Sang Akpa nu sin Mokul Lili Puspus in Kapkapek
“Met e nukewa su lutiyuk sumwosna fwa oana met luti lal.”—LUK 6:40, NW.
1. Mea Jisus el oru ke lusen orekma in luti lal in sang akpa a orani met fwakak peng mwo?
KE SAFLAIYEN ma simusla lal ke moul lal Jisus, met sap Jon el simusla: “A oasr pa ma puspus ma Jisus el orala, su fwin simusyukla nukewa, nga nunku tu fwalu tia fwal nu ke buk su fwa simusyukla.” (Jon 21:25) Jisus el kafweang yok ke orekma in luti peng mwo ke lusen kitin pal el oasr fwin fwalu. Ke lusen pal san, el suk ke mokul puspus su el ku in sang akpa in tafwela orekma lal tokin el folokla nu in kosrao. In yea 33, el sang akpa nu sin sie u srisrik, tusruktu piselos arlana sa puseni in ekla sie congregation lulap sin met fwakak peng mwo su oasr ke tausen puspus.—Orekma 2:41, 42; 4:4; 6:7.
2, 3. (a) Efu ku oasr ma enenu ke mokul puspus wiyesr in kulansap nu ke congregation? (b) Mea kut a fwa lutlutkin ke me lutlut se inge?
2 Ke pal inge, oasr met fwakak peng mwo su pus liki million itkosr ke congregation 100,000 kutu fwin fwalu nufon. Oasr ma eneneyuk sin mokul puspus wiyesr in liaung congregation nukewa inge. Ke sie me pupulyuk, oasr ma enenu yok ke met elder puspus. Mokul wiyesr inge su kafweang in oru ma puspus in kulansapu met lili ke congregation, elos “lungse sie orekma mwo.”—1 Timote 3:1.
3 Oasr ma puspus su sie mokul wiyesr el enenu in oru meet liki el ku in fwal nu ke kunokon puspus ke congregation. Lutlut, etauk lalos ke moul, a oiyen sumat ke orekma, tia pa inge ma su ku in akola sie met ke orekma se inge. Moul lal enenu in fwal nu ke ma Baibel el siyuk sin mokul puspus in kulansap nu ke congregation. Kut ku in kasru fuka mokul wiyesr in kapkapek ke ma paye a in fwal nu ke kunokon puspus? Jisus el fwak: “Met e nu kemwa su lutiyuk sumwosna fwa oana met luti lal.” (Luk 6:40, NW) Ke me lutlut se inge, kut fwa sramsramkin ke kutu inkanek su Jisus el sang akpa nu sin met tuma lutlut lal a mea kut ku in lotela ke me akpa inge.
“Nga Pangon Komwos Met Kawuk”
4. Jisus el sie met kawuk mwomwo fuka nu sin met tuma lutlut lal?
4 Jisus el tia nunku mu el mwo liki met tuma lutlut lal. Elos met kawuk lal. El lungse in welalos, a el lulalfongelos. El fwak nu selos: “Ma nukewa ma Nga long sin Papa tumuk Nga fwakak tari nu sumwos.” (Ridi Jon 15:15.) Srike nunku ke insemwomwo yok lun met tuma lutlut ke pal se el topuk kusensiyuk lalos inge: “A mea akul in oasr tari lom, a saflaiyen akwuk puspus lun fwalu?” (Mattu 24:3, 4, NW) El lungse pa elos in etu nunak lal a pulakin lal. Ke sie me pupulyuk, ke fong se ma metu sruokilye, Jisus el eisel Piter, Jemes, a Jon nu in imae lun Getsemane. El enenu in pre ke pal upa se inge. Saap met sap tolu inge elos tia long ma el fwak ke pre lal, tusruktu elos etu la el arlana keok. (Mark 14:33-38) Ke siepa pal, el akkeyelos ke el “ekla ye mutalos.” (Mark 9:2-8; 2 Piter 1:16-18) Oiyen kawuk fototo in masrlon Jisus a met tuma lutlut lal sang nu selos ku su elos enenu in tafwela orekma saok su elos enenu in oru.
