Kaksakihn Jeova Oacna Mwet Orek Ahluh Kle Suc Luhmwekuhtlac

1. Efuh kuh Jeova pa mwet orek ahluh kle suc fuhlwact emeet uh?

KE November 2010, oasr sie bid ma sun tala 70 million ke sie ahluh Chinese ma oreklac ke fohk kle fin acn England. Arlacna usrnguck lah sie mwet in orek ahluh ke kle el kuh in orekmakihn fohk kle ma oasr ke yen nuhkewa ac fihsracsr molo in oraclah sie ahluh na kahto ac yohk molo. Jeova, mwet orek kle suc luhmwekuhtlac el fuhlwact liki kuhtwena mwet fin facluh suc orek ahluh kle. Bible uh fahk lah Jeova el oraclah sie mukul suwohs ke “El eis kuhtuh fohk liki infohk uh [kle] ac luhmahlah mwet se kac.” (Genesis 2:7) Mukul se inge pa Adam ac el “wen nuhtin God” suc oreklac ke sie inkacnek tuh elan kuh in etahi ohiyac wo pucspucs luhn God.”​—Luke 3:38.

2, 3. Kuht ac etahi fuhkah ohiyac luhn mwet Israel suc auliyak?

² Ke pacl se Adam el lain God, el tilac wen nahtuhl. Tuhsruhktuh, puhs sin tuhlihk nahtuhl ac fihl in tuhlihk nahtuhl ma sulacllah Jeova elan mwet kol laltahl. (Hebrew 12:1) Ke eltahl inse puhsisacl in ahkos God laltahl uh, ma inge ahkkahlwemye lah eltahl luhngse in el pa Pahpah tuhmwacltahl ac mwet in luhmahltahllah, tiac Satan. (John 8:44) Oaru laltahl nuh sin God uh ahkacsmakihnye kuht ke kahs luhn mwet Israel ke eltahl auliyak: “LEUM GOD, kom pahpah tuhmasr. Kuht oacna fohk kle, ac kom oacna mwet orek ahluh kle. Kom orekuhtlac.”​—Isaiah 64:8.

³ Ke pacl inge, mwet kuhlwacnsap pwacye luhn Jeova uh oacyacpac kwacfeacng in inse puhsisacl ac ahksol. Eltahl puhla muh sie kunohkohn sacohk in pahngon Jeova oacna Pahpah tuhmwacltahl ac eltahl luhngse in el pac mwet in luhmahltahllah uh. Yac kuht oacna fohk kle ma fihsracsr nuh sin God in luhmahlah nuh ke sie ahluh na sacohk? Yac kuht liye mwet lili wiyacsr uh oacna ahluh kle ma God el srackna ahkwoye? In kahsre kuht ke ip se inge, kuht ac fah sramsramkihn lah Jeova el sulaclah fuhkah mwet suc el ac luhmahlah uh, efuh kuh el luhmahlah mwet inge, ac el oruh fuhkah ma inge.

JEOVA EL SULACLAH MWET SUC EL AC LUHMAHLAH UH

4. Jeova el sulaclah fuhkah mwet suc el ac kohlma nuh yohrohl uh? Sang kuhtuh mwe puhpuhlyuck an.

⁴ Jeova el tiac liye mwet uh oacna kuht. A, el tuni insiacn kais sie sesr ac liye lah kuht fuhkah na pwacye. (Riti Sie Samuel 16:7b.) Jeova el ahkkahlwemye ma inge ke pacl se ma el oakiyac congregation luhn mwet Christian. El kohlma nuh yohrohl ac yurin wen nahtuhl, mwet pucspucs suc mwet sahyac uh nuhnkuh muh wacngihn srihpac. (John 6:44) Ke sie mwe puhpuhlyuck, sie sin mwet inge pa Saul, sie mwet Pharisee. El “sie mwet suc fahk kahs kuluk kacl [Christ] in pacl meet, ac sie suc ahkkulukye ac kalyei orekma lal.” (Sie Timothy 1:13) Tuhsruhktuh, Jeova el tuni insiacl Saul ac el tiac liyacl oacna kle ma wacngihn srihpac. (Soakas 17:3) A, Jeova el liye lah Saul el kuh in luhmweyucklac nuh ke “sie ahluh sulohsohllah” suc ac fah som fahkwack nuh sin “mwet pagan ac tohkohsrah, ac tuhlihk nahtuhl Israel.” (Orekma 9:15, BMK) Jeova el sulaclah kuhtuh pac sahyac suc kuh in luhmweyucklac ac “orekmakihnyuck nuh ke ma yohk srihpac,” wekuhnacng mwet suc sruhi, oruh orekma in kosro, ac pihsrapasr. (Rome 9:21; Sie Corinth 6:9-11) Ke eltahl lutlutkihn ma suhmuhslah uh, eltahl ahkkweye luhlahlfongi laltahl nuh sin Jeova ac lwelah elan luhmahltahllah.

