Tâwpna A Hnaih Rual Hian Thuâwih Zir Rawh

“Hnam tinin [Silova] thu an âwih ang.”​—GENESIS 49:10.

1. (a) Hun kal tawhah khân, Jehova thuâwihnaah eng nge tel fo? (b) Thuâwihna chungchângah eng thu nge Jakoba’n a hrilh lâwk?

JEHOVA thuâwihnaah hian a aiawhtute thuâwih hi a tel fo va. A aiawhtute zîngah chuan vântirhkohte, hnam thlahtute, rorêltute, puithiamte, zâwlneite, leh lalte an tel a ni. Israel lalte lalṭhutthlêng chu Jehova lalṭhutthlêng tiha koh a ni hial a ni. (1 Chronicles 29:23) Lungchhiatthlâk takin, Israel rorêltu tam tak chuan Pathian thu an âwih lo va, anmahni leh an khua leh tuite chungah chungpikna an thlen a ni. Mahse, Jehova chuan a mi rinawm nghette chu beisei bovin a siam ngai lo; felna ngainatute’n a thu zawm nuam an tih tûr Lal ṭha a din tûr thu tiamin anni chu a thlamuan a ni. (Isaia 9:​6, 7) Hnam thlahtu Jakoba’n a thih hma lawk khân chu lal lo awm tûr chungchâng chu heti hian a hrilh lâwk a: “Lal tiang chu Juda lakah a bo lo vang a, rorêltu tiang chu a ke kâr ata a bo hek lo vang, Silova lo kal hma loh chuan; hnam tinin ama thu an âwih ang,” tiin.​—Genesis 49:10.

2. “Silova” tih chu engtihna nge ni a, a lal rorêlna hnuaiah tute nge tel dâwn?

² “Silova” tih chu Hebrai thu mal a ni a, “A Neitu,” a nih loh leh “A Neitu Tak” tihna a ni. Ni e, Silova chuan lal tiangin a entîr angin rorêl tûra dikna zawng zawng a chang ang a, rorêltu tiangin a entîr angin thupêk chhuah theihna a chang ang. Chu bâkah, a rorêlna hnuaiah chuan Jakoba thlahte mai ni lovin, ‘hnam tin’ an tel bawk ang. Chu chu Abrahama hnêna Jehova thutiam: “I thlahte chuan an dote kulh kawngkhâr chu an la neihsak ang . . . ka thu i âwih tâk avângin i thlahah chuan khawvêla hnam tin an la thawveng [“mal an insâwm,” NW] ang,” tih nên khân a inrem chiah a ni. (Genesis 22:​17, 18) Jehova chuan chu “thlah” chu Nazaret Isua a nihzia C.E. 29-ah thlarau thianghlima hriak thihin, a nemnghet ta a ni.​—Luka 3:​21-23, 34; Galatia 3:16.

Isua Lalram Hmasa Ber

3. Isua vâna a lâwn khân eng rorêlna nge a dawn?

³ Isua vâna a lâwn khân, khawvêla mi zawng zawngte chunga rorêlna lal tiang chu a la nghâl mai lo va. (Sâm 110:1) Nimahsela, khua leh tui thuâwih tak nei ‘lalram’ chu a chang ngei a ni. Tirhkoh Paula chuan: “[Pathian] chuan thim thuneihna laka min [thlarauva hriak thih Kristiante] chhan chhuakin, a Fapa hmangaih taka ramah chuan min kaitîr ta a,” tia a ziah khân chu a lalram chu a târ lang a ni. (Kolossa 1:13) Chu chhan chhuahna chu Pentikost C.E. 33-a Isua hnungzuitu rinawmte chunga thlarau thianghlim leihbuak a nih khân a inṭan a ni.​—Tirhkohte 2:​1-4; 1 Petera 2:9.

