“Kuht Ke Wi Kom”

1, 2. (a) Meac Jeova el fahk muh ac fah sikyak ke pacl lasr uh? (b) Kihsen siyuck fuhkah ac fah topukyuck ke mwe lutlut se inge? (Liye petsac se meet ke mwe lutlut se inge.)

JEOVA el fahk muh ke pacl lasr inge, “mwet sahyac singucul ac fah tuhkuh nuh yurin sie mwet Jew ac fahk, ‘Kuht ke wi kom, mweyen kuht lohng lah God El wi kowos.’” (Zechariah 8:23) Mwet Jew inge luhmweyuck nuh ke mwet suc God el akmuhsraelah ke nguhn muhtahl. Eltahl oacyacpac pahngpahng, “Israel luhn God.” (Galatia 6:16, BMK) Mwet sahyac singucul inge luhmweyuck nuh ke mwet suc oasr finsrak la in moul ma pahtpaht fin facluh. Eltahl etuh lah Jeova el ahkinsewowoye u in mwet akmuhsralah se inge ac eltahl puhla muh kunohkohn na sacohk se pa in weluhltahl alu nuh sel.

² In oacna mwet pahluh Zechariah, Jesus el fahk lah mwet luhn God uh ac fah inse sefanna. El ahkuhtweyac ke mwet suc engan in muhta inkuhsrao oacna “u srihsrihk se” ac mwet suc engan in wi muhta fin facluh oacna “kuhtuh pac sheep” sahyac. Tuhsruhktuh, Jesus el fahk lah eltahl ac fah “u sefannalac” ac eltahl ac fah ukwe “mwet shepherd sefanna” laltahl. (Luke 12:32; John 10:16) Ke srihpen oasr u luo, kuhtuh mwet uh ac kuh in nuhnkuh: (1) Yac kuhtuh pac sheep sahyac inge enenuh in etuh inen mwet akmuhsralah nuhkewa ma oasr ke pacl inge? (2) Meac mwet akmuhsralah uh enenuh in nuhnkuh kacltahl sifacna? (3) Mwet se ke congregation luhk uh fin muhtwacwacack in wi ipeis ke bread ac wain ke pacl in Mwe Acsmakihn uh, ohiyac fuhkah nga enenuh in ahkkahlwemye nuh sel? (4) Yac nga enenuh in fosrngah nga fin liye muh puhseni pihsen mwet suc wi ipeis ke bread ac wain ke pacl in Mwe Acsmakihn uh? Mwe lutlut se inge ac fah topuk kihsen siyuck inge nuhkewa.

YAC KUHT ENENUH IN ETUH INEN MWET AKMUHSRALAH NUHKEWA KE PACL INGE

3. Efuh kuht tiac kuh in etuh na pwacye lah suc ac fah wi na pwacye ke 144,000?

³ Yac kuhtuh pac sheep sahyac uh enenuh in etuh inen mwet akmuhsralah nuhkewa ma srackna oasr fin facluh ke pacl inge? Moh. Efuh? Mweyen, wacngihn mwet ma kuh in etuh na pwacye lah suc mwet ma ac fah eis mwe insewowo la uh.^[1] (Liye endnote.) God el finne solwacltahl in som nuh inkuhsrao, pacl se na ma eltahl ac eis mwe insewowo se laltahl inge pa tukun eltahl ahkpwacyeye oaru laltahl uh. Satan el etuh ma inge ac el orekmakihn “mwet pahluh kikiacp” in ‘kiacpweltahllah.’ (Matthew 24:24) Mwet Christian akmuhsralah uh tiac kuh in etuh na pwacye fin eltahl ac eis mwe insewowo laltahl uh nwe ke na Jeova el ahkkahlwemye nuh seltahl lah el nuhnuhnkwacltahl oacna mwet oaru. Jeova el ahkkahlwemye ma inge nuh seltahl ke sil sahflah sac, ma tuhkuh meet liki na eltahl misac kuh meet liki na muhtwacwacack “pacl in ahkkweok luhlahp” uh.​—Fwackyuk 2:10; 7:3, 14.

4. Fin tiac kuh in etweyuck inen mwet akmuhsralah nuhkewa fin facluh ke pacl inge, na sheep sahyac uh ac ‘weluhltahl’ fuhkah?

