Loang Nu Ke Kas Palu Lun God
“A yurosr kas in palye su akpayeyuk tari; komwos oru mwo komwos fwin kurunganang ma inge.”—2 PITER 1:19.
1, 2. Kain in me srikasrak fuka ke messaia kikiap kom ku in sromon?
KE lusen century puspis, messia kikiap puspis elos srike in palye ke ma sikyuk ke pal fwasru. Ke century aklimekosr C.E., sie mokul su pangnol sifwanu Moses el oru met Ju ke tuka lun Crete in lalalfongi la el pa messaia a mwolela nu selos la el akola in aksukosokyelos ke ma upa a keok. Ke len in molela lalos su el mwolela, elos fwasr tokol ke sie an fulat su elos ku in ngeti nu ke Mwea lun Mediterranean. El fwak nu selos la elos enenu in oatula nu in mwea, a kofu fwa fwasrelik. Un met puspis su oatula nu ke kofu elos walomla, a messaia kikiap inge el kaengla.
2 Ke century ak 12, sie “messia” sikyuk fwin an Yemen. Caliph, ku met kol we, elos siyuk sel in akkalemye akul la el pa messaia. “Messiah” se inge el kaifwe nu sel Caliph in tala sifwel. El palye ke sifwil moulyuk lal oanu pa inge akul. Caliph el insese ke plan lal—a pa inge saflaiyen “messaia” inge.
3. Su Messaia na paye, a mea orekma lun forfor lal el akpayeye?
3 Messaia kikiap a kas palu lalos wangin sripe, tusruktu in loang yok ke kas palu lun God tia ku in kol nu ke me asor. Messaia paye, Jisus Kraist, pa me akpayeye moul lun kas palu puspis lun Baibel. Ke sie me pupulyuk ke pal se el orekmakin kas palu lal Isaia, met sim lun Gospel Mattu el simusla: “Fwal sel Zebulon a fwal sel Naftelai, su on sisken mwea, a lefwalwalung Jordan, Galili lun met Pegan! Met su muta in losu elos liye kalem lulap, a elos su muta in an a ngunin mise, kalem sikyuk nu selos.’ Tokin pal se inge Jisus el mutamwauk in luti, a in fwak: ‘Komwos auliyuk, tu togusrai in kosrao apkurun me.’ ” (Mattu 4:15-17; Isaia 9:1, 2) Jisus pa “kalem lulap” inge, a orekma lun forfor lal me akpayeye la el pa Met Palu su Moses el palye. Elos nu kemwa su srunga in porongo Jisus elos fwa kunausyukla.—Duteronomi 18:18, 19; Orekma 3:22, 23.
4. Fuka Jisus el akpayeye Isaia 53:12?
4 Jisus el ouyepa akpayeye kas palu lun Isaia 53:12: “El okaot ngunal nu ke mise, a oaoala yurin met koluk; a el wis ma koluk lun met puspis, a orek iumwe nu ke met koluk.” Meyen el etu la el e sang moul lal oanu me lango ke pal na futoto, paenang Jisus el akkeye lalalfongi lun met tumal lutlut lal. (Mark 10:45) El oru ou inge ke inkanek usnguk lulap ke inkanek lun ekla lal ye mutalos.
