Yac Kom Liye Ma Enenweyuck in Ahkpahye Mwet Sahyac?

1, 2. Efuh kuht enenuh in ahkpahye mwet sahyac in oruh pac kunohkohn ke congregation?

JESUS el orekma upac in fahkwack pweng wo ke Tohkohsrahi uh. El oacyacpac sislah pacl yohk lal in ahkpahye mwet tuhma lutlut lal ah. El ahkkahlwemye nuh seltahl fuhkah in oruh orekma in luti ac in karihngihn mwet luhn God uh. Mwet tuhma lutlut lal ah lotwelah in kol oacna mwet shepherd suc liyacacng un sheep nahtuhltahl. (Matthew 10:5-7) Phillip el arlacna kahfofo ke orekma in luti lal uh, tuhsruhktuh el ahkpahye pac tuhlihk muhtwacn se nahtuhl in oruh pac orekma se inge. (Orekma 21:8, 9) Ke pacl inge, kuht oacyacpac enenuh in ahkpahye mwet sahyac uh. Efuh?

² Ke congregation fin facluh nohfohn, oasr mwet sasuc pucspucs suc soenna bacptais. Mwet sasuc inge enenuh in ahkpahyeyuck. Kuht enenuh in kahsreltahl in kahlwem kac lah efuh wo nuh seltahl in rit ac lutlut ke Bible ke pacl laltahl sifacna. Oacyacpac, kuht enenuh in ahkpahyacltahl in fahkwack ac luti ke pweng wo uh. Mukul lili suc tuhfahna bacptaislac eltahl enenuh in eis ahkpah eltahl in muh kuh in kuhlwacnsap oacna mwet suc kahsruh mwet elder ac mwet elder. Mwet nuhkewa ke congregation uh kuh in kahsruh mwet sasuc uh.​—Soakas 4:2.

LUTI MWET SASUC UH IN LUTLUT KE BIBLE

3, 4. (a) Paul el kapsreni fuhkah lutlut ke Bible nuh ke orekma in luti ma ac fahlac wo? (b) Meet liki kuht ahkkweye mwet lutlut lasr in oruh lutlut lal sifacna ke Bible, meac kuht sifacna ac enenuh in oruh?

³ Mwet kuhlwacnsap nuhkewa luhn Jeova enenuh in rit ac lutlut ke Bible in lotwelah ke ma luhngse luhn God. Mwet sap Paul el ahkuhtweyac ma inge nuh sin mukul ac muhtwacn lili fin acn Colossae ke el fahk: “Ke srihpac se inge, ke pacl se kuht tuhfahna lohng keiwos ne mihsenge kuht puhruhe na keiwos, ac siyuck God Elan oruh tuh kowos in arlacna kahlwem ke ma luhngse lal, ke etwacack ac lahlmwetmwet nuhkewa.” Efuh kuh yohk srihpac nuh seltahl in rit ac lutlut ke ma suhmuhslah uh? Mweyen ma inge ac kuh in sang lahlmwetmwet ac kahsreltahl in kahlwem kac lah fuhkah eltahl kuh in “moul fal nuh ke ma luhngse luhn Leum, ac oruh ma suc ahkinsewowoyacl pacl nuhkewa.” Ac ma inge ac kahsreltahl in oruh “kain orekma wo nuhkewa” ma Jeova el luhngse eltahl in oruh, yohkna orekma in luti pweng wo uh. (Colossae 1:9, 10) Pwacnacng, kuht fin lutlut yurin sie mwet, kuht enenuh in kahsrel in kahlwem kac lah in rit ac lutlut ke Bible pacl nuhkewa kuh in kahsrel in kuhlwacnsuhpuh Jeova.

⁴ Kuht tiac kuh in kahsruh mwet lutlut lasr ke Bible in kahlwem ke yohk srihpaciyen lutlut lal sifacna kuht fin tiac oruh lutlut lasr sifacna. Pwacye lah, kuht fin riti Bible ac nuhnkuh yohk kac ke pacl nuhkewa, ma inge kuh in kahsre kuht ke moul lasr ac orekma in luti lasr uh. Ke sie mwe puhpuhlyuck, ke pacl se kuht oruh orekma in luti uh ac sie mwet el siyuck sesr ke sie kihsen siyuck na upac, kuht ac kuh in orekmakihn Bible in sang tohpohklah kihsen siyuck lal an. Kuh, ke pacl se kuht riti lah fuhkah Jesus, Paul, ac mwet sahyac eltahl tiac fuhlweack ke orekma in luti laltahl uh, kuht ac fah ahkkweyeyuck ac tahfwelah na in fahkwack finne ke pacl upac. Ac ke pacl kuht fahkwack nuh sin mwet sahyac ke ma kuht lotwelah ke lutlut lasr uh ac fuhkah ma inge kahsre kuht, kuht ac ahkkweyacltahl in ahkyohkye lutlut laltahl ke Bible eltahl in muh kuh in eis ma wo kac.

