Mea Kalmen Mongo In Eku Lun Leum Nu Sum?
“Ke ma inge el su mongo bred inge, a nim kup lun Leum in tia sumwos, oasr metal ke manol a sran Leum.”—1 KORINT 11:27.
1. Mea me akfulat saok emeet su e fwa orek ke yiu 2003, a ma inge tuku ya me?
ME akfulat saok emeet su oakiyuki tari ke yiu 2003 e fwa orek ke April 16 tokin fwatu tilli. Met Lo lun Jeova nu kemwa ke pal inge elos fwa tukeni nu sie in esam Memorial ke mise lun Jisus Kraist. Oanu ma akkalemyeyuk tari ke me lutlut somla, Jisus el oakiye me akfulat inge, su ouyepa pangpang Mongo in Eku lun Leum, tokin El a met sap nu kemwa lal elos akfulatye Kofwen Alukela in Nisan 14, 33 C.E. Bred tia pulol a wain srusra ke Memorial aoliyen monin Kraist su arulanu nasnas a sral su surorla liki manol—pa inge me kise siefwunnu su ku in molela met nu kemwa ke ma koluk a mise su elos usru.—Rom 5:12; 6:23.
2. Kain in kas in sensen fuka akkalemyeyuk in 1 Korint 11:27?
2 Elos nu kemwa su wi mongo a nim ke Memorial elos enenu in oru ou inge ke inkanek sumwos a sunak. Met sap Poul el akkalemye ma inge ke pal se el sim nu sin met Kristian in pal meeta in an Korint, ke an se inge kutu sin met elos tia akfulatye Mongo in Eku lun Leum ke inkanek sumwos. (1 Korint 11:20-22) Poul el simusla: “Ke ma inge el su mongo bred inge, a nim kup lun Leum in tia sumwos, oasr metal ke manol a sran Leum.” (1 Korint 11:27) Mea ma yok ke kas inge?
Kutu Sin Met Elos Akfulatye Ma Inge ke Inkanek Sesumwos
3. Kain in oiye fuka met Kristian puspis fwin an Korint elos akkalemye ke akfulat lalos ke Mongo in Eku lun Leum?
3 Pus sin met Kristian fwin an Korint elos wi mongo a nim ke Memorial fwinne elos sufwal in oru ou inge. Oasr srisri inmaslolos, a ke sie pal, kutu selos wis mongo in eku lalos ke nien toeni a elos mongo meet liki pal in toeni ku ke lusen pal in toeni, a pal nu kemwa elos mongo a nim alukela ma fwal. Ma inge orala nunuk lalos a ku lalos in ngun in tia akola. Ma inge orelos in “oasr meta ke manol a sran Leum.” Elos su tia mongo, elos musrensral a tia loang mwo ke toeni. Aok, met puspis elos mongo bred a nim wain ke pilesru a elos tia akilen ma saok su tuku ke toeni inge. Tia me lut elos eis meta nu selos sifwanu!—1 Korint 11:27-34.
4, 5. Efu in tuni sifwanu arulanu yok sripe nu selos nu kemwa su wi mongo a nim wain pal nu kemwa ke pal in Memorial?
4 Ke pal se akfulat ke Memorial futotoeni ke yiu nu kemwa, arulanu yok sripe nu sin kais sie met su wi mongo a nim in tuni moul lalos sifwanu. Elos fwin lungse in mongo ke me sang lun me kise misla, elos enenu in fukoko in ngun. Kutena met su akkalemye pilesru, ku wangin sunak ke me kise lun Jisus, elos arulanu sensen in ‘mwotla liki met lun God,’ oanu sie met Israel su mongo ke ikwen me sang lun me kise misla, ke tia nasnas lal on fwel.—Livitikus 7:20; Hibru 10:28-31.
