Krista’n Kohhranho Hnênah Thu A Sawi
“A kut ding lama arsi pasarih kenga . . . khân hêng thu hi a sawi a ni.”—THU PUAN 2:1.
1, 2. Engvângin nge Asia Minor-a kohhran pasarihte hnêna Isua thusawi chu kan ngaihven hle ang?
JEHOVA Fapa mal neih chhun, Isua Krista chu Kristian kohhran Lû a ni a. A hriak thih hnungzuitute kohhran chu bawlhhlawh kai lova a awm theihna tûrin, Krista chuan anmahni fakna leh zilhna pein a lû nihna chu a hmang a ni. (Ephesi 5:21-27) Lû nihna a hman dân entîrna chu Thu Puan bung 2 leh 3-ah a awm a, chutah chuan Asia Minor-a kohhran pasarihte hnêna Isua thuchah khauh tak leh duhawm tak kan hmu a ni.
2 Kohhran pasarihte hnêna Isua thuchah a hriat hma hian, tirhkoh Johana chu ‘Lalpa ni’ inlârna hmuhtîr a ni. (Thu Puan 1:10) Chu ‘ni’ chu 1914-a Messia Lalram din a nih khân a inṭan a. Chuvângin, kohhranho hnêna Krista thusawi chu he ni hnuhnûng atân hian a pawimawh êm êm a ni. A fuihna leh zilhna thute chuan he hun khirh takte chhûnga harsatna kan tawhte hma chhawn thei tûrin min ṭanpui a ni.—2 Timothea 3:1-5.
3. Tirhkoh Johana hmuh ‘arsite,’ ‘tirhkohte’ leh ‘rangkachak khâwnvâr dahnate’ khân eng nge a entîr?
3 Johana chuan chawimawi tawh Isua Krista, a “kut ding lama arsi pasarih kenga” leh “rangkachak khâwnvâr dahna pasarih [a nih loh leh kohhranho] zînga vei veia” chu a hmu a. ‘Arsite’ chu “kohhran pasarihte tirhkoh an ni.” (Thu Puan 1:20; 2:1) A châng chuan arsi chuan thlarau thil siam vântirhkohte a entîr a; mahse, Krista chuan thlarau thil siam tâna thuchah ziak tûrin mihring chu a hmang tawp lo vang. Chuvângin, hêng ‘arsite’ hian thlarauva hriak thih enkawltute, a nih loh leh upahote chu a kâwk a ni. ‘Tirhkohte’ tih chuan thuchah kengtu nihna chanvo chu a sawifiah a. Pathian inawpna pâwl chu a ṭhan len zêl avângin, “sum enkawltu rinawm” pâwl chuan Isua “berâm dang” zînga mi puitling takte chu enkawltu ni tûrin an thlang bawk a ni.—Luka 12:42-44; Johana 10:16.
4. Engtin nge upate’n kohhranho hnêna Krista thusawi ngaihsak chu an hlâwkpui theih?
4 ‘Arsite’ chu Isua kut ding lamah—a thiltihtheihna, thununna, duhsakna, leh vênhimna hnuaiah—a awm a. Chuvângin, a lakah mawhphurhna an nei a ni. Kohhran pasarihte hnêna a thusawi hi zâwmin, tûn laia upate hian chutiang harsatnate enkawl dân an hria a ni. Mahse, Kristian zawng zawngte pawhin Pathian Fapa thu chu an ngaithla ngei tûr a ni. (Marka 9:7) Chuvângin, Krista’n kohhranho hnêna thu a sawi ngaihsakna aṭangin eng nge kan zîr theih?
Ephesi Khaw Tirhkoh Hnênah
5. Ephesi khawpui chu eng ang khawpui nge ni?
5 Isua chuan Ephesi khuaa kohhran chu a fak a, a zilh bawk a ni. (Thu Puan 2:1-7 chhiar rawh.) Diani pathiannu biak in lian tak chu he Asia Minor khawthlang lam tuipui kam, sumdâwnna hmun leh sakhaw biakna hmunpuiah hian a awm a. Ephesi chu nungchang bawlhhlawhna te, sakhaw dik lo te, dawi thiam thil tein khat mah sela, chu khawpuia tirhkoh Paula leh mi dangte rawngbâwlna chu Pathianin mal a sâwm a ni.—Tirhkohte, bung 19.
