Nguhn luhn God Sang Mwe Ahkpwacyeye nuh ke Nguhnasr

1-3. Ke Pentecost, meac sikyak ma pwacnacng lwen se inge in arlacna sacohk? Ac ma sikyak inge ahkpwacyeyuck fuhkah nuh ke ma ma suhmuhslah uh palye? (Liye petsac se meet ke mwe lutlut se.)

KE LUTUTACNG in Sunday se fin acn Jerusalem, lwen se inge sacohk ac lwen in engan se. Mwet inge ahkfuhlwactye Pentecost, ac ma inge kuhfa na sacohk se ma muhta orek ke muhtwacwacyen pacl in kosrwacni wheat. Ke lututacng sac, mwet tol fuhlwact sac kihsackihn mwe kihsac ke tempuhl uh. Ac tok ke ao yuc, el ac kihsackihn loaf in bread lukwac ma oreklac ke fahko se meet ke wheat ma eltahl kosrwacni. Mwet tol fuhlwact se inge ac kohlwack loaf in bread lukwac inge ac furok tuh in ahkkahlwemye ma inge nuh sin Jeova. Ma inge orek ke Pentecost ke yac 33.​—Leviticus 23:15-20.

² Ke yac nuhkewa, mwet tol fuhlwact se oruh mwe kihsac inge ac ma inge orek ke lusen yac pucspucs. Mwe kihsac se inge kuhpahsr nuh ke sie ma na yohk srihpac ma tuh sikyak ke Pentecost ke yac 33. Ma se inge sikyak nuh sin mwet tuhma lutlut 120 lal Jesus suc tuhkweni puhruhe ke sie infuhkihl lucng fin acn Jerusalem. (Orekma 1:13-15) Yac oalfoko meet liki ma inge, mwet pahluh Joel el sihm in sruhmuhn ke ma ac sikyak inge. (Joel 2:28-32; Orekma 2:16-21) Meac na yohk srihpac se sikyak inge?

³ Riti Orekma 2:2-4. Ke Pentecost 33, God el sang nuh sin mwet Christian inge nguhn muhtahl, ac eltahl akmuhsralah. (Orekma 1:8) Tohkoh, oasr un mwet se rauneltahllah ac mwet tuhma lutlut inge muhtwacwacack sramsramkihn ma wowo pucspucs ma eltahl liye ac lohng inge. Mwet sap Peter el ahkuhtweyac lah meac sikyak inge ac lah efuh ma inge arlacna yohk srihpac. Na, el fahk nuh sin un mwet sac: “Kais sie suwos enenuh in forlah liki ma kuluk lal, ac bacptaislac inen Jesus Christ, tuh ma kuluk lowos fah nuhnak muhnahs nuh suwos; ac kowos fah eis mwe kihte luhn God.” Ke lwen sac, apkuhran nuh ke mwet 3,000 bacptaislac ac eltahl wi pac eis nguhn muhtahl.​—Orekma 2:37, 38, 41.

4. (a) Efuh kuh kuht enenuh in etuh ma sikyak ke Pentecost ke yac 33 ah? (b) Ma yohk srihpac fuhkah se ma sahp sikyak pacna ke lwen se inge ke yac pucspucs meet liki yac 33? (Liye endnote.)

⁴ Meac mwet tol fuhlwact ac mwe kihsac ma orek ke Pentecost nuhkewa inge luhmweyuck nuh kac? Mwet tol fuhlwact inge luhmweyuck nuh kacl Jesus. Loaf in bread inge luhmweyuck nuh ke un mwet tuhma lutlut lal Jesus ma akmuhsralah ke nguhn muhtahl. Mwet tuhma lutlut inge suleyucklac inmahsrlon mwet sesuwohs ac pahngpahng eltahl “fahko se meet.” (James 1:18) God el eis mwet inge ac sulacltahllah oacna wen nahtuhl ac in weluhl Jesus kol inkuhsrao oacna tohkohsrah ke Tohkohsrahi luhn God. (Sie Peter 2:9) Jeova el ac orekmakihn Tohkohsrahi se lal inge in ahkinsewowoye mwet nuhkewa suc ahksol. Pwacnacng, acn sesr uh finne oasr inkuhsrao weluhl Jesus kuh ke sie paradise fin facluh, arlacna yohk srihpen Pentecost ke yac 33 nuh sesr.^[1]​—Liye endnote.

