Esani Ma On Lung A Ma On Fwalu
“Fwal nu ke nunuk mwo Lal . . . tu Lan esani nu sie ma nu kemwa in Kraist, ma on lung, a ma on fwalu.”—EFESUS 1:9, 10.
1. Mea “ma akinsemwomwoye” nu sin Jeova in kosrao a fwalu?
MISLA FWIN FWALU NUFON! Pa inge akwuk mwolana lun Jeova, “God lun misla.” (Hibru 13:20) Ngun mutal lal kasrel Poul met sap in simusla la “ma akinsemwomwoye” nu Sel pa in “esani nu sie ma nu kemwa in Kraist, ma on lung, a ma on fwalu.” (Efesus 1:9, 10) Mea kalmen kas inge su lungasyukla nu ke ‘sifwil esani nu sie’ ke fus inge? Mokul inge J. B. Lightfoot, sie scholar ke Baibel el simusla: “Kas se inge akkalemye ke pal se oasr oiya mwomwo a misla in kosrao a fwalu, a ma puspus saye ma tuku lik su orek me lokwalok ku me akkoluk fwa wanginla, a ma nukemwa fwa tukeni nu sie nu sin Kraist. Ma koluk a mise, me asor a me keok, e fwa wanginla.”
“Ma Puspus in Kosrao”
2. Su “ma puspus in kosrao” inge su eneneyuk in tukeni nu sie?
2 Met sap Piter el akkalemye ke kas futoto ke fwinsrak mwolana lun met Kristian paye nu kemwa ke el simusla: “A, oana mwuleung Lal, kut sano kosrao sasu a fwal sasu, yen sumwosmwos on we.” (2 Piter 3:13) “Kosrao sasu” su mwoleyukla inge el sramsramkin ke sie guferment sasu, ke Togusrai lun Messaia. “Ma puspus in kosrao” su akkalemyeyuk sel Poul ke leta lal nu sin met Efesus pa elos in tukeni nu sie “yurin Kraist.” Elos pa u srisrik lun met su suleyukla in welul Kraist in kol in kosrao. (1 Piter 1:3, 4) Met Kristian akmusrala inge su piselos oasr ke 144,00 elos “moliyukla tari liki fwalu,” a elos “moliyukla liki metu,” tu elos in welul Kraist ke Togusrai lal in kosrao.—Fwakyuk 5:9, 10; 14:3, 4; 2 Korint 1:21; Efesus 1:11; 3:6.
3. Ke oiya fuka met akmusrala ku in eteyuk mu elos ‘tukeni muta in kosrao’ fwinne elos oasr fwin fwalu?
3 Met Kristian akmusrala nukemwa elos sifwil isusla, ke kasru lun ngun mutal tu elos fwa ku in ekla tulik nutin God in ngun. (Jon 1:12, 13; 3:5-7) Ke sripen Jeova el nutelosla oana “mwen puspus natul,” na tok elos ekla ma wiyen Jisus. (Rom 8:15; Efesus 1:5) In oana mwen nutin God, fwinne elos srakna oasr fwin fwalu, elos eteyuk oana elos ‘akmoulyeyukyak yurol, a likiyuki in muta yurol in kosrao, in Kraist Jisus.’ (Efesus 1:3; 2:6) Elos muta in an fulat in ngun in pal inge meyen “siliyuki ke ngun mutal lun mwuleang, su me akpayeye usru [lalos]” su saneyuk ka elos in kosrao. (Efesus 1:13, 14; Kolosse 1:5) Ke ma inge, met nukemwa inge elos pa “ma puspus in kosrao,” su piselos pakiyuki tari sin Jeova a eneneyuk in oraloseni in tukeni nu sie.
Orekma in Esani Met Akmusrala Mutamwauk tari
4. Nge a fuka orekma in esani nu sie “ma puspus in kosrao” mutamwauk?
4 In fwal nu ke “orekma in liaung” lun Jeova, ku inkanek lal in karungin ma puspus, orekma in esani “ma puspus in kosrao” mutamwauk tari “in pal fwal” ku pal pakiyuki. (Efesus 1:10) Pal pakiyuki inge sikyuk tari ke Pentecost 33 C.E. Ke len se inge, ngun mutal el ilyuk nu in met sap nukemwa a un met tuma lutlut, mokul puspus a mutan puspus. (Orekma 1:13-15; 2:1-4) Pa inge me akpayeye la mwuleang sasu el mutamwauk in orekma, paenang ma sikyak inge pa mutamweyen congregation lun met Kristian a mutamweyen mutanfwal sasu lun Israel in ngun, “Israel lun God.”—Orekma 1:13-15; 2:1-4.
