Thu Puan—Tûn Laia I Tâna A Awmzia

1-2. Thu Puan bu kan ngaihven a ngaih chhan pakhat chu eng nge ni?

TU EMAWIN a album en tûrin a sâwm tawh ngai che em? Chûng thlalâkte i han en chuan a tam zâwk chu i hriat ngai lohte an ni a. Mahse, thlalâk pakhat chuan i mit a la chat mai. Engvângin nge? Chu thlalâkah chuan i tel ve vâng a ni. I han en chian chuan, thlalâkna hmun leh in lâk hun chu hriat chhuah i han tum a. Thlalâka tel zawng zawngte chu hriat vek i tum bawk. Chu thlalâk chuan i tân awmzia a nei hle a ni.

² Thu Puan bu hi chu thlalâk ang chu a ni. Engvângin nge? A lo berah, chhan pahnih vâng a ni. Pakhatna, Thu Puan bu hi kan tâna ziah a ni a. A châng hmasa berah heti hian kan chhiar a ni: “Isua Krista thu puan chhuah, Pathianin a bawihte hriattîr atân a hnêna a pêk, thil lo thleng thuai tûr thu chu,” tiin. (Thup. 1:1) Chuvângin, chu lehkhabua thuziakte chu mi zawng zawng tân ni lovin, Pathian chhiahhlawh inpumpêkte tân a ni a. Pathian mite kan nih angin, chu lehkhabu ngaihvenawm taka kan hmuh hrilh lâwknate thlen famkimnaah kan tel ve tih hriat chu mak kan ti tûr a ni lo. Thu danga sawi chuan, “chu thlalâkah chuan” kan tel ve tihna a ni.

3-4. Thu Puan buin a sawi angin, chûng hrilh lâwknate chu eng hunah nge a thlen famkim ang a, chu chuan eng tih duhna nei tûrin nge min chêttîr ṭheuh vang?

³ A chhan pahnihnaah chuan chûng hrilh lâwknate thlen famkim hun tûr a tel a. Kum upa tawh tak tirhkoh Johana chuan chumi hun chungchâng chu heti hian a sawi a ni: “Lalpa nîah chuan thlarauvin ka lo awm a,” tiin. (Thup. 1:10) C.E. 96 vêla Johana’n chûng thute a ziah lai chuan ‘Lalpa nî’ chu a la hla hle a ni. (Mt. 25:14, 19; Lk. 19:12) Mahse, Bible hrilh lâwkna sawi dân chuan, chu nî chu vâna Isua Lal a nih kum, kum 1914-ah a inṭan a. Chumi kum aṭang chuan, Pathian mite telna Thu Puan bu-a chûng hrilh lâwknate chu a thleng famkim ṭan a ni. Ni e, tûnah hian “Lalpa nîah” kan awm mêk a ni.

⁴ Chu hun phûrawm taka kan awm avângin, Thu Puan 1:3-naa chhinchhiah he fuihna duhawm tak hi kan ngaihven lehzual a ngai a ni, “He hrilh lâwkna bu thu chhiartu leh ngaithlaa a chhûnga thu ziak pawmtute chu an eng a thâwl e; a hun chu a hnai tawh si a,” tih hi. Dik tak chuan, “he hrilh lâwkna bu thu” hi kan ‘chhiar a, kan ngaihthlâk a, kan pawm’ a ngai a ni. Kan pawm ngai chûng thute zînga ṭhenkhat chu eng nge ni?

