Jeova El ‘Nuhnke Kom’ ac Karihngihn Kom

Kom ac etuh fuhkah lah kahs inge pwacye ac Jeova el nuhnke kom na pwacye? Sie srihpac uh pa, mweyen Bible uh fahk arlac kahlwem. Sie Peter 5:7 fahk: “Sang mwe fosrngah lowos nuhkewa nuh sel, mweyen el nuhnke kowos.” Mwe ahkpwacyeye fuhkah oasr yurum in luhlahlfongi lah Jeova God el nuhnke kom ac karihngihn kom?

GOD EL SANG MWE ENENUH LUHN MWET UH

Oasr ohiyac wo luhn God ma kom luhngse sin kawuck fototo lom uh. Mwet suc ahkkahlwemye ohiyen kuhlwacng ac engan in sang nuh sin sie sin sie eltahl arlacna fototo. In oacna ma kom kuh in liye tari uh, Jeova el kuhlwacng ac engan in sang nuh sin mwet ke lwen nuhkewa. Nuhnkuh ke mwe puhpuhlyuck se inge: “El oruh kalmen faht lal uh in sreyac mwet kuluk ac mwet wo oacna sie, ac El sang pac af nuh fin mwet suwohs ac mwet sesuwohs.” (Matthew 5:45) Ma wo fuhkah faht ac af uh use nuh sesr? Ke inkacnek luhn af, faht ac kuhtuh pac ma sahyac, God ‘El sang mwe mongo nuh sin mwet ac nwacklah insiacltahl ke engan.’ (Orekma 14:17) Ahok, Jeova el oruh tuh facluh in oraclah mongo pucspucs. Ac oasr na kais kuhtuh ma sahyac ma kuh in ahkenganye kuht liki na sie mongo yucyuc.

Pwacnacng, efuh kuh arlacna puhkantwen mwet suc masrinsracl? Ma ke srihpen mwet kol ke politic eltahl kwacna suk in eis kuh ac mani liki na in ahkwoye moul luhn mwet uh. Ke pacl na sa, Jeova el fah ahkwoyelah ma upac nuhkewa ma tuhkuh ke srihpen rahpkuh. El ac fah oruh ma inge ke el ac ahkwacngihnyelah oakwuck luhn politic ma oasr ke pacl inge ac oakiyac sie Tohkohsrahi ma Jesus el fah kol kac inkuhsrao. Ke pacl sacn, wacngihn mwet fah sifwil masrinsracl. Finne ma inge soenna sikyak, God el ahkkweye mwet kuhlwacnsap oaru lal ke pacl inge. (Psalm 37:25) Yac tiac pa inge sie inkacnek yohk ma ahkkahlwemye lah el nuhnke kuht?

JEOVA EL TIAC SROHWOHSRKIHN PACL LAL UH

Sie kawuck wo el orekmakihn pacl lal nuh sum. Sahp el kuh in sislah ao pucspucs in sramsram nuh sum ke ma komtacl kewa luhngse. Ac sie kawuck wo el ac lohng ahkwoyac ke pacl ma kom fahk nuh sel ke ma upac lom ac mwe elyah lom uh. Yac Jeova el lohacng nuh sesr ohinge? Ahok! El pa lohng puhruhe lasr uh. Pwacnacng, Bible uh ahkkweye kuht in “sikaleni in puhruhe” ac in “puhruhe pacl nuhkewa.”​—Rome 12:12; Sie Thessalonica 5:17.

Puhtahkah Jeova el luhngse in lohng puhruhe lom nuh sel uh? Sie mwe puhpuhlyuck ke Bible uh topuk ma inge nuh sesr. Meet liki Jesus el sulaclah mwet sap lal uh, “el sislah fong nohfohn se we in puhruhe nuh sin God.” (Luke 6:12) Ke puhruhe se lal Jesus inge, sahp el sruhmuhn kais sie mwet tuhma lutlut lal uh ke ineltahl, ke ohiyac wowo pucspucs, mwe muhnahs laltahl uh, ac el siyuck Pahpah tuhmwacl uh in kahsrel in sulaclah. Ke pacl se faht uh takack ac sie lwen sasuc muhtwacwacack, Jesus el etuh lah mwet ma fal emeet in kuhlwacnsap oacna mwet sap lal pa el sulaclah inge. Ke srihpen Jeova el lohng ac “topuk puhruhe” uh, pwacnacng el insewowo in lohng mwet nuhkewa suc puhruhe ke inse pwacye. (Psalm 65:2) Finne sie mwet el puhruhe ke lusen ao pucspucs ke sie mwe elyah yohk lal, Jeova el tiac nuhnkuh ke lusen pacl inge.

