Kom Ku In Muteng Nu Ke Safla

“Lela kut in moniyuk in kasrusr lun akutun, su filiyuki tari ye mutasr.”​—HIBRU 12:1.

1, 2. Mea kalmen muteng?

“TU komwos enenu mongfwusesr,” met sap Poul el simusla nu sin met Hibru Kristian ke century se meet. (Hibru 10:36) In akkalemye ma saok su tuku ke oiye inge, met sap Piter el ouyepa kaifwe nu sin met Kristian: “Toeni nu ke lalalfongi lomwos . . . muteng.” (2 Piter 1:5, 6, New World Translation) Tusruktu, mea kalmen muteng?

² Sie Greek-English lexicon el aketeye kas Greek verb inge “muteng” oanu “muta na a tia kaeng . . . tu ku, tia som liki.” Fwin ke kas Greek noun ke kas inge “muteng,” sie orekma ke reference el fwak: “Pa inge ngun se su ku in muteng ke ma nu kemwa, tia in tui, a ke sie fwinsrak yok . . . Pa inge sie kain in oiye su oru sie met in tu ku ke niel a mutal ngetla nu meet lain engyengu. Sie kain in oiye mwo pa inge su ku in ekulla ma upa yok nu ke mwolanu meyen tokin keok el liye sie nien sun.” Ke ma inge, muteng, el ku in oru sie met in tu ku lain me kutong a ma upa a in tia wanginla fwinsrak. Su oasr enenu na paye nu ke oiye mwo inge?

3, 4. (a) WSu oasr yuro enenu nu ke muteng? (b) Efu kut enenu in muteng nu ke safla?

³ Met Kristian nu kemwa elos kasrusr nu ke sie akutun in me pupulyuk su enenu muteng. Apkurun nu ke yiu 65 C.E., met sap Poul el simusla nu sin met orekma wiel a met fwafwasyesr oaru wiel pangpang Timote kas in akkeye inge: “Nga meuni tari meun mwo, Nga aksafyela kasrusr luk, a Nga srukye ku lalalfongi.” (2 Timote 4:7) Ke kas lal inge “kasrusr nu ke safla,” Poul el pupulyukin moul lal oanu sie met Kristian ke sie akutun, su oasr an in kasrusr a sie an in aksafyela kasrusr. Ke pal inge, Poul el apkurun in aksafyela in kutangla kasrusr lal, a el ngetuk nu ke pal fwasru a lalalfongi na paye la el fwa eis sie tefuro. “Ke pal se inge la nu tok,” el tafwela in fwak, “sie tefuro sumwosmwos lemla sane yu, su Leum met nununku sumwos, el a fwa ase nu sik in len sa.” (2 Timote 4:8) Poul el arulanu etu na paye la el akola in eis opi ke sripen el muteng nu ke safla. A fuka kut nu kemwa?

⁴ In akkeyelos su sroang tari nu ke akutun, Poul el simusla: “Lela kut in moniyuk in kasrusr lun akutun, su filiyuki tari ye mutasr.” (Hibru 12:1) Oanu met Kristian, kut sroang tari ke akutun inge ke pal se kut mwolela moul lasr nu sin Jeova God ke inkanek lun Jisus Kraist. Sie mutamwauk mwo ke orekma in kulansap arulanu yok sripe, tusruktu ma yok emeet pa kut in aksafyela kasrusr lasr. Jisus el fwak: “A el su muteng nu ke safla, el nu fwa moul.” (Mattu 24:13) Opi su sano met nu kemwa su aksafyela akutun pa moul ma patpat! Ke ma inge, ke kut srukye nien sun inge ke nunuk lasr, kut enenu in muteng nu ke safla. Mea ma inge su ku in kasru kut in eis nien sun inge?

Me Mongo Fwal​—Yok Sripe

5, 6. (a) Tu in muteng nu ke kasrusr lun akutun lun moul, nu ke mea kut enenu in loang mwo? (b) Kain in me sang fuka ke ma lun ngun kut enenu in silaklak in eis, a efu?

