Met Seperd Nukemwa Su “Me Srikasrak Nu Sin U”
“Komwos in kiteung u lun God in maslomwos, . . . ke lungse lomwos . . . , ke insiomwos kena oru . . . , komwos in sifwana ore komwos me srikasrak nu sin u.”—1 PITER 5:2, 3.
1, 2. (a) Kunokon fuka Jisus el sang nu sel Piter, a efu ku oasr sripe mwomwo lun Jisus in lulalfongi nu sel? (b) Mea pulakin lun Jeova nu sin met seperd nukemwa su srusrngiyuki?
SIE pal meet liki len in Pentecost 33 C.E., Piter a met tuma lutlut onkosr elos eis me mongo nalos ke lututang se su Jisus el akola nu selos ke elos muta sisken Mwea lun an Galili. Tia pa inge pal se meet su Piter el liyel Jisus ke el akmoulyeyukyak, a wangin alolo ka la el engan na paye in liye ke Jisus el moul. Tusruktu Piter el ku pa in pulakin tufwal ku sangeng. Ke sripen pulakin lal, su tia pat ke len ekasr meet liki pal inge, el lafwekunal Jisus ye mutun met puspus la el tia etel. (Luk 22:55-60; 24:34; Jon 18:25-27; 21:1-14) Ya Jisus el sang kas in kai upa nu sel Piter ke sripen srikla lulalfongi lal? Mo. El tia oru oinge, a el sang nu sel Piter sie kunokon in karungin a kiteang “sip srisrik” natul Jisus. (Jon 21:15-17) In oana ke ma akkalemyeyuk ke ma simusla in Baibel ke me sramsram ke congregation lun met Kristian in century se meet, lulalfongi lun Jisus nu sel Piter el oru tia ke wangin sripe. Piter wekunang met sap puspus a met matu puspus in an Jerusalem, elos oru orekma in karungin congregation lun met Kristian ke lusen sie pal su oasr me srife a kalyai upa tusruktu oasr kapkapek yok ke pisen met lulalfongi.—Orekma 1:15-26; 2:14; 15:6-9.
2 Ke pal inge, Jeova ke inkanek lun Jisus el srusrngiye met fwal puspus in oru orekma lun met seperd in kol sip nukemwa Natul ke pal in ma upa yok ke me sramsram lun metu. (Efesus 4:11, 12; 2 Timote 3:1) Ya oasr sripe mwomwo lun Jeova in lulalfongi met puspus inge? U lun met Kristian su oasr ke pal inge fwin fwalu nu fon elos engankin misla mwomwo inmasrlolos su pa inge me akpayeye ka. Paye, la met seperd nukemwa inge elos ku in orala ma tafongla, oana Piter in pal meeta. (Galetia 2:11-14; Jemes 3:2) Ne oinge, Jeova el lulalfongelos in karungin sip nukemwa su “el moli ke sran Mwen natul sifwana.” (Orekma 20:28, NW) Oasr lungse paye lun Jeova nu sin met nukemwa inge, el nunkelos oana “fwal nu ke sunak lulap.”—1 Timote 5:17.
3. Fuka met seperd nukemwa in ngun sruokye pal nukemwa sie inse mulala a kena in oru kunokon lalos?
3 Fuka met seperd in ngun nukemwa elos sruokye pal lalos nukemwa ke sie inse mulala a kena in oru kunokon lalos, ke ma inge elos akkalemye me srikasrak mwomwo nu sin u? In oana Piter a kutu pa met seperd puspus in century se meet, elos tupan ke ngun mutal lun God, su sang nu selos ku su elos enenu tu elos in akpayeye kunokon lalos. (2 Korint 4:7) Ngun mutal el kasrelos pa in akkalemye fwako lun ngun mutal—lungse, engun, misla, mongfusesr, kulang, inse mwo, oaru, fwokpap, a sifwana leum fwom. (Galetia 5:22, 23) Lela kut in lutlutkin kutu inkanek su met seperd elos ku in orala ke me srikasrak in akkalemye fwako nu kemwa su elos ku in oru ke orekma in karungin u lun God.
Met Elder Elos Enenu In Akkalemye Lungse Nu Sin Congregation a Nu Sin Kais Sie Sip
4, 5. (a) Fuka Jeova a Jisus elos akkalemye lungse nu sin congregation? (b) Mea kutu inkanek su met seperd nukemwa in ngun elos akkalemye ke lungse nu sin congregation?
