“ຍ້ອນພວກເຈົ້າມີຄ່າຫຼາຍກວ່າ.”—ມັດທາຍ 10:31
ອົງສັກສິດສົນໃຈເຈົ້າບໍ?
ວິທີທີ່ພະເຈົ້າສ້າງມະນຸດບອກເຮົາໃຫ້ຮູ້ຫຍັງ?
ໃນໄລຍະ 1 ຊົ່ວໂມງທຳອິດທີ່ແອນ້ອຍເກີດມາເປັນຊ່ວງເວລາທີ່ສຳຄັນຫຼາຍສຳລັບການປັບໂຕຂອງແອນ້ອຍ. ເປັນຫຍັງຈຶ່ງສຳຄັນ? ຍ້ອນວ່າເມື່ອແມ່ສ້າງສາຍສຳພັນທີ່ໃກ້ຊິດກັບລູກໃນໄລຍະນີ້ ມັນຈະກະຕຸ້ນການເຕີບໃຫຍ່ແລະພັດທະນາການຂອງລູກໄດ້ຫຼາຍ.a
ອັນໃດເຮັດໃຫ້ແມ່ເບິ່ງແຍງລູກນ້ອຍຢ່າງອ່ອນໂຍນ? ສາສະດາຈານເຈເນັດ ເຄຣນຊໍ ອະທິບາຍໃນປຶ້ມການສຶກສາແລະການໃຫ້ຄວາມຮູ້ກັບພໍ່ແມ່ກ່ຽວກັບການເກີດລູກແລະການເບິ່ງແຍງລູກໃນໄລຍະເກີດໃໝ່ (The Journal of Perinatal Education) ວ່າ “ເມື່ອແມ່ຈັບບາຍລູກ ແນມເບິ່ງລູກ ແລະເອົານົມໃຫ້ລູກກິນ” ລະດັບຮອກໂມນອອກຊິໂທຊິນຈະເພີ່ມຂຶ້ນແລະ “ກະຕຸ້ນຄວາມຮູ້ສຶກຂອງຄວາມເປັນແມ່” ແລະຕອນນັ້ນຈະມີຮອກໂມນອີກຊະນິດໜຶ່ງຫຼັ່ງອອກມາເຊິ່ງ “ຊ່ວຍໃຫ້ແມ່ຕອບສະໜອງຕໍ່ຄວາມຕ້ອງການຂອງລູກ” ແລະເຮັດໃຫ້ແມ່ກັບລູກມີສາຍສຳພັນກັນ. ເປັນຫຍັງເລື່ອງນີ້ຈຶ່ງສຳຄັນ?
ພະເຢໂຫວາພະເຈົ້າbເປັນຜູ້ອອກແບບສາຍສຳພັນທີ່ໃກ້ຊິດລະຫວ່າງແມ່ກັບລູກນ້ອຍທີ່ຫາກໍເກີດ. ກະສັດດາວິດຍົກຍ້ອງພະເຢໂຫວາຍ້ອນເພິ່ນພາລາວ “ອອກມາຈາກທ້ອງແມ່” ແລະເຮັດໃຫ້ລາວປອດໄພຢູ່ໃນອ້ອມກອດຂອງແມ່. ດາວິດອະທິດຖານວ່າ: “ພະອົງເບິ່ງແຍງລູກຕັ້ງແຕ່ລູກເກີດ. ພະອົງເປັນພະເຈົ້າຂອງລູກຕັ້ງແຕ່ລູກຍັງຢູ່ໃນທ້ອງແມ່.”—ເພງສັນລະເສີນ 22:9, 10
ລອງຄິດເບິ່ງ: ຖ້າພະເຢໂຫວາສ້າງລະບົບທີ່ຊັບຊ້ອນເພື່ອໃຫ້ແມ່ຕອບສະໜອງຕາມຄວາມຕ້ອງການຂອງລູກແລະເບິ່ງແຍງລູກຢ່າງອ່ອນໂຍນ ນັ້ນກໍສະແດງວ່າເພິ່ນສົນໃຈເຮົາແຕ່ລະຄົນ ຍ້ອນເຮົາເປັນ “ລູກຂອງພະເຈົ້າ.”—ກິດຈະການ 17:29
ຄຳພີໄບເບິນສອນວ່າພະເຢໂຫວາເຝົ້າເບິ່ງເຮົາດ້ວຍຄວາມເປັນຫ່ວງ
