Jeova El Sang Akpa Nu Sin Met Seperd Nukemwa In Sang Kasru U Lal
“Tu Jeova El se lalmetmet; etauk a liyaten tuku liki oalul.”—SOAKAS 2:6.
1, 2. Efu ku mokul puspus su baptais tari elos kaifweang in sun kutupa kunokon ke congregation?
“NGA arulanu engan ke pal Nga srusrngiyuki oana sie met elder,” Nick el fwak, su kulansap oana met elder ke lusen yea itkosr. “Nga liye kunokon inge oana sie pal mwomwo in akyokye orekma in kulansap luk nu sin Jeova. Nga pulakin la Nga sowemol nu sel paenang Nga enenu in akkalemye kulo luk ke ma nukemwa su el orala nu sik. Nga lungse pa sang kasru nu sin met lili nukemwa ke congregation ke inkanek nukemwa, in kasrelos ke inkanek oana sie su met elder elos kasre yu ka.” Tusruktu, fwinne Nick el pulakin insemwomwo ka, el oayepa pulakin tufwal. “Ke sripen Nga soenna sun yea 30 matwe ke Nga srusrngiyuki oana sie met elder,” Nick el fwak, “Nga tufwal meyen wangin yuruk ku su eneneyuk—liyaten a lalmetmet—in liaung congregation ke inkanek mwo.”
2 Elos su Jeova el srusrngiye in karungin u lal oasr sripe puspus lalos in insemwomwo. Met sap Poul el akesmakinye met elder in an Efesus ke sie sripe su elos in insemwomwokin ke pal se, el orekmakin kas lal Jisus, el fwak: “Insemwomwo in sang yok liki insemwomwo in eis.” (Orekma 20:35) In orekma oana sie ministerial servant ku sie met elder sang kutupa inkanek nu sin mokul puspus su baptais tari in sang me sang nu sin Jeova a nu ke congregation. Ke sie me pupulyuk, ministerial servant puspus, elos kasru met elder puspus ke orekma lalos. Ministerial servant puspus inge elos orekmakin pal yok lalos in karungin pa kunokon yok sripe puspus. Met lili puspus inge elos akkeyeyuk ke lungse lalos nu sin God a met tulan lalos in oru orekma in kulansap yok sripe.—Mark 12:30, 31.
3. Efu ku kutu mokul su baptais tari elos alolo in sun kunokon puspus ke congregation?
3 Fuka ke sie met Kristian mokul su saap alolo in kaifweang in sun kunokon lun sie ministerial servant a ke saflaiye sie met elder meyen el pulakin mu el tia fwal nu ka? In oana Nick, saap el alolo la wangin yurol ku a oiya mwomwo su eneneyuk in ekla sie met seperd mwo. Oana sie met lili mokul su baptais tari, ya kom sie selos su oasr pulakin oinge? Kain in nunak inge tia koluk. Meyen Jeova el e fwa oru nununku nu sin met seperd fwal nu ke oiya su elos akkalemye nu sin sip nukemwa. Jisus el fwak: “A nu sel su etukyung ma puspus nu sel, fwa siyuk ma puspus sel, a nu sel elos fuleung ma puspus nu sel, elos fwa siyuk ma yok liki sel.”—Luk 12:48.
4. Fuka Jeova el sang kasru nu selos su el srusrngiya in karungin sip lal?
4 Ya Jeova el tupan met nukemwa su el srusrngiyuki oana ministerial servant a met elder in oru kunokon lalos fwinne wangin me kasru nu ka? Tia oinge, a el sang me kasru mwomwo su kasrelos tia in muteng mukena a in kutangla pa. In oana ke ma aketeyuki ke me lutlut tari a, Jeova el sang nu selos ngun mutal lal in karungin mwo sip nukemwa natul. (Orekma 20:28; Galetia 5:22, 23) In wekunang, Jeova el sang lalmetmet, etauk, a liyaten nu selos. (Soakas 2:6) Fuka el oru ma inge? Lela kut in aketeye inkanek tolu su Jeova el orekmakin in sang akpa nu sin met puspus su el srusrngiyuki in karungin sip lal.
