Met Meun Lain God Fwa Tia Kutangla!

“A elos fwa anwuk lain kom, a elos fwa tia kutangkomla.”​—JEREMAIA 1:19.

1. Kain in kunokon fuka Jeremaia el eis, a luseka orekma lal?

JEOVA el pakiyel Jeremaia su srakna fwusr in ekla met palu lun mutanfwal nu kemwa. (Jeremaia 1:5) Ma inge sikyuk ke lusen pal in kolyuk lun Togusra mwomwo inge Josaia lun an Juda. Orekma in palye lal Jeremaia el tafwela nu ke pal in ma upa meet liki kutangla lun Babulon nu Jerusalem a pal in utukla lun met lun God oanu met kos in an saye.​—Jeremaia 1:1-3.

2. Fuka Jeova el akkeyel Jeremaia, a anwuk lain met palu inge ku in kalmekin mea?

² Kas in nununku su Jeremaia el enenu in sulkakin ku in purakak na paye me lain. Ke ma inge, God el akkeyel tu lan akola nu ke ma e sikyuk toko. (Jeremaia 1:8-10) Ke sie me pupulyuk, ku in ngun lun met palu inge akkeyeyuk ke kas inge: “A elos fwa anwuk lain kom, a elos fwa tia kutangkomla, ‘Tu Nga wi kom,’ Jeova el fwak, in molikomla.’ ” (Jeremaia 1:19) Anwuk lain Jeremaia ku in kalmekin anwuk lain God. Ke len inge, oasr un met kulansap lun Jeova su oanu met palu su oru orekma oanu orekma lal Jeremaia. Oanu el, elos pulaik in sulkakin kas palu lun God. A kas inge orekma nu sin kais sie met a kais sie mutanfwal nu ke ma mwo ku nu ke ma koluk, fwal nu ke nunuk lalos ka. Oanu in pal lal Jeremaia, oasr kutu met su lain God ke pal se elos lain met kulansap lal a orekma mutal su pakiyuki nu selos in oru.

Met Kulansap lun Jeova Elos Muta Ye Me Lain

3. Efu met kulansap lun Jeova elos muta ye me lain?

³ Met lun Jeova elos muta ye me lain ke mutamweyen century ak20 me. In an puspis, met koluk puspis elos suk in kutongye​—aok, in tulokinya—​orekma in sulkakin peng mwo lun Togusrai lun God. Elos inge mokleyuk sin Met Lokwalok lulap lasr, Devil, su “oanu soko laion ngutngut, el fwafwasyesr, in suk su el fwa kangla.” (1 Piter 5:8) Tokin “pal lun met pegan” safla ke 1914, God el tulukunak Mwen nutul oanu Togusra sasu lun fwalu, a sapkin nu sel: “Kom in Leum in maslon met lokwalok lom.” (Luk 21:24; Sam 110:2) In orekmakin ku lal, Kraist el sisila Setan liki an in kosrao nu fwalu. Meyen el etu la pal lal futoto, Devil el akkalemye mulat lal nu sin met Kristian akmusrala a met su welulos. (Fwakyuk 12:9, 17) Mea fwokin orekma lun met anwuk puspis inge su lain God?

4. Kain in me srifwe fuka met kulansap lun Jeova elos sun ke pal in Meun Lulap I, tusruktu mea sikyuk in yiu 1919 a 1922?

⁴ Met Kristian akmusrala lun Jeova elos sun me srifwe puspis ke lalalfongi lalos mutamwauk ke Meun Lulap I. Elos akkolukyeyuk a kas kikiap orek in lainelos, met koluk ukwelos, a unilos. Oanu Jisus el palye, elos ekla “me srungeyuk nu sin mutanfwal nu kemwa.” (Mattu 24:9) Ke pal in fosrnga ke meun, met lokwalok ke Togusrai lun God elos orekmakin akmwuk kutasrik oanu ma met koluk elos orekmakin nu sin Jisus Kraist in pal meeta. Elos kikiap in fwak la met lun Jeova elos lain guferment, a elos anwuk lain met kol ke u lun Jeova su ku in liyeyuk. In May 1918, federal warrants orekla in srukilye president lun Watch Tower Society inge J. F. Rutherford, a met itkosr su welul orekma. Mokul alkosr inge eis nununku upa in kapuri ke nien kalpous a supweyukla elos nu ke nien kapur lun federal fwin an Atlanta, Georgia, U.S.A. Tokin malem eu elos inge aksukosokyeyukla. In May 1919 circuit court of appeals el fwak la oasr srisri ke trial su orekla nu selos, a ke ma inge elos ekulla nununku lalos. A sapkinyuk in sifwil longyuk case laltal, tusruktu guferment el srungela in tafwela ke prosecution lal, a aksukosokyela Brother Rutherford a met nu kemwa su welul. Elos tafwela ke orekma lalos, a oasr sie toeni lulap orekla fwin an Cedar Point, Ohio, ke 1919 a ke 1922 elos sifwilpa tafwela in oru orekma in luti ke Togusrai.

