Baptisma Chan Hnua Harsatna Awm Theite Atân I Inbuatsaih Em?

1-2. Thutak kan hriat hnua kan hmachhawn mai theih harsatnate atân engtin nge kan lo inbuatsaih lâwk theih? Entîrna pe rawh.

SETANA khawvêlah hian harsatnate chu kan beisei tûr a ni a. Chuvângin, Isua chuan a hnungzuitute chu inâwm takin heti hian a vaukhân a ni: ‘Tlûknate thlentîrtu chu lo thleng tûr rêng a ni,’ tiin. (Mt. 18:7) Chu chu rilrua dahin, kan Kristian unaute nêna buaina kan neih mai theihte pawh tiamin, harsatna kan hmachawn tûrte atân kan inbuatsaih a ngai a ni.

² Hei hi han ngaihtuah teh. Jehova mite chu leilung chhiatnate atâna lo inbuatsaih lâwk tûra hrilh kan ni a. A nih leh, engtin nge kan inbuatsaih? A hmasain, kan awmna hmuna leilung chhiatna thleng theite kan hriat a ngai a. A bîk takin, chumi hmuna rawn pêm tharte tân chutianga lo inbuatsaih lâwk chu a pawimawh lehzual a. Leilung chhiatna lo awm theite kan hriat tawh hnu chuan, chûngte atâna lo inbuatsaih tûra ruahmanna kan siam a ngai a ni. (Thuf. 21:5) Chutiang bawkin, thutak kan hriat hnua kan hmachhawn mai theih harsatnate chu kan hriat a, chumi atâna inpeih tûrin tûn aṭangin kan lo inbuatsaih thei a. Chutianga kan tih chuan, chûng harsatnate chu ṭha lehzualin kan hmachhawn thei ang a, Jehova nêna kan inlaichînna pawh tih chhiatin a awm lo vang. (Sâm 17:5) Tûnah, chûng harsatna lo awm thei pathum leh chûngte atâna kan lo inbuatsaih lâwk theih dânte chu i lo sawiho vang u.a

UNAU TU EMAWIN A TI LUNGNI LO CHE

3. Kohhranah eng harsatnate nge kan hmachhawn mai theih?

³ Jehova Thuhretute inkhâwma a vawi khatna atâna i tel ṭuma an zînga hmangaihna awm i hmuh kha i la hre thei em? Thutak i hmu tih i hre nghâl a ni lâwm ni? (Joh. 13:35; Kol. 3:12) Unaunu Blanca-i’b chu chutiang chuan a awm a. Mahse, baptisma a chan hnu chuan a beisei lo tak thiltawn a nei a. Ani chuan: “Unaunu pakhat hian ngilnei lo takin ka chungah thil a ti a. Chu bâkah, mi dangte chungchâng pawh a chhe zâwngin a sawi ṭhîn tih ka hria. Hetiang thil a thlen hi ka beisei ngai lo; a chhan chu Jehova Thuhretute chu inrem tak leh inhmangaih taka awm an tum tih ka hre tawh a ni,” tiin a sawi. Ni e, i Kristian unaute chuan mize ṭha tak tak neih tumin theih tâwp an chhuah a; mahse, Jehova mite chu ṭha famkim an ni bîk lo. (Eph. 4:23, 24; 1 Joh. 1:8) Chuvângin, i unau tu emawin i rilru ti na thei thilte a tih hun emaw, a sawi hun emaw a awm thei a. (Jak. 3:8) Lungchhiatthlâk takin, ṭhenkhat chuan chûng harsatnate avângin Jehova rawng bâwl hial an bânsan a ni.

4. Kan Kristian unau tu emawin min tih lungnih loh huna chhân lêt dân tûr kan hriat theih nân, tûnah eng nge kan tih theih? (Ephesi 4:32)

⁴ I Kristian unau tu emawin a tih lungnih loh hunah che i chhân lêt dân tûr i hriat theih nân, tûnah eng nge i tih theih? Ephesi 4:32-a kan hmuh thurâwn nunpui chu chîn ṭhanah nei ang che. (Chhiar rawh.) Theih tâwp chhuaha ngilneihna leh khawngaihna i lantîr a nih chuan, mi dangte nêna ṭûl lo taka intih buai chu i pumpelh thei ang. An thil tih sualte chu thinlung taka ngaihdam tum ṭhîn bawk ang che. Chutianga ti tûrin engin nge ṭanpui thei che? Jehova hnêna i thil tih sualte ngaidam tûra i dîl ngunzia leh a ngaihdam nasatzia che kha ngaihtuah rawh. (Mt. 6:12) Jehova’n a ngaihdam nasatzia che i ngaihhlut a, i ngaihtuah tam poh leh, mi dangte ngaihdam chu awlsam i ti lehzual ang.

