Jeova El God Na Luhngse Se
“God El luhng.”—SIE JOHN 4:8, 16.
KOM KUH IN TOHPOHKLAH?
Luhngse luhn God uh ac sang kahsruh fuhkah nuh sin mwet ke pacl fahsruh ma ahksol uh?
Jeova el ahkkahlwemye fuhkah luhngse lal nuh sin mwet suc oruh ma kuluk?
Tohkohsrahi luhn God ahkpwacyeye fuhkah luhngse luhn God nuh sesr?
1. Meac ohiyac se ma yohk emeet luhn God ac ke kom etuh ma inge, meac kom puhla kacl uh?
BIBLE uh luti nuh sesr lah “God El luhng.” (Sie John 4:8) Tuhsruhktuh meac kalmen fuhs se inge? Kalmac pa, luhngse uh tiac sie na sin ohiyac wowo pucspucs luhn Jeova. Pa inge ohiyac se ma yohk emeet sel uh. El tiac puhlakihn luhngse muhkwena, a pa inge ohiyacl. Luhngse pa srihpen ma nuhkewa ma el oruh uh. Kuht arlacna srui lah luhngse pa moklel Jeova elan oraclah ma moul nuhkewa wekuhnacng ma nuhkewa sahyac.
2. Luhngse luhn God uh ahkkweye luhlahlfongi lasr uh fuhkah?
2 Jeova el arlac kuhlwacng ac wo nuh sin ma el oraclah uh. Luhngse lal nuh sesr uh ahkkweye kuht in luhlahlfongi lah oakwuck lal nuh sin mwet uh ac fah ahkpwacyeyuck ke inkacnek se ma wo emeet uh. Ke sahflahiyen ma inge, mwet ma ahksol uh fah insewowo na pwacye. Ke sie mwe puhpuhlyuck, ke srihpen luhngse, Jeova “El oakiyac tari sie lwen ma El ac nuhnuhnkuh facluh nohfohn ke nuhnuhnkuh suwohs, ke sie mwet suc El sulaclah tari,” Jesus Christ. (Orekma 17:31) Kuht luhlahlfongi na pwacye lah nuhnuhnkuh lal uh ac sikyak. Nuh sin mwet suc ahkos, kalmen ma inge pa sie moul wowo ke pacl fahsruh suc ac fah oan nwe tok.
MEAC MA SIKYAK FIN FACLUH UH AHKKALWEMYE
3. God el fuhnuh tiac luhngse mwet uh, luhkuhn fuhkah moul luhn mwet ke pacl fahsruh uh?
3 Jeova el fuhnuh tiac God luhngse se, moul luhn mwet ke pacl fahsruh uh luhkuhn fuhkah? Mwet uh luhkuhn tahfwelah na kol fin sie sin sie ac kihfucsyucklac sel Satan suc sie god ma wacngihn luhngse la. (Luo Corinth 4:4; Sie John 5:19; riti Fwackyuk 12:9, 12.) Moul luhn mwet ke pacl fahsruh uh luhkuhn kuluk na upac fuhnuh Jeova el tiac luhngse kuht!
4. Efuh kuh Jeova el lwelah in lainyuck kolyuck lal uh?
4 Ke pacl se Satan el lain kolyuck luhn God, el oacyacpac kihfaslah pahpah ac ninac se emeet kiyacsr ah in lain. El kihsen siyuckihn suwohs luhn God in kol fin ma nuhkewa. Satan el fahk muh kolyuck lal uh ac wo liki na kolyuck luhn God. (Genesis 3:1-5) Ke srihpen lahlmwetmwet luhn Jeova, el lwelah Satan elan kol ke kihtin pacl na tuh elan ahkpwacyeye ma el fahk uh. Tuhsruhktuh sahflahiyen ma inge ahkkahlwemye lah Satan ac mwet uh kewa na tiac kuh in kol ke inkacnek wo.
5. Meac ma sikyak ke moul luhn mwet fin facluh uh ahkpwacyeye?
5 Ke pacl inge, facluh kuluklac liki na meet ah. Puhs liki million 100 sin mwet suc misac ke na srihpen mweun ke lusen yac siofok somlah inge. Bible uh fahk ma inge “ke lwen sahflah uh”: “Mwet kuluk ac mwet wosounkahs ac fah yohkyohkwelihk in ma kuluk lalos.” (Luo Timothy 3:1, 13) Bible uh oacyacpac fahk: “Leum God, nga etuh lah wacngihn sie mwet sifacna kol inkacnek lal. Wacngihn mwet sifacna nuhnuhnkuh moul lal.” (Jeremiah 10:23) Ma sikyak ke moul luhn mwet fin facluh uh ahkpwacyeye arlac kahlwem lah kahs inge arlacna pwacye. Jeova el tiac oraclah mwet uh eltahl in sifacna kohluhltahl ac tiac eis kolyuck lal.