5. Mea sikyuk nu sin Met Lo lun Jeova fwin an Nazi Germany?

⁵ Met kol koluk pangpang dictator sikyuk in yiu 1930 kutu, a mutamfwal Germany, Italy, a Japan elos tukeni nu sie in oakiye Axis power. Ke mutamweyen yiu inge, kolyai upa mutamwauk lain met lun God, yokna fwin an Nazi Germany. Tia sukosok in oru orekma oakiyuki. Elos utyuk nu in loom in sukok meta, a met nu kemwa su muta ka elos sruokye. Tausen puspis elos filiye ke nien kapur lulap pangpang concentration camp meyen elos srunga in fuleak lalalfongi lalos. Nien sun ke meun lain God a met lal pa in kunausla Met Lo lun Jeova nu kemwa ke an nu kemwa ye koko lun totalitarian.a Ke pal se Met Lo elos som nu ke court fwin an Germany in suk sumwos lalos, Reich’s Ministry of Justice el akola sie sramsram loes su ku in oru tu elos in tia kutangla. Elos fwak: “Court el enenu in kutangla fwinne oasr luma sumwos srisrik ke ma sap; a el enenu in suk a konaok inkanek puspis fwinne oasr ma upa, in akpayeye kunokon fulat lal.” Kalmen ma inge pa nununku sumwos kom tia ku in eis. Nazi el fwak la orekma lun Met Lo lun Jeova tia mwo, oanu orekma lun sie met lokwalok, a ‘kunausla akmwuk lun National Socialistic.’

6. Kain in kaifweung fuka orekla in kutonye orekma lasr ke lusen pal in Meun Lulap II a tokin pal inge?

⁶ Ke lusen Meun Lulap II, wangin sukosok, a me kutong elos oakiye nu sin met lun God fwin an Australia, Canada, a kutu an su oasr ku lun British Commonwealth we​—in an Africa, Asia, a tuka puspis lun an Caribbean a Pacific. Fwin an United States, met lokwalok pengpeng elos kaskas kikiap nu sin met in lain Met Lo paenang metu elos ‘orekmakin ma sap in oru ma koluk.’ (Sam 94:20) Tusruktu, me sramsram yok ke flag-salute a ma sap ke kais sie an su tia fulela orekma lun forfor elos wisla nu ke court puspis, a nununku mwo a sumwos etukyung nu selos fwin an United States a ma inge oakiye sie me kasru yok nu ke sukosok lun alu. Kulo nu sin Jeova, kaifweung lun met lokwalok elos tia kutangla. Ke pal se meun fwin an Europe apkurun in safla, me kutong nu kemwa etukla. Tausen puspis sin Met Lo su muta ke nien kapur lulap pangpang concentration camp elos aksukosokyeyukla, tusruktu meun lalos sonna tari. Ke pal sa tokin Meun Lulap II, Cold War mutamwauk. Mutanfwal nu kemwa fwin an Eastern Europe elos tafwela in sang ma upa nu sin met lun Jeova. Orekma lun guferment mutamwauk in kutongye orek ma lo lasr, fwasrelik lun me rid ke Baibel, a kosroila toeni lulap lasr tu in tia orek. Pukanten sin Met Lo elos filiyuki nu in kalbos ku elos supwelosla nu ke labor camps.

Tafwela Ke Orekma in Luti!