MEAC SIKYAK KE PACL SE SIE MWET EL AKMUHSRALAH?

5. Kuht etuh fuhkah lah tiac mwet akmuhsralah nuhkewa eis akmuhsra laltahl uh ke inkacnek sefanna?

⁵ Mwet tuhma lutlut suc muhta ke infuhkihl se lucng ah tiac kuh in muhlkuhnlah lwen se inge. Kais sie seltahl oasr atacn e ma fihrihr fin sifacltahl. Jeova el sang kuh nuh seltahl in sramsram ke kahs sahyac. Wacngihn ahlohloh kac lah eltahl akmuhsralah ke nguhn muhtahl. (Orekma 2:6-12) Tuhsruhktuh, ma wolacna inge tiac sikyak nuh sin mwet Christian nuhkewa ke pacl se eltahl akmuhsralah ah. Ke sie mwe puhpuhlyuck, Bible uh tiac fahk lah oasr ma atacn e fin sifen tausin sin mwet fin acn Jerusalem ma akmuhsralah tok ke lwen sac. Mwet inge akmuhsralah ke pacl se ma eltahl bacptaislac ah. (Orekma 2:38) Oacyacpac, tiac mwet Christian inge nuhkewa akmuhsralah ke pacl se eltahl bacptaislac inge. Mwet Samaria inge akmuhsralah tukun bacptais laltahl. (Orekma 8:14-17) Ac ke sie inkacnek na usrnguck, Cornelius ac mwet in lohm sel uh akmuhsralah meet liki eltahl bacptaislac.​—Orekma 10:44-48.

6. Meac mwet akmuhsralah nuhkewa uh eis ac meac ma inge oruh nuh seltahl?

⁶ Kahlwem lah kain in inkacnek pa mwet Christian inge konwacack lah eltahl mwet akmuhsralah. Sahp kuhtuh seltahl sa na konwacack lah Jeova el ahkmuhsraeltahllah. Kuhtuh pac seltahl konwacack tukun lusen pacl se. Tuhsruhktuh, mwet sap Paul el ahkuhtweyac ke ma sikyak nuh sin kais sie seltahl inge. El fahk: ‘Ke kowos oacyacpac luhlahlfongi, kowos siliyucki ke nguhn muhtahl luhn wuhleacng, suc mwe ahkpwacyeyacn usru lasr.’ (Ephesus 1:13, 14, BMK) Pwacnacng, Jeova el orekmakihn nguhn muhtahl lal uh in oruh in kahlwem na pwacye nuh sin mwet Christian inge lah el sulacltahllah in som nuh inkuhsrao. Ke inkacnek se inge, nguhn muhtahl pa “ahkpwacyeye” nuh sin mwet inge lah ke pacl fahsruh uh eltahl ac fah moul ma pahtpaht inkuhsrao ac tiac fin facluh.​—Riti Luo Corinth 1:21, 22; 5:5.

