“Met Sumwosmwos Elos Fwa Saromromla oana Fwatu”

“Na met sumwosmwos elos fwa saromromla oana fwatu in togusrai lun Papa tumalos.”—MATTU 13:43.

1. Jisus el orekmakin kain in me pupulyuk puspus in akuteye ke oiya fuka puspus lun Togusrai?

JISUS KRAIST el orekmakin kain in me pupulyuk puspus, ku me lumala, in akuteye ke oiya puspus ke Togusrai. El fwakak “me pupulyuk nu sin un met puspus. A el tia kaskas nu selos fwin tia ke me pupulyuk.” (Mattu 13:34) Ke me pupulyuk puspus ke orekma in taknelik futen ma paye lun Togusrai, Jisus el akkalemye yok ke oiyen insien met nu ke peng mwo, a ke kasru lun Jeova nu ke kapkapek lun met ke etauk a orekma lalos nu sin God. (Mark 4:3-9, 26-29) Jisus el pupulyukkin pa ke kapkapek yok ke pisen met nukewa su porongo peng mwo lun Togusrai, fwinne kapkapek inge el tia arlana kalem ke mutawauk. (Mattu 13:31-33) Sayen ma inge, el akkalemye yok la tia met nukewa su long peng mwo elos fwal nu ke kolyuk lun Togusrai.—Mattu 13:47-50.a

2. Ke me pupulyuk lun Jisus ke witu a tau, fute mwo el lumeyuk nu ke mea?

² Tusruktu, sie ke me pupulyuk lun Jisus el akkalemye yok ke orekma in esani met nukewa su fwa welul ke Togusrai lal. Ma inge el pangpang pa me pupulyuk se nu ke witu a maa su simusyukla in Mattu sapta 13. Tusruktu ke sie pa me pupulyuk Jisus el akkalemye nu sesr la fute inge pa “kas ke togusrai,” a ke me pupulyuk inge, fute mwo el lumeyuk nu ke ma saye, pa ke “mwen nutin togusrai.” (Mattu 13:19, 38) Mwen inge tia met su muta ye kolyuk lun Togusrai, tusruktu “mwen” inge pa met usru lun Togusrai.—Rom 8:14-17; ridi Galetia 4:6, 7.

Me Pupulyuk ke Witu a Tau

3. Akuteye ke ma upa su sikyuk nu sin mokul sa ke me pupulyuk a mea el oru ke ma upa inge.

³ Pa inge me pupulyuk: “Togusrai in kosrao oana sie met su taknelik fute mwo in ima lal. A ke met elos motul, met lokwalok lal el tuku a taknelik tau pa in masrlon witu, a fwala. A ke srua srunak a isus fwako, na tau sikyuk pa. A met kulansap lun met kato elos tuku a fwak nu sel, ‘Leum, ya kom tia taknelik fute mwo in ima lom? Na tau inge sikyuk ya me?’ A el fwak nu selos, ‘Sie met lokwalok el oru ma inge.’ A met kulansap elos fwak nu sel, ‘Ya kom lungsum tu kut in som a sifwalosyuk?’ A el fwak, ‘Mo; saap ke komwos esani tau, komwos fwusak wit oelulos pa. Lela in tukeni kapak nu ke pal in kosrani; a in pal in kosrani nga fwa fwak nu sin met kosrani, Esani nu sie tau meet, a kapriye in kap in furrelosyuk, a esani wit nu in imwen wit sik.’”—Mattu 13:2430.

4. (a) Met sa ke me pupulyuk el petsaela su? (b) Ngea a fuka Jisus el mutawauk in taknelik fute inge?

⁴ Su met se su taknelik fute mwo in imae lal? Tok Jisus el sang me top nu ka ke pal se el akuteye nu sin met tuma lutlut lal: “El su taknelik fute mwo el Mwen nutin met.” (Mattu 13:37) Jisus, su eteyuk pa oana “Mwen nutin met,” el akola imae elan taknelik fute ka ke lusen yea tolu tafwu ke orekma in luti lal fwin fwalu. (Mattu 8:20; 25:31; 26:64) A mutawauk in Pentecost 33 C.E. fwasru, el taknelik fute mwomwo, su petsaela “mwen nutin togusrai.” Orekma in taknelik inge orek ke pal se Jisus, oana met tutafpo lun Jeova, el okoila ngun mutal nu sin met tuma lutlut puspus, a el akmosraelosla oana mwen nutin God.b (Orekma 2:33) Fute mwomwo inge kapek a ekla sak in wit mwo. Ke ma inge akwuk mwomwo in taknelik fute mwo pa in esani met nukewa su fwa ekla met usru a met kol yurin Jisus ke Togusrai lal.

