Nun Ahkosr Eklac Muhtwacn Lili Suc Kuhlwacnsuhpuh Jeova

Felisa: Nga mahtuhlah ke sie sucu na inse puhsisacl fin acn Spain. Sucu luhk ah wi Catholic ac kuht arlacna fokoko ke alu. Singucul tolu sin mwet in sucu luhk uh priest kuh orekma ke alu ac. Sie cousin luhn ninac kiyuck ah priest se, ac el oacyacpac mwet luti se ke lohm lutlut luhn Catholic. Tukun el misac, Pope John Paul II el ahkmuhtahlyacl oacna sie mwet saint kuh mwet muhtahl. Pahpah tuhmuhk ah sie mwet orekma ke osra, ac ninac kiyuck ah orekma ke imac. Kuht tuhlihk oalkosr nohfohn ac nga pa mahtuh emeet uh.

Ke nga yac 12, mweun se srolah fin acn Spain. Tukun mweun se inge, pahpah tuhmuhk ah sruhoh in presin ke srihpen mwet luhlahp ke government inge tiac engan ke nuhnak lal nuh ke oakwuck luhn politic. Arlacna upac nuh sin ninac kiyuck ah in kihte kuht nohfohn. Pwacnacng, el suhpwaclah tuhlihk muhtwacn tolu wiyuck inge, Araceli, Lauri ac Ramoni eltahl in som muhta yurin nun ekahsr ke lohm sin nun fin acn Bilbao. Fal mongo nwacn tuhlihk muhtwacn wiyuck inge we.

Araceli: Ke pacl sac nga yac 14, Lauri el yac 12 ac Ramoni el yac 10. Kuht arlacna ahsroelah sucu lasr ah. Ke lohm sin nun inge, orekma lasr ah pa in ahknwacsnwacs. Yac luo tohkoh, nun inge suhpwekuhtlac nuh ke lohm luhlahp se sin nun pucspucs fin acn Zaragoza ma karihngihn mwet mahtuh. Kuht tuh orekma upac in ahknwacsnwacsye lohm in mongo ah ac ma inge oruh kuht kwacna ullac.

Felisa: Ke tuhlihk muhtwacn wiyuck inge som nuh ke lohm sin nun fin acn Zaragoza, ninac ac uncle se luhk suc sie priest eltahl sulaclah in suhpweyuclac pac nuh we. Eltahl ke suhpweyuclac liki sie tuhlihk mukul suc luhngse nga. Nga arlacna engan in som nuh ke lohm sin nun inge mweyen nga luhngse God. Nga wi alu ke lwen nuhkewa ac nga luhngse pac in eklac sie missionary ke Catholic oacna cousin se luhk fin acn Africa.

Tuhsruhktuh, ke lohm sin nun inge, nga puhla muh puhs ma nga ke oruh tuhsruhktuh nga tiac kuh in oruh. Nun ke acn inge eltahl tiacna ahkkweyeyuc in kuhlwacnsuhpuh God ke sie pac acn, in oacna ma nga finsrakkihn ac. Pwacnacng tukun yac se, nga fohlohk nuh lohm sihk ac, ac nga muhtwacwacack in karihngihn uncle se luhk suc sie priest. Nga ahknwacsnwacsye lohm sel ah ac ke ekuh nuhkewa kuht orekmakihn Rosary kuh mwe walwal se in puhruhe. Nga luhngse pac in tahkihn ros ke lohm alu ac, ac nahwelah ma sruhloaclah kacl Mary ac kuhtuh pac “saint” sahyac.

Araceli: Ke pacl se nga muhta fin acn Zaragoza, nga oraclah wuhlelah se emeet ma enenweyuck nuh sin sie mwet tuhfah el eklac sie nun. Tohkoh, nun we ah sulaclah in srikuhtelihk. Pwacnacng, eltahl suhpweyuclac nuh ke sie lohm sin nun fin acn Madrid ac Lauri nuh ke sie pac lohm sin nun fin acn Valencia. Ramoni el muhta fin acn Zaragoza. Fin acn Madrid, nga ahksahfyelah wuhlelah luhk in eklac sie nun. Mwet pucspucs, oacna tuhlihk lutlut ac mwet mahtuh, eltahl tuhkuh muhta ke lohm sin nun inge. Pwacnacng, puhs orekma ma enenuh in orek we. Nga orekma ke acn in ono ke lohm sin nun inge.