7. Mea experience lun Met Lo lun Jeova fwin an Poland, Russia, a kutupa an ke yiu ekasr somla?

⁷ Tokin yiu puspis somla, orekma in luti ke Togusrai ikakla. An Poland, el fwinne muta ye koko lun Communist, el lela kut in oru toeni lulap we ke sie len in yiu 1982. Toeni lulap lun International orekla fwin an we ke yiu 1985. Toeni lulap lun international sifwil orek we in yiu 1989, a tausen puspis sin met su tuku fwin an Russia a Ukraine elos wi. Ke yiu sepanu inge an Hungary a an Poland elos akilen a sang sukosok nu sin Met Lo lun Jeova fwal nu ke ma sap. Ke pulanpal lun autumn lun 1989, pot lun Berlin Wall itukla. Tokin malem ekasr na, kut eis sukosok fwin an East Germany a elos akilen kut fwal nu ke ma sap, a tia pat tokin ma inge sie toeni lulap lun international orekla fwin an Berlin. A ke mutamweyen yiu siengoul su lula nu ke century ak20, moniyuk in osun nu sin met lili fwin an Russia orekla. Elos osun nu sin kutu met lulap lun guferment fwin an Moscow, a ke yiu 1991, elos akilen a sang sukosok nu sin Met Lo lun Jeova in registered alu lalos. Mutamwauk ke pal inge orekma fwin an Russia arulanu kapkapek a in kutu republic su wi meet ke Soviet Union.

8. Mea sikyuk nu sin Met Lo lun Jeova ke lusen yiu 45 tokin Meun Lulap II?

⁸ Fwinne kolyai wanginla in kutu an, tusruktu ma inge kapek ke an saye. Yiu 45 tokin meun lulap akluo, srakna oasr an puspis srunga in akilen Met Lo lun Jeova fwal nu ke ma sap. wekunang ma inge, me kutong filiyuki nu sesr ku ke orekma lasr in an 23 fwin an Africa, 9 fwin Asia, 8 fwin an Europe, 3 fwin an Latin America, a 4 ke kutu mutanfwal su orekla ke tuka.

9. Mea Met Lo lun Jeova elos sun fwin an Malawi?

⁹ Met Lo lun Jeova fwin an Malawi elos sun kolyai upa mutamwauk ke yiu 1967. Ke sripen elos tia wi ke politic oanu met Kristian paye, paenang met lili wiesr fwin an we elos tia moli political party card. (Jon 17:16) Tokin sie meeting lun Malawi Congress Party in yiu 1972, orekma silolel sifwil orekla nu selos. Sapkinyuk nu sin met lili nu kemwa in som liki loom selos a tia sang orekma nu selos. Tausen puspis elos kaengla liki an selos tu in tia mise. Tusruktu, ya met lokwalok inge su lain God a met lal elos kutangla? Mo na mo! Ke pal se wanginla ma upa, sie pise sasu su oasr ke 43,767 met orekma lun Togusrai orala report fwin an Malawi in yiu 1999, a pus liki 120,000 met elos wi ke toeni lulap puspis fwin an we. Sie ofus sasu lasr musaiyukyuk ke capital city.

Elos Suk Kutena Meta

10. Oanu ma sikyuk nu sel Daniel mea met lokwalok ke pal inge elos oru nu sin met lun God?

¹⁰ Met luti kikiap, met kol lun alu, a kutupa met elos tia ku in muteng ke me sramsram lasr su tuku ke Kas lun God. Ye ma upa su tuku ke alu lun Kristendom, met lokwalok elos suk kutena me lain su tuku ke ma sap in oru sumwos lun meun lalos lain kut. Kain in orekma kutasrik fuka elos orekmakin kutapal? Efu, kain orekma kutasrik fuka un met koluk elos tu oru in lain met palu Daniel? In Daniel 6:4, 5, kut ku in rid: “Na met president a met leum elos suk in konoiyuk kutena ma lainul Daniel ke togusrai; a elos koflanu konoiyuk kutena ma ku meta, meyen el oaru, a wangin ma sito ku meta konoiyukyuk in el. Na met inge fwak: ‘Kut fwa tia konoiyukyuk kutena ma lainul Daniel se inge, kut fwin tia konoiyuk lainul ke ma sap lun God lal.’ ” Ke len inge, met lain elos ouyepa suk meta. Elos orekmakin me sramsram ke “me sensen su tuku ke alu srisrik su muta ye koko lun met” a elos srike in fwak la Met Lo lun Jeova elos ou inge. Ke inkanek lun kas kikiap, nunuk koluk, a ma sito, elos meun lain alu lasr a akos lasr ke ma sap lun God.