5. Su met lokwalok ke me pupulyuk, a tau el petsaela su?

⁵ Su met lokwalok, a tau el lumeyuk nu sin su? Jisus el fwak nu sesr la met lokwalok pa “Devil.” Tau akkalemyeyuk oana “mwen nutin ma koluk.” (Mattu 13:25, 38, 39) Saap Jisus el sramsramkin kain in maa ku tau su pangpang bearded darnel. Aten wit inge el oana aten maa koluk inge ke el soenna matula. Me pupulyuk inge el akkalemye na paye ke met Kristian kikiap, elos su fwak mu elos, wen nutin Togusrai tusruktu elos tia orala fwako mwomwo! Met Kristian kikiap inge su fwak mu elos fwasr tokin Kraist pa wi ke “futen” Setan su Devil.—Genesis 3:15.

6. Ngea tau mutawauk in sikyak? A fuka met elos “motul” in pal san?

⁶ Ngea met Kristian inge su oana tau sikyak? Jisus Kraist el fwak: “Ke met elos motul.” (Mattu 13:25) Ngea ma inge sikyak? Kut ku in liye me top nu ka ke kas lal Poul nu sin met elder puspus fwin an Efesus: “Nga etu tu tokin nga som liki komwos, kosro wolf silolel fwa utyuk in maslomwos a tia karunganang u sa, a liki in maslomwos sifwana kutu met fwa tuyuk, a luti ma sesumwos, in amakin met lutlut in fwasr tukolos.” (Orekma 20:29, 30) El kafweang in sang kas in kasru nu sin met puspus inge in loang akmwoye ka a in moniyuk pal nukewa. Met sap elos oru in “ikolye” met luti kikiap, tusruktu tokin elos motul, kalme pa elos mise tari, oasr met Kristian puspus su motul pa, kalme pa elos tila moniyuk ke orekma lalos nu sin God. (Ridi 2 Tessalonika 2:3, 6-8.) Pa inge pal su me luti kikiap mutawauk in fwasrelik.

7. Ya kutu sin witu elos ekla tau? Akuteye.

⁷ Jisus el tia fwak la witu e fwa ekla tau, a tau el taknelik pa inmasrlon witu. Ke ma inge me pupulyuk inge el tia akkalemye ke met Kristian paye su som liki ma paye. A, el akkalemye ke sie orekma kutasrik lal Setan in akkolukye congregation lun met Kristian ke pal se oasr met koluk ilyuk nu ka. Ke pal se met sap Jon, a el pa met safla su mise ke pal se el matou, me luti lun met luti kikiap sikyak arlana kalem.—2 Piter 2:1-3; 1 Jon 2:18.

“Lela In Tukeni Kapak Nu Ke Pal In Kosrani”

8, 9. (a) Efu ku kas lun Leum nu sin met kulansap puspus lal el kalem nu sin met puspus su longol Jisus? (b) Ke me akpayeyen me pupulyuk inge, wit a tau el tukeni kapek nu ke inkanek fuka?

⁸ Met kulansap lun Leum elos fwak nu sel ke ma upa a siyuk: “Ya kom lungsum tu kut in som a sifwalosyuk [tau nukewa]?” (Mattu 13:27, 28) Saap elos lut ke me top lal. El akkalemye nu selos in lela witu a tau in tukeni kapek nu ke pal in kosrani. Masap se inge el kalem nu sin met tuma lutlut lun Jisus. Elos etu la arlana upa in akilen witu liki maa ku tau inge su pangpang darnel. Nu selos su orekma pal nukewa ke imae elos etu la okan tau inge el sremla nu ke okan witu.c Paenang Leum el sapkin elos in sano!

⁹ Ke inkanek ouinge, alu puspus su fwak mu elos met Kristian elos orala fwakon maa ku tau su arlana pukanten, ma se meet ke alu lun Roman Catholic a ke u puspus lun Protestant su sikyak. Ke pal sepana inge, oasr kutu fute lun wit paye sisyukelik tari nu ke imae lun fwalu. Met taknelik ke me pupulyuk el mongfusrasr in sano ke lusen pal loeloes nu ke pal in kosrani.

Pal in Kosrani Sanoeyuk ke Pal Loeloes

10, 11. (a) Ngea pal in kosrani? (b) Ke inkanek fuka met nukewa su oana witu orekeni tari nu ke loom sin Jeova?