ພະເຢຊູຮູ້ຈັກພະເຢໂຫວາດີກວ່າເຮົາທຸກຄົນ ພະເຢຊູສອນວ່າ: “ນົກກະຈອກ 2 ໂຕເຂົາເຈົ້າຂາຍບໍ່ຈັກກີບ ແຕ່ບໍ່ມີຈັກໂຕຈະຕົກລົງດິນໂດຍທີ່ພະເຈົ້າພໍ່ຂອງພວກເຈົ້າບໍ່ຮູ້ຈັກ. ຂະໜາດຜົມຂອງພວກເຈົ້າເພິ່ນກໍນັບໄວ້ແລ້ວທຸກເສັ້ນ. ດັ່ງນັ້ນ ບໍ່ຕ້ອງຢ້ານ ຍ້ອນພວກເຈົ້າມີຄ່າຫຼາຍກວ່ານົກກະຈອກຫຼາຍໂຕລວມກັນ.”—ມັດທາຍ 10:29-31
ປົກກະຕິແລ້ວເຮົາບໍ່ໄດ້ສົນໃຈນົກໂຕນ້ອຍໆທຸກໂຕທີ່ເຮົາເຫັນ. ເຮົາເກືອບບໍ່ໄດ້ສັງເກດຊ້ຳວ່າມີໂຕໃດຕົກລົງດິນແດ່. ແຕ່ພະເຢໂຫວາພໍ່ຂອງເຮົາທີ່ຢູ່ໃນສະຫວັນສັງເກດເບິ່ງນົກທຸກໂຕ! ເຖິງວ່າເອົານົກເຫຼົ່ານີ້ຫຼາຍໆໂຕມາລວມກັນກໍຍັງບໍ່ມີຄ່າສ່ຳກັບມະນຸດຄົນໜຶ່ງ. ສະນັ້ນ ບໍ່ຕ້ອງຢ້ານວ່າພະເຢໂຫວາຈະບໍ່ສົນໃຈເຈົ້າ. ເພິ່ນສົນໃຈເຈົ້າຫຼາຍອີ່ຫຼີ!
ພະເຢໂຫວາພະເຈົ້າສົນໃຈເຮົາແລະເຝົ້າເບິ່ງເຮົາດ້ວຍຄວາມຮັກແລະຄວາມເປັນຫ່ວງ
ຄຳພີໄບເບິນຊ່ວຍເຮົາໃຫ້ໝັ້ນໃຈວ່າ
“ພະເຢໂຫວາເຫັນສິ່ງທີ່ເກີດຂຶ້ນທຸກບ່ອນ. ເພິ່ນເບິ່ງທັງຄົນດີແລະຄົນຊົ່ວ.”—ສຸພາສິດ 15:3
“ພະເຢໂຫວາເຝົ້າເບິ່ງຄົນທີ່ເຮັດສິ່ງທີ່ຖືກຕ້ອງ ແລະເພິ່ນຟັງຄຳຮ້ອງຂໍຄວາມຊ່ວຍເຫຼືອຂອງເຂົາເຈົ້າ.”—ເພງສັນລະເສີນ 34:15
“ລູກດີໃຈຫຼາຍຍ້ອນພະອົງຮັກລູກຢ່າງໝັ້ນຄົງ. ພະອົງເຫັນຄວາມທຸກຂອງລູກແລ້ວ ແລະພະອົງກໍຮູ້ວ່າລູກເຈັບປວດຫຼາຍສ່ຳໃດ.”—ເພງສັນລະເສີນ 31:7
“ຂ້ອຍຮູ້ສຶກວ່າພະເຢໂຫວາບໍ່ຮັກຂ້ອຍ”
ການຮູ້ວ່າພະເຢໂຫວາພະເຈົ້າສົນໃຈເຮົາແລະເຝົ້າເບິ່ງເຮົາດ້ວຍຄວາມຮັກແລະຄວາມເປັນຫ່ວງ ມັນຊ່ວຍເຮົາແນວໃດ? ໃຫ້ເບິ່ງເລື່ອງຂອງຮັນນາcຈາກປະເທດອັງກິດ. ລາວເລົ່າວ່າ:
“ມີຫຼາຍເທື່ອອີ່ຫຼີທີ່ຂ້ອຍຮູ້ສຶກວ່າພະເຢໂຫວາບໍ່ຮັກແລະບໍ່ຕອບຄຳອະທິດຖານຂອງຂ້ອຍ. ຂ້ອຍຄິດວ່າຄືຊິເປັນຍ້ອນຂ້ອຍບໍ່ມີຄວາມເຊື່ອຫຼາຍພໍ. ຂ້ອຍຮູ້ສຶກຄືກັບຖືກລົງໂທດແລະບໍ່ໄດ້ຮັບຄວາມສົນໃຈຍ້ອນບໍ່ມີຄວາມສຳຄັນຫຍັງ. ຂ້ອຍຮູ້ສຶກວ່າພະເຢໂຫວາບໍ່ສົນໃຈຂ້ອຍຈັກໜ້ອຍເລີຍ.”