5, 6. Luhlahlfongi lasr nuh sin Jeova oacna mwet in luhmwekuhtlac uh mokle fuhkah ohiyacsr nuh sin (a) mwet ke acn in forfor lasr uh? (b) mwet lili wiyacsr uh?

⁵ Kuht luhlahlfongi lah Jeova el kuh in sulaclah ac pwacnma mwet wo nuh yohrohl. Pa inge srihpac se pwacnacng kuht tiac enenuh in nuhnuhnkuh mwet sahyac ke acn in forfor lasr kuh ke congregation lasr uh. Ke sie mwe puhpuhlyuck, liye lah fuhkah puhlakihn luhn mukul se inge, Michael ke pacl se ma Mwet Loh luhn Jeova uh som muhtwacta yohrohl. El fahk: “Nga kwacna forlah ac tiac lohacng nuh seltahl, oruh in na muh eltahl wacngihn. Nga arlac nihkihn facsin nuh seltahl! Tok, ke sie pacna acn, nga ohsun nuh sin sucu se suc nga arlacna kaksakihn ke srihpen ohiyac wo laltahl. Na sie lwen ah, nga lut in konwacack lah eltahl Mwet Loh luhn Jeova! Ohiyacltahl mokleyuc in tuni ahkwoyac srihpen srisri luhk nuh seltahl. Kihtin pacl tok, nga akihlenack lah ohiyuck nuh seltahl ma ke srihpen nihkihn luhk ac ma nga lohng kacltahl ma tiac pwacye.” Michael el luhngse in ahkyohkye etuh lal kacltahl ac el sulaclah in lutlut Bible. Tok, el bacptaislac ac eklac sie pioneer.

⁶ Ke kuht akihlen lah Jeova pa mwet in luhmwekuhtlac uh, ohiyacsr nuh sin mwet lili wiyacsr uh ac oacyacpac eklac. Kuht ac kuh in liye kais sie seltahl oacna mwet suc srackna enenuh in kapkapwack. Pa inge liye luhn Jeova nuh seltahl uh. El liye lah mwet fuhkah eltahl uh ke insiacltahl ac el etuh lah ohiyac sesuwohs laltahl uh ac tiac oan paht. El oacyacpac etuh lah kain in mwet fuhkah kais sie seltahl ac kuh in eklac nuh kac. (Psalm 130:3) Kuht kuh in etahi Jeova fin wo nuhnak lasr ke mwet lili wiyacsr uh. Kuht kuh pac in sang kahsruh nuh sin Jeova suc luhmwekuhtlac ke kuht kahsruh kapkapack luhn mwet lili wiyacsr uh. (Sie Thessalonica 5:14, 15) Mwet elder ke congregation uh enenuh in oakiyac mwe srihkasrak wo ke eltahl oruh ma inge.​—Ephesus 4:8, 11-13.

EFUH KUH JEOVA EL LUHMWEKUHTLAC?

7. Efuh kuh kom ahksacohkye mwe kai luhn Jeova uh?

⁷ Kuhtuh mwet uh ac kuh in fahk: ‘Nga tiac arlac ahksacohkye mwe kai ma nga eis sin pahpah ac ninac kiyuck ah ne ke pacl se ma oasr tari tuhlihk nuhtihk sifacna.’ Ke kuht kapkapwack uh, kuht muhtwacwacack in ahksacohkye mwe kai ke srihpen kuht liye lah ma inge oacna sie inkacnek in ahkkahlwemye luhngse. (Riti Hebrew 12:5, 6, 11.) Pwacye, Jeova el luhngse kuht oacna tuhlihk nahtuhl, pwacnacng el mongfihsracsr nuh sesr in kai kuht ac luhmwekuhtlac. El luhngse kuht in lahlmwetmwet, insewowo, ac in luhngse el oacna Pahpah tuhmwacsr. (Soakas 23:15) El sruhnga liye ke kuht kweok uh, ac el sruhnga pac kuht in misac ke srihpen ma kuluk lasr ma kuht tiac auliyak kac.​—Ephesus 2:2, 3.

