Ahkpahye Tuhlihk Fuhsr Nuhtum An in Kuhlwacnsuhpuh Jeova

“Ac Jesus el kapkapack in lahlmwetmwet ac in luhmahl ac el arlacna ohi yurin God ac yurin mwet uh.”​—LUKE 2:52.

ON: 41, 11

KOM KAHSRUH FUHKAH TUHLIHK FUHSR NUHTUM AN KE KOM ETAHI MWE SRIHKASRAK LAL JESUS KE OHIYEN . . .

luhngse?

inse puhsisacl?

etwacack ac kahlwem?

1, 2. (a) Meac kuhtuh pahpah ac ninac kiyacn mwet fuhsr uh elyah kac? (b) Ma wo fuhkah tuhlihk srihsrihk uh kuh in eis ke pacl se eltahl eklac mwet fuhsr?

SIE pacl in engan na yohk luhn pahpah ac ninac ke tuhlihk nahtuhltahl uh bacptaislac. Tuhlihk ahkosr nohfohn nahtuhl Berenice ah bacptaislac meet liki eltahl sun yac 14. El fahk: “Pacl in engan se lasr pa inge. Pwacye lah kuht arlacna srui lah tuhlihk nahtuhsr uh ke kuhlwacnsuhpuh Jeova. Tuhsruhktuh, kuht etuh pac lah arlacna puhs ma upac ma tuhlihk nahtuhsr uh ac sun ke eltahl sun matwacn mwet fuhsr.” Tuhlihk mukul kuh muhtwacn nuhtum an fin sie mwet fuhsr kuh ac apkuhran nuh ke matwac inge, sahp kom oacyacpac elyah ke ma inge.

² Sie mwet ma lutlut yohk ke ohiyen tuhlihk uh fahk lah matwac se luhn mwet fuhsr uh pa upac emeet nuh sin pahpah, ninac ac tuhlihk uh. Tuhsruhktuh, pahpah ac ninac tiac enenuh in nuhnkuh muh tuhlihk nahtuhltahl uh usrnguck kuh elahn tuhlihk srihsrihk. El fahk pac lah mwet fuhsr uh lwemlwem, loal nuhnak laltahl uh ac oasr enenuh se laltahl in wi kawuck laltahl uh. Pwacnacng ke eltahl srackna fuhsr, tuhlihk nuhtum an kuh in muhsaheack fototo laltahl nuh sin Jeova, in oacna ma Jesus el oruh ke el srihk ah. (Riti Luke 2:52.) Eltahl kuh pac in kapkapack ke orekma in luti uh ac in muhsaheack kena laltahl in ahkyohkye kuhlwacnsap laltahl nuh sin God uh. Ac eltahl ac kuh in sifacna sulaclah eltahl fin ke wuhlelah moul laltahl uh nuh sin Jeova ac ahksol. Tuh oacna sie pahpah kuh ninac, meac kom kuh in oruh in ahkpahye tuhlihk fuhsr nuhtum an in kuhlwacnsuhpuh Jeova? Kom kuh in lotwelah ke inkacnek ma Jesus el ahkpahye mwet tuhma lutlut lal ah ke ohiyen luhngse, inse puhsisacl ac kahlwem.

LUHNGSE TUHLIHK FUHSR NUHTUM AN

3. Mwet sap ah etuh fuhkah lah Jesus el kawuck se laltahl?

³ Jesus el kawuck na oaru ac luhngse se. (Riti John 15:15.) Ke pacl luhn mwet in Bible uh, sie leum el suhkwac sramsram nuh sin mwet kuhlwacnsap lal ke ma el nuhnkuh ac puhlakihn. Tuhsruhktuh Jesus el tiac oruh mwet tuhma lutlut lal ah in oacna mwet kuhlwacnsap. El luhngse eltahl ac el oraclah pacl in weluhltahl. El engan in fahk nuh seltahl ma el nuhnkuh ac puhla uh. Ke pacl eltahl ahkkahlwemye ma eltahl nuhnkuh ac puhla uh, el lohacng ahkwoyac nuh seltahl. (Mark 6:30-32) Inkacnek in sramsram inmahsrlol Jesus ac mwet sap lal uh oruh eltahl arlacna fototo nuh sie. Ma inge oruh pac mwet sap ah in ahkolah nuh ke orekma ma eltahl ac fah oruh ke pacl fahsruh uh.

