Thlarauvin Thu A Sawi Hi Ngaithla Rawh!
“Thlarauvin kohhranho pâwlte hnêna thu a sawi hi beng nei chuan hre rawh se.”—THU PUAN 3:22.
1, 2. Thu Puan bua kohhran pasarihte hnêna Isua thuchah tinah hian eng zilhna thu nge chuang ṭheuh?
JEHOVA chhiahhlawhte chuan Isua Krista’n Bible-a Thu Puan bua kan hmuh kohhran pasarihte hnêna thlarau kaihhruaia a sawi hi an ngaihsak ṭheuh tûr a ni. Hêng thuchah tinah hian: “Thlarauvin kohhranho hnêna thu a sawi hi beng nei chuan hre rawh se,” tih zilhna thu hi a tel zêl a ni.—Thu Puan 2:7, 11, 17, 29; 3:6, 13, 22.
2 Ephesi, Smurna, leh Pergamos khaw tirhkohte, a nih loh leh enkawltute hnêna Isua thuchah chu kan ngaihtuah tawh a. Kohhran dang palite hnêna thlarau thianghlim thusawi chu engtin nge kan hlâwkpui theih ang?
Thuatira Khua Tirhkoh Hnênah
3. Thuatira khua chu khawia awm nge ni a, a thil siam chhuah eng ber avângin nge a hmingthan?
3 “Pathian Fapa” chuan Thuatira kohhran chu fakna leh zilhna a pe ve ve a. (Thu Puan 2:18-29 chhiar rawh.) Thuatira (tûna Akhisar) chu Asia Minor khawthlang lama Gediz (hmân laia Hermus) Lui fintu lui bula awm a ni a. He khawpui hi kut themthiamna lama hmingthang tak a ni. A hmingthanna ber chu rawng sen duka rawng thlâk hi a ni a, a thlâktute chuan madder thing zung an hmang a ni. Paula’n Grik ram Philippi khua a tlawh ṭuma Kristiana inlet ta Ludi pawh kha “puan sen duk zuartu, Thuatira khua a mi,” a ni.—Tirhkohte 16:12-15.
4. Eng atân nge Thuatira kohhran chu fak a nih?
4 Isua chuan Thuatira kohhran chu an thiltih ṭhat te, hmangaihna te, rinna te, chhelna te, leh rawngbâwlnaa an thawh rimna te avângin a fak a. Dik tak phei chuan, ‘an thiltih hnuhnûng berte chu atîra mi aiin a nasa zâwk’ a ni. Nimahsela, chanchin ṭha tak kan neih pawhin, kan nungchang lamah kan fîmkhur lo ngai tûr a ni lo.
5-7. (a) “Hmeichhia Jezebeli” chu tunge ni a, a thununna chungchângah eng nge tih tûr ni ang? (b) Thuatira kohhran hnêna Krista thuchah chuan Pathian ngaihsak hmeichhiate chu eng ti tûrin nge a ṭanpui?
5 Thuatira kohhran chuan milem biakna te, zirtîrna der te, leh mipat hmeichhiatna lama bawlhhlawhna te a ngaizam mai mai a. An zîngah chuan “hmeichhia Jezebeli” a awm a—chu chu Israel Lalram hnam sâwm Lalnu Jezebeli ang rilru put hmang pu hmeichheho sawina a ni mai thei. Mi thiam ṭhenkhat chuan Thuatira khuaa ‘zâwlneinute’ chuan sumdâwnna pâwl pathiante leh pathiannute be tûr leh milem hnêna hlan tawh ei tûr thilte telna kûta tel tûrin Kristiante thlêm thlûk an tum tih an sawi. Tûn laia Kristian kohhranah hian, mahnia zâwlneinua insiam chawpte hian mi dang tumah kawihher vêl tum suh se!