⁵ Futoto nu ke siti lun Korint, Greece, pa sie an su sritel pengpeng se inge Isthmian Games elos oru in pal meeta. Wangin alollo la Poul el etu la met lili wiel fwin an Korint elos arulanu etu sritel a akutun su orek fwin an we. In orekmakin ma elos etu tari, Poul el akismakinyelos ke akutun lun moul su elos sroang tari nu ka: “Ya komwos tia etu tu elos su kasrusr in akutun, elos nu kemwa kasrusr, a siefwunnu eis mol in kutangla? Komwos in kasrusr ou inge tu komwos fwa eis.” Poul el aketeye ke ma saok su tuku ke kaifweung na in kasrusr ke akutun nu ke safla. Tusruktu mea ku in kasrelos in oru ou inge? “A met nu kemwa su srike in akutun, elos sifwanu liyelosyung in ma nu kemwa,” el fwak. Aok, met nu kemwa su wi ke sritel in pal meeta elos akpusisilyelos sifwanu ke sie akpa su arulanu upa, elos arulanu taran ke ma elos kang a nim, a elos sifwanu kurungin mokuikui lalos nu kemwa tu in ku in kutangla.​—1 Korint 9:24, 25.

⁶ A fuka akutun su met Kristian nu kemwa elos sroang tari nu ka? “Kom enenu in laong mwo ke me mongo in ngun su kom mongo kom fwin akola in muteng nu ke akutun lun moul,” sie met elder lun sie congregation lun Met Lo lun Jeova el fwak. Tuni akmwoye me mongo in ngun su Jeova el wise, “God su ase nu sesr muteng” el akola nu sesr. (Rom 15:5) Sropon me mongo yok in ngun su kut enenu yok nu ke ku lasr pa Kas Lal, Baibel. Ya tia fwal nu sesr in orala schedule mwo ke ridi Baibel? Ke inkanek lun “met kulansap oaru a lalmetmet,” Jeova el ouyepa ase nu sesr pal fwal ke me rid inge Tauer In San a Awake! a kutupa me rid su tuku ke Baibel. (Mattu 24:45) Moniyuk in lutlut ke ma inge nu kemwa ku in akkeye kut in ngun. Aok, kut enenu in pakiye pal​—‘molela pal fwal’—​ke lutlut lom sifwanu.​—Efesus 5:16.

7. (a) Efu kut tia enenu in inse misla fwin kut etu na ma ke me luti srisrik lun met Kristian? (b) Fuka kut ku in “akwot nu ke sumwosmwoslanu”?

⁷ In muta na ke orekma lun met Kristian, kut enenu in sisla kaskas ke “ma srumtauk lun etauk” a “akmwot nu ke sumwosmwoslanu” (Hibru 6:1) Ke ma inge kut enenu in akkalemye pwar nu ke “sralupa a luse a fulata a loala” lun ma paye a eis me akkeye ke ma lun ngun su tuku ke me “mongo upa fwal nu sin met matu.” (Efesus 3:18; Hibru 5:12-14) Ke sie me pupulyuk, tuni akmwoye, me sramsram akosr su kut ku in lalalfongi ke moul lun Jisus fwin fwalu​—Gospel lal Mattu, Mark, Luk, a Jon. Ke inkanek lun sie lutlut mwo ke record lun Gospel inge, kut tia ku in etu mukena orekma nu kemwa lun Jisus, a la el kain in met fuka, a kut in ku in akilen ma oasr ke nunuk lal su moklel in orekma. Ke ma inge kut ku in “etu nunuk lun Kraist.”​—1 Korint 2:16.

8. Fuka meeting lun met Kristian kasru kut in muteng ke akutun lun moul?

⁸ Poul el kaifwe nu sin met lili wiel ke lalalfongi: “A lela kut in nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oanu lia lun kutena, a kut in kaifwe sie sin sie, a akyokye, oanu komwos liye tu len apkurun me.” (Hibru 10:24, 25) Meeting lun met Kristian el sie sropon me akkeye mwomwo! A fuka sie me insemwomwo na paye in muta yurin brother a sister lasr su engun sesr a lungse in kasru kut in muteng nu ke safla! Kut tia ku in pilesru me sang mwolanu inge su tuku sin Jeova. Ke inkanek lun lutlut lasr sifwanu ke moniyuk a wi meeting pal nu kemwa, lela kut in “elan met matu in nunuk.”​—1 Korint 14:20.

Met Su Liye in Akkeye Kom

9, 10. (a) Ke inkanek fuka met nu kemwa su liye sritel elos ku in sropon me akkeye ke sie akutun su muteng eneneyuk? (b) Mea se inge ‘pukunyeng lulap lun met su apunkutla’ su akkalemyeyuk in Hibru 12:1?