Ekla Lal Ye Mutalos Akkeye Lalalfongi
5. Ke kas lom sifwanu, fuka kom ku in aketeye ekla lun Jisus ke arurumu?
5 Ekla lal ye mutalos sie me akpayeye nu ke kas palu. Jisus el fwak: “Tu Mwen nutin met fwa tuku in mwolanu lun Papa tumal wi lipufon lal . . . Payenu Nga fwak nu sumwos, oasr kutu selos su tu inge, su fwa tia pulakin mise, nu ke pal elos liye Mwen nutin met tuku in togusrai lal.” (Mattu 16:27, 28) Ya kutu sin met tumal lutlut lun Jisus elos liye na paye tuku lun Jisus in togusrai lal? Mattu 17:1-7 el fwak: “A tokin len onkosr Jisus el esal Piter, a Jemes, a Jon met lel, oelul a wiselosyuk nu fwin eol fulat muku. A ekla ye mutalos.” Sie ma sikyuk sakuruk pa inge! “A mutal saromromla oanu fwatu, a nuknuk lal fwosfwosr oanu kalem. A liye, Moses a Elaija eltal sikme nu yurolos, a kaskas nu sel.” Ouyepa, “sie pukunyeng saromrom sunelosi,” a elos long pusren God su fwak: “‘El inge Mwen kulu nutik, a Nga insemwomwo kel; komwos longol,’ a ke met tuma lutlut elos long, elos fwaksifwe, a arulanu sangeng. A Jisus el tuku a kalelosi a fwak, tukakek a nikmet sangeng.’ ”
6. (a) Efu Jisus el pangon ma sikyuk inge oanu arurumu se? (b) Ekla lal inge ke arurumu el pitse nu ke mea?
6 Ma sakuruk inge sikyuk ke sie an fwin Eol Hermon, an se su Jisus a met sap tolu lal elos muta fong fon se we. Kalem la ekla lal sikyuk ke eku, oru ma inge in arulanu kalem ke mutan met. Sie sripe la efu Jisus el pangon ma inge arurumu meyen Moses a Elaija su mise tari ke pal loeloes elos wanginla. Jisus mukena pa oasr na paye. (Mattu 17:8, 9) Kain in arurumu se inge orala nu sel Piter, Jemes, a Jon sie pitse ke tuku mwolanu lun Jisus in Togusrai lal. Moses a Elaija elos pitse nu ke met akmusrala su akola in welul Jisus in kol, a arurumu se inge sang me akpayeye fukoko ke me sramsram lal ke Togusrai a ke kolyuk lal oanu sie Togusra.
7. Efu kut ku in etu la Piter el tia mulkunla ekla lun Jisus ke arurumu?
7 Ekla lal inge sang kasru in akkeye lalalfongi lun met sap tolu su akola in orekma yok ke congregation lun met Kristian. Saromrom lun mutal Kraist a nuknuk lal su fwosfwos, a pusren God su fwak la Jisus pa Mwen Kulu Nutul su met kulansap nu kemwa enenu in long—ma inge nu kemwa orekla fwal nu ke kalme la. Tusruktu met sap elos tia enenu in srumon arurumu se inge nu sin kutena met nu ke pal Jisus el sifwil moulyuk. Tokin yiu 32 kutu, arurumu se inge srakna kalem ke nunuk lal Piter. In sramsramkin ma inge a sripe saok lal, el simusla: “Tu kut tia etawi sramsram mwesral tia paye, ke kut fwakak nu sumwos ku a tuku lun Leum lasr Jisus Kraist, tu kut met lo su liye mwal lal. Tu el eis sin God Papa akfulatye a mwolanu, ke pusra se su tuku sin el su mwal lun mwolanu: ‘El inge mwen kulu nutik, Nga insemwomwo kel.’ A pusra se inge kut sifwanu long tuku in kosrao me, ke kut oelul fwin eol mutal.”—2 Piter 1:16-18.
8. (a) Ma God el fwak ke Mwen nutul el sramsram yok ke mea? (b) Pukunyeng su sikyuk ke pal in arurumu el akkalemye mea?
8 Ma saok se emeet pa ma God el fwak: “Pa inge Mwen Kulu Nutik, a Nga insemwomwo kel; komwos longol.” Kas se inge el sramsram yok kel Jisus oanu Togusra su God el pakiye, su oasr kunokon lun met nu kemwa in aksol. Pukunyeng’u akkalemye la akpayeye lun arurumu se inge tia ku in liyeyuk ke muta. Ma inge ku in akilenyuk mukena ke mutan kalem lun met nu kemwa su akilen “akul” ke oasr tari lun Kraist ke ku lal in Togusrai. (Mattu 24:3) Ke ma paye, kas lun Jisus in tia akkalemye arurumu se inge nu sin kutena met nu ke na el sifwil moulyuk akkalemye la mwal a mwolanu lal e fwa tuku tokin sifwil moulyuk lal.
