh.) (b) Hriak thihte chuan eng baptismate nge an chan belh? (“Hriak Thihte Chan Baptismate,” tih bâwm chu en rawh.)

¹⁴ Thlarau thianghlim hmingin. Thlarau thinghlim chungchânga thutak chu kan pawm a. Thlarau thianghlim chu mi pakhat emaw, Trinity zînga tel emaw ni lovin, Pathian chakna chevêl a ni. Thlarau thinghlimin zâwlneite leh Bible ziaktute chu a kaihruai tih kan pawm avângin Bible chu kan chhiarin, a zirtîrnate chu kan zâwm a. (2 Pet. 1:20, 21) Chu bâkah, sual lian tak tihnain Pathian thlarau thianghlim kan dawnna tûr a dâl theih avâng leh kohhrana zalên taka thlarau thianglim hnathawhna tûr a dâl theih avângin, chûng sual lian tak tihna chu kan pumpelh a ni.—Eph. 4:30.

15. Eng nge tih kan tum tlat ang?

¹⁵ Baptisma chang tawh Kristian i nih chuan, “baptisma chi hrang hrangc chungchâng zirtîrna thu” zawng zawng hriatthiam leh, Jehova hnêna inpumpêka baptisma i channa thutiam mila nun chu tum tlat ang che. A nih leh, baptisma chang tawh Kristian i la nih loh chuan engtin nge ni ang? Chan i hrehna chhan eng emaw a awm em? A dawta thuziakah baptisma chang tûra hma i lâk zawm zêl theih dân sawiho a ni ang.