Met Seperd Puspus su Oasr Experience Yok Sang Me Akpa Nu Selos
5. Efu ku Piter a Jon elos met seperd mwomwo?
5 Ke pal se met sap Piter a Jon elos tu ye mutun Sahnedrin, met nununku lalmetmet lun fwalu ke court se inge elos nunku mu met inge su tu ye mutalos elos “tia lutlut a met silalkung.” Tusruktu, elos ku in rid a sim, fwinne elos tia eis me lutlut lun kutena met rabai ku met luti in lutlutkin ma Simusla. Ne oinge, Piter a Jon wekunang met tuma lutlut puspus elos akpayeye la elos met luti mwomwo, akkeye met puspus su longolos in ekla met lulalfongi. Fuka met puspus inge su tia lutlut a silalkung elos ekla met luti mwomwo? Tokin elos longol Piter a Jon, met nununku ke court elos “etu tu eltal oelul Jisus meet.” (Orekma 4:1-4, 13) Paye, elos eis ngun mutal. (Orekma 1:8) Tusruktu arulanu kalem—fwinne nu sin met nununku puspus ingo su tia ku in kalem ke ma puspus lun ngun—la Jisus el sang akpa nu sin mokul puspus inge. Ke pal se el srakna welulos fwin fwalu, Jisus el luti met sap nukemwa in tia esani met su luman sip mukena a el lotelos pa la fuka in liaung met puspus inge ke pal se elos wi ke congregation.—Mattu 11:29; 20:24-28; 1 Piter 5:4.
6. Me srikasrak fuka in sang akpa nu sin met puspus su Jisus a Poul elos orala?
6 Tokin Jisus el akmoulyeyukyak, el tafwela in sang akpa nu sin met tuma lutlut puspus su srusrngiyuki oana met seperd. (Fwakyuk 1:1; 2:1–3:22) Ke sie me pupulyuk, el sifwana sulela Poul a el kol orekma in sang me akpa nu sel. (Orekma 22:6-10) Poul el aksaokye me akpa su el eis a el sang me luti nu sin met elder puspus saye su el luti. (Orekma 20:17-35) Ke sie me pupulyuk, el orekmakin pal a el kaifweang yok in sang akpa nu sel Timote in ekla “sie met orekma” ke orekma in kulansap nu sin God, “su tia enenu in mwekin.” (2 Timote 2:15) Sie oiya lun kawuk fototo el orala inmasrlon mokul luo inge. Meet liki ma inge, Poul el simusla kel Timote: “Oana sie mwen yurin papa tumal, oinge el wi yu orekma nu ke kapkapek lun mwosasu.” (Filippai 2:22) Poul el tia suk inkanek in oralla Timote ku kutu pa met in ekla met tuma lutlut lal sifwana. A, el akkeye met lili puspus wiyel in ekla ‘met etawel, oana el oayepa met etawi Kraist.’—1 Korint 11:1.
7, 8. (a) Ma sikyak fuka akkalemye ke ma lane su tuku ke kaifweang lun met elder in etawi Jisus a Poul? (b) Nge met elder elos ku in mutamwauk in sang akpa nu sin met lili nukemwa su fwal in kulansap oana ministerial servant a met elder?
7 In etawi Jisus a Poul, met seperd puspus su yok experience lalos elos lungse in sang akpa nu sin met lili mokul nukemwa su baptais tari, su oasr pa fwako mwomwo lalos. Nunku ke ma sikyak nu sel Chad. El karunginyuk ke sie sou su papa a nine kiyel elos tia oana sie ke alu lalos tusruktu tia pat el srusrngiyuki oana sie met elder. El fwak: “Ke lusen yea puspus, met elder puspus su yok experience la elos kasre yu in kapkapek ke orekma in kulansap nu sin God. Meyen papa tumuk el tia wi ke lulalfongi, met elder nukemwa ingo elos akkalemye insemwomwo lalos keik a elos oana papa nu sik. Elos orekmakin pal lalos in sang akpa nu sik ke orekma in luti peng mwo, a tok, sie sin met elder el sang akpa a luti yu in karungin a oru kunokon ke congregation su Nga eis.”
8 In oana ke ma sikyak nu sel Chad su el akkalemye, met seperd nukemwa su oasr kalem ku etauk yuro elos mutamwauk in sang akpa nu sin met lili nukemwa su ku in ekla ministerial servant a met elder meet liki elos ku in fwal in eis a oru kunokon puspus ke congregation. Efu ma inge eneneyuk? Meyen Baibel el sapkin la ministerial servant a met elder nukemwa enenu in akkalemye oiya mwomwo ke moul a ke orekma nu kemwa lalos nu sin God meet liki elos ku in srusrngiyuki in oru kunokon inge. Elos enenu in “srikeyuk meet.”—1 Timote 3:1-10.
