Kulansupal Kraist Su Togusra Ke Paye A Oaru

“A etukyung nu Sel mwal, a mwolanu, a sie togusrai, tu met e nu kemwa, mutanfwalu, a kasu fwa kulansupal.”​—DANIEL 7:14.

1, 2. Kut etu fuka la Kraist el tia eis ku nukemwa ke Togusrai in yea 33 C.E.?

YA OASR sie met kol su ku in sang moul lal a mise ke met kulansap nukemwa lal tusruktu el sifwilpa moulyak a oru kolyuk lal oana togusra? Ya oasr togusra su ku in moul fwin fwalu, in akkeye lulalfongi a oiya paye a oaru lun met kulansap nukemwa lal, a tok oru me kolyuk lal in kosrao? Met sefwanna su ku in oru ma inge​—a kutu pa ma saye—​pa Jisus Kraist. (Luk 1:32, 33) In len in Pentecost 33 C.E., tokin Jisus el mise, sifwil moulyuk, a somwak nu in kosrao, God el “esalang Lan sifwen ma nu kemwa nu ke congregation.” (Efesus 1:20-22; Orekma 2:32-36) Ke ma inge Jisus el mutamwauk in oru kolyuk lal tusruktu tia ke inkanek nukemwa. U se meet lun met puspus su oasr ye kolyuk lal pa met Kristian akmusrala in ngun, su met nukemwa wi ka tia met Israel na paye a elos pangpang Israel in ngun, ku “Israel lun God.”​—Galetia 6:16; Kolosse 1:13.

² Apkurun yea 30 tokin len in Pentecost in 33 C.E., met sap Poul el akkalemye la Kraist el soenna eis ku nukemwa lal ke Togusrai, tusruktu “el muta lepo leyot sin God, a liki pal se ingo el sano nu ke pal met lokwalok lal elos orekla ma loangoeyen niel.” (Hibru 10:12, 13) Tokin ma inge, su apkurun nu ke saflaiyen century se meet C.E., met sap Jon su matu tari el liye ke sie aruruma el su Fulatlanu in Kosrao a Fwalu, Jeova, su orella Jisus Kraist oana Togusra ke Togusrai sasu su tufana oakiyuki in kosrao. (Fwakyuk 11:15; 12:1-5) Ke etauk lasr ke pal inge ke me sramsram lun met, kut ku in kalweni me akpayeye su arulanu kalem la Kraist el mutamwauk in kol oana Togusra Messaia in kosrao in yea 1914.a

3. (a) Oasr oiya mwo fuka su sasu wekunang nu ke Togusrai su mutamwauk in yea 1914? (b) Kusensiyuk puspus fuka kut ku in siyuk sesr sifwana?

³ Aok, mutamwauk in yea 1914 oasr sie oiya mwomwo su sasu in weang orekma in fwakak peng mwo lun Togusrai. Oiya mwomwo su sasu inge pa Kraist el oru kolyuk lal oana sie Togusra ke Togusrai lun God in kosrao, fwinne el oru kolyuk lal “inmasrlon met lokwalok [lal].” (Sam 110:1, 2; Mattu 24:14; Fwakyuk 12:7-12) Wekunang ma inge, fwin fwalu nufon, met nukemwa su muta ye kolyuk lal elos akkalemye akosten lalos nu ke kunokon ku lal ke elos wi ke sie orekma in luti ke Baibel su wangin ma oana ke me sramsram lun metu. (Daniel 7:13, 14; Mattu 28:18) Met Kristian akmusrala in ngun, su “mwen nutin togusrai,” elos oana “met tutafpo ke Kraist.” Elos kasreyuk ke inkanek oaru lun met puspus su wi ke u lun “sip ngia” lun Kraist, elos kulansap oana met roso ke Togusrai lun God. (Mattu 13:38; 2 Korint 5:20; Jon 10:16) Ne oinge, kut enenu in tuni fwin kut oana met se met se akilen a akos na paye ku lun Kraist. Ya kut akkalemye oiyen paye a oaru lasr nu sel ke inkanek nukemwa? Fuka kut ku in akkalemye oiyen oaru a paye lasr nu sin sie Togusra su oru kolyuk lal in kosrao? Lela kut in aketeye meet ke sripe puspus lasr ke oiyen oaru lasr nu sin Kraist.

