Ya Kom Lela Jeova In Me Usru Lom?

“A komwos suk meet togusrai lal, a ma sumwosmwos lal, a ma inge nukemwa fwa etukot pa nu sumwos”—MATTU 6:33.

1, 2. (a) “Israel lun God” su akkalemyeyuk in Galatia 6:16 el lumeyuk nu sin su? (b) In Mattu 19:28, pulo kas inge “sruf sengoul luo lun Israel” el lumeyuk nu sin su?

KE PAL se kom rid in Baibel e se inge Israel, mea kom nunku ka? Ya kom nunku ke tulik natul Isaak su pangpang Jekob, su tok pangonyuk pa ke e se inge Israel? Ku ya kom nunku ke tulik nukewa natul, su ekla mutunfwal Israel? Baibel el akkalemye pa ke “Israel lun God.” Ma inge lumeyuk nu sin met 144,000 su akmusrala ke ku lun God in orekma oana togusra a met tol in kosrao. (Galetia 6:16; Fwakyuk 7:4; 21:12) Tusruk e se inge Israel orekmakin pa nu ke oiya yok sripe saye. Kut ku in rid ma inge in Mattu 19:28.

² Jisus el fwak: “In pal in sifwil moulyuk ke Mwen nutin met fwa muta fwin tron in mwolana lal, komwos ouyepa fwa muta fwin tron siengoul luo, a nununku sruf siengoul luo lun Israel.” Ke fus se inge, “sruf sengoul luo lun Israel” lumeyuk nu sin met nukewa su a fwa moul ma patpat ke sie Paredais fwin fwalu. Elos fwa eis me insemwomwo puspus ke orekma lun met 144,000 oana met nununku a met tol.

3, 4. Me srikasrak mwomwo fuka met akmusrala oaru elos akkalemye?

³ In oana ke met tol puspus a met Livai in pal meeta, met akmusrala ke pal inge elos aksaokye orekma lalos oana sie kunokon na mwomwo. (Oekyuk 18:20) Met akmusrala elos tia nunku in eis an selos fwin fwalu. A, Fwakyuk 4:10, 11 el akkalemye la elos fwa tafwela in oru orekma lalos nu sin Jeova in kosrao, a elos fwa orekma we oana togusra a met tol yurin Jisus Kraist.—Ezikiel 44:28.

⁴ Ke elos srakna moul fwin fwalu, met akmusrala elos enenu in moulkin moul su akkalemye la Jeova pa me usru lalos. Orekma in kulansap lalos nu sin God pa ma yok sripe emeet nu selos. Met sap Piter el fwak: “Komwos in alken in akpayeye pang lomwos a sulela lomwos.” (2 Piter 1:10) Met akmusrala elos oru ma inge ke elos akkalemye lulalfongi ke me kise lun lango lun Kraist a elos fwasr tokol pal nukewa. Ma elos ku in oru ke orekma nu sin God a ma puspus su sikyak ke moul lalos tia oana sie, ne ouinge elos tia fwak mu elos munas ku elos tia sumat ku utuftuf paenang elos oru ma na srisrik ke orekma in kulansap lalos nu sin God. Aok elos tia nunku ouinge, a elos oru meet ke moul lalos orekma nu sin God ke ku lalos kewa. A elos akkalemye me srikasrak mwomwo nu selos su oasr fwinsrak in moul ke sie paredais fwin fwalu.

