Lwelah Ohiyen Muhtweng in Ahksahfyelah Orekma La

1, 2. (a) Meac kuht kuh in lotwelah ke ohiyen muhtweng lal Gideon ac mukul 300 lal ah? (Liye petsac se meet ke mwe lutlut se inge.) (b) In fal nuh ke Matthew 24:13, efuh kuh yohk srihpac in muhtweng?

SRIHKE luhmahlah ke nuhnak lom an mweun na upac se inmahsrlon solse luhn acn Israel suc kolyuck sel mwet nuhnuhnkuh Gideon ac mwet lokoalok laltahl uh. Gideon ac mwet lal ah ukwe mwet Midian ac muhtuhnfacl sahyac ma weluhltahl inge ke lusen mael 20 ke fong na fohn se! Bible uh fahk nuh sesr ke ma sikyak tohkoh uh: “In pacl se inge, Gideon ac mwet tolfoko lal ah tuhkuh nuh Infacl Jordan ac fahsr ahluhkwelah. Elos arulacna tohtohlah.” Tuhsruhktuh, eltahl soenna kuhtanglah ke mweun se inge ac srackna oasr solse 15,000 ma eltahl enenuh in acnwuck lain. Mwet lokoalok inge ahkkohsye mwet Israel ke lusen yac pucspucs, pwacnacng eltahl tiac kuh in fuhleack. Pwacnacng, Gideon ac mwet lal ah tahfwelah na ukwe mwet lokoalok laltahl inge ac ke sahflahiyac ah eltahl kuhtanguhltahllah!​—Mwet Nununku 7:22; 8:4, 10, 28.

² Kuht oacyacpac wi ke sie mweun na upac ke pacl inge. Mwe lokoalok lasr uh pa Satan, facl se lal inge ac ohiyac sesuwohs lasr sifacna. Kuhtuh sesr lain mwe lokoalok lasr inge ke lusen yac pucspucs. Ke kahsruh luhn Jeova, kuht kuhtanglah kuhtuh sin mwe lokoalok lasr inge. Tuhsruhktuh, kuht soenna kuhtanglah nohfohn. Kuhtuh pacl uh, kuht tohtohlah ke lainyac. Kuh sahp, kuht tohtohlah ke soaneyacn oakwuck kuluk se inge in tari sahflah. Jesus el sensenkihn kuht lah ac fah oasr mwe srihfe ac mwe kalyei upac ke lusen lwen sahflah inge. Tuhsruhktuh, el oacyacpac fahk lah kuht fin muhtweng na kuht kuh in kuhtanglah. (Riti Matthew 24:13.) Meac se inge muhtweng? Meac ac kuh in kahsre kuht in muhtweng? Meac kuht kuh in lotwelah sin mwet suc muhtweng? Ac kuht ac “lwelah ohiyen muhtweng in ahksahfyelah orekma la” ke inkacnek fuhkah?​—James 1:4.

MEAC SE INGE MUHTWENG?

3. Meac se inge muhtweng?

³ Ke Bible, kalmen muhtweng el tiac kalmackihn muhkwena in mongfihsracsr ke pacl upac. El oacyacpac kalmackihnyuck nuh ke nuhnak ac puhlakihn lasr ke ma upac lasr uh. Ohiyen muhtweng el kahsre kuht in puhlaik, oaru ac in soano na. Sie puk el fahk lah, muhtweng el sie ohiyac ma kahsre kuht in sruokyac kuh sie finsrak na wo ac in tiac fuhleack ke pacl ma kuht sun ma upac. Ma inge kahsre kuht in tu na kuh ac in tiac mukwikwi finne ke pacl ma upac emeet uh. Ac ma inge kahsre kuht in furohklah ma upac uh nuh ke kuhtanglah, ac in nuhnkuh na ke finsrak lasr uh, tiac ke mwe kweok lasr uh.

4. Efuh kuh kuht kuh in fahk muh luhngse pa mokle sie mwet in muhtweng?

⁴ Luhngse pa mokle kuht in muhtweng uh. (Riti Sie Corinth 13:4, 7.) Ke inkacnek fuhkah? Luhngse lasr nuh sin Jeova uh mokle kuht in muhtweng ke kuhtwena ma el lwelah. (Luke 22:41, 42) Luhngse lasr nuh sin mwet lili wiyacsr uh kahsre kuht in muhtweng ke ohiyac sesuwohs laltahl uh. (Sie Peter 4:8) Luhngse lasr nuh sin mukul tuhmwacsr kuh muhtwacn kiyacsr uh, kahsre kuht in muhtweng ke ma upac finne siacnyacn ma engan ke pahyuck la uh puhla pac ac ma inge sang kahsruh in ahkkweye moul in pahyuck lasr uh.​—Sie Corinth 7:28.