5. Tu emawin min tih thinrim hunah eng Bible thu bulin nge min ṭanpui thei ang? (Thufingte 19:11) (Milem en bawk rawh.)

⁵ Thufingte 19:11 chhiar rawh. Tih thinrima kan awm hunah ngaihruat thiamnac chuan kan thinrimna a ti dai thei tih Bible-in a sawi a. He Bible thu bul hian kum rei lote kal taa baptisma chang unaunu Rima-i chu a ṭanpui a ni. Ani chuan: “Ka Kristian unaute thil tihin ka rilru a ti nâ emaw, min ti thinrim emaw hunah, Thufingte 19:11 hi ka hre chhuak hmasa ber ṭhîn a. An dinhmunte leh an ṭobulte ka ngaihtuahin, chutianga an tih chhante chu hriatthiam ka tum a. Anni chu rawngbâwlnaa thawhpui ka tum bawk a ni. Chutianga tihna chuan, anmahni hre chiang lehzual tûrin min ṭanpui,” tiin a sawi. Hei hi thurâwn ṭha tak a ni a; tûn aṭanga kan unaute hriat chian chu a pawimawh hle. Chutiang chuan, anni chu kan hre thiam lehzual ang a, min ti lungni lotu thilte an ti emaw, an sawi emaw a nih pawhin, ngaihdam awlsam kan ti lehzual ang.

6. Kohhrana unaute nêna inlaichînna ṭha nei tûrin engin nge min ṭanpui thei?

⁶ Kohhrana unaute nên inlaichînna ṭha nei tûrin eng nge i tih theih? Unaute hriat chian i tum hunah, an mize ṭhate chu ngaihven tum tlat ang che. (Thufingte 10:12; Rom 12:10; Phil. 2:2, 3 nên khaikhin rawh) Chutianga tihnain baptisma chang thar unau Mark-a a ṭanpui dân hi lo chhinchhiah ang che. Kohhrana a Kristian unaute chu hun tam lehzual a han hmanpui chuan, an chak lohnate a hmu ṭan a. Chûngte avânga tlu lo tûrin Mark-a chu engin nge ṭanpui? Ani chuan: “Ka Kristian unaute thil tih sualte chu khawvêla mite thil tih sualte nêna khaikhin chuan eng mah tham a ni lo tih ka hre ta a. Chûng an ṭhat famkim lohnate chu ka ngaihtuah reng tûr a ni lo tih ka rawn hre thiam bawk. Chuvângin, an mize ṭha laite chu ka ngaihtuah tlat zâwk a ni,” tiin a sawi. Nang pawh chutianga i ti ve a nih chuan, kohhran unaute nêna inlaichînna ṭha i nei thei ang.

I THIL KALSAN TAKTE CHU NEIH LEH I DUH ṬAN

7. Engin nge kan thil kalsan tâkte neih lêt leh châkna min neihtîr thei?

⁷ Thutak i hriat tirh khân, Setana khawvêl suaksual tak i kalsan avângin rilru hahdamna i nei ngei ang a. ‘Engtin nge miin chûngte chu neih leh a châk theih zâwk?’ tiin i ngaihtuah hial thei bawk. Mahse, fiahna khirh tak takte i han hmachhawn meuh chuan, Jehova rawng i bâwl ṭan tirha i kalsan tâk thil ṭhenkhatte chu i hre chhuak ṭanin, neih lêt leh châkna hial pawh i rawn nei ṭan thei a ni. (Numbers 11:4-6 nên khaikhin rawh.) Entîr nân, unau ṭhenkhatte chuan hun tam tak pêk ngai hna sâng takte an kalsan a ni thei a. Mi dangte chuan Bible an zir ṭan tirhin an ṭhian ṭha takte an kalsan a ni thei bawk. Mi dang lehte chuan nuam an tih zâwng, chîn dân ṭha lo takte an bânsan tawh pawh a ni thei a ni. Kristian tu emawin chûng a thil lo kalsan tawhte a tih leh avânga Jehova a hlat ṭan a nih chuan, a va lungchhiatthlâk dâwn tak êm! I chungah eng pawh lo thleng se, i thil kalsan tâkahte lêt leh ngai tawh lo tûrin tûnah eng nge i tih theih?

