Kafweang in Suk Me Insemwomwo lun Jeova
“[God] el met sang moul nu selos su sokol.”—HIBRU 11:6.
1, 2. (a) Ke inkanek fuka met puspus elos suk ke me insemwomwo lun God? (b) Efu ku kut lungse in eis me insemwomwo lun Jeova?
“GOD lan akinsemwomwoye kom!” In kutu an, metu elos fwak kas inge fwin oasr sie met akkalemye kulang, a sang me kasru nu selos. Oasr met kol lun alu puspus elos lungse in fwak kas in blessiye ku akinsemwomwoye metu, kosro, a ma puspus saye su wangin moul. Metu elos lungse in travel a som nu ke loom alu lulap puspus meyen elos fwinsrakkin mu pa inge loom ku an elos fwa ku in eis me insemwomwo we. Met kol ke politic elos lungse pa in kaskaskin me insemwomwo lun God nu sin mutunfwal selos. Ya kom nunku mu me siyuk ku me sramsram lalos inge ke me insemwomwo el tuku na paye ke insielos? Ya ma inge ku in sang kasru? Su ku in eis me insemwomwo lun God, a efu?
2 Jeova el palye tari la in len safla, e fwa oasr sie un met lal su nasnas a lungse in orek misla liki mutunfwal nukewa su e fwa sulkakin peng mwo lun Togusrai nu ke an loeslanu fwalu fwinne oasr me srunga a me lain upa nu selos. (Isaia 2:2-4; Mattu 24:14; Fwakyuk 7:9, 14) Kut nukewa su eis kunokon yok sripe se inge in wi ke u lun met kulansap lal kut lungse a kut enenu me insemwomwo lun God, meyen wangin fwinsrak lasr in engankin moul mwomwo su oasr inse misla fwin wangin me insemwomwo lun God ka. (Sam 127:1) Tusruktu fuka kut ku in eis me insemwomwo lun God?
Me Insemwomwo Puspus Sun Met Akosten Nukewa
3. Fwin met Israel elos akos God pal nukewa, ma mwomwo fuka ku in sikyak nu selos?
3 Ridi Soakas 10:6, 7. Meet liki mutunfwal Israel elos ilyuk nu ke Fwal Mwulela, Jeova God el akkalemye la e fwa oasr moul mwomwo a karungin yok su elos fwa engunkin fwin elos fwa akos a long pusral. (Duteronomi 28:1, 2) Aok, me insemwomwo puspus lun Jeova fwa tuku nu nu sin met kulansap lun God a ‘sunolos’ alukela ma fwal. Nu sin met nukewa su lungse in akos God, paye la e fwa oasr me insemwomwo puspus su fwa tuku nu selos.
4. Mea eneneyuk nu ke akosten paye?
4 Oiya a ella fuka met Israel elos enenu in akkalemye fwin elos akos God? Masap lun God akkalemye la el fwa tia insemwomwo fwin met lal elos tia kulansap nu sel ke “engun a insemwomwo.” (Ridi Duteronomi 28:45-47.) Jeova el lungse metu elos in aksol ke inse mulala lalos a tia ke sripen elos nunku mu elos enenu in oru ke sripen God el sapkin nu selos. Oana ma orakrak puspus a dimon elos akos pa, tusruktu arlana fwal nu sin metu elos in akos Jeova ke inse mulala lalos a tia ke sripen sapkinyuk nu selos in oru. (Mark 1:27; Jemes 3:3) Akosten paye nu sin God el akkalemye ke lungse lasr nu sel. Met su akos ke inkanek inge elos pulakin engun yok ke sripen elos lulalfongi la masap lun Jeova tia toasr a elos lulalfongi pa la God pa “met sang moul nu selos su sokol.”—Hibru 11:6; 1 Jon 5:3.
5. Ke inkanek fuka sie met su lulalfongi ke mwulela lun Jeova eis me kasru elan akos masap su oasr in Duteronomi 15:7, 8?
