Sie Mwe Insewowo Yohk In Wi God Orekma

1. Finne Jeova pa fuhlwact emeet uh, meac el siyuck mwet sahyac uh in oruh?

JEOVA pa fuhlwact emeet uh. El oraclah ma nuhkewa ac wacngihn sahflahiyen lahlmwetmwet ac kuh lal uh. Tukun el kahsrel Job in kahlwem ke ma inge, Job el fahk nuh sel: “Leum God nga etuh lah kuh nuhkewa oasr sum, ac kom kuh in oruh ma nuhkewa kom luhngse.” (Job 42:2) Jeova el kuh in oruh ma nuhkewa ma el luhngse in oruh ac el tiac enenuh kahsruh luhn kuhtwena mwet. Tuhsruhktuh, el ahkkahlwemye luhngse lal ke el siyuck mwet sahyac in weluhl ahkfahsrye ma luhngse lal uh.

2. Orekma yohk srihpac fuhkah se Jeova el siyuck Jesus elan oruh?

² God el oracllah Jesus, wen nahtuhl, meet liki kuhtwena mwet ac ma sahyac. Na tok, Jeova el lwelah wen nahtuhl in kahsrel oraclah ma nuhkewa sahyac. (John 1:1-3, 18) Mwet sap Paul el suhmuhslah ma inge kacl Jesus: “Ke el, God El oraclah ma nuhkewa inkuhsrao ac fin facluh, ma liyeyuck ac ma tiac kuh in liyeyuck, weacng pac kuh luhn nguhn inge nuhkewa: leum, ac mwet kol, ac wal fuhlwact ma oan yen engyeng uh. God El oraclah ma nuhkewa inkuhsrao, fin facluh, ac yen engyeng uh kacl ac nuh sel.” (Colossae 1:15-17) Pwacnacng, Jeova el tiac sang muhkwena sie orekma na yohk srihpac nuh sin wen nahtuhl tuhsruhktuh, el fahkwack pac ma inge nuh sin mwet sahyac uh. Sie kunohkohn na sacohk pa inge!

3. Meac Jeova el siyuck sel Adam elan oruh? Efuh?

³ Jeova el oacyacpac siyuck mwet uh in weluhl orekma. Ke sie mwe puhpuhlyuck, el lwelah Adam elan sang inen ma orahkrahk nuhkewa. (Genesis 2:19, 20) Srihke nuhnkuh ke luhpan engan lal Adam ke el oruh orekma se inge! El tuni ahkwoyac atacn ma orahkrahk inge ac ohiyacltahl, na tohkoh el sang inen kais sie ma orahkrahk inge. Jeova el oacyacpac oraclah ma orahkrahk nuhkewa. Pwacnacng, el kuh in sifacna sang ineltahl. Tuhsruhktuh, el ahkkahlwemye nuh sel Adam luhpan luhngse lal ke el lwelah elan sang inen ma orahkrahk inge. God el oacyacpac sang kunohkohn se nuh sel Adam in oraclah facluh nohfohn nuh ke sie paradise. (Genesis 1:27, 28) Tuhsruhktuh tok, Adam el sulaclah in tilac weluhl God orekma ac ke sahflahiyac el puhla mwe kweok yohk, wekuhnacng tuhlihk nuhkewa nahtuhl.—Genesis 3:17-19, 23.

4. Kahsruh luhn mwet sahyac uh ahkfahsrye fuhkah ma luhngse luhn God uh?

⁴ Tok, God el siyuck kuhtuh pac mwet sahyac in weluhl orekma. Noah el muhsahelah oak soko ma karuhnguhnwacng moul lal ac luhn sucu lal ah ke sronot sac. Moses el ahksukohsohkyelah muhtuhnfacl Israel liki acn Egypt. Joshua el kohllah mwet Israel nuh ke Facl in Wuhleacng. Solomon el muhsahelah tempuhl se fin acn Jerusalem. Mary el eklac ninac kiyacl Jesus. Mwet oaru inge nuhkewa ac kuhtuh pac sahyac, eltahl weluhl Jeova in ahkfahsrye ma luhngse lal uh.

5. Orekma fuhkah se kuht kuh in tuhkweni oruh? Yac Jeova el enenuh kuht in oruh orekma se inge? (Liye petsac se emeet ke mwe lutlut se inge.)