Sie Togusra Su Oasr Oiya Mwomwo Yuru Su Akkeye Met Nukemwa Su Muta ke Kolyuk lal in Akkalemye Oaru Lalos nu Sel

4. Mea Jisus el akpayeye oana Togusra se su Pakiyuki ke lusen orekma in luti lal fwin fwalu?

⁴ Oiyen oaru lasr nu sin Kraist el fwal nu ke me kaksak wi sang kulo lasr ke ma nukemwa el oru a ke oiya mwomwo puspus lal. (1 Piter 1:8) Ke pal se el muta fwin fwalu, Jisus el oana Togusra se su Pakiyuki el an akkalemye ke kutu oiya su el fwa oru oana Togusra fwin fwalu nafon ke pal pakiyuki lun God. El kite met musrinsral. El akkeyela met mas, met kun, met sekapas, met selongkas, a met sekas. El akmoulyeyuk pa kutu met mise. (Mattu 15:30, 31; Luk 7:11-16; Jon 6:5-13) In wekunang, in eis etauk ke oiyen moul lun Jisus fwin fwalu ku in kasre kut in etu oiya mwomwo puspus lal oana met Kol lun fwalu ke pal fwasru​—oiya mwo emeet lal su arulanu liyeyuk pa ke lungse paye lal. (Mark 1:40-45) Ke ma inge, oasr met puspus elos fwak mu Napoléon Bonaparte el fwakak kas inge mu: “Alexander, Caesar, Charlemagne, a Nga sifwana oakiyuki nu ke togusrai puspus, tusruktu orekma yok lasr inge oakiyuki nu ke sripe fuka? Ma inge oakiyuki ke ku. Jisus Kraist mukena pa oakiya togusrai lal ke akwuk lun lungse, a ke pal inge million puspus sin met elos fwa mise kel.”

5. Efu ku oiya mwo nukemwa lal Jisus akkeye met puspus?

⁵ Meyen Jisus el fwokpap a inse pusisel, elos su pulakin asor a toasr ke sripen ma upa puspus a me aktoasr puspus elos akkeyeyuk ke me luti nukemwa lal su sang me akkeye a ke oiyen kulang lal. (Mattu 11:28-30) Tulik srisrik elos pulakin insemwomwo ke elos welul. Met puspus su inse pusisel, a oasr nunak mwo lalos elos ekla met tuma lutlut lal. (Mattu 4:18-22; Mark 10:13-16) Oiyen kulang lal a oiya lal nu ke lungse in akkalemye sunak nu sin met nukemwa akkeyeyak mutan puspus su sangeng sin God in akkalemye oiyen oaru lalos nu sel, su pus selos elos sang pal, ku, a ma saok lalos in sang kasrel ke el oru orekma in luti lal.​—Luk 8:1-3.

6. Pulakin paye fuka Jisus el akkalemye ke pal se Lazarus el mise?

⁶ Kraist el akkalemye pulakin paye lal ke pal se met kawuk lal su pangpang Lazarus el mise. Pulakinyen asor yok a memelil lal Mary a Marta arulanu sun insiel paenang el tia ku in kutongye pulakinyen asor lal, a el “tung” pa. El “toasr insiel”​—el pulakin asor yok ke insiel—​fwinne el etu la tia pat el fwa sifwil akmoulyelak Lazarus. Tokin ma inge, ke sripen el akkeyeyuk ke lungse a pakoten, Jisus el orekmakin ku lal su God el sang nu sel a el akmoulyelak Lazarus.​—Jon 11:11-15, 33-35, 38-44.