5 Nunku akmwoye la fuka akosten mwomwo su oasr lulalfongi yok ku in akkalemyeyuk fwin kut akpayeye masap su simusyukla in Duteronomi 15:7, 8. (Rid.) Fwin sie met el akos masap se inge paye la orekma lal inge ku in sang kasru nu sin met enenu, ne ouinge fwin toasr insiel ka ya ma inge ku in akkeye fototo mwomwo inmasrlon met puspus lun God? Sayen ma inge, ya oiya lal inge su tia arlana mwo el akkalemye lulalfongi ke ku lun Jeova in sang ma enenu lun met kulansap puspus lal a in aksaokye pal mwomwo se inge in etawi kulang lal? Mo el tia ku! God el etu insien met kulang a mwo a el mwulela la el fwa akinsemwomwoye orekma lal nukewa a in ma nukewa su el filiye paul nu ka. (Duteronomi 15:10) Lulalfongi ke mwulela se inge fwa akkalemyeyuk ke orekma mwomwo a fwa oasr me insemwomwo puspus ka.—Soakas 28:20.
6. Mwulela fuka Hibru 11:6 el akkalemye nu sesr?
6 In wekunang nu ke lulalfongi nu sin Jeova oana sie Met Sang Moul, Hibru 11:6 el akkalemye kalem ke sie pa oiya mwomwo su eneneyuk in eis me insemwomwo lun God. Loang akmwoye ka la Jeova el akinsemwomwoyelos su “sokol” ke inse kewa lalos. Kas se su orekmakinyuk in pal meeta ka a lungasyukla oana sokol el kalmekin nu ke kafweang yok a in loang akmwoye in sokol. Aok orekma mwomwo inge ku in akkeye kut ke me insemwomwo puspus fwa akpayeye nu sesr! Meyen mwulela se inge tuku sin God paye mukefwanna su “koflana kikiap.” (Taitus 1:2) El akkalemye tari ke lusen tausan yea puspus la metu ku in lulalfongi na paye ke ma nukewa su el mwulela ka. Kas lal akpayeyuk pal nukewa; tia ku in tia akpayeye. (Isaia 55:11) Ke ma inge kut fwin lulalfongi yok la kut akkalemye lulalfongi paye, el fwa akpayeye nu sesr la el fwa sie Met Sang Moul.
7. Kut ku in eis fuka me insemwomwo puspus ke inkanek lun “fute” lal Ebream?
7 Jisus Kraist pa met se meet ke “fute” lal Ebream. Met Kristian akmusrala nukewa elos wi pa ke “fute” se inge su palyeyuk tari. Oasr masap nu selos in “fwakak mwo lal su pangon [elos] liki losr nu ke kalem sakuruk lal. (1 Piter 2:9; Galetia 3:7-9, 14, 16, 26-29) Kut tia ku in fwinsrak in orala fototo mwomwo nu sin Jeova kut fwin pulesru met puspus su Jisus el srusrngiye in liaung ma nukewa lal. Kut tia ku in eis etauk a kalem yok ke ma kut rid ke Kas lun God a kut tia ku in orekmakin ma inge ke moul lasr fwin wangin kasru lun “met kulansap oaru a lalmetmet.” (Mattu 24:45-47) Kut fwin orekmakin ma puspus su kut lotela ke ma Simusla, kut ku in lulalfongi la a fwa oasr me insemwomwo lun God nu sesr.
Kafweang in Nunku Akmwoye ke Ma Lungse lun God
8, 9. Jekob el akkalemye fuka la el kafweang in akfwalye orekma lal ke ma el siyuk sin God?
8 Kut ku in esam ke kafweang yok lal Jekob in pal meeta in eis me insemwomwo lun God. El tia etu la fuka mwulela lun God nu sel Ebream fwa akpayeye, tusruktu el lulalfongi la Jeova el fwa akpusye tulik nukewa nutin papa matou tumal, a tulik natul elos ekla sie mutunfwal lulap. Ke ma inge, in yea 1781 B.C.E., Jekob el som nu an Heran in suk ke mutan se ma el ku in payuk nu se. El kafweang in suk ke sie mutan su lungse in alu nu sin Jeova a mutan se su fwa akpayeye la el sie nine su arlana mwo nu sin tulik natul.
