SIFAC KE KOLO | MEAC NUHNAK LUHN GOD KE MWEUN UH?

Nuhnak luhn God ke Mweun KE PACL INGE

Ke pacl inge, oasr mwet suc ahkkohsyeyuck. Puhs mwet suc tuhng siyuck ke kahsruh luhn God pacl nuhkewa ac nuhnkuh fin ac oasr kahsruh ituckyang nuh seltahl. Yac God el lohng tuhng luhn mwet suc siyuck ke kahsruh inge? Nuh sin mwet suc luhlahlfongi muh mweun uh ac fah ahkwoyelah moul in kohs laltahl uh, yac God el kahsruh kwacfeacng laltahl uh ac puhla muh srihpac laltahl in som mweun inge wona kuh wacngihn ma kuluk kac?

Ma se meet, kom ac engan in etuh kahs pwacye inge: God el liye mwe kweok luhn mwet fin facluh uh ac oasr ma el ac ahkoo in oruh nuh kac. (Psalm 72:13, 14) Ke kahs lal in Bible uh, God el wuhlelah muh “El fah sot monglac nuh suwos suc ahkkweokyeyuck.” Ngac? “El ac fah oruh ma inge ke pacl se Leum Jesus el ac sikme inkuhsrao me wi lipufacn kuhlacna lal . . . in sang kalyaelos suc pihlesruh God, oacyacpac elos suc tiac ahkos Pweng Wo ke Leum lasr Jesus Christ.” (Luo Thessalonica 1:7, 8) Pacl in sikme se lal Jesus inge ac fah orek ke pacl fahsruh uh ma Bible uh pahngon ma inge “Lwen Luhlahp luhn God Kuhlacna,” kuh etweyuck pac muh Armageddon.​—Fwackyuk 16:14, 16.

Ke mweun se ke pacl fahsruh uh inge, God el ac orekmakuhnuhl Jesus, suc Wen nahtuhl ac kuhtuh pac lipufacn sahyac in som mweun lain mwet kuluk nuhkewa. Jesus ac lipufacn inge ac fah ahkwacngihnyelah orekma in ahkkweok nuhkewa uh.​—Isaiah 11:4; Fwackyuk 19:11-16.

Nwe mihsenge, tiac eklac nuhnak luhn God ke mweun uh. El srackna puhla muh mweun uh pa inkacnek se ma fal emeet in ahksahfyelah ma kuluk ac mwe ahkkweok nuhkewa uh. Tuhsruhktuh, ke ma ahkpwacyeyuck ke lusen moul luhn mwet uh, God muhkwena pa oasr suwohs la in fahk lah piyac pacl ma mweun inge ac fah orek ac suc ac fah wi kac uh. In oacna ma ahkkahlwemyeyuck uh, God el etuh tari lah mweun se ma ac fah ahkwacngihnyelah ma kuluk nuhkewa uh ac fohlohkihn ma kuluk luhn mwet ahkkweok inge pa sie mweun ke pacl fahsruh uh ac mweun inge fah orek sel Jesus, Wen nuhtin God. Kalmen ma inge pa mweun ma orek fin facluh ke pacl inge uh tiac ahkinsewowoye God, ma inge finne nuhnkeyuck muh wo kuh yohk srihpac.

In luhmahllah ma inge: Srihke petsacelah tamuhlel luo ma muhtwacwacack in amaci ac acnwuck ke pahpah tuhmwacltahl ah wacngihn. Na eltahl tui kihtin pacl in pahngon pahpah tuhmwacltahl uh ke telefon ah. Sie tuhlihk inge fahk muh tuhlihk se sahyac ah pa sramteack uh, a ma se sahyac ah tuhkahkihn muh mweyen tiac orek el wo. Eltahl kewana tuhkahkihn ma sikyak uh ac finsrakkihn muh pahpah tuhmwacltahl ah ac weack sie seltahl. Tuhsruhktuh, tukun el lohng srihpac laltahl uh kewa, el sapkihn eltahl in tui ke acnwuck uh ac sano elan sun lohm uh na el fah lohacng nuh ke ma sikyak inge. Tuhlihk luo inge sano ke kihtin pacl. Tuh tiac paht na eltahl sifwil pac muhtwacwack acnwuck. Ke pacl se pahpah tuhmwacltahl ah sun lohm uh, el tiac engan seltahl kewa ac el kaeltahl ke seahkos laltahl uh.

