Ahkpahye Tuhlihk Srihsrihk Nuhtum An in Kuhlwacnsuhpuh Jeova

‘Lwelah tuh mwet luhn God . . . in fahk nuh sesr lah meac kuht ac oruh nuh sin tuhlihk se inge ke el ac isuslac uh.’​—MWET NUNUNKU 13:8.

ON: 41, 6

KOM KAHSRUH FUHKAH TUHLIHK NUHTUM AN KE KOM ETAHI MWE SRIHKASRAK LAL JESUS KE OHIYEN . . .

luhngse?

inse puhsisacl?

etwacack ac kahlwem?

1. Meac Manoah el oruh ke el lohng lah el ac fah eklac sie pahpah?

MANOAH ac muhtwacn kiyacl ah luhlahlfongi na pwacye muh ac wacngihn na tuhlihk nahtuhltahl. Tuh sie lwen ah, lipufacn se luhn Jeova fahk nuh sin muhtwacn kiyacl Manoah ah lah el ac oswelah tuhlihk mukul se. Mwe lut na wowo se pa inge! Ke el fahk nuh sel Manoah ma inge, el arlacna enganwack. Tuhsruhktuh, el oacyacpac etuh lah kunohkohn na yohk se pa inge. El ac muhtwacn kiyacl uh nuhnkuh lah eltahl ac tuhfahlah ac ahkpahye fuhkah tuhlihk mukul se nahtuhltahl inge in luhngse Jeova ac kuhlwacnsuhpwacl ke srihpen arlacna puhs mwet ma oruh ma kuluk fin acn Israel. Pwacnacng Manoah el siyuck sin Jeova: “Nuhnak muhnahs, lwelah tuh mwet luhn God se suc kom suhpwacma meet ah in sifwil fohlohkoh nuh yohrohsr ac fahk nuh sesr lah meac kuht ac oruh nuh sin tuhlihk se inge ke el ac isuslac uh.”​—Mwet Nununku 13:1-8.

2. Meac kom enenuh in luti nuh sin tuhlihk nuhtum an ac kom ac oruh ma inge fuhkah? (Liye pac pohk se inge “Mwet Lutlut Bible Lom Suc Yohk Srihpac Emeet uh.”)

² Kom fin sie pahpah kuh ninac, sahp kom kahlwem ke ma Manoah el puhla inge. Oasr pac kunohkohn lom in kahsruh tuhlihk nuhtum an in etuh ac luhngse Jeova. (Soakas 1:8) Ke pacl in lutlut luhn sucu lomtacl an, kom kuh in kahsreltahl in etwacllah Jeova ac etwaclah Bible uh. Tuhsruhktuh, oasr pac ma kom enenuh in oruh sahyacn lutlut Bible nuh sin tuhlihk nuhtum an ke wik nuhkewa. (Riti Deuteronomy 6:6-9.) Meac pac ac kuh in kahsre kom in ahkpahye tuhlihk nuhtum an in luhngse ac in kuhlwacnsuhpuh Jeova? Ke mwe lutlut se inge, kuht ac fah sramsramkihn mwe srihkasrak lal Jesus uh. Finne el tiac pahpah se, oasr ma kom kuh in lotwelah ke inkacnek ma el luti ac ahkpahye mwet tuhma lutlut lal ah. Jesus el inse puhsisacl ac luhngse eltahl. Oacyacpac, el kahlwem ke ma uh. Kalmac pa el kahlwem ke ma eltahl puhla na pwacye uh ac el etuh lah el ac kahsreltahl fuhkah. Kuht kuh in liye ingena lah kuht ac etahel Jesus fuhkah.

LUHNGSE TUHLIHK NUHTUM AN

3. Mwet tuhma lutlut lal Jesus ah etuh fuhkah lah el luhngse eltahl?

³ Jesus el kwacna fahk nuh sin mwet tuhma lutlut lal ah lah el luhngse eltahl. (Riti John 15:9.) Oacyacpac, yohk pacl ma el sang nuh seltahl ac weluhltahl. (Mark 6:31, 32; John 2:2; 21:12, 13) Jesus el tiac mwet in luti se na laltahl, el oacyacpac kawuck se nuh seltahl. Pwacnacng eltahl tiac ahlohloh kac lah Jesus el luhngse eltahl. Meac kom kuh in lotwelah sel Jesus?

4. Kom ac ahkkahlwemye fuhkah nuh sin tuhlihk nuhtum an lah kom luhngse eltahl? (Liye petsac se meet ke mwe lutlut inge.)