I BIAKNA CHU PATHIAN PAWM TLAK A NI TIH CHIAN RAWH

5. Engtin nge Thu Puan bu chuan kan biakna chu Jehova pawm tlâk a ni tih kan chian a pawimawhzia a târ lan?

⁵ Thu Puan bung khatna aṭangin, Isua chuan a mite awmna kohhrana thilthlengte chu a hre vek tih kan hria a. (Thup. 1:12-16, 20; 2:1) Asia Minor-a kohhran pasarih hnêna a thuchahah chutianga a hriatzia chu a târ lang a ni. Chûng a thuchahahte chuan, kum zabi khatnaa Kristiante hnênah an biakna chu Jehova pawm tlâk a ni tih chian tûrin kaihhruaina chiang tak a pe a. Chu bâkah, chûng thuchahte chu tûn laia Pathian mi zawng zawngte tân pawh a ni bawk. Kan tâna zir tûr chu eng nge ni? Kan Hruaitu Krista Isua chuan kan thlarau lam dinhmun chu a hre chiang hle a. A kaihhruaina leh vênhimna hnuaiah kan awm a, engkim a hmu vek a ni. Jehova duhsakna dawng zawm zêl thei tûra kan tih ngaite pawh a hre bawk. A nih leh, tûn laia kan zawm tûr eng kaihhruainate nge min pêk?

6. (a) Thu Puan 2:3, 4-a târ lan angin, Ephesi khuaa kohhran hnêna Isua thuchah chuan eng harsatna nge a târ lan? (b) Chuta ṭang chuan eng nge kan zir?

⁶ Thu Puan 2:3, 4 chhiar rawh. Jehova kan hmangaihna hmasa ber chu kan hloh tûr a ni lo. Ephesi khuaa kohhrana mite hnêna Isua thuchah chuan chhelna an neihzia leh harsatna hrang hrang kâra beidawng lova Jehova rawng an bâwl zawm zêl dânte a târ lang a. Mahse, an hmangaihna hmasa ber chu an hloh a ni. Chu an hmangaihna chu an tihthar leh a ngai; chuti lo chuan, an biakna chu pawm tlâk a ni lo vang. Chutiang bawkin, tûn laiah pawh, chhelna neih mai aia tam kan tih a ngai a. Chhan ṭha tak avânga kan chhel a ngai a ni. Kan Pathian chuan kan thiltihte chauh ni lovin, kan tih chhan pawh a ngaihven a. Kan biakna chu amah kan hmangaihna thûk tak leh a chunga kan lâwmnaa innghat tûra min duh avângin min chêttîrtu chu a tân a pawimawh hle a ni.—Thuf. 16:2; Mk. 12:29, 30.

7. (a) Thu Puan 3:1-3-a târ lan angin, Sardis khuaa kohhran chuan eng buaina nge an neih? (b) Eng nge kan tih ngai?

⁷ Thu Puan 3:1-3 chhiar rawh. Invêng leh harhvâng takin kan awm zawm zêl tûr a ni. Sardis khuaa kohhrana unaute chuan buaina dang a nei a. Tûn hmain Pathian rawngbâwlnaah ṭhahnemngai hle ṭhîn mah se, a hnuah an inthlahdah a. Chuvângin, Isua’n ‘invêng’ tûrin a hrilh a ni. Kan tâna zir tûr chu eng nge ni? Jehova chuan kan hnathawhte chu min theihnghilhsak lo vang. (Heb. 6:10) Chutih rualin, tûn hmaa a rawngbâwlnaa kan lo thawh tawhnate chu kan rinchhan thei lo. Tûn hma angin thawk tam thei tawh lo mah ila, “Lalpa hna” ṭhahnemngai taka thawk zawm zêl a, a tâwp thlenga invêng leh harhvâng taka kan awm a ngai a ni.—1 Kor. 15:58; Mt. 24:13; Mk. 13:33.