5. Sang kahs in kahsruh lah fuhkah in kahsruh mwet sasuc in oasr oakwuck lal in sifacna lutlut ke Bible.

⁵ Kom kuh in siyuck, ‘Fuhkah nga kuh in ahkpahye mwet lutlut luhk in lutlut ke Bible pacl nuhkewa?’ Sahp, kom kuh in ahkkahlwemye nuh sel lah kom ac ahkolah fuhkah mwe lutlut ke mwe rit ma kom ac lutlut yohrohl kac an. Kom ac kuh in fahk nuh sel elan riti mwe lutlut ma kuhpahsr nuh ke kuhtuh pac mwe ahkuhtweyac ke puk se inge Baibel el Luti ac liye pac fuhs in Bible ma ahkkahlwemyeyuck kac. Tohkohyang, kom kuh in ahkkahlwemye nuh sel fuhkah in ahkolah nuh ke miting elan muh kuh in wi top. Ahkkweyacl in riti kais sie Tower in San ac Awake! ke mahlwem nuhkewa. Ac kom kuh in ahkkahlwemye nuh sel fuhkah in konwacack top nuh ke kihsen siyuck ke Bible, ke sie mwe puhpuhlyuck, ke el orekmakihn Watchtower Library kuh Watchtower ONLINE LIBRARY. Ke el srihke kain in inkacnek pucspucs inge ke lutlut lal sifacna, el ac engankihn ma inge ac luhngse in lutlut yohk liki na meet ah.

6. (a) Kom ac kahsruh fuhkah mwet lutlut lom an in ahkyohkye luhngse lal nuh ke Bible ke insiacl? (b) Meac sie mwet lutlut ke Bible el ac kuh in oruh el fin ahkyohkye luhngse lal nuh ke ma Suhmuhslah uh?

⁶ Ke kuht lutlut yurin sie mwet, kuht luhngse elan akihlen lah Bible uh arlacna sacohk, mweyen ma inge ac kahsrel in etwacllah na pwacye Jeova. Kuht kuh in ahkkahlwemye nuh sel fuhkah in engankihn lutlut uh liki na in pahtkol in lutlut. Ke yohkwelihk etwacack lal ke Bible, el ac kuh in puhla oacna mwet sihm luhn psalm suc on: “A fuhnuh nga, fuhkah woiyac ke nga apkuhran nuh sin God. In konwacack molwelah yurin LEUM GOD Fuhlwact.” (Psalm 73:28) Nguhn luhn Jeova ac fah kahsruh sie mwet suc luhngse in fototo nuh sel.

AHKPAHYE MWET SASUH UH NUH KE OREKMA IN FAHKWACK AC LUTI

7. Jesus el ahkpahye fuhkah mwet suc fahkwack ke pweng wo uh? (Liye petsac se meet ke mwe lutlut se inge.)

⁷ Kuht kuh in lotwelah yohk ke inkacnek ma Jesus el orekmakihn in sang ahkpahye mwet tuhma lutlut lal ah. Eltahl weluhl Jesus ke pacl ma el som ac luti, ac eltahl liye ke el luti nuh sin mwet uh. El oacyacpac sang nuh seltahl kahs in kahsruh nuh ke inkacnek in luti laltahl uh. (Matthew, sapta 10)^[1] (Liye endnote.) Ke kihtin pacl na, mwet sap ah etwaclah sel Jesus ke inkacnek in luti mwet uh ke ma pwacye. (Matthew 11:1) Lwelah kuht in liye ma luo ma kuht kuh in ahkpahye mwet sasuc uh in oruh ke pacl ma eltahl oruh orekma in luti uh.

8, 9. (a) Ke inkacnek fuhkah Jesus el sramsram nuh sin mwet uh ke orekma in luti lal uh? (b) Kuht ac kahsruh fuhkah mwet lili sasuc in sramsram nuh sin mwet uh oacna ke Jesus el oruh?

