Met Potter Lulap A Orekma Lal
“[Ekla] sie alu nu ke sunak, . . . akola tari nu ke orekma mwo nu kemwa.”—2 TIMOTE 2:21.
JEOVA el sie Met Potter Lulap. Sie ma orekla sakuruk ke ma el orala pa Edam, papa se meet lasr. Baibel el fwak nu sesr: “A Jeova God el srulela met liki kutkut in foko, a mongyung nu in fwael momong in moul, a met se inge el ekla ngunmoul,” sie “ma orekla su momong.” (Genesis 2:7, footnote, New World Translation) Met se meet inge su God el orala, el sumwosmwos, ma orekla in luman God, sie me akpayeye ke Lalmetmet Mutal lal, lungse ke sumwosmwos paye a nununku sumwos.
2 El orekmakin soko sri in pap kel Edam, God el ouyepa srulela sie met in kasru mokul sa—mutan. Luma kato lal If mwo liki kutena mutan kato ke len inge. (Genesis 2:21-23) In toeni nu ke ma inge, seanyen se meet elos eis kain in mano a lalmetmet sumwosmwos su orekla tu elos in ku in akpayeye orekma su pakiyuki nu selos, in orala fwalu se inge nu ke paredais. Etukyung pa nu selos ku in oru ma God el sapkin nu selos in Genesis 1:28: “Komwos in kapek, a yokelik, a nekla fwalu, a kutangla, a leum fwin ik in mwea, a fwin mwon yen engyengu, a fwin ma moul nu kemwa, su mokuikui fwin fwalu.” Ke saflaiye, imae se inge fwin fwalu nu fon nenela ke met insemwomwo su piselos oasr ke billion puspis, su tukeni muta ke me kapur lun lungse, pa “me kapur lun sumwosna.”—Kolosse 3:14.
3 Sie me asor, meyen papa a nine se meet lasr elos sulela in lain ma sap lun Met Su Orelosla, Met Potter Lulap. Inkanek su elos sulela in oru akkalemyeyuk in Isaia 29:15, 16: “We nu selos su arulanu mwukunla papu lalos liki Jeova, a orekma lalos orek in losr, a su fwak: ‘su liye kut? A su ete kut?’ . . . Ya elos nunku mu met potter oanu kle? Tu ma orekla fwa fwak nu sel su orala: ‘El tia oreyula’?” Orekma koluk lalos inge kol nu ke ongoiye—nununkeyuk in mise ma patpat. Sayen ma inge, tulik nutulos nu kemwa elos usrui ma koluk a mise. (Rom 5:12, 18) Kato lun ma orekla su Met Potter Lulap el orala akkolukyeyuk na upa.
4 Tusruktu, fwinne kut sesumwos ke pal inge, kut nu kemwa su tulik nutul Edam ku in kaksakin Jeova fwal nu ke ma simusla in Sam 139:14: “Nga fwa sot kulo nu sum, tu kom orala luman in sie oiyen me aksangeng a me lut. Orekma lom ma sakuruk, a ma inge ngunik etulanu.” Aok, sie me asor na paye, orekma sakuruk lun Met Potter Lulap in pal meeta arulanu akfokfokyeyuk!
Met Potter El Tafwela ke Orekma Lal
5 Sie me insemwomwo meyen orekma usrnguk lun Met Su Orekutla oanu sie Met Potter el orekmakin alukela liki pal in orekla a srulela se meet lal ke met. Met sap Poul el fwak nu sesr: “Mo, O met, a su kom su topuk lain God? Ya ma orekla fwa fwak nu sel su orala, ‘Efu kom ku ore yu? Ou inge? Ya met potter el tia ku fwin kle, tu in oru liki sie srukwal in kle sie alu nu ke mwolanu, a sie nu ke tia mwolanu?”—Rom 9:20, 21.