4. Pahpah ac ninac, kom ac oruh fuhkah kom in kawuckyak nuh sin tuhlihk nuhtum an? (Liye petsac se meet ke mwe lutlut inge.)

⁴ Finne oasr kuh lom nuh sin tuhlihk nuhtum an, kom kuh pac in kawuck nuh seltahl. Kawuck uh oraclah pacl laltahl in tuhkweni nuh sie. Sahp kom kuh in ahksrihkyelah kuhtuh pacl lom ke orekma lom an kuh ke kuhtuh pac ma sahyac, tuh in yohk pacl lom nuh sin tuhlihk nuhtum an. Pa inge sie ma kom enenuh in puhruhe ac nuhnkuh yohk kac uh. Oasr pac ma kawuck uh kewa na engankihn. Pwacnacng, sokwack lah meac tuhlihk fuhsr nuhtum an luhngse uh, sahp ke kain in on, movie kuh sritacl. Ac srihke kom in engankihn ma el luhngse ingacn. Ilaria, suc muhta fin acn Italy el fahk: “Pahpah ac ninac kiyuck ah wiyuc engankihn pacna on ma nga luhngse lohng ah. Pahpah tuhmuhk ah eklac kawuck se suc fototo emeet nuh sihk ac nga puhla lah nga kuh in sramsram nuh sel ke kuhtwena ma, finne ke ma na oal.” Ke kom kawuck nuh sin tuhlihk nuhtum an ac kahsreltahl in kawuck nuh sin Jeova, kuh lom nuh seltahl oacna sie pahpah kuh ninac ac fah tiac wacngihnlac. (Psalm 25:14) Tuhlihk nuhtum an ac liye lah kom luhngse eltahl ac suhnakuhnuhltahl. Ac fah fihsracsruh pac nuh seltahl in sramsram nuh sum ke kuhtwena ma.

5. Mwet tuhma lutlut lal Jesus ah ac engankihn fuhkah sie moul insewowo ke kuhlwacnsap laltahl nuh sin Jeova?

⁵ Jesus el ke mwet tuhma lutlut lal uh in puhla na pwacye insewowo se ma tuhkuh ke eltahl kahfofo na ke orekma in kuhlwacnsap laltahl nuh sin Jeova uh. Pwacnacng el ahkkweyacltahl in kwacfeacng ke orekma in luti uh ac el wuhlelah nuh seltahl lah el ac fah kahsreltahl.​—Matthew 28:19, 20.

6, 7. Kom ahkkahlwemye fuhkah luhngse nuh sin tuhlihk nuhtum an ke pacl se kom lotweltahl in kuhlwacnsuhpuh Jeova pacl nuhkewa?

⁶ Kom ke tuhlihk nuhtum an in fototo nuh sin Jeova pacl nuhkewa. Ac Jeova el ke kom in ahkpahyacltahl ac kaeltahl. El usot kuh nuh sum in oruh ma inge. (Ephesus 6:4) Pwacnacng, kom enenuh in oruh tuhlihk nuhtum an in eis ahkpah inge pacl nuhkewa. Srihke nuhnkuh ke ma inge: Kom oruh tuhlihk nuhtum an in som lutlut mweyen kom etuh lah etwacack laltahl uh yohk srihpac ac kom ke eltahl in engankihn ma sasuc eltahl ac lotwelah uh. Ke inkacnek se pacna inge, kwacfeacng in oruh eltahl in wi ke miting, toeni luhlahp, ac lutlut luhn sucu lom an. Mweyen etwacack ma eltahl eis sin Jeova uh ma ac molwelah moul laltahl uh. Pwacnacng, kahsreltahl in engan in lutlut kacl Jeova ac in akihlen lah el kuh in lotweltahl in lahlmwetmwet na pwacye. (Soakas 24:14) Oacyacpac, ahkpahye tuhlihk nuhtum an in wi ke orekma in luti uh pacl nuhkewa. Etahi mwe srihkasrak luhn Jesus ke kom kahsreltahl in engan in luti Kahs luhn God uh nuh sin mwet sahyac.

