Efuh Kuh Kuht Enenuh in Tuhkweni nuh sie in Alu?

1-3. (a) Mwet Christian uh ahkkahlwemye fuhkah lah eltahl engan in tuhkweni ke lohm in toeni uh? (Liye petsac se meet ke mwe lutlut se inge.) (b) Meac kuht ac fah sramsramkihn ke mwe lutlut se inge?

KE PACL se Corinna el yac 17, ninac kiyacl ah sruhoh ac suhpweyucklac el nuh ke labor camp kuh acn in kaclpous ma ahkkohsyeyuck mwet we. Tohkohyang, utucklac pac Corinna ke tausin mael liki yen sel nuh Siberia. Ke ac se inge, el orekma ke sie acn in karihngihn kosro ac ahkkohsyeyuck pac el. Ke kais kuhtuh pacl, sapkihnyuck elan orekma lihkihnum ke pacl ma arlacna ohu ac nuknuk lal uh tiac ma ac kuh in ahkfucsrfucsryacl. Finne ohinge, Corinna ac sie pac muhtwacn lili eltahl sulaclah muh eltahl ac suk inkacnek nuhkewa ma eltahl ac kuh in som wi ke sie toeni luhn congregation.

² Corinna el fahk: “Kuht som liki acn in orekma lasr ah ke ekuh ac fahsr ke lusen mael 15 nuh ke sie acn in tui luhn train. Train soko inge muhtwacwacack kahsruhsr ke ao luo ke lututacng, ac kuht kahsruhsr ke lusen ao ohnkohsr, na kuht srolah ac fahsr ke lusen mael ohnkohsr nuh ke lohm in toeni uh.” Corinna el arlacna engan lah el oraclah fuhfahsryucsr se lal inge. El fahk: “Ke toeni uh, kuht lutlutkihn Tower in San ac kuht yuck on in kaksak nuh sin Jeova. Ma kuht puhla inge nuhkewa mwe ahkkweye na yohk nuh ke luhlahlfongi lasr uh.” Muhtwacn lili luo inge fohlohk nuh ke acn in imac ah tukun lwen tolu, tuhsruhktuh mwet se suc liyacacng imac inge tiacna lohacng nuh kac lah eltahl wacngihn ne tuhfahna fohlohk.

³ Mwet luhn Jeova uh engan in tuhkweni nuh sie pacl nuhkewa. Ke sie mwe puhpuhlyuck, mwet Christian ke pacl meet ah arlacna engan in tuhkweni alu nuh sin Jeova ac lutlut kacl. (Orekma 2:42) Ahok, kahlwem lah kom engan pac in som nuh ke miting nuhkewa. Tuhsruhktuh, in oacna mwet lili nuhkewa wiyom uh, sahp kom puhla muh upac kom in wi ke toeni pacl nuhkewa. Sahp srihpac uh pa, arlacna yohk pacl ma kom sislah ke orekma lom uh kuh puhs ma kom enenuh in oruh kuh kom ullac pacl nuhkewa. Pwacnacng, meac ac kuh in kahsre kuht in sang kuhiyacsr kewa in wi ke toeni lasr uh?^[1] (Liye endnote.) Kuht ac ahkkweye fuhkah mwet lutlut lasr ke Bible ac kuhtuh pac mwet sahyac in wi miting ke pacl nuhkewa? Mwe lutlut se inge ac fah ahkuhtweyac lah efuh kwacfeacng in wi ke miting (1) wo nuh sesr, (2) sang kahsruh nuh sin mwet sahyac, ac (3) ahkinsewowoye Jeova.^[2]​—Liye endnote.

TOENI NUHKEWA WO NUH SESR

4. Toeni uh kahsre kuht fuhkah in ahkyohkye etwacack lasr kacl Jeova?

⁴ Toeni uh luti kuht. Toeni nuhkewa kahsre kuht in ahkyohkye etwacack lasr kacl Jeova. Ke sie mwe puhpuhlyuck, inkaiyen congregation uh lutlutkihn puk se inge Draw Close to Jehovah ke Lutlut luhn Congregation ke Bible. Meac kom puhla ke kuht sramsramkihn ohiyac pucspucs luhn Jeova ac ke pacl se kom lohng lah fuhkah puhlakihn luhn mwet lili wiyom uh kacl? Kahlwem lah ma inge ahkyohkye luhngse lom nuh sin Jeova liki na meet ah. Ke acn in toeni uh, kuht oacyacpac etwaclah ma pucspucs ke Bible uh ke kuht lohacng ahkwoyac nuh ke mwe sramsram, mwe luhmah ac ke ritiyuck Bible uh. (Nehemiah 8:8) Nuhnkuh pac ke ma pucspucs ma kuht konwacack ke wik nuhkewa ke pacl ma kuht ahkolah nuh ke rit Bible lasr ac lohng ma mwet sahyac uh lotwelah kac.

