“ພະອົງເຫັນລູກຕັ້ງແຕ່ລູກຍັງເປັນໂຕອ່ອນ.”—ເພງສັນລະເສີນ 139:16
ອົງສັກສິດເຂົ້າໃຈເຈົ້າບໍ?
ວິທີທີ່ພະເຈົ້າສ້າງເຮົາບອກໃຫ້ຮູ້ຫຍັງ?
ສາຍສຳພັນແບບໜຶ່ງທີ່ໃກ້ຊິດທີ່ສຸດຂອງມະນຸດແມ່ນ ສາຍສຳພັນຂອງຝາແຝດ. ເຂົາເຈົ້າຜູກພັນກັນຫຼາຍເປັນພິເສດ. ແນນຊີ້ ຊີໂກ້ ຜູ້ອຳນວຍການສູນສຶກສາຝາແຝດແລະລາວເອງກໍມີຝາແຝດຄືກັນບອກວ່າ ຝາແຝດບາງຄູ່ເຖິງຂັ້ນ “ເວົ້າອັນໃດກໍເຂົ້າໃຈກັນໝົດທຸກເລື່ອງໂດຍບໍ່ຕ້ອງອະທິບາຍເລີຍ.” ຜູ້ຍິງຄົນໜຶ່ງເວົ້າເຖິງສາຍສຳພັນຂອງລາວກັບຄູ່ຝາແຝດວ່າ: “ເຮົາຮູ້ຈັກແລະຮູ້ໃຈກັນທຸກເລື່ອງ.”
ເປັນໄປໄດ້ແນວໃດ? ການວິໄຈສະແດງວ່ານອກຈາກສິ່ງແວດລ້ອມແລະການລ້ຽງດູຈະເປັນປັດໃຈຫຼັກແລ້ວ ລັກສະນະທາງພັນທຸກຳທີ່ຄ້າຍກັນຫຼາຍເປັນພິເສດກໍມີສ່ວນສຳຄັນຄືກັນ.
ລອງຄິດເບິ່ງ: ພະເຈົ້າຜູ້ອອກແບບພັນທຸກຳທີ່ເປັນຕາງຶດຂອງມະນຸດຕ້ອງເຂົ້າໃຈຕົວຕົນແລະອົງປະກອບຂອງເຮົາທຸກຄົນເປັນຢ່າງດີ. ດາວິດຜູ້ຂຽນເພງສັນລະເສີນບອກວ່າ: “ພະອົງປົກປ້ອງລູກຢູ່ໃນທ້ອງແມ່. ພະອົງເຫັນກະດູກທັງໝົດຂອງລູກ ຕອນທີ່ລູກຖືກສ້າງໃນບ່ອນທີ່ບໍ່ມີຜູ້ໃດເຫັນ . . . ພະອົງເຫັນລູກຕັ້ງແຕ່ລູກຍັງເປັນໂຕອ່ອນ. ທຸກສ່ວນຂອງລູກຖືກຈົດໄວ້ໃນປຶ້ມຂອງພະອົງ.” (ເພງສັນລະເສີນ 139:13, 15, 16) ມີແຕ່ພະເຈົ້າເທົ່ານັ້ນທີ່ຮູ້ແລະເຂົ້າໃຈແທ້ໆວ່ານອກຈາກລັກສະນະທາງພັນທຸກຳແລ້ວ ເຫດການທຸກຢ່າງທີ່ເກີດຂຶ້ນໃນຊີວິດກໍມີຜົນກັບບຸກຄະລິກແລະນິດໄສຂອງເຮົານຳ. ຖ້າພະເຈົ້າຮູ້ຈັກເຮົາດີຂະໜາດນີ້ແລະຮູ້ລັກສະນະທາງພັນທຸກຳຂອງເຮົາ ເຮົາກໍໝັ້ນໃຈໄດ້ວ່າເພິ່ນຕ້ອງເຂົ້າໃຈກ່ຽວກັບໂຕເຮົາແທ້ໆ.