9. Efu ekla inge ke arurumu enenu in akkeye lalalfongi lasr?
9 Tokin el sramsram ke ekla, Piter el fwak: “A yurosr kas in palye su akpayeyuk tari; komwos oru mwo komwos fwin kurunganang ma inge, oanu kalem su koflauk in losr, nu ke lenelik, a niesran el sikyuk insiomwos. A komwos etu ma inge meet, tu wangin kas in palye in Baibel tuku sin lalmetmet lun met. Tu wangin kas in palye tuku ke ku lun met, a met elos fwak sin God me ke ngun mutal akkaskasyelos.” (2 Piter 1:19-21) Ekla inge arulanu akkeye lalalfongi nu ke kas palu lun God. Kut enenu in loang nu ke kas inge a tia ke “sramsram mwesral tia paye” su wangin me akkeye mutal ku insemwomwo lun God. Lalalfongi lasr ke kas palu enenu in akkeyeyuk ke ekla se inge meyen arurumu se inge el pitse nu ke mwolanu lun Jisus a ku lun Togusrai su arulanu paye. Aok, oasr yurosr me akpayeye la Kraist el oasr tari ke len inge oanu sie Togusra fukoko in kosrao.
Fuka Niesran El Sikyuk
10. Su a mea “niesran” inge su Piter el fwak, a efu pa inge top lom?
10 Piter el simusla: “Komwos oru mwo komwos fwin kurunganang ma inge [kas palu] oanu kalem su koflauk in losr, nu ke lenelik, a niesran el sikyuk insiomwos.” Su inge ku mea se inge “niesran”? Kas se inge “niesran” el sikyuk pal siefwunnu in Baibel, a kalmen ma se inge el oanu sie nu ke kalmen “itue in lututeng.” Fwakyuk 22:16 el pangpang Kraist “niesran saromrom.” Ke kutu pulanpal lun yiu, kain in itue inge pa itue safla su sikyuk ke eastern horizon. Elos sikyuk meet liki fwat el takak, a ke ma inge elos sulkakin mutamweyen len sasu. Piter el orekmakin kas se inge “niesran” in sramsramkin Jisus tokin El eis ku lal in Togusrai. Ke pal inge, Jisus el sikyuk in kosrao a fwalu! Oanu niesran Messaia, el sulkakin mutamweyen len sasu, ku pal sasu, nu sin met nu kemwa su akos.
11. (a) Efu 2 Piter 1:19 el tia akkalemye la “sie niesran” sikyuk ke inse na paye lun met se? (b) Fuka kom ku in aketeye 2 Piter 1:19?
11 Met leng puspis elos nunku mu kas lun met sap Piter su simusyukla in 2 Piter 1:19 el sramsram ke heart na paye lun metu. Toasr lun Heart lun sie met matu ku in oasr ke ounce 9 nu ke 11. Fuka Jisus Kraist—su ingenu sie ma orekla mwolanu in ngun in kosrao—ku in sikyuk ke ip srisrik inge ke monin met? (1 Timote 6:16) Paye, insiesr ke kas pupulyuk oasr ip yok lal ke ma se inge, meyen ke ma inge kut loang nu ke kas palu lun God. Tusruktu, loang mwo ke 2 Piter 1:19, a kom ku in liye la New World Translation el orekmakin comma in srelik parenthetical phrase inge “nu ke lenelik a niesran el sikyuk” ke kas in fus meet liki kas inge a ke kas se inge “insiomwos.” Fus inge ku in akkalemyeyuk ke kas inge: ‘A yurosr kas in palye su akpayeyuk tari; komwos oru mwo komwos fwin kurunganang ma inge, oanu kalem su koflauk in losr, ke insiomwos, nu ke lenelik a niesran el sikyuk.’