6. Engtin nge tûn laia Kristian rinawm nghette hi hmân lai Ephesi Kristian rinawm nghette ang an nih?
6 Krista chuan Ephesi kohhran chu: “I thiltih te, i thawh rimzia leh i chhelzia te, mi sualte i ngaihtheih lohzia te ka hria. Tirhkoh ni si lova tirhkoh intite chu i fiah bawk a, dawthei an ni tih i lo hre tawh a,” tiin a fak a ni. Tûn laiah pawh, Isua hnungzuitu dik kohhranho chuan chutiang thiltih ṭhat te, thawh rimte, leh chhelna te chungchângah hming ṭha an nei a. Unau der, tirhkoh anga lang duhte chu an ngaithei mai mai lo. (2 Korinth 11:13, 26) Ephesi khuaa mite ang bawkin, tûn laia Kristian rinawmte chuan ‘mi sualte an ngaithei lo’ a ni. Chuvângin, Jehova biakna thianghlim tak an vawn reng theih nân leh kohhran vênhim nân, kalpêng inchhîr duh lote chu an pâwl ngai lo.—Galatia 2:4, 5; 2 Johana 8-11.
7, 8. Ephesi khaw kohhranah eng buaina khirh tak nge awm a, chutiang buaina chu engtin nge kan hmachhawn ang?
7 Amaherawhchu, Ephesi khuaa Kristiante chuan buaina khirh tak an nei a. “Demna che ka nei a ni, i hmangaihna hmasa ber kha i bân tâk avângin,” Isua’n a ti. Kohhran mite chuan Jehova an hmangaihna hmasa ber kha an tihthar a ngai a ni. (Marka 12:28-30; Ephesi 2:4; 5:1, 2) Keini pawh, Pathian kan hmangaihna hmasa ber kan hloh loh nân kan invêng ṭheuh tûr a ni. (3 Johana 3) A nih leh hausak châkna emaw, nawmsak ûmna emaw chu kan nuna thil pawimawh ber ni ta se, engtin nge ni ang? (1 Timothea 4:8; 6:9, 10) Chutiang kan nih chuan, chûng rilru put hmangte chu Jehova hmangaihna thûk tak leh amah leh a Fapain kan tâna an tih zawng zawng avânga lâwmna rilrua thlâkthleng tûrin, Pathian ṭanpuina tih tak zetin kan dîl tûr a ni.—1 Johana 4:10, 16.
8 Krista chuan Ephesi mite chu: “I tlûksan tâk chu hre reng la, simin, atîra i thiltihte kha ti leh rawh,” tiin a fuih a ni. Chutiangin ti leh lo se, engtin nge ni ang? Isua chuan: “Chutilochuan i hnênah ka lo kal ang a, i sim loh zawngin i khâwnvâr dahna a hmun ata ka sawn ang,” a ti. Berâm zawng zawngin an hmangaihna hmasa ber an hloh vek mai chuan, “khâwnvâr dahna,” a nih loh leh kohhran chu a awm thei tawh lo vang. Kristian ṭhahnemngai kan nih angin, kohhran chu thlarau lama a ên reng nân theihtâwp i chhuah ang u.—Matthaia 5:14-16.
9. Pâwl inṭhen hranna chu eng anga thlîr tûr nge ni?
9 Ephesi mite chuan “Nikola ho thiltihte” an huat avângin an fakawm hle a. Thu Puan bua sawi mai bâk chu, he pâwl lo chhuah dân te, an thu zirtîr te, leh thiltih te hriatna chiang tak a awm lo. Nimahsela, Isua’n mihring zui chu a hnâwl avângin, Ephesi khuaa Kristiante tih angin, pâwl inṭhen hranna chu kan huat reng a ngai a ni.—Matthaia 23:10.
