Inse Sefwanna el Me Akul Kalem ke Alu Paye
“Ke inse sefwanna Nga fwa esaloseni, oana sip nu in kalkal lalos.”—MAIKA 2:12, New World Translation.
1. Ma orekla nukewa el akkalemye fuka ke lalmetmet lun God?
SIE met sim lun Sam el fwak kas inge: “O Jeova, pukantenlanu orekma lom! In lalmetmet Kom orala nu kemwa. Fwalu sesesla ke me kasrup lom.” (Sam 104:24) Lalmetmet lun God arlana kalem ke akesrui lun million puspus ke ma el orala, ke kain in saku, won srisrik puspus, ma orakrak nukewa fwin fwalu tu ma inge nukewa ku in moul. Oayepa, oasr laan monum su oasr laa tausan puspus, laa lulap a laan monum su arlana srik ke cells lom, laa nukewa inge tukeni orekma in oru kom in fokoko a wangin mas.
2. Efu ku inse sefwanna inmasrlon met Kristian in century se meet el oana sie mwenmwen?
2 Jeova God el orala metu in akesrui a in fungfung nu sin sie sin sie. Tia oana sie aten metu, oiya lalos, a etauk lalos in oru orekma. Sayen ma inge, el oru met se meet in akkalemye oiya mwomwo oana sie nu ke oiya mwomwo lal in kasrelos in akesrui a in fungfung nu sin sie sin sie. (Genesis 1:27; 2:18) Tusruktu, apkuran met nukewa elos tia kulansap nu sin God a wangin inse sefwanna lalos nu sin sie sin sie. (1 Jon 5:19) Ke ma inge, kut fwin nunku ke congregation lun met Kristian in century se meet, su kutu selos met foko lun met Efesus, kutu elos mutan Grik pengpeng, kutu elos met Ju su oasr lutlut yok lalos, a kutu elos alu nu ke ma srulela in pal somla, inse sefwanna su elos akkalemye nu sin sie sin sie el oana sie mwenmwen.—Orekma 13:1; 17:4; 1 Tessalonika 1:9; 1 Timote 6:1.
3. Baibel el akkalemye fuka inse sefwanna yurin met Kristian paye? A mea kut fwa lutlutkin ke me lutlut se inge?
3 Alu paye ku in oru metu elos in akesrui ke inkanek mwomwo oana laan manosr sifwana. (Ridi 1 Korint 12:12, 13.) Kutu oiya su kut fwa lutlutkin yok ke me lutlut se inge pa: Fuka alu paye el oru metu in inse sefwanna? Efu ku Jeova mukena ku in oru million puspus sin met lun mutunfwal nukewa in inse sefwanna? Kain in me kutong a ma upa fuka Jeova el kasre kut in kutangla ka? Kut fwin sramsramkin oiyen inse sefwanna, fuka met Kristian paye elos tia oana sie ke alu nukewa saye?
Fuka Alu Paye el Oru Metu in Inse Sefwanna?
4. Fuka alu paye el oru metu in inse sefwanna?
4 Met nukewa su wi ke alu paye elos etu a kalem ka la ke sripen Jeova pa orala ma nukewa, paenang el arlana sumwos in oru kolyuk lal in kosrao a fwalu. (Fwakyuk 4:11) Ke ma inge fwinne met Kristian paye elos moul ke kain in akwuk puspus lun anu, a tia oana sie ma sikyak nu selos, tusruktu elos nukewa akos masap sefwanna lun God a elos orekmakin ke moul lalos akwuk fulat lun Baibel. Met nukewa su wi ke alu paye elos pangon Jeova oana “Papa.” (Isaia 64:8; Mattu 6:9) Ke ma inge, elos nukewa met lili a elos ku in engunkin oiya mwomwo su akkalemyeyuk sin sie met sim lun sam: “Liye! Fuka mwo a me insemwomwo ke met lili elos tukeni muta inse siefwanna!”—Sam 133:1.