⁴ Fin tiac kuh in etweyuck inen mwet akmuhsralah nuhkewa fin facluh ke pacl inge, na sheep sahyac uh ac ‘weluhltahl’ fuhkah? Bible uh fahk lah “mwet sahyac singucul ac fah tuhkuh nuh yurin sie mwet Jew ac fahk, ‘Kuht ke wi kom, mweyen kuht lohng lah God El wi kowos.’” Bible uh finne sramsramkihn mwet Jew sefanna ke pacl se ma fahk “kom,” ma inge sramsramkihn mwet pucspucs. Kalmen ma inge pa mwet Jew se inge tiac mwet sefanna, a el mwe luhmahlah se na nuh ke un mwet se ke mwet akmuhsralah uh. Sheep sahyac uh etuh ma inge ac eltahl wi u se inge in kuhlwacnsuhpuh Jeova. Eltahl tiac enenuh in etuh inen mwet nuhkewa ke u se inge ac ukwe kais sie seltahl. Jesus el mwet kol lasr ac Bible uh fahk nuh sesr lah el muhkwena pa kuht enenuh in fahsr tohkoh uh.—Matthew 23:10.

MEAC MWET AKMUHSRALAH UH ENENUH IN NUHNKUH KACLTAHL SIFACNA?

5. Kahs in sensen fuhkah mwet akmuhsralah uh kuh in nuhnkuh yohk kac, ac efuh?

⁵ Mwet akmuhsralah uh enenuh in nuhnkuh yohk ke kahs in sensen ma sihmlac in Sie Corinth 11:27-29. (Riti) Ke inkacnek fuhkah sie mwet akmuhsralah ac kuh in ipeis ke bread ac wain ke pacl in Mwe Acsmakihn ke “ohiyac tiac suwohs?” El fin tiac sruokyac na fototo wo lal nuh sin Jeova ac el seoaru nuh sel, na ke pacl se ma el kang bread ac nihm wain, el ahkkahlwemye lah wacngihn suhnak lal. (Hebrew 6:4-6; 10:26-29) Kahs in sensen na kuh inge ahkacsmakihnye mwet akmuhsralah nuhkewa lah eltahl enenuh in sruokyac oaru laltahl uh eltahl fin ke “eis molin kuhtanglah, suc pa inge: pahng luhn God nuh ke moul sasuc ke Christ Jesus.”​—Philippi 3:13-16.

6. Meac mwet akmuhsralah uh enenuh in nuhnkuh kacltahl sifacna?

⁶ Paul el fahk nuh sin mwet Christian akmuhsralah in pacl sac: “Nga suc sie mwet presin ke srihpen nga kuhlwacnsuhpuh Leum, nga kwacfe nuh suwos tuh kowos in moulkihn ohiyen moul ma fal nuh ke srihkasrak se ma God El oakiyac ke El pahngon kowos.” Eltahl ac oruh ma inge fuhkah? Paul el ahkuhtweyac: “Kowos in puhsisacl, efahl, ac mongfihsracsr pacl nuhkewa. Ahkkahlwemye luhngse lowos nuh sin sie sin sie ke muhtweng. Kowos in moniyuck in karihngihn inse sefanna suc Nguhn el acsot nuh suwos, ke mislac se suc kaprikowosi nuh sie.” (Ephesus 4:1-3) Nguhn muhtahl luhn God pa kahsruh sie mwet elan inse puhsisacl ac tiac inse fuhlwact uh. (Colossae 3:12) Pwacnacng, mwet akmuhsralah uh tiac nuhnkuh na muh eltahl wo liki mwet sahyac uh. Eltahl etuh lah Jeova el tiac sang nguhn muhtahl nuh sin mwet akmuhsralah lal uh in yohk liki ma el sang nuh sin mwet kuhlwacnsap sahyac lal uh. Ac eltahl tiac pac sifacna puhla muh eltahl kuh in kahlwem ke ma pwacye in Bible uh yohk liki kuhtwena mwet sahyac. Oacyacpac, eltahl tiac kuh in fahk nuh sin sie mwet muh el oacyacpac akmuhsralah pwacnacng el enenuh in weluhltahl kang bread ac nihm wain ke pacl in Mwe Acsmakihn uh. Tuhsruhktuh, eltahl inse puhsisacl ac etuh lah Jeova muhkwena pa kuh in suli mwet in som nuh inkuhsrao.

7, 8. Meac mwet Christian akmuhsralah uh tiac enenuh in nuhnkuh kac ac efuh?