4. Eng kawngin nge zirtîr hmasate khân thuâwihna an lantîr a, engtin nge anni chu Isua’n pâwl pakhat anga a târ lan?

⁴ “Krista aia palai” an nih angin, thlarauva hriak thih zirtîrte chuan chu thlarau lam lalrama “tualkhat” an nihpui tûr mi dangte chu thuâwih takin an la khâwm ṭan a ni. (2 Korinth 5:20; Ephesi 2:19; Tirhkohte 1:8) Chu bâkah, an Lalber Isua Krista pawm an nihna tûrin hêng mite hi “rilru hmunkhat leh ngaihtuahna hmunkhata fel taka [an] inzawm tlat” reng a ngai bawk. (1 Korinth 1:10) Chu mi pâwl chu, “bawi rinawm, fing tak” emaw, sum enkawltu rinawm, fing tak emaw a ni.​—Matthaia 24:45; Luka 12:42.

“Enkawltu” Thuâwih Avânga Malsâwmna

5. Hmân lai hun aṭang tawhin, engtin nge Jehova chuan a mite a zirtîr?

⁵ Jehova chuan a mite tân zirtîrtu a pe reng a. Entîr nân, Judate Babulon aṭanga an rawn kîr khân, Ezra leh mi tling dangte chuan Pathian Dân chu mipuite hmaah an chhiar chhuak mai ni lovin, Pathian Thu ‘an chhiar chu hriat chiantîr zêlin’ “a awmzia an hrilhfiah” a ni.​—Nehemia 8:8.

6, 7. Engtin nge bawi pâwl chuan Governing Body hmangin a hun apianga thlarau lam chaw a pêk a, engvângin nge he bawi pâwl hnêna intukluh chu thil inâwm tak a nih?

⁶ Kum zabi pakhatna, C.E. 49-a serh tan leh tan loh chungchânga thu buai a chhuah khân, chutih hun laia bawi pâwl governing body chuan ṭawngṭaina nên chu mi chungchâng chu an ngaihtuah a, Pathian Lehkha Thu nêna inmil thu tlûkna an siam a ni. An thu tlûkna chu lehkha thawn hmanga an puan khân, kohhrante chuan chu kaihhruaina chu an âwih a, Pathian malsâwmna nasa tak an dawn phah a ni. (Tirhkohte 15:​6-15, 22-29; 16:​4, 5) Chutiang bawkin, tûn laiah pawh bawi fing tak chuan Governing Body hmangin thu pawimawh tak tak, Kristian tualdâwihna te, thisen thianghlimna te, leh ruihhlo leh vaihlo hman chungchâng te chu a hrilhfiah a. (Isaia 2:4; Tirhkohte 21:25; 2 Korinth 7:1) Jehova chuan a mite chu a Thu leh a bawi fing tak thu an âwih avângin, mal a sâwm a ni.

⁷ Bawi pâwl hnêna intukluhna hmangin, Pathian mite chuan an Hotu, Isua Krista laka an intukluhzia an lantîr bawk a. Chutiang intukluhna chuan tûn laiah awmzia a nei lehzual a ni; thihna khuma Jakoba hrilh lâwknain a sawi lâwk anga Isua thuneihna a pun tâk avângin.

Silova Chu Lei Lal Dik Tak A Lo Ni

8. Entikah leh engtin nge Isua thuneihna chu tihpun a nih?

⁸ Jakoba hrilh lâwkna chuan Silova’n ‘hnam tina ama thu âwihte’ a ho tûr thu a sawi lâwk a. Chiang takin, Krista rorêlna chuan thlarau lam Israelte chauh lo pawh a huam tel dâwn a ni. Eng nge a huam tel ang? Thu Puan 11:15 chuan heti hian a chhâng a ni: “Khawvêl ram chu kan Lalpa leh a Krista ram a lo ni ta, ani chuan chatuanin ro a rêl ang,” tiin. Isua chuan thuneihna chu hrilh lâwk thua “hun sarih”​—“Jentailte nî”—a kin hun, 1914-ah a dawng tih Bible chuan a târ lang a.a (Daniela 4:​16, 17; Luka 21:24) Chu mi kumah chuan, Messia Lal anga hmuh theih lohva Isua “lo awmlehna” chu a inṭan a; tin, ‘[amah] dotute zînga ro a rêl’ hun a inṭan bawk a ni.​—Matthaia 24:​3, NW; Sâm 110:2.