7. Meac kais sie mwet akmuhsralah enenuh in oruh tuh elan eis mwe usru lal inkuhsrao?

⁷ Ke pacl se sie mwet Christian el akmuhsralah, yac kalmen ma inge pa el ac eis na pwacye mwe usru se lal inge? Moh! El etuh na pwacye lah suliyuck el in som muhta inkuhsrao. Tuhsruhktuh, el ac eis muhkwena mwe usru se lal inge el fin oaru na nuh sin Jeova. Peter el ahkuhtweyac ohinge: “Ke ma inge, mwet luhlahlfongi wiyuck, sifwil pac lihksreni srihke in oruh tuh sulaclah ac pahng kawihl luhn God nuh suwos in kuh in kahlwem ke moul lowos. Kowos fin oruh ohinge, kowos ac fah tiac na fuhleack luhlahlfongi lowos. In ohiyac se inge, ac fah ituckot nuh suwos kuh suwohswohs in ilyak nuh in Tohkohsrahi kawihl luhn Leum ac Mwet Lahngo lasr Jesus Christ.” (Luo Peter 1:10, 11) Pwacnacng, kais sie mwet akmuhsralah enenuh in tiac lwelah kuhtwena ma in tulohkuhnuhl ke kuhlwacnsap lal nuh sin Jeova uh. Mwet se finne suliyuck in som nuh inkuhsrao, el ac kuh pacna in tiac eis mwe usru lal uh el fin tiac sruokyacna oaru lal.​—Hebrew 3:1; Fwackyuk 2:10.

MWET SE AC ETUH FUHKAH?

8, 9. (a) Efuh kuh upac nuh sin inkaiyen mwet uh in kahlwem ke ma sikyak nuh sin sie mwet ke pacl se el akmuhsralah? (b) Mwet se ac etuh fuhkah lah suliyuck el in som nuh inkuhsrao?

⁸ Mwet kuhlwacnsap pucspucs ke pacl inge puhla muh upac nuh seltahl in kahlwem kac lah meac sikyak nuh sin sie mwet ke pacl se God el akmuhsraellah. Eltahl tiac puhla ma inge, mweyen eltahl tiac akmuhsralah. God el oraclah mwet uh in moul ma pahtpaht fin facluh, tiac inkuhsrao. (Genesis 1:28; Psalm 37:29) Tuhsruhktuh, Jeova el sulaclah kuhtuh mwet inge in eklac tohkohsrah kuh mwet tol inkuhsrao. Pwacnacng, ke pacl se el akmuhsraeltahllah uh, finsrak, nuhnak laltahl uh eklac, tuh eltahl in engan ke moul se laltahl inkuhsrao uh.​—Riti Ephesus 1:18.

⁹ Tuhsruhktuh, mwet se ac etuh fuhkah lah suliyuck el in som nuh inkuhsrao? Lohacng nuh ke ma Paul el fahk nuh sin mwet lili akmuhsralah fin acn Rome inge suc God el pahngon mwet lal. El fahk nuh seltahl: “Nguhn se suc God el acsot nuh suwos el tiac ahkkohsye kowos kuh ahksahngwengye kowos a nguhn sac oruh tuh kowos in ma nuhtin God, ac ke kuh luhn nguhn kuht kuh in pahng nuh sin God ac fahk: ‘Pahpah! Pahpah!’ Nguhn luhn God sifacna kuhpahsr me nuh ke nguhnasr, in ahkkahlwemye lah kuht tuhlihk nuhtin God.” (Rome 1:7; 8:15, 16) Ke inkacnek luhn nguhn muhtahl, God el oruh in kahlwem nuh sin sie mwet lah suliyuck el in kol oacna sie tohkohsrah inkuhsrao weluhl Jesus.​—Sie Thessalonica 2:12.