6 Krista chuan ‘Jezebeli chu khumah a paih dâwn a ni; a uirêtute pawh chu, a thiltih chînte chu an simsan loh zawngin hrehawmna nasa takah a paih dâwn’ a ni. Enkawltute chu chutiang zirtîrna leh thununna hnuaiah chuan an intulût ngai tûr a ni lo va, Kristian tu tân mah “Setana thil thûk” chu a suaksual a ni tih hriat nân thlarau leh tisa lama inngaih kher emaw, mi lem biak kher emaw a ngai lo. Isua vaukhânna thu kan ngaihpawimawh chuan, ‘kan neih sa chu kan vuan tlat ang a,’ sualna chuan min hneh lo vang. Hriak thih tho lehte chuan Pathian ngaihsak lo chîn dante, hurna te, leh tumsânna te an hnâwl avângin, ‘hnam tin chungah thuneihna’ an dawng a, Krista nên chûng hnamte chu an tikehsawm ang. Tûn laia kohhrante hian entîr nei arsi a nei a, hriak thihte chu vân lam nuna kaihthawh an nih hunah, “arsi êng tak, vârparh,” Mo Neitu, Isua Krista chu pêk an ni ang.—Thu Puan 22:16.
7 Thuatira kohhran chu kalpêng hmeichhiate thununna suaksual tak ngaithei lo tûra hrilh a ni a. Kohhran hnêna thlarauva thâwk khum Krista thuchah chuan tûn laia Pathian ngaihsak hmeichhiate chu Pathian pêk dinhmuna ding tûrin a ṭanpui a ni. Mipa chunga thu neih an tum lo va, an unaupa tumah thlarau lam emaw, tisa lam emaw inngaihnaa hruai chu an tum bawk lo. (1 Timothea 2:12) Chutiang ai mah chuan, chûng hmeichhiate chuan Pathian chawimawi nâna thil ṭha tihah leh rawngbâwlnaah entawn tûr ṭha an siam zâwk a ni. (Sâm 68:11; 1 Petera 3:1-6) Kohhranin a thil neih sa—thurin thianghlim leh nungchang thianghlim leh Lalram rawngbâwlna ro hlu—chu an vawn tlat chuan, Krista chu phuba la tûr ni lovin, malsâwmna vûr tûrin a lo kal ang.
Sardis Khua Tirhkohte Hnênah
8. (a) Sardis chu khawiah nge a awm a, a chanchin kimchang ṭhenkhat chu engte nge ni? (b) Engvângin nge Sardis khuaa kohhran chuan ṭanpui a ngaih?
8 Sardik khuaa kohhran chuan thlarau lama a thih avângin, hmanhmawh taka ṭanpuina a mamawh a ni. (Thu Puan 3:1-6 chhiar rawh.) Thuatira chhim lam kilometer 50 vêla hlaa awm Sardis chu khawpui hausa tak a ni a. Sumdâwnna te, ram lei lung rah chhuah ṭha tak te, leh sahmul thawmhnaw leh carpet siam te chuan khawpui hausa tak a nihtîr a, thâwk khat lai phei chuan a chhûngah mi chêng 50,000 lai an awm a ni. Thilthleng chanchin ziak mi Josephusa sawi dânin, Sadis chuan B.C.E. kum zabi pakhatnaa Judaho chênna vêng lian tham tak a nei a ni. Khawpui tlu chhe tawh zîngah chuan biak in pakhat leh Ephesi mite pathiannu Diani biak in pakhat a tel a ni.
9. Pathian rawng kan bâwlna chu a hming mai a nih chuan eng nge kan tih ang?
9 Krista chuan Sardis kohhran hnênah: “I thiltihziate ka hria, thi reng si a, nung hming i put hi,” a ti. A nih leh thlarau lama harh hming pu si a, Kristian rawngbâwlna chanvo ngaihthah a, kan rawngbâwlnate chu a hming mai a nih bawk a, thlarau lama ‘thi lek lek’ kan nih chuan engtin nge ni ang? Chutiang kan nih chuan, Lalram thuchah ‘kan dawn leh ngaihthlâkte kha kan hre reng’ tûr a ni a, rawngbâwlna thianghlimah kan thawk rim lehzual tûr a ni a. Kristian inkhâwmnaah thinlung zawng zawngin kan tel ṭan tûr a ni bawk. (Hebrai 10:24, 25) Krista chuan Sardis khuaa kohhran chu heti hian a vaukhân a: “I invên loh zawngin rûkru angin ka lo kal ang a, eng hunah nge ka rawn phâwk dâwn che i hre dâwn si lo,” tiin. He vaukhânna hi kan hun atân a ni ve em? Keini pawhin nakin lawkah kan chanchin kan sawi a ngai dâwn a ni.