9. Isua’n a Lalram a chan khân eng nge a tih a, chu chuan mihringte, a bîk takin a zirtîrte chungah eng nghawng nge a neih?

⁹ Isua’n lal thuneihna a chan hnua a tih hmasak ber chu thuâwih lohna kawnga hriat hlawh ber​—Setana​—leh a ramhuaihote ‘leia paih thlâk’ chu a ni. Chuta ṭang chuan, chu thlarau suaksualte chuan Jehova thuâwih tiharsa tûr boruak an siam mai bâkah, tûn hmaa mihringte chunga la thleng ngai hauh lo khawpa chungpikna nasa tak chu an thlentîr a ni. (Thu Puan 12:​7-12; 2 Timothea 3:​1-5) Dik tak chuan, Setana’n thlarau lam indonaa a tum berte chu Jehova thlarau lam hriak thih, “Pathian thupêkte zâwma Isua hriattîrna thu pawmte” leh an ṭhian ‘berâm dangte’ an ni.​—Thu Puan 12:17; Johana 10:16.

10. Eng Bible hrilh lâwkna thleng famkimin nge Setana’n Kristian dikte a beihna a hlawhchham tûrzia nemnghet?

¹⁰ Nimahsela, Setana chu a hlawhchham chiang dâwn, a chhan chu tûn hi ‘Lalpa nî’ a ni a, Isua ‘hneh zêl tûra kal chhuahna’ chu engmahin a dan theih loh avângin. (Thu Puan 1:10; 6:2) Entîr nân, thlarau lam Israel 1,44,000 te chhinchhiahna hnuhnûng ber zawhna chu amah ngeiin a endik dâwn a. Tin, “mipui tam tak tuma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te” pawh a humhim bawk ang. (Thu Puan 7:​1-4, 9, 14-16) Nimahsela, an ṭhian hriak thihte ang lo takin, hêng mite hi Isua thuâwih lei lama khua leh tuite an ni thung dâwn a ni. (Daniela 7:​13, 14) Khawvêla an lo lanna ringawt pawh hian Silova chu “khawvêl ram” chunga Rorêltu dik tak a nihzia hmuh theihin a fiah dêr tawh a ni.​—Thu Puan 11:15.

Tûn Hi “Chanchin Ṭha Awih” Hun A Ni

11, 12. (a) He khawvêl tâwpnaah hian tute chauh nge dam khawchhuak dâwn? (b) “Khawvêl thlarau” hîptute chuan eng ang mizia nge an neih?

¹¹ Bible chuan “Pathian hre lo mi leh kan Lalpa Isua chanchin ṭha âwih lo mite” chu Pathian thinurna nîa an dam khawchhuah loh tûrzia a sawi chian hle avângin, chatuana nun duh apiangte chuan thuâwih an zîr tûr a ni. (2 Thessalonika 1:​6-8) Nimahsela, tûna khawvêl awm dân suaksual tak leh Bible dân leh thubulte laka helna rilru put hmang hian chanchin ṭha âwih chu a tiharsa hle.

¹² Bible chuan he Pathian huat zâwng rilru put hmang hi “khawvêl thlarau” a ti a. (1 Korinth 2:12) Mipuite chunga nghawng a neih dân sawifiahin, tirhkoh Paula chuan kum zabi pakhatnaa Ephesi Kristiante hnênah heti hian a sawi a ni: “Hmânah khân he khawvêl dân anga in awm kha, boruaka thuneihna lal, tûna âwih lo fate chhûnga thâwk mêktu thlarau dân ang hian. Chûng âwih lo fate zîngah chuan keini pawh hmânah chuan tisa leh rilru duhzâwng tiin, kan tisa châknate angin kan awm vek a, mi dangte ang bawkin thinurna faa piang rêng kan nih kha,” tiin.​—Ephesi 2:​2, 3.