10. Meac kalmen Sie John 2:27, ke el fahk muh sie mwet Christian akmuhsralah tiac enenuh kuhtwena mwet in lotwel?

¹⁰ Mwet suc eis mwe solsol se inge sin God tiac enenuh mwet sahyac in fahk nuh seltahl lah eltahl sie mwet akmuhsralah. Jeova pa mokleltahl in etuh na pwacye uh. Pa inge ma mwet sap John el fahk nuh sin mwet Christian akmuhsralah: “Ac kowos mosrweyukla tari sin el suc muhtahl, ac kowos etuh ma nuhkewa.” Na el sulpac fahk: “Ac fuhnuh keiwos, mosrwelah se suc kowos eis Sel oan na in kowos, ac kowos tiac enenuh tuh kuhtwena mwet in luti nuh suwos; a oacna mosrwelah Lal luti nuh suwos in ma nuhkewa, ac ma se inge pwacye, ac tiac kikiacp, ac oacna ma se inge luti nuh suwos, kowos muhtana in El.” (Sie John 2:20, 27, BMK) Mwet Christian akmuhsralah uh enenuh in lutiyuck sin Jeova oacna mwet nuhkewa sahyac. Tuhsruhktuh, eltahl tiac enenuh kuhtwena mwet in ahkpwacyeye lah eltahl mwet akmuhsralah. Jeova el orekmakihn nguhn muhtahl lal suc kuh emeet in ahkkahlwemye nuh seltahl lah eltahl sie mwet akmuhsralah!

ELTAHL “SIFWIL ISUSLAC”

11, 12. Meac sie mwet Christian akmuhsralah el ac kuh in nuhnkuh ac kihsen siyuckkihn? Tuhsruhktuh, meac el ac tiacna ahlohloh kac uh?

¹¹ Ke pacl se mwet Christian uh akmuhsralah ke nguhn muhtahl, eltahl eklac na pwacye. Jesus el fahk muh oacpacna in muh eltahl “sifwil isuslac.” (John 3:3, 5) El ahkuhtweyac tohkoh: “Nik kom lut mweyen nga fahk lah kowos nuhkewa enenuh in sifwil pac isuslac. Eng uh tuh nuh yen el luhngse. Kom lohng kuhsac, a kom tiac etuh yen el tuhkuh we me, kuh yen el ac som nuh we. Ac oacpacna inge elos nuhkewa suc isuslac ke Ngun.” (John 3:7, 8) Kahlwem lah tiac kuh in ahkuhtweyucki nuh sin sie mwet suc tiac akmuhsralah lah meac mwet inge ac puhla.^[2]​—Liye endnote.

¹² Sie mwet suc akmuhsralah el ac kuh in nuhnkuh, ‘Efuh kuh Jeova el suleyuclac a tiac sie mwet sahyac ah?’ El ac kuh in nuhnkuh el fin ac fal nuh ke kunohkohn se inge. Tuhsruhktuh, el ac tiacna ahlohloh kac fin pwacye Jeova el sulacllah. El ac arlacna engan ac srui ke mwe sang na wowo se inge. Mwet akmuhsralah uh puhla oacpacna ma Peter el puhla ke el tuh fahk: “Lwelah kuht in sang kuloh nuh sin God, Pahpah tuhmuhn Leum lasr Jesus Christ! Ke srihpen pahkotwen luhlahp lal, El acse nuh sesr sie moul sasuc ke el ahkmoulyelack Jesus Christ liki misac. Ma se inge nwekkuhtlac ke sie finsrak moul. Ohinge kuht tawi nuh ke pacl se kuht eis kasrpen mwe insewowo suc God El karihngihn nuh sin mwet lal uh. El karihngihn ma inge nuh suwos inkuhsrao, yen ma ac tiac kuh in kuhlawi, kuh kuluklac, kuh eflah.” (Sie Peter 1:3, 4) Ke pacl se mwet akmuhsralah uh riti kahs inge, eltahl etuh na pwacye ac tiac ahlohloh kac lah Pahpah tuhmwacltahl uh pa sramsram nuh seltahl kais sie.