⁷ Meac kuhlwacnsap luhn sie mwet fuhsr nuh sin Jeova ke lutlut, miting ac forfor ke pacl nuhkewa ac kuh in kahsrel kac? Erin, suc muhta fin acn South Africa el fahk: “Ke kuht tuhlihk ah, kuht kwacna tucltucl ac tohrkahskahs ke pacl in lutlut Bible, miting ac forfor uh. Kuhtuh pacl uh kuht ahkkulukye pacl in lutlut luhn sucu lasr ah ma na kuht in tiac wi. Tuhsruhktuh pahpah ac ninac tiac na fuhleack.” El kuloh nuh sin pahpah ac ninac kiyacl uh mweyen eltahl kahsrel in akihlen yohk srihpaciyen ma inge nuhkewa. Ke pacl inge, el fin tiac kuh in wi ke sie miting kuh nuh ke forfor uh, el ac arlac rahrahlac elan sulpac wi ke pacl na sa.

AHKKAHLWEMYE OHIYEN INSE PUHSISACL

8. (a) Jesus el ahkkahlwemye fuhkah lah el inse puhsisacl? (b) Inse puhsisacl lal Jesus ah kahsruh fuhkah mwet tuhma lutlut lal ah?

⁸ Jesus el finne mwet suwohswohs se, el inse puhsisacl ac fahk nuh sin mwet tuhma lutlut lal ah lah el enenuh kahsruh luhn Jeova. (Riti John 5:19.) Yac ma inge ahksrihkyelah suhnak luhn mwet tuhma lutlut lal ah nuh sel? Moh. Ke eltahl liye lah el luhlahlfongi Jeova pacl nuhkewa, ma inge ahkyohkye luhlahlfongi laltahl nuh sel. Tok, eltahl etahi mwe srihkasrak lal ke ohiyen inse puhsisacl inge.​—Orekma 3:12, 13, 16.

9. Ke kom fahk tahfonglac lom uh ac taltal kuluk kac, ma inge ac kahsruh fuhkah tuhlihk fuhsr nuhtum an?

⁹ Kuht tiac oacna Jesus, mweyen kuht sesuwohs ac kuht tahfonglac pacl puhs. Pwacnacng ahkkahlwemye ohiyen inse puhsisacl. Akihlen lah puhs ma kom tiac kuh in oruh ac taltal kuluk ke pacl kom tahfonglac. (Sie John 1:8) Ac tuhlihk fuhsr nuhtum an fah etwaclah in fahk pac tahfonglac lal uh ac el ac suhnakihn kom liki meet ah. In luhmahlah, suc kom suhnakihn yohk uh? Sie mwet kol ma fahk tahfonglac lal ac taltal kuluk kac kuh sie suc tiacna. Rosemary, suc oasr tuhlihk tolu nahtuh el fahk lah el ac mukul tuhmwacl ah fahk tahfonglac laltahl uh pacl nuhkewa. El fahk pac: “Ma inge mokle tuhlihk nahtuhsr uh in sramsram nuh sesr ke pacl oasr ma upac uh. Kuht lotweltahl lah piyac acn ma wo emeet nuh seltahl in konwacack kahsruh nuh ke ma upac laltahl uh. Ke pacl ma tuhlihk nahtuhsr uh enenuh kahsruh lasr, kuht orekmakihn mwe rit nahtuhsr ma tuhkuh ke Bible uh ac kuht tuhkweni pac puhruhe.”