8, 9. Jeova el luti kuht fuhkah ke pacl inge, ac lutlut inge ac tahfweyucklac fuhkah ke pacl fahsruh uh?

⁸ Meet liki kuht etwacllah Jeova, sahp puhs ohiyac kuluk lasr. Tuhsruhktuh, Jeova el luhmwekuhtlac ac kahsre kuht in eklac. Ke srihpac se inge, ingena oasr ohiyac wo sesr. (Isaiah 11:6-8; Colossae 3:9, 10) Kuht muhta ke sie moul mislac inmahsrlon mwet luhn God. Moul mislac se inge arlacna sacohk ke srihpen ma Jeova el oraclah nuh ke pacl lasr inge ma ac kahsruh in luhmwekuhtlac. Ke srihpen kuht oasr kac, finne facl se ma kuht muhta kac inge nwacnwaclah ke ma kuluk, kuht puhla mislac ac karihngihnyuck wo. Mwet suc tiac puhla luhngse inmahsrlon mwet ke sucu laltahl uh ke eltahl kapkapwack, eltahl puhla luhngse pwacye ke pacl inge sin mwet lili wiyacltahl ke u luhn Jeova ma oasr mislac kac. (John 13:35) Ac kuht lotwelah in ahkkahlwemye pac luhngse nuh sin mwet sahyac. Tuhsruhktuh yohk liki nuhkewa, kuht etwacllah Jeova ac ingena kuht puhla luhngse lal nuh sesr oacna sie pahpah.​—James 4:8.

⁹ Ke facl sasuc uh, kuht ac fah engankihn ma wo pucspucs ke moul mislac inmahsrlon mwet luhn God. Kuht ac fah engankihn pac moul ke paradise se ma ac kolyuck ke Tohkohsrahi luhn God. Ke pacl sacn, Jeova el ac tahfwelah in luhmwekuhtlac ac luti kuht ke sie inkacnek ma upac kuht in petsacelah ke pacl inge. (Isaiah 11:9) Jeova el ac fah oruh pac tuh nuhnak lasr ac mahnosr in suwohs. Ma inge ac oruh in fihsracsr nuh sesr in kahlwem na pwacye ac ahkos kahs in luti nuhkewa lal uh. Pwacnacng, kuht tahfwelah na in lwelah Jeova elan luhmwekuhtlac ac kuht ahkkahlwemye nuh sel lah kuht ahksacohkye mwe ahkpwacyeye ke luhngse lal nuh sesr inge.​—Soakas 3:11, 12.

JEOVA EL LUHMWEKUHTLAC FUHKAH?

10. Jesus el ahkkahlwemye fuhkah ohiyen mongfihsracsr ac etwacack yohk oacna Jeova?

¹⁰ In oacna sie mwet suc etuh na pwacye kain in fohk kle ma el luhmahlah uh, Jeova suc luhmwekuhtlac el etwekuht na pwacye. El etuh mwe muhnahs lasr, kuhiyacsr, ac kapkapwack lasr uh. Ke pacl se ma el luhmahlah kais sie sesr, el nuhnkuh ke ohiyac lasr inge kewa. (Riti Psalm 103:10-14.) Kuht kuh in etwaclah ma Jeova el liye sesr ke kuht tuni inkacnek ma Jesus el ahkkahlwemye nuh ke ohiyac sesuwohs luhn mwet sap lal ah. Oasr pacl ma mwet sap lal ah akuhkuhin lah suc kac fuhlwact inmahsrloltahl. Kom fin oasr we ke pacl sac, meac kom ac kuh in nuhnkuh ke ohiyen mwet sap inge? Sahp kom ac nuhnkuh muh eltahl tiac oacna fohk kle ma fihsracsr in luhmahlah. Tuhsruhktuh, Jesus el etuh lah eltahl kuh in luhmweyucklac eltahl fin lohng kahs in kahsruh na kuhlwacng lal ac etahi ohiyen inse puhsisacl lal. (Mark 9:33-37; 10:37, 41-45; Luke 22:24-27) Tukun Jesus el sifwil moulyak, mwet sap lal ah eis nguhn luhn God ac tilac nuhnkuh lah suc kac fuhlwact. A, eltahl lohacng ahkwoyac nuh ke orekma se ma Jesus el sang nuh seltahl uh.​—Orekma 5:42.

