Fuka Jeova El Kol Kut

“Kol yu in sie inkanek sumwosmwos.”​—SAM 27:11 New World Translation.

1, 2. (a) Fuka Jeova el kol met lal ke len inge? (b) Mea ma inge su kut enenu in oru in eis ma lane yok su tuku ke meeting?

JEOVA el Sropon kalem a paye, oanu ma kut lotela tari ke me lutlut somla. Kas Lal sang kalem nu ke inkanek lasr ke kut fwafwasyesr ke inkanek sumwosmwos. Jeova el kol kut ke el luti kut ke inkanek lal. (Sam 119:105) Oanu met sim lun Sam in pal meeta, kut insemwomwo in sang top nu ke kolyuk lun God a kut pre: “Luti nu sik inkanek lom, O Jeova, a kol yu in sie inkanek sumwosmos.”​—Sam 27:11, NW.

² Sie inkanek su Jeova el orekmakin in luti kut ke len inge pa ke meeting lun met Kristian. Ya kut orekmakin me sang kulang inge ke kut (1) wi pal nu kemwa, (2) porongo mwo ke program, (3) akola in akesrui pal nu kemwa ke kusensiyuk a top? Sayen ma inge, ya kut akkalemye insemwomwo ke pal se kut eis kas in kaifwe su ku in kasru kut in muta na ke “inkanek lun sumwosmwos”?

Fuka Oiye Lom in Wi Meeting?

3. Fuka sie met orekma lun forfor pal nu kemwa el akkapye oiye mwo in wi meeting pal nu kemwa?

³ Kutu sin met orekma lun Togusrai elos wi meeting pal nu kemwa ke pal elos tulik me. “Ke pal se sister se luk su matu liki yu a Nga srakna srik ke yiu 1930,” sie Met Lo lun Jeova su wi orekma lun forfor pal nu kemwa el esam, “kut tia enenu in siyuk sin papa a nine kiesr kut fwin wi ku tia nu ke meeting. Kut etu la kut enenu in wi kut fwin tia mas. Sou lasru wi meeting pal nu kemwa. Oanu met palu Ana, sister se inge “tia som liki” an in alu lun Jeova.​—Luk 2:36, 37.

4-6. (a) Efu kutu sin met Orekma lun Togusrai kutupal elos tia wi meeting? (b) Efu arulanu yok sripe in wi meeting?

⁴ Ya kom sie selos su wi meeting lun met Kristian pal nu kemwa, ku kom sie selos su wi kutupal a kutupal tianu? Kutu sin met Kristian su nunku mu elos wi pal nu kemwa elos sulela tari in tuni na paye ke oiyelos. Ke lusen kutu wik, elos simusla meeting nu kemwa ma elos wi. Ke pal se elos kalweni ma elos simusla ke lusen pal pakiyuki, elos lut ke pisen meeting su elos tia wi.

⁵ ‘Tia me lut,’ sie met el ku in fwak. ‘Met nu kemwa misinge elos muta ye ma upa yok paenang tia fwusesr nu selos in wi pal nu kemwa ke meeting.’ Paye na paye la kut moul misinge ke sie pal upa. Aok, wangin alollo la ma upa inge e fwa yokelik na paye. (2 Timote 3:13) Tusruktu, ya tia pa inge sripe yok paenang kut enenu in wi meeting pal nu kemwa? Fwin wangin me mongo mwomwo in ngun su akkeye kut, na kut tia ku in tu ku in lain ma upa su fwal se inge oru nu sesr. Aok, kut fwin tia asrouki nu sin met lili wiesr pal nu kemwa saap kut fwa srifweyuk in fwasr liki “inkanek lun sumwosmwos”! (Soakas 4:18) Paye, ke pal se kut tuku nu in loom sesr ke saflaiyen sie len upa, saap kut totola in wi meeting. Tusruktu, kut fwin wi, fwinne kut totola, kut fwa eis ma lane a kut fwa akkeye met lili Kristian wiesr in Kingdom Hall.