9 Kut etu la Jekob el sonol Rejel, tulik nutin uncle se lal. El lungsel Rejel a el insese in kulansap nu sel Leban, papa tumal Rejel, ke lusen yea itkosr tu elan ku in payuk nu sel. Kain in oiya se inge sikyak na paye a tia sie me sramsram mukena inmasrlon mokul a mutan su lungse sie sin sie. Jekob el etu na paye la God el mwulela nu sin papa matu tumal, Ebream a el fwak pa mwulela se inge nu sel Isaak, papa tumal. (Genesis 18:18; 22:17, 18; 26:3-5, 24, 25) Isaak el fwak pa ke mwulela se inge nu sel Jekob, mwen natul: “A God Ku liki ku, El akinsemwomwoye kom, a oru kom in isus fwako, a akyokyekomelik, tu kom fwa sie mwalil lun mutanfwal. A sot nu sum me insemwomwo lal Ebream, nu sum, a nu sin fute lom tukom, tu kom fwa ku in usru fwal kom muta we, su God El sang nu sel Ebream.” (Genesis 28:3, 4) Ke ma inge, kafweang lal Jekob in suk sie mutan mwo a fwal elan ku in payuk nu se a in orala sie sou na mwomwo el akkalemye ke lulalfongi lal ke ma Jeova God el fwak.
10. Efu ku Jeova el engun in akinsemwomwoyel Jekob?
10 Aok, Jekob el tia suk ke me kasrup in sang kasru nu sin sou lal. El nunku akmwoye pal nukewa ke mwulela lun Jeova in akinsemwomwoye tulik nukewa natul. El nunku akmwoye pal nukewa ke inkanek in akpayeyen ma lungse lun Jeova. Jekob el lungse na paye in oru ma nukewa ke ku lal kewa elan ku in eis me insemwomwo lun God fwinne oasr ma upa puspus. El akkalemye oiya mwomwo inge nu ke pal se el matu tari, a Jeova el akinsemwomwoyel yok ka.—Ridi Genesis 32:24-28.
11. Kafweang fuka kut enenu in oru in fwal nu ke ma lungse lun God su akkalemyeyuk tari?
11 In oana Jekob, kut tia etu ma nukewa ke inkanek lun Jeova in akpayeye akwuk lal. Ne ouinge, ke inkanek lun lutlutkin Kas lun God, kut ku in eis etauk a kalem ke ma e fwa sikyak ke “len lun Jeova.” (2 Piter 3:10, 17) Ke sie me pupulyuk, kut tia etu la ngea len se inge fwa tuku, tusruktu kut etu la len se inge apkuran. Kut lulalfongi ke Kas lun God ke el akkalemye la kut fwin kafweang in sang ma lo ke kitin pal lula inge, kut fwa ku in molikutla a met nukewa su long kut.—1 Timote 4:16.
12. Ke mea kut lulalfongi na paye?
12 Kut etu a akilen la safla e fwa tuku ke pal na sa; aok Jeova el tia enenu in sano nu ke pal se met nukewa fwin fwalu long ke ma lo ke peng mwo. (Mattu 10:23) Sayen ma inge, kut eis kas in kasru mwomwo la fuka kut ku in akpayeye orekma in luti lasr. Ke sripen lulalfongi lasr paenang kut wi ke orekma saoklana se inge ke ku lasr kewa, a kut orekmakin ma saok nukewa lasr in sang kasru nu ka. Ya met puspus ke territory lasr fwa porongo peng mwo su kut sulkakin nu selos? Aok, kut tia ku in sa in etu la mea fwako lun orekma lasr in sulkakin peng mwo ke territory lasr. (Ridi Ekklisiastis 11:5, 6.) Kunokon lasr pa in sulkakin peng mwo, a kut lulalfongi yok la Jeova el fwa ase nu sesr me insemwomwo lal. (1 Korint 3:6, 7) Kut lulalfongi la el etu a liye kafweang lasr, a ke inkanek lun ku lal, el fwa akkalemye nu sesr kas in kasru nukewa su kut enenu.—Sam 32:8.