ຄຳພີໄບເບິນສອນວ່າພະເຈົ້າເຂົ້າໃຈເຮົາ
ດາວິດອະທິດຖານວ່າ: “ພະເຢໂຫວາເອີ້ຍ ພະອົງໄດ້ກວດເບິ່ງລູກຢ່າງລະອຽດແລະພະອົງກໍຮູ້ຈັກລູກ. ລູກນັ່ງຕອນໃດແລະລູກຢືນຕອນໃດພະອົງກໍຮູ້. ຂະໜາດຢູ່ໄກໆພະອົງກໍຍັງຮູ້ຈັກຄວາມຄິດຂອງລູກ. ພະເຢໂຫວາເອີ້ຍ ລູກຍັງບໍ່ທັນໄດ້ເວົ້າຫຍັງຊ້ຳ ພະອົງກໍຮູ້ຈັກໝົດແລ້ວ.” (ເພງສັນລະເສີນ 139:1, 2, 4) ພະເຢໂຫວາຍັງເຂົ້າໃຈອາລົມຄວາມຮູ້ສຶກເລິກໆຂອງເຮົານຳ ແລະ “ຮູ້ຄວາມຄິດທຸກຢ່າງ” ຂອງເຮົາ. (1 ຂ່າວຄາວ 28:9; 1 ຊາມູເອນ 16:6, 7) ຂໍ້ຄຳພີເຫຼົ່ານີ້ບອກໃຫ້ຮູ້ຫຍັງກ່ຽວກັບພະເຢໂຫວາພະເຈົ້າ?
ເມື່ອອະທິດຖານ ເຮົາອາດບໍ່ໄດ້ເວົ້າຫຼືລະບາຍຄວາມຮູ້ສຶກທຸກຢ່າງອອກມາ ແຕ່ພະເຢໂຫວາພະເຈົ້າຜູ້ທີ່ສ້າງເຮົາກໍເຂົ້າໃຈຍ້ອນເພິ່ນສັງເກດເບິ່ງສິ່ງທີ່ເຮົາເຮັດ ແລະເພິ່ນຍັງເຂົ້າໃຈນຳວ່າເປັນຫຍັງເຮົາຈຶ່ງເຮັດແບບນັ້ນ. ບໍ່ແມ່ນແຕ່ສ່ຳນັ້ນ ເພິ່ນຍັງຮູ້ຈັກສິ່ງດີໆທີ່ເຮົາຢາກເຮັດ ແຕ່ພັດເຮັດບໍ່ໄດ້ຍ້ອນຂໍ້ຈຳກັດຕ່າງໆໃນຊີວິດ. ຍ້ອນພະເຢໂຫວາເປັນຜູ້ໃສ່ຄວາມຮັກໄວ້ໃນຫົວໃຈຂອງເຮົາຕັ້ງແຕ່ທຳອິດ ເພິ່ນຈຶ່ງສົນໃຈແລະຢາກເຫັນເຮົາຄິດແລະເຮັດໃນແບບທີ່ສະແດງຄວາມຮັກ.—1 ໂຢຮັນ 4:7-10
ບໍ່ມີຫຍັງທີ່ພະເຢໂຫວາພະເຈົ້າບໍ່ເຫັນ. ເພິ່ນຮູ້ວ່າເຮົາເຈິຄວາມຍາກລຳບາກຫຍັງແດ່ເຖິງວ່າຄົນອື່ນອາດຈະບໍ່ຮູ້ຫຼືບໍ່ເຂົ້າໃຈ.