⁵ Ke pacl inge, Jeova el siyuck sesr in sang kuhiyacsr kewa in ahkkweye Tohkohsrahi lal uh. Arlac puhs inkacnek ma kuht ac kuh in kuhlwacnsuhpuh God kac. Mwet nuhkewa finne tiac kuh in kuhlwacnsuhpwacl ke inkacnek sefanna, kuht nuhkewa kuh in fahkwack pweng wo ke Tohkohsrahi lal uh. Jeova el kuh in muhkwena ahksahfyelah orekma se inge. El kuh in sramsram nuh sin mwet fin facluh uh. Jesus el fahk lah Jeova el kuh pac in oruh yot uh in sruhmuhn nuh sin mwet sahyac ke Tohkohsrah se ke Tohkohsrahi lal uh. (Luke 19:37-40) Tuhsruhktuh, Jeova el lwelah kuht in ‘mwet orekma yohrohl.’ (Sie Corinth 3:9, BMK) Mwet sap Paul el suhmuhslah: “Kuht, suc wi God in oruh orekma lal, kuht kwacfe suwos tuh kowos in tiac pihlesruh kuhlwacng luhn God suc kowos eis tari.” (Luo Corinth 6:1) Sie kunohkohn na sacohk in siyuckyuck in wi God orekma. Lwelah kuht in liye kuhtuh srihpac ma oruh ma inge in ahkenganye kuht.

KE KUHT WI GOD OREKMA MA INGE AHKENGANYE KUHT

6. Wen se meet nuhtin God el ahkuhtweyac fuhkah puhlakihn lal in wi Pahpah tuhmwacl ah orekma?

⁶ Pacl nuhkewa ma mwet kuhlwacnsap luhn God uh weluhl orekma, ma inge ahkenganyacltahl. Meet liki wen se meet nuhtin God el tuhkuh nuh facluh, el fahk: “LEUM GOD El oreyuclac meet liki ma nuhkewa . . . Nga muhta siskacl oacna sie mwet lwemlwem nuh ke muhsah. Lwen nuhkewa nga mwe engan nuh sel, ac nga engan ye muhtahl pacl nuhkewa.” (Soakas 8:22, 30) Ke pacl se Jesus el wi Pahpah tuhmwacl ah orekma, el engan mweyen yohk ma el ahksahfyelah ac el etuh lah Jeova el luhngse el. Ac fuhkah nuh sesr?

7. Efuh kuh orekma in luti uh ahkenganye kuht?

⁷ Jesus el fahk lah kuht engan kewa na ke pacl ma kuht sang ac ke pacl kuht eis. (Orekma 20:35) Kuht arlacna engan ke pacl se ma kuht eis ma pwacye uh, tuhsruhktuh efuh kuh kuht oacyacpac engan in sruhmuhn ma pwacye uh nuh sin mwet sahyac? Mweyen kuht liye ke pacl se ma eltahl arlacna engan in kahlwem ke ma Bible uh luti ac muhtwacwacack in fototoyang nuh sin God. Kuht engan in liye ke eltahl ekuhllah nuhnak ac ohiyen moul laltahl uh. Orekma in luti uh pa orekma se ma yohk srihpac emeet ac use engan yohk nuh sesr. Ma inge kuh in oruh mwet suc eklac kawuck luhn God uh in eis moul ma pahtpaht.​—Luo Corinth 5:20.

8. Meac kuhtuh mwet uh fahk ke engan laltahl in wi Jeova orekma?

⁸ Ke pacl se kuht kahsruh mwet sahyac uh in etwacllah God, kuht etuh lah kuht ahkinsewowoye Jeova ac el ahksacohkye kwacfeacng lasr in kuhlwacnsuhpwacl. Ma inge acse engan yohk nuh sesr. (Riti Sie Corinth 15:58.) Marco, sie mwet suc muhta fin acn Italy el fahk: “Nga puhla engan yohk suc wacngihn ma oacna ke nga etuh lah nga sang kuhiyuck kewa nuh sin Jeova ac tiac nuh sin sie mwet suc ac muhlkuhnlah orekma luhk uh ke kihtin pacl na tohkoh.” In oacpacna, Franco el oacyacpac oruh orekma in kuhlwacnsap lal uh fin acn Italy ac pa inge ma el fahk: “Ke inkacnek luhn Kahs lal wi mwe rit ac miting nuhkewa, Jeova el ahkacsmakihnye kuht lah el luhngse kuht ac ma nuhkewa ma kuht oruh nuh sel uh yohk srihpac, kuht finne puhla muh kwacfeacng lasr uh arlacna srihklac. Pa inge srihpac se pwacnacng ke nga wi God orekma, nga puhla lah nga insewowo ac oasr srihpen moul luhk uh.”