13. Engtin nge Kristiante’n he khawvêl thlarau hi hlawhtling taka an hnâwl theih a, chu chuan eng hlâwkna nge a thlen?

¹³ Lâwmawm tak maiin, Ephesi khuaa Kristiante chu chutiang thuâwih lohna bawiah chuan an tâng reng lo. Pathian thlarauva intulûtin, Pathian fa thuâwih takte an lo ni a; a thlarau rah ṭha takte chu hnianghnâr takin an lo seng ta zâwk a ni. (Galatia 5:​22, 23) Chutiang bawkin, tûn laiah pawh, Pathian thlarau​—lei leh vâna chakna thiltithei ber​—chuan mi nuai tam takte chu a “tâwp thlenga beiseina famkim” an neih theih nâna Jehova thu lo âwih tûrin a ṭanpui a ni.​—Hebrai 6:11; Zakaria 4:6.

14. Engtin nge Isua chuan ni hnuhnûnga chêng Kristian zawng zawngte hnênah an thuâwihna fiahtu tûr thilte a hrilh?

¹⁴ Tin, Silova ṭanpuina thiltithei tak kan nei tih hi hre reng bawk la; amah leh a Pa chuan hmêlma tumah​—ramhuai emaw, mihring emaw​—chu kan tawrh theih bâkin kan thuâwihna an fiahtîr hauh lo vang. (1 Korinth 10:13) Dik takin, kan thlarau lam indonaa min ṭanpui tûrin, Isua chuan hêng ni hnuhnûnga harsatna kan tawh tûr engemaw zât chu min hrilh a ni. Chu chu tirhkoh Johana hnêna inlârnaa a pêk lehkha thawn pasarih hmangin min pe a ni. (Thu Puan 1:​10, 11) Chûngte chuan chutih laia Kristiante tân fuihna thu pawimawh tak a fûn chiang hle a; mahse, ‘Lalpa Nî,’ 1914 aṭanga inṭan atân a ni bîk a ni. Chuvângin, hêng thuchahte hi ngaihven tûr a va ni êm!b

Inngaihthahna, Nungchang Bawlhhlawhna, leh Sum Leh Pai Âtchilhna Pumpelh Rawh

15. Engvângin nge Ephesi khuaa kohhranin a tawn ang buaina lakah khân kan invên ang a, engtin nge kan invên theih ang? (2 Petera 1:​5-8)

¹⁵ Isua lehkha thawn hmasa ber chu Ephesi khuaa kohhran tân a ni a. A chhelna avânga chu kohhran chu a fak hnuah, Isua chuan heti hian a sawi a: “Nimahsela demna che ka nei a ni, i hmangaihna hmasa ber kha i bân tâk avângin,” tiin. (Thu Puan 2:​1-4) Tûn laiah pawh, Kristian ṭhahnemngai tak ni ṭhîn mi ṭhenkhat chuan an Pathian hmangaihna nasa tak kha an bân a ni. Chu chuan Pathian nêna inlaichînna a tihchauh theih avângin, chutiang mi chu hrilhhriat nghâl vat tûr a ni. Engtin nge chutiang hmangaihna chu tihthar theih a nih? Mumal taka Bible zir te, inkhâwmnaa tel te, ṭawngṭai te, leh rilrua chhût ngunna te hmangin a tihthar theih a ni. (1 Johana 5:3) Chu mi atân chuan ‘taihmâk rêng rêng chhuah’ a ngai ngei mai; mahse, a manhla a ni. (2 Petera 1:​5-8) Ngun taka i inchhûtna chuan i hmangaihna a dai tawh tih a târ lan chuan: “I tlûksan tâk chu hre reng la, simin, atîra i thiltihte kha ti leh rawh” tia Isua fuihna thu âwihin, insiamṭha nghâl thuai ang che.​—Thu Puan 2:5.

16. Pergamos leh Thuatira khuaa kohhranaah khân thlarau lama hlauhawm tak eng thil nge awm a, engvângin nge an hnêna Isua thu sawite chu tûn lai atân inâwm tak a nih?