8. Thu Puan 3:15-17-a kan hmuh Laodikei khuaa unaute hnêna Isua thuchah aṭangin eng nge kan zir?

⁸ Thu Puan 3:15-17 chhiar rawh. Kan biaknaah ṭhahnemngai tak leh thinlung takin kan tel tûr a ni. Laodikei khuaa mite hnêna Isua thuchah chuan buaina dang a târ lang leh a. Anni chu biaknaah ‘lum chang changin’ an awm a ni. Thlarau lam thil an ngaihsak loh avângin, Isua’n “mi rethei, khawngaihthlâk” an nih thu a hrilh a. Jehova leh a biakna atâna ṭhahnemngaihna nasa tak an neih a ngai a ni. (Thup. 3:19) Kan tâna zir tûr chu eng nge ni? Ṭhahnemngaihna eng emaw chen kan hloh a nih chuan, thlarau lam ro hlu kan neihte avânga kan lâwmna chu kan tipung tûr a ni. (Thup. 3:18) Jehova biakna chu kan nuna thil pawimawh ber ni tawh lo khawpa tûna nun nuam tak neih chu kan tum ngai tûr a ni lo.

9. Pergamos leh Thuatira khuaa Kristiante hnêna Isua thuchahin a târ lan angin, kan pumpelh ngai thil hlauhawm chu eng nge ni?

⁹ Kalpêngte zirtîrna chu kan hnâwl tûr a ni. Isua chuan Pergamos khuaa mi ṭhenkhat chu an zînga inṭhen darhna an awmtîr avângin a zilh a. (Thup. 2:14-16) “Setana thil thûk” pumpelhtu Thuatira khuaa mite chu fakin, thutak “vawng tlat” tûrin a fuih a. (Thup. 2:24-27) Zirtîrna dik lote buma awm chumi khuaa Kristian chak lo takte chu an inlamlêt a ngai a ni. Kan chungchâng hi eng nge ni ve? Jehova ngaihtuahna nêna inkalh zirtîrna tawh phawt chu kan hnâwl tûr a ni. Kalpêngte chuan “Pathian ngaihsak anna” an nei mai thei a; mahse, “a thiltihtheihna chu an awih” duh lo. (2 Tim. 3:5) Taima taka Bible kan zir hian, chutiang zirtîrna dik lote hriat hran leh hnâwl chu a awlsam lehzual a ni.—2 Tim. 3:14-17; Jud. 3, 4.

10. Pergamos leh Thuatira khuaa kohhrante hnêna Isua thuchah aṭangin zir tûr dang eng nge kan neih?

¹⁰ Nungchang bawlhhlawhna tawh phawt chu kan hnâwl tûr a ni. Pergamos leh Thuatira khuaa mite chuan buaina dang pawh an nei a. Isua chuan chûng kohhrana awm mi ṭhenkhat chu nungchang bawlhhlawhna an hnâwl loh avângin a dem a ni. (Thup. 2:14, 20) Kan tâna zir tûr chu eng nge ni? Kum tam tak chhûng Jehova rawng kan lo bâwl tawh bâkah, tûnah ngei pawh chanvo hlu eng emaw zât kan nei a nih pawhin, Jehova chu nungchang bawlhhlawhnaa kan inhnamhnawihnate ngaizam tûrin kan beisei thei lo. (1 Sam. 15:22; 1 Pet. 2:16) Ani chuan khawvêl tehnate chu engtiang khawpin tlachhe mah se, nungchang lama a tehna sâng takte chu vawng reng tûrin min beisei a ni.—Eph. 6:11-13.

11. Eng thute nge kan sawiho tawh? (“Tûn Laia Kan Tâna Zir Tûrte,” tih bâwm chu en bawk rawh.)

¹¹ Engtin nge kan sawiho tâk thute kha kan khaikhâwm theih ang? Kan biakna chu Jehova pawm tlâk nihtîr a pawimawhzia kan hre tawh a. Kan biakna pawm tlâk lova siamtu thil eng emaw kan ti a nih chuan insiam ṭha tûra hma kan lâk vat a ngai a ni. (Thup. 2:5, 16; 3:3, 16) Mahse, Isua chuan chûng kohhrante hnênah chuan thil dang pawh a sawi bawk. Chu chu eng nge ni?