⁷ Mwet akmuhsralah uh finne puhla muh kunohkohn na sacohk se nuh seltahl pa in som nuh inkuhsrao, eltahl tiac nuhnkuh mwet sahyac uh in oruh in wo nuh seltahl. (Ephesus 1:18, 19; riti Philippi 2:2, 3.) Eltahl oacyacpac etuh lah ke pacl se ma Jeova el akmuhsraeltahllah uh, el tiac lwelah mwet nuhkewa sahyac in etuh kac. Pwacnacng, mwet akmuhsralah se el tiac enenuh in lut fin mwet sahyac uh tiac luhlahlfongi ke muhtwacwackiyac ah lah el akmuhsralah. El ac esam lah Bible uh fahk nuh sesr in tiac sa na luhlahlfongi mwet suc fahk muh oasr kunohkohn sacohk ma ituckyang nuh sel. (Fwackyuk 2:2) Ke srihpen mwet akmuhsralah se tiac nuhnkuh mwet sahyac uh in arlacna oruh wo nuh sel, el ac tiac pac fahk nuh sin mwet suc el tuhfahna ohsun nuh se uh lah el sie mwet akmuhsralah. El kuh pacna in tiac fahk nuh sin kuhtwena mwet kac. El ac tiac pac kohnkihn ma wowo pucspucs ma el ac oruh inkuhsrao uh.​—Sie Corinth 1:28, 29; riti Sie Corinth 4:6-8.

⁸ Mwet Christian akmuhsralah uh tiac puhla muh eltahl enenuh in wi mwet akmuhsralah muhkwena, in muh atacn eltahl wi ke sie u na pwengpweng. Eltahl tiac srihke in suk mwet akmuhsralah sahyac uh tuh eltahl in tuhkweni muhta sramsramkihn akmuhsralah laltahl uh kuh in toeni ke u se ac lutlut Bible. (Galatia 1:15-17) Kain in orekma inge ac kuh in sraclihk inmahsrlon congregation uh ac lain nguhn muhtahl luhn God, ma ahkkweye ohiyen mislac ac inse sefanna.​—Riti Rome 16:17, 18.

OHIYAC FUHKAH KOM ENENUH IN AHKKAHLWEMYE NUH SELTAHL?

9. Efuh kuh kom enenuh in taran ke ohiyom nuh sin mwet suc wi ipeis ke bread ac wain ke pacl in Mwe Acsmakihn uh? (Liye pohk se inge “Luhngse El Tiac Oruh Ma Suhfal.”)

⁹ Ohiyac fuhkah kom enenuh in ahkkahlwemye nuh sin mwet lili akmuhsralah uh? Jesus el fahk nuh sin mwet tuhma lutlut lal ah: “Kowos nuhkewa mwet lili ac lucluc luhn sie sin sie.” El tahfwelah pac in fahk: “El suc sifacna ahkfuhlwactyacl ac fah ahkpuhsisaclyeyuck, ac el suc sifacna ahkpuhsisaclyacl el ac fah ahkfuhlwactyeyuck.” (Matthew 23:8-12) Pwacnacng, ac ma kuluk se in arlacna ahkfuhlwactye sie mwet, el finne mwet lili akmuhsralah se luhn Christ. Ke Bible uh sramsramkihn mwet elder uh, ma inge ahkkweye kuht in etahi luhlahlfongi laltahl uh, tuhsruhktuh ma inge tiac pac fahk nuh sesr muh kuht kuh in oraclah kuhtwena mwet in kol kuht. (Hebrew 13:7) Pwacye lah Bible uh fahk muh kuhtuh seltahl ‘fal in suhnakihnyuck,’ tiac ke srihpen eltahl mwet akmuhsralah tuhsruhktuh, ma ke srihpen eltahl “leumi wo” ac “orekma in kahs ac in luti.” (Sie Timothy 5:17, BMK) Kuht fin arlacna kaksakihn ac lohacng na nuh sin mwet akmuhsralah uh, kuht ac kuh in ahkmwekihnyacltahllah. Kuh kuluk liki pacna, kuht ac kuh in oruh eltahl in arlacna inse fuhlwact. (Rome 12:3) Wacngihn sie sesr luhngse in oruh sie mwet akmuhsralah wiyacl Christ uh in oraclah kain in ma kuluk inge!​—Luke 17:2.