6. Efuh kuh God el lwelah in oasr ma kuluk?
6 Ke Jeova el lwelah ma kuluk uh in fahsr na ke lusen pacl se inge, el oacyacpac ahkpwacyeye lah kolyuck lal uh muhkwena pa wo uh. Ke pacl fahsruh uh, God el ac fah kuhnahoslah mwet kuluk nuhkewa. Tukun ma inge, kuhtwena mwet fin sifwil pac kihsen siyuckihn inkacnek in kolyuck lal uh, God el ac sa in sang kaiyuck ma enenweyuck uh. El kuh in orekmakihn ma sikyak ke moul luhn mwet uh in ahkpwacyeye lah kuhtwena mwet suc lainuhl enenuh in ahkwacngihnyeyucklac ke pacl na sa. Ac fah tiac sifwil lweyucklac in oasr ma kuluk.
GOD EL AHKKAHLWEMYE FUHKAH LUHNGSE LAL UH?
7, 8. Jeova el ahkkahlwemye fuhkah luhngse yohk lal uh?
7 Jeova el ahkkahlwemye luhngse lal uh ke inkacnek pucspucs. Nuhnkuh ke luhpan inkuhsrao ac kahtoiyac. Galaxy ma oasr inkuhsrao uh sun billion, ke kais sie galaxy inge puhs planet kac wi billion sin itu pucspucs. Ke galaxy se lasr inge, pahngpahng Milky Way, sie sin itu inge pa faht ah. Fin wacngihn faht, ac wacngihn pac ma moul fin facluh. Ma oreklac inge nuhkewa ahkpwacyeye lah Jeova pa orekuhtlac uh ac ahkkahlwemye pac ke ohiyac wowo lal, oacna kuh, lahlmwetmwet ac luhngse lal uh. Ahok, “tiac kuh in liyeyuck kuh luhn God suc kawihl ac elah muhtahl lal, a oe ke muhtwacwacyen oreklac facluh, God El ahkkahlwemye ma inge ke ma El oraclah.”—Rome 1:20.
8 Jeova el oraclah facluh nuh sin ma moul nuhkewa. Ma nuhkewa fin facluh ma ac wo nuh sin mwet ac ma orahkrahk uh. God el oraclah imac na kahto se tuh mwet uh in muhta we. El oacyacpac sang nuhnak ac mahno suwohswohs laltahl tuh eltahl in moul ma pahtpaht. (Riti Fwackyuk 4:11.) Sahyen ma inge, “El sang mwe mongo nuh sin ma nuhkewa ma oasr moul la, tuh luhngkuhlwacng lal oan ma pahtpaht.”—Psalm 136:25.
9. Jeova el finne God luhngse se, ma fuhkah el sruhnga uh?
9 Jeova el God na luhngse se, pwacnacng el sruhnga ma kuluk. Ke sie mwe puhpuhlyuck, Psalm 5:4-6 fahk ma inge kacl Jeova: “Kom tiac sie God suc insewowo ke ma kuluk, . . ac kom sruhnga mwet kuluk nuhkewa.” El oacyacpac “kwase mwet ahkmas ac mwet suhlallacl.”
SAHFLAHIYEN MA KULUK UH APKUHRAN ME
10, 11. (a) Meac ac sikyak nuh sin mwet kuluk nuhkewa uh? (b) Jeova el ac ahkinsewowoye fuhkah mwet suc ahksol?
10 Ke pacl fal, Jeova el ac fah ahkwacngihnyelah ma kuluk nuhkewa fin facluh mweyen el God luhngse se ac el kwase ma kuluk uh. Kahs luhn God uh wuhlelah: “Elos suc luhlahlfongi LEUM GOD fah usrui acn uh, a mwet kuluk fah lihsyucklac. Ac tiac paht mwet kuluk fah wacngihnlac.” Mwet lokoalok luhn Jeova uh “fah wacngihnlac oacna ros in imac; elos fah wacngihnlac oacna kuhlahsr.”—Psalm 37:9, 10, 20.