Nga arlacna engan ke ma nga petsacelah ke moul luhk uh oacna sie nun. Nga nuhnkuh na muh kuht ac orekmakihn inkaiyen pacl lasr uh in rit Bible ac lutlut kac. Tuhsruhktuh, nga arlacna suhpwacrlac. Wacngihn na mwet orekmakihn Bible kuh sramsram ke God kuh kacl Jesus. Nga lotwelah kuhtuh srihsrihk ke kahs Latin, nga lutlut ke moul luhn “saint” ke Catholic ac nga alu nuh sel Mary. Tuhsruhktuh, inkaiyen pacl uh kuht orekma upac muhkwena.

Nga muhtwacwacack in fosrngah ac elyah. Nga puhla muh nga enenuh in sukok mani in kahsruh sucu luhk ah, liki na nga in orekma ke lohm sin nun inge ac kahsruh mwet sahyac in kahsruhpi. Pwacnacng, nga sramsram nuh sin mother superior, kuh nun se ma fuhlwact emeet ac nga fahk nuh sel lah nga ke som. Tuhsruhktuh, el lakiyucwi luun infuckihl se. El nuhnkuh na muh ma inge ac kuh in kihfaslah nuhnak luhk uh in muhta na.

Nun we inge ikacsyuclac liki infuckihl sac, tuhsruhktuh ke eltahl akihlenack lah nga srackna luhngse in som liki acn we, eltahl sifwil pacna lakiyucwi. Tukun ma inge sikyak ke pacl ahktolu, eltahl fahk nuh sihk muh nga ac kuh in som nga fin suhmuhslah kahs inge: “Nga ac som ke srihpen nga luhngse in kuhlwacnsuhpwacl Satan liki na God.” Nga arlacna lut. Nga arlacna luhngse in som, tuhsruhktuh nga tiac kuh in suhmuhslah kahs inge. Na, nga siyuck seltahl nga in sramsram nuh sin sie priest ac, ac nga fahk nuh sel ma sikyak inge. El siyuck sin bishop kuh mwet fuhlwact se ke alu uh nga in fohlohk nuh ke lohm sin nun fin acn Zaragoza. Tukun mahlwem ekahsr ke nga fohlohk nuh we, lweyucklac nga in som. Kihtin pacl tohkoh, Lauri ac Ramoni eltahl oacyacpac som liki lohm sin nun ma eltahl muhta we ah.

SIE PUK MA SRIKUHTWELIHK AC

Felisa: Ke kuhtuh pacl tok, nga pahyuckyak ac som muhta fin acn Cantabria, Spain. Nga srackna fahsr wi alu pacl nuhkewa. Sie Sunday ke lohm alu ac, priest lasr ah kohuyak ac fahk, “Liye puk se inge!” El ahkkahlwemye puk sac nuh sesr The Truth That Leads to Eternal Life. Ac el sifwil fahk, “Fin oasr mwet usot puk se inge, use nuh sihk kuh sislah!”

Wacngihn puk sac nuhtihk, tuhsruhktuh nga ke in oasr nuhtihk sie. Na lwen ekahsr tohkoh, muhtwacn luo yorack lohm sihk ac. Eltahl mwet Loh luhn Jeova. Eltahl use puk sac nuhtihk ac nga riti ke fong sac. Ke muhtwacn luo inge fohlohk nuh yuruk ac, eltahl siyuck sihk fin nga luhngse in lutlut Bible ac nga fahk muh ahok.

Emeet me, nga luhngse in ahkinsewowoye God. Pwacnacng, ke pacl se nga lotwelah ma pwacye kacl Jeova, nga muhtwacwacack in luhngse el ke insiuck kewa. Nga ke sruhmuhnuhl nuh sin mwet nuhkewa. Ke yac 1973, nga bacptaislac. Pacl nuhkewa ma nga kuh, nga srihke in sruhmuhn ma pwacye uh nuh sin sucu luhk uh. Tuhsruhktuh, sucu luhk uh, yohkna Araceli el fahk muh ma nga luhlahlfongi inge tiac pwacye.