7. Efu ku fwal kut in akkalemye oiyen oaru lasr nu sin Kraist? (Srike liye pa pok in sra 17.)

⁷ Kut aksaokye a akkalemye sunak nu ke lungse paye lun Jisus ke ma sumwos a ke srunga lal nu ke oiyen mwosounkas a ma koluk. Oasr pal luo su el akkalemye pulaik lal in aknasnasye temple liki orekma koluk lun met kuka su eis ma laesla puspus. (Mattu 21:12, 13; Jon 2:14-17) Sayen ma inge, oana sie met fwin fwalu, el sun kain in ma upa nukemwa, paenang el sifwana pulakin me keok a ma upa puspus su kut sun ku pulakin pa. (Hibru 5:7-9) Jisus el etu pa pulakin lun sie met su akkolukyeyuk ke srunga a nununku sesumwos. (Jon 5:15-18; 11:53, 54; 18:38–19:16) Ke saflaiye, el akkalemye oiyen pulaik ke el mise in akpayeye ma lungse lun Papa tumal a sang moul ma patpat nu sin met nukemwa su muta ye koko lal. (Jon 3:16) Ya oiya mwomwo nukemwa lun Kraist tia mokle kom in tafwela in kulansupal ke inkanek oaru a paye? (Hibru 13:8; Fwakyuk 5:6-10) Tusruktu mea eneneyuk in sang kasru nu sin sie met ekla sie met kulansap lun Kraist su Togusra?

Ma Eneneyuk nu ke Ekla lun Sie Met Kulansap lun Kraist

8. Mea eneneyuk nu sin met nukemwa su muta ye kolyuk lun Kraist?

⁸ Nunku ke me pupulyuk inge: Fwin sie met el lungse in ekla sie citizen lun mutanfwal saye e fwa oasr ma eneneyuk nu sel. Met nukemwa su fwal in ekla citizen lun sie mutanfwal eneneyuk in oasr oiya mwomwo a in oasr mano fukoko tia mas. Ke kain in oiya sepana inge, met kulansap lun Kraist elos enenu in karungin oiya nasnas lalos a sie oiya mwo in ngun lalos.​—1 Korint 6:9-11; Galetia 5:19-23.

9. Kut ku in akkalemye fuka la kut oaru nu sin Kraist?

⁹ Jisus el siyuk pa met kulansap nukemwa lal elos in akkalemye oiya oaru a paye nu sel a nu ke Togusrai lal. Elos akkalemye oiyen oaru inge ke elos akfwalye moul lalos nu ke ma el luti ke pal se el muta fwin fwalu oana Togusra se su Pakiyuki. Ke sie me pupulyuk, elos suk meet ma lun Togusrai a ma lungse lun God yok liki in suk ma puspus lun fwalu. (Mattu 6:31-34) Elos srike pa in etawi oiya mwomwo lun Kraist, fwinne oasr ma upa puspus sikyak. (1 Piter 2:21-23) Sayen ma inge, met tuma lutlut nukemwa lun Kraist elos fwasr tokin me srikasrak lal ke elos kaifweang in oru ma mwo nu sin met puspus.​—Mattu 7:12; Jon 13:3-17.