5. Oiya fuka sang kasru nu ke inse sefwanna lun met Kristian paye?
5 Met Kristian paye elos sesumwos, ne ouinge elos tukeni nu sie in alu nu sin God meyen elos lotela in lungse sie sin sie. Jeova el lotelos in lungse sie sin sie, a wangin kutena met saye ku in oru ouinge. (Ridi 1 Jon 4:7, 8.) Baibel el akkalemye: “Komwos nukomang . . . inse pakoten, kulang, fwokpap, fulpap, mongfusesr. Muteng nu sin sie sin sie, a nunak munas nu sin sie sin sie, fwin oasr yurin kutena met kas in lain siepa. Oana Leum [Jeova] el nunak munas nu sumwos, komwos in ouyepa oru ouinge. A fwin ma inge nu kemwa, komwos in nukomang lungse, su me kapur lun sumwosna [“inse sefwanna,” NW]. (Kolosse 3:12-14) Me kapur lun inse sefwanna inge su kalmekin nu ke lungse, el oiya mwomwo se su me akul lun met Kristian paye. Ya kom sifwana tia liye la inse sefwanna pa me akul lun alu paye?—Jon 13:35.
6. Fwinsrak ke Togusrai el kasre kut fuka in engunkin inse sefwanna?
6 Met nukewa su alu nu sin God paye elos inse sefwanna meyen elos ngetak nu ke Togusrai lun God oana fwinsrak sefwanna nu sin met nukewa. Elos etu la a fwa tia pat Togusrai lun God fwa kunausla guferment nukewa lun met a fwa akinsemwomwoye met akosten nukewa ke misla paye nu tok ma patpat. (Isaia 11:4-9; Daniel 2:44) Ke ma inge, met Kristian elos porongo ma Jisus el fwak ke met tuma lutlut lal: “Elos tia ma lun fwalu, aok oanu Nga tia ma lun fwalu.” (Jon 17:16) Met Kristian paye elos tia wi ke kutena akwuk lun fwalu in lain a meuni sie sin sie; ke ma inge, elos ku in engunkin inse sefwanna ke pal se met puspus su raunelosla orek meun nu sin sie sin sie.
Akwuk Sefwanna Su Orekmakinyuk in Luti Kut
7, 8. Ke inkanek fuka kas in kasru su tuku in Baibel el sang kasru nu ke inse sefwanna lasr?
7 Met Kristian in century se meet elos engunkin inse sefwanna meyen elos eis me luti ke sropu sepana. Elos etu a akilen la Jisus pa luti a kol congregation ke inkanek lun sie governing body ku un met liaung, su met sap a met matu puspus in Jerusalem wi ka. Met liaung nukewa inge elos akfwalye sulela lalos ke Kas lun God a elos srusrngiye pa met lili puspus in orekma oana met liaung in som nu ke congregation in an puspus in akkalemye kas in kasru lalos nu selos. Baibel el akkalemye kas inge ke met liaung inge: “A ke elos fwasr inkanek lalos in fwasr sasla in siti inge, elos sang nu selos in liaung masap, su met sap a met matu su muta Jerusalem, elos sapkin.”—Orekma 15:6, 19-22; 16:4.
8 Oapana ke pal inge, oasr sie governing body a oasr met Kristian akmusrala puspus wi ka elos sang kasru nu ke inse sefwanna lun congregation fwin fwalu nufon. Governing Body elos orek buk a kain in me rid puspus ke kas puspus in akkeye met Kristian ke lulalfongi lalos. Me luti mwomwo inge oana me mongo el fwal nu ke Kas lun God. Ke ma inge, me lutiyuk inge el tia ma lun met a ma tuku sin Jeova.—Isaia 54:13.
