U Sefwanna Met Seperd Sefwanna
“Komwos su fwasr tukuk, . . . ouyepa fwa muta fwin tron siengoul luo, a nununku sruf siengoul luo lun Israel.”—MATTU 19:28.
1. Oiya fuka Jeova el akkalemye nu sin tulik nukewa natul Ebream? A efu ku ma inge tia kalmekin mu el srunga met lun mutunfwal saye nukewa?
JEOVA el lungsel Ebream, ke ma inge el akkalemye pa lungse paye nu sin tulik nukewa natul Ebream. Ke lusen century limekosr, el liye mutunfwal Israel oana met su el sulela, ‘ma saok lal’ sifwana. (Ridi Duteronomi 7:6.) Ke sripe se inge ya Jeova el tia lungse met lun mutunfwal saye? Mo. In pal se inge, Jeova el lela met puspus su tia met Israel su lungse in alu nu sel in ku in wi yurin mutunfwal saoklana lal. Met nukewa inge su pangpang proselytes, elos liyeyuk pa oana met lun mutunfwal se inge. Met Israel enenu paing elos oana met lili wiyelos. (Livitikus 19:33, 34) A metsa nukewa inge elos enenu pa in akos masap nukewa lun Jeova.—Livitikus 24:22.
2. Kas fuka Jisus el akkalemye nu sin met Ju, a kusensiyuk fuka sikyak ka?
2 Tusruktu, Jisus el akkalemye ma siena nu sin met Ju in len lal: “Ke ma inge Nga fwak nu sumwos, Togusrai lun God fwa etukla liki komwos, a fwa etukyung nu sin sie mutanfwal su fwa isus fwako ka.” (Mattu 21:43) Su a fwa wi ke mutunfwal sasu se inge, a mea oiya sasu inge orek nu sesr ke pal inge?
Mutunfwal Sasu
3, 4. (a) Fuka met sap Piter el akkalemye ke mutunfwal sasu se inge? (b) Su wi ke mutunfwal sasu se inge?
3 Met sap Piter el akkalemye kalem ke mutunfwal sasu se inge. El simusla nu sin met Kristian lili wiyel nukewa: “A komwos ‘fwil sulela, met tol leum, mutanfwal mutal, met su ma lun God mukena, tu komwos fwa ku in fwakak mwo lal’ su pangon komwos liki losr nu ke kalem sakuruk lal.” (1 Piter 2:9) Oana ma palyeyuk tari met Ju paye su lulalfongel Jisus oana Messaia pa u se meeta su wi ke mutunfwal sasu inge. (Daniel 9:27a; Mattu 10:6) Tok, met puspus su tia met Israel elos wi pa nu ke mutunfwal se inge, meyen Piter el fwak pa kas inge: “Su in pal somla komwos tia mutanfwal, a inge komwos mutanfwal lun God.”—1 Piter 2:10.
4 Nu sin su Piter el kaskas nu se inge? Ke mutaweyen leta lal, el fwak: “[God el] sifwil oswekutla nu ke fwinsrak lun moul ke sifwil moulyuk lun Jisus Kraist liki mise, nu ke usru su tia ku in kulamwi, a tia kolukla, a tia ku in efla. Lemla nu sumwos in kosrao.” (1 Piter 1:3, 4) Ke ma inge mutunfwal sasu se inge el orekla sin met Kristian akmusrala, su oasr fwinsrak in moul in kosrao. Elos pa “Israel lun God.” (Galetia 6:16) Ke sie aruruma, met sap Jon el liye la pisen Israel lun God inge oasr ke 144,000. Elos “moliyukla liki metu, tu elos fwako se meet nu sin God a nu sin Lam” in kulansap we oana “met tol” a in “kol oana togusra yurin [Jisus] ke lusen sie tausan yea.”—Fwakyuk 5:10; 7:4; 14:1, 4; 20:6; Jemes 1:18.
Sayen met Akmusrala Ya Mutunfwal Israel el Lumeyuk Pa nu ke Met Puspus Saye?