5. Met elder elos kasru fuka met saye puspus?
5 Oana Jisus, met elder ke pal inge elos kasru met lili mokul a mutan wiyelos a elos lungse in met kawuk lalos. Elos lungselos a akkalemye nu selos la elos nunkelos na paye. Kutupal oasr oiya puspus met elder elos tia ku in sramsram ka. Tusruktu elos sramsram ke ma elos lotela ke Kas lun God nu sin met lili wiyelos. Met elder elos lulalfongelos. Elos tia nunku mu yok sripelos liki ministerial servant su fwusr lukelos. Met elder elos kalem la fwinne ministerial servant fwusr elos ku in kapkapek ke ma paye a fwasr na ka. Elos etu la mokul fwusr inge lungse Jeova a welalos in kulansap in liaung congregation.
“Nga Sot Nu Sumwos Sie Me Srikasrak”
6, 7. Jisus el sie me srikasrak mwo fuka nu sin met tuma lutlut lal? Me srikasrak lal kasrelos fuka?
6 Paye la met tuma lutlut lun Jisus elos lungse Kas lun God, ne ouinge oasr pal nunak lalos kufusyukla ke inkanek su elos matula a ke oiyen moul lalos. (Mattu 19:9, 10; Luk 9:46-48; Jon 4:27) Tusruktu, Jisus el tia na suhfan elos ku kasrkusrak nu selos. El tia siyuk selos in oru kutena ma su arlana upa nu selos. A el tiana siyuk selos in oru ma se su el sifwana tia oru. Jisus el luti met tumal lutlut ke me srikasrak mwomwo lal.—Ridi Jon 13:15.
7 Kain in me srikasrak fuka Jisus el akkalemye nu sin met tumal lutlut? (1 Piter 2:21) El karunganang moul lal in tia nunku ke ma puspus tu elan ku in orekmakin pal lal in kulansapu met puspus. (Luk 9:58) Jisus el luti met puspus ke ma el lotela sin Jeova a el tia luti nunak lal sifwana. (Jon 5:19; 17:14, 17) El kulang, a fusrasr nu sin metu in sramsram nu sel. Orekma lal akkalemye la el lungse met puspus saye. (Mattu 19:13-15; Jon 15:12) Me srikasrak mwo lal Jisus kasru met sap nukewa lal. Ma inge kasrel Jemes in pulaik a oaru in kulansapu God ne ke na anwuki el. (Orekma 12:1, 2) A Jon el oaru in etawi me srikasrak lal Jisus ke lusen yea 60 kutu.—Fwakyuk 1:1, 2, 9.
8. Ke inkanek fuka met elder ku in me srikasrak mwo nu sin met fwusr a met saye?
8 Met elder elos ku in me srikasrak mwo nu sin mokul fwusr ke elos inse pusisel. A elos akkalemye lungse a orekmakin pal a ku lalos in kasru met puspus saye. (1 Piter 5:2, 3) Oayepa, met elder elos engun in akkalemye me srikasrak mwo tu mokul lili elos ku in etawi lulalfongi fokoko lalos, ke inkanek su elos luti, ke oiyen moul lalos oana met Kristian, a ke oiya mwo su elos fwakak peng mwo.—Hibru 13:7.