⁹ Sie met kasrusr el fwinne akola mwo, oasr ma puspis su ku in sikyuk ke inkanek su ku in oru elan tui. “Mwona kasrusr lomwos. Su ikolkomwosi tu komwos in tia akos ma paye?” Poul el siyuk. (Galetia 5:7) Kalem la, kutu sin met Kristian fwin an Galetia elos sremla ke asrouki koluk a, fwokin ma inge pa elos akkolukyeyuk ke kasrusr lalos ke akutun lun moul. Ke kutu inkanek in kasru saye, kasru a kas in akkeye tuku sin kutu met ku pa in oru in fwusesr in muteng ke akutun. Ma inge ku in pupulyukinyuk nu ke ma met su liye sritel el ku in oru nu sin met sritel. Met su liye sritel su arulanu engun el ku in akyokye pwar su ku in kasru tulik sritel in kasrusr ke mutamwauk nu ke safla. Kas in akkeye lun met su liye sritel, su pal nu kemwa elos oru wi on a paspas yok, ku in sang kasru nu sin tulik sritel ke me kasru su elos enenu ke pal se elos apkurun nu ke safla. Paye, met mwo su liye sritel elos ku in purakak ma mwo nu sin met nu kemwa su wi ke akutun.

¹⁰ Ke akutun lun moul su met Kristian nu kemwa elos sroang tari nu ka, su met inge su liye akutun? Tokin el akkalemye met lo oaru nu kemwa lun Jeova meet liki pal lun met Kristian, oanu ma akkalemyeyuk in sapter 11 lun Hibru, Poul el simusla: “Ke ma inge tu oasr pukunyeng lulap lun met lo su apunkutla, . . . lela kut in moniyuk in kasrusr lun akutun su filiyuki tari ye mutusr.” (Hibru 12:1) Ke pal se Poul el orekmakin me pupulyuk ke pukunyeng, Poul el tianu orekmakin kas Greek su akkalemye lupa a luse lun pukunyeng. A, el orekmakin kas se su fwal nu ke lexicographer W. E. Vine “akkalemye sie pukunyeng, su wangin luma su afwunye kosrao.” Kalem la, ma oasr ke nunuk lal Poul pa sie u lulap lun met lo​—arulanu pukanten paenang elos oanu pukunyeng lulap.

11, 12. (a) Fuka met lo oaru su moul meet liki pal lun met Kristian elos ku in akkeye kut, tu kut in kasrusr ke muteng? (b) Fuka kut ku in akyokye ma lane su kut ku in eis sin ‘pukunyeng lulap lun met lo’?

¹¹ Ya met lo oaru nu kemwa meet liki pal lun met Kristian elos ku in oanu met su liye akutun ke pal inge? Mo tia ku. Elos nu kemwa motul tari in mise, a sano sifwil moulyuk. Tusruktu, elos met kasrusr su kutangla tari ke pal se ma elos srakna moul a me srikasrak lalos simusyukla ke sra lun Baibel. Ke kut lutlut ke Ma Simusla, met oaru inge nu kemwa elos oanu akmoulyeyuk in nunuk lasr a ku in akkeye kut, tu kut in kasrusr ke akutun nu ke safla.​—Rom 15:4.a

¹² Ke sie me pupulyuk, fwin sie pal mwo in eis ma puspis ke fwal se inge srifwe kut, ya tia sie me lutlut mwo pa Moses el sulela in tia eis mwolanu lun Ijipt ku in kasru kut in kaifweung ke inkanek lun akutun? Fwin ma upa su sun kut arulanu yok, lela in esamak me srifwe yok su Ebream el sun ke pal se God el siyuk sel in kisakunul Isaak ku in akkeye kut in tia fuleak ke akutun lun lalalfongi. Etauk yok lasr ke ‘pukunyeng lulap’ lun met lo inge ku in kasrukut ke inkanek inge fwal nu ke kalem lasr in liyelos ke inkanek lun mutun kalem lasr.

13. Ke inkanek fuka Met Lo lun Jeova ke len inge elos akkeye kut ke akutun lun moul?

¹³ Un Met Lo lun Jeova ke len inge elos apunkutla pa. Fuka mwolanu lun me srikasrak mwo nu ke lalalfongi su oakiyuki sin met Kristian akmusrala wekunang mokul a mutan ke “u lulap”! (Fwakyuk 7:9) Kut ku in ridi me sramsram ke moul lalos ke kais kutu pal ke magasin inge a ke kutupa me rid lun Watch Tower.b Ke kut esam lalalfongi lalos, kut nu kemwa akkeyeyuk in muteng nu ke safla. A fuka mwoiye in eis me akkeye sin kamwuk futoto a sou lasr su kulansapu pa Jeova ke oaru! Aok, oasr met puspis su purakak insiesr ke kasrusr lasr ke akutun lun moul.