Araceli: Ke srihpen arlacna kuluk ma orek nuh sihk ke pacl se ma nga muhta ke lohm sin nun ah, nga kasrkuhsrak ac toasr sin alu luhk ah. Tuhsruhktuh, nga srackna wi alu ke Sunday nuhkewa, ac ke lwen nuhkewa nga puhruhe ke Rosary. Nga srackna luhngse in kahlwem ke Bible uh ac nga siyuck kahsruh sin God. Na, Felisa el fahk nuh sihk ke ma el lotwelah uh. El arlacna engan ke ma el luhlahlfongi inge ac nga nuhnkuh na muh el wellac. Nga tiac insese nuh ke ma el fahk ah.

Tok, nga sifwil fohlohk nuh Madrid ke srihpen orekma ac ke pacl sac nga pahyuckyak. Ke yac ekahsr tohkoh, nga akihlenack lah mwet ma kwacna wi alu pacl nuhkewa uh tiac moulkihn mwe luti lal Jesus uh. Pwacnacng, nga tilac fahsr wi alu. Nga tilac luhlahlfongi ke “saint” kuh ke isis ac nga tilac nuhnkuh muh priest uh kuh in nuhnak muhnahs ke ma kuluk uh. Nga tuh sislah pac ma sruhloaclah nuhkewa yuruk ac. Nga tiac etuh na pwacye fin ma nga oruh ah wo. Nga arlacna suhpwacrlac tuhsruhktuh, nga tahfwelah na in puhruhe nuh sin God: “Nga luhngse in etwekom. Kahsreyuc!” Nga esam lah pacl puhs Mwet Loh luhn Jeova uh som tongtong ke sruhnguhl luhk ah, tuhsruhktuh wacngihn sie pacl nga ikacslah. Nga tiac luhlahlfongi ke kuhtwena alu.

Lauri el muhta fin acn France, ac Ramoni el muhta fin acn Spain. Ke yac 1980, eltahl muhtwacwacack lutlut Bible yurin Mwet Loh luhn Jeova. Nga luhlahlfongi muh eltahl ac oacna Felisa ac tiac lohacng nuh kac lah kahs kikiacp pa lutiyuck nuh seltahl meet ah. Tok, nga ohsun nuh sel Angelines, sie mwet tuhlan luhk ac kuht kawuckyak. El oacyacpac sie sin Mwet Loh luhn Jeova. Angelines ac mukul tuhmwacl ah siyuck sihk pacl puhs fin nga luhngse in lutlut Bible yohrohltahl. Eltahl akihlen lah nga finne fahk muh nga tiac luhngse sramsramkihn alu, nga arlacna luhngse in etuh ke Bible uh. Ke sahflahiyac ah, nga fahk nuh seltahl: “Koacl, ahok. Nga ac insese in lutlut Bible yurumtacl, fin kom lwelah nga in orekmakihn Bible nuhtihk uh!” Nácar-Colunga pa lweng ke Bible se nuhtihk ac.

KE SAHFLAHIYAC AH, BIBLE UH OREKUHTWENI

Felisa: Ke nga bacptaislac ke yac 1973, oasr Mwet Loh 70 fin acn Santander, capital luhn acn Cantabria. Kuht fuhfahsryucsr ke acn na loeloes in som fahkwack nuh sin mwet nuhkewa ke mura siofok kuhtuh fin acn we. Pwacnacng, kuht fuhfahsryucsr ke bus ac ke stosah in som nuh ke sie mura nuh ke sie mura.

Ke lusen yac pucspucs, nga lutlut Bible yurin mwet pucspucs ac 11 seltahl bacptaislac. Inkaiyen mwet nga lutlut Bible yohroh inge eltahl wi ke Catholic. Nga enenuh in mongfihsracsr nuh seltahl. In oacna nga, eltahl enenuh pacl in akihlen lah ma eltahl luhlahlfongi uh suhtuh. Nga etuh lah Bible ac nguhn muhtahl luhn Jeova muhkwena pa ac kuh in kahsruh sie mwet in ekuhllah nuhnak ac kahlwem lal ke ma pwacye uh. (Hebrew 4:12) Bienvenido, suc mukul tuhmuhk el policeman se meet ac el bacptaislac ke yac 1979. Oacyacpac, ninac kiyuck ah muhtwacwacack lutlut Bible ac tiac paht tohkoh na el misac.