5. Toeni uh kahsre kom fuhkah in orekmakihn ma kom lotwelah ke Bible uh in ahkwoye inkacnek in luti lom uh?

⁵ Toeni lasr uh, luti kuht in orekmakihn kahs in kahsruh luhn Bible ke ip nuhkewa ke moul lasr uh. (Sie Thessalonica 4:9, 10) Ke sie mwe puhpuhlyuck, kom nuh wi tari ke sie lutlut ke Tower in San ma mokle kom in ahkyohkye kuhlwacnsap lom nuh sin Jeova, in ahkwoye inkacnek in puhruhe lom, kuh in nuhnak muhnahs nuh sin sie mwet lili wiyom? Toeni se ma muhta orek ke infulwacn wik pa luti kuht in fahkwack pweng wo ac in kahsruh mwet sahyac in kahlwem ke ma pwacye in Bible.​—Matthew 28:19, 20.

6. Toeni lasr uh ahkkweye kuht ac kahsre kuht fuhkah in tu na kuh?

⁶ Toeni uh ahkkweye kuht. Facl se lal Satan inge srihke in ahkmuhnahsye luhlahlfongi lasr uh ac ma inge ac kuh in oruh kuht in elyah ac inse toasr. Tuhsruhktuh, toeni lasr uh ahkkweye kuht in tahfwelah na in kuhlwacnsuhpuh Jeova. (Riti Orekma 15:30-32.) Inkaiyen pacl uh, kuht sramsramkihn inkacnek ma kahs pahluh in Bible uh ahkpwacyeyuck kac. Ma inge ac kuh in kahsre kuht in luhlahlfongi na pwacye lah wuhlelah luhn Jeova ke pacl fahsruh uh ac ahkpwacyeyuck. Mwet lili wiyacsr uh ahkkweye kuht ke pacl eltahl oruh mwe sramsram laltahl ac ke pacl ma eltahl sang top ac kaksakihn Jeova ke on in kaksak ma tuhkuh ke insiacltahl. (Sie Corinth 14:26) Ac ke pacl ma kuht sramsram nuh seltahl meet liki ac tukun miting, kuht puhla mwe ahkkweye ke srihpen puhs kawuck lasr ma nuhnkuh na pwacye kacsr.—Sie Corinth 16:17, 18.

7. Efuh kuh arlacna yohk srihpac in wi ke toeni nuhkewa?

⁷ Ke toeni uh, kuht eis kahsruh ke nguhn muhtahl luhn God. Jesus el orekmakihn nguhn muhtahl in kol congregation uh. El fahk nuh sesr lah kuht enenuh in “lohng ma nguhn el fahk nuh sin church [“congregation,” NW] uh!” (Fwackyuk 2:7) Nguhn muhtahl ac kuh in kahsre kuht in muhtwacnglah mwe srihfe ac in puhlaik in fahkwack. Ma inge ac kuh pac in kahsre kuht in oraclah sulaclah wo. Pa inge srihpac se pwacnacng kuht enenuh in sang kuhiyacsr kewa in wi ke toeni nuhkewa ac eis kahsruh luhn God ke nguhn muhtahl.

KUHT KAHSRUH MWET SAHYAC KE ACN IN TOENI UH

8. Ke pacl mwet lili wiyacsr uh liye kuht ke acn in toeni uh ac eltahl lohng top lasr ac ke kuht on, ma inge kahsreltahl fuhkah? (Liye pac pohk se inge, “El Engan Pacl Nuhkewa Tukun Toeni Uh.”)

⁸ Ke toeni uh, pa inge pacl wo lasr in ahkkahlwemye nuh sin mwet lili wiyacsr lah kuht luhngse eltahl. Mwet pucspucs ke congregation uh muhtweng ke ma upac pucspucs. Mwet sap Paul el suhmuhslah: “Lela kut in arulana nunku ke sie sin sie.” (Hebrew 10:24, 25) Kuht kuh in ahkkahlwemye lah kuht nuhnkuh ke mwet lili wiyacsr uh ke kuht tuhkweni nuh sie ac ahkkweye sie sin sie. Ke kuht som nuh ke toeni uh, kuht ahkkahlwemye nuh sin mwet lili wiyacsr lah kuht luhngse in weluhltahl ac sramsram nuh seltahl. Kuht luhngse pac in etuh ke puhlakihn laltahl. Kuht oacyacpac ahkkweyacltahl ke pacl ma eltahl lohng ke kuht top ac on ke insiacsr.​—Colossae 3:16

9, 10. (a) Ahkuhtweyac lah kahs lal Jesus ke John 10:16 inge, ac kahsre kuht fuhkah in kahlwem kac lah efuh yohk srihpac kuht in toeni yurin mwet lili wiyacsr uh. (b) Kuht fin wi ke toeni pacl nuhkewa, kuht kuh in kahsruh fuhkah sie mwet suc sruhngacyuck sin sucu lal uh?

