Kasrusr in Akutun Wi Mongfusrasr

“Lela kut in moniyuk in kasrusr lun akutun, su filiyuki tari ye mutasr.”—HIBRU 12:1.

1, 2. Met sap Poul el pupulyukkin moul lun met Kristian nu ke mea?

YEA nukewa, oasr kasrusr in akutun su orek in an puspus. Kutu met su wi ke akutun inge elos arlana mwo a mui, a elos lungse in kutangla. Tusruktu met puspus su kasrusr elos etu la elos tia ku in eis kutangla ka. Ma yok sripe nu selos pa in aksafyela kasrusr in akutun se inge.

² Baibel el akkalemye pa ke sie akutun. Ma inge akuteye la moul lun met Kristian paye ku in pupulyukkin nu ke sie akutun su oasr mol ka. Met nukewa su kafweang in moulkin moul oana met Kristian a in sruokye oaru lalos nu sin Jeova elos pupulyukkin oana met kasrusr su lungse in aksafyela akutun. Met sap Poul el simusla ke kain in akutun se inge in leta se meet lal nu sin met Kristian in an Korint. El simusla ouinge: “Ya komwos tia etu tu elos su kasrusr in akutun, elos nu kemwa kasrusr, a siefwanna eis mol in kutangla? Komwos in kasrusr ou inge tu komwos fwa eis.”—1 Korint 9:24.

3. Mea kalmen kas lal Poul ke el fwak mu met sefwanna ku in eis mol in kutangla?

³ Ke pal se Poul el fwak la met sefwanna ku in eis mol in kutangla, ya kalmen kas lal inge pa met Kristian sefwanna a fwa eis me mol in moul? Mo. El sramsramkin ke sripe paenang met elos kasrusr in akutun. Met Kristian in an Korint elos etu la met nukewa su kasrusr ke sie akutun elos lungse na paye in eis kutangla ka, fwinne met sefwanna ku in eis molo ka. Pa inge sripe paenang met sritel nukewa elos akpa a ako na paye a elos kafweang in kasrusr ke oiya mwo emeet elos ku in oru. Elos nukewa kafweang yok in eis kutangla ka. Poul el lungse met lili nukewa wiyel in kafweang yok in oaru nu sin Jeova pal nukewa a aksafyela akutun lun moul se inge. Met Kristian nukewa su oru ma inge elos ku in kutangla a eis me mol in moul ma patpat.

4. Mea kut enenu in etu ke akutun su met Kristian elos kasrusr ka?

⁴ Kas inge me akkeye nu sesr, tusruktu ma inge oru kut in nunku yok ke inkanek su kut moulkin moul lasr. Kut fwin moulkin moul ke inkanek su akinsemwomwoye Jeova, a fwa oasr fwinsrak mwomwo lasr in moul ma patpat in kosrao ku ke Paredais fwin fwalu. Tusruktu moul lun sie met Kristian el oana kasrusr in akutun su arlana loes ke inkanek soko su oasr me sensen puspus. Oasr ma puspus su ku in akmunasye kut ke orekma in kulansap lasr nu sin Jeova, ku oru kut in tui in kulansapu Jeova. (Mattu 7:13, 14) Oiya inge sikyak nu sin kutu met kulansap lun Jeova. Me sruf a me sensen fuka oasr ke akutun nu ke moul? Fuka kom ku in fwasr liki me sensen inge? Mea kom ku in oru in aksafyela a in kutangla ke kasrusr in akutun inge?

Oiyen Muteng Eneneyuk in Kutangla

5. Mea Poul el akuteye in Hibru 12:1?

⁵ Tokin kutu pal, Poul el simusla nu sin met Hibru Kristian su oasr in Jerusalem a Juda. El sifwilpa sramsramkin met su kasrusr in akutun. (Ridi Hibru 12:1.) El akuteye la efu ku met Kristian elos enenu in kafweang in kasrusr ke akutun lalos a ke ma elos enenu in oru in aksafyela akutun inge. Ma se meet kut fwa sramsramkin sripe puspus paenang Poul el simusla leta se inge nu sin met Hibru a mea el lungselos in oru. Tokin ma inge kut fwa sramsramkin ke ma kut ku in lotela ke ma el simusla nu selos.