4 Oiya mwo emeet su tuku ke ngun mutal lun God pa lungse. Jeova el akkalemye lungse nu sin met nukemwa ke congregation ke el sang mongo in ngun puspus nu selos. (Isaia 65:13, 14; Mattu 24:45-47) Tusruktu, oasr pa ma el oru su yok liki in kite congregation lal mukena. Oasr lungse lal nu sin kais sie sip. (1 Piter 5:6, 7) Jisus el akkalemye pa lungse lal nu sin congregation. El sang moul lal kelos, a el etu kais sie sip, “ke elos.”—Jon 10:3, 14-16.
5 Met seperd nukemwa in ngun elos etawi Jeova a Jisus. Elos akkalemye lungse nu sin u lun God ke elos “orekmakinelos in luti” congregation. Me sramsram lalos su tuku ke Baibel sang me kasru in kite a in karungin congregation, a ke oiyen alken lalos in oru ma inge liyeyuk sin met nukemwa. (1 Timote 4:13, 16) Oasr orekma puspus lalos su tia liyeyuk oana orekma lalos in orala record, in simusla leta, in orala akwuk ku schedule, a in karungin orekma nukemwa in sang kasru tu meeting nu kemwa lun congregation a kutupa orekma ku in orek ke “oiya fwal, a in takla.” (1 Korint 14:40) Pus ke orekma inge orek a tia liyeyuk sin met puspus ke congregation, a elos ku in eis kas in kaksak srisrik ka. Paye la orekma lalos inge el orekma ke lungse.—Galetia 5:13.
6, 7. (a) Piya sie inkanek su met seperd elos ku in oru in eis etauk mwo yurin sip? (b) Efu ku yok sripe ke kut akkalemye pulakin lasr nu sin sie met elder?
6 Met Kristian seperd kulang nukemwa elos kaifweang in akkalemye insemwomwo lalos sifwana nu sin kais sie sip ke congregation. (Filippai 2:4) Sie inkanek su met seperd elos ku in etu na paye ke kais sie sip pa in welulos ke orekma in luti nu sin met puspus. Jisus el wi met tuma lutlut nukemwa lal ke orekma in luti a el orekmakin pal mwomwo inge in sang kas in akkeye nu selos. (Luk 8:1) Sie met Kristian seperd su oasr experience yok lal el fwak: “Nga koneak mu sie ke inkanek mwo emeet in aetui a akkeye sie met lili mokul ku mutan pa in welulos orekma ke orekma in luti peng mwo.” Fwin soenna oasr pal kom wi sin sie met elder ke orekma in luti peng mwo, efu ku kom tia orala akwuk in oru ma inge ke pal na fototo fwasru?
7 Lungse moklel Jisus in akkalemye engan lal a el pulakin asor yok nu sin met tuma lutlut nukemwa lal. Ke sie me pupulyuk, in pal se ke met tuma lutlut 70 lal elos folokla liki orekma in luti lalos elos engan ma lulap, Jisus el akkalemye pa “engan.” (Luk 10:17-21) Tusruktu, ke el liye la Mari a sou lal a met kawuk elos tung a memelil ke mise lal Lazarus, “Jisus el tung.” (Jon 11:33-35) Oapana, met seperd kulang nukemwa ke pal inge elos pulakin pa asor ku insemwomwo lun sip nukemwa. Lungse moklelos in “engun yurolos su engun” a “tung yurolos su tung.” (Rom 12:15) Kom fwin pulakin insemwomwo ku asor ke moul lom, akkalemye ma kom pula nu sin met Kristian seperd puspus. Fwin elos long insemwomwo lom fwa akkeyelos. (Rom 1:11, 12) Fwin elos long ma upa puspus su sun kom elos ku in akkeye a akpwarye kom.—1 Tessalonika 1:6; 3:1-3.
8, 9. (a) Fuka sie met elder el akkalemye lungse lal nu sin mutan kiyel? (b) Efu ku arulanu yok sripe nu sin met elder in akkalemye lungse lal nu sin sou lal?
8 Lungse lun sie met seperd nu sin congregation el kalem na paye ke oiya su el akkalemye nu sin sou lalos. (1 Timote 3:1, 4) Fwin el payuk tari, lungse a akfulat su el akkalemye nu sin mutan kiyel el orala sie me srikasrak nu sin mokul tuma nu kemwa in etawel. (Efesus 5:25; 1 Piter 3:7) Loang akmwoye nu ke kas lun sie mutan Kristian inge su pangpang Linda. Mokul tumal el kulansap oana sie met liaung ke lusen yea 20 kutu meet liki el mise. El fwak: “Mokul tumuk el kafofo pal nukemwa in sang me kasru in karungin congregation. Tusruktu el kasre yu pa ngan pulakin la kut orekma oana team soko. El akkalemye pal nukemwa kulo lal ke kasru luk nu sel, a kut tukeni engankin pal mwomwo lasr ke pal puspus su el tia oru orekma lal in kasru congregation. Ke ma inge, Nga pulakin mu el lungse nga na paye a nga srike ngan tia sok ku lemta ke el orekmakin pal lal in oru orekma in kulansap lal ke congregation.”