8. Abrahama leh Sari entawn tûr siam aṭangin eng nge kan zir theih?

⁸ Bible-ah hian duh sela chuan, an thil kalsan tâkte neih lêt leh châkna nei ṭan thei mi rinawmte entawn tûr siam a chuang a. Entîr nân, Pathian Jehova thu pêk zâwmin, Abrahama leh Sari chuan puan ina awm tûrin Ur khawpui nghet tak chu an kalsan a. (Heb. 11:8, 9) Ur khuaa nun nuam tak an neih ṭhin chu ngaihtuah lêt châng an nei thei ngei mai. Mahse, hun kal tawhte “ngaihtuah reng sela chuan,” a nih loh leh thlîr lêt ngawih ngawih sela chuan, chu khawpui nuam taka kîr leh châkna an neih ngei a rinawm. Mahse, anni chuan hma lam an thlîr tlat zâwk a ni.—Heb. 11:15, 16.

9. Engtin nge tirhkoh Paula chuan a thil kalsan tâkte chu a thlîr? (Philippi 3:7, 8, 13)

⁹ Tirhkoh Paula pawhin Jehova rawng a bâwl theih nân thil ṭhenkhat kalsan a nei a. Kristian a rawn nih hmain, ani chu Dân lama zirtîrtu hmingthang tak Gamaliela hnuaiah a zir a. (Tirh. 22:3) Chu bâkah, Juda sakhuaa nihna sâng tak chelh thei dinhmunah a awm bawk. (Gal. 1:13, 14) Mahse, chanchin ṭha a pawm hnu chuan, chûng zawng zawng chu a kalsan a ni. A nih leh, Kristian a rawn nih hnu chuan a nun chu a awlsam reng em? Awlsam reng lo. A chipuite hnên ngei aṭangin vuak te, tân ina khung te leh, huatnate a tâwk a. (2 Kor. 11:23-26) Chûng fiahnate chauh a ngaihtuah tlut tlut a, a tûn hma nun leh tûna a nun a khaikhin a nih chuan, Kristian a rawn nih hmaa a nun chu a ṭha zâwk niin thu tâwp a siam thei a ni. Mahse, Paula chuan hma lam hun ropui tak nei chunga, tûna Isua Krista rawng a bâwl theihna chanvo hlu chu a ngaihven tlat zâwk a. Ani chuan a thil kalsan tâkte aiin chûng malsâwmna a dawnte chu a hlu zâwk hle tih a chiang a ni.—Philippi 3:7, 8, 13 chhiar rawh.

10. Engte nge kan ngaihtuah fo vang? (Marka 10:29, 30) (Milem en bawk rawh.)

¹⁰ Eng nge kan zir theih? Kristian rawn ni tûra i thil kalsan tâkte i ngaihtuah ṭan a nih chuan, chûng thilte i kalsan chhan pawh hriat reng tum la. (Thur. 7:10) I thil kalsan tâkte leh thutak i hriat hnua i dawn malsâwmnate chu khaikhin bawk ang che. Entîr nân, lei leh vâna Lalchungnung Ber nên inlaichînna ṭha i nei a. (Thuf. 3:32) Hmangaihna nei tak Kristian chhûngkaw zîngah i tel bawk a. (Marka 10:29, 30 chhiar rawh.) Chu bâkah, hma lam hun ropui tak i nei bawk! (Is. 65:21-23) Jehova rawngbâwlna aṭanga lo awm malsâwmnate i ngaihtuah fo a nih chuan, i thil kalsan tâkte neih lêt leh duhna i nei tlêm lehzual ang.