9. Orekma su God el ase nu sesr kasre kut fuka in oasr inse sefwanna?
9 Met liaung puspus elos akkeye pa inse sefwanna ke elos kol orekma in sulkakin peng mwo. Fototo mwomwo inmasrlon met lili puspus su tukeni oru orekma in kulansap nu sin God el fokoko liki fototo lun met puspus lun fwalu su lungse in tukeni ke sripen elos lungse na in orek me akengun. Congregation lun met Kristian oakiyuki in akfulatye Jeova a in akpayeye orekma in sulkakin peng mwo, in oru met tuma lutlut, a in akkeye congregation, a in tia tukeni nu sie in orek me akengun mukena. (Rom 1:11, 12; 1 Tessalonika 5:11; Hibru 10:24, 25) Ke ma inge, met sap Poul el fwak ke met Kristian: “Tu komwos tu ku in ngun siefwanna, a in nunak siefwanna komwos in tukeni akkeye komwos in lulalfongi lun mwosasu.”—Filippai 1:27.
10. Mea kutu inkanek su God el oru met kulansap lal in oasr inse sefwanna?
10 Aok, oana met kulansap lun Jeova, oasr inse sefwanna yurosr meyen kut akos Jeova oana met kol lasr, kut lungse met lili wiyesr, kut fwinsrakkin Togusrai lun God, a kut akkalemye sunak nu sin met lili nukewa su God el orekmakin in kol kut. Jeova el kasre kut in aksumwosye oiyesr su tia mwo su ke sripen sesumwos lasr ku in sang me sensen ke inse sefwanna lasr.—Rom 12:2.
Fuka in Akwanginyela Oiyen Inse Fulat a Sok
11. Efu ku inse fulat el oru metu elos in tia inse sefwanna? A Jeova el kasre kut fuka in akwanginyela oiya se inge?
11 Inse fulat el oru metu in wangin inse sefwanna inmasrlolos. Sie met su inse fulat el lungse in nunku mu el fulat liki met puspus a el engun in konkun kel sifwana pal nukewa. Tusruktu kain in oiya inge el kunausla inse sefwanna; elos su long kas lal ku in pulakin sok. Met tuma lutlut Jemes el akkalemye nu sesr kas inge: “Konkun inge nukewa koluk.” (Jemes 4:16) Paye la, tia mwo in nunku ke met saye mu elos srik liki kut. Jeova God el sie me srikasrak mwomwo ke inse pusisel meyen el akkalemye oiya mwomwo nu sin met sesumwos oana kut. Devid el simusla kas inge: “Kulang [“inse pusisel,” NW] lom oreyu in yok.” (2 Samuel 22:36) Kas lun God kasre kut in akwanginyela inse fulat lasr meyen ma inge luti kut in oasr nunak mwomwo. Poul el simusla kusensiyuk nukewa inge: “Su orekomla in sie liki siepa? Ku mea oasr yurum su kom tia eis? A kom fwin eis, efu kom ku konkun, oana kom tia eis?”—1 Korint 4:7.
12, 13. (a) Efu ku kut lungse in akkalemye sok? (b) Mea fwako mwomwo lun kafweang lasr in etawi nunak lun Jeova ke met puspus saye?
12 Sok el sie pa oiya tia mwo su ku in kunausla inse sefwanna. Ke sripen kut usrui oiyen sesumwos, paenang oasr pal kut nukewa ‘lungse in sok,’ a met Kristian su fokoko ke lulalfongi su baptais tari in pal loeloes somla ku pa in pulakin sok ke ma saok puspus, kunokon mwomwo, a oiya mwomwo lun met lili puspus saye. (Jemes 4:5) Ke sie me pupulyuk, sie brother su payuk a oasr tulik natul el ku in sok ke kunokon mwomwo lun sie brother su oru orekma lun pioneer pal nukewa. Tusruktu el nukin pa la brother se inge su orekma oana pioneer el ku pa in pulakin sok kutu srisrik ke sripen oasr tulik puspus nutin brother se inge. Na fuka kut ku in tulokinye sok in tia kunausla inse sefwanna lasr?