6. Mea met kol lun alu elos srike in oru nu sin met Kristian puspus?

⁶ Met Kristian in pal meeta, yokna elos su muta fwin an Jerusalem a Juda, elos sun kain in me srufwe a ma upa puspus. Met kol ke alu lun met Ju elos srike in patok met puspus in aksoltal. Yea tolngoul meet liki pal san, elos oru met in lulalfongi mu Jisus Kraist el lain guferment a fwak pa mu el sie met koluk su fwal in anwuki. Met kol lun alu inge elos unilye Jisus Kraist, a elos lungse in tulokinye met puspus su luti kel. Ke buk lun Orekma, kut ku in rid ke ma sikyak tokin Pentecost in yea 33. Met kol inge elos kalyai met Kristian ke pal puspus in srike in tulokinyelos in tia luti peng mwo. Ke ma inge arlana upa moul lun met Kristian oaru nukewa inge.—Orekma 4:1-3; 5:17, 18; 6:8-12; 7:59; 8:1, 3.

7. Mea paenang pal se su met Kristian elos moul ka arlana upa?

⁷ Sie pa sripe paenang met Kristian inge elos moul ke sie pal in ma upa pa meyen kunanela lun Jerusalem apkuran. Jisus el sensenkinulos la God el fwa kunausla Jerusalem. El fwak nu selos ke ma a fwa sikyak meet liki kunanela se inge, a el fwak pa nu selos la mea elos enenu in oru in moliyukla. (Ridi Luk 21:20-22.) Jisus el sensenkakunulos: “A komwos in sifwana sismouk, saap insiomwos sesesla ke oasras, a srui, a nunkala lun fwal se inge, a len sa sa tuku nu fwomwos oana sie me kaisrip.”—Luk 21:34.

8. Mea oru kutu met Kristian in tila moniyuk in kulansap nu sin Jeova, ku tui in kulansap nu sel?

⁸ Ke pal se Poul el simusla leta lal nu sin met Hibru Kristian, apkuran yea 30 tokin Jisus el fwak kas in sensen inge. Mea sikyak nu sin met Kristian inge ke lusen yea 30 inge? Ke sripen ma upa puspus ku meyen elos fosrnga ke ma enenu lalos ke len nukewa, kutu selos tui in eis etauk kel Jeova a elos tila oru oiyen kawuk lalos nu sel in fokoko. (Hibru 5:11-14) Saap kutu sin met Kristian elos nunku mu moul lalos a fwa fusrasr fwin elos moulkin moul oana met Ju puspus saye. Saap elos nunku mu ma inge tia koluk meyen met Ju elos srakna lulalfongi God a akos Masap puspus lal. Oasr pa met Kristian ke congregation su srike in patok met puspus in akos Masap lal Moses a fasin puspus lun met Ju. Kutu sin met Kristian lulalfongelos, a kutu porongelos meyen elos sangeng. Mea Poul el fwak in akkeye met Kristian inge in kafweang in moulkin moul oana met Krtistian a in sruokye oiyen oaru lalos nu sin Jeova?

9, 10. (a) Ke saflaiyen Hibru sapta 10, mea Poul el fwak nu sin met Hibru Kristian elos enenu in oru? (b) Efu ku Poul el simusla ke orekma mwo wi lulalfongi yok lun met lo puspus in pal meeta?

⁹ Jeova el kasrel Poul in simusla leta se inge nu sin met Hibru Kristian in akkeyelos. In sapta 10 ke leta se inge, Poul el akkalemye meet nu selos la Masap el me lumala nu ke ma mwo puspus su fwa tuku, a ke sripen me kise lun Jisus pa inge inkanek sefwanna su ku in nunak munas ma koluk lalos. Ke saflaiyen sapta 10, Poul el fwak nu selos la fwin elos lungse in eis me insemwomwo ka, elos enenu in akkalemye mongfusrasr ke moul lalos. El fwak: “Tu komwos enenu mongfusrasr, tu, tokin komwos oru ma lungse lun God, komwos fwa eis mwuleung. Tu ‘tokin kutu srisrik pal, el su tuku fwa tuku, tia pat.’”—Hibru 10:1, 36, 37.