11. Ke inkacnek fuhkah David el ahkpwacyeye lah el oacna fohk kle ma fihsracsr, ac kuht ac etahel fuhkah?

¹¹ Ke pacl inge, Jeova el orekmakihn Bible, nguhn muhtahl lal, ac congregation uh in luhmwekuhtlac. Bible uh ac luhmwekuhtlac fuhkah? Kuht enenuh in riti, nuhnkuh yohk ke ma kuht riti inge, ac siyuck Jeova elan kahsre kuht in orekmakihn ma kuht lotwelah uh. Tohkohsrah David el suhmuhslah: “Ke nga oan fin mwe oan kiyuck, nga esam kom; Nga nuhnkuh keim ke fong fohn.” (Psalm 63:6) El oacyacpac suhmuhslah: “Nga fah kaksakihn Jeova suc acse pwacpa nuh sihk; ahok, insiuck lutiyuc ke fong.” (Psalm 16:7, BMK) Ahok, David el nuhnkuh yohk ke kahs in kahsruh luhn Jeova uh ac el lwelah ma inge in luhmahlah nuhnak ac puhlakihn lal uh, finne kahs in kahsruh inge upac elan eis. (Luo Samuel 12:1-13) David el oakiyac nuh sesr mwe srihkasrak wo ke inse puhsisacl ac ahkostwen. Pwacnacng, siyuck sum sifacna: ‘Ke nga riti Bible uh, yac nga nuhnkuh yohk kac ac lwelah kahs in kahsruh luhn God inge in sun nuhnak luhk, puhlakihn luhk ac insiuck? Yac nga kuh in oruh in yohk liki na meet ah?’​—Psalm 1:2, 3.

12, 13. Jeova el luhmwekuhtlac fuhkah ke inkacnek luhn nguhn muhtahl ac congregation uh?

¹² Nguhn muhtahl ac kuh in luhmwekuhtlac ke inkacnek pucspucs. Ke sie mwe puhpuhlyuck, ma inge ac kuh in kahsre kuht in etwaclah in etahi ohiyacl Jesus ac in ahkkahlwemye kain in ip pucspucs ke fahko luhn nguhn. (Galatia 5:22, 23) Sie ip ke fahko se inge pa luhngse. Kuht luhngse God ac kuht luhngse in ahksol ac in luhmweyucklac sel ke srihpen kuht etuh lah masap lal uh ma ac wo nuh sesr. In wekuhnacng ma inge, nguhn muhtahl ac kuh in acse kuh nuh sesr in fahsr liki ohiyac kuluk luhn facl se inge. (Ephesus 2:2) Ke mwet sap Paul el srackna fuhsr, mwet kol inse fuhlwact ke alu luhn mwet Jew eltahl kihfasuhllah. Tuhsruhktuh, nguhn muhtahl pa kahsrel in eklac uh. El suhmuhslah tok: “Nga kuh in oruh ma nuhkewa in El suc ahkkweyeyuc.” (Philippi 4:13, BMK) Kuht enenuh pac in siyuck ke nguhn muhtahl, mweyen kuht etuh lah Jeova el ac fah topuk puhruhe lasr ma tuhkuh ke insiacsr.​—Psalm 10:17.

¹³ Jeova el orekmakihn pac congregation ac mwet elder uh in luhmahlah kais sie sesr. Ke sie mwe puhpuhlyuck, fin mwet elder uh akihlen lah oasr mwe muhnahs se lasr, eltahl ac srihke in kahsre kuht. Tuhsruhktuh, eltahl tiac sang kahs in kai ma tuhkuh ke nuhnak laltahl sifacna. (Galatia 6:1) A, eltahl puhruhe nuh sin Jeova tuh eltahl in kahlwem ac lahlmwetmwet. Na, eltahl oruh research ke Bible ac ke mwe rit pucspucs nahtuhsr uh in konwacack mwe ahkuhtweyac ma ac kuh in kahsre kuht. Fin mwet elder uh tuhkuh nuh yurum ac usot kahs in kai, sahp ma ke inkacnek in nuknuk kuh nahweyuck lom ac eltahl oruh ma inge ke inkacnek kuhlwacng ma ahkkahlwemye luhngse, esam lah ma inge ahkpwacyeye luhngse luhn God nuh sum. Kom fin orekmakihn kahs in kahsruh inge, kom ac fah oacna fohk kle ma fihsracsr nuh sin Jeova in luhmahlah ac kom fah engan kac.