11. Unaunu Rosemary-i thiltawn aṭangin eng nge i zir?

¹¹ Unaunu Rosemary-i chu kum 50 vêl a nihin baptisma a chang a. A thil kalsan tâkte neih châk lehna pumpelh tûra a thil tihte hi lo chhinchhiah ang che. Ani chuan: “A tîr chuan, chhûngkuaa hun nuam tak kan hman ṭhin Krismas hunte chu ka ngai ṭhîn hle a. Ka hmangaihte hnêna present-te han pêk hi nuam ka ti bawk. Naupangte’n Krismas thingkûng hnuaia an present dawnte hlim taka an hawng laite hmuh chu nuam ka ti thei hle,” tiin a sawi. A nih leh, ani chu engin nge ṭanpui? Rosemary-i chuan: “Krismas ni lo, hun danga chhûngte nêna hlim taka hun hman dân ka hre tawh a. Kum tin hian, Krismas ni lo hun dangah, chhûngte ko khâwmin, present-te ka pe a, anmahni ka ngaihhlut chhante ka hrilh ṭhîn,” tiin a sawi. Harsatna dang pawh a hmachhawn a. Ani chuan: “Thutak ka pawm hnu chuan, ka ṭhian hluite’n min kalsan a. A châng chuan ka ngai thei hlein, mal ngawih ngawih ni hian ka inhre ṭhîn,”d tiin a sawi. A nih leh, ani chu engin nge ṭanpui? Unaunute nên rawngbâwlnaa thawkho tûrin ruahmanna a siam ṭan a. Ani chuan: “Chutianga tihna chuan ka hmangaih tak leh ngaihhlut tak ṭhian tharte min pe a ni,” tiin a sawi. A hnên aṭangin eng nge i zir theih? Thutak i hriat hmaa nangmah ti hlim ṭhîntu che thil eng emaw ngaih chângte i nei thei a; mahse, chûngte chu thil dang ṭha zâwkte nên i thlâk thei a ni. (Phil. 4:8, 9) Tichuan, hei hi hre reng bawk ang che: Jehova chuan i thil kalsan tâkte aia tam a pe reng ang che, tih hi.

MI ṬHENKHATIN JEHOVA AN KALSAN

12. Kohhran chhûnga eng thil thleng hi nge a bîk taka hmachhawn harsa thei?

¹² Thuhretu i rawn nih khân, he khawvêl suaksual tak chhuahsan a, thlarau lam leh nungchang lama thianghlimna ngainatute zînga i rawn tel avângin i hahdam huai ngei ang. (Is. 65:14) Amaherawhchu, kohhran chhûnga tu emawin thil sual a tih thute i hre mai thei a. Ṭhenkhat chu kohhran aṭanga chhuahtîr hial pawh an ni thei a ni. (1 Kor. 5:13) Chutiang dinhmunin unaunu Samar-i chunga nghawng a neih dân hi lo chhinchhiah ang che. Ani chuan: “Baptisma ka chan aṭanga rei vak lovah, upa pakhat chu sual lian tak a tih avânga kohhran aṭanga chhuahtîr a ni a. Kohhran upa meuhvin Jehova leh kohhran chunga chutiang thil sual lian tak a ti chu rin harsa ka tih êm avângin ka tlu lek lek a ni,” tiin a sawi. Ni e, kan Kristian unaute chuan Jehova an hmangaihin, amah bêl an duh tih chu rinhlelh kan duh lo ngei ang. (1 Kor. 13:4, 7) Amaherawhchu, kum tina mi ṭhenkhat kohhran aṭanga chhuahtîr an ni erawh a lungchhiatthlâk hle. Kawng sual zawhtu chu i chhûngte zînga mi emaw, i mi rin tak tu emaw a nih chuan, a harsa lehzual thei a ni.

13. I hmangaih tak tu emawin Jehova kalsan a, chumi avânga i tlûk phah loh nân, engtin nge tûn aṭanga i lo inbuatsaih lâwk theih?

¹³ I hmangaih tak tu emawin Jehova a kalsan a nih chuan, chumi avânga i tlûk phah loh nân, engtin nge tûn aṭanga i lo inbuatsaih lâwk theih? Jehova nêna in inlaichînna tih ngheh zawm zêlna hmangin a ni. (Jak. 4:8) Tu emaw rinawm lohna avânga Pathian nêna in inlaichînna a chhiat phah chu phal ngai suh. Entîr nân, chhûngkua leh kohhran angin Pathian beho ṭhîn mah ila, ṭawngṭaina leh Bible chhiarna hun duan chu mi mal taka kan neih a ngai a ni.—Sâm 1:2; 62:8.