9 Fwin oasr tulik puspus nutin sie met seperd, oiya nukemwa su el orekmakin in sang kai ke kulang a in kaksakin pal nukemwa tulik srisrik natul inge ku in orala sie me srikasrak mwomwo nu sin papa a nine puspus in etawi. (Efesus 6:4) Paye, lungse su el akkalemye nu sin sou lal el sang me akpayeye pal nukemwa la el orekmakin ke moul lal oiya mwomwo nukemwa su oasr yurol ke pal se el srusrngiyuki sin ngun mutal in oru orekma oana sie met seperd.—1 Timote 3:4, 5.
Akkeye Engan a Misla ke Inkanek in Sramsram
10. (a) Mea ku in akkolukye engan a misla lun sie congregation? (b) Kusensiyuk fuka orala me sensen nu ke oiyen misla lun congregation in century se meet, a fuka ma sikyak upa inge aksumwosyeyuk?
10 Ngun mutal el ku in orala engan a misla nu insien sie met Kristian, inmasrlon u lun met elder, a nu ke congregation nafon. Tusruktu, fwin sramsram mwomwo tia orek me akkoluk nu ke oiyen engan a misla ku in sikyak. Solomon in pal meeta el fwak: “Yen wangin papu we, nunuk meeta aklusrongtenyeyuk.” (Soakas 15:22) Ke oiya saye, fwin oasr me sramsram mwomwo a sunak akkalemyeyuk ku in oasr engan a misla akilenyuk. Ke sie me pupulyuk, ke pal se oasr kusensiyuk yok ke oiyen kosroila su sang me sensen nu ke oiyen misla lun congregation in century se meet, u lun met matu in ngun su oru me kolyuk in an Jerusalem elos suk me kasru lun ngun mutal nu ka. Elos akkalemye pa kain in nunak puspus lalos su tia oana sie ke me sramsram nu ke kosroila inge. Tokin oasr asiyuki lulap orek tari, elos orala sie sulela mwomwo. Ke pal se elos sramsramkin ke sulela lalos nu sin congregation puspus inge, met lili “elos engun ke kas in akparye inge.” (Orekma 15:6-23, 25, 31; 16:4, 5) Engan a misla akkeyeyuk.
11. Fuka met elder elos akkeye oiyen engan a misla lun congregation?
11 Oapana ke pal inge, met seperd elos akkeye engan a misla lun congregation ke elos akkalemye la elos met sramsram mwomwo. Ke pal se oasr ma upa puspus su orala me sensen nu ke oiyen misla lun congregation, elos tukeni muta sramsram a sukosok in akkalemye pulakin lalos. Elos akkalemye nunak pusisel ke elos long kas lun met elder nukemwa wiyelos. (Soakas 13:10; 18:13) Tokin elos pre ke ngun mutal, elos aksumwosye sulela nukemwa lalos fwal nu ke akwuk mwomwo a masap lun Baibel a ke kas in kasru ku masap su simla sin “met kulansap oaru a lalmetmet.” (Mattu 24:45-47; 1 Korint 4:6) Tokin oasr sie sulela fwal nu ke ma Simusla su orekla sin u lun met elder, kais sie met elder el akpusiselyel sifwana nu ke kolyuk lun ngun mutal ke el sang kasru a orekmakin sulela inge fwinne nunak lal sifwana tia orekmakinyuk sin met elder puspus. Kain in oiya lun fwokpap ku inse pusisel inge akkeye engan a misla a akkalemye me srikasrak mwomwo nu sin sip nukemwa la fuka in fwufwasryesr wi God. (Maika 6:8) Ya kom inse pusisel in akesrui nu ke sulela nukemwa fwal nu ke ma Simusla su orekla sin met seperd nukemwa lun congregation?