⁸ Sramsram nuh sin mwet uh. Tiac pacl nuhkewa pa Jesus el sramsram nuh sin un mwet uh. Inkaiyen pacl uh, el sramsram nuh sin kais sie mwet, ac el oruh ke inkacnek kuhlwacng. Ke sie mwe puhpuhlyuck, oasr pacl se ma el tuh sramsram nuh sin sie muhtwacn suc tuhkuh in ut kof ke luhf in kof se ke city Sychar. (John 4:5-30) Jesus el oacyacpac sramsram nuh sel Matthew Levi, sie mwet suc esacni tax, ac el solwacl in eklac mwet tuhma lutlut lal. Matthew el insese kac ac tok, el solwacl Jesus ac mwet sahyac nuh ke lohm sel uh in wi mongo. In acn se ingacn, Jesus el sramsram nuh sin mwet pucspucs.​—Matthew 9:9; Luke 5:27-39.

⁹ Jesus el oacyacpac sramsram ke inkacnek kuhlwacng nuh sel Nathaniel, el finne fahk ma tiac wo ke mwet Nazareth. Ke srihpen inkacnek kuhlwacng ma Jesus el orekmakihn ac sramsram nuh sel, Nathaniel el ekuhllah nuhnak lal kacl Jesus, suc ma Nazareth. Ac Nathaniel el luhngse in etuh yohk kacl Jesus. (John 1:46-51) Ke mwe srihkasrak lal Jesus, kuht lotwelah lah ke pacl kuht sramsram nuh sin mwet ke inkacnek kuhlwacng ac wo, eltahl ac engankihn in lohng ke ma kuht fahk uh.^[2] (Liye endnote.) Ke pacl se kuht ahkpahye mwet sasuc uh in sramsramkihn inkacnek ohinge, eltahl ac engankihn orekma in luti uh yohk liki na meet ah.

10-12. (a) Fuhkah Jesus el ahkkweye luhngse ma mwet sahyac uh ahkkahlwemye ke pweng wo uh? (b) Kuht ac kahsruh fuhkah mwet lili sasuc uh in ahkwoye inkacnek in luti laltahl ke ma pwacye ke Bible uh?

¹⁰ Lotwelos nuhkewa suc luhngse in lohng. Jesus el arlacna kahfofo. Tuhsruhktuh, ke pacl se mwet uh luhngse in lohngohl, el sislah pacl lal yohrohltahl ac lotweltahl ke ma pucspucs. Ke sie mwe puhpuhlyuck, sie lwen ah oasr un mwet se tuhkweni nuh ke lihkihn pot uh in lohng ke Jesus el oruh sramsram lal. Na, Jesus el sroacng nuh fin oak uh weluhl Peter ac muhtwacwacack in luti nuh sin mwet uh. Tukun ma inge, el luhngse pac in lotwel Peter ke sie mwe lutlut. Jesus el orek mwenmwen ke el oruh tuh Peter elan kuh in sruokyac ik puhkantwen. Na, el fahk nuh sel Peter: “Ingelac kom ac fah mwet koa mwet.” Tiac paht tohkoh, Peter ac mwet suc weluhl ah “amackuhnwack oak uh nuh weacn ah, fihliyac ma nuhkewa, ac fahsr tohkohl Jesus.”​—Luke 5:1-11.

¹¹ Nicodemus el luhngse pac in eis etwacack yohk sel Jesus. Tuhsruhktuh, ke srihpen Nicodemus el wi ke Sanhedrin, el sahngweng ke ma mwet sahyac uh fahk eltahl fin liye ke el sramsram nuh sel Jesus. Pwacnacng, el som muhtwacta yohrohl Jesus ke fong. Jesus el tiac fohlohkohnuhllah, a el sislah pacl lal nuh sel in ahkuhtweyac ke ma pwacye suc yohk srihpac nuh sel. (John 3:1, 2) Ke pacl nuhkewa, Jesus el inse muhlahlah in orekmakihn pacl lal in luti mwet uh ke ma pwacye ac ahkkweye luhlahlfongi laltahl uh. Ke inkacnek se pacna inge, kuht enenuh in inse muhlahlah in muhtwacta nuh yurin mwet ke pacl ma wo nuh seltahl. Ac kuht enenuh pac in oraclah pacl nuh seltahl in kahsreltahl in kahlwem ke Bible uh.