10. Thlarau thusawi ngaihsaktute’n eng nge an chen ang?
10 “Thlarauvin kohhranho hnêna thu a sawi hi beng nei chuan hre rawh se,” Krista chuan a ti a. Leia a awm lai khân, Isua chuan Pathian thlarau thununna hnuaiah thu a sawi ṭhîn a. (Isaia 61:1; Luka 4:16-21) Chuvângin, Pathianin thlarau thianghlim hmanga tûna a sawite pawh kan ngaihsak tûr a ni. Thlarau kaihhruaina hnuaiah, Isua chuan: “A hnehtu apiang Pathian paradis-a nunna thinga mi ka eitîr ang,” tiin a tiam a ni. Hei hi, thlarau thusawi ngaihsaktu hriak thihte tân chuan, vân lam ‘Pathian paradis,’ a nih loh leh Jehova awmna hmun ngeia thi thei lo nun neihna a ni a. Thlarau thusawi ngaihsaktu “mipui tam tak” chuan, “nunna tui lui” ata tui an in theihna tûr lei lam paradis an chên ang a, a lui kama “thing hnahte” aṭang chuan tihdamna an hmu ang.—Thu Puan 7:9; 22:1, 2; Luka 23:43.
11. Engtin nge Jehova kan hmangaihna chu kan neih theih ang?
11 Ephesi Kristiante chuan an hmangaihna hmasa ber an hloh va, a nih leh tûn laia kohhranah hian chutiang dinhmun bawk chu lo thleng ta se, engtin nge ni ang? Hmangaihnaa khat a kawngte chanchin sawina hmangin, Jehova hmangaihna i nei ṭheuh vang u. Pathianin a Fapa duh tak hmangin tlanna a ruahman a, chu a hmangaihna avânga kan lâwmzia chu kan lantîr thei a ni. (Johana 3:16; Rom 5:8) A inâwm hunah chuan, inkhâwmnaa hun kan chan hunahte leh chhânna kan pêk hunahte hian, Pathian hmangaihna chanchin kan sawi lang thei a ni. Kristian rawngbâwlnaa Jehova hming chawimawina hmang pawhin, Jehova kan hmangaihna chu kan lantîr thei bawk. (Sâm 145:10-13) Ni e, kan ṭawngkam chhuak leh thiltihte hian kohhranin a neih hmangaihna hmasa ber chu a tithar emaw, a tichak emaw thei a ni.
Smurna Khaw Tirhkoh Hnênah
12. Smurna khua leh chu khuaa an sakhaw biak dân chungchâng thilthleng chanchin chuan eng nge a târ lan?
12 Smurna khuaa kohhran chu Krista, “Hmasabera leh Hnuhnungbera, thia lo nung leh taa” chuan a fak hle a. (Thu Puan 2:8-11 chhiar rawh.) Smurna (tûna Izmir, Turkey ram) chu Asia Minor khawthlang lam tuipuikamah a awm a ni. Chu khawpui chu Grik ho sak a ni a; mahse, B.C.E. 580 vêl khân, Lydian-hovin an tichhia a ni. Alexander Ropuia thlâktute chuan Smurna chu hmun tharah an sa ṭha leh a. Asia rama Rom-ho bial neih a lo ni ta a, sumdâwnna hmunpui a ni a, vântlâng in ṭha tak tak avânga hmingthang tak a ni. Khawpui chhûnga Tiberia Kaisara biak in chuan lal biakna hmunpui a nihtîr a. Chibai bûktute chuan rimtui sawhkhat an hâl a ngai a, “Kaisara chu Lalpa a ni,” an tih a ngai a ni. Kristiante chuan chu chu an ti ve thei lo, an tân chuan “Isua chu Lalpa” a ni si a. Chuvângin tihduhdahna an tuar a ni.—Rom 10:9.
13. Pachhe hlawm mah se, eng kawngin nge Smurna Kristiante chu an hausak?
13 Tihduhdah an nih mai bâkah, Smurna khuaa Kristiante chu an pachhe bawk a, chu chu lal chibai an bûk duh loh avânga hrên a nih vâng a nih a rinawm. Tûn laia Jehova chhiahhlawhte pawh chutiang chi fiahna lakah an fihlîm bîk lo. (Thu Puan 13:16, 17) Pachhe hlawm hle mah se, Smurna Kristiante ang mite chu thlarau lamah an hausa êm êm a, chu chu thil pawimawh ber a ni.—Thufingte 10:22; 3 Johana 2.