6 Aok, kutu nu ke ma Met Potter Lulap el orala ma nu ke mwolanu, a kutu ma nu ke tia mwolanu. Elos nu kemwa su sulela in fwasr tokin fwalu se inge su putatla nu ke ma koluk upa lal, elos inge orekla ke sie inkanek su ku in sang akul nu selos tu in musalla. Ke pal se Togusra mwolanu, Jisus Kraist el tuku in oru nununku, kain alu inge nu kemwa su orekla tia ke mwolanu, weang nu ke met nu kemwa su lumeyuk nu ke goat elos fwa “som nu in kai kamwul” oanu Mattu 25:46 el fwak. Tusruktu elos nu kemwa su lumeyuk nu ke sip ku “met sumwosmwos,” elos su orekla nu ke “mwolanu,” elos fwa usrui “moul ma patpat.”
7 Ke sie inse pusisel, met sumwosmwos inge elos akpusisilyelos sifwanu ke lumala mutal lun God. Elos ilyuk nu ke inkanek lun God ke moul. Elos eis kai su simusyukla in 1 Timote 6:17-19: “Tia filiye fwinsrak [lom], nu fwin ma ekyek oanu me kasrup, a in God. Su ase yok nu sesr ma nu kemwa tu kut in engun ka.” Elos orekmakin moul lalos in “oru mwo, tu elos in kasrup in orekma mwo, tu elos in akola in kite me kulang, a me pakomuta, a elosak nu selos sifwanu sie pelung mwo nu ke pal se su e fwa tuku, tu elos fwa ku in srukye moul ma patpat su moul paye.” Ma paye mutal el aksasuye met inge a elos akkalemye lalafongi su tia ku in mokuikui ke me sang lun Jeova ke inkanek lal Jisus Kraist, su “sifwanu esalang tu in me mol ke met e nu kemwa” tu lan ku in sifwil folokonma ma nu kemwa su tula ke sripen ma koluk lal Edam. (1 Timote 2:6) Ke ma inge, sie me insemwomwo na paye sesr, in akpusisilye kut sifwanu ke kai lal Poul nu sesr in “nukomang met sasu [moul lasr sifwanu], su [srulela] ku aksasuyeyuk nu ke etauk, oanu luman El su oral”!—Kolosse 3:10.
Kom Kain in Alu Fuka ke Pal Fwasru?
8 Su ku in pakiye sie met fwin el kain in alu fuka ke pal fwasru? Oiye a orekma lal sifwanu. Inkanek lal mutamwauk ke lungse a kena lun insie. Togusra Solomon su lalmetmet el fwak: “Insien sie met kineuk inkanek lal, a Jeova el aksumwosye fwalkel.” (Soakas 16:9) Ma se akluo, inkanek lal mokleyuk ke ma el long a liye, asrouki a ke ma el srike tari. Ke ma inge, arulanu yok sripe na paye, kut in loang nu ke kai: “Fwafwasyesr yurin met lalmetmet, a kom fwa lalmetmet, a el su wi met lalfon fwa ngal ka.” (Soakas 13:20) Oanu kas in sensen lun 2 Piter 1:16, kut enenu in fwasr liki “sramsram mwesral tia paye,” ku oanu Knox’s Roman Catholic version el fwak, “sramsram folinfong su met sifwanu orala.” Wikin ma inge pa me luti puspis a me akfulat puspis su met luti kikiap lun Kristendom elos luti.
9 Ke ma inge, fwal nu ke sulela lasr, God el ku in aksasuye kut. Ke sie inse pusisel ye mutun Jeova, kut ku in kalweni pre lal Devid: “Kom suiyuwi, O God, a etu insiuk. Kom srike yu a etu nunuk luk, a liye fwin oasr kutena innek koluk yurok, a kol yu innek kamwil nu tok.” (Sam 139:23, 24) Jeova el oru peng mwo lun Togusrai lun God in lutiyuk. Insiesr mokleyuk a sang kulo ke peng mwo a ke kolyuk lal. Ke inkanek lun u lal el ase nu sesr kain in me sang puspis su kapsreni nu ke orekma in luti ke peng mwo; lela kut in srukye a aksaokye ma inge.—Filippai 1:9-11.
