Akfototoye Kom Nu Sin God

Ya God el Asor Ke Ma El Orala a Lungse in Ekulla Nunak Lal Ka?

MET NUNUNKU 2:11-18

KUT nukewa auli pal puspus, meyen kut met sesumwos. Ke sie me pupulyuk, kut asor ke sripen kut akilen la kut tafongla a orala ma tia mwo. Oasr pal, Baibel el akkalemye la Jeova el ku in auli. ‘Tusruktu God el sumwosmwos,’ saap kom fwak. ‘El tia ku in tafongla pal nukewa!’ Ke ma inge, ke oiya fuka God el ku in auli? Me top nu ke kusensiyuk se inge ku in kasre kut in eis etauk a kalem yok ke ma se su arlana mwo: la oasr pulakin lun Jeova, a orekma lasr ku in akinsemwomwoyel ku akasoryel. Lela kut in nunku akmwoye ke kas nukewa su simusyukla in Met Nununku 2:11-18.

Buk lun Baibel se inge su pangpang Met Nununku el akkalemye ke pal in ma upa su sikyak nu sin met Israel. In pal se inge mutunfwal Israel elos muta fwin an Kenan, an se su God el mwulela nu sel Ebream. Ke lusen century puspus toko, ma sikyuk nu sin met Israel ku in akkalemyeyuk ke oiya akosr inge: ma se meet pa ke seakos lalos, mutanfwal saye sruokyelos, pre a siyuk kasru sin God, a ke molela lalos.a

Seakos. Met Israel elos etawi inkanek koluk lun met Kenan, ke ma inge elos “som liki Jeova” a elos fwasr tokin god puspus saye, elos “kulansapu Beal a Astoret.”b Orekma koluk lalos inge el oana sie nu ke oiya su som liki ma paye. Ke ma inge met Israel elos “akkoskosrukye Jeova,” su molelosla liki an Ijipt.—Fus 11-13; Met Nununku 2:1.

Mutunfwal Saye Sruokyelos. Ke sripen orekma koluk lalos paenang Jeova el mulat nu selos a tila insemwomwo in loangela met lal nukewa su forla lukel. Met Israel elos sruo ke “poun met lokwalok lalos,” su tuku ke an selos a wapi an selos.—Fus 14.

Pre a Siyuk Kasru sin God. Ke kain in me keok nukewa su elos sun, met Israel elos asor a auliyuk ke inkanek koluk lalos a elos wowoyuk a siyuk sin God ke kasru. Me siyuk lalos inge ku in kalmekin nu ke pulo kas inge “sao lalos ke met akkemkutuyelos a kalyai elos.” (Fus 18) Orekma lalos in pre a siyuk sin God ke kasru orek ke pal puspus. (Met Nununku 3:9, 15; 4:3; 6:6, 7; 10:10) Oiya fuka God el akkalemye nu ka?

Molela. Jeova el long sasao lun met Israel a el “auli.” Kas Hibru su lungasyukla nu ke “auli” ku in kalmekin “in ekulla nunak ku ma lungse la.” Sie buk el akkalemye ouinge: “Jeova, el eisla sasao lalos, el ekulla akwuk lal in kaelos a el lungse in molelosla.” Ke sripen pakoten lal, Jeova el srusrngiye a “akfulatye met nununku nu selos,” su molela met kulansap nukewa lal liki met lokwalok lalos.—Fus 18.

Ya kom liye a kalem ka la mea oru God in auli, ku ekulla nunak lal? Meyen met kulansap lal elos ekulla oiya koluk lalos. Kut ku in pupulyukkin ma inge oana ke oiya se inge: Sie papa su kulang ku in sang kai nu sin tulik natul su oru ma koluk, saap ke inkanek su el tia lela tulik natul in oru kutu ma. Tusruktu fwin el liye la tulik natul el auliyuk na paye, a papa se inge el ku in oru sulela lal in aksafyela me kai lal nu sel.

Mea kut ku in lotela kel Jeova ke ma simusla se inge? Met su srunga in auli ku in akkoskosrukyel, tusruktu met su auliyuk na paye ke insielos ku in oru Jeova in pakomutalos. Arlana mwo kut in nunku akmwoye ka la ma kut oru ku in aktoasrye ku akengunye God. Ke ma inge arlana fwal kut in lutlut ke inkanek mwomwo su kut ku in “akengunye insien Jeova.” (Soakas 27:11) Fwin kom oru ma inge kom fwa tia auli ka.

[Footnote]