Kas lun Jeova el Moul
Kas Fulat su Tuku ke Leta lal Jemes a lal Piter
APKURAN nu ke yea 30 tokin Pentecost 33 C.E., met tuma lutlut Jemes, tumalel se wiyel Jisus el simusla leta se nu sin “sruf sengoul” lun met Israel lun God. (Jemes 1:1) Mea niyen sun lal? In kaifwelos in tu ku ke lulalfongi lalos a in akkalemye mongfusesr fwin oasr ma upa puspus. El simusla pa ke kas in kai in aksumwosye ma upa puspus su oasr ke congregation puspus.
Meet liki pal in orekma lal Emperor Nero lun an Rom in kalyai met Kristian in yea 64 C.E., met sap Piter el simusla leta se meet lal nu sin met Kristian nukewa, a el akkeyelos in tu na ku ke lulalfongi lalos. Ke leta akluo lal, su simusyukla tia pat tokin leta se meet lal, Piter el akkeye met lili wiyel in loang akmwoye nu ke kas lun God a sang kas in sensen nu selos ke len lun Jeova su apkurun. Aok, kut ku in eis me insemwomwo yok kut fwin loang akmwoye nu ke kas mwomwo ke leta lal Jemes a lal Piter.—Hibru 4:12.
GOD EL SANG LALMETMET NU SELOS SU “SIYUK KE LULALFONGI”
“Insemwomwo met se su muteng ke srifweyuk, tu ke akpayeyuk tari el a fwa eis tefuro lun moul,” Jemes el simusla. Nu selos su “siyuk ke lulalfongi,” Jeova el sang etauk su eneneyuk in muteng ke ma upa puspus ku me srufwe.—Jemes 1:5-8, 12.
Lulalfongi a etauk eneneyuk nu sin met puspus su srusrngiyuki oana “met luti” ke congregation. Tokin el akkalemye la loa el “sie loa srisrik” su ku in ‘akfokfokye mano nufon,’ Jemes el sang kas in sensen ke oiya koluk puspus su ku in kunausla fototo lun sie met nu sin God. El simusla pa ke inkanek puspus su ku in orekmakinyuk nu sin kutena met su oru ma koluk tu elan ku in sifwil akmwoye fototo lal nu sin God.—Jemes 3:1, 5, 6; 5:14, 15.
Kusensiyuk Puspus Ke Ma Simusla Eis Top Ka:
2:13—Ke inkanek fuka ‘pakoten el engunak in kutangla nununku’? Ke pal su God el fwa nununke kut, el nunke kut pa kut fwin akkalemye pakoten nu sin met puspus a el ase nunak munas nu sesr fwal nu ke me kise lun lango lun Mwen natul. (Rom 14:12) Aok pa inge sripe mwomwo se su kut ku in akkalemye yok ke pakoten nu ke moul lasr.
4:5—Ma simusla fuka Jemes el orekmakin ke fus se inge? Jemes el tia orekmakin kutena fus. Tusruktu, kas inge su tuku sin God saap el fwal nu ke kas mwomwo su oasr in Genesis 6:5; 8:21; Soakas 21:10; a Galetia 5:17.
5:20—“El su akauliyeuk sie met koluk liki tafongla lun innek lal” fwa molela moul lun su liki mise? Sie met Kristian su kasru sie met in forla liki inkanek koluk lal el kasru met inge in akmwoye fototo lal nu sin God a el molela moul lal liki kunausla ma patpat. Met se su sang kasru nu sin met su orekma koluk el “afwunye ma koluk puspus lal.”
Me Lutlut Nu Sesr:
1:14, 15. Ma koluk el tuku ke nunak a kena koluk. Ke ma inge kut tia enenu in nunku pal nukewa ke kena koluk. A, kut enenu in “kafweang in nunku” ke me akkeye puspus a nekla insiesr a nunak lasr ke ma mwomwo puspus inge.—Filippai 4:8.
2:8, 9. Orekma in srisri met ku “wiwikas” el lain “masap fulat” nu ke lungse. Ke ma inge, met Kristian paye elos tia enenu in “wiwikas” ku srisri met.
2:14-26. Kut “langoyukla . . . ke lulalfongi,” “tia ke orekma” ke Masap lal Moses ku ke orekma lasr oana met Kristian. Lulalfongi lasr el enenu in yok liki ma kut fwak fwin kut fwak mu kut lulalfongi ke God. (Efesus 2:8, 9; Jon 3:16) Lulalfongi el akkeye kut in akfwalye orekma lasr nu ke ma lungse lun God.