¹⁰ Jisus el fwak nu sesr: “A pal in kosrani, saflaiyen fwalu, a met kosrani, lipufan.” (Mattu 13:39) Ke lusen len safla lun akwuk koluk puspus inge, su kut oasr ke misenge, mwen nutin Togusrai esani a sreyukla elos liki met nukewa su oana tau. Ke oiya ku orekma inge, met sap Piter el akkalemye nu sesr kas inge: “Tu pal se inge pal in nununku mutamwauk in loom sin God. A fwin mutamwauk yurosr meet, a fwaska nu selos su tia akos mwosasu lun God?”—1 Piter 4:17.

¹¹ Tia pat tokin mutaweyen len safla, ku “saflaiyen akwuk puspus inge,” nununku inge mutawauk tari nu selos su fwak mu elos met Kristian paye, nu selos su “mwen nutin togusrai” ku “mwen nutin ma koluk.” “Ma se meet” Babulon Lulap el ikori, a “tokin ma inge” mwen nutin Togusrai esaniyuki elos ke mutaweyen pal in kosrani. (Mattu 13:30) Tusruktu ke inkanek fuka wit su lumeyuk nu sin mwen nutin togusrai el filiyuki nu ke loom sin Jeova? Met nukewa inge su orekeni tari elos oasr ke congregation lun met Kristian, su elos pulakin me insemwomwo a karungin lun God, ku elos eis tari me insemwomwo nu in kosrao.

12. Putaka pal in kosrani se inge orek?

¹² Putaka len in nununku? Jisus el fwak la orekma in kosrani a orek ke sie “pulanpal” ku lusen pal, ke ma inge el orek ke lusen pal loes. (Fwakyuk 14:15, 16) Nununku nu sin kais sie met su wi ke u lun met akmusrala el orek nu ke pal safla. Ma inge orek nu ke pal se su elos siliyuki tari.—Fwakyuk 7:1-4.

13. Ke inkanek fuka tau el oru me aktukulkul? A elos oru fuka ma koluk?

¹³ Su e fwa esani in eisla liki Togusrai, a elos oru fuka me tukulkul a oru kain in ma koluk? (Mattu 13:41) Met kol lun alu lun Christendom su oana tau ku maa elos kiapela million sin met puspus ke lusen century puspus. Elos oru ma inge ke inkanek lun met luti su akkolukye God, “ma puspus su oru me tukulkul,” oana me luti ke isis lun hell a ke me luti lun Trinity su akfosye metu. Met kol puspus lun alu elos oru me srikasrak koluk nu sin met lalos ke elos lungse in kawuk nu sin fwalu su lumeyuk oana orekma lun kosro a ke kutu oiya ke inkanek lun moul fokfok lalos. (Jemes 4:4) Sayen ma inge, alu lun Christendom elos tia aksumwosye orekma lun kosro inmasrlon met su wi ke alu lalos. (Ridi Jud 4.) Aok oasr kain in oiya koluk nukewa su orek, tusruktu elos tafwela in akkalemye ma likun manolos oru mu elos mutal a lungse God. Sie me insemwomwo yok nu sin mwen nutin Togusrai la elos srela tari liki me akkoluk a me luti kikiap lun met inge su oana tau su aktukulkulye met puspus!

14. Fuka met su oana tau elos tung a ngangorngor wiselos?

¹⁴ Fuka met inge su oana tau elos tung a ngangorngor in mwus? (Mattu 13:42) “Mwen nutin ma koluk” akkeokyeyuk ke sripen “mwen nutin togusrai” elos fwakak orekma koluk a me luti kikiap lun met inge su oana tau. Elos akkalemye asor yok lalos ke sripen met lalos tila arla lungse in sang kasru ke pal inge nu ke alu lalos.—Ridi Isaia 65:13, 14.

15. In luma fuka met su oana tau elos fwa isisyuk ke e?

¹⁵ In luma fuka tau orekeni a isisyuk ke e? (Mattu 13:40) Ma inge sramsramkin ke saflaiyen tau. Ke sripen elos isisyuk ke e paenang ma inge akkalemye la elos arlana apkuran nu ke kunausla ma patpat. (Fwakyuk 20:14; 21:8) Met Kristian kikiap su oana tau, fwa kunausyukla ke pal in “ongoiye lulap.”—Mattu 24:21.