⁴ Fahk nuh sin tuhlihk nuhtum an lah kom luhngse eltahl ac ahkkahlwemye nuh seltahl lah yohk srihpacltahl nuh sum. (Soakas 4:3; Titus 2:4) Samuel, sie mukul suc muhta fin acn Australia el fahk: “Ke nga srihk ah, pahpah el tuh riti nuh sihk puk se inge Buk in Sramsram lun Baibel Nutik ke ekuh nuhkewa. El ac tohpohklah nohfohn kihsen siyuck luhk kac uh, sruokyucwi, ngokyac muhtuhk ac fong wolac nuh sihk. Nga arlacna lut ke nga etwacack tok lah pahpah el tiac mahtuhlah ke kain in sucu se ma oruh kain in ohiyac inge in sruok ac ngok muhtuhn tuhlihk! Tuhsruhktuh, el kwacfeacng in ahkkahlwemye luhngse lal nuh sihk uh. Ke srihpac se inge, nga arlacna fototo nuh sel ac nga puhla karihngihnyuck wowo lal uh.” Kahsruh tuhlihk nuhtum an in puhla oacpacna, ke kom fahk kahs inge nuh seltahl pacl nuhkewa, “Nga luhngse kom.” Sruokiltahluh ac ngokyac muhtahltahl. Sang pacl lom in muhta sramsram nuh seltahl, weluhltahl mongo ac sritacl.

5, 6. (a) Ke srihpen Jesus el luhngse mwet tuhma lutlut lal uh, meac el oruh? (b) Kom enenuh in kai fuhkah tuhlihk nuhtum an?

⁵ Jesus el fahk: “Elos nuhkewa suc Nga luhngse, Nga kwacfelos a kaelos.”a (Liye footnote.) (Fwackyuk 3:19, BMK) Ke sie mwe puhpuhlyuck, pacl puhs mwet tuhma lutlut lal ah akuhkuhinlac lah suc kac seltahl fuhlwact emeet. Jesus el tiac pihlesruh ma upac se inge, a el kaeltahl ke inkacnek mislac ke ma eltahl sikaleni in oruh. Tuhsruhktuh, el kuhlwacng pacl nuhkewa ac sano nuh ke pacl ac acn ma fal elan ahksuwohsyacltahl.​—Mark 9:33-37.

⁶ Ke srihpen luhngse lom nuh sin tuhlihk nuhtum an, kom etuh lah kom enenuh in kaeltahl. Kuhtuh pacl uh fal in ahkuhtweyac na lah efuh wo kuh kuluk ma se. Tuhsruhktuh, fuhkah eltahl fin srackna seahkos? (Soakas 22:15) Etahel Jesus, mongfihsracsr ac tahfwelah in kaeltahl, ahkpahyacltahl, ac ahksuwohsyacltahl. Sulaclah pacl ac acn ma fal kom in kaeltahl uh, ac oruh ma inge ke inkacnek kuhlwacng. Elaine, sie muhtwacn lili fin acn South Africa el esam inkacnek in kai luhn pahpah ac ninac kiyacl ah nuh sel. Pacl nuhkewa, eltahl ahkuhtweyac nuh sel ma eltahl luhngse el in oruh ac ma elan tiac oruh. Eltahl fin fahk nuh sel muh eltahl ac sang mwe kai nuh sel ke srihpen el seahkos, na eltahl ac oruh. Tuhsruhktuh, el fahk: “Soenna oasr pacl se eltahl kaiyuc ke pacl eltahl kasrkuhsrak. Wacngihn pac pacl eltahl kaiyuc ac tiac ahkuhtweyac nuh sihk meet lah efuh.” Ke srihpac se inge, el etuh na pwacye lah pahpah ac ninac kiyacl uh luhngse el.

AHKKAHLWEMYE INSE PUHSISACL

7, 8. (a) Meac mwet tuhma lutlut lal Jesus ah etwaclah ke inkacnek in puhruhe lal uh? (b) Puhruhe lom uh ac luti fuhkah tuhlihk nuhtum an in luhlahlfongi God?

⁷ Meet liki sruhoh Jesus tuh elan acnwucki, el siyuck sin Pahpah tuhmwacl ah: “Pahpah, Pahpah, kom kuh in oruh ma nuhkewa. Eislah cup in kweok se inge likiyuc. Tuhsruhktuh, in tiac oacna luhngse luhk, a in oacna luhngse lom.”b (Liye footnote.) (Mark 14:36) Srihke nuhnkuh ke puhlakihn luhn mwet tuhma lutlut lal ah ke eltahl lohng kuh etwacack tok ke puhruhe se lal inge. Eltahl akihlen lah el finne mwet suwohswohs se, el srackna siyuck kahsruh sin Pahpah tuhmwacl uh. Pwacnacng eltahl etwaclah lah eltahl enenuh pac in inse puhsisacl ac luhlahlfongi Jeova.