10. Jesus el ahkkahlwemye inse puhsisacl fuhkah ke pacl ma el fahk ma mwet tuhma lutlut lal ah in oruh?

¹⁰ Oasr kuh lal Jesus in fahk nuh sin mwet tuhma lutlut lal ah ma eltahl in oruh. Tuhsruhktuh, ke srihpen inse puhsisacl lal, el kwacna ahkuhtweyac lah efuh eltahl enenuh in oruh. Ke sie mwe puhpuhlyuck, el tiac fahk na nuh seltahl in suk meet Tohkohsrahi ac suwohswohs luhn God. El oacyacpac fahk: “El ac fah acsot ma inge nuhkewa nuh suwos.” Tukun el fahk ma inge: “Nik kowos nuhnuhnkuh mwet.” El ahkuhtweyac srihpac uh, “tuh God Elan tiac pac nuhnuhnke kowos. Mweyen God El ac fah nuhnuhnke kowos oacna ke kowos nuhnuhnkuh mwet sahyac.”​—Matthew 6:31–7:2.

11. Ke kom ahkuhtweyac srihpac pwacnacng kom oraclah masap se kuh sulaclah se, ma inge ac kahsruh fuhkah tuhlihk fuhsr nuhtum an?

¹¹ Oraclah sie pacl wo an in ahkuhtweyac nuh sin tuhlihk fuhsr nuhtum an lah meac srihpac ma pwacnacng kom oraclah masap se kuh sulaclah se. El fin kahlwem kac lah efuh, el ac ke ahkos ma kom fahk uh. Barry wi tuhlihk ahkosr nahtuhl el fahk: “Ke kom fahk nuh seltahl srihpac uh, ma inge kahsreltahl in luhlahlfongi kom.” Mwet fuhsr uh ac kuh in liye lah kom tiac oraclah masap se kuh sulaclah se ke na srihpen oasr kuh lom in oruh tuhsruhktuh kom oruh ma inge ke srihpac wo se. Oacyacpac esam lah mwet fuhsr uh tilac tuhlihk srihsrihk. Eltahl muhtwacwacack etwaclah in sifacna nuhnkeack ma uh ac eltahl ke sifacna oruh sulaclah laltahl uh. (Rome 12:1) Barry el ahkuhtweyac: “Mwet fuhsr uh enenuh in etwaclah in sifacna oruh sulaclah wowo ma oasr srihpac ac tiac ma ke puhlakihn na laltahl uh.” (Psalm 119:34) Pwacnacng ahkkahlwemye ohiyen inse puhsisacl ac ahkuhtweyac nuh sin tuhlihk fuhsr nuhtum an lah efuh kom oruh sulaclah se. Ke inkacnek se inge, el ac fah etwaclah elan sifacna oruh sulaclah lal ac el fah etuh pac lah kom suhnakuhnuhl ac kom akihlen lah el mahtuhlah.

AHKKAHLWEMYE KAHLWEM LOM

12. Ke srihpen kahlwem lal Jesus, ma inge kahsrel Peter fuhkah?

¹² Jesus el kahlwem ke kain in kahsruh ma mwet tuhma lutlut lal ah enenuh. Ke sie mwe puhpuhlyuck, ke pacl se Jesus el fahk nuh sin mwet tuhma lutlut lal ah lah el ac fah acnwucki, Peter el fahk nuh sel elan karuhnguhnuhlwacng sifacna elan tiac misac. Jesus el etuh lah Peter el luhngse el, tuhsruhktuh el etuh pac lah nuhnak lal Peter ah tiac suwohs. Jesus el kahsrel ac mwet tuhma lutlut sahyac lal ah fuhkah? Ma se meet el ahksuwohsyacllah Peter. Na, Jesus el ahkuhtweyac lah meac ac sikyak nuh sin mwet suc tiac oruh ma luhngse luhn Jeova ke pacl ma upac uh. Jesus el oacyacpac fahk lah Jeova el ac fah ahkinsewowoye mwet ma tiac nuhnkuh kacltahl sifacna. (Matthew 16:21-27) Peter el lotwelah mwe lutlut na yohk se.​—Sie Peter 2:20, 21.