14, 15. Hriak tihte’n Thu Puan 2:10 aṭangin eng thlamuanna nge an neih theih?
14 Smurna khuaa Juda tam zâwkte chu Pathian thu kalh thuro chhiahte an zawm avâng te, Pathian Fapa an hnâwl avâng te, leh thlarauva a hrin a hnungzuitute an sawichhiat avâng tein “Setana inkhâwmna in” an ni a. (Rom 2:28, 29) Mahse, hriak thihte chuan Krista thu sawizawm aṭang hian thlamuanna an hmu thei tlat! Ani chuan: “I tuar tûrte hi hlau suh: ngai teh, fiaha in awm theih nân diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm in tuar ang. Thih thlengin rinawmin lo awm rawh, tichuan nunna lallukhum ka pe ang che,” a ti.—Thu Puan 2:10.
15 Isua chuan Jehova lal chungnunna a thlâwp avânga thih chu a hlau lo rêng rêng a. (Philippi 2:5-8) Setana hian tûnah hian hriak thih la bângte do mah se, anni chuan a huhova an tuar tûr—tihduhdahna te, lungin tânna te, a nih loh leh râpthlâk taka thihna—te chu an hlau lo a ni. (Thu Puan 12:17) Anni chu khawvêl ngamtu an ni dâwn a ni. Milem beho intihsiaknaa a hnehtu chan pangpâr lukhum vuai thei ang ni lovin, Krista chuan hriak thih tho lehte chu vâna thil siam thi thei lo nia “nunna lallukhum” pêk chu a tiam zâwk a ni. Thilpêk hlu a va ni êm!
16. Hmân lai Smurna kohhran ang chi kohhranah kan lâwi a nih chuan, eng thilah nge kan ngaihtuahna kan pêk ang?
16 Vân lam beiseina nei kan ni emaw, lei lam beiseina nei kan ni emaw hmân lai Smurna kohhran angah kan lawi a nih chuan, engtin nge ni ang? Chutiang a nih chuan, kan rinpuite chu Pathianin tihduhdahna awm a phal chhan ber—lei leh vâna a lalchungnunna thu buai—chu ngaihtuah ngun tûrin i ṭanpui ang u. Rinawmna vawngtu Jehova Thuhretu apiangte chuan Setana dâwt theihzia an finfiah a, tihduhdahna tâwktu pawhin Lei leh Vâna Lalchungnungber ni tûra Jehova dikna neih chu a thlâwp tlat thei tih a târ lang a ni. (Thufingte 27:11) Kristian dangte chu tihduhdahna chhel taka tuar a, chutaṭanga ‘kan dam chhûng zawng [Jehova] mithmuha thianghlim leh fel taka awm a, hlau lova a rawng bâwl’ zêl tûrin i fuih ang u.—Luka 1:68, 69, 74, 75.
Pergamos Khaw Tirhkoh Hnênah
17, 18. Pergamos chu eng ang chi biakna hmunpui nge ni a, chutianga milem biaknaa tel duh loh chuan eng nge thlen thei?
17 Pergamos khaw kohhran chu fakna leh zilhna pêk a ni ve ve a. (Thu Puan 2:12-17 chhiar rawh.) Smurna hmâr lam kilometer 80 vêla hlaa awm Pergamos khuaah chuan milem biakna sakhua a hluar hle a ni. Kaldai arsi chanchin zir mite chu Babulon aṭangin an rawn pêm lût hlâwm ni âwm tak a ni. Dam lote chu Pergamos khuaa tihdamna leh damdawi pathian, pathian lem biak in hmingthang tak Asclepius-ah chuan an rawn kal hlawm a. Pergamos leh a biak in Kaisara Augustusa biak nâna pum pêk chu “lalram din ṭantirh lama lal biakna hmunpui” tia koh a ni.—Encyclopædia Britannica, 1959, Volume 17, phêk 507.