11 Kahs luhn God uh oacyacpac wuhlelah nuh sesr: “Mwet suwoswos fah usrui acn uh, ac elos ac fah muhta fac ma pahtpaht.” (Psalm 37:29) Mwet suc oaru “elos fah engankihn mwe insewowo ac mislac.” (Psalm 37:11) Efuh? Mweyen God na luhngse se lasr inge el ke ma ac wo emeet nuh sin mwet kuhlwacnsap oaru lal. Bible uh fahk lah: “El ac fah elah sronin muhtahlos nuhkewa. Ac fah wacngihn misac, wacngihn ahsor kuh tuhng kuh kweok, mweyen ma nuhkewa meet ah wacngihnlac.” (Fwackyuk 21:4) Sie pacl na wowo ke pacl fahsruh uh pa inge nuh sin mwet ahkostwen suc srui ke luhngse luhn God!
12. Suc “mwet suwohswohs” inge?
12 Bible uh fahk nuh sesr: “Liye mwet wo, ac tuni mwet suwohswohs, oasr fihl in tuhlihk nuhtin mwet suc moul in mislac. A mwet kuluk elos kuhnausyucklac ac fihl in tuhlihk nahtuhlos sikiyucklac.” (Psalm 37:37, 38) “Mwet suwoswos” se ac srihke in etwacllah Jeova ac wen nahtuhl uh ac el ac ahkos ma luhngse luhn God uh. (Riti John 17:3.) El luhlahlfongi na pwacye lah “facluh ac ma nuhkewa loac ma mwet uh mwel uh muhtwacwacack in wacngihnlac; a el suc oruh ma luhngse luhn God fah moul ma pahtpaht.” (Sie John 2:17) Ke srihpen sahflahiyen facluh apkuhran me uh, arlacna yohk srihpac kom in “fihliyac finsrak lom in LEUM GOD ac ahkos ma sap lal.”—Psalm 37:34.
MA SE EMEET MA GOD EL AHKKAHLWEMYE KE LUHNGSE LAL UH
13. Meac ma se emeet ma ahkkahlwemye luhngse luhn God uh?
13 Kuht finne sesuwohs, kuht kuh in ahkos God. Kuht kuh pac in fototo nuh sin Jeova ke srihpen mwe lahngo luhn Jesus, suc pa inge inkacnek se emeet ma God el ahkkahlwemye luhngse lal uh. Jeova el acse nuh sesr mwe lahngo tuh mwet suc ahksol uh kuh in sukohsohklah liki ma kuluk ac misac. (Riti Rome 5:12; 6:23.) Jesus el oaru nuh sin God ke lusen pacl na loeloes se inkuhsrao. Pwacnacng Jeova el luhlahlfongi muh Wen se nahtuhl inge ac fah sruokyac na oaru lal fin facluh. In oacna Pahpah na luhngse se, Jeova el arlac ahsor ke el liye orekma luhn mwet kuluk inge nuh sin Wen nahtuhl. Ahok, Jesus el oaru in ahkkweye kolyuck suwohswohs luhn God ac ahkkahlwemye lah mwet suwohswohs uh kuh in oaru na nuh sin God finne ke pacl upac.
14, 15. Meac misac lal Jesus ah oruh nuh sin mwet uh?
14 Finne ke ma na upac ma Jesus el sun ah, el srackna sruokyac oaru lal ac ahkkweye suwohs luhn Jeova in kol. Kuht enenuh in srui ke mwe lahngo luhn Jesus mweyen ke srihpen misac lal uh ma inge acse finsrak nuh sin mwet uh ke sie pacl wo in moul ma pahtpaht ke facl sasuc luhn God! Mwet sap Paul el ahkuhtweyac luhngse se suc Jeova ac Jesus eltahl kewa na ahkkahlwemye ke mwe lahngo uh. El fahk: “Tuh ke pacl se kuht srackna muhnahs, Christ el misac kacsr suc mwet kuluk, ke pacl ma God El pakiyac. Ma na upac se sie mwet in misac ke sie mwet suwohswohs. Tuh sahp ac oasr mwet luhngse in misac ke sie mwet wo. Tuhsruhktuh God el ahkkahlwemye luhpan luhngse lal nuh sesr, mweyen ke pacl se kuht srackna mwet kuluk, Christ el misac kacsr.” (Rome 5:6-8) Mwet sap John el suhmuhslah: “Ac God el ahkkahlwemye luhngse lal nuh sesr ke El suhpwacma Wen sefanna nahtuhl nuh facluh tuh kuht fah kuh in moul kacl. Pa inge luhngse uh; tiac tuh kuht luhngse God, a tuh El luhngse kuht, ac El suhpwacma Wen nahtuhl tuh kuht fah kuh in eis nuhnak muhnahs ke ma kuluk lasr kacl.”—Sie John 4:9, 10.