10. Sardis kohhran ang dinhmunah pawh, Kristian tlêm tê chu eng ang nge an nih mai theih?
10 Sardis kohhran ang dinhmunah pawh, ‘an puante tibawlhhlawh lo va, puanvâr sina Krista nêna lêng ve ṭhîn thei’ mi tlêm tê an awm mai thei a. Chûng mite chuan an Kristian nihna chu an vawng reng a, bawlhhlawh kai lo, he khawvêl nungchang leh sakhaw bawlhhlawhna kai lovin an awm a ni. (Jakoba 1:27) Chuvângin, Isua chuan ‘nunna bu ata an hming a thai bo tawp lo vang a, a Pa hmaah leh a vântirhkohte hmaah chuan an hming a ṭan zâwk ang.’ Krista nêna lêng dûn tlâka puan an nih avângin, a mo pâwl hriak thihte chu Pathian mi thianghlimte thiltih fel târ langtu puan nêm êng tak, fai tak, leh ṭha taka thuam an ni ang. (Thu Puan 19:8) Vâna anmahni nghâktu, an rawngbâwlna chanvo hlu tak neih tûr chuan he khawvêl ngam tûrin anni chu a chawk phûr a ni. Tin, lei lama chatuana nunna beiseitute pawh malsâwmnain a hmuak bawk a. An hming chu nunna buah ziak a ni ve a ni.
11. Thlarau lama kan muthilh chuan eng nge kan tih ang?
11 Kan zînga tumah hian Sardis khuaa kohhran thlarau lam dinhmun lungchhiatthlâk taka tlûk luh chu kan duh hauh lo vang. Mahse, thlarau lamah kan muthlu tih kan inhriat chuan engtin nge ni ang? Kan ṭhat nân chêt kan la vat tûr a ni. Pathian ngaihsak lo thiltihte lama hîp kan ni emaw, inkhâwmna emaw, rawngbâwlna emawa tel kan ngaihthah deuh emaw pawh a ni mai thei. Tih tak zeta ṭawngṭaiin, Jehova ṭanpuina i zawng ang u. (Philippi 4:6, 7, 13) Nî tina Bible chhiar a, Pathian Lehka Thu leh “sum enkawltu rinawm” chhuah thu leh hlate zirna chuan thlarau lama harhvâng tûrin min ṭanpui ang. (Luka 12:42-44) Tichuan, Sardis kohhrana Krista pawmzâwng mi tlêm tête ang kan lo ni ang a, kan rinpuite tân malsâwmna kan ni ang.
Philadelphia Khaw Tirhkoh Hnênah
12. Hmân lai Philadelphia khua sakhaw lam dinhmun chu engtin nge i sawi ang?
12 Isua chuan Philadelphia kohhran chu a fak a. (Thu Puan 3:7-13 chhiar rawh.) Philadelphia (tûna Alashir) chu Asia Monor khawthlang lama uain siamchhuahna hmunpui hausa tak a ni. An pathian lian ber pawh uain pathian, Dionysus a ni nghe nghe a. Philadelphia khuaa Judate chuan chuta Juda Kristiante chu Mosia Dân ṭhenkhat zâwm zêl tûr emaw, zâwm leh tûr emawin hmin an tum a; mahse, an hlawhchham a nih hmêl hle.
13. Engtin nge Krista’n “Davida chabi” a hman?
13 Krista chu “Davida chabi neia” a ni a; chuvângin, Lalram hmakhua zawng zawng leh rinna chhûngkaw zînga mite enkawlna zawng zawng chu a kuta dah a ni. (Isaia 22:22; Luka 1:32) Isua chuan chu chabi chu hmân lai Philadelphia leh hmun danga Kristiante tân Lalram lam thila inhman theihna hun remchâng hawn nân a hmang a ni. Kum 1919 aṭang khân, “sum enkawltu rinawm” hmaah chuan dotute khâr theih loh “kawngka zau tak” Lalram thuhrilh rawngbâwlnaa hruaitu chu a hawng a. (1 Korinth 16:9; Kolossa 4:2-4) “Setana inkhâwmna in” zînga mite tân erawh Lalram lam thila inhman theihna chanvote chu khâr tlat a ni, anni chu thlarau lam Israel an nih loh avângin.