18 Pergamos-ah chuan Jupita hnêna hlan maichâm a awm a. Chu khawpui chu Diabola thunun mihringte biakna hmunpui a ni bawk. Chuvângin, chu mi khuaa kohhrante chu “Setana ṭhutphah” awmna hmuna awm anga sawi an ni pawh hi a mak lo ve! Jehova lalchungnunna thlâwptu tân lal biak duh loh chu thih phahna a ni thei a ni. Tûnah pawh hian khawvêl chu Diabola thuhnuaiah a la awm reng a, hnam chhinchhiahnate chu milem pathian anga biak an ni. (1 Johana 5:19) Kum zabi pakhatna aṭanga tûn lai hun thlengin, Kristian rinawm tam tak chu tihhlum an ni tawh a, chûng zînga pakhat chu Krista’n “ka thu hretu Antipa, Setana awmnaa in zînga an thah, ka mi rinawm tak” tia a koh hi a ni. Pathian Jehova leh Isua Krista chuan chutiang a chhiahhlawh rinawm nghette chu an hre reng a ni.—1 Johana 5:21.
19. Eng nge Balaama’n a tih a, eng lakah nge Kristian zawng zawngte chu kan invên vek ang?
19 Krista chuan “Balaama zirtîrna” chungchâng thu a sawi bawk a. Sum leh pai lama a duhâmna lamah, zâwlnei der Balaama chuan Israel chu ânchhe lawh a tum a. Chu ânchhia chu Pathianin malsâwmnaa a chantîr tâkah, Balaama chu Moab Lal Balaka nên ṭangdûnin, Israel mi tam tak chu milem biaknaah leh mipat hmeichhiatna lama nungchang bawlhhlawhnaah an thlêmthlu a ni. Kristian upate chu Balaama thiltih rah chhuahte dodâltu Phinehasa angin felnaah an ding nghet tlat tûr a ni. (Numbers 22:1–25:15; 2 Petera 2:15, 16; Juda 11) Dik takin, Kristian zawng zawngte chu milem biakna leh kohhrana mipat hmeichhiat lama nungchang bawlhhlawhna lamah kan invêng vek tûr a ni.—Juda 3, 4.
20. Kristian tupawhin, kalpêngte ngaih dân a pawm ṭan chuan, eng nge a tih ang?
20 Pergamos khaw kohhran chu “Nikola ho zirtîrna thu . . . pawm tute” an zînga awmtîr a phal avângin dinhmun derthâwng takah a ding a ni. Krista chuan chu kohhran hnênah: “Sim rawh; chutilochuan i hnênah ka lo kal thuai ang a, ka khandaih chuanin anmahni ka rawn do vang,” a ti. Pâwl hrangho chuan Kristiante chu thlarau lama hliam an duh a, chutianga inṭhen hranna leh pâwl hrang siamtute chuan Pathian Ram an luah lo vang. (Rom 16:17, 18; 1 Korinth 1:10; Galatia 5:19-21) Kristian tupawhin kalpêngte ngaih dân a pawmpui ṭan a, theh darh a duh chuan, Krista vaukhânna thu hi ngai pawimawh rawh se! Chhiatna laka a inhumhim theih nân, a inlamlêt tûr a ni a, kohhran upate thlarau lam ṭanpuina a zawng bawk tûr a ni. (Jakoba 5:13-18) Krista chu rorêl tûra a lo kal thuai dâwn avângin, chêt lâk nghâl vat a pawimawh êm êm a ni.
21, 22. Tuin nge “manna thuhrûk” chu ei thei a, chu chuan eng nge a entîr?
21 Hriak thih Kristian rinawmte leh an ṭhian rinawm nghette chuan rorêlna lo thleng tûr chu an hlauh a ngai lo. Pathian thlarau thianghlim kaihhruaina hnuaia Isua zilhna thu ngai pawimawhtu zawng zawngte chu malsâwmnain a nghâk reng a ni. Entîr nân, khawvêl hnehtu hriak thihte chu “manna thuhrûk” zînga mi ei tûra sâwm an ni ang a, “lung vâr” a chunga “hming thar ziak nên” pêk an ni bawk ang.