5 Poul el srikeye Memorial nu ke sie mongo ke me sang lun me kise misla in an Israel in pal meeta. El sramsram ke met nu kemwa su tukeni mongo in Kraist a el fwak: “Komwos tia ku in nim kup lun Leum, a kup lun dimon; komwos tia ku in mongo ke ‘tebu lun Jeova’ a tebu lun demon.” (1 Korint 10:16-21) Fwin sie met su mongo bred a nim wain ke Memorial pal nu kemwa el oru ma koluk upa, el enenu in akkalemye ma inge nu sin Jeova a siyuk pa ke me kasru in ngun su tuku sin met matu in congregation. (Soakas 28:13; Jemes 5:13-16) Ke ma inge, el fwin auliyuk na paye a akkalemye ma inge ke orekma lal, el tia eis meta el fwin mongo a nim.—Luk 3:8.
Elos Wi in Liye ke Sunak
6. God el pakiye nu sin su in wi mongo bred a nim wain ke Mongo in Eku lun Leum?
6 Ya met nu kemwa su oru mwo nu sin met lula ke 144,000 ma wiel Kraist elos ku in mongo bred a nim wain ke Mongo in Eku lun Leum? (Mattu 25:31-40; Fwakyuk 14:1) Mo. God el sang pal mwo in mongo bred a nim wain mukena nu sin met nu kemwa su el akmusrala ke ngun mutal su “met usru yurin Kraist.” (Rom 8:14-18; 1 Jon 2:20) Ke ma inge, mea ip lun met nu kemwa su oasr fwinsrak in moul ma patpat ke sie paredais fwin fwalu ye koko lun Togusrai? (Luk 23:43; Fwakyuk 21:3, 4) Ke sripen elos tia met usru yurin Jisus a wangin fwinsrak lalos in kosrao, paenang elos wi ke Memorial in tuni ma orek we ke sunak.—Rom 6:3-5.
7. Efu met Kristian ke century se meet elos etu la elos enenu in wi mongo a bred a nim wain ke pal in Memorial?
7 Met Kristian paye nu kemwa ke century se meet elos met akmusrala ke ngun mutal. Pus selos ku in orekmakin sie ku luo ke me sang lun ngun mutal ke inkanek sakuruk, kutu selos ku in orekmakin kain in kas pukanten. Ke ma inge, tia upa nu sin kais sie selos in etu la elos met akmusrala paenang elos enenu in wi mongo bred a nim wain ke Memorial. Tusruktu, in len lasr, sie met el ku akilen el fwin met akmusrala ku tia el fwin tuni moul lal sifwanu fwal nu ke ma simusla inge su etuku ke ngun lun God: “Tu elos nu kemwa su kolyuk ke ngun lun God, elos ma nutin God. Tu komwos tia sifwil eis ngun lun sruo nu ke fosrnga, a komwos eis ngun lun ma nutla, su kut ku in pangon, ka: ‘Abba, Papa!’ ”—Rom 8:14, 15.
8. “Wheat” a “tau” su sramsramkinyuk in Mattu sapter 13 el lumeyuk nu sin su?
8 Mutamwauk ke congregation se meet lun met Kristian, met Kristian akmusrala paye elos kapek oanu “wheat” ke sie imae lun “tau” ku met Kristian kikiap. (Mattu 13:24-30, 36-43) Mutamwauk ke 1870 “wheat” inge mutamwauk in akilenyuk, a tokin yiu puspis somla sapkinyuk nu sin met sropu Kristian akmusrala nu kemwa ou inge: “Met elder nu kemwa . . . enenu in oakiye nu sin met nu kemwa su akola in wi ke Memorial akmwuk inge nu kemwa,—(1) lalalfongi ke sran [Kraist]; a (2) mwolela nu sin Leum a ke orekma lal, nu ke pal in mise lalos. Elos enenu in suli met nu kemwa su pakiyuki nu ke inkanek inge a ke ma inge elos mwoleyukla tari in wi ke akfulat lun mise lun Leum.”—Studies in the Scriptures, Series VI, The New Creation, sra 473.a
In Suk “Sip Ngie”
9. Fuka akmwuk in akilenye “u lulap” akkalemyeyuk in yiu 1935, a mea ma inge el oru nu sin met puspis su wi mongo bred a nim wain ke Memorial meet liki pal inge?