10. Kom ac ahkkahlwemye fuhkah lah kom suhnakihn mwet Christian akmuhsralah uh?

¹⁰ Kuht ac ahkkahlwemye fuhkah lah kuht suhnakihn mwet suc akmuhsralah sin Jeova uh? Kuht ac tiac siyuck seltahl lah fuhkah nwe eltahl eklac mwet akmuhsralah se. Ma inge ma nuh sin mwet se mwet se, ac wacngihn suwohs lasr in wi etuh kac. (Sie Thessalonica 4:11; Luo Thessalonica 3:11) Kuht ac tiac pac enenuh in nuhnkuh na muh mukul tuhmwacltahl kuh muhtwacn kiyacltahl, pahpah kuh ninac kiyacltahl, kuh kuhtwena mwet sahyac in sucu laltahl uh wi pac akmuhsralah. Wacngihn mwet usrui finsrak se inge ke sucu laltahl uh. (Sie Thessalonica 2:12) Kuht tiac pac enenuh in siyuck kain in kihsen siyuck ma ac kuh in ahktoasrye mwet sahyac uh. Ke sie mwe puhpuhlyuck, kuht ac tiac siyuck sin muhtwacn kiyacn sie mukul lili suc akmuhsralah lah meac el puhla ke mukul tuhmwacl uh ac tiac weluhl in moul ma pahtpaht fin facluh. Kuht etuh tari lah ke facl sasuc uh, Jeova el ac fah “ahkfalye enenuh luhn ma nuhkewa suc moul.”​—Psalm 145:16.

11. Ke pacl se kuht tiac ‘yuckihn’ mwet sahyac uh, ma inge ac karihngihn kuht fuhkah?

¹¹ Oruh lasr nuh sin mwet akmuhsralah uh fin oacpacna oruh lasr nuh sin mwet nuhkewa sahyac uh, kuht oacyacpac karihngihn kuht sifacna. Fuhkah? Bible uh fahk nuh sesr lah sahp oasr mwet lili ma “oruh muh elos mwet luhlahlfongi” ke congregation uh ac kuh pac in fahk muh eltahl mwet akmuhsralah. (Galatia 2:4, 5; Sie John 2:19) Oacyacpac, kuhtuh mwet akmuhsralah uh kuh pac in tiac sruokyac oaru laltahl uh. (Matthew 25:10-12; Luo Peter 2:20, 21) Tuhsruhktuh, kuht fin tiac “yuckuhnuhlos” kuht ac tiac ukwe mwet sahyac finne mwet akmuhsralah kuh mwet suc etweyuck muh eltahl kuhlwacnsuhpuh Jeova ke lusen pacl na loeloes. Na, eltahl fin tilac oaru kuh som liki congregation uh, luhlahlfongi lasr nuh sin Jeova uh ac tiac tuhlac kuh kuht ac tiac tui in kuhlwacnsuhpwacl.​—Jude 16.

YAC KUHT ENENUH IN ELYAH KE PIHSEN MWET SUC WI IPEIS INGE?

12, 13. Efuh kuh kuht tiac enenuh in elyah ke pihsen mwet suc mongo bread ac nihm wain ke Mwe Acsmakihn uh?

¹² Ke lusen yac pucspucs, pihsen mwet suc wi ipeis ke bread ac wain ke pacl in Mwe Acsmakihn uh srihksrihkeni. Tuhsruhktuh ke pacl inge, pihsac se inge yohkwelihk kuh puhseni ke kais sie yac. Yac kuht enenuh in elyah ke ma inge? Moh. Lwelah kuht in tuni lah efuh.

¹³ “Leum [Jeova] El etuh mwet lal.” (Luo Timothy 2:19) Mukul lili suc wek pihsen mwet suc kang bread ac nihm wain ke Mwe Acsmakihn uh eltahl tiac oacna Jeova, suc etuh na pwacye mwet suc akmuhsralah uh. Pwacnacng, pihsen mwet suc acwaclah inge wekuhnacng mwet suc nuhnkuh muh eltahl wi akmuhsralah tuhsruhktuh ke ma na pwacye uh eltahl tiac. Ke sie mwe puhpuhlyuck, oasr mwet suc wi mongo bread ac nihm wain ke sie pacl ah tuh tok eltahl tui. Kuhtuh pac seltahl sahp maskihn nuhnak ac puhlakihn laltahl uh pwacnacng, eltahl luhlahlfongi muh eltahl ac fah weluhl Christ in kol inkuhsrao. Kahlwem lah, kuht tiac etuh na pwacye pihsen mwet akmuhsralah ma luhlah oasr fin facluh.

14. Meac Bible uh fahk ke pihsen mwet akmuhsralah suc ac luhlah fin facluh ke pacl se ma lwen in ongaiyac luhlahp uh muhtwacwacack?