9. Kunokon fuka oasr yurin met seperd matu nukemwa, a efu?
9 Fwin met lili mokul puspus enenu in srikeyuk, fwal elos in eis me akpa meet. In pupulyukkin ma inge: Fwin oasr sie tulik lutlut ke loom lutlut sapkinyuk in eis sie examination upa tusruktu met luti lal el tia lotel a sang akpa nu sel ke sie me lutlut, ya tulik lutlut se inge ku in kutangla ku pass ke test? Paye la el fwa tia pass ku orala test se inge. Ke sripe se inge, me akpa eneneyuk. Tusruktu, met luti mwomwo elos sang akpa nu sin tulik lutlut nukemwa tia in pass sie test mukena a in kasrelos pa in lotela la fuka in orekmakin etauk su elos eis. In oana sie, met elder alken nukemwa elos enenu in sang me kasru nu sin mokul puspus su baptaisla tari in akkeyelos ke oiya mwomwo puspus su eneneyuk nu sin met se su srusrngiyuki ke elos sang me akpa mwomwo nu selos. Elos oru ma inge tia in kasrelos mukena in srusrngelosi a in kasrelos pa elos in ku in karunganang sip nukemwa ke congregation ke inkanek mwomwo. (2 Timote 2:2) Paye, mokul nukemwa su baptais tari elos enenu in kaifweang in sun oiya mwomwo nukemwa su sapkinyuk nu sin sie ministerial servant ku sie met elder. (Taitus 1:5-9) Ne oinge, ke met elder elos inse mulala in sang akpa nu sin met lili nukemwa su kaifweang in sun oiya mwomwo nukemwa nu ke kunokon lun congregation, met seperd nukemwa inge su yok experience lalos ku in kasrelos in sa kapkapek.
10, 11. Fuka met seperd elos ku in sang akpa nu sin brother puspus in eis kunokon puspus?
10 Fuka met seperd su oasr experience lalos ku in sang akpa nu sin mokul puspus nu ke kunokon puspus lun congregation? Ma se meet, met seperd elos enenu in akkalemye la elos lungse in kasru met lili puspus ke congregation—ke elos welulos ke orekma in luti peng mwo sie loom nu ke sie loom pal nukemwa a in sang kasru nu selos in akkeye ku lalos in “orekmakin sumwosna kas lun God.” (2 Timote 2:15) Met seperd matu elos aketeye nu sin brother puspus ke oiyen engan su tuku ke orekma in kulansap nu sin met lili puspus a ke insemwomwo su met seperd elos eis ke orekma in orala akwuk a in sun niyen sun puspus lun ngun. Elos sang pa kas in kasru mwomwo ke inkanek su sie brother el ku in kapkapek ka oana sie ‘me srikasrak nu sin congregation.’—1 Piter 5:3, 5.
11 Ke pal se sie brother el srusrngiyuki oana sie ministerial servant, met seperd kulang a lalmetmet el ku in tafwela in sang me akpa nu sel. Oasr sie brother su pangpang Bruce, su kulansap oana met elder ke lusen yea puspus, el fwak: “Nga lungse in muta sramsram nu sin sie ministerial servant su tufana srusrngiyuki a kalweni nu sel kas in kasru su simusyukla sin met kulansap oaru a lalmetmet. Kut ridi kutu pa akwuk mwo ke kunokon lal, a tokin ma inge Nga lungse in welul orekma nu ke pal se el pala tari in oru kunokon nukemwa lal.” Ke pal se sie ministerial servant el eis experience, el ku in eis pa me akpa in oru orekma lun met seperd in akkeye met lili. Bruce el fwak pa: “Ke pal se sie ministerial servant el wi yu muteta nu yurin sie met lili in akkeyelos, Nga kasrel in sulela sie ma simusla su fwa akkeye sie met lili ku sie sou su kut fwa muteta nu yuru. In lotela la fuka in orekmakin ma Simusla ke inkanek mwo su ku in sun insiyel yok sripe fwin sie ministerial servant el ekla sie met seperd mwomwo.”—Hibru 4:12; 5:14.