10. Fuka oiyen oaru nu sin Kraist ku in akkalemyeyuk ke (a) sou a (b) ke congregation?

¹⁰ Met tuma lutlut nukemwa lun Kraist elos akkalemye pa oiyen oaru lalos nu sel ke elos akkalemye oiya mwomwo puspus lal nu ke sou. Ke sie me pupulyuk, mokul tuma elos akkalemye oiyen oaru lalos nu sin Togusra lalos in kosrao ke elos etawi oiya mwomwo lun Kraist ke oiya su elos akkalemye nu sin mutan kiyelos a tulik natulos. (Efesus 5:25, 28-30; 6:4; 1 Piter 3:7) Mutan payuk nukemwa elos akkalemye oiyen oaru lalos nu sin Kraist ke ella mwomwo lalos a ke elos akkalemye “fulpap a ngun okak.” (1 Piter 3:1-4; Efesus 5:22-24) Tulik nukemwa elos akkalemye oiyen oaru lalos nu sin Kraist ke elos etawi oiyen akosten lal. Oana sie met fwusr, Jisus el akpusiselyel sifwana pal nukemwa nu sin papa a nine kiel, fwinne elos sesumwos. (Luk 2:51, 52; Efesus 6:1) Met kulansap nukemwa lun Kraist elos kaifweang yok in etawel ke elos “pakoten sie sin sie, lungse oana met lili,” a akkalemye “fusrasr inse.” Elos kaifweang in oana Jisus, “fulpap in nunak, tia atopuki ke ma koluk, ku atopuki ke kas kou.”​—1 Piter 3:8, 9; 1 Korint 11:1.

Met Kulansap Nukemwa lun Kraist Elos Akos Masap Lal

11. Nu ke masap fuka met kulansap lun Kraist elos akpusiselyelos sifwana?

¹¹ In oana met nukemwa su lungse in ekla citizen lun sie mutanfwal su enenu in akos masap nukemwa lun an san, met kulansap lun Kraist elos akpusiselyelos sifwana nu ke “masap lun Kraist” ke elos akfwalye moul lalos nu ke ma nukemwa su Jisus el luti a sapkin. (Galetia 6:2) Elos akkalemye oiyen oaru lalos yokna ke elos moul fwal nu ke “masap fulat” lun togusra su akkalemye ke lungse. (Jemes 2:8) Mea weang nu ke masap nukemwa inge?

12, 13. Fuka kut akkalemye oaru lasr in akos “masap lun Kraist”?

¹² Met kulansap nukemwa lun Kraist elos met sesumwos a oasr ma koluk lalos. (Rom 3:23) Ke ma inge, elos enenu in akkeye ke pal nukemwa “lungse paye nu sin met lili” tu elos in ku in “lungse sie sin sie ke insielos ma lulap.” (1 Piter 1:22) “Fwin oasr yurin kutena met kas in lain siepa,” met Kristian elos orekmakin masap lun Kraist ke elos akkalemye “muteng nu sin sie sin sie, a nunak munas nu sin sie sin sie.” Fwin elos akos masap inge ku in kasrelos in tia loang mwo nu ke oiyen sesumwos lun sie met a in suk sripe puspus a suk inkanek in akkalemye lungse nu sin sie sin sie. Ya kom tia sang kulo ke kom wi met puspus su oaru in akpusiselyelos nu sin Togusra kulang a nukomelosyung ke lungse, “su me kapur lun sumwosna”?​—Kolosse 3:13, 14.

¹³ In wekunang ma inge, Jisus el aketeye la lungse su el akkalemye el yok liki lungse su metu akkalemye nu sin sie sin sie. (Jon 13:34, 35) Kut fwin lungse elos su lungse kut mukena, kut tia oru kutena “ma su arulanu yok sripe.” Ke ma inge lungse lasr el tia lungse paye. Jisus el kaifwe kut in etawi lungse lun Papa tumal ke kut akkalemye lungse fwinne nu sin met lokwalok nukemwa su srunge kut a kalyai kut. (Mattu 5:46-48) Kain in lungse inge akkeye pa met kulansap lun Kraist in kaifweang in oru orekma yok lalos. Mea orekma yok lalos inge?