3:13-17. “Lalmetmet lung me” el mwo liki lalmetmet lun “fwalu, ou lungse koluk, a oana devil”! Kut enenu in ‘kafweang in suk ke etauk lun God oana ma saok lukma.’—Soakas 2:1-5.
3:18. Futen peng mwo lun Togusrai enenu in “eoki tari in misla nu selos su orek misla.” Arulanu yok sripe kut fwin orek misla pal nukewa a in tia insefulat, lungse in orek akukuin, ku lungse in orek anwuk.
‘TU NA KU KE LULALFONGI’
Piter el akesmakinye met lili nukewa wiyel ke “fwinsrak lun moul” ke me usru in kosrao. “A komwos ‘fwil sulela, met tol leum, mutanfwal mutal,’” Piter el fwak nu selos. Tokin el sang kas in kai nu selos ke oiyen pusisel, el kaifwelos in “nunak sefwanna . . . in pakoten sie sin sie, lungse oana met lili, fusrasr inse, fulpap in nunak.”—1 Piter 1:3, 4; 2:9; 3:8.
“Tu safla lun [akwuk puspus lun met Ju] ma nukewa apkurun me,” Piter el sang kas in kasru nu sin met lili nukewa elos in ‘nunak sumwos a sano ke pre.’ El fwak pa nu selos: “Komwos in efwal, komwos in sano . . . Komwos in tu ku, a sinukunul [Setan] in lulalfongi.”—1 Piter 4:7; 5:8, 9.
Kusensiyuk Puspus Ke Ma Simusla Eis Top Ka:
3:20-22—Ke inkanek fuka baptais el molikutla? Baptais el eneneyuk nu sin met nukewa su suk ke molela. Tusruktu, baptais mukena tia ku in molikutla. Molela el ku in akpayeyuk “ke sifwil moulyuk lun Jisus Kraist.” Met su fwal in eis baptais el enenu in lulalfongi la molela el ku ke sripen Jisus el mise oana sie me kise, el akmoulyeyukyak, a el “muta lepo leyut sin God,” a oasr ku lal nu sin met moul a met mise. Baptais su fwal nu ke kain in lulalfongi inge el petsaiyukla nu ke ‘met oalkosr moliyukla liki kofu.’
4:6—Su “met mise” su “mwosasu lutiyuk”? Oasr met puspus su ‘mise ke sripen ma sito a in ma koluk,’ ku met puspus su tia kulansap nu sin Jeova, meet liki elos long ke peng mwo. (Efesus 2:1) Tusruktu, tokin elos lulalfongi ke peng mwo, elos mutamwauk in “moul” ke sripen ingena oasr fototo mwomwo lalos nu sin God.
Me Lutlut Nu Sesr:
1:7. Kut fwin lungse lulalfongi lasr in arulanu mwo, enenu kut in akpayeye, a in srikeyuk ma inge. Kain in lulalfongi fukoko inge ku in ‘molela moul lasr.’ (Hibru 10:39, New World Translation) Kut tia enenu in tapulla fwin lulalfongi lasr srikeyuk.
1:10-12. Lipufan elos lungse in liye a eis etauk ke ma loal puspus lun God su met palu puspus in pal meeta elos simusla ke congregation lun met Kristian akmusrala. Tusruktu, ma nukewa inge el akkalemyeyuk mukena ke pal se Jeova el mutamwauk in orekmakin congregation. (Efesus 3:10) Ya kut tia etawi me srikasrak lun lipufan puspus a kafweang in suk ke “ma loal puspus lun God”?—1 Korint 2:10.
2:21. In etawi Jisus Kraist, su Met Srikasrak mwomwo lasr, kut enenu pa in akkalemye inse misla in pal in keok nu ke mise tu kut fwa ku in sang me kasru in akpayeye sumwos lun Jeova in kol.
5:6, 7. Kut fwin filiye me sensen nukewa ku me toasr lasr nu sin Jeova, el kasre kut in oru meet ke moul lasr akwuk nukewa ke alu paye a tia fosrnga yok ke len tok a.—Mattu 6:33, 34.
“LEN LUN JEOVA FWA TUKU”
“Tu wangin kas in palye tuku ke ku lun met, a met elos fwak sin God me ke ngun mutal akkaskasyelos,” Piter el simusla. Kut fwin loang akmwoye nu ke kas palu fwa ku in karungin kut liki “met luti kikiap” a kutupa met koluk.—2 Piter 1:21; 2:1-3.