14. (a) Philadelphia khuaa kohhrante chu Isua’n eng thu nge a tiam? (b) Engtin nge “fiahna hun” chhûnga tlu lo tûrin kan inhumhim theih?
14 Isua chuan hmân lai Philadelphia khuaa Kristiante chu heti hian thu a tiam a: “Ka chhelna thu i pawm avâng khân . . . fiahna hun lo thleng tûr lakah chuan kei pawhin ka humhim ang che,” tiin. Thuhrilh tûr chuan Isua lantîr ang chhelna kha neih a ngai a. Ani chu hmêlmate kutah a tlâwm ngai lo va, a Pa duhzâwng a tih reng zâwk ṭhîn a ni. Chuvângin, Krista chu vânah thi thei lo nun neia kaihthawh a ni a. Jehova be tûra kan thu tlûkna kan vawn ngheh tlat a, chanchin ṭha hrilhna hmanga Lalram kan thlâwp tlat chuan, “fiahna hun,” tûna fiahna hun chhûngah hian tlu lo tûra humhim tlat kan ni ang. Chûng Lalram hmakhuate tihpun tuma beihna hmangin, Krista hnên aṭanga ‘kan thil neih sa kha kan vawng tlat’ ang. Chutianga tihna lâwmman chu hriak thihte tân vân lam lallukhum hlu tak leh an ṭhian rinawm nghette tân leia chatuana nunna a ni ang.
15. ‘Pathian biak ina’ ban ni tûrte chu eng nge phût an nih?
15 Krista chuan: “A hnehtu apiang chu ka Pathian biak inah chuan banah ka siam ang a, . . . anmahniah chuan ka Pathian hming nên, ka Pathian khua, Jerusalem Thar, ka Pathian hnêna mi vân ṭanga lo chhuk tûr hming nên, ka hming thar nên ka ziak ang,” a tih zawm a ni. Hriak thih enkawltute chuan biakna dik chu an vuan tlat tûr a ni a, biakna dik an thlâwp tlat tûr a ni. Anni chu Pathian Lalram chanchin hrilhna leh thlarau lama thianghlim taka awmna hmangin, “Jerusalem thar” pâwla mi nih tling takin an awm reng tûr a ni. Vân lam biak in chawimawia ban nih an duh a, a vân lam khua leh tui anga Pathian khawpui hming chawi tûr leh a mo an nih anga Krista hming an ṭawm duh chuan chutianga an awm chu a ṭûl a ni. Tin, “thlarauvin kohhranho pâwlte hnêna thu a sawi” chu hre tûrin beng an nei ngei bawk tûr a ni.
Laodikei Khaw Tirhkoh Hnênah
16. Laodikei khaw chungchâng thudik ṭhenkhat chu engte nge ni?
16 Krista chuan Laodikei khuaa kohhran ngaihngam tak chu a zilhhau va. (Thu Puan 3:14-22 chhiar rawh.) Laodikei khua chu Ephesi chhak lam kilometer 150 vêla hla, Lycus Lui ruam ram ṭha taka awm sumdâwnna hmunpui a ni a, thil siam chhuahna khaw hausa tak a ni. Chu mi rama sahmul dum aṭanga siam thawmhnawte chu a lâr hle. Damdawi lam zirna school hmingthang tak awmna a nih avângin, mit damdawi Phryngian powder tia hriat hi Laodikei khua aṭanga siam chhuah a nih ngei a rinawm. Damdawi lam pathian Asclepius chu an khuaa pathian lian berte zînga pakhat a ni. Laodikei khuaah chuan Judaho an tam tham hle niin a lang a, an zînga ṭhenkhat chu an hausa thawkhat a ni.