10 Arulanu yok sripe kut in loang nu ke Kas lun God pal nu kemwa, fwasr tokin sie program in ridi Baibel ke len nu kemwa, orala Baibel a orekma lun Jeova in sifwen me sramsram ke sou a inmaslon kamwuk lasr. In toeni nu ke program ke alu in lututeng meet liki pal in mongo ke lututeng su orek inmaslon met orekma nu kemwa in Bethel a ke missionary nu kemwa su muta ke missionary home lun Met Lo lun Jeova pa, ridi Baibel ke lusen wik se, na ridi Yearbook sasu ke lusen wik se, na sifwil foloko nu ke ridi Baibel. Ya sou lom el ku in ouyepa oru kain in akmwuk inge? Kain in ma lane fuka kut ku in ouyepa eis, ke inkanek in asrouki lasr ke congregation lun met Kristian, ke tukeni nu sie lasr ke pal in meeting, a yokna ke akesrui lasr ke lutlut lun Watchtower ke wik nu kemwa!
Aksasuye Tu in Kutangla Liki Me Srifwe
11 Ke moul lasr ke len nu kemwa, God el lela kutu ma sikyuk, saap kut ku in konaok la kutu ke ma inge arulanu upa nu sesr. Nunuk fuka kut enenu in akkalemye ke ma inge? Oanu Jemes 4:8 el kai kut, lela kut in tia toasr ka, a lela kut in kalukyung nu yurin God, lalalfongel ke insiesr kemwa, kut etu na paye la kut fwin ‘kalukyung nu sel, el e fwa kalukot nu sesr.’ Paye, kut enenu in muteng ke ma upa a me srifwe, tusruktu ma inge nu kemwa El lela oanu me kasru in aksasuye kut, su oswela fwako mwo ke saflaiye. Jemes 1:2, 3 el fwak ke paye sesr: “Komwos in oekla oanu me akengun nu kemwa, ke me sruf puspis apinkomwosla, a komwos etu tu me akpayeye lalalfongi lomwos orekma fulpap.”
12 Jemes el ouyepa fwak: “Lela tu in wangin met in fwak fwin srifweyuk: ‘God el srifwe yu.’ Tu God el tia srifweyuk ke ma koluk a ouyepa el tia srifwe kutena met. Tu met nu kemwa elos srifweyuk, kena lalos kolang insielos nu ke lungse koluk lalos a elos tafongla.” (Jemes 1:13, 14) Saap arulanu pukanten me srifwe su sun kut a kain in me srifwe puspis, tusruktu, oanu ma sikyuk nu sel Job, ma inge nu kemwa orekma in aksasuye kut. Fuka sie kas na mwomwo Ma Simusla in Jemes 5:11 el ase nu sesr: “Liye! kut pangnolos insemwomwo elos su muteng, komwos long ke mongfwusesr lal Job, a komwos liye saflaiye sin Leum, fuka Leum el pakomuta a pakoten.” Oanu alu ke paon Met Potter Lulap, lela kut in srukye oaru lasr pal nu kemwa, a srukye lalalfongi ke saflaiye oanu Job el oru!—Job 2:3, 9, 10; 27:5; 31:1-6; 42:12-15.
Aksasuye Met Fwusr Lasr
13 Papa a nine elos ku in sang kasru ke orekma in lumala tulik nutulos, elos ku in mutamwauk ke pal se elos srakna awowo, a met fwusr inge elos ku in ekla met oaru na paye ke saflaiye! (2 Timote 3:14, 15) Ma inge arulanu paye fwinne me srifwe el arulanu upa. Ke yiu ekasr somla, ke pal se kolyai ke sie an fwin an Africa arulanu upa, sie sou oaru el kurunganang sie orekma in lukma in orala The Watchtower ke sie loom srisrik likinum. Sie len met solse pukanten elos forfor ke inkanek, a utyuk nu ke kais sie loom in sukok met fwusr su elos ku in pakiye in ekla met solse. Srakna oasr pal mwo lun mokul fwusr luo ke sou se inge in mwokla, tusruktu fwin met solse elos sukoltal in loom elos e fwa konaok a liye na paye ingen in orek me rid. Ma inge ku in kol nu ke keok a mise lun met nu kemwa in sou. Mea elos enenu in oru? Mukol fwusr luo inge elos kaskas ke pulaik, a srukak Jon 15:13: “Wangin lungse yurin met yok liki lungse se inge, tu sie met fwa filiye moul lal ke met kamwuk lal.” Elos sulela in muta na in loom. Met solse fwin elos utyuk elos fwa liyelos a wangin alollo elos fwa akkeokyeltal a saap uniltal elos fwin srunga in sroang nu ke solse. Aok, met solse elos tia enenu in suk a tuni ma nu kemwa in loom. Paenang ingen in orek buk a met saye in sou tia oasr ke me sensen. Tusruktu, ma sikyuk toko arulanu sakuruk. Met solse elos alukela liki loom inge a elos som nu ke loom saye! Met inge su oanu alu ma nu ke mwolanu el tia musalla, wikin ingen in orek buk, tu elos in ku in tafwela ke orekma lalos nu sin Jeova. Sie sin met fwusr luo inge wikin sister se lal elos kulansap ke Bethel ke pal inge; el srakna orekmakin ingen maa inge.