⁸ Yohk ma tuhlihk nuhtum an kuh in lotwelah ke puhruhe lom uh. Pwacye lah, ke pacl kom puhruhe uh, kom tiac oruh ma inge in luti muhkwena tuhlihk nuhtum an. Tuhsruhktuh, ke pacl eltahl lohng puhruhe lom uh, eltahl etwaclah in luhlahlfongi Jeova. Ke puhruhe lom uh, nikmet siyuck muhkwena Jeova elan kahsruh tuhlihk nuhtum an, tuhsruhktuh siyuck elan kahsre kom pac. Ana el muhta fin acn Brazil, ac pa inge ma el fahk uh: “Ke pacl kuht sun ma upac, oacna ke pahpah mahtuh ac ninac mahtuh mas na upac, pahpah ac ninac kiyuck ah ac siyuck Jeova elan sang kuh nuh seltahl in muhtwacnglah ma upac inge ac elan sang pac lahlmwetmwet tuh in wo sulaclah ma eltahl oruh uh. Finne ke ma upac, eltahl fihliyac fin Jeova mwe fosrngah laltahl inge. Ke ma inge, nga etwaclah nga in luhlahlfongi Jeova.” Ke tuhlihk nuhtum an lohng ke kom siyuck sin Jeova ke puhlaik tuh kom in sang ma loh nuh sin mwet tuhlan lom, ac ke kom siyuck sin mwet kol ke orekma lom kom in monglac tuh kom in wi ke toeni luhlahp uh, eltahl ac akihlen lah kom luhlahlfongi Jeova ke kahsruh lal ac eltahl ac fah oruh oacpacna.

9. (a) Jesus el luti fuhkah mwet tuhma lutlut lal ah in inse puhsisacl ac tiac nuhnkuh kacltahl sifacna? (b) Meac tuhlihk nuhtum uh ac etwaclah kom fin inse puhsisacl ac tiac nuhnkuh keim sifacna?

⁹ Jesus el fahk nuh sin mwet tuhma lutlut lal ah in inse puhsisacl ac tiac nuhnkuh kacltahl sifacna ac el oacyacpac oakiyac mwe srihkasrak nuh seltahl. (Riti Luke 22:27.) Mwet sap uh liye lah el sang kuhiyacl kewa ac kihsackuhnuhlacng in kuhlwacnsuhpuh Jeova ac kahsruh mwet sahyac, pwacnacng eltahl etwaclah in oruh pac ma inge. Kom kuh pac in luti tuhlihk nuhtum an ke mwe srihkasrak lom uh. Debbie, suc oasr tuhlihk luo nahtuh el fahk: “Wacngihn pacl nga lwemta ke srihpen pacl ma mukul tuhmuhk ah sang in kahsruh mwet sahyac oacna sie elder. Nga etuh lah pacl nuhkewa ma sucu lasr uh enenuh pacl ac kahsruh lal uh, el ac use.” (Sie Timothy 3:4, 5) Mwe srihkasrak lal Debbie ac Pranas, mukul tuhmwacl uh, kahsruh fuhkah sucu laltahl uh? Pranas el fahk lah tuhlihk nahtuhl uh arlac engan in kahsruh ke pacl in toeni luhlahp uh. Eltahl engan, puhs kawuck na wowo laltahl ac eltahl luhngse wi mwet lili uh. Ke pacl inge, eltahl nohfohn ke sucu uh kuhlwacnsuhpuh Jeova ke eltahl wi ke orekma in pioneer. Kom fin inse puhsisacl ac tiac nuhnkuh keim sifacna, kom luti tuhlihk nuhtum an in luhngse kahsruh mwet sahyac.

AHKKAHLWEMYE KAHLWEM LOM

10. Jesus el orekmakihn fuhkah kahlwem lal ke pacl ma mwet fin acn Galilee tuhkuh in sokuhl?

¹⁰ Jesus el ahkkahlwemye kahlwem lal ke inkacnek suwohswohs. El tiac lohacng muhkwena nuh ke ma mwet uh oruh tuh ke srihpac pwacnacng eltahl oruh ma ingacn. El kuh in etuh lah meac oan ke insiacltahl. Ke sie mwe puhpuhlyuck, sie pacl ah mwet ekahsr tuhkuh nuh Galilee in sokuhl. (John 6:22-24) El akihlenack lah tiac srihpac na pwacye ma pwacnacng eltahl in sokuhl uh pa in lohng mwe luti lal uh, a eltahl sukok mongo. (John 2:25) Jesus el etuh ma eltahl puhla na pwacye uh. Ac el mongfihsracsr ke inkacnek el ahksuwohsyacltahl ac ahkuhtweyac nuh seltahl ma eltahl enenuh in eklac kac uh.​—Riti John 6:25-27.