MEAC AC KUH IN KAHSRE KOM IN MUHTWENG?

5. Efuh kuh Jeova pa wo emeet in kahsre kuht in muhtweng?

⁵ Siyuck sin Jeova ke kuh. Jeova pa “God, suc sesseslah ke mongfihsracsr ac mwe ahkkweye.” (Rome 15:5) El muhkwena pa etuh na pwacye ohiyac ma sikyak nuh sesr uh, puhlakihn lasr, ac ma nuhkewa kacsr. Pwacnacng, el etuh lah meac na pwacye kuht enenuh tuh kuht in muhtweng. Bible uh fahk: “El ahkfalye enenuh lalos nuhkewa suc ahkfuhlwactyacl, El lohng puhsren tuhng lalos ac molweloslac .” (Psalm 145:19) Tuhsruhktuh, God el ac topuk fuhkah puhruhe lasr in eis kuh tuh kuht in muhtweng?

6. In oacna ma Jeova el wuhlelah ke Bible, el ac use “inkacnek in muhtwacnglah ac kahingkuhnlah” ma upac lasr uh ke inkacnek fuhkah?

⁶ Ke pacl ma kuht siyuck Jeova elan kahsre kuht in muhtweng inge, el wuhlelah lah el ac fah use “inkacnek in muhtwacnglah ac kahingkuhnlah ma inge.” (Riti Sie Corinth 10:13.) El ac oruh fuhkah? Kuhtuh pacl uh el ac ahkwacngihnyelah ma upac sacn. Tuhsruhktuh, inkaiyen pacl uh el ac use kuh nuh sesr tuh kuht in “muhtwacnglah ma nuhkewa ke mongfihsracsr, ac . . . engan.” (Colossae 1:11) Ac ke srihpen el etuh kuhiyacsr, nuhnak lasr ac puhlakihn lasr uh, Jeova el ac fah tiacna lwelah sie ma in upaclah ne kuht tiac kuh in sruokyac ohiyen oaru lasr nuh sel.

7. Sang sie mwe puhpuhlyuck an lah efuh mongo in nguhn uh enenweyuck tuhfah mwet se kuh in muhtweng.

⁷ Mongo in nguhn pa ahkkweye luhlahlfongi lom an. Efuh kuh yohk srihpac mongo in nguhn uh? Nuhnkuh ke mwe puhpuhlyuck se inge: In fanuhkyac finohl soko inge pahngpahng Mount Everest, mwet se ac enenuh in kang mongo nwacl ke lwen se in oacna nuh ke suhnuhn lwen tolu kuh ahkosr. Ma inge yohk liki na ma mwet pucspucs enenuh na pwacye uh. In muhtweng ac sun finsrak se lal inge, ac enenuh in yohk mongo ma mwet fanfan se inge kanglah. Ke inkacnek se pacna inge, enenuh in yohk mongo lasr in nguhn tuh kuht in muhtweng ac sun finsrak lasr uh. Kuht enenuh in kwacfeacng ac oraclah pacl in oruh lutlut lasr sifacna ac wi ke miting. Ma inge nuhkewa ac fah use mwe enenuh lasr tuh kuht in sruokyac kuh luhlahlfongi lasr uh.​—John 6:27.

8, 9. (a) In fal nuh ke Job 2:4, 5, meac kuht enenuh in nuhnkuh kac ke pacl se kuht sun ma upac uh? (b) Ke pacl ma kom sun ma upac uh, meac kom ac kuh in petsacelah ke nuhnak lom an?