13. Nuhnak luhn sie mwet ke pacl se el akmuhsralah uh eklac fuhkah? Meac oruh eltahl in eklac uh?

¹³ Meet liki Jeova el suli mwet Christian inge in som nuh inkuhsrao, oasr finsrak laltahl in wi moul ma pahtpaht fin facluh. Eltahl engan in liye ke pacl se ma Jeova el ac fah oraclah facluh nuh ke sie paradise ac ahkwacngihnyelah ma kuluk nuhkewa. Sahp, eltahl petsacelah tari ke eltahl ac paing mwet laltahl suc misac tari. Sahp, eltahl ngwetlah liye ke eltahl ac muhsahelah lohm seltahl sifacna ac muhta kac kuh ke eltahl ac yok ac kang fukun imac laltahl inge. (Isaiah 65:21-23) Pwacnacng, efuh kuh nuhnak laltahl uh eklac? Yac eltahl eklac ke srihpen eltahl ahsor kuh kweok na pwacye? Yac eltahl muhtwacwacack in sruhngaclah moul ma pahtpaht fin facluh ac eltahl ac tiac engan in muhta we? Yac eltahl ke puhla lah fuhkah moul se inkuhsrao uh? Moh. God pa sulaclah ma inge nuh seltahl uh. Ke pacl se el solwacltahl uh, el orekmakihn nguhn muhtahl lal in ekuhllah nuhnak laltahl wi ma wowo ma eltahl kuh in engan in sun ke pacl fahsruh uh.

14. Meac puhlakihn luhn mwet akmuhsralah uh ke moul laltahl fin facluh?

¹⁴ Yac kalmen ma inge pa mwet akmuhsralah uh ke misac? Paul el ahkuhtweyac puhlakihn luhn mwet akmuhsralah uh. El kapsruh monin mwet inge nuh ke sie “lohm nuknuk” ac fahk: ‘Tuh pwacye kuht suc muhta in lohm nuknuk se inge kuht saho, tuh kuht toasr; ac tiac tuh kuht kena sahruhklah ma inge, a tuh in nukumyuckyang kuht, tuh ma suc ac misac fah ukumyucklac in moul.’ (Luo Corinth 5:4, BMK) Mwet Christian inge sruhnga in misac. Eltahl engankihn moul laltahl ac luhngse in orekmakihn kais sie lwen in kuhlwacnsuhpuh Jeova wi sucu ac kawuck laltahl uh. Tuhsruhktuh, finne meac eltahl oruh uh, eltahl esam lah God el wuhlelah tari finsrak wowo se nuh seltahl ke pacl fahsruh uh.​—Sie Corinth 15:53; Luo Peter 1:4; Sie John 3:2, 3; Fwackyuk 20:6.

YAC JEOVA EL NUH SULI KOM?

15. Meac kuhtuh ma ma tiac ahkpwacyeye lah sie mwet el akmuhsralah ke nguhn muhtahl?

¹⁵ Sahp, kom nuhnkuh fin Jeova el suli kom in som nuh inkuhsrao. Kom fin puhla muh el suli kom, nuhnkuh ke kihsen siyuck na yohk srihpac inge: “Yac kom puhla muh kom arlacna moniyuck ke orekma in luti uh? Yac kom arlacna engan in lutlut ke Bible uh ac in lutlut ke ma “loallacna luhn God”? (Sie Corinth 2:10) Yac kom puhla muh Jeova el ahkinsewowoye orekma in luti lom an? Yac ma yohk srihpac emeet nuh sum an pa in oruh ma Jeova el luhngse kom in oruh uh? Yac luhngse lom nuh sin mwet sahyac uh yohk ac kom puhla muh kunohkohn na yohk srihpac se lom in kahsreltahl in kuhlwacnsuhpuh Jeova? Kom nuh liye tari mwe ahkpwacyeye nuh kac lah Jeova el kahsre kom ke inkacnek pucspucs ke moul lom ma arlacna kahlwem? Kom fin muh ahok nuh ke kihsen siyuck inge nuhkewa, yac kalmen ma inge pa suliyuck kom in som nuh inkuhsrao? Moh, tiac pa ingacn kalmac uh. Efuh? Mweyen mwet kuhlwacnsap nuhkewa luhn God uh puhla ma inge, lah eltahl mwet akmuhsralah se kuh tiac. Ac ke inkacnek luhn nguhn muhtahl, Jeova el kuh in sang kuh se pacna inge nuh sin kuhtwena mwet kuhlwacnsap lal, finne meac finsrak laltahl ke pacl fahsruh uh. Kom fin nuhkanlah lah kom ac wi som nuh inkuhsrao, kalmac pa tiacna suliyuck kom. Mwet suc suleyucklac sin Jeova inge ac tiac nuhnkuh kac! Mweyen eltahl etuh na pwacye!