11. Kain in kas kikiap fuka met lain elos oru nu sin Met Lo lun Jeova?

¹¹ In kutu an, alu a politic elos srunga in akilen la kut orekmakin “alu nasnas a tia fokfok ye mutun God lasr.” (Jemes 1:27) Fwin orekma lasr in oanu sie met Kristian fwasrelik in an 234, tusruktu met lain elos fwak la kut sie kain in “alu su tia eteyuk.” Ke pal futoto meet liki toeni lulap lun international in yiu 1998, sie newspaper el srukak kas lun sie met kol ke alu lun Greek Orthodox su fwak la “[Met Lo lun Jeova] el sie ‘alu su tia eteyuk,’ ” fwinne siena ma European Court of Human Rights el fwak. Tokin len ekasr, siepa newspaper ke siti senpanu el srukak kas lun sie met kaskas ke alu su fwak: “[Met Lo lun Jeova] el ‘tia ku in Kristian congregation se,’ meyen lalalfongi lalos tia oanu sie ke lalalfongi pengpeng lun met Kristian nu sin Jisus Kraist.” Sakuruk na paye ma inge, meyen wangin kutena alu su fwakak orekma yok lalos in etawi Jisus sayen Met Lo lun Jeova!

12. In oru meun in ngun, mea kut enenu in oru?

¹² Kut suk in aksumwosye a in akkeye mwosasu ke inkanek lun ma sap. (Filippai 1:7) Sayen ma inge, kut tia fuleak ku akmunasye kaifweung lasr in akos ma sap sumwosmwos lun God. (Taitus 2:10, 12) Oanu Jeremaia, kut ‘losye infulwesr a kaskas ke ma nu kemwa ma Jeova el sapkin nu sesr,’ kut tia lela met lokwalok lun God in aksangengye kut. (Jeremaia 1:17, 18) Kas Mutal lun Jeova el akkalemye na paye inkanek sumwos su kut enenu in sulela. Lela kut in tia filiye lalalfongi lasr nu ke “sie po ikwe” munas ku in suk “nien molela ye lulin Ijipt,” su lumeyuk nu ke fwalu se inge. (2 Kronikel 32:8; Isaia 30:3; 31:1-3) Ke kut meun in ngun, kut enenu in tafwela in lalalfongi Jeova ke insiesr kemwa, lela lan kol inkanek lasr, a lela kut in tia filiye lalalfongi lasr nu ke lalmetmet lasr sifwanu. (Soakas 3:5-7) Fwin wangin kasru sin Jeova a wangin kurunginyuk lal, na orekma lasr nu kemwa “wangin sripe.”​—Sam 127:1.

Sun Kolyai Tusruktu Tia Fuleak

13. Efu kut ku in fwak la orekma kutasrik lal Setan lain Jisus tia kutangla?

¹³ Sie me srikasrak mwo emeet ke oaru nu sin Jeova pa Jisus, su metu elos fwak mu, el lain guferment a kunausla akmwuk misla fwin an’u. Tokin tuniyuk case lal Jisus, Pailat el insese ka in tulalla Jisus. Tusruktu un met puspis, su mokleyuk sin met kol lun alu, elos siyuk el lan patikyel Jisus, fwinne wangin ma koluk el oru. Elos siyuk el lan tulalla Barabbas a tia Jisus​—sie mokul su muta in nien kapur ke sripen akmas a lain lal nu ke guferment! Pailat el sifwil pa srike in kaifwe nu sin met lain su oasr nunuk koluk lalos, tusruktu ke saflaiye el wi ma nu kemwa ma metu elos lungse. (Luk 23:2, 5, 14, 18-25) Jisus el fwinne mise ke sak soko, tusruktu orekma kutasrik lun Setan lain Mwen nutin God tia kutangulla, meyen Jeova el akmoulyeak Jisus a akfulatyel in muta lepo leyut Lal. A ke len in Pentekost 33 C.E., ke inkanek lun Jisus su muta in mwolanu, ngun mutal el, oakiye congregation lun met Kristian​—“ma orekla sasu.”​—2 Korint 5:17; Orekma 2:1-4.