⁸ Esam oaru lom nuh sin God uh. Ke pacl ma kuht sun ma upac uh, oasr ma sahyac ma kuht enenuh pac in nuhnkuh kac. Oaru lasr nuh sin God uh srihfeyuck ke kain in pacl inge. Ohiyacsr nuh ke sie mwe srihfe pa ac fah ahkkahlwemye lah kuht nuhnkuh kacl Jeova oacna mwet kol na pwacye lasr fin ma nuhkewa. Ke inkacnek fuhkah? Satan, suc sie mwet lokoalok luhn God el lain kolyuck luhn Jeova in fahk muh mwet uh kuhlwacnsuhpuh God ke na srihpen ma wo ma eltahl ac eis kac uh. Satan el fahk: “Mwet se ac kuh na in pihlacsraclah ma nuhkewa lal elan muh kuh in moul.” Ac el fahk pac ma inge kacl Job: “Tuhsruhktuh, kom ac fin ahkkulukyelah mahnol [Job], el ac ngwetoht nuh sum ac selngawikomi!” (Job 2:4, 5) Yac Satan el nuh eklac tukun pacl se ma el fahk kahs in lain inge? Moh, el tiac! Yac pucspucs tohkoh, ke Satan el sisilac liki inkuhsrao, el srackna fahk kahs in lain ke mwet kuhlwacnsap oaru luhn God inge. (Fwackyuk 12:10) Ke pacl inge, Satan el srackna fahk muh mwet uh kuhlwacnsuhpuh God ke srihpen ma wo ma eltahl ac fah eis kac uh. El arlacna engan in liye ke kuht pihlesruh kolyuck suwohs luhn God ac tilac kuhlwacnsuhpwacl.

⁹ Ke pacl se kom kweok ke srihpen ma upac lom, srihke petsacelah ke nuhnak lom an ma inge: Satan ac lipufacn kuluk lal uh tu ke sie lacyen ah. Eltahl liye lah meac kom ac oruh ac eltahl fahk muh kom ac fuhleack. Mwet ma tu ke lacyen se sahyac an pa Jeova, Jesus Christ suc Tohkohsrah lasr, mwet akmuhsralah suc ahkmoulyeyuckyak tari ac tausin sin lipufacn pucspucs. Eltahl oacyacpac liye ma upac se lom inge, tuhsruhktuh eltahl kahluhkluhk keim! Eltahl engan in liye lah kom kuh in muhtwacnglah ac sruokyacna oaru lom nuh sin Jeova. Na kom lohng ke Jeova el fahk ma inge nuh sum: “Wen nuhtihk, kom in lahlmwetmwet, ac ahkenganye insiuck, tuh nga fah kuh in tohpkuhl suc ahngonyuc.”​—Soakas 27:11, BMK.

10. Kom ac etahel Jesus fuhkah in lohacng nuh ke mwe insewowo ma tuhkuh ke kom muhtweng?

¹⁰ Lohacng nuh ke mwe insewowo ma tuhkuh kac uh. Srihke petsacelah muh kom oruh fuhfahsryucsr se lom. Ke fuhfahsryucsr se lom inge, kom enenuh in fahsr sahslah ke tunnel soko. Yen nuhkewa kom ngwet nuh we uh lohsr. Tuhsruhktuh, kom etuh lah kom fin tahfwelah na ke fuhfahsryucsr se lom inge, kom ac kuh in sifwil liye kahlwem uh. Moul lasr uh ac kuh in oacna fuhfahsryucsr se inge. Sahp, oasr ma upac ma kom sun ac kom puhla muh kom tiac kuh in kuhtanglah ma upac lom inge. Jesus el tuh puhla pac ohinge. Ke pacl se ma srihpsrihpyak el ke sahk soko ah, el ahkmwekihnyeyuck ac el kweok na upac. Sahp, pacl se inge pa upac emeet ke moul lal uh! Meac kahsrel in muhtweng? Bible uh fahk lah ma “ke srihpen engan suc el ahkwot nuh kac.” (Hebrew 12:2, 3) Jesus el nuhnkuh yohk ke mwe insewowo ma ac tuhkuh ke mongfihsracsr ac muhtweng lal uh. Yohk liki nuhkewa, el nuhnkuh yohk ke ip kunacl in wi ahkmuhtahlye inen God ac ahkkweye suwohs lal in kol. El etuh lah mwe srihfe inge ma nuh ke kihtin pacl na, tuh mwe insewowo lal inkuhsrao uh ac oan ma pahtpaht. Ke pacl inge, mwe srihfe ma kom sun an ac kuh in ahktoasrye insiom ac kom ac kuh pac in kweok kac. Tuhsruhktuh, esam lah ma inge ma nuh ke kihtin pacl na.