13 Baibel el pupulyukkin met akmusrala nukewa su wi ke congregation lun met Kristian nu ke laa nukewa ke monun met, a kut fwin esam ka ma inge el sie me kasru nu sesr in tia akkalemye sok. (Ridi 1 Korint 12:14-18.) Ke sie me pupulyuk, kut ku in liye mutasr tusruktu kut tia ku in liye heart lasr, ne ouinge paye la laa luo inge arlana yok sripe nu sum. Ke inkanek oapana inge, Jeova el aksaokye met nukewa ke congregation fwinne kutu sin met lili elos engunkin kunokon mwomwo liki met lili saye. Ke ma inge lela kut in etawi nunak lun Jeova ke met lili wiyesr. Lela kut in tia sok sin met lili puspus, a kut ku in akkalemye nunak mwomwo a insemwomwo nu selos. Kut fwin oru ma inge, kut ku in sang kasru nu ke u lasr oana met Kristian la ma inge tia oana sie nu selos su wi ke alu kikiap nukewa.
Alu Puspus su Fwak Mu Elos Met Kristian —Wangin Inse Sefwanna Lalos
14, 15. Mea paenang alu nukewa su fwak mu elos met Kristian wangin inse sefwanna lalos?
14 Inse sefwanna su oasr yurin met Kristian paye arlana eteyuk, tusruktu alu puspus saye su fwak mu elos met Kristian wangin inse sefwanna yurolos. In century ak akosr, met Kristian su sruokye me luti kikiap arlana pengpeng yen nukewa, ke sripe se inge togusra lun an Rom el orala akwuk in tulokinye ma inge, orekma lal inge sang kasru nu ke yokelik lun alu puspus su fwak mu elos met Kristian. Tokin ma inge, alu se inge kitakitelik nu ke u puspus, oasr mutunfwal puspus su wi ke alu se inge srelosla liki kolyuk lun an Rom a orala alu lalos sifwana ke an selos.
15 Mutunfwal puspus inge su fwak mu elos met Kristian elos orek meun nu sin sie sin sie ke lusen century puspus. Ke century ak 17 a ak 18, met puspus fwin an Britain, France, a an Merika elos akkeye lungse yok lalos nu ke mutunfwal selos, a ke kas in pupulyuk lungse lalos nu ke mutunfwal selos ekla oana sie alu nu selos. Ke lusen century ak 19 a 20, nationalism ku lungse yok lun metu ke mutunfwal selos mutawauk in oan ke nunak a insien metu. Tokin kutu pal, alu puspus su fwak mu elos met Kristian kitakitelik nu ke alu puspus, su alu nukewa inge elos akkeye lungse yok nu ke mutunfwal selos. Met puspus su wi ke alu inge elos wi in orek meun lain met su wi ke alu lalos ke siepa an ku mutunfwal. Ke pal inge, alu puspus su fwak mu elos met Kristian wangin inse sefwanna lalos ke sripen tia oana sie me luti lalos a ke sripen lungse ke mutunfwal lalos.
16. Kain in oiya fuka oru alu puspus su fwak mu elos met Kristian in wangin inse sefwanna inmasrlolos?
16 Ke century ak 20, kutu alu su tuku ke Kristendom elos mutawauk in srike orekmakin sie akwuk in akkeye inse sefwanna inmasrlolos. Tusruktu tokin elos kafweang in oru ma inge ke yea puspus, tia alu nukewa su fwak mu elos met Kristian oasr inse sefwanna, a met su wi ke alu inge elos srakna tia insese nu sin sie sin sie ke me top nu ke kusensiyuk inge: Ya ma nukewa tuku ke akwuk lun evolution? Ya orekma in uniye tulik srisrik su soenna isusla el fwal a mwo? Ya God el insese ke orekma koluk lun mokul nu sin mokul? Ya mutan ku in srusrngiyuki in kol ke alu? Kutu sin met kol lun alu inge elos srike in oru met lun alu puspus in tukeni nu sie ke elos tila orekmakin me luti su oru met in tia insese nu sin sie sin sie. Tusruktu, ke elos fwak mu me luti lalos inge tia eneneyuk in orekmakinyuk meyen tia arlana yok sripe, ma inge oru lulalfongi lun met lalos in arlana munas a akwuk lalos inge tia oru alu puspus su fwak mu elos met Kristian in oasr inse sefwanna lalos.