9 Tokin sie pal, u lun Jeova mutamwauk in loang nu ke kutu met in toeni nu ke met tuma lutlut akmusrala lun Kraist. Sie kapkapek yok ke ma se inge sikyuk infwulwen 1930 kutu. Meet liki pal inge, met lun God elos nunku ke “u lulap” lun Fwakyuk 7:9 oanu u se akluo su akola in wi ke 144,000 met akmusrala su e fwa sifwil moulyuk a som nu in kosrao—oanu mutan kamwuk lun mutan pusrla lun Kraist. (Sam 45:14, 15; Fwakyuk 7:4; 21:2, 9) Tusruktu, in May 31, 1935, ke sie me sramsram su akkalemyeyuk ke sie toeni lulap lun Met Lo lun Jeova in an Washington, D.C., U.S.A., ke inkanek lun Baibel akkalemyeyuk la “u lulap” se inge (“u lulap,” King James Version) el sramsram ke “sip ngie” su moul ke len safla. (Jon 10:16) Tokin toeni lulap inge, kutu sin met su wi mongo a nim wain ke pal in Memorial elos tui in oru ou inge, meyen elos akilen la fwinsrak lalos pa fwalu a tia kosrao.
10. Fuka kom ku in akketeye fwinsrak a kunokon puspis lun “sip ngie” ke pal inge?
10 Yokna, in yiu 1935 oasr orekma yok in sukok met nu kemwa su wi ke “sip ngie,” su lalalfongi ke lango, su mwolela moul lalos nu sin God, a akkeye “u srisrik” akmusrala ke orekma in luti lalos ke Togusrai. (Luk 12:32) Sip ngie nu kemwa elos fwinsrak in moul ma patpat fwin fwalu, tusruktu sayen ma inge, akmwuk a inkanek nu kemwa ke moul lalos, oanu sie ke akmwuk a inkanek nu kemwa ke moul lun met lula akmusrala su met usru ke Togusrai. Oanu met saye su muta in an Israel in pal meeta su alu nu sin Jeova a akos Ma Sap lal, sip ngie ke len inge elos eis kunokon lun met Kristian, oanu in luti ke peng mwo yurin met nu kemwa su wi ke Israel in ngun. (Galetia 6:16) Aok, wangin met saye in pal meeta su ku in ekla sie togusra ku met tol lun Israel, oupanu ke sip ngie, wangin sie selos ku in kol ke Togusrai lun God in kosrao ku elos ku in kulansap oanu sie met tol.—Duteronomi 17:15.
11. Efu ku pal in Baptais lun sie met oasr ip lal ke fwinsrak su oasr yurol?
11 In yiu 1930 kutu, mutamwauk in kalem la un met nu kemwa su oasr fwinsrak in kosrao suleyukla tari. Ke lusen yiu puspis somla fwasru nu misenge, orekma in sukok, pa ma ke sip ngie su oasr fwinsrak fwin fwalu. Fwin sie met akmusrala el suoaru, kalem la God el sulela sie met ke sip ngie su muta pat ke kulansap lal nu sin God in aola ma tula ke 144,000.