¹² Ke pacl se kuht orekma wi mwet sasuc uh, kuht kuh in lotweltahl in fohlohk nuh yurin mwet suc ahkkahlwemye luhngse in sifwil sramsram nuh seltahl. Kuht kuh pac in suli mwet sasuc in wi kuht nuh ke kuht sifwil fohlohk nuh yurin mwet ac lutlut Bible. Ke inkacnek ohinge, eltahl ac lotwelah fuhkah in luti mwet sahyac ac kuh in puhla woiyac in kahsruh mwet inge in lotwelah ma pwacye kacl Jeova. Na, mwet sasuc inge ac rahrahlac in sifwil muhtwacta nuh yohrohltahl ac lutlut Bible nuh seltahl. Eltahl ac oacyacpac lotwelah in mongfihsracsr ac tiac sa na in fuhlweack ke eltahl tiac kuh in sifwil konwacack mwet ke lohm seltahl uh.​—Galatia 5:22; liye pohk se inge, “El Tiac Fuhleack.”

AHKPAHYE MWET SASUC IN KUHLWACNSUHPUH MWET LILI WIACLTAHL

13, 14. (a) Meac kom nuhnkuh ke mwe srihkasrak in Bible ke mwet suc kihsackuhnlah moul laltahl ke mwet sahyac uh? (b) Ke inkacnek pucspucs fuhkah kom kuh in ahkpahye mwet lili sasuc ac mwet fuhsr uh in ahkkahlwemye luhngse nuh sin mwet lili wiyacltahl uh?

¹³ Jeova el luhngse mwet kuhlwacnsap lal uh in luhngse sie sin sie oacna mukul ac muhtwacn lili ac in kuhlwacnsuhpuh sie sin sie. (Riti Luke 22:24-27; Sie Peter 1:22.) Bible uh ahkuhtweyac lah Jesus el sang ma nuhkewa lal, wekuhnacng moul lal in kahsruh mwet sahyac uh. (Matthew 20:28) Dorcas “el sesseslah na ke orekma wo ac mwe pahkomuhta.” (Orekma 9:36, 39, BMK) Mary el “orekma yohk” nuh sin mwet lili wiyacl fin acn Rome. (Rome 16:6, BMK) Kuht ac kuh in kahsruh fuhkah mwet lili sasuc uh in kahlwem kac lah arlacna yohk srihpac in oruh ma wo nuh sin mwet lili wiyacltahl uh?

¹⁴ Kuht kuh in siyuck sin mwet sasuc uh in wi kuht ke pacl kuht muhtwacta nuh yurin mwet mahtuh kuh mwet suc mas. Ac ke pacl pahpah kuh ninac uh muhtwacta nuh yurin mwet inge, eltahl kuh in us tuhlihk nahtuhltahl in weluhltahl fin ma ac fal. Mwet elder uh kuh in siyuck sin mukul fuhsr kuh mwet lili sasuc uh in weluhltahl orekma eltahl fin ac enenuh in sang mongo nwacn mwet mahtuh inge kuh fin ac oasr orekma ma ac enenuh in orek nuh ke lohm seltahl uh. Ke pacl se mwet fuhsr kuh mwet lili sasuc inge liye lah kuht karihngihn sie sin sie, eltahl ac lotwelah pac in oruh oacpacna. Ke sie mwe puhpuhlyuck, ke pacl in luti uh orek ke acn ma oan srenglah uh, sie mwet elder el ac muhtwacta ke pacl nuhkewa nuh yurin mukul lili suc muhta ke acn inge in liye lah eltahl fuhkah. Oasr sie mukul lili fuhsr suc kwacna weluhl ac el lotwelah ke mwe srihkasrak luhn mwet elder se inge in nuhnkuh ke inkacnek ma el ac kuh in kahsruh mwet lili wiyacl uh kac.​—Rome 12:10.