14. Finne oasr kuh luhn Jeova in luhmahlah kuhtwena fohk kle, el ahkkahlwemye fuhkah suhnak nuh ke sulaclah luhn kais sie mwet?

¹⁴ Kuht fin kahlwem kac lah Jeova el luhmwekuhtlac fuhkah, ma inge ac kuh in kahsre kuht in fototo nuh sin mwet lili wiyacsr uh. Ac wo pac nuhnak lasr ke mwet ke acn in forfor lasr ac mwet lutlut Bible lasr uh. Ke pacl luhn mwet in Bible uh, meet liki sie mwet suc orek ahluh ke fohk kle el muhtwacwacack, el enenuh in ahknwacsnwacsye ac eslah yot srihsrihk nuhkewa kac wi kuhtwena kutkut sahyac. Jeova suc fuhlwact emeet in luhmahlah ma pucspucs, el kahsruh mwet suc luhngse in luhmweyucklac uh. El tiac pahtok kuhtwena mwet in eklac, a el ahkkahlwemye nuh seltahl oakwuck wo ac nwacsnwacs lal uh. Eltahl enenuh in sifacna sulaclah fin eltahl ac eklac kuh tiac.

15, 16. Mwet lutlut Bible uh ac ahkkahlwemye fuhkah lah eltahl luhngse Jeova elan luhmahltahllah? Sang sie mwe puhpuhlyuck an.

¹⁵ Nuhnkuh ke ma sikyak nuh sel Tessie, sie muhtwacn lili fin acn Australia. Ke pacl se ma el srackna lutlut Bible ah, arlacna fihsracsr nuh sel in sruokyac ma el lotwelah uh. Tuhsruhktuh, tiac yohk kapkapwack lal uh ac el tiac pac som nuh ke toeni uh. Muhtwacn lili se ma lutlut Bible yohrohl inge puhruhe nuh sin Jeova ac sulaclah muh el ac tui ke lutlut nuh sel uh. Na muh, ma na usrnguck se sikyak. Ke mwet luti sac nuhnkuh muh pa inge lutlut sahflah laltahl uh, Tessie el sruhmuhn nuh sin mwet luti se lal uh lah efuh el tiac kapkapwack. El fahk lah el puhla muh el sie mwet wosounkahs ke srihpen el luhngse na pwacye in sritacl mani. Tuhsruhktuh, ke pacl inge el sulaclah in tiac sifwil sritacl mani.

¹⁶ Tiac paht tohkoh, Tessie el muhtwacwacack in fahsr wi miting ac el ahkkahlwemye pac ohiyac wo luhn sie mwet Christian finne kuhtuh kawuck lal meet ah isrucnuhl kac. Tukun kihtin pacl, Tessie el bacptaislac ac el sroacng nuh ke orekma in pioneer, finne oasr tuhlihk srihsrihk nahtuhl. Arlacna kahlwem lah ke pacl se ma mwet lutlut Bible uh muhtwacwacack in ekuhllah ohiyacltahl ac ahkinsewowoye God, el ac fah kaluckyang nuh yohrohltahl ac luhmahltahllah nuh ke ahluh na sacohk.

17. (a) Meac ahkkweye kom in etuh lah Jeova pa luhmwekomlac uh? (b) Ip pucspucs fuhkah ke inkacnek in luhmahlah ma kuht ac fah sramsramkihn tok uh?

¹⁷ Ke pacl inge, kuhtuh mwet suc orek ahluh kle uh srackna orekmakihn paholtahl in luhmahlah ahluh kahto. Ke inkacnek se pacna inge, Jeova el mongfihsracsr in luhmwekuhtlac ke kahs in kahsruh lal ac el liye ahkwoyac lah fuhkah ohiyacsr nuh kac. (Riti Psalm 32:8.) Yac kom kuh in liye lah Jeova el arlacna luhngse kom? Yac kom kuh in liye inkacnek luhn Jeova in luhmwekomlac ahkwoyac? Kom fin kuh, ohiyac fuhkah kom nuhnkuh muh ac kahsre kom in oacna fohk kle ma fihsracsr nuh sin Jeova in luhmahlah? Ohiyac fuhkah kom enenuh in fahsr liki tuh kom in tiac oacna fohk kle ma kwekwe ac tiac kuh in luhmweyucklac? Pahpah ac ninac uh ac akacsruhi fuhkah nuh sin Jeova in luhmahlah tuhlihk nahtuhltahl uh? Mwe lutlut se tok uh ac fah sramsramkihn ma inge.