Efu Kutu Met Elos Tafongla in Nunku La Oasr Fwinsrak Lalos in Kosrao
12. Ye luma a ma sikyuk fuka sie met el enenu in tui ke mongo bred a nim wain ke pal in Memorial, a efu?
12 Met Kristian akmusrala nu kemwa elos etu na paye la oasr pang lun God nu selos in som nu in kosrao. Tusruktu, fuka fwin sie met su tia eis pang inge el wi mongo bred a nim wain ke pal in Memorial? A ke pal tok el akilen la wangin na paye fwinsrak lal in kosrao, aok ella lal fwa moklel in tia sifwil mongo bred a nim wain. God el tia insemwomwo nu sin kutena met su akkalemyel sifwanu oanu sie met su pangonyuk in ekla sie togusra a met tol in kosrao fwinne el etu na paye la God el tia pangnol ke kunokon inge. (Rom 9:16; Fwakyuk 20:6) Jeova el uniye Kora sie met Livai ke sripen el insefulat in suk ma kunen met tol su ma nu ke sou lal Aaron mukena. (Exodus 28:1; Oekyuk 16:4-11, 31-35) Fwin kutena met Kristian el akilen la el tafongla ke pal se el mongo bred a nim wain ke pal in Memorial, el enenu in tia sifwil mongo bred a nim wain a el enenu in pre ke inse pusisel a siyuk sin Jeova in nunuk munas nu sel.—Sam 19:13.
13, 14. Efu kutu met elos tafongla in nunku la oasr fwinsrak lalos in kosrao?
13 Efu kutu met elos tafongla in nunku la God el pangnolos ke sie kunokon in kosrao? Mise lun mutan kielos ku mokul tumalos ku kutu ongoiye su tuku ke moul lalos ku in moklelos in supwarla ke moul fwin fwalu. Ku saap elos lungse pa fwinsrak in kosrao lun kamwuk futoto lalos su akkalemye la elos met akmusrala Kristian. Aok, God el tia pakiye ku sapkin nu sin kutena met in akkeye kutu met in eis me sang inge. A el tia akmusra kutena met usru ke Togusrai ke inkanek se su oanu oasr pusra se su elos long in pakiyelos.
14 Me luti kikiap lun alu su akkalemye la met mwo nu kemwa som nu in kosrao ku in mokle kutu met in nunku la God el pangolos in som nu in kosrao. Ke ma inge, kut enenu in taran in tia mokleyuk ke lalalfongi sito lasr in pal meeta ku ke kutupa me purakak sito. Ke sie me pupulyuk, saap kutu met elos ku in siyuk selos sifwanu: ‘Ya Nga orekmakin ono su arulanu purakak insiuk? Ya Nga sie met su arulanu emotional ku arulanu fwusesr inse paenang ma inge mokle yu in nunku la Nga sie met akmusrala?’
15, 16. Efu kutu met elos tafongla in nunku la elos met akmusrala?
15 Kutu sin met elos ku in siyuk selos sifwanu: ‘Ya Nga lungse in ekla sie met pengpeng? Ya Nga lungse mwal ke pal inge, ku ya Nga lungse in ekla met usru yurin Kraist ke pal fwasru?’ Ke pal se met usru nu kemwa lun Togusrai pangonyuk ke century se meet, kutu selos wangin kunokon yok in congregation. A met nu kemwa su oasr fwinsrak in kosrao elos tia suk moul pengpeng ku elos konkun meyen elos met akmusrala. A, elos akkalemye inse pusisel meyen pa inge ma fwal in liyeyuk nu selos nu kemwa su oasr “nunuk lun Kraist.”—1 Korint 2:16.
16 Saap kutu met elos fwak la God el pangnolos in som nu in kosrao meyen arulanu yok a alukela ma fwal etauk lalos ke Baibel. Tusruktu ngun mutal el tia sang etauk alukela ma fwal nu selos su el akmusrala, meyen Poul el srakna enenu in luti a kai kutu sin met akmusrala inge. (1 Korint 3:1-3; Hibru 5:11-14) Oasr akmwuk lun God God in kitakut me mongo in ngun nu sin met nu kemwa lal. (Mattu 24:45-47) Ke ma inge, wangin kutena met ku in fwak la meyen el sie met akmusrala paenang etauk lal yok liki etauk lun met nu kemwa su oasr fwinsrak fwin fwalu. Lalmetmet in sang topuk ke kusensiyuk ke Baibel, lalmetmet in sang ma lo, ku sumat ke aketeye me sramsram in Baibel, ma inge nu kemwa tia akul la sie met el akmusrala. Kutu sin met Kristian su oasr fwinsrak fwin fwalu elos arulanu mwo pa ke oiye inge nu kemwa.