14 Met fwusr nu kemwa ku in lutiyuk fuka in pre, a God el long pre lalos. Sie me srikasrak mwo ke ma se inge el sikyuk ke lusen pal in akmas upa fwin an Rwanda. Ke pal se met koluk fwin an we elos tuku ke sie sou su oasr tulik srisrik yiu onkosr matwe wikin papa a nine kiel in unilosla ke sie bakudang, tulik srisrik inge el pre ke pusra lulap a siyuk ke pre in tia lela eltal in mise tu elos in ku in tafwela ke orekma lalos nu sin Jeova. Met koluk inge mokleyuk in tia unilosla, el fwak: “Nga tia ku in uni komwos ke sripen tulik mutan srisrik inge.”—1 Piter 3:12.
15 Pus sin met fwusr lasr tia enenu in muteng ke kain in ma upa su akkalemyeyuk inge, tusruktu oasr me srifwe puspis su elos sun ke loom lutlut a ke met koluk puspis ke len inge: kas koluk, pitse a me rid fokfok, me akengun koluk, a me purakak in oru ma koluk su tuku sin kutu met fwusr su oanu matwe lalos arulanu yokyokelik in an puspis. Pal puspis met sap Poul el sang kai lain me purakak koluk puspis inge.—1 Korint 5:6; 15:33, 34; Efesus 5:3-7.
16 Tokin el sramsram ke kutu alu “nu ke mwolanu a kutu nu ke tia mwolanu,” Poul el fwak: “Ke ma inge, kutena met fwin aknasnasyel liki ma se tok, el fwa sie alu nu ke sunak, akmutalyeyuk a fwal tu Leum lan orekmakin, akola tari nu ke orekma mwo nu kemwa.” Ke ma inge, lela kut in kaifwe nu sin met fwusr in taran ke asrouki lalos. Lela elos in “kaengla liki lung kulok lun met fwusr a fwasr tokin sumwosmwos, lalalfongi, lungse, misla oelulos su pang nu sin Leum ke inse nasnas.” (2 Timote 2:20-22, NW) Sie program ke sou in “musai sie sin sie” ku in sang kasru yok in aksasuye met fwusr. (1 Tessalonika 5:11; Soakas 22:6) Lutlut a ridi Baibel len nu kemwa, orekmakinyen me rid lun Society ku in me kasru yok.
Me Aksasu Nu Sesr Kemwa
17 Tu in aksasuye kut, Jeova el ase nu sesr kai su tuku ke Kas Lal ke inkanek lun u lal. Lela kut in tia lain kain in kai inge su tuku sin God! Eis ma inge ke lalmetmet, a lela ma inge in aksasuye kom fwal nu ke orekma lun Jeova. Soakas 3:11, 12 el kai kut: “Mwen nutik, nik kom pilesru kaiyuk lun Jeova; ku totola ke kai lal, tu el su Jeova el lungse el kai, oanu sie papa nu sin mwen se su el insemwomwo ka.” Sayen ma inge, kai su tuku sin papa akkalemyeyuk in Hibru 12:6-11: “Tu Jeova el kaelos su el lungse . . . Paye, kai nu kemwa in pal in kai tia oanu ma in akinsemwomwoye, a me akasorye; a tok, kai oswe fwako mutal in elos su kaiyuk tari, aok, fwako lun sumwosmwos.” Kas lun God su etuku ke ngun pa enenu sropun me kai inge.—2 Timote 3:16, 17.