Kafweang in Suk ke Ku lun God
13, 14. Ku lun God el akpayeye fuka in oru met kulansap puspus lal elos in arlana fwal ke kain in orekma puspus ke pal inge?
13 Na fuka kut fwin nunku mu kut sufwal a tia ku in akpayeye sie kunokon su ituku nu sesr, kut tia ku in oru orekma in sulkakin peng mwo? Kut ku in siyuk Jeova God in ase nu sesr ku lal in kasre kut in akmwoye kain in orekma puspus lasr nu sel. (Ridi Luk 11:13.) Ku lun God ku in oru met puspus in fwal nu ke sie orekma ku kunokon mwomwo nu sel. Ke sie me pupulyuk, tokin met Israel elos som liki an Ijipt, ku lun God kasru met seperd a met kulansap nukewa inge in kutangla liki met lokwalok lalos ke meun fwinne elos tia pa ke akwuk nukewa lun meun. (Exodus 17:8-13) Tia pat tokin ma inge, ku lun God el oru Bezalel a Oholiab in arlana fwal nu ke orekma usrnguk, a in akpayeye plan a akwuk na mwomwo nu ke loom nuknuk in alu.—Exodus 31:2-6; 35:30-35.
14 Ku lun God inge su arlana ku, ku in oru met kulansap nukewa lun God ke pal inge elos in arlana fwal in karungin a liaung ma enenu lun u, yokna ke pal se oasr ma eneneyuk elos in mutawauk in orekmakin engine puspus lalos in orek buk a kain in me rid puspus. Ke sie leta lal Brother R. J. Martin, su met liaung ke niyen orek buk, el akuteye ke ma mwomwo su orekla in yea 1927. “Ke pal fwal, Leum el ikasla srungul; a oasr sie engine lulap in orek buk su kut moli a kut mutawauk in orekmakin. In pal san kut nukin na paye in orekmakin kofwen orekma se inge, a la a fuka engine se inge in orekma. Tusruktu Leum el etu in sang kasru nu sin met lili nukewa su kisekin ma mwomwo nukewa lalos nu sel. El aklalmetmetye elos a akyokye etauk lalos ka. . . . Ke lusen wik na ekasr, kut pala tari in orekmakin kofwen me orek buk se inge; a srakna orekmakinyuk nu ke pal inge, su ku in orala kain in me rid puspus, tusruktu met su orala ma inge elos nukin la kut ku in orekmakin engine se inge nu ke kain in orekma puspus inge.” Jeova el srakna akinsemwomwoye kafweang inge lun met kulansap lal nu ke pal inge.
15. Fuka Rom 8:11 el ku in sie me akkeye nu selos nukewa su sun me sruf upa?
15 Ku lun Jeova el orekma ke kain in inkanek puspus. Ku se inge oasr pa yurin met kulansap nukewa lun God, a ma inge kasrelos in muteng a kutangla liki ma upa puspus. Na fuka kut fwin sun me srufwe upa? Kut ku in eis ku ke kas mwomwo su Poul el simusla in Rom 7:21, 25 a 8:11. Aok, God el orekmakin ‘ku lal in akmoulyelak Jisus liki met mise,’ a ma inge ku in kasre kut pa ke pal inge, a ku in akkeye kut in kutangla ke meun lasr in lain kena koluk nukewa lasr. Kas inge simusyukla nu sin met Kristian akmusrala, tusruktu me lutlut mwomwo ka ku in orekmakinyuk nu sin met kulansap nukewa lun God. Kut nukewa ku in eis moul kut fwin akkalemye lulalfongi nu sin Kraist, a kut in kafweang yok in akwanginyela kena koluk lasr, a in moulkin moul fwal nu ke kolyuk lun ku lun God.