⁹ Ke pacl ma kuht wi ke toeni uh, kuht kahsruh congregation uh in fototo nuh sin sie sin sie. (Riti John 10:16.) Jesus el kalmackuhnuhl nuh ke sie mwet shepherd ac mwet lal uh nuh ke un sheep. Srihke nuhnkuh ke ma inge: Fin sheep lukoac muhta ke finohl uh ac lukoac pac sheep ac muhta infahlfahl uh, ac soko pac oasr ke sie pacna acn, yac sheep lihmekohsr inge wi ke un sheep sefanna? Moh, mweyen un sheep inge tuhkweni pacl nuhkewa ac ukwe mwet shepherd la uh. Ke inkacnek se pacna inge, kuht tiac kuh in ukwe mwet Shepherd lasr uh kuht fin sifacna srikuhtlac. Kuht enenuh in tuhkweni yurin mwet lili wiyacsr uh tuhfah kuht wi ke “u sefanna” ye “mwet shepherd sefanna.”

¹⁰ Toeni lasr uh kahsre kuht in inse sefanna oacna sie sucu. (Psalm 133:1) Oasr mwet ke congregation uh ma sruhngacyuck sin sucu na fototo laltahl oacna pahpah ac ninac kuh tuhlihk wiyacltahl suc tiac wi ke luhlahlfongi uh. Tuhsruhktuh, Jesus el wuhlelah muh el ac sang sucu ma ac fah luhngse eltahl ac karuhnguhnuhltahl. (Mark 10:29, 30) Kom fin wi ke toeni pacl nuhkewa, kom kuh in eklac oacna sie pahpah, ninac, mukul kuh muhtwacn wiyen sie mwet ke congregation uh. Kuht fin nuhnkuh ke ma inge, kuht ac luhngse in sang kuhiyacsr kewa in wi ke toeni nuhkewa.

KUHT AC AHKINSEWOWOYE JEOVA

11. Ke kuht wi ke toeni uh, ma inge kahsre kuht fuhkah in sang nuh sin Jeova ma fal elan eis?

¹¹ Ke toeni uh, kuht sang nuh sin Jeova ma fal elan eis. Ke srihpen el pa orekuhtlac uh, kuht enenuh in sang kuloh, wolacna ac kaksak nuh sel. (Riti Fwackyuk 7:12.) Kuht kuh in oruh ma inge ke pacl ma kuht puhruhe nuh sin Jeova, yuck on in kaksak, ac sramsramkuhnuhl ke pacl in toeni uh. Pacl na wowo se nuh sesr pa inge in alu nuh sin Jeova ke wik nuhkewa!

12. Meac puhlakihn luhn Jeova ke pacl ma kuht ahkos masap lal in wi ke toeni nuhkewa?

¹² Jeova el orekuhtlac ac kuht enenuh in ahksol. El sapkihn nuh sesr in tiac pihlesruh toeni nuhkewa lasr uh, yohk na ke kuht apkuhranyang nuh ke sahflah uh. Pwacnacng ke kuht ahkos masap se inge, Jeova el insewowo. (Sie John 3:22) El akihlen lah kuht luhngse na pwacye in wi ke toeni uh ac el ahksacohkye kwacfeacng nuhkewa lasr uh.​—Hebrew 6:10.

13, 14. Kuht ac fototoyang fuhkah nuh sin Jeova ac Jesus ke pacl in toeni uh?

¹³ Ke kuht wi nuh ke toeni uh, kuht ahkkahlwemye nuh sin Jeova lah kuht luhngse in fototo nuh sel ac nuh sin Wen nahtuhl. Ke toeni uh, Jeova el luti kuht ke inkacnek luhn Bible ke ma kuht enenuh in oruh ac kuht ac moulkihn fuhkah moul lasr uh. (Isaiah 30:20, 21) Finne ke pacl ma oasr mwet suc tuhkuh wi miting suc tiac kuhlwacnsuhpuh Jeova, eltahl akihlen lah God pa kol kuht uh. (Sie Corinth 14:23-25) Jeova el kol toeni lasr uh ke nguhn muhtahl lal ac ma kuht lotwelah ke toeni lasr inge ma tuhkuh sel me. Pwacnacng, ke pacl se kuht som nuh ke toeni uh, kuht lohng ma Jeova el fahk uh, kuht puhla luhpan luhngse lal nuh sesr ac kuht fototoyang nuh sel.