15. Efuh kuh yohk srihpac mwet elder uh in ahkkahlwemye pwacr lal nuh ke kapkapwack luhn mukul lili ke congregation uh?

¹⁵ Jeova el sang kunohkohn nuh sin mukul in luti ke Kahs luhn God ke congregation uh. Pwacnacng, arlacna yohk srihpac nuh sin mukul lili in lotwelah in luti ke inkacnek wo ke pacl se ma eltahl oruh mwe sramsram laltahl uh. Kom fin mwet elder se, sahp kom kuh in lohng ke mwet suc kahsruh mwet elder uh el oruh ahkpah lal nuh ke mwe sramsram lal ac kahsrel in ahkwoye.​—Nehemiah 8:8.^[3]

16, 17. (a) Meac Paul el oruh in kahsrel Timothy ke kapkapwack lal uh? (b) Fuhkah mwet elder uh kuh in sang mwe ahkpah wo nuh sin mwet suc kuh in liyacacng congregation uh ke pacl fahsruh uh?

¹⁶ Oasr mwe enenuh nuh ke ahkpah nuh sin kuhtuh pac mukul lili in eklac mwet liyacacng ke congregation uh. Paul el ahkpahyacl Timothy ac ahkkweyacl in ahkpahye mwet sahyac uh. Paul el fahk: “Kom in ahkkweye kom ke luhng kuhlwacng suc ma lasr ke kuht kuhpahsryang nuh sin Christ Jesus. Eis mwe luti suc kom lohng sihk ke nga fahkwack ye muhtuhn mwet pucspucs, ac sang ma inge nuh sin mwet kom luhlahlfongi, suc fah kuh in luti pac nuh sin mwet ngiac.” (Luo Timothy 2:1, 2) Timothy el lotwelah ma pucspucs sel Paul, suc sie mwet elder ac mwet sap. Timothy el lotwelah in ahkwoye orekma in luti ac in kahsruh mwet sahyac ke congregation uh.​—Luo Timothy 3:10-12.

¹⁷ Paul el sislah pacl yohk lal yohrohl Timothy mweyen el ke etuh na pwacye lah Timothy el eis mwe ahkpah wo. (Orekma 16:1-5) Mwet elder uh kuh in etahel Paul ke pacl ma eltahl us mwet suc kahsruh mwet elder inge in weluhltahl ke eltahl oruh muhtwacta laltahl nuh yurin mwet lili in ahkkweyacltahl. Ke inkacnek se inge, mwet suc kahsruh mwet elder inge ac kuh in lotwelah seltahl ke inkacnek in luti mwet sahyac, in ahkkahlwemye mongfihsracsr ac luhngse, ac in fihliyac luhlahlfongi laltahl nuh sin Jeova ke eltahl karihngihn mwet in congregation uh.​—Sie Peter 5:2.

YOHK SRIHPAC IN SANG MWE AHKPAH

18. Efuh kuh yohk srihpac nuh sesr in ahkpahye mwet lili uh ke orekma in kuhlwacnsap laltahl nuh sin Jeova?

¹⁸ Ke lwen sahflah inge, puhs mwet sasuc suc enenuh in ahkpahyeyuck in ahkwoye inkacnek in luti laltahl uh. Oasr pac enenuh nuh sin mukul lili in etwaclah in karihngihn congregation uh. Jeova el luhngse mwet kuhlwacnsap nuhkewa lal uh in eis mwe ahkpah wo, ac el use nuh sesr kunohkohn in kahsruh mwet sasuc inge. Pwacnacng, in oacna ke Jesus ac Paul eltahl oruh, arlacna yohk srihpac in kwacfeacng in ahkpahye mwet sahyac uh. Kuht enenuh in ahkpahye mwet pucspucs, ke srihpen srackna yohk orekma ma enenuh in orek meet liki na sahflah uh tuhkuh.

19. Efuh kom kuh in luhlahlfongi na pwacye lah kwacfeacng lom in ahkpahye mwet sahyac ke kuhlwacnsap laltahl nuh sin Jeova uh ac fah mwe insewowo nuh sum?

¹⁹ Kwacfeacng ac pacl yohk pa enenweyuck in ahkpahye mwet lili sasuc uh. Tuhsruhktuh, kuht etuh na pwacye lah Jeova ac Jesus eltahl ac fah kahsre kuht in etwaclah in ahkpahye mwet sahyac ke inkacnek se ma wo emeet uh. Kuht ac fah engan na pwacye ke kuht liye mwet suc kuht ahkpahye ke eltahl kwacfeacng in “orekma upac.” (Sie Timothy 4:10) Ke pacl se pacna ingacn, kuht enenuh in sang nohfohn kuhiyacsr in kapkapwack ke orekma in kuhlwacnsap lasr nuh sin Jeova uh, ahkwoye ohiyacsr oacna mwet Christian, ac in fototoyang nuh sin Jeova.