15 Jesus el fahk lah “God el luhngse facluh ohinge, el acse Wen sefanna nahtuhl, tuh elos nuhkewa suc luhlahlfongi in el fah tiac misac, a elos fah eis moul ma pahtpaht.” (John 3:16) Finne mwe ahkahsor se nuh sin Jeova in liye luhpan kweok lal Jesus el srackna kihsackuhnacng moul luhn Wen nahtuhl oacna mwe lahngo. Ma inge ahkkahlwemye luhpan luhngse lal nuh sin mwet uh. Ac luhngse se inge ac fah oan ma pahtpaht. Paul el suhmuhslah: “Tuh nga etuh na pwacye lah wacngihn ma kuh in srikuhtlac liki luhngse lal; tiac misac kuh moul, tiac lipufacn kuh kuhtwena kuh inkuhsrao, tiac ma oasr inge kuh ma ac fah tuhkuh, tiac ma oan lucng liki facluh, kuh ma oan ten liki facluh, wacngihn sin ma oreklac nuhkewa suc ac fah kuh in srikuhtlac liki luhngse luhn God, suc ma lasr ke Christ Jesus Leum lasr.”—Rome 8:38, 39.
TOHKOHSRAHI LUHN GOD KOL KE PACL INGE
16. Meac se inge Tohkohsrahi, ac suc Jeova el srihsrngiyac in mwet kol kac?
16 Tohkohsrahi luhn God suc Messiah el kol kac, mwe ahkpwacyeye se nuh ke luhngse luhn Jeova nuh sin mwet uh. Fuhkah? Jeova el srihsrngiyac tari sie mwet kol suc luhngse ac fal in kol mwet uh, el pa Jesus Christ. (Soakas 8:31) God el sulaclah mwet 144,000 in weluhl Christ inkuhsrao in kol. Ke pacl se eltahl sifwil moulyak ac som nuh inkuhsrao, eltahl ac kuh in orekmakihn etwacack laltahl ke ma sikyak nuh sin mwet uh. (Fwackyuk 14:1) Ke pacl se Jesus el muhta fin facluh, Tohkohsrahi uh pa mwe luti se ma yohk srihpac emeet elan fahkwack kac ac el luti mwet tuhma lutlut lal ah in puhruhe ohinge: “Pahpah tuhmasr suc inkuhsrao, Em in ahkmuhtahlyeyuck. Tohkohsrahi Lom in tuhkuh. Ma luhngse Lom in orek, oacna inkuhsrao, ohinge fin facluh.” (Matthew 6:9, 10, BMK) Kuht ngwetack ac rahrahlac nuh ke ahkpwacyeyacn puhruhe se inge, ke pacl se Tohkohsrahi luhn God use mwe insewowo pucspucs nuh sin mwet uh.
17. Meac ma siena ke kolyuck luhn Jesus nuh ke kolyuck luhn mwet uh?
17 Arlacna yohk ma tiac oacna sie ke kolyuck luhn Jesus ac kolyuck luhn mwet uh. Kolyuck luhn mwet uh pa oraclah mweun pucspucs suc onelah million sin mwet. Tuhsruhktuh, Jesus suc mwet kol lasr el luhngse kuht ac el etahi ohiyac wowo pucspucs luhn God, yohk na luhngse. (Fwackyuk 7:10, 16, 17) Jesus el fahk: “Fahsruh nuh yuruk, kowos suc orekma ac tohtohlah, tuh nga fah sot monglac nuh suwos. Eis srenenuh luhk nuh fowos ac lutlut sihk, tuh nga fakpacp ac inse puhsisacl; ac kowos fah konwacack monglac. Tuh srenenuh luhk fihsracsr ac mwe utuck luhk muhlahlah.” (Matthew 11:28-30) Sie wuhlelah na wo suc ahkkahlwemye luhngse pa inge!
18. (a) Meac orek muhtwacwack ke yac 1914 ah fahfahsruh nuh mihsenge? (b) Meac kuht ac fah tuni ke mwe lutlut se tok uh?
18 Bible uh ahkkahlwemye lah Tohkohsrahi luhn God uh muhtwacwack in kol inkuhsrao ke yac 1914. Ke pacl sacn fahfahsruh nuh mihsenge, srackna orekeni mwet luhlah suc ac weluhl Jesus inkuhsrao in kol wekuhnacng “u na luhlahp se” ke mwet suc ac moliyucklac liki oakwuck kuluk se inge ac utyak nuh ke facl sasuc uh. (Fwackyuk 7:9, 13, 14) Fuhkah luhpan u luhlahp se inge mihsenge? Meac God el siyuck seltahl uh? Mwe lutlut se tohkoh uh fah topuk kihsen siyuck inge kewa.