¹⁰ Ke inkanek lun kas inge, Poul el akkeye met Hibru Kristian elos in mongfusrasr. In sapta 12, el akkeyelos in muteng a fwak nu selos in mongfusrasr in ‘kasrusr lun akutun’ su filiyuki ye mutalos. Tusruktu meet liki el fwak ma inge, God el kasrel in simusla nu selos ke oiya saye, a kut ku in rid ka in sapta 11. In sapta se inge, el akuteye la mea kalmen lulalfongi paye nu sin God, ke el simusla ke ma mwomwo puspus orek sin met su oasr lulalfongi paye in pal meeta. Efu ku el sramsram ke lulalfongi meet liki el sifwilpa sramsram ke mongfusrasr? Meyen el lungse met Kristian inge in etu la elos enenu in mongfusrasr a pulaik tu elos in akkalemye lulalfongi paye nu sin Jeova. El akkalemye ke mokul a mutan puspus in pal meeta su sruokye oaru lalos nu sin Jeova fwinne ke pal su oasr ma upa puspus. Me srikasrak lalos ku in kasru met Hibru Kristian in muteng ke kain in ma upa puspus. Tokin el fwak ke orekma mwo wi lulalfongi yok lun met kulansap inge lun Jeova, Poul el fwak nu sin met Hibru Kristian: “Ke ma inge, tu oasr pukunyeng lulap lun met lo su apunkutla, lela kut in ouyepa sisla ma toasr nu kemwa, a ma koluk su apkuran in kuluskuti, a lela kut in moniyuk in kasrusr lun akutun, su filiyuki tari ye mutasr.”—Hibru 12:1.

‘Sie Pukunyeng lun Met Lo’

11. Kut fwin nunku ke me srikasrak lun “pukunyeng lulap lun met lo,” mea kut enenu in esam?

¹¹ Poul el fwak la met kulansap puspus lun God su moul meet liki pal lun met Kristian elos oana sie ‘pukunyeng lulap lun met lo su apunkutla.’ Elos oaru nu sin Jeova nu ke saflaiyen moul lalos, a me srikasrak mwomwo lalos akkalemye la met Kristian nukewa ku in sruokye oiyen oaru lalos nu sin Jeova fwinne oasr me keok a ma upa puspus. “Pukunyeng lun met lo” inge, ku met kulansap lun Jeova in pal meeta, elos oana met kasrusr su aksafyela kasrusr in akutun lalos. Me srikasrak lalos ku in akkeye met lo saye in kafweang in kasrusr ke akutun se inge. Kut fwin kasrusr ke sie akutun a kut etu la oasr met kasrusr su fokoko a mui elos wi pa kasrusr a elos akkeye kut pa in kafweang in kasrusr, na kut fwa oru ma nukewa in aksafyela kasrusr in akutun lasr. Ke ma inge met Hibru Kristian elos enenu in nunku ke me srikasrak lun met kulansap lun Jeova inge in pal meeta. Me srikasrak lalos ku in akkeyelos a akesmakinyelos la elos ku pa in mongfusrasr in “kasrusr lun akutun” a aksafyela ma inge. A kut ku pa in oru ma inge.

