Ya Kom Sang Kasru in Oru Meeting Nukewa lun Congregation in Oasr Me Akkeye?
“Ke komwos tukeni nu sie, . . . komwos in oru ma nukewa nu ke musaiyuk.”—1 KORINT 14:26.
1. In fwal nu ke 1 Korint sapta 14, mea niyen sun saok lun meeting nukewa lun met Kristian?
‘OASR na paye me akkeye yok tuku ke meeting lasr inge!’ Ya kom fwak pa ouinge tokin kom wi ke sie meeting ke Kingdom Hall? Wangin alolo ka la kom ouyepa akkalemye kain in nunak inge! Meeting nukewa lun congregation pa sropon me akkeye yok, aok tia me lut se pa inge. Paye, in oana ke len lun met Kristian in pal meeta, akwuk mwomwo lun meeting nukewa lasr ke pal inge pa in akkeye lulalfongi lun met nukewa su wi ka. Loang akmwoye la fuka met sap Poul el akkalemye niyen sun lun meeting nukewa lun met Kristian ke leta se meet lal nu sin met Korint. Ke sapta 14 nufon el akkalemye pal puspus la kais sie me sramsram su orek ke meeting nukewa ke congregation enenu in akpayeye akwuk sefwanna. Akwuk mwo se inge pa in akkeye ku “musaiyuk congregation.”—Ridi 1 Korint 14:3, 12, 26.a
2. (a) Meeting nukewa su oasr me akkeye yok ka el tuku ke mea? (b) Kusensiyuk fuka kut fwa akuteye?
2 Kut akilen la sripe mwomwo paenang oasr me akkeye yok su tuku ke meeting nukewa lasr, a oasr me lutlut mwomwo metu ku in lotela ka, pa ke kasru lun ku lun God. Ke ma inge, kut ikasla kais sie meeting lun congregation ke pre su tuku ke insiesr nu sin Jeova a kut siyuk sin Papa tumasr in kosrao in akinsemwomwoye tukeni lasr ke inkanek lun ku lal. Tusruktu, kut etu la met nukewa su wi ke congregation elos ku in sang kasru in oru me sramsram nukewa ke meeting in oasr me akkeye yok tuku ka. Ke ma inge, mea kutu inkanek su kut nukewa ku in akpayeye la meeting nukewa ke kais sie wik su orek ke Kingdom Hall lasr pa sropon me akkeye fototo lasr nu sin God pal nukewa?
3. Fuka yok sripaiyen meeting nukewa lun met Kristian?
3 In sang me top nu ka, kut fwa tuni kutu akwuk lun meeting lasr su enenu in esam pal nukewa sin met nukewa su oru ouinge. Kut fwa lutlutkin pa la fuka met lili nukewa ke congregation ku in sang kasru in oru meeting in oasr me akkeye yok nu sin met nukewa su wi ka. Oasr insemwomwo yok lasr ke me lutlut inge meyen meeting nukewa lasr pa tukeni mutal. Aok, in wi a sang me top ke meeting pa kunokon saok ke orekma in alu lasr nu sin Jeova.—Sam 26:12; 111:1; Isaia 66:22, 23.
Sie Meeting su Orekla in Lutlutkin Baibel
4, 5. Mea sripe yok emeet ke lutlut lun Tauer in San?
4 Kut nukewa lungse in eis me insemwomwo yok ke lutlut lun Tauer in San ke wik nukewa. Ke ma inge, in eis kalem yok ke niyen sun lun meeting inge, lela kut in kalweni kutu ma ekla su orek tari nu ke Tauer in San a ke me lutlut nukewa.
5 Mutawauk ke issue se meet lun Tauer in San su fwa orekmakinyuk sin congregation ke me lutlut, ke malem lun January 15, 2008, oasr oiya yok sripe weang nu ke sra se meet. Ya kom liye ma inge? Loang akmwoye nu ke kolin magasin se ma kom sruokye inge. Ke petsa lun tauer se ten inge, kom fwa liye Baibel se ma ikakla inge. Oiya sasu se inge su weang nu ka akkalemye yok ke sripe mwomwo paenang kut oru lutlut lun Tauer in San. Sripe u pa in lutlutkin Baibel ke kasru lun magasin se inge. Aok, ke lutlut lun Tauer in San nutusr ke wik nukewa, Kas lun God el “akuteyuki,” a oana in len lal Niemaia in pal meeta, oasr orekma in ‘akuteye a sang kalme ke masap lun God.’—Niemaia 8:8; Isaia 54:13.