Araceli: Ke pacl se nga muhtwacwacack in lutlut Bible yurin Mwet Loh luhn Jeova, nga puhla muh nga tiac kuh in luhlahlfongeltahl. Tuhsruhktuh ke kihtin pacl tok, nga tilac puhla ohinge. Mwet Loh inge tiac lutiyuck ke Bible muhkwena, a eltahl oacyacpac ahkos mwe luti kac uh. Luhlahlfongi luhk sin Jeova ac ke Bible uh muhtwacwacack in yohkwelihk ac nga engan liki na meet ah. Kuhtuh sin mwet tuhlan luhk ah akihlen eklac luhk inge ac fahk nuh sihk, “Araceli, kwacfeacng na ke inkacnek se ma kom sulaclah an!”

Nga esam ke nga puhruhe fahk, “Kuloh Jeova ke kom tiacna fuhleack sihk uh ac ke kom oraclah inkacnek pucspucs nuh sihk in konwacack ma nga suk inge, etwacack pwacye ke Bible.” Nga oacyacpac siyuck sel Felisa elan nuhnak muhnahs nuh sihk ke kahs na upac ma nga tuh fahk nuh sel ah. Ke pacl sac fahlac, kuht tilac akuhkuhin, a kuht engan in sramsramkihn Bible uh. Ke yac 1989, nga bacptaislac ke nga yac 61.

Felisa: Ingena nga yac 91. Mukul tuhmuhk ah misac ac nga tiac kuh in oruh oacna meet ah. Tuhsruhktuh, nga srackna rit Bible lwen nuhkewa ac nga som wi miting ac forfor ke pacl nuhkewa ma nga kuh.

Araceli: Nga luhngse in sramsram kacl Jeova nuh sin priest ac nun pucspucs ma nga ohsun nuh se, sahp ke srihpen nga tuh nun se ke sie pacl ah. Oasr kuhtuh seltahl suc luhngse lohng ke nga sramsram nuh seltahl ac puhs seltahl sruokyac puk ac mackuhsin uh. Sie ma nga esam uh pa sie priest. Tukun nga sramsram nuh sel pacl ekahsr, el insese ke ma nga fahk ah. Na el fahk nuh sihk: “Tuhsruhktuh, meac nga kuh in oruh ke nga mahtuhoh tari inge? Meac mwet nuhkewa ke alu luhk ac sucu luhk uh ac fahk?” Nga topkuhl ac fahk: “Ac meac God el ac fahk?” El akihlen lah pwacye sihk ac nga kuh in liye lah el suhpwacrlac. Tuhsruhktuh, luhman el tiac puhlaik in eklac.

Nga tiacna kuh in muhlkuhnlah ke mukul tuhmuhk ah fahk nuh sihk lah el luhngse in wiyuc som nuh ke toeni uh. El ahluhkwelah yac 80 ke pacl se meet ma el som nuh ke toeni uh ac tukun lwen sac wacngihn sie lwen ma el tiac som wi kac. El muhtwacwacack lutlut Bible ac wi ke orekma in luti uh. Arlacna puhs mwe acsmakihn na wowo lasr ke orekma in luti uh. El misac mahlwem luo meet liki na lwen in bacptais lal uh.

Felisa: Ke pacl se nga muhtwacwacack in kuhlwacnsuhpuh Jeova, tuhlihk muhtwacn srihsrihk tolu wiyuck inge lainyuc. Tuhsruhktuh tok, eltahl welah pac ma pwacye uh. Pa inge sie sin ma wo emeet ma sikyak nuh sihk uh. Tukun ma inge, kuht kuh in engankihn pacl lasr in tuhkweni ac sramsram kacl Jeova, God na luhngse se lasr uh ac ke kahs lal! Wo lah kuht nohfohn kuhlwacnsuhpuh Jeova.a