Oasr Inse Sefwanna ke Alu Paye su Mwo Liki Inse Sefwanna Yurin Met Puspus su Oasr Lungse Yok ke An Selos
17. Kas palu el akkalemye fuka la alu paye fwa oru metu in oasr inse sefwanna lalos ke “len safla”?
17 Aok wangin inse sefwanna in masrlon met yen nukewa ke pal inge, ne ouinge inse sefwanna su oasr yurin met nukewa su wi ke alu paye arlana kalem. Met palu se inge lun God su pangpang Maika el palye: “Ke inse sefwanna Nga fwa esaloseni, oana sip nu in kalkal lalos.” (Maika 2:12, NW) Maika el palye la alu paye fwa mwo liki alu saye nukewa, liki god kikiap nukewa. El simusla: “A in len toka a fwa te oru, eol lun loom sin Jeova fwa oakiyuki fwin mangon eolu, a fwa akfulatyeyuk liki toktoku; a mutanfwalu fwa eel nu lu. Tu mutanfwal nu kemwa fwasr, kais sie in en god lal; a kut fwa fwasr in En Jeova God lasr ma patpat a ma patpat.”—Maika 4:1, 5.
18. Alu paye el kasre kut in orala ma ekla fuka puspus?
18 Maika el akkalemye pa ke inkanek mwo su alu paye el kasru metu in oasr inse sefwanna lalos wekunang met su lain sie sin sie in pal somla. “A mutanfwal puspus fwa som a fwak: ‘Fwasru, a lela kut in utyuk nu ke eol lun Jeova, a nu ke loom sin God lal Jekob; a el fwa luti nu sesr inkanek lal, a kut fwa fwasr inkanek lal.’ . . . A elos fwa tuktukye kutlas natulos nu ke mwusra lun plau, a mwusra natulos nu ke mitmit in pakpuk lesak. Mutanfwal fwa tia srukak kutlas lain mutanfwal, a elos fwa tia sifwil lutlut meun.” (Maika 4:2, 3) Met nukewa su forla liki god kikiap a liki mutunfwal selos a wi u lun met su alu nu sin Jeova elos engunkin inse sefwanna lalos su oasr fwin fwalu nufon. God el lotelos ke inkanek lun lungse.
19. Inse sefwanna yurin million puspus sin met su wi ke alu paye el me akpayeye kalem ke mea?
19 Inse sefwanna yurin met Kristian paye fwin fwalu nufon ke pal inge el wangin ma oana a oiya inge sie me akpayeye la Jeova el tafwela in kasru met nukewa lal ke inkanek lun ku lal. Met lili in mutunfwal nukewa elos engunkin inse sefwanna nu sin sie sin sie su soenna liyeyuk in pal somla ke me sramsram lun metu. Oiya mwomwo se inge el me akpayeyen ma akkalemyeyuk in Fwakyuk 7:9, 14, a ma inge akkalemye la e fwa tia pat lipufon lun God elos e fwa fulela “eng akosr” su fwa kunausla akwuk koluk nukewa lun fwalu ke pal inge. (Ridi Fwakyuk 7:1-4, 9, 10, 14.) Aok kut arlana insemwomwo in engunkin inse sefwanna yurin met lili wiyesr fwin fwalu nufon. Kut nukewa ku in akkeyeyuk fuka ke inse sefwanna inge? Me top nu ka e fwa lutlutkinyuk ke me lutlut toko.
Kom E Topuk Fuka?
• Ke inkanek fuka alu paye el oru met puspus in oasr inse sefwanna lalos?
• Fuka kut ku in kutongkuti sifwana in tia kunausla inse sefwanna lasr?
• Met in mutunfwal nukewa elos tia insese nu sin sie sin sie yokna ke pal inge, tusruktu efu ku met nukewa su wi ke alu paye oasr inse sefwanna lalos?
[Caption on page 8]
Efu ku met tuma lutlut elos kaskaskin kas puspus?
[Caption on page 9]
Orekma lom in sang kasru nu ke orekma in musai Kingdom Hall el sang kasru fuka nu ke inse sefwanna?