6. (a) Me aksumwos fuka orek nu ke lutlut lun Tauer in San? (b) Mea kut enenu in esam pal nukewa ke ma simusla nukewa su oasr akul inge “ridi”?
6 Ke sripen Baibel pa buk se su kut orekmakin yok, paenang oasr ma ekla ku me aksumwos orek nu ke lutlut lasr ke Tauer in San. Kutu ma simusla su oasr ke me lutlut akilenyuk ke kas inge “ridi.” Kut nukewa akkeyeyuk in rid pa ma simusla inge nukewa ke pal in meeting, orekmakin Baibel nutusr sifwana. (Orekma 17:11) Efu? Kut fwin liye kas in kai lun God ke Baibel nutusr sifwana, oasr me kasru yok ka nu sesr. (Hibru 4:12) Ke ma inge, meet liki ma simusla inge nukewa ridiyuk ke pusra yok, met se su kol lutlut el enenu in sang pal nu sin met nukewa su wi ka in liye ma simusla inge a rid ma simusla ke pal in rid.
Oasr Pal Yok in Akkalemye Lulalfongi Lasr
7. Pal mwomwo fuka oasr yurosr ke pal in lutlut lun Tauer in San?
7 Siepa me aksumwos ku ma ekla orek nu ke me lutlut nukewa ke Tauer in San pa ke lupan me lutlut. Ke kutu yea tufwana somla, me lutlut orekla in akfototoyeyuk kutu liki meeta. Ke ma inge, ke pal in lutlut ke Tauer in San, pal na fototo se in orekmakinyuk in rid paragraph, tusruktu yok pal ku in orekmakinyuk in sang me top nu ka. Oasr pal mwomwo ingena lun met puspus ke congregation in fwakak lulalfongi lalos ye mutun met nukewa ke inkanek in sang me top ke kusensiyuk su oasr ka, in orekmakinyen ma simusla kalem, in srumon experience fototo su akkalemye la inkanek lalmetmet in akos masap lun Baibel, ku ke kutu pa inkanek. Kutu pal ku in orekmakinyuk pa in akuteye kalmeyen petsa.—Ridi Sam 22:22; 35:18; 40:9.
8, 9. Mea kunokon lun met kol ke lutlut lun Tauer in San?
8 Tusruktu, lusen pal inge in akkalemye kain in comment puspus fwa ku in orek mukena fwin met lili elos akfototoye comment lalos a met su kol lutlut el tia sang comment pal nukewa ke pal in lutlut lun Tauer in San. Ke ma inge, mea ku in kasru met lili su kol lutlut in fwal comment lal a lun met lili puspus ke congregation, in oasr me akkeye yok tuku ke toeni inge nu sin met nukewa?
9 In sang me top nu ka, tuni akmwoye nu ke me pupulyuk se inge. Lutlut lun Tauer in San su orek ke inkanek mwo el oana sie me mwalmwal ku lei in ros su arlana mwo a kato. Oana sie me mwalmwal ku lei in ros su orekla ke ros kato puspus, Lutlut lun Tauer in San el oapana ke sripen orekla ke kain in comment puspus. A oana ke kais sie ros ke sie lei ku me mwalmwal su tia oana sie lupa a tun ka, comment su akkalemyeyuk ke pal in meeting el tia pa oana sie, oasr me top loes kutu a oasr me top fototo. A mea kunokon lun brother se su kol lutlut inge? Comment lal kais kutu pal el lumeyuk oana kutu folfol sra su toeni nu ke me mwalmwal ku lei in ros. Sra folfol inge tia arlana pukanten; tusruktu ma inge sang kasru in oru me mwalwal in arlana mwo a kato. Ke inkanek oapana inge, met lili su kol lutlut el enenu in esam pal nukewa la kunokon lal pa, in tia sang comment lal pal nukewa. A el enenu na in sang comment kais kutu pal in toeni nu ke kas in kaksak su akkalemyeyuk sin met lili ke congregation. Aok, ke pal se oasr kain in me top puspus akkalemyeyuk sin met lili ke congregation a comment mwomwo lun met kol kais kutu pal tukeni nu sie, ma inge ku in orala kas mwomwo su oana ros in sie me mwalmwal, su ku in akkeye a akinsemwomwoye met nukewa su wi ke meeting.