⁶ Hibru 10:25 el akkalemye pa ke sie sripe yok saye ma paenang kut enenu in wi meeting pal nu kemwa. Ke fus inge met sap Poul el kaifwe nu sin met lili Kristian wiel in tukeni nu sie meyen elos ‘liye tu len apkurun me.’ Aok, lela kut in tia mulkunla la paye “len lun Jeova” apkurun. (2 Piter 3:12) Kut fwin nunku mu saflaiyen akmwuk inge srakna loes, saap kut mutamwauk in kafofo ke orekma lasr sifwanu in sang aolla orekma saok lasr ke ma lun ngun, oanu akesrui lasr in wi meeting. Ke ma inge, Jisus el fwak ke kas in sensen, ‘len sa sa tuku nu sesr oanu sie met kaisrip.’​—Luk 21:34.

Akola In Porongo

7. Efu arulanu yok sripe nu sin tulik srisrik in loang nu ke pal in meeting?

⁷ Oasr ma enenu sayen wi meeting nu kemwa. Kut enenu in porongo mwo, loang mwo nu ke me luti an. (Soakas 7:24) Wekunang ma inge pa tulik nutusr. Fwin sie tulik el som nu ke loom lutlut, el enenu in loang nu sin met luti lal, fwinne me lutlut el upa in kalem nu sel. Met luti el etu la fwin tulik se el kaifweung in loang, el ku in lotela kutu ma lutiyuk ke me lutlut san. Ke ma inge, ya tia fwal pa nu sin tulik srisrik in loang nu ke me lutlut su akkalemyeyuk ke meeting lun congregation a tia in mutol na ke pal se meeting mutamwauk? Paye, oasr kutu ma saok na paye su ku in konoiyukyuk ke Ma Simusla “upa in eteyuk.” (2 Piter 3:16) Tusruktu lela kut in tia pilesru ku lun tulik srisrik in lutlut. God el tia oru ou inge. In pal meeta, el sapkin nu sin met kulansap fwusr lal in ‘long a lutlut, a sangeng sin Jeova, a liaung in oru ma sap nu kemwa in ma lo se inge,’ wangin alollo la kutu ma inge upa nu sin tulik srisrik in kalem ka. (Duteronomi 31:12; srike liye Livitikus 18:1-30.) Ya Jeova el tia lungse tulik in oru pa ou inge in len lasr?

8. Kain in orekma fuka papa a nine elos oru in kasru tulik nutulos in loang mwo ke meeting?

⁸ Papa a nine Kristian elos akilen la me enenu lun tulik nutulos ke ma lun ngun tia na akfwalyeyukla nu fon nu selos ke ma elos lotela ke meeting. Ke ma inge kutu papa a nine elos oakiye nu sin tulik srisrik nutulos in motul la meet liki meeting meyen ma inge ku in kasrelos in tia metkal a akola mwo in lutlut ke Kingdom Hall. Kutu papa a nine elos tiana lela tulik nutulos in liye television ke fong in meeting nu kemwa. (Efesus 5:15, 16) A kain in papa a nine inge elos kaifweung in wangin me losrong nu sin tulik nutulos, kaifwe tulik nutulos in porongo a in lutlut, fwal nu ke matwe a ku lalos.​—Soakas 8:32.

9. Mea ma inge su ku in kasru kut in akkapye ku lasr in porongo?

⁹ Jisus el sramsram nu sin met matu ke pal se el fwak: “Komwos sismouk fuka komwos long.” (Luk 8:18) Ke len inge, fwusesr in fwak ou inge liki na in oru. Aok, kut nu kemwa insese ka la kaifweung in porongo tia fwusesr, tusruktu kom ku in akkapye ku in porongo. Ke kom porongo ke sie sramsram in Baibel ku ke sie kunokon ke meeting, kaifweung in srelik me lutlut yok. Nunku a sano ke ma met sramsram el akola in fwak. Tuni me lutlut yok su kom ku in orekmakin ke orekma lun forfor ku ke moul lom. Kalweni ke nunuk lom ma inge ke pal in lutlut. Simusla ma inge.

10, 11. Fuka kutu papa a nine elos kasru tulik nutulos in ekla met long mwo, a kain in akmwuk fuka kom konaok la arulanu mwo in orekmakin?