5. Efu ku Jeova el orala sie “mutanfwal sasu” in aola Israel in ikwe?
5 Mwuleang ke Masap su orekla nu sin met Israel tia akpayeyuk in orala “sie togusrai lun met tol puspus a sie mutanfwal mutal” su e fwa oru orekma in kulansap nu tok ma patpat in kosrao. (Exodus 19:5, 6) Jisus el fwak nu sin met kol puspus ke alu lun met Ju: “Togusrai lun God fwa etukla liki komwos, a fwa etukyung nu sin sie mutanfwal su fwa isus fwako ka.” (Mattu 21:43) Ke mutanfwal sa, su Israel in ngun, oasr met Kristian akmusrala puspus elos wi ka elos oasr tari ke mwuleang sasu. Met sap Piter el simusla ma inge nu selos: “A komwos ‘fwil sulela, met tol leum, mutanfwal mutal, met su ma lun God mukena, tu komwos fwa ku in fwakak mwo Lal’ su pangon komwos liki losr nu ke kalem sakuruk Lal su in pal somla komwos tia mutanfwal, a inge komwos mutanfwal lun God.” (1 Piter 2:9, 10) Met Israel in ikwe elos tila met kulansap lun God oana ke el oru mwuleang nu selos in pal meeta. (Hibru 8:7-13) In oana ke ma Jisus el palye tari, pal mwomwo lalos ke Togusrai lun Messaia wanginla yurolos a itukyang nu sin 144,000 met su wi ke Israel in ngun.—Fwakyuk 7:4-8.
Itukla Nu ke Mwuleang lun Togusrai
6, 7. Mwuleang mwomwo fuka Jisus el orala nu sin met lili wiyel in ngun, a mea kalmeyen ma inge nu selos?
6 Ke fong se Jisus el oakiye Me Esmakin ke mise lal, el fwak nu sin met sap oaru nukemwa lal: “A komwos elos su wi Yu in mel Luk; a Nga pakiye nu sumwos sie togusrai, oana Papa tumuk El pakiye nu Sik, tu komwos fwa mongo a nim ke tebu Luk in togusrai Luk; a komwos fwa muta fwin tron a nununku sruf siengoul luo lun Israel.” (Luk 22:28-30) Ke fus inge Jisus el sramsramkin sie mwuleang mwomwo su el orala nu sin met lili wiyel in ngun su piselos oasr ke 144,000, su fwa sruokye “oaru lalos nu ke mise” a elos akpayeye la elos ‘kutangla.’—Fwakyuk 2:10; 3:21.
7 Nu selos su wi ke u srisrik inge elos fuleak fwinsrak nukemwa lalos in muta ma patpat fwin fwalu oana met su moul in ikwe a sra. Elos fwa welul Kraist in kol oana togusra in kosrao, elos fwa muta ke tron in nununku metu. (Fwakyuk 20:4, 6) Lela kut in tuni kutupa ma simusla su orekmakinyuk mukena nu sin met akmusrala nukemwa a la efu ku akkalemyeyuk mu “sip ngia” elos tia wi kang me akul ke bred a wain su orekmakinyuk ke Me Esmakin nu ke mise lun Kraist.—Jon 10:16.
8. Mea met akmusrala elos akkalemye ke elos wi eis bred?
8 Met akmusrala elos pula pa me keok puspus su Kraist el sun a elos lungse in akpusiselyelos nu ke elos mise oana Jisus. Poul su sie sin met ke u inge, el fwak la el akola in oru kutena me kise tu el ku in “eis Kraist . . . tu elan etel a ku lun sifwil moulyuk lal, a aenguni ke keok lal.” Aok Poul el lungse in akpusiselyel sifwana nu ke mise su “oana luman mise lal.” (Filippai 3:8, 10) Met Kristian akmusrala puspus elos muteng ke moul in ikwe lalos nu ke “me keok puspus nu ke mise su metu oru nu sin Jisus.”—2 Korint 4:10.