Oakiye ke Lalmetmet Kasrusr Lom

14, 15. (a) Efu arulanu yok sripe in oakiye ke lalmetmet kasrusr su fwal nu ke ku lasr? (b) Efu kut enenu in orekmakin lalmetmet ke pal se kut orala nien sun lasr?

¹⁴ Ke pal se kom kasrusr loes, oanu ke marathon, sie met su kasrusr el enenu in oakiye mwo kasrusr lal ke lalmetmet. “Kasrusr mui ke mutamwauk ku in saflaiye kuf,” magasin se inge New York Runner el fwak. “Saflaiyen ma inge pa in kaifweung ke kasrusr loeloes nu ke apkurun in safla na fwuleak ku tianu sroang.” Sie met kasrusr ke marathon el esam: “Met su sramsram ke sie lutlut su Nga wi in akola nu ke akutun el srukak kas in sensen su arulanu kalem: ‘Nik komtel srike in ukwe kutena met su kasrusr mui. Komtel kasrusr fwal nu ke lupa su komtel oakiye tari. Meyen fwin tia, komtel fwa totola a fwuleak.’ Akos nu ke kas in kai kasru yu in aksafyela akutun.”

¹⁵ Ke akutun lun moul, met kulansap lun God elos kaifweung na paye. (Luk 13:24) Tusruktu, met tuma lutlut Jemes el simusla: “A lalmetmet lung me . . . fwusesr in siyukyuk.” (Jemes 3:17) Fwinne me srikasrak mwo lun kutu met mokle kut in akyokye orekma lasr, tusruktu oiye fwal ku in kasru kut in oakiye nien sun fwal su fwal nu ke ku a lumasr. Ma Simusla akismakinye kut: “A lela kais sie met in sifwanu srike orekma lal, a na a fwa oasr sripen konkun lal kel sifwanu, a tia ke met tulan lal. Tu kais sie met fwa sifwanu wis me toasr lal.”​—Galetia 6:4, 5.

16. Fuka inse pusisel ku in kasre kut in oakiye kasrusr mwomwo su fwal nu ke ku lasr?

¹⁶ In Maika 6:8, kusensiyuk inge siyukyuk nu sesr: “Mea Jeova el suk sum . . . a in fwasr wi inse fwokpap yurin God lom?” Fwokpap el kasru kut in akilen lupan ku lasr. Ya mano munas ku matuo aksrikye ku lasr ke orekma lasr nu sin God? Lela kut in tia asor. Jeova el etu kaifweung lasr a me kise lasr ‘fwal nu ke ma oasr yurosr, a tia fwal nu ke ma wangin yurosr.’​—2 Korint 8:12; srike liye Luk 21:1-4.

Filiye Mutom ke Opi

17, 18. Mea oasr yurin Jisus su ku in kasrel in muteng ke oiye sikyuk fwin sak soko?

¹⁷ In akkalemye nu sin met Kristian fwin an Korint ma enenu muteng nu ke akutun lun moul, Poul el srukak siepa ma sikyuk ke sritel se inge Isthmian Games su fwal nu selos in loang nu ka. Me enenu nu sin tulik sritel nu kemwa ke sritel inge, Poul el simusla: “A elos oru ma inge in eis tefuro su sa kulamwi, a kut in eis sie su kamwil. Ke ma inge, Nga kasrusr ou inge, tia oanu Nga nukin saflaiye; Nga meun ou inge, tia oanu Nga pouk engyengu.” (1 Korint 9:25, 26) Opi lun met su kutangla ke sritel in pal meeta pa sie tefuro, ku tefuro orek ke sra lun sak pine, ku kutu sak, ku wild celery su paola​—paye sie “tefuro su sa in kulamwi.” Ke ma inge, mea ma inge su akola nu sin met Kristian nu kemwa su muteng nu ke safla?

¹⁸ In sramsramkin Me Srikasrak lasr, Jisus Kraist, met sap Poul el simusla: “Su ke engun filiyuki ye mutal, el keok fwin sak soko, a pilesru mekin, a muta lepo leyut lun tron lun God.” (Hibru 12:2) Jisus el muteng nu ke saflaiyen moul lal oanu sie met ke el ngetuk nu ke engun su filiyuki ye mutal a pilesru sak soko, wikin engun inge pa ip lal in akmutalye en Jeova, in molela sou lun met nu kemwa liki mise, a in kol oanu sie Togusra a Met Tol Fulat ke el fwa folokonak moul ma patpat in sie paredais fwin fwalu nu sin met nu kemwa su akos.​—Mattu 6:9, 10; 20:28; Hibru 7:23-26.