Elos “Fwa Saromromla oana Fwatu”

16, 17. Mea kas palu lal Malakai ke tempel lun God? A kas palu inge akpayeyuk fuka?

¹⁶ Ngea met su oana witu elos “fwa saromromla oana fwatu”? (Mattu 13:43) Malakai el palye ke orekma in aknasnasye tempel lun God: “‘A Leum, su komwos suk, fwa sa tuku nu ke tempel Lal, a met roso lun mwuleung, su komwos engun yurol. Liye! El tuku,’ Jeova lun un met meun el fwak. ‘A su ku in tu in len in tuku lal, a su fwa tu ke el sikme? El oana e lun met aknasnasye silfer, a oana sop lun met aknasnasye nuknuk. A el fwa muta oana sie met boil a aknasnasye silfer, a el fwa aknasnasye mwen natul Livai; a akmwoyelos oana gold a silfer; a elos fwa kisekin nu sin Jeova me kise in sumwosmwos.’”—Malakai 3:1-3.

¹⁷ Kas palu inge el arlana kalem la akpayeyuk in yea 1918 ke pal se Jeova, wekunang “met roso lun mwuleang,” Jisus Kraist, el tuni tempel in ngun. Malakai el akkalemye nu sesr ma sikyak ke pal in aknasnas inge tari: “Na komwos fwa foloko a akilen in maslon met sumwosmwos a met koluk, in maslon el su orekma nu sin God a el su tia orekma nu sel.” (Malakai 3:18) Met Kristian paye su eis me akkeye yok ka elos arlana moniyuk in oru orekma lalos in pal se, ma inge akkalemye la pal in kosrani mutawauk tari.

18. Mea e fwa sikyak ke pal lasr fwal nu ke kas palu lal Daniel?

¹⁸ Met palu Daniel el akkalemye pa kas palu ke len lasr: “A elos su lalmetmet fwa tolak oana saromrom lun yen engyengu; a elos su furokla met puspus nu ke sumwosmwos oana itue ma patpat nu tok.” (Daniel 12:3) Su met inge su saromrom oana fwatu? Aok, elos pa u lun met akmusrala, su oana wit paye su Jisus el kaskaskin ke me pupulyuk lal ke witu a ke tau! Orekma in ‘esani’ met Kristian tia paye su oana tau el arlana etu sin u lulap lun met su oana sip su piselos yokyokelik. Mutawauk ke pal se elos wi orekma yurin met akmusrala, u lulap inge su oasr fwinsrak in muta ye kolyuk lun Togusrai elos oru pa kalem lalos in tolak nu ke fwal se inge su oasr ke losr.—Zekaraia 8:23; Mattu 5:14-16; Filippai 2:15.

19, 20. Mea “mwen nutin togusrai” elos tupan ku sano ka? A mea kut fwa lutlutkin ke me lutlut toko?

¹⁹ Ke pal inge, “mwen nutin togusrai” elos engun na paye in sano ke me insemwomwo lalos in kosrao. (Rom 8:18, 19; 1 Korint 15:53; Filippai 1:21-24) Tusruktu, elos enenu in sruokye oiyen oaru lalos nu ke pal se elos eis me insemwomwo lalos. Elos enenu in kafweang in tolak kalem lalos, saromrom oana fwatu, a in akpayeye la elos siena liki “mwen nutin ma koluk.” (Mattu 13:38; Fwakyuk 2:10) Aok, kut arlana insemwomwo ke sripen oasr pal mwomwo lasr in liye saflaiyen orekma in ‘esani’ maa ku tau ke pal inge!

²⁰ Tusruktu, fuka mwen nukewa nutin Togusrai a u lulap su arlana puseni ke pal inge su oasr fwinsrak in moul ma patpat fwin fwalu ye koko lun Togusrai elos kasru sie sin sie? Me lutlut toko fwa sang me top nu ke kusensiyuk se inge.

[Footnote]

Ya Kom Esam?

Ke me pupulyuk lun Jisus ke wit a tau, mea kalmen:

• Fute mwomwo?

• Met su taknelik fute?

• Orekma in taknelik fute?

• Met lokwalok

• Tau

• Pal in kosrani

• Nien fulma

• Tung a ngangorngor in mwus

• Isisyuk ke e

[Petsac ke sra 22]

Orekma in taknelik fute mwomwo el mutawauk in Pentecost 33 C.E.

[Petsac ke sra 25]

Un met su lumeyuk nu ke witu utukla elos nu ke loom sin Jeova

[Credit Line]

Pictorial Archive (Near Eastern History) Est.