¹⁴ Jesus suc sifen congregation, el fahk: “Tuh yen nuhkewa ma oasr mwet luo kuh tolu tuhkweni we inek, nga fah weluhlos pac.” (Matthew 18:20) Bible uh oacyacpac fahk lah Jesus el muhta “inmahsrlon” mwet ke congregation luhn God uh. (Fwackyuk 1:20–2:1) Arlac kahlwem lah Jeova ac Jesus eltahl wi kuht ac ahkkweye kuht ke pacl in toeni lasr uh. Meac kom nuhnkuh muh Jeova el puhla ke el liye lah kom sang kuhiyom kewa in fototo nuh sel ac nuh sin Wen nahtuhl?

15. Wi lasr nuh ke toeni uh ahkkahlwemye fuhkah lah kuht luhngse in ahkos God?

¹⁵ Ke kuht wi toeni uh, kuht ahkkahlwemye nuh sin Jeova lah kuht luhngse in ahksol. Jeova el tiac pahtok kuht in ahkos ma el fahk uh. (Isaiah 43:23) Pwacnacng, ke pacl se kuht sulaclah in ahkos masap lal in wi ke toeni nuhkewa, kuht ahkkahlwemye nuh sel lah kuht luhngse el ac kuht luhlahlfongi lah oasr suwohs lal in fahk nuh sesr ma kuht in oruh. (Rome 6:17) Ke sie mwe puhpuhlyuck, meac kuht ac oruh fin mwet kol ke yen in orekma lasr uh luhngse kuht in ahkyohkye pacl in orekma lasr ac ma inge oruh kuht in tiac wi ke toeni uh pacl nuhkewa? Kuh sahp, mwet kol luhn acn uh fahk muh kuhtwena mwet fin tuhkweni in alu nuh sin Jeova, el ac enenuh in moli luhpah se, som nuh in presin, kuh kalyeiyuck ke sie ma na upac. Kuh sahp, oasr pacl ma kuht puhla muh oasr ma kuht ke oruh sahyac liki na in som wi miting. Ke kain in pacl inge, kuht enenuh in sulaclah lah meac kuht ac fah oruh. (Orekma 5:29) Tuhsruhktuh ke kais sie pacl ma kuht sulaclah in ahkos Jeova, kuht ahkinsewowoyacl.​—Soakas 27:11.

TAHFWELAH NA TOENI YURIN MWET LILI WIYOM

16, 17. (a) Kuht etuh fuhkah lah mwet Christian in pacl meet ah arlacna ahksacohkye pacl in toeni uh? (b) Meac Brother George Gangas el puhla ke toeni uh?

¹⁶ Tukun mwet Christian in pacl meet ah tuhkweni ke Pentecost in yac 33, eltahl tahfwelah in toeni alu nuh sin Jeova pacl nuhkewa. “Elos arlacna eisaclosyang in porongo ac lutlut sin mwet sap uh, oacyacpac aengani yurin sie sin sie.” (Orekma 2:42) Ac eltahl tiac tui in toeni nuh sie, finne ke pacl ma kalyeiyuck eltahl sin government luhn mwet Rome ac sin mwet kol ke alu luhn mwet Jew. Finne ma inge tiac fihsracsr, eltahl kwacfeacng ac tahfwelah na in toeni nuh sie.

¹⁷ Mwet kuhlwacnsap pucspucs luhn Jeova ke pacl inge eltahl oacyacpac ahksacohkye toeni nuhkewa ac eltahl engan in som nuh kac. George Gangas, suc wi ke Un Mwet Suc Liyacacng Orekma Nuhkewa Lasr Fin Facluh Nohfohn ke yac longoul kuhtuh, el fahk: “Nuh sihk, sie mwe ahkkweye ac mwe insewowo na yohk ke moul pa in toeni yurin mwet lili uh. Fin nga kuh, nga luhngse na pwacye in wi som emeet nuh we ac in som etok liki Lohm in Toeni uh. Nga puhla engan yohk ke pacl ma nga sramsram nuh sin mwet luhn God uh. Ke pacl se nga muhta inmahsrloltahl, oacna in nga muhta ke lohm sihk ac wi sucu luhk uh. Ma inge oacna sie paradise suc oasr mislac kac inmahsrlon mwet lili.” El oacyacpac fahk: “Luhngse ac kena yohk luhk uh pa in wi ke toeni nuhkewa.”

18. Meac kom puhla ke toeni nuhkewa lasr uh, ac meac kom sulaclah in oruh?

¹⁸ Yac pa pacna inge ma kom puhla ke alu lom nuh sin Jeova? Fin ohingacn, tahfwelah na ke kwacfeacng lom in toeni yurin mwet lili wiyom, finne ke pacl ma upac. Ahkkahlwemye nuh sin Jeova lah kom puhla oacna Tohkohsrah David, suc fahk: “LEUM GOD, nga luhngsihk lohm suc kom muhta we.”​—Psalm 26:8.