12. Mea luman heart lun met nu kemwa, tusruktu mea ma inge su arulanu paye nu sin met Kristian paye?
12 Mea luman inse ke kas pupulyuk lun met nu kemwa fwin fwalu? Aok, insielos oan in losr! Tusruktu, kut fwin met Kristian paye, oanu oasr kalem ke insiesr, a tia losr. Oanu kas lal Piter el akkalemye, ke inkanek in loang mukena ke kas palu lun God su sang kalem met Kristian paye elos ku in akola a eis etauk ke kalmelik lun len sasu se. Elos fwa kalem ke me akpayeye ke sikyuk lun niesran, tia ke insien metu na paye, a nu sin ma orekla nu kemwa.
13. (a) Efu kut ku in fwak na paye la Niesran el sikyuk tari? (b) Efu met Kristian elos ku in muteng ke luma upa su Jisus el palye mu sikyuk ke len lasr?
13 Niesran el sikyuk tari! Kut ku in lalalfongi na paye ka ke kut loang nu ke kas palu lulap lun Jisus ke oasr tari lal. Ke len inge, kut liye na paye me akpayeye ke ma inge oanu meun lulap, sral, kusrusr, a orekma in luti ke peng mwo fwin fwalu nu fon. (Mattu 24:3-14) Fwinne luma upa su Jisus el palye sun kut pa oanu met Kristian, tusruktu kut ku in muteng in misla a insemwomwo. Efu? Meyen kut loang nu ke kas in palu la a oasr lalalfongi lasr ke ma el mwolela ka ke pal fwasru. Kut etu la arulanu futoto na paye nu ke pal inge, meyen kut oasr tari ke saflaiyen “len safla”! (Daniel 12:4) Fwalu se inge oasr ke ma upa na paye su Isaia 60:2 el palye: “Tu, liye, losr a fwa afwunye fwalu, a losr matoltol mutanfwalu.” Sie met el enenu in loang akmwoye ke insie pusisel nu ke kas palu lun God ingenu, meet liki patla ma nu kemwa. Metu su oasr inse pusisel la elos enenu in forla nu sin Jeova God, el su Sropon moul a kalem. (Sam 36:9; Orekma 17:28) Fwin oru ou inge mukena pa e ku in sang kasru nu sin met su oasr kalem paye a fwinsrak paye la in engunkin pal fwasru mwolanu su God el akola nu sin met fwokpap.—Fwakyuk 21:1-5.
“Kalem Summa nu Fwalu”
14. Mea kut enenu in oru in liye akpayeyen kas palu mwolanu lun Baibel?
14 Ma Simusla akkalemye na paye la Jisus Kraist el mutamwauk ingenu in kol oanu Togusra. Ke sripen el mutamwauk in kol ke 1914, paenang srakna oasr kas palu mwolanu su e fwa akpayeyuk. In liye akpayeyen ma inge, Kut enenu in sang me akpayeye la kut met fwokpap a akkalemye lalalfongi nu sin Jisus, su auliyuk liki orekma koluk, ma koluk su kut oru ke sripen nukin. Paye, elos nu kemwa su lungse losr elos tia eis moul ma patpat. Jisus el fwak: “A pa inge nununku, tu kalem summu nu fwalu, a met elos lungse losr yok liki kalem, tu orekma lalos koluk. Tu met e nu kemwa su orek ma koluk elos srunga kalem, a tia tuku nu ke kalem, saap kai orekma lalos. A el su orek ma paye el tuku nu ke kalem, tu in kalem orekma lal, tu orek in God.”—Jon 3:19-21.
15. Mea sikyuk kut fwin pilesru molela su God el orekmakin ke inkanek lun Mwen nutul?
15 Kalem in ngun summu nu fwalu ke inkanek lun Jisus, a in porongel arulanu yok sripe. Poul el simusla: “God, su kaskas meet nu sin papa tumasr yurin met palu in tafwu puspis, tia oanu sie, a in oiye puspis tia oanu sie, in saflaiyen len inge el kaskas nu sesr ke Mwen nutul, su el filiye met usru lun ma nu kemwa.” (Hibru 1:1, 2) Mea sikyuk kut fwin pilesru mwolela su God el orala ke inkanek lun Mwen nutul? Poul el tafwela in fwak: “Tu kas su lipufon elos fwak, fwin tu kuna, a ma koluk nu kemwa a seakos eis me mol fwal nu ke kas lalos; fuka kut ku in kaengla, kut fwin pilesru lango lulap ou inge su ke Leum el fwak meet, a elos su long elos akpayeye nu sesr, God el ouyepa welulos orek ma lo, ke akul a menmen, a ke ku puspis, a ke me sang lun ngun mutal, fwal nu ke lungse lal?” (Hibru 2:2-4) Aok, Jisus pa sifwen orekma in sulkakin kas palu.—Fwakyuk 19:10.