GOD EL LUHNGSE IN NUHNAK MUHNAHS

Kuhtuh pacl uh, upac nuh sin kawuck wo uh in nuhnak muhnahs nuh sin sie sin sie. Ke kais kuhtuh pacl, mwet uh tulokihnyac fototo laltahl nuh sin mwet suc eltahl kawuck nuh se ke lusen pacl na loeloes ke srihpen eltahl puhla muh upac nuh seltahl in nuhnak muhnahs. Jeova el tiac ohinge. Bible uh suli mwet inse pwacye nuhkewa in siyuck ke nuhnak muhnahs lal, mweyen “El pahkotwen ac sa in nuhnak muhnahs.” (Isaiah 55:6, 7) Efuh kuh God el luhngse in nuhnak muhnahs?

Srihpac uh pa luhngse yohk lal uh. El luhngse na pwacye mwet uh pwacnacng el kihsackuhnlah moul lal Jesus tuh in molwelah mwet uh liki ma kuluk ac mwe sensen ma kuht kuh in eis kac. (John 3:16) Mwe molwelah uh use ma wowo pucspucs. Ke srihpen mwe kihsac luhn Christ, God el kuh in nuhnak muhnahs nuh sin mwet suc el luhngse. Mwet sap John el suhmuhslah: “A kuht fin fahkwack ma kuluk lasr nuh sin God, El ac fah ahkpwacyei wuhlelah lal ac oruh ma suwohs, El ac fah nuhnak muhnahs nuh sesr ke ma kuluk lasr.” (Sie John 1:9) Ke srihpen nuhnak muhnahs luhn Jeova, mwet uh kuh in tahfwelah na in fototo nuh sel ac ke kuht etuh ma inge uh, arlacna mokle insiacsr.

EL KAHSRE KOM KE PACL KOM ENENWACL

Sie kawuck pwacye el ahkolah in sang kahsruh nuh sin mwet sahyac ke pacl ma eltahl enenuh kahsruh. Yac Jeova el oruh pac ma inge? Kahs lal uh fahk: “Elos fin ikori, elos ac fah tiac muhta na ten, mweyen LEUM GOD El ac tulohkuhnuhlosyak.” Jeova el ‘tulohkuhnwack mwet kuhlwacnsap lal’ uh ke inkacnek pucspucs. Lohacng nuh ke ma sikyak nuh sin sie muhtwacn fuhsr fin acn Caribbean Island of St. Croix.

Muhtwacn fuhsr se inge ahkkulukyeyuck sin tuhlihk lutlut wiyacl uh ke srihpen luhlahlfongi lal mweyen el tiac ahkfuhlwactye flag uh. Tukun el puhruhe nuh sin Jeova ke kahsruh, el sulaclah in ahkuhtweyac ke ma inge. Ke sie report ma el oruh ke lutlut uh, el sramsram ke sifac inge, ahkfuhlwactyeyacn flag. El orekmakihn Buk in Sramsram lun Baibel Nutik in ahkuhtweyac lah ma sikyak nuh sel Shadrach, Meshach ac Abednego inge pa mokle sulaclah lal uh. El fahk: “Jeova el karihngihn tuhlihk Hebrew tolu inge ke srihpen eltahl tiac alu nuh ke ma sruhloaclah sac.” Tohkoh, el siyuck sin mwet nuhkewa suc wi lohng kac eltahl fin luhngse in eis nahtuhltahl puk inge. Singucul sie sin tuhlihk lutlut wiyacl uh luhngse in eis. Muhtwacn fuhsr se inge arlacna engan ke el akihlen lah Jeova el sang kuh ac lahlmwetmwet nuh sel in sang ma loh ke sifac na yohk srihpac se inge.

Fin oasr pacl ma kom ahlohloh kac lah Jeova el nuhnke kom ac karihngihn kom na pwacye, nuhnkuh ke ma suhmuhslah luhn Bible uh, oacna Psalm 34:17-19; 55:22; ac 145:18, 19. Siyuck sin mwet Loh suc wi ke ma pwacye ke lusen pacl loeloes lah Jeova el karuhnguhnuhltahl fuhkah. Ac ke pacl ma kom enenuh kahsruh luhn God, puhruhe nuh sel ke ma ingacn. Kom ac fah liye ke pacl na sa lah Jeova el ‘nuhnke kom’ ac karihngihn kom.