14. Mea sikyuk ke pal se met kol lun alu lun met Ju elos anwuk lain met tuma lutlut lal Jisus?

¹⁴ Tia pat toko met kol lun alu elos aksangengye met sap, tusruktu met tuma lutlut lun Kraist tia tui in sramsram ke ma puspis su elos liye a long. Met tuma lutlut lun Jisus elos pre: “A inge Jeova, kom liye me aksangeng lalos, a sang nu sin met kulansap lom in fwak kas lom ke pulaik nu kemwa.” (Orekma 4:29) Jeova el topuk me siyuk lalos ke el orelos in tingtingi ke ngun mutal a akkeyelos in tafwela orekma in sulkakin lalos ke pulaik. Tia pat toko, sifwil sapkinyuk nu sin met sap in tui ke orekma in luti lalos, tusruktu Piter a kutu met sap elos topuk a fwak: “Mwo tu kut akos God yok liki metu.” (Orekma 5:29) Me aksangeng, me kapur, a anwuk tia ku in kutongelosi in tia akyokye orekma lun Topgusrai.

15. Su met inge Gamaliel, a kain in kai fuka el sang nu sin met kol lun alu su lain met tuma lutlut lun Jisus?

¹⁵ Mea met kol lun alu elos pula? “Toasr insielos, a elos kena onelosla [met sap nu kemwa].” Tusruktu, sie met luti ke ma sap, e Gamaliel, sie met Farisi el oasr, su met e nu kemwa kaksakin. El sap in likiyuki met sap likinumu kitin pal, el sang kai nu sin met kol koluk lun alu: “Komwos met Israel, komwos sifwanu liyekomwosyung ke ma komwos nunku in oru nu sin met inge. . . . A inge Nga fwak nu sumwos, Fwasr liki met inge, a nik komwos ikololosi; (tu, papu se inge ku orekma se inge fwin ma sin metu, a fwa lungasyukla; a fwin ma sin God me, komwos koflanu kunausla;) saap konoiyukyuk komwos in meun lain God.”​—Orekma 5:33-39.

Wangin Me Meun Su Lumeyuk Lain Kom Fwa Kapkapek

16. Ke kas lom sifwanu, fuka kom ku in akkalemye kas in akkeye su Jeova el sang nu sin met lal?

¹⁶ Kas in kai lal Gamaliel arulanu sumwos, a lela kut in sang kulu fwin oasr kutu met elos sramsram mwo kasr. Kut ouyepa akilen la sukosok in alu akfulatyeyuk ke inkanek in nununku lun met nununku su tia sulosol ke court. Paye, kaifweung lasr in akos Kas lun God arulanu akasorye met kol lun Kristendom a kutu met kol lun Babulon Lulap, su lumeyuk nu ke alu kikiap nu kemwa fwin fwalu. (Fwakyuk 18:1-3) Fwinne elos nu kemwa a met nu kemwa elos purakak orek in akkoluk a in lain kut, kut ku in lalalfongi ke kas inge: ‘“Wangin me meun su lumeyuk lain kom fwa kapkapek, a loa nu kemwa su fwa tuyuk lain kom in nununku kom fwa lusla. Pa inge me usru lun met kulansap lun Jeova, sumwosmwos lalos su ma sik,’ Jeova el fwak.”​—Isaia 54:17.

17. Fwinne met lokwalok elos meun lain kut, efu kut pulaiknu?

¹⁷ Met lokwalok lasr elos anwuk lain kut ke wangin sripe, tusruktu, kut tia sangeng. (Sam 109:1-3) Kut tia lela kutena pal nu sin kutena met su srunga kas in Baibel su kut sulkakin in aksangengye kut tu kut in fuleak lalalfongi lasr. Fwinne kut akilen la meun lasr in ngun el yokelik, tusruktu kut etu la mea saflaiyen ma inge. Oanu Jeremaia, kut e fwa pulakin akpayeyen kas palu inge: “A elos fwa anwuk lain kom, a elos fwa tia kutangkomla, tu ‘Nga wi kom,’ Jeova el fwak, ‘in molikomla.” ’ (Jeremaia 1:19) Aok, kut etu la met nu kemwa su lain God elos tia kutangla!

[Footnote]

Fuka Kom Topuk?

• Efu Met kulansap lun Jeova elos muta ye me lain?

• Ke inkanek puspis fuka met lain elos meun lain met lun Jeova?

• Efu kut ku in lalalfongi na paye la met nu kemwa su lain God elos tia kutangla?

[Picture on page 25]

Jeremaia el akkeyeyuk la Jeova el welul

[Picture on page 26]

Met su moula liki Concentration camp

[Picture on page 26]

Orekma silolel lun un met koluk lain Met Lo lun Jeova

[Picture on page 26]

J. F. Rutherford a met su welul

[Picture on page 28]

Ke ma sikyuk nu sel Jesus,’ met su lain God elos tia kutangla