ຄຳພີໄບເບິນຊ່ວຍເຮົາໃຫ້ໝັ້ນໃຈວ່າ
“ພະເຢໂຫວາເຝົ້າເບິ່ງຄົນທີ່ເຮັດສິ່ງທີ່ຖືກຕ້ອງ ແລະເພິ່ນຟັງຄຳອ້ອນວອນຂອງເຂົາເຈົ້າ.”—1 ເປໂຕ 3:12
ພະເຢໂຫວາສັນຍາວ່າ: “ເຮົາຈະໃຫ້ເຈົ້າມີຄວາມເຂົ້າໃຈແລະຊີ້ນຳເຈົ້າໃຫ້ໄປໃນທາງທີ່ເຈົ້າຄວນໄປ. ເຮົາຈະໃຫ້ຄຳແນະນຳເຈົ້າແລະເບິ່ງແຍງເຈົ້າສະເໝີ.”—ເພງສັນລະເສີນ 32:8
ພະເຢໂຫວາພະເຈົ້າມີຄວາມຮັກແລະເມດຕາ
ການຮູ້ວ່າພະເຢໂຫວາພະເຈົ້າເຂົ້າໃຈສະພາບການແລະຄວາມຮູ້ສຶກຂອງເຮົາ ມັນຊ່ວຍເຮົາໃຫ້ອົດທົນກັບຄວາມຍາກລຳບາກໄດ້ແນວໃດ? ຜູ້ຍິງຄົນໜຶ່ງຊື່ອັນນາຈາກປະເທດນີເຊເຣຍເລົ່າວ່າ: “ຊີວິດຂ້ອຍມີແຕ່ບັນຫາ ຂ້ອຍຈຶ່ງໝົດຫວັງກັບຊີວິດ. ຂ້ອຍເປັນແມ່ໝ້າຍແລະມີລູກສາວຜູ້ໜຶ່ງ. ຕອນທີ່ລູກເຂົ້າໂຮງໝໍຍ້ອນມີນ້ຳອັ່ງໃນສະໝອງ ທ່ານໝໍກໍກວດພໍ້ວ່າຂ້ອຍເປັນມະເຮັງເຕົ້ານົມ. ຂ້ອຍຕ້ອງໄດ້ຜ່າຕັດ ເຮັດເຄມີບຳບັດ ແລະສາຍແສງ. ມັນຍາກອີ່ຫຼີຍ້ອນຂ້ອຍເອງກໍບໍ່ສະບາຍແຮງແລະຍັງຕ້ອງໄດ້ເບິ່ງແຍງລູກທີ່ນອນຢູ່ໂຮງໝໍນຳອີກ.”
ອັນໃດຊ່ວຍອັນນາໃຫ້ຮັບມືໄດ້? “ຂ້ອຍຄິດເຖິງຂໍ້ຄຳພີຫຼາຍຂໍ້ ເຊັ່ນ: ຟີລິບປອຍ 4:6, 7 ທີ່ບອກວ່າ ‘ສັນຕິສຸກຂອງພະເຈົ້າທີ່ເກີນຄວາມເຂົ້າໃຈທຸກຢ່າງກໍຈະປົກປ້ອງຫົວໃຈແລະຄວາມຄິດຂອງພວກເຈົ້າໄວ້.’ ທຸກເທື່ອທີ່ຄິດເຖິງຂໍ້ຄຳພີນີ້ ຂ້ອຍຮູ້ສຶກໃກ້ຊິດກັບພະເຢໂຫວາຍ້ອນຮູ້ວ່າເພິ່ນເຂົ້າໃຈຂ້ອຍດີກວ່າທີ່ຂ້ອຍເຂົ້າໃຈໂຕເອງ. ຂ້ອຍຍັງໄດ້ຮັບກຳລັງໃຈຈາກພີ່ນ້ອງໃນປະຊາຄົມນຳ.
ເຖິງວ່າຂ້ອຍຍັງຕ້ອງຕໍ່ສູ້ກັບບັນຫາສຸຂະພາບຢູ່ ແຕ່ສະພາບການຂອງຂ້ອຍກັບລູກສາວກໍດີຂຶ້ນ. ຍ້ອນເຮົາມີພະເຢໂຫວາຢູ່ຄຽງຂ້າງ ເຮົາໄດ້ຮຽນຮູ້ວ່າບໍ່ຄວນຄິດໃນແງ່ລົບເມື່ອເຈິບັນຫາ. ຢາໂກໂບ 5:11 ບອກວ່າ: ‘ພວກເຮົາຖືວ່າຄົນທີ່ອົດທົນກໍມີຄວາມສຸກ. ພວກເຈົ້າກໍເຄີຍໄດ້ຍິນວ່າໂຢບອົດທົນຫຼາຍສ່ຳໃດແລະຮູ້ວ່າໃນທີ່ສຸດພະເຢໂຫວາໄດ້ອວຍພອນລາວແນວໃດ. ເລື່ອງນີ້ສະແດງວ່າພະເຢໂຫວາມີຄວາມອີ່ຕົນແລະເຫັນອົກເຫັນໃຈຫຼາຍແທ້ໆ.’” ພະເຢໂຫວາເຂົ້າໃຈແລະຮູ້ທຸກຢ່າງທີ່ເກີດຂຶ້ນໃນຊີວິດຂອງໂຢບ. ເຮົາກໍໝັ້ນໃຈໄດ້ຄືກັນວ່າເພິ່ນເຂົ້າໃຈບັນຫາແລະຄວາມຍາກລຳບາກຕ່າງໆທີ່ເຮົາເຈິ.