¹⁰ Oiye lun lungse in porongo ku in lutiyukla ke pal tulik me. Meet liki elos lutlut in sim a rid, kutu sin tulik inge akkeyeyuk sin papa a nine kielos in “simusla” ma yok su elos long ke pal in meeting. Elos sang akul ke pepu fwin kas pengpeng oanu “Jeova,” “Jisus,” ku “Togusrai” orekmakinyuk. Ke inkanek inge, tulik srisrik nu kemwa elos ku in lutlut in filiye nunuk lalos ke me lutlut su orek ke me sramsram.

¹¹ Fwinne kutu tulik su matu tari kutupal elos enenu kas in akkeye in porongo. Oasr akilenyeya la tulik mokul nutulos su yiu 11 matwe el oru nunuk lal in oanu in mwemwe ke lusen pal in toeni lulap lun met Kristian, sifwen sou inge el sang Baibel nu sin tulik nutul a kaifwe nu sel in liye fus nu kemwa su met sramsram el orekmakin. Papa se inge su simusla kas fulat ke me sramsram, el liye tulik nutul ke el srukye Baibel. Tokin ma inge, tulik mokul se inge el loang mwo nu ke program lun toeni ke insemwomwo yok.

Lela Pusrem in Longyuk

12, 13. Efu arulanu yok sripe in wi on lun congregation?

¹² Togusra Devid el on: “Ou inge Nga fwa apunla loang lom, O Jeova, tu Nga fwa ku in oru pusren kaksak in longyuk.” (Sam 26:6, 7) Meeting nu kemwa lun Met Lo lun Jeova ase nu sesr pal mwo in akkalemye lalalfongi lasr ke sie pusra lulap. Sie inkanek in oru ou inge pa ke pal in akesrui lasr ke pal in on lun congregation. Sie ip saok yok pa inge ke alu lasr, tusruktu arulanu fwusesr in mulkunla.

¹³ Kutu sin tulik srisrik su sonna ku in rid elos ku in filiye ke nunuk lalos kas in on nu kemwa lun Togusrai su akola in orekmakinyuk ke meeting ke kais sie wik. Elos ku in insemwomwokin in on wi met matu. Tusruktu, ke pal se tulik elos matula, saap kena lalos in akesrui ke onkin on lun Togusrai mutamwuak in munasla. Kutu sin met matu elos mekin pa in on ke pal in meeting. Aok, on el ip lun alu lasr, oanu orekma lun forfor su sie pa ipen alu lasr. (Efesus 5:19) Kut oru ma nu kemwa in kaksakin Jeova ke orekma lun forfor lasr. Ya kut tia ku in akfulatyel pa ke kut oru in yok pusrasr​—fwinne mwo ku tianu arle mwo—​lela in sang on in sang kaksak ke insiesr kemwa?​—Hibru 13:15.

14. Efu arulanu fwal nu sesr in akola ke me lutlut nu kemwa su kut orekmakin ke meeting lun congregation?

¹⁴ Kut ouyepa sang kaksak nu sin God ke pal se kut sang comment mwo lasr ke lusen pal in meeting ke pal kusensiyuk ke me lutlut orek nu sin met in akesrui nu ke me top. Akola eneneyuk ke oiye se inge. Enenu pal yok in nunku ke ma loal ke Kas lun God. Met sap Poul, el su lutlut yok ke Ma Simusla, el akilen ma inge. El simusla: “O fuka loal in gaspen lalmetmet a etauk lun God!” (Rom 11:33) Sifwen sou, arulanu yok sripe nu sum in kasru kais sie met in sou lom in suk lalmetmet lun God su akkalemyeyuk ke Ma Simusla. Pakiye kutu pal ke lusen pal in lutlut lun sou ke Baibel, in aketeye me lutlut upa a in kasru sou lom in akola nu ke meeting.

15. Kain in kas in kaifwe fuka ku in kasru sie met in sang topuk ke pal in meeting?

¹⁵ Kom fwin lungse in sang comment pal nu kemwa ke meeting, efu kom ku tia akola mwo ma kom lungse in fwak ke pal sa? Tia enenu in arulanu kato comment lom. Fwin oasr sie fus in Baibel kom orekmakin srike in ridi ke pulaik, ku kutu kas su tuku ke insiom su kom sulela, ma inge nu kemwa mwo. Kutu sin met orekma elos siyuk sin met luti in pakiye nu selos comment se meet ke sie paragrah, meyen elos lungse na paye in eis pal mwo in fwakak lalalfongi lalos.