5. (a) Kas inge “Israel lun God” el lumeyuk nu sin su? (b) Efu ku kas inge “Israel” oasr pa kalme saye?
5 Ke ma inge, arlana kalem la, pulo kas inge “Israel lun God” in Galetia 6:16 el kalmekin nu sin met Kristian akmusrala mukena. Tusruktu, ya oasr kutupal ke pal se Jeova el orekmakin mutunfwal Israel oana sie me pupulyuk, su oasr kutupa met wi ka sayen met akmusrala? Me top oasr ke kas inge lun Jisus nu sin met sap oaru nukewa lal: “A Nga pakiye nu sumwos sie togusrai, oana Papa tumuk el pakiye nu sik, tu komwos fwa mongo a nim ke tebu luk in togusrai luk, a komwos fwa muta fwin tron a nununku sruf siengoul luo lun Israel.” (Luk 22:28-30) Ma inge fwa sikyak ke pal se “sifwilpa orekla lun ma puspus,” ku ke pal in sifwil akmwoye ma nukewa, ke lusen Kolyuk lun Jisus ke Sie Tausan Yea.—Ridi Mattu 19:28.a
6, 7. “Sruf sengoul luo lun Israel” su akkalemyeyuk in Mattu 19:28 a Luk 22:30 el petsaela su?
6 Met akmusrala inge su piselos oasr ke 144,000 elos fwa kulansap in kosrao oana togusra, met tol, a met nununku ke lusen Tausan Sie Yea. (Fwakyuk 20:4) Su elos fwa nununku a kol an? Mattu 19:28 a Luk 22:30 akkalemye la elos fwa nununku “sruf sengoul luo lun Israel.” Ke ma simusla inge “sruf sengoul luo lun Israel” el petsaela su? Ma inge lumeyuk nu selos nukewa su oasr fwinsrak in moul fwin fwalu, nu selos su lulalfongi ke me kise lun Jisus, tusruktu elos tia wi ke u lun met tol a togusra. (Sruf lun met Livai el wangin ke ma simusla inge ke sruf 12 lun met Israel paye.) Ke ma simusla inge sruf 12 lun Israel el lumeyuk nu selos su fwa eis me akkeye yok nu ke fototo lalos nu sin God ke kasru lun orekma lun met tol nukewa inge su piselos oasr ke 144,000. Met nukewa inge su tia met tol elos met lun God pa, a el lungselos a eiselos. Arlana fwal pa in pupulyukkinyuk elos nu sin met kulansap lun God in pal meeta.
7 Arlana fwal, tokin met sap Jon el liye Israel lun God su piselos oasr ke 144,000 su eis tari sil lalos meet liki ongoiye lulap, el liye pa sie “u lulap” su wangin met ku in oekla, a elos tuku “liki mutunfwal nukewa.” (Fwakyuk 7:9) Elos e fwa moulla liki ongoiye lulap nu ke kolyuk lun Kraist ke lusen Tausan Sie Yea. Billion puspus sin met su fwa sifwil moulyuk fwa welulos. (Jon 5:28, 29; Fwakyuk 20:13) Met nukewa inge su pupulyukkinyuk nu ke “sruf sengoul luo lun Israel” fwa nununkeyuk sin Jisus a sin met 144,000 su welul kol.—Orekma 17:31; 24:15; Fwakyuk 20:12.