“Lela Kut in Kise nu sin God ke Kaksak Pal E Nukewa”
10. Fuka met Kristian in pal meeta elos nunku ke meeting nukewa lun congregation?
10 Ma Poul el akuteye ke tukeni lun met Kristian su simusyukla in 1 Korint 14:26-33 el ase nu sesr etauk la fuka toeni inge orek in century se meet. Sie scholar ke Baibel el akuteye kutu ma ke fus inge, a el simusla ouinge: “Ma su arlana kalem ke akwuk ke Congregation in pal meeta pa met nukewa su tuku elos pulakin mu oasr kunokon lalos a elos enenu in sang kasru nu ka. Sie met el tia wi in muta a long mukena; el oayepa tuku in eis a in sang.” Aok, met Kristian in century se meet elos nunku ke meeting lun congregation oana sie pal mwomwo in akkalemye lulalfongi lalos.—Rom 10:10.
11. (a) Mea sang kasru yok in oasr me akkeye yok ke meeting lasr, a efu? (b) Kas in kasru fuka mwo kut in orekmakin in kasre kut in akmwoye comment lasr ke pal in meeting? (Srike liye footnote.)
11 Kafweang lasr in akkalemye lulalfongi lasr ke pal in meeting sang kasru yok in “musaiyuk congregation.” Paye la kom e fwa insese la fwinne kom wi tari ke meeting nukewa ke lusen pal loeloes, ne ke pal inge kom srakna insemwomwo in long ke me top lun met lili puspus. Ke pal se sie sin met lili wiyesr su matu tari el sang me top, ma inge sun na paye insiesr a kut eis me akkeye yok ka; kut arlana engun in long me top lun sie met elder su nunku kesr; a kut insemwomwo fwin sie tulik srisrik el sang me top lal sifwana in akkalemye lungse paye lal nu sin Jeova. Kalem la, kut fwin kafweang in sang me top, kut nukewa ku in sang kasru in oru meeting lasr ke congregation in oasr me akkeye yok ka.b
12. (a) Me lutlut fuka kut ku in lotela ke me srikasrak lal Moses a Jeremaia? (b) Fuka pre ku in kasre kut in pulaik in sang me top?
12 Tusruktu, nu selos su mwekin a tufwal, arlana upa nu selos in sang me top ke pal in meeting. Fwin oiya se inge sikyak pa nu sum, mwo kom in esam la tia kom mukena pa pulakin ouinge. Aok, met kulansap oaru lun God su pangpang Moses a Jeremaia elos akkalemye pa nunak in alolo lalos la elos tia ku in kaskas ye mutun met puspus. (Exodus 4:10; Jeremaia 1:6) Tusruktu, lela kut in esam la Jeova el kasrelos in pulaik in kaksakunul ye mutun met puspus, a God el fwa kasre kom pa in sang kas in kaksak nu sel. (Ridi Hibru 13:15.) Fuka kom ku in eis kasru lun Jeova in akwanginyela sangeng lom in sang me top? Ma se meet, kom in akola mwo nu ke meeting. A meet liki kom som nu ke Kingdom Hall, kom in pre nu sin Jeova a siyuk sel in sot nu sum oiyen pulaik in kasre kom in sang me top. (Filippai 4:6) Kom siyuk ke ma se su “fwal nu ke ma lungse lal,” ke ma inge kom ku in lulalfongi ka la Jeova el fwa topuk pre lom.—1 Jon 5:14; Soakas 15:29.
Meeting Nukewa Orekla in ‘Musaiyuk, Akkeye, a Akpwarye’
13. (a) Mea meeting nukewa lasr ku in oru nu sin met nukewa su wi ka? (b) Kusensiyuk fuka yok sripe nu sin met elder nukewa?
13 Poul el akkalemye la sripe mwo ma paenang meeting lun congregation orek pa in ‘musaiyuk, akkeye a akpwarye’ met nukewa su wi ka.c (Srike liye 1 Korint 14:3.) Fuka met Kristian elder ke pal inge elos ku in akpayeye la me sramsram lalos ke pal in meeting ku in akkeye met lili nukewa? In sang me top nu ka, lela kut in nunku akmwoye ke sie toeni su Jisus el oru tia pat tokin el akmoulyeyukyak.
14. (a) Ma puspus fuka sikyak meet liki Jisus el orala sie tukeni nu sin met tuma lutlut lal? (b) Efu ku met sap nukewa elos akkeyeyuk ke pal se “Jisus el tuku nu yurolos a kaskas nu selos”?