5. Fuka met Kristian nukewa elos ku in oru Jeova oana me usru lalos? Efu ku tia fusrasr in oru ma inge?

⁵ Jisus el fwak la kais sie met Kristian, fwin oasr yurol fwinsrak in moul in kosrao ku fwin fwalu, el enenu in “sifwana lafwekunal” a fwasr tukol pal nukewa. (Mattu 16:24) Million puspus sin met su fwinsrak in moul ke sie Paredais fwin fwalu elos alu nu sin God a etawi Kraist ke oiya se inge. Elos tia engun in oru ma na srisrik ke orekma in kulansap nu sin God fwin elos etu la oasr ku lalos in oru ma puspus ka. Oasr met lili puspus su oru moul lalos in tia nunku yok ke ma puspus lun fwalu a elos sroang nu ke orekma lun regular pioneer. Oasr met lili saye su kafweang in wi ke orekma lun pioneer ke lusen malem ekasr ke kais sie yea. Oasr pa met lili puspus saye, su tia ku in wi ke orekma lun pioneer, ne ouinge elos kafweang na paye in sulkakin peng mwo. Elos oana Mary, su okoila me akmusra keng nu fwin sifwel Jisus. Jisus el fwak: “El oru sie orekma mwo nu sik. . . . El oru ma el ku in oru.” (Mark 14:6-8) Meyen kut moul ke sie fwalu su oasr ke ku lal Setan, paenang tia fusrasr in oru ma nukewa kut ku in oru. Kut enenu in kafweang yok a in filiye lulalfongi lasr nu sin Jeova. Kut fwa tuni akmwoye ke inkanek akosr su kut ku in oru ma inge.

Suk Meet Togusrai lun God

6. (a) Met puspus lun fwalu elos akkalemye fuka la me usru lalos pa ma na ke moul se inge? (b) Efu ku mwo in etawel Devid?

⁶ Jisus el luti met tuma lutlut lal in suk meet Togusrai a ma sumwosmwos lun God. Met lun fwalu elos suk ma mwo emeet nu selos. Baibel el akkalemyelos oana “met lun fwalu su ma lalos on in moul se inge.” (Ridi Sam 17:1, 13-15.) Met inge elos tia nunku kel Jeova. Metu elos nunku mukena in oasr moul mwomwo lalos, in karungin sou lalos, a in sang me usru nu sin tulik natulos. Me usru lalos ma na ke moul se inge. Devid el tia oana elos. El lungse in oasr “sie e mwo” ye mutun Jeova. Tokin kutu pal, tulik natul se inge su pangpang Solomon el fwak la kut nukewa enenu pa in oru sie e mwo nu sin God. (Ekklisiastis 7:1) In oana Asaph, Devid el etu la oiyen kawuk nu sin Jeova pa ma yok sripe emeet ke moul. Ma inge oralla Devid in insemwomwo. Ke pal lasr inge, oasr met Kristian puspus su akkalemye la orekma lalos nu sin Jeova pa ma yok sripe liki na in oru orekma in suk ma enenu ke moul.

7. Me insemwomwo fuka sie brother wiyesr el eis ke sripen el suk meet Togusrai?

⁷ Mokul se inge Jean-Claude su muta fwin an Central African Republic, el sie met elder, el payuk a oasr tulik tolu natul. Upa in koneak sie orekma in an se inge, a met puspus elos fwa oru ma nukewa in tia tula orekma lalos. Sie len, met kol ke niyen orekma el fwak nu sel Jean-Claude in mutawauk in orekma ke eku. Orekma lal fwa mutawauk ke ao 6:30 ke eku, len itkosr ke wik nukewa. Jean-Claude el fwak nu sel la el enenu in karungin ma enenu lun sou lal ke mongo a ma puspus, tusruktu el enenu pa in kasrelos in oasr fototo mwomwo nu sin God. El fwak pa la el enenu in kasru congregation. Manager se inge el fwak nu sel: “Fwin oasr sie orekma mwomwo lom, kom enenu in mwulkunla ma nukewa saye, wekunang mutan kiyom, tulik nukewa nutum, a me fosrnga nukewa lom. Kom enenu in orekmakin moul lom kewa nu ke orekma se inge. Kom oru sulela lom: alu lom ku orekma lom.” Mea kom a oru fwin kom sun kain in oiya se inge? Jean-Claude el etu la fwin el sisila ke orekma lal, God el fwa karungunul. Srakna oasr ma puspus su el enenu in oru ke orekma in kulansap lal nu sin God, a Jeova el fwa kasru sou lal ke ma enenu lalos nu ke moul. Ke ma inge, el wi nu ke miting toko lun congregation ke infulwen wik u. Tokin ma inge, el akola in som nu ke orekma, fwinne el nukin fwin srakna oasr orekma lal. Ke pal se inge, oasr sie met panglol ke telefon. Manager lal sisila liki orekma lal, tusruk met lili wiyesr se inge srakna oasr orekma lal.