22 Pathian chuan Isarelte chu thlalêra kum 40 an kal chhûng zawnga anmahni inchâwm nân manna a pe a. Chûng “chhang” zînga ṭhenkhat chu thuthlung bâwm chhûnga rangkachak bêlah dah ṭhat a ni a, chuvângin Jehova awmpuina lantîrtu chhûm ding mak tak mai awmna, Hmun Thianghlim Berah thuhrûk tlat a ni. (Exodus 16:14,14, 15, 23, 26, 33; 26:34; Hebrai 9:3, 4) Chu manna thuhrûk chu tuma ei phal a ni lo. Mahse, kaihthawh an nih hnuah Isua hnungzuitu hriak thihte chuan thih theih lohna an chang ang a, chu chu “manna thuhrûk” ei hian a entîr a ni.
23. “Lung vâr” leh “hming thar” chuan eng pawimawhna nge a neih?
23 Lung dum chuan Rom-ho rorêlna ina thiam loh chantîrna a kâwk a, lung vâr erawh chuan thiam chantîrna a kâwk thung a. Chuvângin, Isua’n hnehna changtu hriak thih Kristiante hnêna “lung vâr” a pêk chuan anni chu pawisawi lo, thianghlim, leh fai angin a pawm tih a târ lang a ni. Rom-ho pawhin lung chu thilthleng pawimawh taka telve phalna ticket anga an hman avângin, “lung vâr” chuan hriak thihte chu vâna Berâm no mo neihnaa telve phalna ticket pêk an nihzia a lantîr a ni. (Thu Puan 19:7-9) “Hming thar” chuan vân lam Lalrama roluahpuitute anga Isua nêna inzawmna chanvo an neih chu a târ lang a ni. Hêngte hian hriak thihte leh Jehova rawngbâwlnaa an thawhpui, lei paradis-a chên beiseina neite chu a va tiphûr tehrêng êm!
24. Kalpênna chungchângah eng dinhmunah nge kan din ngheh tlat ang?
24 Pergamos kohhran chu kalpêngte tihderthâwnin a awm tih hriat reng chu a ṭha a. Kan lâwina kohhran thlarau lam hmakhua chu chutiang bawk dinhmun chuan a tiderthâwng a nih chuan, kalpênna chu hnâwl ṭhakin, thutakah i kal zêl ang u. (Johana 8:32, 44; 3 Johana 4) Zirtîrtu derte emaw, kalpênna lam âwntute emaw chuan kohhran pum pui an tihchhiat theih avângin, kalpênna chu kan do tlat tûr a ni a, suala inbumna chuan thutak kan zawmna a dan chu kan phal ngai tûr a ni lo.—Galatia 5:7-12; 2 Johana 8-11.
25. Thuziak dawtlehah eng kohhrante hnêna Krista thuchah nge kan sawiho leh ang?
25 Tûna kan ngaihtuah tâk Asia Minor-a kohhran pasarihte zînga pathumte hnêna chawimawi tawh Isua Krista sawi fakna leh zilhna thute chuan rilru a va khawih tak êm! Nimahsela, thlarau thianghlim kaihhruaina angin, kohhran dang palite hnênah pawh thu tam tak sawi tûr a la nei a. Chûng kohhran la bâng pali Thuatira te, Sardis te, Philadelphia te, Laodikei te hnêna a thuchahte chu thuziak dawtlehah kan sawiho vang. (w03 5/15)
Engtin Nge I Chhân Ang?
• Engvângin nge Krista’n kohhranho hnêna thu a sawi chu kan ngaihsak ang?
• Engtin nge kohhran hmangaihna hmasa ber chu titharleh tûrin kan ṭanpui theih?
• Engvângin nge hmân lai Smurna khuaa Kristian pachhe takte chu an hausa kan tih theih?
• Pergamos khuaa kohhran dinhmun kan ngaihtuahin, engtin nge kalpêngte ngaih dân chu kan thlîr ang?
[Phêk 24-naa map]
(A lan dân tûr dik tak hriat nân, a lehkhabu en rawh)
GREECE
ASIA MINOR
Ephesi
Smurna
Pergamos
Thuatira
Sardis
Philadelphia
Laodikei
[Phêk 26-naa milem]
“Mipui tam tak” chuan lei lam paradis an chên ang