14 Ma se meet, nunku ke ma sikyak puspus meet liki tukeni se inge. Meet liki Jisus el anwuki, met sap elos “fwasr lukel a kaengla,” a in oana ke ma palyeyuk tari, elos “fwasrelik kais sie met nu yen sel.” (Mark 14:50; Jon 16:32) A tokin akmoulyeyukyak el, Jisus el suli met sap lal su munasla insielos elos in wi ke sie tukeni.d Ke ma inge, “met lutlut sengoul sie elos som nu in Galili, nu fwin eol soko yen Jisus el oakiye nu selos.” Ke pal se elos tuku, “Jisus el tuku nu yurolos, a kaskas nu selos.” (Mattu 28:10, 16, 18) Srike lumala ke nunak loman ke lupan engun yok lun met sap nukewa inge ke pal se Jisus el sramsram nu selos! Mea Jisus el akuteye nu selos?
15. (a) Me lutlut puspus fuka Jisus el sramsramkin, tusruktu ma fuka el tia akuteye? (b) Fuka meeting se inge sang me akkeye yok nu sin met sap nukewa?
15 Jisus el akkalemye sie me fwakak: “Ku e nukewa etuku nu sik.” Tokin ma inge el sang kunokon nu selos: “Ke ma inge komwos som, a oru met in mutanfwal nu kemwa tu elos in met tumal lutlut.” Ma se safla, el sang nu selos sie kas in akkeye mwomwo: “Nga wi komwos pal e nu kemwa.” (Mattu 28:18-20) Tusruktu ya kom akilen ke ma Jisus el tia na oru? El tia sang kas in kai nu sin met sap nukewa lal; el tia pa na orekmakin tukeni se inge in akkalemye la nunak lalos a insielos tia mwo. A el tia pa orekmakin pal se inge in oru elos in pulakin mu oasr ma koluk elos oru ke pal se lulalfongi lalos arlana munas. A, Jisus el akkeyelos a fwak nu selos lungse lal a lun Papa tumal ke el sang nu selos kunokon na yok sripe. Mea oiya mwo inge lun Jisus oru nu sin met sap nukewa? Elos akkeyeyuk ka, a akpwaryeyuk paenang tokin tukeni se inge, elos sifwilpa ‘luti a fwakak peng mwo kel Jisus.’—Orekma 5:42.
16. Ke inkanek fuka met Kristian elder ke pal inge elos etawi me srikasrak lun Jisus in oru meeting su ku in akkeye met lili nukewa?
16 Met elder ke pal inge elos kafweang in etawi Jisus, paenang elos nunku ke tukeni nukewa oana pal mwomwo in akkeye met lili wiyesr ke lungse lun Jeova nu sin met kulansap nukewa lal. (Rom 8:38, 39) Ke ma inge, ke me sramsram lalos ke pal in meeting, met elder elos loang akmwoye ke oiya mwomwo nukewa lun met lili wiyelos, a tia ke me munas lalos. Elos lulalfongi na paye la met lili wiyelos oasr inse paye lalos. A, kas lalos akkalemye la elos nunku ke met lili wiyelos oana met su lungse Jeova a elos lungse in oru ma sumwos. (1 Tessalonika 4:1, 9-12) Aok, oasr pal met elder elos enenu in sang kas in me aksumwos nu sin congregation, tusruktu, fwin oasr na kutu met su enenu in aksumwosyeyuk, elos enenu na in sramsram nu sin kutu met lili inge a tia nu sin met nukewa ke congregation. (Galetia 6:1; 2 Timote 2:24-26) Ke pal se elos sramsram nu sin congregation, met elder elos lungse in sang kas in kaksak nu sin met lili pal nukewa. (Isaia 32:2) Elos kafweang in kaskas pal nukewa ke inkanek mwomwo paenang ke saflaiyen meeting, met nukewa su wi ka elos akkeyeyuk a akpwaryeyuk.—Mattu 11:28; Orekma 15:32.
Meeting Nukewa Lasr Pa Sropon Me Akkeye
17. (a) Efu ku arlana yok sripe liki na meeta la meeting lasr ke pal inge el sropon me akkeye? (b) Mea kom ku in oru in sang kasru in oasr me akkeye ke pal in meeting? (Liye pok se inge “Inkanek Sengoul In Oru Tukeni Lasr In Me Akkeye Yok Nu Sum a Nu Sin Met Saye Nukewa.”)