13, 14. (a) Meac ac kuh in ahkkahlwemye lah tuhlihk fuhsr nuhtum an el ac enenuh in ahkkweye luhlahlfongi lal uh? (b) Kom ac etuh fuhkah mwe kahsruh ma tuhlihk muhtwacn kuh tuhlihk mukul nuhtum an enenuh uh?

¹³ Puhruhe nuh sin Jeova ac siyuck ke kahlwem tuh in kahsre kom in etuh ma tuhlihk fuhsr nuhtum an enenuh. (Psalm 32:8) Sahp kom liye lah el tiac engan oacna meet ah kuh sahp el muhtwacwack in fahk ma kuluk ke mwet lili uh. Sahp kom puhla muh oasr ma el tiac fahk nuh sum. Nik kom sa in nuhnkeack muh oasr ma kuluk ma tuhlihk fuhsr se nuhtum an oraclah.a (Liye footnote.) Tuhsruhktuh nik kom pihlesruh ma upac lal an kuh finsrak na tuh ma ingacn in wacngihnlac. Sahp kom enenuh in kahsrel ahkyohkye luhlahlfongi lal an.

¹⁴ In konwacack lah kom ac kahsruh fuhkah tuhlihk fuhsr nuhtum an, kihsen siyuck nuh sel ke inkacnek kuhlwacng ac suhnak. Ma inge oacpacna ke kom ut kof ke sie luhf in kof. Kom fin suhlahklahk olack pakiht lom an, ac tiac yohk kof ma kom ac eis kac. In oacpacna, kom fin mongsa ke kom kihsen siyuck nuh sel kuh srihke in pahtok tuhlihk fuhsr nuhtum an in sramsram, kom ac tiac konwacack na pwacye lah meac el nuhnkuh ac puhla uh. (Riti Soakas 20:5.) Ilaria el esam ke el srackna fuhsr ah, el ke wi na tuhlihk lutlut wiyacl ah pacl nuhkewa ac el etuh lah ma inge tiac wo. Pahpah ac ninac kiyacl ah akihlenack lah oasr ma el elyahlac kac. Ilaria el fahk: “Sie ekuh ah, eltahl fahk na lah eltahl akihlen lah nga luhman suhpwacr na ac eltahl siyuck sihk lah meac upac uh. Nga muhtwacwacack na tuhng. Nga ahkuhtweyac ma sikyak uh ac nga siyuck eltahl in kahsreyuc. Eltahl sruokyucwi, fahk lah eltahl kahlwem ke ma nga puhla ah ac wuhlelah muh eltahl ac kahsreyuc.” Pahpah ac ninac kiyacl Ilaria ah suhlahklahk in kahsrel ac konwacack kawuck na wowo lal ke congregation.

15. Meac sie pac inkacnek ma Jesus el ahkkahlwemye lah el kahlwem sin mwet uh?

¹⁵ Jesus el oacyacpac ahkkahlwemye kahlwem lal ke el akihlen ohiyac wowo luhn mwet tuhma lutlut lal ah. Ke sie mwe puhpuhlyuck, ke pacl se Nathanael el lohng lah Jesus el mwet Nazareth se, el fahk: “Yac oasr ma wo ma kuh in tuhkuh ke acn Nazareth?” (John 1:46) Kom fin oasr we ke pacl sac, yac kom ac nuhnkuh na muh Nathanael el srisri mwet kuh muh pac el sie mwet suc muhnahs luhlahlfongi la? Tiac pa inge ma Jesus el nuhnkuh kacl ah. El kahlwem ac etuh lah Nathanael el ahkkahlwemye na puhlakihn lal uh, pwacnacng el fahk: “Mwet Israel na pwacye se pa inge. Wacngihn ma suhfal [kuhtasrihk] in el!” (John 1:47) Jesus el etuh ma oan insiacn mwet uh ac el orekmakihn kuh se lal inge in liye ohiyac wowo luhn mwet uh.