Jisus El Fwak Nu Selos Ma Elos Enenu in Oru, a Supwelosla
9. Kut etu fuka la Jisus el sang akpa nu sin met tumal lutlut in fwakak peng mwo?
9 Tokin Jisus el fwakak peng mwo ke lusen yea luo, el supwela pa met sap 12 lal in fwakak peng mwo. Tusruktu el fwak meet ma elos enenu in oru. (Mattu 10:5-14) Ke siepa pal, meet liki Jisus el kite tausan puspus sin met ke mongo na srisrik, el fwak nu sin met tumal lutlut ma elos enenu in oru. El fwak nu selos in orelik metu nu ke u srisrik tu met nukewa ku in eis me mongo nelos. (Luk 9:12-17) Jisus el sang akpa nu sin met tumal lutlut ke el fwak nu selos ma elos enenu in oru a la fuka elos fwa oru ma inge. Ke sripen me akpa su Jisus el sang nu selos a ke kasru su elos eis ke ku lun God, met sap elos orala akwuk mwo in oru sie orekma yok in sulkakin peng mwo su mutawauk in yea 33.
10, 11. Fuka met elder a kutupa met lili ku in sang akpa nu sin mokul puspus in kulansapu congregation?
10 Ke pal inge, kut mutawauk in luti sie mokul ke kut lutlut Baibel nu sel. Saap kut enenu in kasrel in etu rid mwo. Ke kut tafwela in oru lutlut nu sel, kut kasrel pa ke inkanek puspus saye. Ke el mutawauk in wi miting, el fwa lotela ma el enenu in oru elan fwal in oru me sramsram ke miting se inge pangpang Lutlut in Oru Ma Lungse lun Jeova a elan fwal oana met fwakak peng mwo su soenna baptais. Tokin el baptaisla, met elder elos fwa sang kutupa akpa nu sel. Ke sie me pupulyuk, elos ku in sang akpa nu sel in karungin a akmwoye An in Toeni. Met elder elos ku in kasrel pa in eis kalem ke ma el enenu in oru in fwal nu ke kunokon lun sie ministerial servant.
11 Ke pal se met elder elos sang sie kunokon nu sin sie mokul lili, elos lungse in kasrel in oru ma inge ke inkanek mwo. Elos akuteye inkanek su met elder elos oru orekma inge ke congregation a akkalemye kalem nu sel ma el enenu in oru. Fwin upa nu sel in oru orekma kutupal, met elder elos tia sa in fwak mu el tia fwal nu ka. A, met elder elos sifwilpa akuteye nu sel ke inkanek mwo ma el enenu in oru a la fuka el ku in oru ma inge. Met elder elos engun in kasru sie mokul lili in karungin kunokon nukewa lal meyen elos etu la orekma in kulansapu met lili ke congregation fwa oru elan insemwomwo.—Orekma 20:35.
“El Su Lalmetmet Porongo Papu”
12. Mea oru kas in kasru lal Jisus in arlana mwo?
12 Siepa inkanek su Jisus el sang akpa nu sin met tuma lutlut lal pa ke el sang kas in kasru su elos enenu ke pal fwal. Ke sie me pupulyuk, ke Jemes a Jon elos lungse e in tuku in kosrao me in kunausla kutu met Samaria, Jisus el kaeltal la tia mwo ma elos lungse in oru. (Luk 9:52-55) Ke siepa pal, nine kiyel Jemes a Jon el siyuk sel Jisus fwin elos ku in eis kunokon yok sripe ke Togusrai lal. Tusruktu Jisus el etu la Jemes a Jon pa lungse in eis kunokon inge, ke ma inge el fwak nu selos: “In muta lepouk leyut a lepouk lese, tia ma luk in sot, a ma lalos su Papa tumuk el akou nu selos.” (Mattu 20:20-23) Pal nukewa, Jisus el sang kas in kasru su kalem a ku in kasru metu in etu ma elos fwa oru ke kain in oiya puspus. Ma inge fwal nu ke Kas lun God pal nukewa. El lungse met tuma lutlut lal in etu in nunak a oru ma nukewa in fwal nu ke Kas lun God. (Mattu 17:24-27) Jisus el etu la met tumal lutlut elos tia sumwosmwos a oasr kutu ma elos tia ku in oru. El sang kas in kasru nu selos meyen el lungselos na paye.—Jon 13:1.
13, 14. (a) Su enenu kas in kasru? (b) Mea kutu kas in kasru su met elder elos ku in sang nu sin sie mokul lili?