8, 9. Ke oiya fuka kut ku in etawi met tol a met Livai a oru Jeova oana me usru lasr?

⁸ Saap kain in oiya se inge sikyak pa nu sin kutu sumwos. Saap kom fosrnga la fuka kom ku in sang ma enenu lun sou lom kom fwin sisila liki orekma lom. (1 Timote 5:8) Tusruktu fwin ma inge sikyak nu sum ku tia, kalem la kom lotela ke ma sikyak nu sum sifwana la God el tia som liki met nukewa su aksaokye kunokon lalos in kulansap nu sel. Ke pal se Jisus el fwak nu sin met tumal lutlut lal in kafweang in suk meet togusrai, el mwulela nu selos la God el fwa sang nu selos ma nukewa saye, oana mongo nelos, me nim a nuknuk.—Mattu 6:33.

⁹ Nunku ke met Livai, su tia eis an oana me usru lalos. Meyen orekma lalos pa in kol mutunfwal se inge ke alu paye, elos enenu in lulalfongi la Jeova pa me usru lalos a el fwa karungin ma enenu nukewa lalos nu ke moul. (Oekyuk 18:20) Kut tia orekma in tempel oana met tol a met Livai in pal meeta, ne ouinge kut ku in lulalfongi pa nu sin Jeova oana elos. Ke kut apkuranyung nu ke safla, yok sripe na paye kut in lulalfongi nu sin God la el fwa karungin kut.—Fwakyuk 13:17.

Suk Meet Ma Sumwosmwos lun God

10, 11. Kutu met elos akkalemye fuka la elos lulalfongi Jeova ke elos sulela ke orekma lalos? Sang me pupulyuk.

¹⁰ Jisus el kaifwe met tumal lutlut in ‘kafweang in suk meet ma sumwosmwos lun God.’ (Mattu 6:33) Kalmen ma inge pa kut in akos ma Jeova el nunku ke ma sumwos a ma koluk a tia ke ma metu nunku ka. (Ridi Isaia 55:8, 9.) Oasr met puspus in pal somla su eokiye tobacco ku kukakin paip, sang akpa nu sin met puspus in wi meun, ku elos orala a kukakin kain in kofwen me meun meet liki elos ekla met Kristian. Tusruktu tokin elos lotela ma paye, pus selos oru sulela in ekulla orekma lalos a elos fwal nu ke baptais.—Isaia 2:4; 2 Korint 7:1; Galetia 5:14.

¹¹ Sie me srikasrak mwomwo ka pa Andru. Ke pal se el a mutan kiyel elos lotela kel Jeova, elos oru sulela lalos in kulansap nu sel. Andru el lungse na paye orekma lal, ne ouinge el sisla orekma lal inge. Efu? Meyen u se su el orekma inge el sang kasru nu ke meun, a el lungse in oru ma Jeova el fwak ke ma sumwos. Ke pal se ma Andru el sisla orekma lal, oasr tulik luo natul a mani lal fwal na ke lusen malem ekasr. El oana met Livai su wangin me usru. El suk orekma a el lulalfongi nu sin God. Ke pal inge, ke elos nunku ke pal san, Andru a sou lal elos ku in fwak la kas inge arlana paye: “Poun Jeova tia akfutotoyeyuk.” (Isaia 59:1) Ke sripen elos oru moul lalos in tia nunku ke ma puspus lun fwalu, Andru a mutan kiyel elos ku in wi ke orekma lun pioneer. Andru el fwak mu oasr pal elos fosrnga ke mani, ke an in muta lalos, ke karunginyen manolos in tia mas, a elos fwafwala nu ke matou. Tusruktu Jeova el kasrelos pal nukewa. Elos ku in fwak a lulalfongi na paye la orekma in kulansap nu sin God el sie me insemwomwo yok a kunokon su mwo emeet lun metu.—Ekklisiastis 12:13.