TIHDUHDAHNA CHHEL TAKA TAWRH INHUAM RAWH

12. Smurna leh Philadelphia khuaa unaute hnêna Isua thuchah aṭangin eng nge kan zir theih? (Thu Puan 2:10)

¹² Tûnah chuan, Smurna leh Philadelphia khuaa kohhrante hnêna Isua thuchah hi i lo ngaihtuah ang u. Ani chuan chuta Kristiante chu an rinawmna lâwmman an dawn dâwn avângin tihduhdahna tawrh chu hlau lo tûrin a hrilh a ni. (Thu Puan 2:10 chhiar rawh; 3:10) Kan tâna zir tûr chu eng nge ni? Tihduhdahna tawrh chu kan beisei tûr a ni a, chhel taka tawrh pawh kan inhuam bawk tûr a ni. (Mt. 24:9, 13; 2 Kor. 12:10) Engvângin nge he hriatnawntîrna hi a pawimawh?

13-14. Engtin nge Thu Puan bung 12-a târ lan thilthlengte chuan Pathian mite chungah nghawng a neih?

¹³ Thu Puan bu chuan Pathian mite chu tûn kan hun—“Lalpa nîah” hian tihduhdah an ni ang tih min hrilh a. Thu Puan bung 12-na chuan Pathian Ram a pian vêlah vânah indona a chhuak nghâl tih a târ lang a ni. Mikaela—chawimawia awm tawh Isua Krista—leh a vântirhkohte chuan Setana leh a ramhuaite chu an do va. (Thup. 12:7, 8) Chûng Pathian hmêlmate chu an tlâwm a, leia paihthlâk an ni a, lei leh a chhûnga chêngte chungah hrehawm tawrhna tam tak an thlen a ni. (Thup. 12:9, 12) A nih chuan, engtin nge chu thilthleng chuan Pathian mite chungah nghawng a neih?

¹⁴ Thu Puan bu chuan Setana chhân lêt dân chu min hrilh a. Vânah hmun a neih tawh loh avângin, lei lama Pathian Ram aiawhtu leh ‘Isua hriattîrna thu pawmtu’ hriak thih a la bângte chungah a thinrimna a hrithla a ni. (Thup. 12:17; 2 Kor. 5:20; Eph. 6:19, 20) Engtin nge chu hrilh lâwkna chu a thlen famkim?

15. Thu Puan bung 11-naa târ lan “thuhretu pahnihte” chuan tute nge an entîr a, an chungah eng nge thleng?

¹⁵ Setana chuan Lalram thu hrilh rawngbâwlnaa hmahruaitu hriak thih unaupate chu a bei a. Chûng unaute chuan Thu Puan bu-a tihhluma awm “thuhretu pahnihte” chu an entîr a ni.b (Thup. 11:3, 7-11) Kum 1918 khân, mawhphurhna nei unaupa pariatte chu dik lo taka puh an niin, rei tak tân ina khung tûra an chung thu rêl a ni a. Mihring thlîrna aṭang chuan chûng hriak thihte rawngbâwlna chu tihtâwpsak ang a ni.

16. Kum 1919 khân, eng thil mak danglam tak nge thleng a, chumi hun aṭang chuan Setana’n eng nge a tih zawm zêl?

¹⁶ Thu Puan bung 11-naa hrilh lâwkna chuan “thuhretu pahnihte” chu hun rei lo te hnuah tihnun leh an ni ang tih a sawi a. Chu hrilh lâwkna chu unaupate tân ina khung an nih aṭanga kum khat pawh a liam hmain, mak danglam takin a thleng famkim a ni. Kum 1919, March thlaah chûng hriak thihte chu tân in aṭanga chhuah zalen an ni a, a hnuah an puhnate pawh tihtâwpsak a ni. Unaute chuan Lalram rawngbâwlna hna chu an thawk zawm nghâl a. Mahse, chu thilthleng chuan Pathian mite chunga Setana beihna chu a titâwp chuang lo. Chumi hun aṭang chuan Setana’n Pathian mi zawng zawngte chungah tihduhdahna “lui” a luantîr a. (Thup. 12:15) Chuvângin, kan za hian “chhel tak leh rinawm taka” kan awm a ngai tak zet a ni.—Thup. 13:10.