13 Kais sie mokul lili su lungse in kulansupu met lili puspus el fwa enenu kas in kasru ke Baibel in kutu pal ke moul lal. Soakas 12:15 el akkalemye: “El su lalmetmet porongo papu.” Sie mokul lili fwusr el fwak la el pulakin mu el tia arlana fwal in kulansap. El fwak mu sie met elder el kasrel in kalem la el tia enenu in sumwosmwos na paye in kulansap.
14 Fwin met elder elos liye la oiya lun sie mokul lili pa sripe paenang el tia kapkapek, elos fwa sa in srike kasrel ke oiyen fwokpap. Elos lungse elan ku in kulansapu met lili nukewa. (Galetia 6:1) Kutupal, met elder elos enenu in sang kas in kasru nu sin sie met in aksumwosye oiyel. Ke sie me pupulyuk, saap met elder elos liye la sie mokul lili kutupal el tia arlana kafweang ke orekma lal. Elos ku in akkeyel in nunku ke me srikasrak lal Jisus. Jisus el alken ke orekma in sulkakin peng mwo a fwak nu sin met tumal lutlut elos in fwasr tokin me srikasrak lal. (Mattu 28:19, 20; Luk 8:1) Saap sie mokul lili el lungse in yok liki met saye puspus. Met elder elos ku in akuteye la Jisus el luti met tumal lutlut la elos in tia nunku in fulat emeet. (Luk 22:24-27) Ku saap arlana upa nu sin sie mokul lili in nunak munas met saye. Met elder elos ku in kasrel ke elos orekmakin me pupulyuk ke met kulansap su srunga in nunak munas met saye fwinne met saye nunak munas nu sel ke inkanek yok. (Mattu 18:21-35) Ke pal se met elder elos enenu in sang kas in kasru, elos enenu in sang ma inge ke pal na sa.—Ridi Soakas 27:9.
“Sifacna Akpahye Kom”
15. Fuka sou lun mokul lili ku in kasrel in kulansap nu sin met saye puspus?
15 Met elder elos kafweang in sang akpa nu sin mokul lili puspus in kulansap ke congregation. Tusruktu met saye elos ku pa in kasru. Ke sie me pupulyuk, sou sifwana lun mokul lili elos ku in kasrel in kulansap. A fwin sie mokul lili el met elder tari, mutan kiyel a tulik natul ku in kasrel ke el kafweang in orekma ke congregation. Elos kalem ka la el enenu in orekmakin kutu pal a ku lal nu sin met lili puspus. Ma inge oral in engun fwin sou lal elos inse mulala elan orekmakin pal a ku lal tu lan ku in karungin mwo kunokon lal. Kut sang kulo nu sin sou lun met elder puspus ke elos akkalemye oiya mwomwo inge.—Soakas 15:20; 31:10, 23.
16. (a) Su enenu in akkalemye la oasr yurol lungse in kulansap nu sin met saye? (b) Mea sie mokul lili el enenu in oru fwin el lungse in kulansap oana sie ministerial servant ku sie met elder?
16 Fwinne met saye ku in kasrel, tusruktu mokul lili se inge el enenu in akkalemye la el lungse in kulansapu met lili. (Ridi Galetia 6:5.) Paye la sie mokul lili el tia enenu in oana sie ministerial servant ku sie met elder in kasru met lili a in oru ke ku lal kewa in sulkakin peng mwo. Tusruktu fwin sie mokul lili el lungse in kulansap oana sie ministerial servant ku sie met elder, el enenu meet in akfwalyel sifwana ka. Baibel el akkalemye ke oiya mwomwo su el enenu in kafweang in orekmakin ke moul lal tu lan ku in fwal nu ka. (1 Timote 3:1-13; Taitus 1:5-9; 1 Piter 5:1-3) Ke ma inge fwin sie mokul lili el lungse in kulansap oana sie ministerial servant ku sie met elder tusruktu el soenna wi oru, el enenu in nunku ke kutu ma su el ku in oru tu elan fwal in kulansap. Mea ku in kasrel? El enenu in rid a lutlutkin Baibel pal nukewa, in sifwilpa nunku ka, a in pre. A oru ke ku lal kewa orekma in sulkakin peng mwo. Fwin el oru ma nukewa inge, el fwa orekmakin kas in kasru lal Poul su el sang nu sel Timote: “Sifacna akpahye kom in moulkin moul in akinsewowoye God.”—1 Timote 4:7, LSK.