16. Mea kut enenu in oru in eis ku lun God?
16 Ya kut ku in tupan God elan ase nu sesr ku lal fwin kut tia kafweang nu ka? Mo. Kut enenu in pre ka, sayen ma inge kut enenu pa in alken in lutlutkin Kas lun God. (Soakas 2:1-6) Sayen ma inge, ku lun God oasr pa ke congregation lun met Kristian. Kut fwin wi pal nukewa ke meeting lun congregation, ma inge akkalemye la kut lungse in long ke ma God el fwak ke inkanek lun ku lal nu sin congregation. (Fwakyuk 3:6) Sayen ma inge, kut enenu in inse pusisel in orekmakin ma kut lotela tari. Soakas 1:23 el akkalemye nu sesr kas in kai inge: “Komwos forla ke kas in kai luk. Liye, nga fwa okoila ngunik nu fwomwos.” Aok, God el lungse in sang ku lal “nu selos su aksol.”—Orekma 5:32.
17. Fwako mwomwo lun me insemwomwo lun God nu ke kafweang lasr ku in pupulyukkin nu ke mea?
17 Kafweang yok eneneyuk in eis me insemwomwo lun God, tusruktu lela kut in esam la ma inge tia ku in oana sie nu ke ma mwomwo su arlana pukanten su Jeova el ase nu sesr. Fwako mwomwo lun me insemwomwo lal nu ke kafweang lasr ku in pupulyukkin nu ke inkanek su manosr eis me kasru ke me mongo mwomwo. God el orala manosr ke inkanek su kut ku in engunkin mongo a in akkeye manosr. El ase pa kain in mongo nukewa. Kut tia etu na paye la fuka me mongo inge nukewa eis kain in nutrients, a kut tia pa ku in akuteye la fuka ma inge orekma nu ke manosr in orala energy su tuku ke mongo su kut kang. Ma kut etu pa mongo nukewa ku in akkeye kut a oasr ma eneneyuk pa nu sesr in kang mongo in akkeye manosr. Kut fwin sulela in kang mongo mwomwo, a fwa oasr me akkeye mwomwo nu sesr. Ke inkanek oana sie, Jeova el akkalemye ma eneneyuk nukewa nu ke moul ma patpat, a el ase nu sesr kasru su kut enenu in akpayeye masap nukewa inge. Kalem la, el kasre kut ke inkanek yok a arlana fwal tu elan kaksakinyuk. Ne ouinge, kut enenu in aksol, akfwalye orekma lasr nu ke ma lungse lun God, tu kut in eis me insemwomwo puspus.—Haggeai 2:18, 19.
18. Sulela fuka kom lungse in oru, a efu?
18 Ke ma inge lela kom in akpayeye kunokon nukewa lom ke inse kewa lom. Lela kom in siyuk kasru sin Jeova tu kom in eis kutangla. (Mark 11:23, 24) Kom fwin oru ma inge, lela kom in lulalfongi la ‘el su suk fwa konoiyuk.’ (Mattu 7:8) Met Kristian akmusrala nukewa fwa akinsemwomwoyeyuk ke “tefuro lun moul” in kosrao. (Jemes 1:12) “Sip ngie” nukewa lun Kraist, su kafweang yok in eis me insemwomwo ke inkanek lun fute lal Ebream, elos fwa insemwomwo in longol Kraist ke el fwak: “Fwasru, komwos met insemwomwo lun Papa tumuk, usrui togusrai su akola nu sumwos ke mutamweyen fwalu me.” (Jon 10:16; Mattu 25:34) Aok, “elos su [God] el akinsemwomwoye fwa usru fwalu, . . . a muta we ma patpat.”—Sam 37:22, 29.
Ya Kom Ku In Akuteye?
• Mea eneneyuk nu sesr kut in eis me insemwomwo lun God?
• Mea kut enenu in oru in akkalemye akosten paye?
• Kut ku in eis fuka ku lun God, a ma inge ku in kasre kut fuka?
[Caption on page 4]
Jekob el apurak nu sin sie lipufon ke lusen fong fon se elan eis me insemwomwo lun Jeova.
Ya kom kafweang pa ke orekma in kulansap lom?
[Caption on page 6]
Ku lun God oru Bezalel a Oholiab in arlana usrnguk a mwo ke orekma lalos