KE KUHT WI GOD OREKMA, MA INGE AHKFOTOTOYE KUHT NUH SEL AC NUH SIN MWET SAHYAC

9. Fuhkah inmahsrlol Jeova ac Jesus, ac efuh?

⁹ Ke pacl se kuht wi mwet kuht luhngse uh orekma, ma inge ahkfototoye kuht nuh seltahl. Yohkwelihk ma kuht etuh ke ohiyacltahl. Kuht etwaclah finsrak laltahl uh ac lah eltahl ac srihke in sun fuhkah. Jesus el weluhl Jeova orekma ke lusen yac pucspucs. Luhngse laltahl nuh sin sie sin sie uh kuhi ac wacngihn kuhtwena ma kuh in kuhnahoslah inmahsrloltahl. Jesus el ahkuhtweyac fototoiyacltahl ke el tuh fahk: “Nga ac Pahpah ma sefanna.” (John 10:30) Eltahl inse sefanna ac tuhkweni orekma in ma nuhkewa.

10. Efuh kuh orekma in luti uh ahkfototoye kuht nuh sin God ac nuh sin mwet sahyac uh?

¹⁰ Jesus el siyuck Jeova elan karihngihn mwet tuhma lutlut lal uh. Efuh? El puhruhe ac fahk: “Tuh elos fah ma sefanna, oacna ke nga kom ma sefanna.” (John 17:11) Ke kuht moulkihn moul lasr fal nuh ke oakwuck wowo luhn God, ac kuht wi ke orekma in luti uh, kuht kahlwemack ke ohiyac wowo pucspucs lal uh ac kuht inse sefanna. Kuht etwaclah lah efuh sie inkacnek lahlmwetmwet pa in luhlahlfongel ac in ukwe kolyuck lal uh. Ac ke kuht fototoyang nuh sin God, el fototo me pac nuh sesr. (Riti James 4:8.) Kuht oacyacpac fototo nuh sin mwet lili wiyacsr uh, ke srihpen kuht kewa puhla ma upac ac mwe engan sefanna ac finsrak lasr kewa uh oacna sie. Kuht tuhkweni orekma, tuhkweni engan ac tuhkweni muhtweng ke ma upac lasr uh. Octavia, suc muhta fin acn Britain, el fahk: “Ke nga weluhl Jeova orekma uh, ma inge ahkfototoyeyuc nuh sin mwet sahyac.” El ahkuhtweyac lah ma inge ma ke srihpen kawuck lal inge kewa tuhkweni oasr ke “finsrak ac oakwuck sefanna.” Kahlwem lah kuht puhla oacpacna. Ke pacl se kuht liye kwacfeacng luhn mwet lili wiyacsr uh in ahkinsewowoye Jeova, ma inge ahkfototoye kuht nuh seltahl.

11. Efuh kuh fototo lasr nuh sin Jeova ac mwet lili wiyacsr uh ac fah kuhi liki na meet ah ke facl sasuc uh?

¹¹ Luhngse lasr nuh sin God ac nuh sin mwet lili wiyacsr uh arlac kuh ke pacl inge, tuhsruhktuh ac fah kuhi liki meet ah ke facl sasuc uh. Srihke nuhnkuh ke orekma nuhkewa kuht ac engan in oruh ke pacl fahsruh uh! Kuht ac paing mwet suc ac sifwil moulyak uh ac lotweltahl kacl Jeova. Ac fah oasr pac orekma ma kuht ac oruh in ekuhllah facluh nuh ke sie paradise. Kuht ac fah puhla engan yohk in tuhkweni orekma ac kais kuhtuh na eklac mwet suwohswohs ye kolyuck luhn Christ. Mwet nuhkewa ac fah fototo nuh sin sie sin sie ac nuh sin Jeova, suc ac fah “ahkfalye enenuh luhn ma nuhkewa suc moul.”​—Psalm 145:16.