17, 18. Mea sie mokul lili el ku in oru fwin el pulakin mu el tia arla fwal ku fwin wangin lungse yurol in kulansap?
17 Na fuka fwin sie mokul lili el nunku mu el tia arlana fwal in kulansap oana sie ministerial servant ku sie met elder? Mwo nu sel in esam la Jeova a Jisus elos kasre kut ke inkanek yok. Jeova el mwulela la el “wis me utuk lasr len nu kemwa.” (Sam 68:19) Ke ma inge Jeova el fwa kasru sie mokul lili in eis kunokon puspus ke congregation. Fwin sie mokul lili el tia sie ministerial servant ku sie met elder, a mwo nu sel in esam la oasr ma enenu yok ke mokul lili puspus su ku in karungin congregation. Mwo pa nu sel in pre a siyuk ke ku lun Jeova meyen ma inge fwa kasrel in oasr misla a sifwana leumi. Ma inge ku in kasrel in tia nunku mu el tia arla fwal ka. (Luk 11:13; Galetia 5:22, 23) Kut ku in lulalfongi ka la Jeova el fwa akinsemwomwoye mokul lili su lungse in kulansapu met lili puspus ke inse paye.
18 Saap wangin lungse yurin sie mokul lili in kulansap. Mea ku in kasrel? Met sap Poul el simusla: “God el orekma in komwos, tu komwos in lungse a oru ma lungse mwo lal.” (Filippai 2:13) Aok God pa sang ku nu sin sie met a in oasr lungse lal in kulansapu met saye puspus a in oru ma lungse Lal. (Filippai 4:13) Sayen ma inge, sie met Kristian el ku in pre nu sin God ke kasru in oru ma sumwos.—Sam 25:4, 5.
19. Mea kalmen Jeova el fwa tulokunak “met seperd itkosr, a met fwisrak oalkosr”?
19 Jeova el fwa akinsemwomwoye kafweang lun met elder su sang akpa nu sin mokul lili puspus. El akinsemwomwoye pa mokul lili puspus su lungse in kulansapu met lili saye. Baibel el akkalemye la kut ku in lulalfongi la a fwa oasr mokul lili puspus inmasrlon met lun God su ku in karungin congregation puspus. Ma simusla el akkalemye la Jeova el fwa tulokunak “met seperd itkosr, a met fwisrak oalkosr.” (Maika 5:5) Ke pal inge, oasr mokul lili puspus su inse pusisel elos lungse in kulansapu met lili saye a elos eis me akpa in karungin congregation. Ma inge sang kaksak nu sin Jeova a ase me insemwomwo puspus nu sesr.
Kom E Topuk Fuka?
• Mea kutu inkanek su Jisus el sang me akpa nu sin met tumal lutlut?
• Fuka met elder elos ku in etawel Jisus ke elos kasru mokul lili pupus in kulansapu met saye ke congregation?
• Sou lun mokul lili elos ku in kasrel fuka in kulansapu met saye ke congregation?
• Mea sie mokul lili el enenu in oru in akkalemye la el lungse in kulansap nu sin congregation?
[Petsac ke sra 23]
Me akpa fuka kom ku in oru nu sin met lutlut Baibel lom ke el lungse in kapkapek?
[Petsac ke sra 24]
Mokul lili elos ku in akkalemye fuka la elos kafweang in kapkapek?