12. Fuka met seperd nukemwa su oasr experience yok yuru ku in sang me akpa nu sin met elder su tufana srusrngiyuki?
12 Met seperd sasu su tufana srusrngiyuki elos eis pa ma lane ke kutupa me akpa. Nick su akkalemyeyuk ke mutamweyen me lutlut inge el fwak: “Me kasru ku me akpa su Nga eis sin met elder matu luo ase me kasru yok nu sik. Brother luo inge elos etu la inkanek mwo fuka in aksumwosye ma puspus. Elos akkalemye mongfusesr lalos ke elos long ma Nga lungse in fwak a loang mwo nu ke ma Nga nunku—fwinne elos tia insese ka. Nga lotela ma puspus ke Nga liye inkanek mwo lalos ke elos akkalemye oiyen pusisel a sunak nu sin met lili wiyesr ke congregation. Met elder luo inge akkalemye yok nu sik ke me enenu nu ke orekmakinyen Baibel ke inkanek mwo fwin oasr ma enenu in sang aksumwosye ma upa ku in sang kas in akkeye.”
Kasreyuk ke Kas lun God
13. (a) Mea sie brother el enenu in oru in ekla sie met seperd mwomwo? (b) Efu ku Jisus el fwak mu: “Me luti luk tia ma luk”?
13 Paye, oasr ke Kas lun God, Baibel, masap, me akwuk mwo, a me srikasrak puspus su sie met seperd el enenu in sang kasrel in “sumwosna, a in akola fwal nu ke orekma mwo nu kemwa.” (2 Timote 3:16, 17) Saap oasr lutlut yok nu ke etauk lun fwalu sin sie brother, tusruktu etauk lal ke ma Simusla a la fuka el ku in orekmakin ma inge sang kasrel in ekla sie met seperd mwomwo. Nunku ke me srikasrak lal Jisus. Etauk lal yok liki met nukemwa, el lalmetmet liki met nukemwa, a el pa met seperd su lalmetmet emeet su moul fwin fwalu; ne oinge, el tia fungfung nu ke lalmetmet lal sifwana ke el luti sip nutin Jeova. El fwak: “Me luti Luk tia ma Luk, a ma Lal Su supeyume.” Efu ku Jisus el tia akfulatyel sifwana a akfulatye Papa tumal in kosrao? El aketeye: “El su sifwana kaskas el suk mwolana lal sifwana.”—Jon 7:16, 18.
14. Fuka met seperd elos ku in fwasr liki in suk mwolena lalos sifwana?
14 Met seperd oaru nukemwa elos fwasr liki in suk mwolena lalos sifwana. Kas in kai a kas in akkeye su elos sang nu sin met lili, tia fwal nu ke lalmetmet lalos sifwana, a ke Kas lun God. Elos kalem ka la kunokon lun met seperd pa in kasru sip in eis “nunak lun Kraist,” a tia nunak lun met elder. (1 Korint 2:14-16) Ke sie me pupulyuk, fuka fwin sie met elder el sang kas in kasru nu sin sie siyanyen in aksumwosye ma upa lalos ke moul in payuk fwal nu ke nunak a experience lal sifwana a tia ke kas in kai lun Baibel a ke me lutlut mwomwo ke me rid su orekla sin “met kulansap oaru a lalmetmnet”? (Mattu 24:45) Saap oasr me kasru yok ke fasin lun anu nu ke kas in kai lal a el tia etu na paye ma inge. Paye la, kutu fasin tia koluk, a oasr etauk a experience lun sie met elder el ku in eis ke moul lal. Tusruktu sip elos eis ma lane yok ka fwin met seperd elos akkeyelos in long ke pusren Jisus a ke kas lun Jeova a tia ke nunak lun met puspus ku ke akwuk lun fasin lun anu.—Sam 12:6; Soakas 3:5, 6.
Kasreyuk sin “Met Kulansap Oaru a Lalmetmet”
15. Kunokon fuka Jisus el sang nu sin “met kulansap oaru a lalmetmet,” a mea sie sripe in eis kutangla lun met kulansap inge?