16. Efu kut ku in lalalfongi na paye ke kas palu nu kemwa lun Jeova God?
16 Oanu ma akkalemyeyuk tari, Piter el fwak: “Tu wangin kas in palye tuku ke ku lun met.” Met el tia ku in orekmakin kas in palu paye, tusruktu, kut ku in lalalfongi ke mwolela nu kemwa lun God. Meyen ma inge tuku na paye sin Jeova. Ke inaknek lun ngun mutal el oru met kulansap lal in kalem ke kas in palu lun Baibel su akpayeyuk tari. Paye fwal kut in sang kulo nu sin Jeova meyen kut liye akpayeyen kas in palu puspis inge su mutamwauk in yiu 1914. A kut ku in lalalfongi na paye la kas in palu lula nu kemwa ke saflaiyen akmwuk koluk inge e fwa akpayeyuk. Arulanu yok sripe kut in loang pal nu kemwa nu ke kas in palu mutal a in pal sanna kut lela kalem lasr in tolak. (Mattu 5:16) Arulanu yok kulo lasr nu sin Jeova meyen el lela ‘kalem lal in sikyuk in losr’ su afwunye fwalu misinge!—Isaia 58:10.
17. Efu kut enenu kalem in ngun su tuku sin God?
17 Kalem ku in kasru kut in liye. Ma inge sang kasru pa ke kapek lun fwokinsak su ase nu sesr kain in me mongo puspis. Kut tia ku in moul fwin wangin kalem. A fuka kalem in ngun? Ma inge ase nu sesr kol a akkalemye nu sesr ma pal fwasru oanu Kas lun God, ku Baibel el palye. (Sam 119:105) Jeova el kulang in “supwela kalem lal a paye lal.’ (Sam 43:3) Paye kut enenu in akkalemye kulo yok ke kain in me sang inge. Ke ma inge lela kut in kaifweung in oru ma nu kemwa in eis kalem lun “etauk lun mwolanu lun God,” tu lan tolak nu ke insiesr ke kas pupulyuk.—2 Korint 4:6; Efesus 1:18.
18. Mea Niesran lun Jeova akola in oru ke pal inge?
18 Yok na paye me insemwomwo lasr in etu la ke 1914, Jisus Kraist, el su Niesran, el sikyuk tari in kosrao a fwalu in akpayeye arurumu ke ekla lal! Niesran lun Jeova oasr tari, akola in oru akmwuk lun God in akpayeye kutupa ipen ekla lal ke arurumu—“meun lun len lulap lun God Ku Liki Ku.” (Fwakyuk 16:14, 16) Tokin kunanela lun akmwuk matu inge, Jeova el fwa akpayeye mwolela lal ke “kosrao sasu a fwalu sasu” sie an su kut ku in kaksakunul ma patpat oanu Leum Ku Liki Ku in kosrao a fwalu a God lun kas palu paye. (2 Piter 3:13) Nu ke pal lun len lulap inge, lela kut in kaifweung in fwasr ke kalem mutal ke kut loang nu ke kas palu lun God.
Fuka Kom Ku In Topuk?
• Fuka kom ku in aketeye ekla lal Jisus ke’ arurumu?
• Fuka ekla lun Jisus ke arurumu musaiyuk lalalfongi?
• Su ku mea se inge Niesran lun Jeova, a nge el sikyuk?
• Efu kut enenu in loang mwo ke kas palu lun God?
[Picture on page 21]
Ya kom ku in aketeye ma saok lun ekla lal Jisus ke arurumu?
[Pictures on page 23]
Niesran el sikyuk tari. Ya kom etu fuka a nge?