¹⁴ Mwet akmuhsralah uh ac fah muhta ke acn pucspucs fin facluh ke pacl se Jesus el tuhkuh in eisacltahl uh. Bible uh fahk lah “puhsren mwe ukuk luhlahp ac fah kahslah, ac Wen nuhtin Mwet el fah suhpwaclihk lipufacn lal nuh fin facluh nohfohn, ac elos fah eisacni mwet sulohsohllah lal liki acn nuhkewa facluh.” (Matthew 24:31) Bible uh oacyacpac ahkkahlwemye lah ke lusen lwen sahflah uh, ac fah oasr u srihsrihk se ke mwet akmuhsralah ma ac luhlah fin facluh. (Fwackyuk 12:17) Tuhsruhktuh, tiac fwack lah ekahsr seltahl ac fah luhlah fin facluh ke pacl se ma lwen in ongaiyac luhlahp uh ac muhtwacwacack.

15, 16. Meac kuht enenuh in kahlwem kac ke mwet 144,000 suc ma sollac sin Jeova inge?

¹⁵ Jeova pa ac sulaclah lah ngac el ac fah sule mwet akmuhsralah lal inge. (Rome 8:28-30) Jeova el muhtwacwacack tari in sule mwet akmuhsralah lal inge tukun Jesus el ahkmoulyeyuckyak ah. Oacna in muh mwet Christian pwacye nuhkewa ke pacl luhn mwet sap ah akmuhsralah. Ke yac pucspucs tukun pacl sac, inkaiyen mwet suc fahk muh eltahl mwet Christian, eltahl tiac ukwacl Christ. Finne ohinge, ke lusen yac pucspucs inge, Jeova el akmuhsraelah kuhtuh pac mwet suc ahkkahlwemye lah eltahl mwet Christian na pwacye. Eltahl oacna mah wo ma Jesus el tuh fahk muh ac kapwack inmahsrlon mah kuluk uh. (Matthew 13:24-30) Ke lusen lwen sahflah inge, Jeova el tahfwelah srackna sule mwet ma ac wi ke 144,000.^[2] (Liye endnote.) Pwacnacng, God el fin sulaclah mwet ekahsr meet liki na sahflah uh, kuht ac tiac ahlohloh kac lah pa inge ma wo elan oruh uh.(Isaiah 45:9; Daniel 4:35; riti Rome 9:11, 16.)^[3] (Liye endnote.) Kuht enenuh in taran tuh kuht in tiac oacna mwet orekma suc tohrkahskahs ke inkacnek luhn leum laltahl nuh sin mwet suc muhtwacwacack orekma ke fongeni tari ac.​—Riti Matthew 20:8-15.

¹⁶ Tiac mwet nuhkewa suc oasr finsrak la in muhta inkuhsrao wi ke “mwet kuhlwacnsap oaru ac lahlmwetmwet.” (Matthew 24:45-47) In oacna ke pacl luhn mwet sap ah, Jeova ac Jesus eltahl orekmakihn mwet ekahsr in kihte kuh luti mwet pucspucs ke pacl inge. Mwet Christian akmuhsralah na ekahsr ke pacl luhn mwet sap ah pa orekmakihnyuck in suhmuhslah ke puk luhn Matthew nuh ke Fwackyuk. Ac ke pacl inge, mwet Christian akmuhsralah na ekahsr pa oasr kunohkohn se inge yohroh in kihte mwet luhn God “ke pacl fal.”

17. Meac ngac kom lotwelah ke mwe lutlut se inge?

¹⁷ Meac ngac kuht lotwelah ke mwe lutlut se inge? Jeova el sulaclah in sang moul ma pahtpaht fin facluh nuh sin inkaiyen mwet lal uh ac moul inkuhsrao nuh sin mwet suc ac weluhl Jesus kol inkuhsrao. Jeova el ahkinsewowoye mwet kuhlwacnsap nuhkewa lal uh, mwet “Jew” ac “mwet sahyac singucul” ac. Eltahl enenuh in ahkos masap sefanna ac sruokyacna oaru laltahl uh. Mwet nuhkewa enenuh in inse puhsisacl. Mwet nuhkewa enenuh in tuhkweni kuhlwacnsuhpwacl ke inse sefanna. Ac mwet nuhkewa enenuh in sruokyac na ohiyen mislac ke congregation uh. Ke kuht apkuhranyang nuh ke sahflah uh, lwelah kuht nuhkewa in tahfwelah na in kuhlwacnsuhpuh Jeova ac ukwacl Christ oacna u sefanna.