ແຕ່ຕອນນີ້ຮັນນາໝັ້ນໃຈແລ້ວວ່າພະເຢໂຫວາສົນໃຈແລະຮັກລາວ. ອັນໃດເຮັດໃຫ້ຄວາມຮູ້ສຶກຂອງຮັນນາປ່ຽນໄປ? ລາວບອກວ່າ: “ມັນຄ່ອຍໆປ່ຽນ. ຂ້ອຍຈື່ໄດ້ວ່າມີຄຳບັນລະຍາຍໜຶ່ງໃນຫຼາຍປີກ່ອນທີ່ເວົ້າກ່ຽວກັບຄ່າໄຖ່ຂອງພະເຢຊູເຮັດໃຫ້ຂ້ອຍເລີ່ມປ່ຽນຄວາມຄິດ. ຄຳບັນລະຍາຍນັ້ນເຮັດໃຫ້ຂ້ອຍໝັ້ນໃຈວ່າພະເຢໂຫວາຮັກຂ້ອຍ. ເມື່ອຄຳອະທິດຖານຂອງຂ້ອຍໄດ້ຮັບຄຳຕອບ ຂ້ອຍກໍມັກຈະຮ້ອງໄຫ້ຍ້ອນຂ້ອຍເຂົ້າໃຈແລ້ວວ່າທີ່ຈິງພະເຢໂຫວາຮັກຂ້ອຍຫຼາຍ. ການສຶກສາຄຳພີໄບເບິນແລະການເຂົ້າຮ່ວມປະຊຸມເຮັດໃຫ້ຂ້ອຍຮູ້ຈັກພະເຢໂຫວາຫຼາຍຂຶ້ນ ໄດ້ຮຽນຮູ້ກ່ຽວກັບນິດໄສໃຈຄໍຂອງເພິ່ນ ແລະຮູ້ວ່າເພິ່ນຮູ້ສຶກແນວໃດກັບເຮົາ. ຕອນນີ້ຂ້ອຍເຫັນແຈ້ງແລ້ວວ່າພະເຢໂຫວາພ້ອມທີ່ຈະຊ່ວຍເຫຼືອເຮົາ ເພິ່ນຮັກແລະຢາກເບິ່ງແຍງເຮົາທຸກຄົນ.”
ຄຳເວົ້າຂອງຮັນນາໃຫ້ກຳລັງໃຈເຮົາຫຼາຍແທ້ໆ. ແຕ່ເຮົາຈະໝັ້ນໃຈໄດ້ແນວໃດວ່າພະເຢໂຫວາພະເຈົ້າເຂົ້າໃຈເຈົ້າແລະບໍ່ລືມຄວາມຮູ້ສຶກຂອງເຈົ້າ? ບົດຕໍ່ໄປຈະຕອບຄຳຖາມນີ້.
a ຜູ້ຍິງບາງຄົນທີ່ມີອາການຊຶມເສົ້າຫຼັງຈາກເກີດລູກອາດຮູ້ສຶກວ່າຍາກທີ່ຈະສ້າງສາຍສຳພັນກັບລູກ. ແຕ່ເລື່ອງນີ້ບໍ່ແມ່ນຄວາມຜິດຂອງແມ່. ລາຍງານຈາກສະຖາບັນສຸຂະພາບຈິດຂອງປະເທດອາເມຣິກາບອກວ່າ ອາການຊຶມເສົ້າຫຼັງຈາກເກີດລູກ “ອາດເກີດຈາກປັດໃຈຫຼາຍຢ່າງທາງຮ່າງກາຍແລະຈິດໃຈ . . . ແຕ່ບໍ່ໄດ້ເປັນຍ້ອນແມ່ໄດ້ເຮັດບາງຢ່າງ.” ສຳລັບຂໍ້ມູນເພີ່ມເຕີມກ່ຽວກັບເລື່ອງນີ້ ໃຫ້ເບິ່ງບົດຄວາມ “ຂ້ອຍເອົາຊະນະພາວະຊຶມເສົ້າຫຼັງເກີດລູກ” ໃນຕື່ນເຖີດ! 8 ສິງຫາ 2002. (ພາສາໄທ)
b ພະເຢໂຫວາເປັນຊື່ຂອງພະເຈົ້າຕາມທີ່ບອກໄວ້ໃນຄຳພີໄບເບິນ.—ເພງສັນລະເສີນ 83:18
c ຊື່ສົມມຸດ