“ELOS MUHTWACNGLAH MWE KWEOK”

11. Efuh kuh kuht enenuh in nuhnkuh ke ma sikyak nuh sin mwet suc “muhtwacnglah mwe kweok”?

¹¹ Kuht tiac enenuh in muhkwena ke muhtweng lasr uh. In ahkkweye mwet Christian in muhtwacnglah mwe srihfe pucspucs lal Satan uh, mwet sap Peter el suhmuhslah: “Tu na kuh ke luhlahlfongi lowos an, ac lainuhl mweyen kowos etuh lah mwet luhlahlfongi wiyowos fin facluh nohfohn elos puhlakihn pac kain kweok ma kowos puhla uh.” (Sie Peter 5:9) Ma sikyak nuh sin mwet suc “muhtwacnglah mwe kweok” uh luti nuh sesr in sruokyacna ohiyen oaru lasr, ahkkweye kuht in etuh lah kuht kuh in kuhtanglah, ac ahkacsmakihnye kuht lah oasr mwe insewowo ma tuhkuh ke oaru lasr uh. (James 5:11) Lwelah kuht in tuni kuhtuh sin mwe puhpuhlyuck inge.^[1]​—Liye endnote.

12. Meac kuht lotwelah ke mwe puhpuhlyuck se ke kerubim ma fihliyucki ke imac Eden?

¹² Kerubim pa lipufacn ma oasr kunohkohn yohk la. Tukun Adam ac Eve oraclah ma kuluk, Jeova el srihsrngiyac kerubim ekahsr in eis sie kunohkohn sasuc fin facluh. Kunohkohn se inge arlacna siena liki kunohkohn laltahl inkuhsrao. Mwe srihkasrak laltahl uh kuh in luti nuh sesr in muhtwacnglah ke pacl ma utuckuh sie kunohkohn upac nuh sesr. Bible uh fahk lah Jeova, ‘el fihliyac kerubim kuhtuhlacp in imac se, ac katlas fihrihr suc for, in liyacacng inkacnek nuh ke sahk in moul.’^[2] (Liye endnote.) (Genesis 3:24, BMK) Bible uh tiac fahk muh kerubim inge tohrkahskahs kuh puhla muh kunohkohn sasuc se inge tiac ma nuh seltahl mweyen yohk srihpacltahl. Eltahl tiacna alsruhngesrack kuh fuhleack. Eltahl oruh na ma kunacltahl uh ne ke pacl se ma orekma laltahl uh sahflah ke yac 1,600 tohkoh, sahp ke pacl in sronot ke lwen lal Noah ah!

13. Job el muhtwacnglah fuhkah ma upac lal inge?

¹³ Job, sie mukul oaru. Sahp kuhtuh pacl uh kom ngalyak ke srihpen kawuck se kuh sie mwet in sucu lom an fahklah sie ma ma ahktoasrye kom. Kuh sahp, kom sun mas na upac se kuh kom ahsor ke srihpen sie mwet lom el misac. Tuhsruhktuh, finne meac sikyak, kom kuh in eis mwe ahkkweye ke mwe srihkasrak lal Job uh. (Job 1:18, 19; 2:7, 9; 19:1-3) Job el tiac etuh lah mwe kweok inge tuhkuh oyac me. Tuhsruhktuh, el tiacna fuhleack. Meac kahsrel in muhtwacnglah? Ma se meet, el luhngse Jeova ac el sruhnga in ahksuhpwacryacl. (Job 1:1) Job el luhngse in ahkinsewowoye God ke pacl wo ac ke pacl upac. In wekuhnacng, Jeova el kahsrel Job in liye kuh lal uh ke el sruhmuhn nuh sel kuhtuh sin ma wolacna ma el oraclah uh. Ma inge oruh Job el in luhlahlfongi lah Jeova el kuh in ahkwacngihnyelah ma upac lal uh ke pacl fal. (Job 42:1, 2) Ac pa ingacn ma sikyak ah. “LEUM GOD El sifwil pac fohlohkuhnacng mwe kahsruhp lal in pacl luo yohk liki meet ah.” Job el moul ne “ke el arlacna mahtuhoh.”​—Job 42:10, 17.

14. In fal nuh ke Luo Corinth 1:6, ohiyen muhtweng lal Paul uh kahsruh mwet sahyac uh fuhkah?

¹⁴ Mwet sap Paul. Yac kom puhla mwe kweok kuh mwe kalyei upac? Yac kom sie mwet elder kuh mwet suc fuhfahsryucsr nuh ke congregation pucspucs ac kom puhla muh kom nwacnwaclah ke kunohkohn pucspucs? Fin ohingacn, mwe srihkasrak lal Paul uh ac kuh in kahsre kom. Paul el sun mwe kalyei na upac, ac el sensen ke mwet lili ke congregation uh. (Luo Corinth 11:23-29) Tuhsruhktuh, Paul el tiacna fuhleack, ac mwe srihkasrak lal uh ahkkweye mwet sahyac. (Riti Luo Corinth 1:6.) Ke kom kwacfeacng in muhtweng, ma inge ac ahkkweye mwet sahyac in oacyacpac muhtweng.