Oiyen Oaru lun Met Kulansap Nukemwa lun Kraist Srikeyuk

14. Efu ku orekma in sulkakin peng mwo arulanu yok sripe?

¹⁴ Oasr orekma su arulanu yok sripe nu sin met nukemwa su muta ye kolyuk lun Togusrai lun God, orekma inge pa in “fwakak ke togusrai lun God.” (Orekma 28:23) In oru orekma inge arulanu yok sripe meyen Togusrai lun Messaia el fwa akmutalye sumwos lun Jeova in kol in kosrao a fwalu. (1 Korint 15:24-28) Ke kut sulkakin peng mwo, oasr pal mwomwo lun met nukemwa su long in ekla met su ku in muta ye koko lun Togusrai lun God. Sayen ma inge, ke oiya su akkalemyeyuk sin met nukemwa ke peng mwo sang sie me akul, ku me kasru mwomwo, su Jisus el ku in orekmakin in sang nununku metu. (Mattu 24:14; 2 Tessalonika 1:6-10) Ke ma inge, inkanek se meet su kut enenu in akkalemye nu ke oiyen oaru lasr nu sin Jisus pa in akos masap lal in akkalemye nu sin met puspus peng mwo ke Togusrai.​—Mattu 28:18-20.

15. Efu ku oiyen oaru lun met Kristian srikeyuk?

¹⁵ Paye la, Setan el lain orekma in luti peng mwo ke kutena oiya su el ku in oru, a met kol puspus lun metu elos tia akilen ku lun Kraist su God el sang nu sel. (Sam 2:1-3, 6-8) Ke ma inge, Jisus el sang kas in sensen nu sin met tumal lutlut nukemwa: “Sie met kulansap el tia yok liki met kato lal. Elos fwin kolyai yu, elos fwa ouyepa kolyai komwos.” (Jon 15:20) Ke sripe se inge, met tuma lutlut nukemwa lun Kraist elos oasr ke sie meun in ngun su sang me srike nu ke oiyen oaru lalos.​—2 Korint 10:3-5; Efesus 6:10-12.

16. Fuka met nukemwa su muta ye koko lun Togusrai elos sang “nu sin God ma lun God”?

¹⁶ Ne oinge, met nukemwa su muta ye kolyuk lun Togusrai lun God elos akkalemye oaru lalos pal nukemwa nu sin Togusra lalos su tia liyeyuk a ke pal sepana elos akkalemye pa sunak nu ke ku lun met kol puspus. (Taitus 3:1, 2) Jisus el fwak: “Sang nu sin Sisar ma lun Sisar, a nu sin God ma lun God.” (Mark 12:13-17) Ke ma inge, met nukemwa su muta ye koko lun Kraist elos akos masap lun gufernment fwin ma inge tia lain masap lun God. (Rom 13:1-7) Tusruktu, ke pal se court fulat lun met Ju elos lain masap lun God ke elos sapkin nu sin met tuma lutlut lun Kraist in tui in luti peng mwo, met tuma lutlut elos pulaik in fwak la elos enenu in “akos God yok liki metu.”​—Orekma 1:8; 5:27-32.

17. Efu ku kut ku in muteng ke me srifwe nukemwa ke oiyen oaru lasr wi pulaik?

¹⁷ Paye la, enenu in akkalemye pulaik yok nu sin met tuma lutlut lun Kraist in akkalemye oaru lalos pal nukemwa nu sin Togusra lalos fwin oasr me kalyai sikyak. Ne oinge, Jisus el fwak: “Insemwomwo komwos ke met akangonye komwos, a kolyai komwos, a fwak kain koluk nu kemwa lain komwos in kikiap, keik. Komwos engunak, a arulanu insemwomwo, tu yok ma lane lomwos in kosrao.” (Mattu 5:11, 12) Met tuma lutlut nukemwa lun Kraist in pal meeta elos pulakin na paye ke kas lun Jisus inge. Fwinne elos sringilyuk ku kalyaiyuk ke sripen elos srunga in tui in sulkakin peng mwo ke Togusrai, elos engun “tu filiyuki elos fwal in keok ke e se inge. A len nu kemwa, in tempel a yen selos, elos tia tari in luti a fwakulak Jisus tu El Kraist.” (Orekma 5:41, 42) Komwos fwal in kaksakinyuk, ke komwos akkalemye pa oiyen oaru su akkalemyeyuk sin met tuma lutlut nukemwa in pal meeta ke kom muteng ke ma upa nukemwa, mas, asor yok, ku me lain.​—Rom 5:3-5; Hibru 13:6.