Akkalemye Mongfusesr Yok a Kulang
12. Efu ku Jisus el enenu in akkalemye mongfusesr yok a kulang nu sin met sap nukemwa lal?
12 Jisus el akkalemye mongfusesr yok a kulang nu sin met sap nukemwa lal, fwinne oasr me munas su elos akkalemye ke pal puspus. Ke sie me pupulyuk, ke pal puspus Jisus el srike in akkalemye nu selos ke ma enenu su akkalemyeyuk nu ke oiyen inse pusisel. (Mattu 18:1-4; 20:25-27) Ne oinge, ke fong safla lun moul lal Jisus fwin fwalu, tia pat tokin el akkalemye nu selos sie me lutlut ke inse pusisel ke el tanla niyelos, “sie akukuin sikyuk in masrlolos, la su selos a fwa fulat liki nu kemwa.” (Luk 22:24; Jon 13:1-5) Ya Jisus el sang kai upa nu sin met sap nukemwa inge? Mo, el kulang in sramsram nu selos, ke el fwak: “Su yok, el su fungyung nu ke tebue, ku el su kulansap? Ya tia el su fungyung nu ke tebue? A Nga muta in masrlomwos oana el su kulansap.” (Luk 22:27) Mongfusesr yok a kulang lun Jisus—wekunang me srikasrak mwomwo lal—ke saflaiye sun insien met sap nukemwa lal.
13, 14. Nge met seperd elos enenu in akkalemye kulang yok?
13 Ke luma oinge, sie met seperd el enenu in sang kas in kai ke pal puspus nu sin sie met ke sripen sie me munas ku ma tafongla lal. Met seperd inge ku in pulakin toasr nu sin met se inge. Tusruktu, fwin el esam ma tafongla lal sifwana ke el ‘kaelos su seakos,’ el ku in akkalemye mongfusesr yok a kulang nu sin met lili wiyel. Ke inkanek inge el etawi Jisus a Jeova, elos su akkalemye oiya mwomwo inge nu sin met Kristian nukemwa—wekunang met seperd nukemwa.—1 Tessalonika 5:14; Jemes 2:13.
14 Oasr pal, met seperd elos enenu in sang kas in kai upa nu sin sie met su orala ma koluk upa. Fwin met se inge el srunga in auliyuk, met seperd elos enenu in sisla met inge su orala ma koluk liki congregation. (1 Korint 5:11-13) Ne oinge, ke oiya su elos akkalemye nu sin met inge enenu in akkalemyeyuk la elos srunga ma koluk lal, a tia met se inge su orala ma koluk. (Jud 23) Oiya lun kulang su akkalemyeyuk sin met seperd puspus ku in oru in fusrasr nu sin met inge in sifwilpa foloko nu ke congregation.—Luk 15:11-24.
Orekma Mwo Puspus Mokleyuk ke Lulalfongi
15. Mea sie inkanek su met elder elos etawi ke oiya mwo lun Jeova, a mea moklelos in oru oinge?
15 “Jeova el mwo nu sin met nukemwa,” fwinne nu selos su tia sang kulo nu ke ma mwo su el oru nu selos. (Sam 145:9; Mattu 5:45) Oiya mwomwo lun Jeova el liyeyuk yok ke el supwela met kulansap nukemwa lal in sulkakin “peng mwo lun togusrai.” (Mattu 24:14) Met seperd elos etawi pa oiya mwomwo lun Jeova ke elos kol orekma inge in sulkakin peng mwo. Mea moklelos in oru kaifweang yok inge? Lulalfongi ku nu sin Jeova a ke mwulela nukemwa lal.—Rom 10:10, 13, 14.
16. Fuka met seperd elos ku in “oru ma mwo” nu sin sip u?
16 In wekunang nu ke orekma in “oru mwo nu sin met nukemwa” ke inkanek in sulkakin peng mwo, oasr kunokon lun met seperd in oru ma mwo “yokna nu selos su sou lun lalalfongi.” (Galetia 6:10) Sie inkanek in oru ma inge pa in oru orekma in muteta lun met seperd in akkeye met Kristian puspus. “Nga lungse in oru orekma in muteta nu yurin met lili in akkeyelos,” sie met elder el fwak. “In oru orekma inge oasr pal mwomwo luk in sang kas in kaksak nu sin met lili mokul a mutan puspus ke kaifweang lalos a in kasrelos in etu la orekma upa lalos el aksaokyeyuk na paye.” Ke pal puspus, met elder elos ku in sang kas in kasru ke inkanek puspus in kasru sie met elan ku in akmwoye orekma in kulansap lal nu sin Jeova. In oru oinge, met seperd elos etawi met sap Poul. Nunku ke inkanek su el orekmakin in sang akkeye met lili nukemwa in an Tessalonika: “A kut lalalfongi Leum keyumwos tu komwos oru, a fwa oru ma kut sapkin nu sumwos.” (2 Tessalonika 3:4) Kain in lulalfongi inge su akkalemyeyuk ku in purakak ku akkeye oiya mwomwo lun sip a ku in kasrelos in fusrasr “in akos met kol lalos.” (Hibru 13:17) Ke met seperd elos tuku nu yurum in akkeye kom, efu ku kom tia akkalemye kulo lom nu ka?