JEHOVA MIN PEK HNAAH A KIMIN TEL RAWH

17. Pathian mite chuan Setana beihna an tâwk chung pawhin beisei loh takin eng ṭanpuina nge an dawn?

¹⁷ Thu Puan bung 12-na chuan Pathian mite’n an beisei lohna lam aṭanga ṭanpuina ṭhenkhat an dawn tûr thu a sawi leh a. Chu chu “lei chuan” tihduhdahna “lui” chu a lem zo ang a ni. (Thup. 12:16) Chutiang chiah chuan a thleng a. Setana khawvêla rorêlna thiltih ang chi thil ṭhenkhatte chu Pathian mite tâna chhan chhuahna a nih chângte pawh a awm a. Jehova chhiahhlawhte chuan court-a thu buai an neihahte chuan vawi tam tak hnehna an chang a, chu chuan zalênna eng emaw chen a neihtîr a ni. Engtin nge chûng an zalênna chu an hman? Jehova’n an hnêna a pêk hnate thawh nân hun remchâng an neih apiang chu ṭha takin an hmang a ni. (1 Kor. 16:9) Chu hnaah chuan eng nge tel?

18. He ni hnuhnûng chhûnga kan hnathawh bul ber chu eng nge ni?

¹⁸ Isua chuan tâwpna a lo thlen hmain a mite’n khawvêl pumah “[Pathian] Ram chanchin ṭha” an hril ang tih a sawi lâwk a. (Mt. 24:14) Chutianga an thu hrilhnaah chuan “leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra, chatuana chanchin ṭha nei” nia târ lan vântirhkoh pakhat, a nih loh leh vântirhkoh rual ṭanpuina chu an dawng a ni.—Thup. 14:6.

19. Jehova hmangaihtute chuan eng thuchah dang nge an puan ang?

¹⁹ Lalram chanchin ṭha chu Pathian mite puan chhuah tûr thuchah awm chhun a ni lo. Anni chuan Thu Puan bung 8 aṭanga bung 10-naa târ lan vântirhkohte hnathawh chu an thlâwp a ngai bawk. Chûng vântirhkohte chuan Pathian Ram hnâwltute tawrh tûr hremna râpthlâk tak takte an puang a. Chuvângin, Jehova Thuhretute chuan Setana khawvêl suaksual tak chunga Pathian rorêlna târ langtu “rial leh mei” nêna tehkhin rorêlna thuchah chu an puang a ni. (Thup. 8:7, 13) Mite chuan an nuna inthlâk danglamna lian tak an siam theih nân leh Jehova thinrimna nîa an dam khawchhuah theih nân, tâwpna a hnai tawh tih an hriat a ngai a. (Zep. 2:2, 3) Mahse, chu thuchah chuan ngaihven a hlawh lo hle. Chu thuchah puang tûr chuan huaisenna kan neih a ngai a ni. Hrehawm nasa tak chhûngin, rorêlna thuchah hnuhnûng ber chuan mite thin a tirim lehzual ang.—Thup. 16:21.

HRILH LAWKNA THUTE CHU ZAWM TLAT RAWH

20. A dawta thuziak pahnihah eng nge sawiho a nih ang?

²⁰ Thu Puan bu-a kan hmuh thute thlen famkimnaa kan tel avângin, ‘he hrilh lâwkna bu-a thute’ hi kan zawm a ngai tak zet a ni. (Thup. 1:3) A nih chuan, engtin nge rinawm taka tihduhdahna kan tawrh theih a, chûng thuchahte chu huaisen taka kan puan zawm zêl theih ang? Thil pahnih avângin tihchakin kan awm ang: pakhatna, Thu Puan bu-a Pathian hmêlmate chungchâng târ lanna leh pahnihna, kan rinawm zêl chuan nakina kan dawn tûr malsâwmnate hmangin a ni. A dawta thuziak pahnihah chûng thute chu sawiho a ni ang.