12. Oiya mwomwo fuka kut enenu in suk meet ma sumwosmwos lun God? Sang me pupulyuk sikyak in an sum.

¹² Jisus el fwak nu sin met tuma lutlut lal: “Lulalfongi lomwos fwin oana luman futen mustad se, komwos a ku in fwak nu sin eol soko inge, ‘Fwasrot liki an se inge nu ingo,’ na a som, komwos a ku in oru kutena ma.” (Mattu 17:20, Leng Sasu Ke Kas Kosrae) Ya kom fwa orekmakin akwuk fulat lun God yok liki ma nukewa fwin ma inge oru ma upa puspus? Kom fwin tia etu la kom ku in oru ku tia, lela kom in sramsram nu sin met lili puspus ke congregation. Paye la ma sikyuk ke moul lalos ke inkanek mwo su Jeova el kasrelos fwa ku in akkeye lulalfongi lom.

Akkalemye Kulo Lom nu ke Akwuk Nukewa lun Jeova

13. Kut fwin kafweang in orekmakin moul lasr in kulansap nu sin Jeova, lulalfongi fuka oasr yurosr?

¹³ Kom fwin aksaokye kunokon lom in kulansap nu sin Jeova, na kom ku in lulalfongi la el fwa usot ma nukewa su kom enenu nu ke moul lom, oana ke ma el oru nu sin met Livai. Nunku kel Devid. Fwinne el mwukmwuk in sie luf, el lulalfongi la God fwa kasrel. Kut ku in lulalfongi pa nu sin Jeova fwinne ke pal se kut nunku mu wangin kutena met su ku in kasre kut. Esam la ke pal se Asaph el tuku “nu in loom mutal sin God,” el eis etauk yok ke ma su oru elan fosrnga. (Sam 73:17) Ke oiya sepana inge, kut enenu in lulalfongi Jeova la el a fwa ase ma kut enenu in karungin oiyen kawuk lasr nu sel. Ma inge fwa akkalemye la kut aksaokye orekma lasr in kulansap nu sin Jeova ke kain in luma a ma sikyuk puspus ke moul lasr. Kut fwa lela Jeova in me usru lasr.

14, 15. Mea kut enenu in oru fwin oasr ma ekla ke me akuteye a kalem lasr ke kutu ma simusla? Efu?

¹⁴ Ya kom lulalfongi Jeova ke pal se el kasre kut in eis kalem yok ke “ma loal lun God” su oasr in Baibel? (1 Korint 2:10-13) Met sap Piter pa me srikasrak mwomwo su oru ma inge. Jisus el fwak nu sin met Ju: “Komwos fwin tia mongo ke ikwen mwen nutin met a nim sral, wangin moul in komwos sifwana.” Met tuma lutlut puspus elos nunku mu Jisus el sramsram ke ikwe a sra paye paenang elos fwak: “Kas inge upalanu; su fwa ku in long?” Elos “folokla” nu ke ma puspus su elos filiyuki tari tokolos. Tusruktu Piter el fwak: “Leum, kut fwa som nu yurin su? Kas lun moul ma patpat oasr yurum.”—Jon 6:53, 60, 66, 68.

¹⁵ Piter el tia arlana kalem ke kas lun Jisus inge. Tusruktu el lulalfongi Jeova la el orekmakunul Jisus in kasru met in eis etauk a kalem ke ma paye. Ke pal se oasr ma ekla ke me akuteye a kalem lasr ke sie ma paye lun Baibel ke pal inge, ya kom srike in etu ke sripe puspus nu ke ma ekla inge? (Soakas 4:18) Met Berea in century se meet elos “eis kas inge ke insielos kemwa, a suk in ma Simusla len nu kemwa.” (Orekma 17:11) Kom fwin etawi me srikasrak lalos, kom a fwa aksaokye orekma in kulansap lom nu sin God yok liki meeta. Kom fwa arlana engun in oru Jeova oana me usru lom.