12. Mea kut ku in lotela ke lulalfongi lun met puspus su Poul el sramsramkin ka inge?

¹² Kut ku in lotela ke lulalfongi lun met puspus inge su Poul el sramsramkinyuk meyen pus selos pulakin pa oiya oana ke ma sikyak nu sesr. Ke sie me pupulyuk, Noa el moul meet liki Jeova el kunausla met koluk nukewa in pal san ke inkanek lun sronot lulap. A kut moul ingena ke sie pal meet liki Jeova el a kunausla akwuk nukewa ke fwal lal Setan. Jeova el siyuk sel Ebream a Sera in som liki loom selos. El mwulela nu selos la el fwa oru tulik natulos oana sie mutunfwal in kulansap nu sel, a elos tupanul in akpayeye mwulela se inge. Jeova el siyuk sesr in tia moul fwal nu ke lungse lasr sifwana, a kut in moulkin moul lasr in kulansap nu sel. El mwulela nu sesr la kut fwin orekmakin moul lasr in kulansap nu sel, el fwa met kawuk lasr a el fwa akinsemwomwoye kut. Moses el fwufwasryesr yen mesis su oasr me sensen puspus in som nu ke Fwal Mwulela. Kut moul ke fwal koluk se inge a kut sano ke fwal sasu su Jeova el mwulela nu sesr. Arlana yok sripe nu sesr in nunku ke moul lun met oaru nukewa inge. Kut ku in etawi ma mwomwo puspus su elos oru in akinsemwomwoye Jeova a lotela pa ke ma puspus su tia ku in akinsemwomwoyel.—Rom 15:4; 1 Korint 10:11.

Mea Kasrelos in Aksafyela Kasrusr In Akutun Lalos?

13. Ma upa puspus fuka Noa el sun? Mea kasrel in oru ma nukewa su Jeova el fwak nu sel elan oru?

¹³ Mea kasru met kulansap nukewa lun Jeova inge in mongfusrasr ke kasrusr in akutun lalos a aksafyela ma inge? Loang akmwoye ke ma Poul el simusla kel Noa. (Ridi Hibru 11:7.) Noa el soenna liye sie sronot su kunausla met a ma orakrak nukewa. (Genesis 6:17) Soenna oasr sronot sikyak meet liki pal san. Tusruktu Noa el tia nunku mu sronot se inge tia ku in sikyak. Efu? Meyen el lulalfongi la ma nukewa Jeova el fwak, el akpayeye. Ke ma inge Noa el tia nunku mu arlana upa in akos Jeova. El oru ma nukewa el sapkin nu sel. Baibel el akkalemye: “Ouinge Noa el oru.” (Genesis 6:22) Oasr ma puspus su Noa el enenu in oru. El enenu in musaela oak soko, orani kain in kosro nukewa, esani mongo fwal nu sin sou lal a nen kosro natul. El enenu pa in sensenkakin met nukewa ke Sronot su fwa tuku, a kasru sou lal in oasr lulalfongi fokoko nu sin Jeova. Tia fusrasr nu sel Noa in oru ma nukewa su Jeova el sapkin nu sel elan oru. Tusruktu oasr lulalfongi lal nu sin Jeova, ke ma inge el mongfusrasr ke orekma su el enenu in oru. A Jeova el molella a sou lal nukewa a sang nu selos me insemwomwo puspus.

14. Ke oiya puspus fuka Ebream a Sera elos akkalemye lulalfongi nu sin God? Mea kut ku in lotela ke me srikasrak lalos?

¹⁴ Poul el akkalemye pa kel Ebream a Sera oana sie sin met puspus su wi ke “pukunyeng lulap lun met lo su apinkutla.” Moul lalos ekyek ke pal se God el fwak nu selos in som liki loom selos in an Ur. Elos nukin la mea a fwa sikyak ke moul lalos. Tusruktu oasr lulalfongi fokoko lalos nu sin Jeova a elos aksol fwinne ke oiya upa puspus. Baibel el akkalemyel Ebream oana “papa tumalos nukewa su lulalfongi” ke sripen el lafwekunul sifwana in akinsemwomwoye Jeova. (Rom 4:11) Met Hibru Kristian elos etu tari ke moul lal Ebream a sou lal, ke ma inge Poul el akkalemye mukena ke kutu oiya su elos akkalemye orekma mwo wi lulalfongi yok. Ne ouinge ma inge fwal tari in akkalemye la lulalfongi lalos arlana fokoko. Poul el fwak kelos: “Elos inge nu kemwa [welulang Ebream a sou lal] mise in lalalfongi, ke elos sumwena eis me mwuleang, a elos liye a paing nu selos yen loesla, a elos fwakak tu elos metsa a met fwasr fwin fwalu.” (Hibru 11:13) Kalem la, lulalfongi lalos nu sin God a oiyen kawuk lalos nu sel kasrelos in kasrusr lun akutun wi mongfusrasr.