¹⁶ Pergamos leh Thuatira khuaa Kristiante chu an rinawmna te, an chhêlna te, leh ṭhahemngaihna te avânga fak an ni a. (Thu Puan 2:​12, 13, 18, 19) Mahse, anni chu mipat hmeichhiatna leh Baal biaknaa hmân lai Israel tihbawlhhlawhtu Balaama leh Jezebeli rilru put hmang suaksual tak ang pu mite hnehin an awm a ni. (Numbers 31:16; 1 Lalte 16:​30, 31; Thu Puan 2:​14, 16, 20-​23) Anih leh kan hun​—‘Lalpa nî’​—chungchâng hi eng nge ni ve le? Chûng suahsualnate chu a awm em? Awm e, nungchang bawlhhawlhna chu Pathian mite zînga inhnawh chhuahna awmtîrtu bul ber a ni. Chuvângin, chutiang mi nungchang ṭha lote​—kohhran chhûnga mi an ni emaw, pâwna mi an ni emaw​—kawm loh chu a va pawimawh êm! (1 Korinth 5:​9-11; 15:33) Tin, Silova khua leh tui ni duhte chuan intihhlimna ṭha lêm lo leh zahmawh lam thil chuanna lehkhabu leh Internet te chu an hawisan bawk ang.​—Amosa 5:15; Matthaia 5:​28, 29.

17. Sardis leh Laodikei khuaa kohhrante thil thlîr dân leh rilru put hmang chu an thlarau lam dinhmun Isua thlîr dân nên eng anga khaikhin nge a nih?

¹⁷ Mi tlêm tê tih chauh lo chu, Sardis khuaa kohhran chuan fak hlawhna rêng a nei lo. Nung “hming” pu, a nih loh leh nung angin lang mah se, thlarau lam a ngaihthah nasat êm avângin Isua tân chuan a “thi” a ni. Chanchin ṭha thuâwihna chu tih dân phung pângngai ang lek a ni. Demna a va ni êm! (Thu Puan 3:​1-3) Laodikei khuaa kohhran pawh chutiang bawk a ni. Sum leh pai lama a hausakna chu chhuangin, “Ka hausa,” a ti a; mahse, Krista mithmuhah chuan, “mi rethei, khawngaihthlâk, pachhia, mitdel, saruak” a ni thung a ni.​—Thu Puan 3:​14-17.

18. Engtin nge Pathian mithmuha thlarau lama lum chang chang chauh nih chu a pumpelh theih?

¹⁸ Tûn laiah pawh, Kristian rinawm tak lo ni ṭhîn ṭhenkhatte chu chutiang bawk thuâwih lohnaah chuan an tlu lût a. Chûng mite chuan khawvêl thlarau chu an nun ata hmanhmawhthlâk a ni tih an hriatna lâk botîrin, Bible zir te, ṭawngṭai te, Kristian inkhâwm te, leh rawngbâwlnate ngaih pawimawh vak lohna neiin, thlarau lamah an lum chang chang a ni thei. (2 Petera 3:​3, 4, 11, 12) Chûng mite chuan Krista thuâwihna hmanga thlarau lam hausakna an khâwl khâwm chu a va pawimawh tak êm!​—a ni, ‘rangkachak meia tihthianghlim te . . . Krista hnêna mi leiin.’ (Thu Puan 3:18) Chutianga hausakna dik takah chuan ‘thil ṭha tih ngah te, thil phala thawhlâwm peih te’ a tel a ni. Hêng thil hlu tak takte khâwl khâwmna hmangin, ‘nunna, nunna taktak chu kan vawn theih nân, hun lo thleng tûr atân chuan lungphûm ṭha tak kan tân kan khâwl khâwm’ a ni.​—1 Timothea 6:​17-19.

