Report Ke Met Fwakelik Ke Togusrai
“Pukanten Ma Kom Etu ke Baibel”
KE pal se Jisus el yiu 12 matwe el pulaik in sramsram nu sin met kol lun alu fwin an Jerusalem in pal meeta, “elos nu kemwa su longol elos lut ke lalmetmet lal a topuk lal.” (Luk 2:47) Oupanu ke len inge, met kulansap fwusr puspis lun Jeova elos pulaiknu in sramsram nu sin met luti lalos a tulik lutlut wielos ke God a Baibel, a pal nu kemwa elos pulakin insemwomwo lulap.
Tiffany, su yiu 14 matwe, el wi sie class su sramsramkin kas palu lun Baibel ke wik 70 lun yiu, su ku in konoiyukyuk in Daniel 9:24-27. Met luti el sang kutu me akpayeye ke fus inge a el silaklak in aketeye ke inkanek futoto me sramsram inge.
Ke mutamwauk, Tiffany el alollo la el e srukak paol. “Tusruktu ke kutu sripe,” el fwak, “Nga nunku na paye meyen fus ke Baibel inge tianu aketeyuki mwo. Na Nga silaklak in srukak paok.” Met luti el lut meyen apkurun tulik lutlut nu kemwa elos tia kalem ka, a oasr met se su lungse in sramsram ke sifwe se inge.
Ke pal se el eis pal mwo in aketeye kas palu inge, Tiffany el tuyuk a sramsram ke impromtu. Ke el aksafyela sramsram lal, oasr misla lulap ke classrooom. Tiffany el sangeng kutu srisrik. Na class lal elos paspas ke lusen pal loeloes.
“Me purakak inse na paye pa inge, Tiffany, el arulanu mwo na paye,” met luti el fwak pal puspis. El fwak la el etu ke mutamwauk me la oasr pa aketeye saye ke fus inge, tusruktu Tiffany pa met se meet su aketeye ma inge nu sel in arulanu kalem. Ke saflaiyen class, el siyuk sel Tiffany la efu ku arulanu yok etu lal ke Baibel.
“Meyen Nga sie sin Met Lo lun Jeova,” el fwak. “Papa a nine kiuk elos aketeye nu sik meet kas palu se inge pal puspis meet liki Nga kalem ka na paye.”
Un tulik lutlut wiel elos ouyepa lut ke etu lal ke Baibel. Sie sin tulik lutlut el fwak nu sel Tiffany: “Ke pal inge Nga etu la efu komwos Met Lo lun Jeova som nu ke srungal nu ke srungal; meyen yok etauk lomwos ke Baibel.” Kutu tulik lutlut wiel elos mwolela la elos e tia sifwil angnol ke lalalfongi lal.
Ke pal se Tiffany el fwak nu sin papa a nine kiel experience lal, elos kaifwe nu sel in sang buk inge Etauk Su Ku In Kol Nu Ke Moul Ma Patpat nu sin met luti lal. Ke pal se oru ou inge a akkalemye nu sel me lutlut se su aketeye ke kas palu lal Daniel, met luti lal el eis buk inge a sang kulo nu sel ke ma se inge.
Paye, fwin met Kristian fwusr elos pulaik in sramsram ke ma papa a nine kielos luti nu selos ke God a ke Baibel, elos sang kaksak a akfulat nu sin Jeova a akinsemwomwoyelos sifwanu.—Mattu 21:15, 16.