Ke pacl inge muhtuhnfacl ma mweun lain sie sin sie uh kwacna ngwetack nuh sin God in eis kahsruh lal. Tuhsruhktuh, God el tiac wi ke kuhtwena u kuh lacyen ke mweun nuhkewa ma orek ke pacl inge uh. Ke kahs lal in Bible uh, el fahk arlac kahlwem: “Fin oasr kuhtwena mwet oruh ma kuluk nuh suwos, kowos in tiac fohlohkihn nuh sel ke ma kuluk,” ac “kowos in tiac fohlohksahk.” (Rome 12:17, 19) Yohk liki ma inge, el oruh in kahlwem nuh sin mwet uh lah eltahl enenuh in “mongfihsracsr ac tuhpan ma LEUM GOD El fah oruh” ke Armageddon. (Psalm 37:7) Ke pacl se muhtuhnfacl uh tiac sano God elan oruh ma el ac oruh uh ac eltahl sifacna som nuh ke mweun, el liye mweun inge oacna orekma luhn mwet ma sifacna us kuh la ac el tiac insewowo kac. Pwacnacng ke Armageddon, God el ac fah ahkkahlwemye muhlat ac toasr lal ke el ahkwacngihnyelah amaci nuhkewa luhn muhtuhnfacl uh ac nuh sin mwet nuhkewa el ac fah “tulokihnyac mweun fin facluh nohfohn.” (Psalm 46:9; Isaiah 34:2) Ahok, Armageddon pa mweun sahflah se ma ac ahkwacngihnyelah mweun nuhkewa sahyac.

Wacngihnlac luhn mweun uh sie na sin mwe insewowo pucspucs ma tuhkuh ke Tohkohsrahi luhn God uh. Jesus el sruhmuhn ke government se inge ke puhruhe na etweyuck se lal uh: “Tohkohsrahi lom in tuhkuh. Ma luhngse Lom in orek, oacna in kuhsrao, ohinge fin facluh.” (Matthew 6:10, BMK) Tohkohsrahi luhn God uh ac ahkwacngihnyelah mweun nuhkewa, wi sropon ma inge ac ma kuluk nuhkewa.a (Psalm 37:9, 10, 14, 15) Pwacnacng, mwet tuhma lutlut lal Jesus uh engan in sano mwe insewowo ma tuhkuh ke Tohkohsrahi luhn God uh.​—Luo Peter 3:13.

Tuhsruhktuh, puhtahkah kuht ac sano Tohkohsrahi luhn God in ahkwacngihnyelah mwe kweok, orekma in ahkkweok ac orekma kuluk nuhkewa? Mwe ahkpwacyeye nuh ke kahs pahluh in Bible uh ahkkahlwemye lah kuht moul ke “lwen sahflah” ke oakwuck kuluk se inge. (Luo Timothy 3:1-5)b Ke pacl na sa, Tohkohsrahi luhn God ac fah ahksahfyelah lwen sahflah inge ke mweun se inge pahngpahng Armageddon.

In oacpacna ma fwack tari ah, mwet suc misac ke mweun sahflah se inge pa mwet suc sruhnga “ahkos Pweng Wo ke Leum lasr Jesus Christ.” (Luo Thessalonica 1:8) Tuhsruhktuh, esam lah God el tiac insewowo ke misac luhn kuhtwena mwet, finne mwet kuluk. (Ezekiel 33:11) “El tiac luhngse kuhtwena mwet in tuhlac” ke mweun sahflah se inge. Ke pacl inge, el liye lah pwacye pweng wo kacl Leum Jesus uh “lutiyuck fin facluh nohfohn in mwe loh nuh sin mwet nuhkewa” meet liki sahflah uh tuhkuh. (Luo Peter 3:8, 9; Matthew 24:14; Sie Timothy 2:3, 4) Pwacnacng, ke srihpen orekma in luti luhn Mwet Loh luhn Jeova ma orek fin facluh nohfohn, mwet uh kuh in etwacllah Jeova, ahkos pweng wo kacl Jesus ac sang kuhiyacltahl kewa in wi liye ke lwen se ma mweun uh wacngihnlac.

[Sihm srihsrihk e ten]