Thuâwihna Avângin Fak An Hlawh

19. Smurna leh Philadelphia khuaa Kristiante hnênah eng fakna leh fuihna nge Isua’n a pêk?

¹⁹ Smurna leh Philadelphia khuaa kohhrante chu an tâna Isua lehkha thawnah chuan zilhna thu engmah a chuan ve loh avângin, thuâwih kawnga entawn tlâk leh langsâr tak an ni. Smurna mite hnênah chuan: “I hrehawmzia te, i pachhiatzia te (nimahsela i hausa si a) . . . ka hria,” tiin a ziak a ni. (Thu Puan 2:9) Laodikei khuaa mi, khawvêl thila an hausakna chapopui a, rethei hle site nên chuan an va inang lo êm! Diabola chuan Krista laka rinawmna leh thuâwihna lantîrtu tupawh chu a lâwm hauh lo. Chuvângin, Isua chuan: “I tuar tûrte hi hlau suh: ngai teh, fiaha in awm theih nân Diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm in tuar ang. Thih thlengin rinawmin lo awm rawh, tichuan nunna lallukhum ka pe ang che,” tiin a vaukhân a ni. (Thu Puan 2:10) Chutiang bawkin, Isua chuan Philadelphia kohhran pawh a fak a ni: “Ka thu i pawm [a nih loh leh, i âwih] a, ka hming pawh i phat lo va, . . . Ka lo kal thuai dâwn e; tuman i lallukhum chu an lâksak loh nân che i thil neih sa kha vawng tlat rawh,” tiin.​—Thu Puan 3:​8, 11.

20. Engtin nge tûn laia mi nuai tam takte chuan Isua thu an âwih a, eng dinhmun hnuaiah nge an âwih?

²⁰ ‘Lalpa nî’ kum 1914-a inṭan aṭang khân, mi rinawm la bângte leh an ṭhian berâm dang, tûna nuai tam tak ni tawhte chuan ṭhahnemngai taka rawngbâwlna leh an rinawmna vawn tlatna hmangin Isua thu an âwih a. Kum zabi pakhatnaa an unaute ang bawkin, ṭhenkhat chuan Krista thu an âwih avângin an tuar a, tân inah leh concentration camp-ah te hial dah an ni. Ṭhenkhat chuan hausakna leh duhâmnain a hualvêl chung pawhin, ‘an mit tihfîmna’ hmangin Isua thu an âwih bawk a ni. (Matthaia 6:​22, 23) Ni e, eng boruak leh eng dinhmunah pawh, Kristian dikte chuan an thuâwihna hmangin Jehova thinlung an tilâwm reng a ni.​—Thufingte 27:11.

21. (a) Eng thlarau lam mawhphurhna nge bawi pâwl chuan a hlen zawm zêl dâwn? (b) Engtin nge Silova thuâwih kan duh tak zetzia kan lantîr theih?.

²¹ Hrehawmna nasa tak a lo hnaih telh telh hian, “bawi rinawm, fing tak” chuan a Pu, Krista thu âwih chhoh zêl a tum ruh tlat a. Chutah chuan a hun apianga Pathian chhûngte tâna an thlarau lam chaw buatsaihsak pawh a tel a ni. Chuvângin, Jehova theocratic inawpna pâwl ropui tak leh a thil ruahmante chungah i lâwm zêl ang u. Hetianga kan tih hian, a khua leh tuite leh a thu thuâwihtute hnêna chatuan nunna petu tûr, Silova hnêna kan intukluhzia kan lantîr a ni ang.​—Matthaia 24:45-​47; 25:40; Johana 5:​22-​24. (w02 10/1)

[Footnote-te]

I Hre Chhuak Em?

• Jakoba thihna khuma hrilh lâwkna ang khân, Isua chu eng chanvo chang tûr nge a nih?

• Engtin nge Isua chu Silova anga kan hriat theih a, eng rilru nge kan pumpelh tûr?

• Thu Puan-a kohhran pasarihte hnêna lehkha thawnah khân, kan hun lai atâna hman theih zilhna thu engte nge chuang?

• Eng kawngin nge hmân lai Smurna leh Philadelphia khuaa kohhranho kha kan entawn theih?

[Phêk 14-naa milemte]

Jehova chuan a mite chu “enkawltu” rinawm tak thu an âwih avângin mal a sâwm ṭhîn

[Phêk 15-naa milem]

Setana thununna chuan Pathian thuâwih a tiharsa

[Phêk 17-naa milemte]

Jehova nêna inlaichînna ṭha tak chuan a thu âwih tûrin min ṭanpui