15. Efu ku Moses el sulela in moulkin moul oana ke inkanek su el oru?

¹⁵ Moses el sie pa met kulansap lun Jeova su wi ke “pukunyeng lun met lo.” Moses el filiye loom sel oana ke ma Ebream el oru. Moses el tia nunku ke mwolana a me kasrup ke loom sin togusra. El sulela in “keok yurin met lun God.” Efu ku el sulela in oru ma inge? Poul el sang me top nu ka: “El nunku ke mol lun ma lane.” Poul el fwak pa kel Moses la el muteng, oana el liye El su tia ku in liyeyuk. (Ridi Hibru 11:24-27.a) Moses el etu la oasr ma yok sripe liki in “engun ke ma koluk in kitin pal na.” God el arlana paye nu sel, a el etu la mwulela nukewa lun God a fwa akpayeyuk. Ma inge kasrel in oru ma puspus wi pulaik yok a in muteng ke ma upa puspus. A ma inge kasrel in kafweang yok in kol met Israel liki an Ijipt nu ke Fwal Mwulela.

16. Kut etu fuka la Moses el tia fuleak ke sripen el tia ku in ilyuk nu ke Fwal Mwulela?

¹⁶ Ebream a Moses elos mise meet liki mwulela lun Jeova akpayeyuk. Meet liki met Israel elos ilyuk nu ke Fwal Mwulela, God el fwak nu sel Moses: “Tu kom fwa liye fwal sa ye mutom, a kom fwa tia utyuk nu in fwal se su Nga sang nu sin tulik natul Israel.” Ke sripen elos seakos God ke kof Meriba, Moses a Aron elos tia ilyuk nu ke Fwal Mwulela. Elos lela met tunyuna in oralos in mulat, ke ma inge elos akkalemye sie oiya su tia akfulatye God. (Duteronomi 32:51, 52) Moses el tia fuleak ke sripen el tia ku in ilyuk nu ke Fwal Mwulela. El tia nunku mu sulela se inge su God el oru nu sel tia sumwos. Kut etu ma inge meyen el siyuk sin Jeova in akinsemwomwoye sruf lun met Israel. Kas safla lal nu selos pa: “Insemwomwo kom, O Israel! Su oana kom, sie mutanfwal su moliyukla ke Jeova, me loeyuk in kasru lom, a kutlas lun fulat lom?”—Duteronomi 33:29.

Me Lutlut Nu Sesr

17, 18. (a) Mea kut ku in lotela ke “pukunyeng lun met lo”? (b) Mea kut fwa sramsramkin ke me lutlut toko?

¹⁷ Kut lotela ke moul lun kutu met su wi ke “pukunyeng lun met lo su apunkutla,” la in aksafyela akutun, kut enenu in oasr lulalfongi fokoko nu sin God a ke mwulela nukewa lal. (Hibru 11:6) Kain in lulalfongi inge enenu in sang kasru yok nu ke inkanek su kut moulkin moul lasr ke pal inge. Kut etu la oasr pal mwomwo su God el mwulela nu sesr ke pal fwasru. Kut ku in liye ‘El su tia ku in liyeyuk.’ God el paye nu sesr, ke ma inge kut kasrusr ke akutun wi mongfusrasr.—2 Korint 5:7.

¹⁸ Akutun su met Kristian elos kasrusr ka tia fusrasr. Tia ma fusrasr in moul oana met Kristian a akkalemye lulalfongi nu sin God. Tusruktu kut ku in aksafyela akutun. Ke me lutlut toko, kut fwa sramsramkin ke kutu ma saye su ku in kasre kut in aksafyela akutun.

[Footnote]

Ya Kom Ku In Akuteye?

• Efu ku Poul el simusla ke orekma mwo wi lulalfongi yok lun met lo puspus in pal meeta?

• Fuka me srikasrak lun “pukunyeng lulap lun met lo su apunkutla” kasre kut in mongfusrasr nu ke akutun?

• Mea kom lotela ke me srikasrak lun met lo oaru inge Noa, Ebream, Sera a Moses?

[Petsac ke sra 15]

Ebream a Sara elos inse mulala in filiye moul mwomwo in an Ur