9. Bred su orekmakinyuk ke Me Esmakin ke mise lun Kraist el lumeyuk nu ke mea?
9 Ke pal se Jisus el oakiye Mongo in Eku lun Leum, el fwak: “Pa inge monuk.” (Mark 14:22) El sramsramkin manol na paye, su fwa tia pat sringsring a sra surorla ke manol. Bred su tia pulol el sie me akul mwomwo nu ke manol. Efu? Meyen in Baibel, me pulol el ku in kalmekin nu ke ma koluk ku orekma koluk. (Mattu 16:4, 11, 12; 1 Korint 5:6-8) Jisus el sumwosmwos, a wangin ma koluk ke manol in ikwe. El fwa kisekin mano sumwosmwos lal inge oana sie me kise in orek iumwe. (Jon 6:51) Orekma lal inge fwa akinsemwomwoye met Kristian oaru nukemwa, elos su oasr fwinsrak in moul in kosrao, ku elos su oasr fwinsrak in moul ma patpat ke sie paredais fwin fwalu.—Hibru 7:26; 1 Jon 2:2.
10. Fuka elos nukemwa su wi eis wain ke Me Esmakin elos ‘wi ke sran Kraist’?
10 In sramsramkin wain su met akmusrala elos eis ke pal in Me Esmakin, oasr ma Poul el simusla ka: “Kup lun insemwomwo su kut pre ka, ya tia sie nu sin sie in sran Kraist?” (1 Korint 10:16) Ke inkanek fuka elos su wi eis wain elos ‘wi in sran Kraist’? Paye la elos tia sang manolos in wi ke me kise lun lango, ke sripen elos sifwana enenu in langoeyukla. Ke inkanek lun lulalfongi lalos ke ku lun sran Kraist in langoela metu, ma koluk lalos eis tari nunak munas ka a akkalemyeyuk elos oana met sumwosmwos nu ke moul in kosrao. (Rom 5:8, 9; Taitus 3:4-7) Ke inkanek lun sran Kraist su aksuroryeyukla paenang met 144,000 su welul Kraist oana met usru elos “akmutalyeyuk tari,” srela tari, aknasnasyeyukla liki ma koluk in ekla “met mutal.” (Hibru 10:29; Daniel 7:18, 27; Efesus 2:19) Paye la, ke sripen sral su aksuroryeyukla paenang ke inkanek inge Kraist el “molela met puspus nu sin God met lun sruf nu kemwa, a kaskas nu kemwa, a fwil nu kemwa, a mutanfwal nu kemwa .. . . oralos tu elos in togusra a met tol nu sin God lasr, a elos fwa togusra fwin fwalu.”—Fwakyuk 5:9, 10.
11. In eis wain ke Me Esmakin inge lumeyuk nu ke mea?
11 Ke pal se Jisus el oakiye Me Esmakin nu ke mise lal, el sang kup in wain nu sin met sap oaru nukemwa lal a el fwak: “Komwos nu kemwa nim ka tu pa inge ‘srak lun mwuleung,’ su ukweyukla nu sin met puspus in ela ma koluk.” (Mattu 26:27, 28) In oana ke sran kao mokul puspus a goat mokul puspus su akpayeye mwuleang ke Masap inmasrlon God a mutanfwal Israel, sran Kraist akpayeye mwuleang sasu su Jeova el orala nu sin Israel in ngun, mutamwauk in Pentecost 33 C.E. (Exodus 24:5-8; Luk 22:20; Hibru 9:14, 15) In eis wain su lumeyuk nu ke “sran mwuleang,” met akmusrala elos akkalemye la elos eis tari mwuleang sasu a elos eis me insemwomwo puspus lun ma inge.