18 Jeova el ouyepa pakoten. (Exodus 34:6) Fwin auliyuk na paye akkalemyeyuk fwinne ke ma koluk upa, el akola in sang nunuk munas. Fwinne ‘tulik engunyer’ ke len lasr ku in aksasuyeyuk nu ke alu su fwal in orekmakin. (Luk 15:22-24, 32) Saap ma koluk lasr tia arulanu upa oanu ma koluk lun tulik engunyer se. Tusruktu akos fwokpap lasr ke Ma Simusla el kasru kut pal nu kemwa in aksasuye kut nu ke alu su fwal in orekmakin.
19 Ke pal se ma kut tufwanu etu ma paye, kut akkalemye insemwomwo in lela Jeova in aksasuye kut. Kut fwasr liki inkanek lun fwalu se inge, a kut mutamwauk in nukomang met sasu, a ekla sie met Kristian su mwolela a baptais. Kut akos kai su oasr in Efesus 4:20-24, ‘in sisla met matu fwal nu ke oiyen moul lasr meet, su kulokla fwal nu ke lung kikiap, a kut nukomang met sasu, su fwal nu sin God orekla tari in sumwosmwos a mutal lun paye.’ Lela kut nu kemwa in tafwela in fwusesr ke paon Jeova, el su Met Potter Lulap, kulansap nu sel pal puspis oanu alu fwal nu ke orekma lal!
Kalweni
◻ Mea akmwuk lun Met Potter Lulap ke fwalu lasr inge?
◻ Fuka kom ku in ekla met sasu fwal nu ke orekma mwo?
◻ Ke inkanek fuka tulik nutusr elos ku in ekulla nu ke met sasu?
◻ Oiye fuka kut akkalemye ke kai?
[Study Questions]
1, 2. (a) Fuka mokul a mutan se meet su God el orala sie ma orekla mwo emeet? (b) Mea nien sun lun Met Potter Lulap paenang el orala Edam a If?
3. Fuka papa a nine se meet lasr elos ekla sie alu nu ke tia mwolanu a mea fwokin ma inge?
4. Ke kain in orekma mwo fuka kut ku in kulansapu?
5. Fuka usnguk lun Met Potter Lulap el fwa akkalemyeyuk?
6, 7. (a) Fuka met puspis misinge elos sulela in akfwalye moul lalos ke ma tia mwolanu? (b) Fuka met sumwosmwos aksasuyeyuk nu ke mwolanu?
8. (a) Mea ma inge su pakiye sie met el fwin kain in alu fuka ke pal fwasru? (b) Mea ma luo inge su lumala sie met?
9. Fuka kut ku in pusisel in topuk ke orekma lun Met Potter Lulap in aksasuye kut?
10. Fuka kut ku in kaifweung in fwasr tokin program puspis ke ma lun ngun?
11, 12. (a) Fuka kut ku in orekmakin kai lal Jemes fwin ke me srifwe su sun moul lasr ke len nu kemwa? (b) Fuka experience lal Job akkeye kut in srukye oaru lasr?
13, 14. (a) Nge papa a nine elos ku in mutamwauk in kasru tulik nutulos in nukomang met sasu, wikin fwinsrak fuka ke pal fwasru? (b) Fwako mwo fuka kom ku in srumon?
15. Poul el sang kas in sensen ke kain in me purakak koluk fuka?
16. Fuka sie met el ku in ekla sie alu su fwal in orekmakin?
17. Fuka kai el aksasuye kut, a kain in fwako mwo fuka ke pal fwasru ku in siyuk?
18. Fwin ke auliyuk, mea kut ku in lotela ke Luk sapter 15?
19. Fuka kut ku in tafwela in kulansap oanu alu fwal ke paon Jeova?
[Picture on page 20]
Ya kom lumala fwal nu ke orekma mwo ku tia?
[Picture on Page 22]
Met fwusr elos ku in eis kasru in nukomang met sasu ke pal se elos tulik me