8. Akwuk puspus ke Len in Orek Iumwe el lumala fuka ke oiya su sikyak inmasrlon 144,000 a met puspus saye?
8 Oiya inge inmasrlon met 144,000 a met puspus saye inge el lumeyuk pa nu ke ma sikyak puspus ke Len in Orek Iumwe su orek ke yea nukewa. (Livitikus 16:6-10) Ma se meet, met tol fulat el sapkinyuk in kisekin kao mokul soko oana me kise ke ma koluk “lal sifwana a ke loom sel.” Ke ma inge, me kise lun Jisus el orekmakinyuk meet nu sin met nukewa su fwa welul oana met tol, a togusra in kosrao. Oayepa ke Len in Orek Iumwe, oasr goat lukwe kisekinyuk pa nu ke ma koluk lun met Israel saye nukewa. Ke ma simusla inge, sruf lun met tol el petsaela 144,000, a met Israel saye nukewa el lumeyuk nu sin met nukewa su oasr fwinsrak in moul ma patpat fwin fwalu. Me akuteye inge el akyokye kalmen kas inge “Israel,” su kalmekin pa nu sin met nukewa su filiye lulalfongi lalos ke me kise lun Jisus, a tia nu sin u lun met akmusrala mukena.b
9. Met tol ke aruruma lal Ezikiel elos lumeyuk nu sin su? A met Israel saye nukewa su tia met tol elos lumeyuk nu sin su?
9 Nunku akmwoye ke sie pa me pupulyuk. Oasr aruruma ke tempel lun Jeova su akkalemyeyuk nu sin met palu Ezikiel. (Ezikiel sapta 40-48) Ke aruruma se inge, met tol elos orekma luen temple, a elos luti a eis kas in kasru a me aksumwos lun Jeova. (Ezikiel 44:23-31) Ke aruruma inge, met lun kain in sruf puspus elos tuku in alu a in kisekin me kise lalos nu sin God. (Ezikiel 45:16, 17) Ke ma inge, met tol elos petsaela met akmusrala, a met Israel su tuku sin sruf su tia orekma oana met tol elos lumeyuk nu sin met nukewa su oasr fwinsrak in moul ma patpat fwin fwalu. Aruruma se inge el akkalemye yok la u luo inge elos tukeni orekma a oasr inse sefwanna lalos, a un met akmusrala elos kol orekma nukewa ke alu paye.
10, 11. (a) Kut liye akpayeyen kas fuka lun Jisus ke pal inge su ku in akkeye lulalfongi lasr? (b) Kusensiyuk fuka ku in siyukyuk ke sip ngie?
10 Jisus el kaskaskin “sip ngie” su tia muta in “kalkal” lun “u srisrik” lun met kulansap akmusrala lal. (Jon 10:16; Luk 12:32) El fwak: “Nga fwa ouyepa wiselosme, a elos fwa long pusrek, a elos fwa u siefwanna a met sropu siefwanna.” Aok sie me akkeye nu ke lulalfongi lasr pa inge in liye akpayeyen kas lal inge! U luo lun met elos tukeni nu sie, u srisrik lun met akmusrala a u lulap lun sip ngie. (Ridi Zekaraia 8:23.) Aok fwinne met nukewa ke sip ngie elos tia oru kunokon saoklana lun met akmusrala, tusruktu elos kulansap pa nu sin Jeova, oana ke kas in pupulyuk, elos kulansap ke sie inkul likin temple.
11 Fwin Jeova el orekmakin kutupal met Israel su tia met tol in pal meeta in petsaela sip ngie, ke ma inge ya elos e fwa wi pa kang bred a nim wain ke Memorial? Kut fwa lutlutkin ingena me top nu ke kusensiyuk se inge.
Mwuleang Sasu
12. Akwuk sasu fuka Jeova el palye in pal meeta?
12 Jeova el palye ke sie akwuk sasu nu sin met kulansap nukewa lal ke el fwak kas inge: “A pa inge mwuleang se su Nga fwa oru yurin loom sel Israel tokin len ingo. . . . Nga fwa filiye masap luk insielos, a Nga fwa simusla insielos. A Nga fwa God lalos, a elos fwa met srak.” (Jeremaia 31:31-33) Ke inkanek lun mwuleang sasu se inge, mwulela lun Jeova nu sel Ebream fwa akpayeyuk ke inkanek mwomwo nu tok ma patpat.—Ridi Genesis 22:18.
13, 14. (a) Su wi ke mwuleang sasu? (b) Su met puspus su fwa eis me insemwomwo puspus ka? A elos ‘sruokye’ fuka mwuleang sasu se inge?