12. Ke inkanek fuka met akmusrala elos baptaisla nu ke mise lun Kraist?
12 Met akmusrala elos akesmakinyeyuk pa ke kutu ma. Jisus el fwak nu sin met tuma lutlut oaru puspus lal: “Kup se su Nga nim ka komtal fwa nim ka; a komtal fwa baptais ke baptais su Nga baptaisla ka.” (Mark 10:38, 39) Tok kutu met sap Piter el sramsramkin met Kristian puspus su “baptaisla nu ke mise.” (Rom 6:3) Met akmusrala elos akkalemye oiyen kisekinyen moul lalos sifwana ke lusen moul lalos nu fon. Mise lalos oana me kise meyen elos fuleak fwinsrak nukemwa lalos ke moul ma patpat fwin fwalu. Baptais lun met akmusrala nukemwa nu ke mise lun Kraist aksafyeyukla tokin elos sruokye oaru lalos nu ke mise a akmoulyeyukyak elos oana met in ngun in “togusra yurol” Kraist in kosrao.—2 Timote 2:10-12; Rom 6:5; 1 Korint 15:42-44, 50.
In Wi Eis ke Me Akul lun Me Esmakin
13. Efu ku elos nukemwa su oasr fwinsrak in moul fwin fwalu elos tia wi eis bred a wain, tusruktu efu ku elos wi ke Me Akesmakin nu ke mise lun Kraist?
13 Ke sripe puspus su kut aketeye tari nu ke orekma in eis bred a wain ke lusen pal lun Me Akesmakin, arulanu kalem la tia fwal nu sin met nukemwa su oasr fwinsrak lalos in muta fwin fwalu in wi eis me akul inge. Elos su oasr fwinsrak in moul fwin fwalu elos etu la elos sifwana tia wi ke u lun met akmusrala su fwal nu ke monin Kraist, a elos wangin pa ke mwuleang sasu su Jeova el orala nu selos su fwa welul Kraist in kol. Ke sripen “kup se” lumeyuk nu ke mwuleang sasu, paenang elos mukena su wi ke mwuleang sasu elos ku in eis wain a bred. Elos nukemwa su fwinsrak nu ke moul ma patpat fwin fwalu oana met sumwosmwos ye koko lun Togusrai elos tia baptaisla ke mise lun Kraist ku pangonyuk in welul in kol in kosrao. Fwin elos wi eis bred a wain, ma inge ku in akkalemye la oiya inge tia sumwos ku tia fwal nu selos in eis. Ke ma inge elos tia ku in wi eis me akul inge, tusruktu elos wi ke Me Akfulat inge a elos akkalemye oiyen sunak nu ka. Elos akkalemye kulo lalos ke ma nukemwa su Jeova el orala tari nu selos ke inkanek lun Mwen natul, wekunang orekma lal in sang nunak munas nu ke ma koluk fwal nu ke sran Kraist su aksuroryeyukla.
14. Fuka met akmusrala elos akkeyeyuk ke orekma lalos in alu nu sin Jeova ke elos wi eis bred a wain?
14 Orekma safla in siliya u srisrik lun met Kristian su pangonyuk in kol wi Kraist in kosrao apkurun in aksafyeyukla. Ke saflaiyen moul lalos fwin fwalu, met akmusrala elos akkeyeyukla ke elos eis bred a wain ke Me Akesmakin inge. Elos pulakin me kapur lun inse sefwanna nu sin met lili wiyelos su wi ke u srisrik lun met akmusrala oana monin Kraist. Orekma lalos in wi eis bred a wain akesmakinyelos ke kunokon lalos in sruokye oaru lalos nu ke mise.—2 Piter 1:10, 11.
Orekma in Esani “Ma Puspus fwin Fwalu”
15. Su met puspus su tukeni nu sie nu yurin met Kristian akmusrala?
15 Mutamwauk ke yea 1930 kutu, oasr sie u lun “sip ngia” elos puseni, su tia wi ke u lun “u srisrik” a fwinsrak lalos pa in moul ma patpat fwin fwalu, elos sang kasru nu sin met akmusrala. (Jon 10:16; Luk 12:32; Zekaraia 8:23) Elos met asrouki mwomwo nu sin “met lili wiyen” Kraist, a elos sang kasru in sulkakin “peng mwo lun togusrai” in ma lo nu sin mutanfwal nukemwa. (Mattu 24:14; 25:40) In oru oinge, oasr pal mwomwo lalos in oru nununku lalos wi Kraist oana “sip” natul, filiyuki ke “lepo leyot” lal ke el oru nununku nu sin mutanfwal nukemwa. (Mattu 25:33-36, 46) Ke inkanek in lulalfongi ke sran Kraist, elos fwa orala “u lulap,” su fwa moulla liki “ongoiye lulap.”—Fwakyuk 7:9-14.