15 Met seperd oana met sap Piter, Jon, a Poul elos wi ke u se inge su akkalemyeyuk oana “met kulansap oaru a lalmetmet.” U lun met kulansap inge orekla sin met lili akmusrala in ngun wiyel Jisus fwin fwalu, su oasr fwinsrak in welul Kraist kol in kosrao. (Fwakyuk 5:9, 10) Ke lusen len safla inge, pisen met lili wiyen Kraist lula fwin fwalu supuseni. Tusruktu, orekma su Jisus el sapkin nu selos in oru—ke orekma in luti peng mwo lun Togusrai meet liki safla tuku—el orek ke inkanek yok yen nukemwa meet liki meeta. Ne oinge, u lun met kulansap elos eis me insemwomwo yok a kutangla ke orekma inge! Efu? Ke kutu sripe, meyen elos sang akpa nu sin met lili puspus su wi ke u lun “sip ngia” in kasrelos in sulkakin a luti peng mwo. (Jon 10:16; Mattu 24:14; 25:40) Ke pal inge, orekma in luti peng mwo el orek yokna sin met oaru nukemwa su wi ke u lun sip ngie.
16. Fuka u lun met kulansap elos sang akpa nu sin met srusrngiyuki nukemwa?
16 Ke inkanek fuka u lun met kulansap elos sang me akpa inge? In century se meet, oasr met tutafpo lun u lun met kulansap elos eis kunokon in sang me akpa a srusrngiye met elder ke congregation puspus, a met elder inge elos sang akpa nu sin met nukemwa ke congregation. (1 Korint 4:17) Oiya inge orek pa in pal lasr inge. Governing Body ku u lun met matu in ngun su oru me kolyuk—u srisrik lun met elder akmusrala elos aolyen u lun met kulansap—elos sang kunokon nu sin met tutafpo lalos in sang akpa a srusrngiye ministerial servant a met elder puspus su oasr ke tausen puspus ke congregation fwin fwalu nafon. In wekunang, U lun met matu in ngun su oru orekma in kolyuk lalos elos orala akwuk nu ke kain in lutlut puspus in sang akpaye met puspus su oru kulansap lalos oana Branch Committee, traveling overseers, met elder nukemwa, a ministerial servant nukemwa in kasrelos in oru karunginyuk mwomwo nu sin sipu. Kutupa kas in kasru orekla ke inkanek lun leta puspus, ke me lutlut puspus su simusyukla ke magasin inge Tauer in San, a ke inkanek lun kutupa me rid, oana Organized to Do Jehovah’s Will (Akwuki in Oru Ma Lungse lun Jeova).a
17. (a) Fuka Jisus el akkalemye lulalfongi lal nu sin u lun met kulansap? (b) Fuka met seperd in ngun elos akkalemye la elos lulalfongi ke u lun met kulansap?
17 Oasr lulalfongi yok lun Jisus nu ke u lun met kulansap paenang el srusrngelosi nu fwin “ma lal nukemwa”—oana ma nukemwa lal a orekma nukemwa lal fwin fwalu. (Mattu 24:47) Met seperd nukemwa su srusrngiyuki elos akpayeye pa la oasr pa lulalfongi lalos nu sin u lun met kulansap ke elos orekmakin ma elos eis sin u se inge su pangpang Governing Body. Aok, fwin met seperd elos sang akpa nu sin met lili puspus, fwin elos lela elos in sifwana kasreyuk ke Kas lun God, a fwin elos orekmakin me akpa su u lun met kulansap elos sang nu selos, elos ku in akkeye inse sefwanna lalos inmasrlon congregation. Kut arulanu insemwomwo ka meyen Jeova el sang akpa nu sin mokul puspus su oasr lungse yok lalos nu sin kais sie met su wi ke congregation lun met Kristian!
[Footnote]
a Orekla sin Met Lo lun Jeova.
• Ke inkanek fuka met seperd su matu in ngun elos sang akpa nu sin met lili puspus?
• Efu ku met seperd elos tia luti fwal nu ke nunak lalos sifwana?
• Fuka a efu met seperd elos akkalemye lulalfongi lalos nu sin u lun met kulansap?
[Kusensiyuk Puspus ke Me Lutlut]
[Petsa ke sra 10, 11]
Met Kristian elder elos sang akpa nu sin met fwusr puspus ke congregation
[Petsa ke sra 12]
“Met kulansap oaru a lalmetmet” sang me akpa ke inkanek puspus nu sin met elder nukemwa