13 Jisus el sramsramkin mwuleang sasu se inge ke fong se meet liki el mise ke el fwak: “Kup se inge mwuleung sasu in srak, su surorla keyumwos.” (Luk 22:20; 1 Korint 11:25) Ya met Kristian nukewa elos wi ke mwuleang sasu se inge? Mo. Kutu sin met su oasr we oana met sap puspus su numla kup in wain in fong se, elos wi ke mwuleang sasu.c Jisus el orala siepa mwuleang nu selos in welul kol ke Togusrai lal. (Luk 22:28-30) Elos fwa welul Jisus ke Togusrai lal.—Luk 22:15, 16.
14 Na mea nu selos su fwa moul fwin fwalu ye kolyuk lun Togusrai? Elos fwa eis me insemwomwo puspus su tuku ke mwuleang sasu. (Galetia 3:8, 9) Fwinne elos tia wi ke mwuleang sasu, elos ‘sruokye’ mwuleang se inge ke elos akos masap nukewa ka, in oana ke ma met palu Isaia el palye: “Ouyepa metsa su sifwana oeung Jeova, in orekma nu sel, a in lungse En Jeova, tu in met kulansap lal, kais sie su liaung len Sabat in tia akkolukye, a srukye ku mwuleung luk, aok nga fwa wiselos nu fwin eol mutal luk, a akengunyelos in imwen pre sik.” Jeova God el fwak pa ouinge: “Tu loom sik fwa pangonyuk imwen pre nu sin mutanfwal nu kemwa.”—Isaia 56:6, 7.
Su Fwa Wi Kang Bred a Nim Wain?
15, 16. (a) Mea met sap Poul el akuteye ke mwuelang sasu? (b) Efu ku met nukewa su oasr fwinsrak in moul fwin fwalu elos tia enenu in wi kang bred a nim wain ke Memorial?
15 Elos nukewa su wi ke mwuleang sasu “pulaik in ilyuk nu yen mutal.” (Ridi Hibru 10:15-20.) Met nukewa inge fwa “eis togusrai su koflanu moguigui.” (Hibru 12:28) Ke ma inge, met nukewa su fwa wi togusra a met tol in kosrao yurin Jisus Kraist fwa nim wain on ke “kup” su lumeyuk nu ke mwuleang sasu. Met nukewa su wi ke mwuleang sasu pa fwakelosyung oana mutan nasnas nu sin Lam. (2 Korint 11:2; Fwakyuk 21:2, 9) Met saye nukewa su wi ke Me Esmakin ke mise lun Jisus elos wi akfulatye ma inge wi sunak lalos nu ka, tusruktu elos tia wi nim wain a kang bred.
16 Poul el kasre kut pa in kalem ka la met nukewa su oasr fwinsrak lalos in moul fwin fwalu elos tia wi kang bred a nim wain ke Memorial. El fwak nu sin met Kristian akmusrala: “Tu pal e nu kemwa komwos mongo bred inge, a nim kup inge, komwos fwakak mise lun Leum nu ke pal se el sifwil tuku.” (1 Korint 11:26) Ngea Leum el a sifwil ‘tuku’? Ke pal se el tuku in eis met safla ke u lun met akmusrala oana mutan su akola in payuk nu ke loom selos in kosrao. (Jon 14:2, 3) Kalem la, me akfulat ke Mongo in Eku lun Leum el fwa aksafyeyukla. “Met lula” ke futen mutan su srakna oasr fwin fwalu elos fwa tafwela na in wi mongo bred a nim wain nu ke elos nukewa eis me insemwomwo lalos in kosrao. (Fwakyuk 12:17) Fwin met su a fwa muta ma patpat fwin fwalu elos ku in wi ipeis ke bread a wain, ke ma inge me akfulat ke mise lun Kraist enenu in orek ke yea nukewa nu tok ma patpat.
“Elos Fwa Met Srak”
17, 18. Kas palu su simusyukla in Ezikiel 37:26, 27 el akpayeyuk fuka?