KE KUHT WI GOD OREKMA MA INGE KARIHNGIHN KUHT

12. Orekma in luti uh karihngihn kuht fuhkah?

¹² Kuht enenuh in karihngihn fototo lasr nuh sin Jeova. Kuht muhta ke facl lal Satan ac kuht mwet sesuwohs, pwacnacng ac fihsracsr nuh sesr in muhtwacwacack in nuhnak ac orekma oacna mwet luhn facluh. Ma inge ac kuh in luhmweyucklac nuh ke pacl se kuht yihyih ke infacl soko ac acsr na luhlahp se us kuht nuh ke acn ma kuht sruhnga kofkof we. Kuht ac enenuh in orekmakihn kuhiyacsr kewa in kofkof lain acsr se inge. In oacpacna, kuht enenuh in sang kuhiyacsr kewa tuh kuht in fahsr liki mwe ahkkuluk ke facl lal Satan uh. Pwacnacng, orekma in luti uh karihngihn kuht fuhkah? Ke pacl se kuht sramsram kacl Jeova ac ke Bible uh, kuht lohacng yohk nuh ke ma yohk srihpac ac ma wo, tiac nuh ke ma ac ahkmuhnahsye luhlahlfongi lasr uh. (Philippi 4:8) Orekma in luti uh ahkkweye luhlahlfongi lasr uh, mweyen ma inge ahkacsmakihnye kuht ke wuhlelah pucspucs luhn God ac ke oakwuck wowo lal uh. Ma inge oacyacpac kahsre kuht in sruokyacna ohiyac wo ma kuht enenuh tuh kuht in karihngihn kuht luhkel Satan ac facl se lal inge.​—Riti Ephesus 6:14-17.

13. Meac puhlakihn luhn sie Mwet Loh fin acn Australia ke orekma in luti uh?

¹³ Ke kuht ahkkahfofoye kuht ke orekma in luti uh, lutlut Bible ac kahsruh mwet sahyac ke congregation uh, kuht karihngihn kuht sifacna mweyen wacngihnlac pacl kuht in muhta elyahlac ke ma upac lasr uh. Joel, sie mukul suc muhta fin acn Australia, el fahk: “Orekma in luti uh kahsreyuc nga in tiac muhlkuhnlah ma yohk srihpac ac pwacye uh. Ma inge ahkacsmakihnyeyuc ke ma upac ma mwet sahyac uh sun ac ke ma wo ma nga puhla ke srihpen nga orekmakihn kahs in kahsruh luhn Bible ke moul luhk uh. Orekma in luti uh kahsreyuc in inse puhsisacl, mweyen pacl wo se nuh sihk pa inge in luhlahlfongi Jeova ac mwet lili wiyuck uh.”

14. Efuh kuh kwacfeacng lasr ke orekma in luti uh ahkkahlwemye lah nguhn luhn God uh wi kuht?

¹⁴ Orekma in luti uh oacyacpac ahkkweye luhlahlfongi lasr uh lah nguhn luhn God uh wi kuht. In luhmahlah ma inge ke nuhnak lasr uh: Srihke petsacelah muh orekma se lom pa in kihtakat fuhlao nuh sin mwet ke acn sum an. Tiac moul nuh sum a kom orekmakihn mani lom sifacna in oruh orekma se inge. Oacyacpac, inkaiyen mwet uh tiac luhngse fuhlao inge ac kuhtuh mwet uh sruhngwac kom ke kom ac us nuh yohrohltahl uh. Puhtahkah kom liye tuh kom ac tahfwelah in oruh orekma se inge? Tukun kihtin pacl na, kom ac sruhngaclah ac kom ac kuh pacna in tui. Yac nuh ke yac, kuht orekmakihn pacl ac mani lasr nuh ke orekma in luti uh. Kuhtuh pacl uh mwet uh isrucn kuht kuh kasrkuhsrak sesr, tuhsruhktuh kuht srackna wi ke orekma in luti uh. Ma inge ahkpwacyeye lah nguhn luhn God pa kahsre kuht uh.