“Tu in len safla met aksruksruk, a fwa tuku in aksruksruke,” Piter el fwak. Tusruktu, “len lun Jeova a tuku oana met pusrapasr.” Piter el aksafyela leta lal ke inkanek lun kas in kasru nu selos su ‘sano a tawi ke tuku lun len sa.’—2 Piter 3:3, 10-12.
Kusensiyuk Puspus Ke Ma Simusla Eis Top Ka:
1:19—Su “niesran” ku itu ke len, ngea el tolak, a kut etu fuka la ma inge sikyak tari? “Niesran” pa Jisus Kraist tokin el ekla togusra ke Togusrai lun God. (Fwakyuk 22:16) In yea 1914, Jisus el sikyak ke ma orekla nukewa ke Togusrai lun Messaia ke el akkalemye ke luma se su lumeyuk oana lenelik lun len sasu. Aruruma ke ekla lun Jisus el akkalemye ke ma se su fwa sikyak ke pal fwasru ke mwolanu a ku lun Jisus ke Togusrai lal, su akkalemyeyuk yok ke kas palu nukewa lun God la el akpayeyuk pal nukewa. Kut fwin loang akmwoye nu ke kas inge fwa ku in tolak insiesr, a ma inge oru kut in etu la Niesran ku itu ke len el sikyak.
3:17—Mea Piter el lungse in akkalemye ke kas inge “etu ma inge meet”? Piter el sramsramkin ke etauk lun ma puspus su fwa sikyak ke pal fwasru, su itukyang nu sel a nu sin met sim puspus saye lun Baibel ke kasru lun God. Ke sripen ma inge el tia etauk yok ke ma su fwa sikyak, paenang fwinne oasr etauk lalos ka ma inge tia oru elos in etu ma nukewa su fwa sikyak ke pal fwasru. Elos etu a kalem ke kutu ma su ku in sikyak.
Me Lutlut Nu Sesr:
1:2, 5-7. Kafweang yok lasr in akkeye oiya mwomwo su oana lulalfongi, mongfusesr, a lungse yok nu sin God ku in kasre kut in “yokelik . . . in lalmetmet lun God a Jisus.” A ma inge ku in kasre kut in moniyuk ke orekma a isus fwako mwomwo puspus ka.—2 Piter 1:8.
1:12-15. Kut enenu kas in esmakin pal nukewa, in kasre kut in “tu ku in ma paye,” oana ke ma kut long a eis ke inkanek lun meeting nukewa lun congregation, lutlut lasr sifwana, a ke akwuk lasr in ridi Baibel.
2:2. Kut enenu in taran oiyesr a ella lasr in tia akkolukye Jeova a u lal.—Rom 2:24.
2:4-9. In fwal nu ke ma el orala tari in pal meeta, kut ku in lulalfongi la “Jeova el etu fuka in eisla met mwo liki me srifwe, a srukye met tia sumwos on nu ke kaiyuk nu ke len in nununku.”
2:10-13. Saap oasr pal “met fulat a mwolanu,” su kalmekin nu sin met Kristian elder elos tafongla ku orala ma koluk, ne oinge kut tia enenu in fwakak kaskou kelos.—Hibru 13:7, 17.
3:2-4, 12. Kut fwin loang akmwoye nu ke “kas fwakak meet sin met palu mutal, a masap lun Leum a met Lango” fwa ku in kasre kut in loang akmwoye pal nukewa nu ke len lun Jeova su arulanu apkurun.
3:11-14. Kut nukewa su “sano a tawi ke tuku lun len lun God,” kut enenu in (1) ‘nasnas ke oiyesr,’ karungin oiyen nasnas pal nukewa ke manosr, nunak lasr, moul lasr a ke orekma nukewa lasr in kulansap nu sin God; (2) oru ma mwo puspus su akkalemye ‘moul mutal a sumwosmwos’ a lungse yok nu sin God, oana ke orekma in sulkakin peng mwo a oru met tuma lutlut; (3) in karungin oiyesr a ella lasr in “wangin tun,” nasnas liki ma fokfok lun fwalu; (4) in tia “kuiye,” oru ma nukewa ke inse nasnas; a (5) in orek “misla” nu sin God, nu sin met lili wiyesr, a nu sin met nukewa.