17 Jeova el palye ke inse sefwanna lun met kulansap nukewa lal ke kas inge: “Nga fwa oru pa sie mwuleung lun misla yurolos, a fwa sie mwuleung nu tok yurolos. A nga fwa fulelosla, a akpusyelos, a fwa filiye loom mutal sik in masrlolos ma patpat. Loom nuknuk in tukeni luk fwa on pa yurolos, a nga fwa God lalos, a elos fwa met srak.”—Ezikiel 37:26, 27.
18 Met kulansap nukewa lun God elos ku in eis me insemwomwo yok ke akpayeyen kas palu mwomwo inge, ke mwuleang ke misla. Aok, Jeova el mwulela misla nu sin met kulansap nukewa lal su lungse in aksol. Fwako lun ngun mutal lal el arlana kalem inmasrloslos. Tempel lal, su lumeyuk nu ke alu paye lun met Kristian, el oasr yurolos. Elos ekla met sral, meyen elos som liki kain in alu nu ke ma srolela a elos alu nu sin Jeova God mukena.
19, 20. Su wi ke u lun met su Jeova el pangon “met srak,” a mea ku in akpayeye ke inkanek lun mwuleang sasu?
19 Arlana mwo in liye u luo inge su oasr inse sefwanna inmasrlolos! U lulap su arlana puseni ke pal inge wangin fwinsrak lalos in moul in kosrao, ne ouinge elos engun yok in wi nu selos su oasr fwinsrak inge. Elos lungse in weang Israel lun God pal nukewa. Ke elos oru ma inge, elos welulos su Jeova el panglolos “met srak.” Kut liye akpayeyen kas palu inge nu selos: “A mutanfwal puspus fwa oeung Jeova in len sa, a elos fwa met srak a nga fwa muta in masrlom.”—Zekaraia 2:11; 8:21; ridi Isaia 65:22; Fwakyuk 21:3, 4.
20 Ke inkanek lun mwuleang sasu, Jeova el oru ma nukewa inge in ku in akpayeye. Million sin met lun mutunfwal nukewa elos wi ke u lun met kulansap lun God. (Maika 4:1-5) Elos lungse na paye in kafweang in sruokye ku mwuleang sasu se inge ke elos aksaokye a akos ma sap nukewa ka. (Isaia 56:6, 7) In oru ouinge, wekunang Israel lun God, elos engunkin misla pal nukewa. Lela komwos in engunkin oiya inge, ingena a nu tok ma patpat!
[Footnote]
a Mattu 19:28 (NW): “A Jisus el fwak nu selos: ‘Payenu Nga fwak nu sumwos, tu komwos su fwasr tukuk, in pal in sifwil orekla ma puspus ke Mwen nutin met fwa muta fwin tron in mwolana lal, komwos ouyepa fwa muta fwin tron sengoul luo, a nununku sruf sengoul luo lun Israel.’”
b Ke inkanek oapana inge, met akmusrala sramsramkinyuk pa oana “congregation.” (Hibru 12:23, NW) Tusruktu kas se inge “congregation” oasr pa kalme saye, a el kalmekin pa nu sin met Kristian nukewa, fwinne oasr fwinsrak lalos in kosrao ku fwin fwalu.—Srike liye Tauer in San, July 1, 2007, sra 23-26.
c Jisus pa met Iumwe ke mwuleang se inge. Oana Met Iumwe ka, kalem la el tia wi kang bred a nim wain.
Ya Kom Esam?
• Su “sruf sengoul luo lun Israel” inge su met 144,000 fwa orek nununku ?
• Mea kalmen mwuleang sasu nu sin met akmusrala nukewa a nu sin sip ngie?
• Ya met Kristian nukewa elos enenu in wi kang bred a nim wain ke Memorial?
• Kain in inse sefwanna fuka palyeyuk tari nu ke len lasr?
[Graph/Petsac ke sra 27]
(For fully formatted text, see publication)
Met puspus elos weang nu sin Israel lun God
7,313,173
4,017,213
1,483,430
373,430
1950 1970 1990 2009