Payuk in Leum Mukena

16. Fuka met Kristian su lolap elos ku in oru God in me usru lalos, fwal nu ke 1 Korint 7:39?

¹⁶ Siepa oiya su met Kristian enenu in esam akwuk lun God pa in akos masap lun Baibel in payuk “in Leum mukena.” (1 Korint 7:39) Met Kristian puspus elos sulela in tia payuk liki na in pulesru masap se inge. God el karungin mwo met lili puspus su oru ma inge. Mea Devid el oru ke pal se el pulakin asor a el nunku mu wangin kutena met su ku in kasrel? El siyuk sin Jeova ke kasru. Devid el fwak: “Nga use torkaskas luk nukewa nu yorol, nga fwakak ongoiye nukewa luk nu sel, ke nga apkuran in fuleak.” (Sam 142:1-3, LSK) Jeremaia el oaru in kulansap nu sin God ke lusen yea puspus oana sie met lolap. El pulakin pa asor ke sripen el mukelana muta. Kom ku in lutlutkin me srikasrak lal inge oana ke ma akuteyuki in sapta ak 8 ke buk se inge Kas lun God Nu Sesr Ke Inkanek lal Jeremaia ke kas English.

17. Mea sie sister su lolap el oru ke pal se el pulakin asor?

¹⁷ Oasr sie sister in an Merika el fwak mu el tiana orala sulela lal in muta oana sie met lolap pal nukewa. El lungse in payuk fwin el liye tari met su fwal elan payuk nu se. Nine kiyel, su tia met Lo, el lungse elan insese in payuk nu sin oana sie mokul su lungse in payuk nu sel. El lungse na paye tulik natul in payukyuk. Sister wiyesr inge el siyuk sin nine kiyel fwin el lungse in eis meta fwin moul in payuk lal tia mwo. Tusruktu ke pal se nine kiyel el liye la oasr orekma mwomwo lun an natul se inge, el karungin mwo moul lal, a el engun, nine kiyel el tui in sramsram yok ka. Sister se inge el pulakin asor kutupal. El fwak: “Nga kafweang in fungfung a lulalfongi nu sin Jeova. A el tia som liki yu.” Mea kasrel in lulalfongi nu sin Jeova? El fwak: “Pre luk kasre yu in kalem la God el paye a nga tia mukelana muta. El su Fulatlana el long, ke ma inge na fuka nga tia ku in pulakin engun a aksaokyeyuk?” El lulalfongi ke ma Baibel el fwak: “Insemwomwo in sang yok liki insemwomwo in eis.” Ke ma inge el kafweang in kasru met puspus a el tia sano ke kutena me mol. El fwak pa: “Ke nga nunku la, ‘Mea nga ku in oru in kasru met se inge?’ Nga pulakin insemwomwo.” (Orekma 20:35) Aok, el oru Jeova oana me usru lal, a el insemwomwo ke orekma in kulansap lal.

18. Kom ku in ma lun Jeova ke oiya fuka?

¹⁸ Ke oiya nukewa su sikyak ke moul lom, kom ku in lela God oana me usru lom. Kom fwin oru, kom ku in sie sin met lal su insemwomwo. (2 Korint 6:16, 17) Ke ma inge kom ku in ma lun Jeova, oana met kulansap puspus lun God in pal meeta. (Ridi Duteronomi 32:9, 10.) In oana ke met Israel elos ekla ma lun Jeova inmasrlon mutunfwal puspus, el ku in sulikomla oana me usru lal a el kulang in karungin kom.—Sam 17:8.

Kom E Topuk Fuka?

Kom ku in oru fuka Jeova in me usru lom

• ke kom suk meet Togusrai lun God a ma sumwosmwos lal?

• ke kom akkalemye kulo wi kaksak ke ma Jeova el usot nu sum?

• ke kom akos masap lun God in payuk in Leum mukena?

[Petsac ke sra 9]

Me srikasrak lal Jeremaia el me akkeye yok nu sesr