17. In akmusrala ke ngun mutal oakiyuki nu ke mea a nu sin su?
17 Fwin sie met lili el siyuk ke pang lun God nu sin met in som nu in kosrao, sie met elder ku sie met Kristian su matu in ngun el ku in aketeye ma inge nu sel. Tusruktu, sie met el tia ku in patokye sulela lal nu sin kutu met. Sie met su pangonyuk ke me sang inge el tia enenu in siyuk kutu met fwin God el sang nu sel fwinsrak se inge. Met akmusrala nu kemwa elos “sifwilpa isusla, tia ke fute kulamwi, tu ke fute a tia kulamwi, ke kas lun God su moul, a mutana.” (1 Piter 1:23) Ke inkanek lun ngun mutal a Kas Lal, God el oanu taknelik “fute” se inge su orala sie met in oanu “ma orekla sasu,” su oasr fwinsrak in kosrao. (2 Korint 5:17) A Jeova pa oru sulela. In mosweyukla ke ngun mutal “tia ke el su lungse, ku ke el su kasrusr, a ke God su kulang.” (Rom 9:16) Ke ma inge, fuka sie met el ku in etu na paye la God el sulela el an som nu in kosrao?
Efu Elos Etu
18. Fuka ngun mutal el sang ma lo ke ngun lun met akmusrala?
18 Ma lo su tuku ke ngun mutal lun God purakak met akmusrala in lalalfongi na paye la oasr fwinsrak lal in kosrao. “Komwos eis ngun lun ma nutla,” Poul el simusla, “su kut ku in pangon, ka: ‘Abba, Papa!’ Ngun el sifwanu orek ma lo nu ke ngunasr, tu kut ma nutin God. A kut fwin ma nutul, na kut met usru: met usru lun God, a met usru yurin Kraist, kut fwin keok yurol, tu kut fwa ouyepa mwolanu yurol.” (Rom 8:15-17) Ye koko lun ngun mutal, ngun, ku oiye fulat, lun met akmusrala moklelos in orekmakin Ma Simusla inge su sramsramkin mwen nutin Jeova in ngun nu selos sifwanu. (1 Jon 3:2) Ngun mutal lun God sang nu selos sie ku in pulakin su akkalemye la elos mwen nutin God a ke sripe se inge oasr fwinsrak sakuruk lalos in kosrao. (Galetia 4:6, 7) Aok, moul ma patpat fwin fwalu oanu sie met sumwosmwos a raunella ke sou a kamwuk puspis arulanu mwo a me purakak inse na paye, tusruktu, tia pa inge fwinsrak su God el sang nu selos. Ke inkanek lun ngun mutal lal, God el sang nu selos sie kain in fwinsrak fukoko in kosrao paenang elos akola a insemwomwo in likiye kutena ma a kutena fwinsrak fwin fwalu.—2 Korint 5:1-5, 8; 2 Piter 1:13, 14.
19. Mea ip lun mwoleuang sasu ke moul lun met Kristian akmusrala?
19 Met Kristian akmusrala nu kemwa elos arulanu lalalfongi na paye ke fwinsrak lalos in kosrao, a elos akilen la elos nu kemwa utukla tari nu ke mwoleaung sasu. Jisus el akkalemye ma inge ke pal se el oakiye Memorial, el fwak: “Kup se inge mwoleaung sasu in srak, su surorla keyumwos.” (Luk 22:20) Met nu kemwa su wi ke mwoleuang sasu pa God a met akmusrala. (Jeremaia 31:31-34; Hibru 12:22-24) Jisus pa met iumwe. Ma inge orekma ke inkanek lun sral Kraist su surorla liki manol, mwoleaung sasu se inge tia fwal nu sin met Ju mukena, a el fwal pa nu sin met pegan su pangpang nu ke en Jeova a ekla oanu ipen “fute” lal Ebream. (Galetia 3:26-29; Orekma 15:14) “Mwoleaung ma patpat” se inge kasru met Israel in ngun nu kemwa in sifwil moulyuk a moul ma patpat in kosrao.—Hibru 13:20.