YAC OHIYEN MUHTWENG AC KUH IN “AHKSAHFYELAH OREKMA LA” IN KOM?

15, 16. (a) “Orekma” fuhkah se ac enenuh in ahksahfyeyucklac ke ohiyen muhtweng? (b) Sang kuhtuh mwe puhpuhlyuck an lah ke inkacnek fuhkah kuht ac “lwelah ohiyen muhtweng in ahksahfyelah orekma la.”

¹⁵ Mwet tuhma lutlut James el suhmuhslah ma inge: “Lwelah ohiyen muhtweng in ahksahfyelah orekma la.” “Orekma” fuhkah se ac enenuh in ahksahfyeyucklac ke ohiyen muhtweng? Ma inge pa ac kahsre “kom in fal in ohiyac nuhkewa, ac wacngihn kuhtwena ma kom ac fah suhfallac kac.” (James 1:4, NW) Ke pacl se kuht sun ma upac, sahp kuht ac kuh in akihlen lah kuht enenuh in ahkyohkye ohiyen mongfihsracsr, srui ac luhngse lasr uh. Ke pacl se kuht muhtwacnglah ma upac se, kuht ac etwaclah in ahkkahlwemye ohiyac inge in yohk liki meet ah ac ke inkacnek ma ac kuh in ahkkapye ohiyacsr oacna sie mwet Christian.

¹⁶ Ke srihpen muhtweng pa ac kuh in kahsre kuht in eklac sie mwet Christian wowo, kuht ac tiac luhngse in kuhnahoslah sie masap luhn Jeova tuh in ahkwacngihnyelah kuh tulokihnyac ma upac se lasr inge. Ke sie mwe puhpuhlyuck, kom fin kwacfeacng in sislah nuhnak fohkfohk, nik kom lwelah mwe srihfe inge in kuhtangkomlac! Siyuck sin Jeova elan kahsre kom in sislah nuhnak fohkfohk inge. Yac oasr mwet in sucu lom an suc lain kom? Nik kom fuhleack! Kwacfeacng kom in tahfwelah na kuhlwacnsuhpuh Jeova. Esam: Kuht enenuh in muhtweng tuh kuht in eis mwe insewowo luhn God.​—Rome 5:3-5; James 1:12.

17, 18. (a) Sang sie mwe puhpuhlyuck an nuh ke yohk srihpaciyac in muhtweng ne ke sahflah. (b) Ke kuht apkuhranyang nuh ke sahflah uh, meac kuht luhlahlfongi na pwacye kac?

¹⁷ Kuht enenuh in muhtweng, tiac ke kihtin pacl na, a ne ke sahflah. Srihke petsacelah ke nuhnak lom an fin pa oak luhlahp soko apkuhran in tili. Mwet ke oak soko inge enenuh in kofkof som nuh fin acn uh eltahl fin luhngse in moullac. Sahflahiyen sie mwet suc kofkof ne fuhleack meet liki na el sun finmes uh ac oacpacna sie mwet suc fuhleack na e ke muhtwacwacyen kofkof lal uh. In oacpacna, kuht enenuh in muhtweng ne ke kuht sun facl sasuc uh. Lwelah kuht in oacna mwet sap Paul suc fahk ma inge: “Kuht tiac fuhleack.”​—Luo Corinth 4:1, 16.

¹⁸ In oacna Paul, kuht luhlahlfongi na pwacye lah Jeova el ac kahsre kuht in muhtweng ne ke sahflah. Paul el suhmuhslah: “Yohk kuhtanglah lasr in el suc luhngse kuht! Tuh nga etuh na pwacye lah wacngihn ma kuh in srikuhtlac liki luhngse lal; tiac misac kuh moul, tiac lipufacn kuh kuhtwena kuh inkuhsrao, tiac ma oasr inge kuh ma ac fah tuhkuh. Tiac ma oan lucng liki facluh, kuh ma oan ten liki facluh, wacngihn sin ma oreklac nuhkewa suc ac fah kuh in srikuhtlac liki luhngse luhn God, suc ma lasr ke Christ Jesus Leum lasr.” (Rome 8:37-39) Pwacye, kuhtuh pacl uh kuht tohtohlah. Tuhsruhktuh, lwelah kuht in etahel Gideon ac mwet lal ah. Eltahl tohtohlah tuhsruhktuh, eltahl tiac fuhleack ke elos “ukwe mwet lokoalok lalos”!​—Mwet Nununku 8:4.