16. Kom ac ahkkweye fuhkah tuhlihk fuhsr nuhtum an in kapkapack?

¹⁶ Kom finne tiac kuh in etuh ma oan ke insiacn mwet uh, kom kuh in kahlwem kac. Jeova el kuh in kahsre kom in liye ohiyac wowo luhn tuhlihk fuhsr nuhtum an. Tuhlihk fuhsr se nuhtum an finne ahksuhpwacrye kom, nik kom fahk ke kuhtwena pacl muh el mwet kuluk se. Nik kom nuhnkuh kacl ohinge, a fahk nuh sel lah kom liye ohiyac wowo lal an ac lah kom etuh na pwacye lah el ke oruh ma wo. Lohacng nuh kac lah meac el oruh in kapkapack ac kaksakuhnuhl. Kahsrel in kapkapack ke ohiyac wowo lal ingacn ke kom sang kuhtuh pac kunohkohn sahyac ah elan oruh ke pacl nuhkewa ma kuh. Jesus el oruh pac ma inge nuh sin mwet tuhma lutlut lal ah. Yac se tahfuh tukun el ohsun nuh sel Nathanael (el oacyacpac pahngpahng Bartholomew), Jesus el sang kunohkohn na yohk srihpac se nuh sel. El srihsrngilyac Nathanael elan mwet sap lal ac el oaru in oruh orekma ma Jesus el sang nuh sel ah. (Luke 6:13, 14; Orekma 1:13, 14) Pwacnacng nik kom oruh tuhlihk nuhtum an in puhla muh ma el oruh uh suhfal kuh tiac wo, ahkkweyacl ac kaksakuhnuhl. Oruh elan puhla lah el kuh in oruh kom ac Jeova in engan ac elan puhla pac lah el kuh in orekmakihn kuh lal uh in kuhlwacnsuhpuh Jeova.

KOM FIN AHKPAHYE TUHLIHK NUHTUM AN KOM AC FAH ENGAN NA PWACYE

17, 18. Kom fin kwacfeacng na in ahkpahye tuhlihk fuhsr nuhtum an in kuhlwacnsuhpuh Jeova, meac ac kuh in tuhkuh kac?

¹⁷ Sahp kom puhla oacna ma mwet sap Paul el puhla. El nuhnkuh yohk ke mwet suc oacna tuhlihk srihsrihk. Eltahl pa el kahsruh in lutlut kacl Jeova ac el luhngse eltahl na pwacye. Pwacnacng mwe ahsor se nuh sel in nuhnkuh muh sahp kuhtuh seltahl ac tilac kuhlwacnsuhpuh Jeova. (Sie Corinth 4:15; Luo Corinth 2:4) Victor suc oasr tuhlihk tolu nahtuh, el fahk: “Tiac fihsracsr ke pacl se eltahl sun matwacn mwet fuhsr uh. Tuhsruhktuh pacl wo ah kahsruh na pwacye, finne oasr ma upac kuht sun. Ke kahsruh luhn Jeova, kuht engankihn fototo wowo lasr nuh sin tuhlihk nahtuhsr uh.”

¹⁸ Pahpah ac ninac, komtacl arlacna kwacfeacng in ahkpahye tuhlihk nuhtum an ke srihpen kom luhngse eltahl na pwacye. Nik kom fuhleack. Nuhnkuh ke luhpan engan lom ke pacl se tuhlihk nuhtum an sulaclah in kuhlwacnsuhpuh God ac in tahfwelah na kuhlwacnsuhpwacl ke oaru.​—Tolu John 4.

[Sihm srihsrihk e ten]