11. (a) Kom ac oruh fuhkah kom in kahlwem ke ma tuhlihk nuhtum an puhla ke orekma in luti uh? (b) Kom ac kahsruh fuhkah tuhlihk nuhtum an in engankihn orekma in luti uh?

¹¹ Kom tiac kuh in etuh na pwacye lah meac oan ke insiacn tuhlihk nuhtum an, tuhsruhktuh kom kuh in kahlwem kac. Ke sie mwe puhpuhlyuck, kom kuh in kahlwem ke ma tuhlihk nuhtum an puhla ke orekma in luti uh. Pahpah ac ninac pucspucs oraclah pacl in monglac srihsrihk ke pacl eltahl wi forfor uh, tuh tuhlihk nahtuhltahl uh in monglac ac nuhmlah kuh kanglah sie ma ah. Tuhsruhktuh, kom ac kuh in siyuck sum sifacna, ‘Yac tuhlihk nuhtihk uh engankihn na pwacye orekma in luti uh kuh pacl in monglac uh na? Kom fin akihlen lah tuhlihk nuhtum an tiac arlac engankihn orekma in luti uh, srihke oraclah in pwacr nuh seltahl. Sang kuhtuh ma eltahl ac kuh in oruh ah tuh eltahl in puhla lah yohk srihpacltahl.

12. (a) Meac Jesus el sensenkihn mwet tuhma lutlut lal ah kac? (b) Efuh kuh mwet tuhma lutlut lal Jesus ah enenuh na pwacye kahs in sensen lal inge?

¹² Ke inkacnek fuhkah pac sahyac Jesus el ahkkahlwemye kahlwem lal? El etuh lah tahfonglac sefanna ac kuh in kol nuh ke sie pac ac oraclah ma na kuluk. Pwacnacng el sensenkihn mwet tuhma lutlut lal ah ke ma inge. Ke sie mwe puhpuhlyuck, mwet tuhma lutlut ah etuh tari lah ma na kuluk se pa orekma in kosro uh. Tuhsruhktuh, Jesus el oacyacpac sensenkuhnuhltahl ke ma ac kuh in oruh sie mwet elan orek kosro. El fahk: “Kuhtwena mwet suc ngwetacng nuh sin sie muhtwacn ac oasr nuhnak in kena lal nuh sel, el orek kosro nuh sel tari in nuhnak luhn insiacl. Ke ma inge, ahtronmotom lacyot fin ahkkulukye kom, tipallah ac sislah!” (Matthew 5:27-29) Mwet tuhma lutlut ah muhta inmahsrlon mwet na kuluk fin acn Rome. Mwet we inge pwacr ke liyeyuck drama kuh sritacl ma nwacnwaclah ke orekma in kosro ac kahs fohkfohk. Pwacnacng ke inkacnek suc ahkkahlwemye luhngse, Jesus el sensenkihn mwet tuhma lutlut lal ah in fahsr liki kuhtwena ma ma ac oruh upac nuh seltahl in oruh ma wo.

13, 14. Kom ac kahsruh tuhlihk nuhtum an fuhkah in fahsr liki mwe ahkengan kuluk ac fohkfohk?

¹³ Pahpah ac ninac, kom kuh pac in orekmakihn etwacack kuh kahlwem lom in karihngihn tuhlihk nuhtum an liki kuhtwena ma ma ac tiac ahkinsewowoye Jeova. Mwe ahsor se lah ke pacl inge sensenkihnyuck pac tuhlihk srihsrihk uh ke petsac fohkfohk ac kuhtuh pac ma sahyac ma ahkkahlwemye orekma in kosro. Ma na kahlwem se lah kom enenuh in fahk nuh sin tuhlihk nuhtum an lah kuluk in liyeyuck petsac fohkfohk ke orekma in kosro. Tuhsruhktuh, oasr pac ma sahyac kom kuh in oruh in karuhnguhnuhltahl. Siyuck sum sifacna: ‘Yac tuhlihk nuhtihk uh etuh lah efuh petsac fohkfohk uh arlacna sensen? Meac ac kuh in oruh eltahl in ke liye kain in petsac inge? Yac nga oruh fihsracsr nuh seltahl in sramsram nuh sihk ke kuhtwena ma, tuh eltahl in siyuck kahsruh sihk eltahl fin srihfeyuck in liyeyuck petsac fohkfohk?’ Finne ke pacl se ma tuhlihk uh srackna srihk, kom kuh in fahk nuh seltahl: “Kom fin liye kuhtwena ma ke internet uh ma oruh kom in nuhnkuh ke ohsun luhn muhtwacn ac mukul ke mahno ac kom ke liye ma inge, nuhnak muhnahs tuhkuh sramsram nuh sihk. Nik kom sahngweng kuh mwekihn in siyuck sihk ke kahsruh. Nga ke kahsre kom.”