16. Su fwa wi ke “ma puspus fwin fwalu,” a fuka met nukemwa inge fwa oasr pal mwomwo lalos in ekla “tulik nutin God”?
16 Ke pal se pisen met 144,000 nukemwa siliyuki tari, “eng” in kunausten fwa mutamwauk in fuleyukla in kunausla akwuk koluk nukemwa lal Setan fwin fwalu. (Fwakyuk 7:1-4) Ke lusen Sie Tausen Yea Kolyuk lun Kraist a togusra a met tol nukemwa su welul, pise yok lun met nukemwa su akmoulyeyukyak fwa wi u lulap. (Fwakyuk 20:12, 13) Met nukemwa inge fwa engankin pal mwomwo lalos in moul ma patpat fwin fwalu ye koko lun Togusra Messaia, Jisus Kraist. Ke saflaiyen Kolyuk lun Kraist ke Sie Tausen Yea, “ma nukemwa fwin fwalu” fwa sifwil srifeyuk ke me srife safla. Met nukemwa su akpayeye la elos oaru nu ke safla fwa nutiyukla in “tulik nutin God” fwin fwalu.—Efesus 1:10; Rom 8:21; Fwakyuk 20:7, 8.
17. Fuka akwuk lun Jeova fwa akpayeyuk?
17 Ke ma inge, inkanek lalmetmet yok nu ke “orekma in kolyuk” lal, ku inkanek in karungin ma puspus, Jeova el fwa akpayeye akwuk lal “in sifwilpa esani nu sie ma puspus nu sin Kraist, ma puspus in kosrao a ma puspus fwin fwalu.” Ma orekla lalmetmet nukemwa in kosrao a fwin fwalu fwa tukeni nu sie in misla, a insemwomwo in akpusiselyelos nu ke kolyuk sumwosmwos lun Jeova, sie God Fulatlanu su orala akwuk mwolana.
18. Fuka met akmusrala a met asrouki lalos fwa eis me insemwomwo ke elos wi ke Me Akesmakin nu ke mise lun Kraist?
18 Fuka mwoiyen me akpayeye ke toeni nu sie lun pise srisrik lun met akmusrala a million puspus sin sip ngia ke April 12, 2006 fwa me akkeye lulalfongi nu selos! Elos fwa akfulatye Me Akesmakin nu ke mise lun Kraist, in oana ma Jisus el sapkin: “Oru ma inge in esam Yu.” (Luk 22:19) Met nukemwa su fwa wi ke me akesmakin inge elos enenu in esamak la mea Jeova el orala nu selos ke inkanek lun Mwen kulo natul, Jisus Kraist.
Ke Inkanek lun Kalweni
• Mea akwuk lun Jeova ke ma puspus in kosrao a ma puspus fwin fwalu?
• “Ma puspus in kosrao” su elos an, a fuka elos tukeni nu sie?
• “Ma puspus fwin fwalu” su elos an, a fwinsrak fuka oasr yurolos?
[Box ke sra 25]
“Monin Kraist”
In 1 Korint 10:16, 17, Poul el aketeye ke ma yok sripe nu sin met lili in ngun wiyen Kraist, el sramsramkin “mano” ke sie inkanek yok. El fwak: “Bred, su kut kunsalik, ya el tia sie nu sin sie in monin Kraist? Tu kut, met puspus bred siefwunnu a mongo siefwunnu; tu kut nu kemwa mongo ke bred siefwunnu.” Ke met Kristian akmusrala elos wi eis bred ke Me Akesmakin, elos akkalemye oiyen inse sefwanna lalos nu ke congregation lun met akmusrala, su oana sie mano a Kraist pa Sifwe.—Mattu 23:10; 1 Korint 12:12, 13, 18.
[Petsa ke sra 25]
Efu ku met akmusrala mukena wi mongo bred a nim wain?
[Petsa ke sra 27]
Ke inkanek lun orekma in liaung ku kolyuk lun Jeova, ma orekla nukemwa in kosrao a fwin fwalu fwa tukeni nu sie in inse sefwanna