20. Met akmusrala nu kemwa elos utukla nu ke kain in mwoleaung fuka yurin Kraist?
20 Met akmusrala nu kemwa elos etu na paye fwinsrak lalos. Elos inge nu kemwa utukla nu ke siepa mwoleaung, mwoleuang ke Togusrai. In sramsramkin akesrui lalos nu sel Kraist, Jisus el fwak: “A komwos su wi yu in mel luk; a Nga pakiye nu sumwos sie togusrai, oanu Papa tumuk el pakiye nu sik.” (Luk 22:28-30) Mwoleaung se inge inmaslon Kraist a togusra nu kemwa su akola in welul fwa orekma ma patpat.—Fwakyuk 22:5.
Pal in Memorial—Sie Pal in Insemwomwo
21. Fuka kut ku in eis me insemwomwo lulap ke pulanpal lun Memorial?
21 Oasr me insemwomwo puspis su tuku ke pal in Memorial. Kut ku in eis ma lane yok su tuku ke schedule ke Baibel reading ke pal inge. Sie pal mwo pa pa inge in pre, ku in nunku ke moul lun Jisus a mise lal fwin fwalu, a ke orekma in luti lal ke Togusrai. (Sam 77:12; Filippai 4:6, 7) Me akfulat inge akismakinye kut ke lungse su God a Kraist elos akkalemye in kapsreni nu ke me kise lango lun Jisus. (Mattu 20:28; Jon 3:16) Me sang inge ase nu sesr fwinsrak a me pwarak, a ma inge enenu in akkeye kaifweung lasr in fwafwasyesr ke inkanek lun Kraist. (Exodus 34:6; Hibru 12:3) Memorial el enenu in akkeye kut in akpayeye mwolela lasr nu sin God oanu met kulansap lal a in fwasr tokin Mwen nutul ke oaru.
22. Mea me sang yok emeet lun God nu sin metu, a mea sie inkanek in akkalemye insemwomwo nu ke ma inge?
22 Me sang na mwomwo pa inge su Jeova el ase nu sesr! (Jemes 1:17) Oasr yurosr me kasru su tuku ke Kas lal, me kasru su tuku ke ngun mutal lal, a fwinsrak in moul ma patpat. Me sang yok emeet lun God pa me kise lun Jisus in molela ma koluk lun met akmusrala a kutupa met su akkalemye lalalfongi. (1 Jon 2:1, 2) Ke ma inge, fuka lupan kalmen mise lun Jisus nu sum? Ya kom sie selos su akkalemye insemwomwo ku kulo ke kom wi selos su tukeni nu sie tokin tilli lun fwat in April 16, 2003, in akfulatye Mongo in Eku lun Leum?
[Footnote]
a Orekla a kitakutla sin Met Lo lun Jeova tusruktu elos tia sifwil print ma inge.
Mea Topuk Lom?
• Su ku in wi mongo bred a nim wain ke Memorial?
• Efu ku “sip ngie” elos wi ke Mongo in Eku lun Leum oanu sie met su tuni me akfulat inge ke sunak?
• Fuka met Kristian akmusrala nu kemwa elos ku in etu la elos enenu in wi mongo bred a nim wain ke Memorial lun mise lun Kraist?
• Pal in Memorial pa sie pal in mea?
[Graph/Pictures on page 28]
(For fully formatted text, see publication)
Memorial Attendance
IN MILLIONS
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Picture on page 28]
Ya kom akola in wi ke Mongo in Eku lun Leum ke yiu se inge?
[Pictures on page 30]
Pal in Memorial pa sie pal in akyokye Baibel ridi lasr a akesrui lasr ke orekma in luti ke Togusrai