16. Kuht etuh fuhkah lah tiac mwet nuhkewa ma eis nguhn luhn God uh suliyuck in som nuh inkuhsrao?

¹⁶ Puhs mwe puhpuhlyuck in Bible ke mwet suc eis nguhn muhtahl luhn Jeova tuhsruhktuh tiac som nuh inkuhsrao. Sie mwe puhpuhlyuck ke ma inge pa John Bacptais. Jesus el fahk lah wacngihn sie mwet fuhlwact luhkel John, tuhsruhktuh el fahk muh John el ac tiac kol oacna sie tohkohsrah inkuhsrao. (Matthew 11:10, 11) David el oacyacpac kolyuck ke nguhn muhtahl. (Sie Samuel 16:13) Nguhn muhtahl pa kahsrel in kahlwem ke ma loal kacl Jeova ac oacyacpac kohluhl in suhmuhslah kuhtuh ip ke Bible uh. (Mark 12:36) Finne ohinge, mwet sap Peter el fahk lah David el tiac “som nuh lucng.” (Orekma 2:34) Jeova el orekmakihn nguhn muhtahl lal uh in sang kuh nuh sin mwet inge in oruh ma wolacna pucspucs, tuhsruhktuh el tiac orekmakihn in solwacltahl in muhta inkuhsrao. Yac kalmen ma inge pa suhfal ohiyen oaru laltahl uh kuh eltahl tiac fal in kol inkuhsrao? Moh. Kalmac pa Jeova el ac fah ahkmoulyeltahlwack in moul ke Paradise fin facluh.​—John 5:28, 29; Orekma 24:15.

17, 18. (a) Finsrak fuhkah se ma mwet kuhlwacnsap pucspucs luhn God ngwetlah liye ke pacl fahsruh uh? (b) Kihsen siyuck fuhkah kuht ac fah nuhnkuh kac ke mwe lutlut se tok uh?

¹⁷ Inkaiyen mwet kuhlwacnsap luhn God ke pacl inge ac tiac som nuh inkuhsrao. Abraham, David, John Bacptais wi mukul ac muhtwacn pucspucs sahyac in Bible uh ngwetlah liye ke pacl se eltahl ac muhta fin facluh ye government luhn God suc ac fah kohluhltahl. (Hebrew 11:10) Ac fah oasr 144,000 suc weluhl Jesus kol inkuhsrao. Tuhsruhktuh, Bible uh sruhmuhn lah “tuhlihk luhlah” ke mwet akmuhsralah uh srackna oasr fin facluh ke lusen lwen sahflah inge. (Fwackyuk 12:17) Pwacnacng, inkaiyen mwet 144,000 inge misac ac oasr tari inkuhsrao.

¹⁸ Tuhsruhktuh, mwet se fin fahk muh el akmuhsralah, ohiyac fuhkah mwet suc oasr finsrak la in moul fin facluh uh enenuh in ahkkahlwemye nuh sin mwet inge? Mwet se ke congregation lom an fin muhtwacwacack kang bread ac nihm wain ke pacl in Mwe Acsmakihn, ohiyac fuhkah kom enenuh in ahkkahlwemye nuh sel? Ac fuhkah fin pihsen mwet suc fahk muh eltahl akmuhsralah inge puhseni liki meet ah? Yac kom enenuh in elyac kac? Kuht ac fah topuk kihsen siyuck inge ke mwe lutlut se tok uh.