Sie Met Nukin El Ekla Lalametmet

16, 17. Kain in kai fuka sie met elder el oru nu sin ministerial servant, a efu ma inge arulanu fukoko?

¹⁶ Ke meeting lun Met Lo lun Jeova, pal nu kemwa akismakinyeyuk kut in ridi Baibel len nu kemwa. In oru ou inge oasr me insemwomwo tuku ka. Ma inge kasre kut pa in oru sulela mwo, aksumwosye munas lasr sifwanu, in lain me srifwe, a in sifwil akkeyeyuk ke ku lasr in ngun kut fwin tafongla in fwasr ke inkanek sesumwos.​—Sam 19:7.

¹⁷ Met elder lun congregation su yok experienced lalos akola in sang kai ke ma lun ngun su fwal nu ke enenu lasr. Ma kut enenu in oru pa in “amakin” ma inge ke akosyen kai lalos su tuku ke Baibel. (Soakas 20:5) Ke sie len ministerial servant fwusr se el siyuk sin met elder ke kasru la fuka el ku in ekla sie met su congregation orekmakin pal nu kemwa. Met elder, su etu na paye mokul fwusr se inge, el ikasla Baibel nutul in 1 Timote 3:3, su akkalemye la mokul nu kemwa su pakiyuki enenu in “kulang.” El aketeye mwo inkanek puspis la fuka mokul fwusr se inge ku in akkalemye oiye kulang nu sin kutu met. Ya mokul fwusr se inge el asor ke kai sumwos su el eis? Mo na mo! “Met elder el orekmakin Baibel” el fwak, “ke ma inge Nga akilen la kai lal tuku sin Jeova.” Ministerial servant inge el orekmakin kai a oru kapkapek mwo.

18. (a) Mea ma inge su kasru met fwusr se in lain me srifwe in loom lutlut? (b) Fuka Baibel el akismakinye kut ke pal se kut sun me srifwe?

¹⁸ Kas lun God ku in kasru met fwusr pa in “kaengla liki lung koluk lun met fwusr.” (2 Timote 2:22) Sie Met Lo lun Jeova fwusr su tufwanu srola ke high school el kutangla me srifwe ke lusen yiu puspis in lutlut ke el kalweni ke nunuk lal pal nu kemwa a orekmakin ma simusla in Soakas 13:20: “Fwafwasyesr yurin met lalmetmet, a kom fwa lalmetmet.” In fwasr tokin ma inge, el arulanu taran paenang el orek kamwuk na nu selos nu kemwa su akfulatye Ma Simusla. El fwak: “Nga tia mwo liki kutu met. Fwin Nga asrouki nu sin u koluk, Nga fwa lungse in akinsemwomwoye kamwuk luk, a ma inge ku in kol nu ke ma upa. Kas in kai lal Poul su simusyukla in 2 Timote 1:8 kasrel yu pa. El simusla: “Nik kom mwekin ke me fwakak lun Leum lasr, . . .  A kom in keok ke ma upa wi mwosasu, fwal nu ke ku lun God.” Fwal nu ke kas in kai inge, el arulanu pulaik in aketeye lalalfongi lal su tuku ke Baibel nu sin tulik lutlut wiel ke pal fwal nu kemwa. Pal nu kemwa ma oasr kunokon lal in orala report ke class, el sulela sie me sramsram su ku in kasrel in sang ma lo kulang ke Togusrai lun God.