KE KUHT WI GOD OREKMA KUHT AHKKAHLWEMYE LUHNGSE LASR NUH SEL AC NUH SIN MWET SAHYAC

15. Orekma in luti ke pweng wo uh kuhpahsr fuhkah nuh ke oakwuck luhn God nuh sin mwet uh?

¹⁵ Orekma in luti uh kuhpahsr fuhkah nuh ke oakwuck luhn God nuh sin mwet uh? Oakwuck luhn God uh pa mwet uh in moul ma pahtpaht ac oakwuck se lal inge tiac eklac ke pacl se Adam el oraclah ma kuluk sac. (Isaiah 55:11) God el oraclah oakwuck se nuh sesr tuh kuht in sukohsohklah liki ma kuluk ac misac. Fuhkah? Jesus el tuhkuh nuh facluh in kihsackuhnwacng moul lal. Tuhsruhktuh, in wi puhla ma wo ke mwe kihsac lal uh, mwet uh enenuh in ahkos God. Pa inge srihpac se oruh Jesus el luti mwet uh ke ma God el luhngse eltahl in oruh ac el sapkihn mwet tuhma lutlut lal ah in oruh pac ma inge. Ke pacl se kuht wi ke orekma in luti uh ac kahsruh mwet sahyac in eklac kawuck luhn God ke pacl inge, ma inge oacpacna kuht in wi God orekma ke oakwuck na wowo se lal in molwelah mwet uh liki ma kuluk ac misac.

16. Orekma in luti lasr uh kuhpahsr fuhkah nuh ke masap se ma yohk srihpac emeet luhn God?

¹⁶ Ke pacl se kuht kahsruh mwet sahyac uh in konwacack inkacnek in wi moul ma pahtpaht, kuht ahkkahlwemye lah kuht luhngse eltahl ac Jeova. Ma luhngse lal uh pa “mwet e nuhkewa in moliyucklac ac in kuh in etuh ke ma pwacye.” (Sie Timothy 2:4) Ke mwet Pharisee se tuh siyuck sel Jesus lah meac masap se ma yohk srihpac emeet luhn God, Jesus el fahk: “‘Kom fah luhngse Leum God lom ke insiom kewa, ke nguhnum kewa, ac ke nuhnkom kewa.’ Pa inge ma sap se ma yohk emeet ac yohk srihpac emeet. Ma sap se ahkluo yohk srihpac oacpacna ma se meet an: ‘Kom fah luhngse mwet tuhlan lom oacna kom luhngse kom sifacna.’” (Matthew 22:37-39) Ke kuht wi ke orekma in luti ke pweng wo uh, kuht ahkkahlwemye lah kuht ahkos masap inge.​—Riti Orekma 10:42.

17. Meac kom puhla ke kunohkohn na yohk se lasr inge in fahkwack ke pweng wo?

¹⁷ Arlacna yohk mwe insewowo ma ituckuh nuh sesr! Jeova el use sie orekma ma ahkenganye kuht, ma ahkfototoye kuht nuh sel ac nuh sin mwet lili wiyacsr uh ac karihngihn fototo lasr nuh sel uh. Ma inge oacyacpac oraclah pacl wo se nuh sesr in ahkkahlwemye luhngse lasr nuh sin God ac nuh sin mwet sahyac. Puhs liki million sin mwet kuhlwacnsap luhn Jeova fin facluh nohfohn ac eltahl nohfohn siena ohiyac ma eltahl oasr kac uh. Tuhsruhktuh, kuht finne fuhsr kuh mahtuh, kahsruhp kuh suhkahsruhp, fokoko kuh muhnahs, kuht sang kuhiyacsr kewa in ahkkahlwemye luhlahlfongi lasr uh nuh sin mwet sahyac. Kuht puhla oacna ma Chantel, sie mwet France el fahk inge: “Nga puhla in oacna ke mwet se suc kuh emeet ac oraclah ma nuhkewa, suc sie God engan el fahk nuh sihk: ‘Som! Sramsram! Sramsram luhk, ke insiom kewa. Nga usot kuh luhk, Kahs luhk ke Bible, kahsruh luhn lipufacn, mwet lili wiyom fin facluh, mwe ahkpah, ac kahs in luti ke pacl fal.’ Sie kunohkohn na yohk in oruh ma Jeova el siyuck sesr uh ac in tuhkweni orekma yurin God lasr!”