Sifwana Leumi Eneneyuk nu ke Oiyen Fwokpap
17. Me lutlut fuka Piter el lotela sin Jisus?
17 Jisus el fwokpap a inse pusisel, fwinne oasr pal oasr ma koluk orek nu sel. (Mattu 11:29) Ke pal se el tukakunyukyak a met meun elos sruokilye, Jisus el akkalemye oiyen fwokpap a sifwana leumi yok. Piter el silaklak in srukak kutlas natul a lain met meun inge. Tusruktu Jisus el akesmakinyel: “Ku kom nunku mu Nga tia ku in siyuk sin Papa tumuk, a El fwa supamu nu Yuruk inge pus liki siengoul luo lijion lun lipufon?” (Mattu 26:51-53; Jon 18:10) Piter el lotela me lutlut yok inge a filiye ma inge ke insiel a tok el akesmakinye met Kristian nukemwa: “Tu Kraist el oayepa keok keyumwos, a likiye nu sumwos sie sikasrak, tu komwos in fwasr in fwalkel. . . . Su ke kaskouyuk, a El tia sifwil kas kou. Su ke el keok el tia aksangeng.”—1 Piter 2:21-23.
18, 19. (a) Nge met seperd elos enenu in akkalemye yok oiyen fwokpap a sifwana leumi? (b) Kusensiyuk fuka kut fwa aketeye ke me lutlut toko?
18 Ke ma inge, met seperd mwomwo elos fwokpap fwinne elos akkolukyeyuk na paye. Ke sie me pupulyuk, kutu sin met su elos srike in sang kasru nu se ke congregation saap elos tia akkalemye oiya mwomwo nu ka. Fwin sie met su enenu me kasru el munas ku mas in ngun, el ku in akkalemye oiya koluk nu ke kas in kai ke el “kaskas mongkeke oana fwakfuk lun sie kutlas.” (Soakas 12:18) Tusruktu, in oana Jisus, met seperd elos tia orekmakin kaskas upa ku akkalemye sie oiya su lungse pa in foloksak. A, elos akkalemye sifwana leumi a ku in akilen pulakin lun met lili munas inge, su elos ku in sang sie me insemwomwo nu sin sie met su enenu kasru. (1 Piter 3:8, 9) Ya oasr ma kom lotela ke me srikasrak lun met elder puspus a akkalemye oiyen fwokpap a sifwana leumi ke kom eis kas in kai?
19 Wangin alolo ka, la Jeova a Jisus elos aksaokye orekma mwo lun tausan puspus sin met seperd su arulanu lungse in karungin congregation fwin fwalu. Oasr pa lungse yok lun Jeova a lun Mwen natul nu sin tausan puspus su ministerial servant ke elos kasru met elder nukemwa in ‘kulansapu met mutal puspus.’ (Hibru 6:10) Ke ma inge, efu ku kutu sin met lili mokul su baptaisla tari elos alolo in kaifweang in sun “orekma mwo” inge? (1 Timote 3:1) A fuka Jeova el luti ku sang me akpa nu sin met nukemwa su el srusrngiye oana met seperd? Kut fwa aketeye kusensiyuk puspus inge ke me lutlut toko.
Ya Kom Esam?
• Mea kutu inkanek su met seperd elos akkalemye lungse nu sin congregation?
• Fuka met nukemwa ke congregation elos ku in akkeye oiyen engan a misla?
• Efu ku met seperd elos enenu in akkalemye mongfusesr yok a kulang ke elos sang kas in kai?
• Fuka met elder elos akkalemye kulang a lulalfongi?
[Petsa ke sra 4]
Lungse akkeye met elder nukemwa in kulansap nu ke congregation
[Petsa ke sra 4]
Elos orekmakin pa pal lalos yurin sou lalos in oru me akengan . . .
. . .a ke orekma in luti peng mwo
[Petsa ke sra 6]
Fwin oasr me sramsram mwo inmasrlon met elder nukemwa ku in akkeye oiyen engan a misla ke congregation