17 Ke sripen fwal lal Setan yokyokelik na paye kain in ma upa nukewa, kut enenu in akpayeye la tukeni nukewa lasr oana met Kristian pa sropon me akkeye yok, aok sropon me akpwarye nu sin met lili nukewa. (1 Tessalonika 5:11) Sie sister a mokul tumal su muteng ke me keok ke kutu pal somla el esam: “Pal nukewa kut oasr ke Kingdom Hall kut oana in oasr ke poun Jeova su arlana kulang. Ke lusen ao puspus su kut oasr ka, oasr met Kristian wiyesr raunikutla, kut pulakin mu kut sisla tari me toasr lasr nu sin Jeova, a kut pulakin inse misla.” (Sam 55:22) Lela met lili nukewa su wi ke tukeni lasr elos in pulakin la elos akkeyeyuk a akpwaryeyuk pa ka. Tu kut in akpayeye la oiya inge sikyak pa nu sesr, lela kut in kafweang in oru kunokon lasr in sang me akkeye ke pal in meeting nukewa ke congregation.
[Footnote]
a Oasr ma palyeyuk tari la kutu akwuk ke meeting lun met Kristian in century se meet fwa wanginla. Ke sie me pupulyuk, kut tila “kaskas ke loa” ku “palye.” (1 Korint 13:8; 14:5) Ne ouinge, kas in kasru lal Poul kasre kut in eis kalem yok la fuka meeting nukewa lun met Kristian orek in pal inge.
b Ke kas in kasru puspus in akmwoye me top lasr ke meeting srike liye Orekma Lun Togusrai Lasr, March 2008, sra 4-6.
c Ke ma tia oana sie inmasrlon kas Grik luo su lungasyukla oana “akkeye” a “akpwarye,” buk se inge Vine’s Expository Dictionary of Old and New Testament Words el akkalemye la kas se su lungasyukla nu ke kas se inge “akpwarye” el kalmekin nu ke “yokiyen nunak mwo a kulang liki kas se inge akkeye.”—Srike liye Jon 11:19.
d Ma inge ku in kalmekin nu ke pal su Poul el sramsramkinyuk ke pal se el fwak la Jisus el “sikme sie pal nu sin met lili pus liki lumfoko.”—1 Korint 15:6.
Kom E Topuk Fuka?
• Meeting nukewa ke congregation el yok sripe fuka?
• Efu ku me top nukewa su akkalemyeyuk ke pal in meeting el sang kasru yok in “akkeye congregation”?
• Mea kut ku in lotela ke meeting su Jisus el oru nu sin met tuma lutlut nukewa lal?
[Box/Petsac ke sra 18]
INKANEK SENGOUL IN ORU TUKENI LASR IN ME AKKEYE YOK NU SUM A NU SIN MET SAYE NUKEWA
Akola meet liki meeting. Kom fwin sa in lutlutkin me lutlut su e fwa akuteyuki ke Kingdom Hall, meeting nukewa lasr e fwa oru kom in oasr insemwomwo yok ka a ma inge ku in sun nunak lom a insiom.
Wi meeting pal nukewa. Oasr me akkeye yok fwin oasr met puspus su wi ke meeting, ke ma inge kom fwin kafweang in wi kom ku in akkeye met lili.
Sa tuku nu ke pal. Kom fwin oasr a muta tari meet liki mutaweyen tukeni, kom ku in wi ke on a pre ke mutaweyen tukeni, su kalmekin pa nu ke orekma in alu lasr nu sin Jeova.
Us tuku kofwen me lutlut nukewa. Us Baibel a me rid nukewa su fwa orekmakin ke pal in meeting tu kom ku in rid a liye me lutlut a in eis kalem yok ke me lutlut su akuteyuki.
Taran in wangin kutena me akkoluk. Ke sie me pupulyuk, kom ku in rid text ke cell phone lom tia ke pal in meeting, tusruktu tokin meeting. Ke inkanek ouinge kom ku in oru ma lom sifwana ke inkanek fwal a mwo.
Wi sang me top. Fwin oasr met lili puspus su sang me top, oasr met lili puspus su akkeyeyuk ka, a akpwaryeyuk ke kain in me top mwomwo nukewa inge.
Kafweang in oru me top lom in fototo na. Oiya mwo inge ku in sang pal mwomwo nu sin met lili puspus elos in wi pa sang me top.
Oru kunokon nukewa lom. Oana tulik lutlut ke Theocratic Ministry School ku wi in oru me lumala ke Service Meeting, kom enenu in akola mwo, akpa ke pal na sa, a kom in tia cancel kunokon lom.
Sang kas in kaksak nu sin met su oasr kunokon ku met su sang me top. Fwak nu sin met lili nukewa su oasr kunokon ke meeting ku elos su sang me top mwomwo la kom aksaokye na paye kafweang lalos ka.
Wi asrouki. Kas in paing ke pusra kulang a sramsram su me akkeye meet liki a tokin meeting sang me akengun yok a ma lane puspus su tuku ke sripen kut wi ke meeting.