17. Engvângin nge Laodikei mite chu zilhhau an nih?
17 Isua’n Laodikei “tirhkoh” hmanga chu kohhran a biaknaah, “thuhretu rinawm leh dik taka, Pathian thil siam bula” a nih angin thunei takin thu a sawi a ni. (Kolossa 1:13-16) Laodikei mite chu thlarau lama an ‘vawh hek loh va, an lum hek loh’ avângin zilhhau an ni. An lum chang chang chauh avângin, Krista chuan a kâ ata a chhâk chhuak dâwn a ni. Chu tehkhin thu chu an tân chuan hriat thiam harsa a ni lo vang. A bul lawka awm Heirapoli khua chuan tuisa lei aṭanga lo chhuak a nei a, Kolossa khua chuan a vâwt an nei thung si a. Tui chu hmun hla tak aṭanga Laodikei khuaa lâk a ngaih avângin, khawpui a rawn thlen meuh chuan a lum chang chang chauh tawh ṭhîn a ni. Kawng chanve chu tuikawng siam chawp hmanga lâk a ni a. Laodikei hnaih deuhvah chuan lung verh pawh bilat leia châr zawm hmanga lâk a ni.
18, 19. Engtin nge Laodikei khuaa mite ang tûn lai Kristiante chu ṭanpui theih an nih?
18 Laodikei khuaa mi ang tûn laia mite chu mi tiphûr khawpin an lum lo va, mi tiharh sawng sawng thei khawpin an vawt hek lo. Tui lum chang chang chauh ang maiin, ka aṭanga chhâk chhuah tûr an ni! Isua’n chûng mite chu hriak thih “Krista aia palai” ni a, a aiawha thusawitu atân a duh lo a ni. (2 Korinth 5:20) Chûng mite chu an inlamlêt a nih loh chuan, Lalram thu puangtu an nihna chanvo chu lâksak an ni ang. Laodikei mite chuan khawvêl hausakna an zawng a, ‘mi rethei, khawngaihthlâk, pachhia, mitdel, leh saruak an nih an inhre lo a ni.’ Tûn laia anmahni ang tupawh hian thlarau lama an retheihna te, mitdelna te, leh saruaka awmna te tibo tûrin, Krista hnên aṭangin fiah tawh rinna “rangkachak meia tihthianghlim te,” felna “puan vâr te,” leh thlarau lam khawhmuh tifiahtu “mit na hlo te” an lei a ngai a ni. Kristian enkawltute chuan chûng mite chu “rinnaa hausa” an lo nih theih nâna an thlarau lam mamawh ngaihven tûra ṭanpui chu an châk hle a ni. (Jakoba 2:5; Matthaia 5:3) Chu bâkah, enkawltute chuan thlarau lam “mit na hlo” hnawih tûra an ṭanpui a ngai bawk—Isua zirtîrna te, zilhna te, entawn tûr siam te, leh rilru put hmang te pawm a, chu mi mila nung tûrin. Hei hi “tisa châkna te, mit châkna te, dam chhûng ropuina lem te” aṭanga invênna a ni.—1 Johana 2:15-17.
19 Isua chuan a hmangaih apiang a zilhhau ṭhîn a. A hnuaia enkawltute pawhin nunnêmna nên chutiang takin an ti ve tûr a ni. (Tirhkohte 20:28, 29) Laodikei mite chuan ‘ṭhahnem ngai a, an sim’ a ngai a ni. Kan zînga ṭhenkhat hian Pathian hnêna rawngbâwlna thianghlim kan hlan chu thil pawimawh lo zâwka siam thei nunphung kan chîng em? Kan chîng a nih chuan, ṭhahnemngai taka Lalram zawn hmasak a pawimawhzia kan hmuh theih nân ‘Krista hnên aṭangin mit na hlo’ i lei ang u.—Matthaia 6:33.
20, 21. Tute’n nge Isua kawngka “kik” chu ṭha taka chhâng lêt a, chûngte chuan eng nge an beisei?