19. Mea kut enenu in filiye ke nunuk lasr ke kut kaifweung ke inkanek lasr oanu met tuma lutlut Kristian?

¹⁹ Tuni akmwoye engun su filiyuki ye mutusr ke kut kaifweung ke orekma lasr oanu sie met Kristian. Jeova el ase nu sesr sie orekma mwo in luti ke peng mwo lun Togusrai lun God, a in sulkakin etauk lun Baibel su ku in molela kutu met. (Mattu 28:19, 20) Fuka yokiyen sie me insemwomwo in konaok sie met su engunkin in etu ke God paye a in kasru met inge in sroang nu ke akutun lun moul! A fwin oasr kutena oiye su met elos akkalemye ke orekma in luti lasr, pa inge sie me sang mwolanu nu sesr in wi orekma su luti ke akmutalyeyen en Jeova. Ke kut muteng ke orekma lun forfor lasr fwinne oasr me lain ku srunga sikyuk ke territory lasr su kut orek lo nu we, oasr me insemwomwo lasr in oru insien Jeova in engun. (Soakas 27:11) A me sang mwolanu su el mwolela ka nu sesr pa moul ma patpat. Sie me insemwomwo yoklanu pa inge! Kut enenu in filiye ke nunuk lasr me insemwomwo inge nu kemwa a kaifweung ke akutun.

Ke Kut Liye La Len Apkurun Me

20. Fuka akutun ke moul ku in mutamwauk in upala ke kut apkurun nu ke safla?

²⁰ Ke akutun lun moul, kut enenu in lain met lokwalok lulap lasr, Setan su Devil. Ke kut apkurun nu ke safla, el kaifweung na paye in aktukulkulye kut tu kut in munasla ke kasrusr lasr. (Fwakyuk 12:12, 17) A tia fwusesr in tafwela na oanu sie met oaru, a met orekma su mwolela tari oanu met sulkakin Togusrai ke sripen oasr meun, sral, me lokwalok, a kutupa ma upa su oanu me akul nu ke “len safla.” (Daniel 12:4; Mattu 24:3-14; Luk 21:11; 2 Timote 3:1-5) Sayen ma inge, len safla el srakna loes in oanu nunuk lun kutu met, yokna kut fwin sroang nu ke akutun inge ke yiu puspis somla. Aok, Kas lun God akkalemye nu sesr la safla e fwa tuku. Jeova el fwak la ma se inge fwa tia pat. Safla arulanu apkurun.​—Hebakkuk 2:3; 2 Piter 3:9, 10.

21. (a) Mea ma inge su akkeye kut ke kut tafwela nu ke kasrusr lasr ke inkanek lun moul? (b) Mea kut kaifweung in oru ke liye la safla futotoeni?

²¹ Ke ma inge, in kutangla ke akutun lun moul, kut enenu in eis ku ke me kasru mwolanu sin Jeova su el ase lungse tu kut in ku na ke ma lun ngun. Kut enenu pa me akkeye su tuku ke asrouki lasr nu sin met lili wiesr in lalalfongi, su kasrusr pa ke akutun. Fwinne oasr kolyai upa a oasr ma upa sikyuk su kut tia etu in oru kasrusr lasr in arulanu upa, lela kut in muteng nu ke safla meyen Jeova el ase “yoklanu lun ku.” (2 Korint 4:7) Fuka sie me insemwomwo yoklanu in etu la Jeova el lungse kut in aksafyela kasrusr lasr! Paenang ke kaifweung yoklanu, “lela kut in moniyuk in kasrusr lun akutun, su filiyuki tari ye mutusr,” a lalalfongi la “in pal fwal kut fwa kosrani, kut fwin tia mulalla.”​—Hibru 12:1; Galetia 6:9.

[Footnotes]

a Kom Esam?

◻ Efu kut enenu in muteng nu ke safla?

◻ Kain in me sang fuka su tuku sin Jeova kut tia enenu in pilesru?

◻ Efu arulanu yok sripe in oakiye ke lalmetmet kasrusr lasr?

◻ Kain in engun fuka filiyuki ye mutusr ke kut tafwela nu ke kasrusr lasr?

[Picture on page 28]

Eis me akkeye su tuku ke meeting lun met Kristian