18. Mea kas lun Jisus nu sel Pontius Pailat el akkalemye?

¹⁸ Ke pal se el srakna oasr fwin fwalu a el soenna eis ku lal oana Togusra su Pakiyuki, Jisus el aketeye nu sel Pontius Pailat, Governor lun an Rom: “Togusrai Luk, tia ma lun fwal se inge. Togusrai Luk fwin ma lun fwal se inge, na met kulansap luk elos fwa anwuk, tu Nga in tia etukyung nu sin met Ju. A inge togusrai luk tia ma sin an se inge me.” (Jon 18:36) Ke ma inge, met nukemwa su muta ye kolyuk lun Togusrai su in kosrao, elos tia orekmakin kutena kofwen me meun in lain kutena met ku in wi ke kutena u lun met in lain sie sin sie. In akkalemye oiyen oaru a paye nu sin “Fwisrak in Misla,” pal nukemwa elos tia wi ke kutena u ku akwuk lun fwalu su wangin inse sefwanna ka.​—Isaia 2:2-4; 9:6, 7.

Me Insemwomwo Ma Patpat nu sin Met Kulansap Oaru Nukemwa

19. Efu ku met nukemwa su muta ye koko lun Kraist elos ku in ngetla nu ke pal fwasru wi lulalfongi?

¹⁹ Met kulansap oaru nukemwa lun Kraist, “Togusra lun Togusra Nukemwa,” elos akkalemye lulalfongi ke elos sano ke pal fwasru. Elos lungse in sano nu ke pal se ke el fwa akkalemye ku lal oana togusra fwin fwalu. (Fwakyuk 19:11–20:3; Mattu 24:30) Met lula sin met oaru nukemwa su akmusrala in ngun su “mwen nutin togusrai” elos ngetla meet nu ke me usru lalos su arulanu yok sripe oana togusra puspus su welul Kraist in kosrao. (Mattu 13:38; Luk 12:32) “Sip ngia” nukemwa lun Kraist su akkalemye oaru lalos nu sel elos tupan nu ke pal se Togusra lalos el fwa fwak kas in akinsemwomwoyelos inge: “Fwasru, komwos met insemwomwo lun Papa tumuk, usrui [me insemwomwo nukemwa ke Paredais fwin fwalu lun] togusrai su akola nu sumwos ke mutamweyen fwalu me.” (Jon 10:16; Mattu 25:34) Ke ma inge, lela met nukemwa su muta ye koko lun Togusrai elos in akkalemye sulela mwomwo lalos in akkalemye oiyen oaru lalos pal nukemwa nu sin Kraist su Togusra.

[Footnote]

Ya Kom Ku in Aketeye?

• Efu ku fwal kut in akkalemye oiyen oaru lasr nu sin Kraist?

• Fuka met nukemwa su muta ye koko lun Kraist elos akkalemye oaru lalos nu sel?

• Efu kut lungse in akkalemye oaru lasr nu sin Kraist su Togusra?

[Box ke sra 17]

KUTUPA OIYA MWOMWO LUN KRAIST

Tia Sulosol Met​—Jon 4:7-30.

Pakoten​—Mattu 9:35-38; 12:18-21; Mark 6:30-34.

Lungse su Oasr Oiyen Lafwekunal Sifwana​—Jon 13:1; 15:12-15.

Paye a Oaru​—Mattu 4:1-11; 28:20; Mark 11:15-18.

El Pulakin pa asor lun met​—Mark 7:32-35; Luk 7:11-15; Hibru 4:15, 16.

Oasr Nunak Mwomwo a Sumwos​—Mattu 15:21-28.

[Petsa ke sra 15]

Ke kut akkalemye lungse nu sin sie sin sie, kut inse pusisel in akos “masap lun Kraist”

[Petsa ke sra 17]

Ya oiya mwomwo nukemwa lun Kraist akkeye kom in kulansupal ke inkanek oaru?