19. Efu sie met fwusr el tia kutangla in lain ma upa lun fwalu, tusruktu mea ma inge su kasrel in ku in ngun?

¹⁹ Fwin oasr pal kut tafongla liki “inkanek lun sumwosmwos,” Kas lun God ku in kasru kut in aksumwosye inkanek lasr. (Soakas 4:18) Sie mokul fwusr su muta fwin an Africa el lotela ma inge ke inkanek yok. Ke pal se sie sin Met Lo lun Jeova el muteta yurol, el insese ke lutlut Baibel. El engun ke ma el lotela, tusruktu kitin pal na el sremla ke asrouki koluk lal in loom lutlut. Tia pat tok, el sremla ke sie moul fokfok lun kosro. “Ela luk kaifweung in akkolukye yu, paenang Nga enenu in tui liki meeting,” el fwak. Tok, el sifwil mutamwauk in wi meeting. Mokul fwusr se inge el fwak kas inge: “Nga konaok la ma upa inge nu kemwa sikyuk ke sripen Nga musrinsral ke ma lun ngun. Nga tia oru lutlut luk sifwanu ke Baibel. Paenang Nga tia ku in tu ku in lain me srifwe. Nga mutamwauk in rid Tauer In San a Awake! Kais kutu srisrik, Nga sifwil eis ku luk in ngun a aknasnasye moul luk. Ma inge sie ma lo yok nu selos nu kemwa su liye ekla su Nga oru. Na Nga baptais, a ke pal inge Nga insemwomwo.” Mea ma inge su paenang mokul fwusr se inge el ku in tu ku in kutangla munas lal in ikwe? Meyen el sifwil eis ku lal in ngun ke inkanek lun lutlut lal sifwanu pal nu kemwa ke Baibel.

20. Fuka sie met fwusr el ku in lain orekma kutasrik lun Setan?

²⁰ Met Kristian fwusr, komwos muta ye me srifwe ke len inge! Komwos fwin lungse in lain meun lun Setan nu sumwos, komwos enenu in eis me mongo lun ngun pal nu kemwa. Kalem la met simusla Sam, el met fwusr se pa paenang el kalem ke ma se inge. El sang kulo nu sin Jeova ke Kas Lal, meyen ma inge ku in ‘aknasnasye moul lun sie met fwusr.’​—Sam 119:9.

An Nu Kemwa God El Kol Kut, Kut Fwasr Tokol

21, 22. Efu kut tia enenu in fwak la inkanek lun ma paye arulanu upa?

²¹ Jeova el kol mutanfwal Israel liki an ijipt nu ke Fwal in Mwolela. Ke liye lun metu inkanek se su el sulela upa a tia engunkiyuk. El tia sulela inkanek fwusesr, a futoto sisken Mwea lun Mediterranean, aok Jeova el kol met lal ke sie inkanek upa nu yen mwesis. Tusruktu, ma el oru inge akkalemye sie oiye kulang lun God. Fwinne futoto inkanek sisken Mwea lun Mediterranean, tusruktu inkanek inge ku in kololos nu ke an lun met Filistia su arulanu koluk. Ke pal se el sulela inkanek saye inge, Jeova el oru met lal in tia sa sun meun lun met Filistia.

²² In oiye sena, Jeova el sulela inkanek kut in fwasr ka ke len inge arulanu upa kutu pal. Kais sie wik, oasr schedule lasr ke orekma lun met Kristian, meeting lun congregation, lutlut lasr sifwanu ke Baibel, a orekma lun forfor. Oasr kutu sin inkanek inge fwusesr. Tusruktu akos lasr mukena nu ke kolyuk lun God pa inganek siefwunnu kut ku in sun nien sun lasr su kut kaifwe kut in sun. Ke ma inge, lela kut in tafwela in eis me luti saok su tuku sin Jeova a kaifweung in fwasr ke “inkanek lun sumwosmwos” ma patpat!​—Sam 27:11.

Ya Kom Ku In Aketeye?

• Efu kut enenu na paye in wi meeting lun met Kristian pal e nu kemwa?

• Mea papa a nine elos ku in oru in kasru tulik nutulos in porongo ke meeting?

• Mea ma inge su ku in toeni nu ke porongo mwo?

• Mea ma inge su ku in kasru kut in sang topuk ke meeting?

[Pictures on pages 14, 15]

In wi meeting pal nu kemwa ku in kasru kut in esam pal nu kemwa len lun Jeova

[Pictures on page 16]

Oasr inkanek puspis in kaksakin Jeova ke meeting lun congregation