14. Tirhkoh Petera entawn tûr siam aṭangin eng nge kan zir theih? (Johana 6:66-68)

¹⁴ Zirtîr tam takin Isua hnungzui an bânsan huna tirhkoh Petera chhân lêt dân aṭang pawhin kan inzir thei a. Khatih hun lai khân, Petera ngei pawh eng emaw chen a rilru a buai ve a rinawm. Mahse, Johana 6:66-68-naa a thusawi hi lo chhinchhiah ang che. (Chhiar rawh.) Petera chuan mi dangte thil tih ngaihven aiin, thutak chungchânga Isua thusawite chu a ngaihven zâwk a. Chuvângin, ani chu a tlu ve lo. Chutiang bawkin, tûn laiah pawh, mi dangte thil tihin Pathian inawpna pâwl ṭanpuina hmanga i hmuh thutak hlutna chu a thlâk danglam chuang lo. Chu thutak chu pawm tlat ang che! Kan târ lan tâk unaunu Samar-i chuan heti hian a sawi, “Mi tu emawin thil a tih sual avângin kohhran pumpui, a nih loh leh inawpna pâwl chu a sual tihna a ni lo va; chûng an thil sual tihte chuan Jehova mizia a entîr hek lo tih ka inhriat nawntîr fo ṭhîn,” tiin a sawi.

15. Emily-i thiltawn aṭangin eng nge i zir?

¹⁵ Unaunu Emily-i chunga thilthleng hi han ngaihtuah teh. Baptisma a chan aṭanga chawlhkâr khat lekah, a nu chuan an chhûngkua a kalsanin kohhran aṭanga chhuahtîr a ni a. Emily-i chuan: “Hetiang thil hi a thleng ang tih rêng ka suangtuah ngai lo. Hei hi ka tâna tawrh harsa ber a ni a, ka nu chu ka ngai thei khawp mai,” tiin a sawi. Emily-i chu engin nge ṭanpui? Ani chuan: “Ka mal lo va. Ka pa hnên aṭang chauh ni lovin, chhûngkua anga ka en ṭhin kohhrana unaute hnên aṭangin ṭanpuina ka dawng a. Mi tin hian fiahna kan tâwk ṭheuh va. Chuvângin, kan inhnaih tlat a, kan infuih tawn hi a pawimawh tak meuh a ni,” tiin a sawi. (1 Pet. 5:9) I Kristian unaute nêna in inlaichînna ti nghet tûrin harsatna i tawh hun i nghah kher a ngai lo va. Tûn aṭangin chu in inlaichînna chu ti nghet zawm zêl ang che. Chutianga i tih chuan, eng thil pawh thleng se, mal nia inhriatna i nei tlêm lehzual ngei ang.

16. Eng nge kan hriat reng ang? (Milem en bawk rawh.)

¹⁶ Jehova’n a hmangaihte chu a zilh ṭhîn tih pawh hi hre reng ang che. (Heb. 12:6) Ani chuan kohhran aṭanga chhuahtîr zawng zawngte chu lo kîr leh tûrin a duh a. (2 Pet. 3:9) Chuvângin, i hmangaih tak tu emaw chu kohhran aṭanga chhuahtîr a nih chuan, upate’n Jehova hnêna lo kîr leh tûrin theih tâwp an chhuah ang tih ring tlat ang che.—2 Tim. 2:24, 25.

17. Eng nge kan chian tlat theih?

¹⁷ Baptisma chan hnua i hmachawn mai theih harsatna tlêm azâwng kan sawiho tawh a. Ni e, ṭhenkhat chuan chûngte avângin hlauhthâwnna eng emaw chen an nei thei a; mahse, i hlauh nachhan tûr eng mah a awm lo. Inbuatsaih nân thil tam tak tih theih i nei. Chu bâkah, ṭanpuina azawnga ṭanpuina ṭha ber Pathian Jehova i nei tih pawh hi theihnghilh ngai suh ang che. Ani chuan a ṭanpui tawh che a, chatuana ṭanpui che a duh bawk! (1 Pet. 5:10) Eng fiahna pawh hmachhawn thei tûrin i mamawh chakna leh chhelna a pe reng ang che. Jehova ṭanpuina i pawm zawm zêl a nih chuan, a lak aṭanga kalpêntîr theitu che harsatna a awm lo vang!—Sâm 119:165; Rom 8:38, 39.