20 Krista chuan: “Ngai teh, kawngkhâr bula dingin ka kik hi; tupawhin ka aw hriaa kawng a hawn chuan a hnênah ka lût ang a, a hnênah zanriah ka ei ang a, ani pawhin ka hnênah a ei bawk ang,” a ti. Isua chuan chaw a ei pahin thlarau lam kaihhruaina a pe fo a ni. (Luka 5:29-39; 7:36-50; 14:1-24) Ani chuan Laodikei khuaa kohhran ang chi kohhrante kawngka chu a kik mêk a ni. Chu kohhran mi leh sate chuan a kawngka kik chu chhâng lêtin, amah an ngainatna chu tithar lehin, an zîngah lâwm lûtin, an inzirtîr ang em? Chutianga an lo tih chuan, Krista chuan thlarau lama an hlâwkpui atân ruai a ṭhehpui ang.
21 Tûn laia “berâm dang” pâwl chuan Isua chu an luhtîr a tih theih a, chu chuan chatuana nunna a thlen a ni. (Johana 10:16; Matthaia 25:34-40, 46) A hriak thih hnehtu apiangte chu Krista chuan ‘lalṭhutphahah a hnênah a ṭhuttîr ang, ani pawhin a hneh a, a Pa hnênah lalṭhutphaha a ṭhut ang khân.’ Ni e, hriak thih hnehtu chan changte hnênah Isua chuan vâna a Pa ding lama lalṭhutphaha a hnêna ṭhuttîrve a tiam a ni. Tin, hnehtu chan chang berâm dang zînga mite chuan Lalram awpna hnuaia lei hmun ropui tak chu an nghâk bawk.
Kan Zaa Kan Zir Tûr Chu
22, 23. (a) Engtin nge Kristian zawng zawngte’n kohhran pasarihte hnêna Isua thusawi hi an hlâwkpui theih? (b) Eng nge kan tum tlat tûr?
22 Asia Minor-a kohhran pasarihte hnêna Isua thusawite hi Kristian zawng zawngte’n an hlâwkpui thei tih chu rinhlelh rual a ni lo. Entîr nân, Krista’n an phu tâwka a fak dânte hian, hmangaihna ngah Kristian upate chu thlarau lama hrisêl kohhran leh mi malte fak tûrin a chêttîr a ni. Chak lohna a awm chuan, upate chuan an rinpuite chu Pathian Lehkha Thua damnate hmang tûrin an ṭanpui ṭhîn. Hêng kohhran pasarih hnêna Krista zilhna pêk chi hrang hrangte hi, tih tak zeta ṭawngṭaina nêna kan nunpui nghâl phawt chuan kan hlâwkpui ṭheuh thei a ni.a
23 He ni hnuhûngte hi ngaihngam hun, hausak âtchilh hun, a nih loh leh Pathian rawng a hming maia min bâwltîr thei thil dang rêng rêng buaipuina hun a ni lo. Chuvângin, kohhran zawng zawngte chu Isua’n ama hmun ṭheuhva a dah khâwnvârte angin êng reng rawh se. Kristian rinawm kan nih angin, Krista’n thu a sawi apiang ngaihsak ila, thlarauvin thu a sawi apiang zawm chu i tum nghet tlat ang u. Tichuan, Jehova ropui nâna êng kengtute angin, hlimna tluantling kan nei ang. (w03 5/15)
[Footnote]
a Thu Puan 2:1–3:22 hi Revelation—Its Grand Climax At Hand!, tih lehkhabu Jehova Thuhretute chhuah bung 7 aṭanga 13 chhûngah hian sawikhâwm a ni bawk.
Engtin Nge I Chhân Ang?
• “Hmeichhia Jezebeli” chu tunge ni a, engvângin nge Pathian ngaihsak hmeichhiate’n an entawn loh?
• Sardis khaw kohhran hi eng dinhmunah nge a din a, chuta chêng Kristian tam takte ang kan nih loh nân eng nge kan tih theih?
• Eng thutiam nge Isua’n Philadelphia khuaa kohhran chu a tiam a, chu chu tûn lai hunah eng anga hman nge ni?
• Engvângin nge Laodikei mite chu zilhhau an nih a, mahse Kristian ṭhahnemngai takte hmaah eng beiseina nge dah a nih?
[Phêk 30-naa milem]
“Hmeichhia Jezebeli” kawng suaksual chu pumpelh tûr a ni