¹⁴ Ke pacl nuhkewa ma kom sulaclah mwe ahkengan nuh sum sifacna uh, nuhnkaclah ahkwoyac lah kom ac oakiyac fuhkah mwe srihkasrak wo nuh sin tuhlihk nuhtum an. Pranas, suc kuht sruhmuhn piacng sac el fahk: “Kom kuh in fahk ma nuhkewa kom luhngse an, tuhsruhktuh tuhlihk nuhtum an tuni ma kom oruh uh ac etahi kom.” Kom fin sensenkihn ac sulaclah in wo on, puk, ac movie ma kom ac engankihn an, kom ac kuh in kahsruh tuhlihk nuhtum an in oruh oacpacna.​—Rome 2:21-24.

JEOVA EL AC KAHSRE KOM

15, 16. (a) Efuh kom kuh in luhlahlfongi lah Jeova el ac kahsre kom in ahkpahye tuhlihk nuhtum an? (b) Meac kuht ac fah sramsramkihn ke mwe lutlut se tok uh?

¹⁵ Meac sikyak ke pacl se Manoah el tuh siyuck Jeova elan kahsrel tuh elan sie pahpah na wo? “God El oruh oacna ma Manoah el siyuck ah.” (Mwet Nununku 13:9) Pahpah ac ninac, Jeova el ac lohng pac puhruhe lom an. El ac kahsre kom in ahkpahye tuhlihk nuhtum an. Ac el ac fah kahsre kom in ahkkahlwemye luhngse, inse puhsisacl ac kahlwem lom.

¹⁶ In oacna ke Jeova el ac kahsre kom in ahkpahye tuhlihk nuhtum an ke eltahl srackna srihk, el kuh pac in kahsre kom in ahkpahyacltahl ke pacl se eltahl eklac sie mwet fuhsr. Ke mwe lutlut se tok uh, kuht ac fah sramsramkihn lah fuhkah mwe srihkasrak lal Jesus ke luhngse, inse puhsisacl ac kahlwem ac kuh in kahsre kom in ahkpahye tuhlihk fuhsr nuhtum an in kuhlwacnsuhpuh Jeova.

[Sihm srihsrihk e ten]

[Pohk ke sra 10]

Mwet Lutlut Bible Lom Suc Yohk Srihpac Emeet uh

KE PACL kuht lutlut nuh sin mwet sahyac uh, kuht kwacna orekmakihn puk se inge Mea Baibel el Luti Na Paye? in kahsreltahl etwaclah kacl Jeova ac in etwaclah ma pwacye in Bible uh. Kuht lutlutkihn puk se inge “Keep Yourselves in God’s Love” in kahsreltahl ahkyohkye luhngse laltahl nuh sin Jeova ac nuh ke oakwuck suwohswohs lal uh.

Tuhlihk nuhtum an pa mwet lutlut Bible lom ma yohk srihpac emeet uh. Eltahl enenuh in etwacllah Jeova, luhngse el ac kahlwem ke ma el luhngse eltahl in oruh uh. Pwacnacng, lutlutkihn puk inge Baibel el Luti ac “God’s Love” nuh sin tuhlihk nuhtum an, mukul tuhmom kuh muhtwacn kiyom an finne tiac na kuhlwacnsuhpuh Jeova. (Soakas 6:20) Kom kuh in orekmakihn mwe kahsruh ke mwe lutlut ke jw.org inge in kahsruh tuhlihk nuhtum an in nuhnkuh yohk ke ma el lutlut ke Baibel el Luti tuh in kahsreltahl kahlwem kac lah eltahl ac orekmakihn fuhkah ma eltahl lotwelah inge.​—Liye ye BIBLE TEACHINGS > TEENAGERS.c

[Sihm srihsrihk e ten]