Met lun God Elos Akos Kolyuk lun Ku lal In Pal Meeta a In Pal Inge

“Ku sana inge oru orekma inge nukewa.”​—1 KORINT 12:11, NW.

1. Mea kut fwa lutlutkin ke me lutlut se inge?

PENTECOST in yea 33 pa sie len su oasr kutu ma mwolana puspus sikyuk. Pa inge len su God el okoila ku lal nu sin met kulansap puspus lal! (Orekma 2:1-4)a God el mutawauk in orekmakin ku lal in kol met lal ke sie oiya sasu. Ke me lutlut se meeta, kut lotela la fuka ku lun God kasru met kulansap oaru lal in pal meeta in oru ma upa puspus ke orekma in kulansap nu sin God. Tusruktu mea ma tia oana sie ke inkanek su ku lun God kol met kulansap lal meet liki a tokin pal se su congregation lun met Kristian oakiyuki? A fuka met Kristian elos eis me kasru su tuku ke kolyuk lun ku lun God ke pal inge? Pa inge ma kut fwa lutlutkin ke me lutlut se inge.

Liye! Mutan Kulansap lun Jeova!

2. Mea Mary el etu ke ku lun God?

² Ke pal se ku lun God okoiyukla nu sin met nukewa su tukeni nu sie infwokil lung in Jerusalem, Mary el oasr we. (Orekma 1:13, 14) Tusruktu fwinne meet liki len se inge, Mary el etu tari ke lusen pal loeloes la Jeova el ku in oru ma mwolana puspus ke inkanek lun ku lal. Yea 30 kutu meet liki pal se inge, Jeova el supwema moul lun Mwen natul liki kosrao nu fwalu. Jeova el orekmakin ku lal in oral Mary in pitutuyak fwinne el srakna virgin.​—Mattu 1:20.

3, 4. Mea pulakin lal Mary ke ma God el siyuk sel elan oru? Fuka kut ku in etawel?

³ Efu ku Jeova el sulella Mary? Tokin lipufan se el fwak nu sel Mary la el fwa oswela Mwen nutin God, el fwak: “Liye! Mutan kulansap lun Leum! Lela in orek nu sik oana kas lom.” (Luk 1:38) Ma Mary el fwak akkalemye ke kain in oiya paye lal. El inse mulala in eis ma lungse lun Jeova nu sel. El tia siyuk sin lipufan ke ma metu elos fwa nunku kel fwin el pitutuyak ku el sangeng mu Josef el srungela in payukyak nu sel. Ke el fwak la el met kulansap lun Jeova, Mary el akkalemye la el lulalfongi na paye nu sin Jeova.

⁴ Ya oasr pal kom pulakin mu kunokon lom ke orekma in kulansap nu sin God upala nu sum in akpayeye? Kais sie sesr enenu in siyuk sel sifwana: Ya nga lulalfongi na paye la Jeova el fwa karungin ma puspus fwal nu ke ma lungse lal? Ya nga lungse na paye in oru orekma su Jeova el lungse ngan oru? Kom ku in lulalfongi la God el sang ku lal nu selos nukewa su lulalfongi na paye nu sel a aksol oana met Kol.​—Orekma 5:32.

Ku lun God Kasrel Piter

5. Fuka ku lun God kasrel Piter meet liki Pentecost in yea 33?

⁵ Oana Mary, met sap Piter el liye a pula pa kuiyen ku lun God meet liki Pentecost in yea 33. Jisus el sang ku nu sel a nu sin met sap saye puspus in sisla lipufan koluk. (Mark 3:14-16) A fwinne Baibel el tiana akkalemye nu sesr ma puspus ka, kalem la Piter el orekmakin ku inge. Oayepa, ke Jisus el sulel Piter in fwasr fwin Mwea lun Galili in tuku nu yurol, Piter el ku in oru ma inge ke kasru lun ku lun God. (Ridi Mattu 14:25-29.) Arlana kalem la Piter el ku in oru orekma kulana meyen el lulalfongi ke kasru lun ku lun God. Tokin kutupal, ku lun God sang ku nu sel Piter a nu sin met tuma lutlut tu elos in oru ma saye puspus.

6. Mea ku lun God kasrel Piter in oru ke pal in Pentecost yea 33 a tokin pal se inge?

⁶ In Pentecost yea 33, ke inkanek lun mwenmwen ku lun God kasrel Piter a met puspus saye in kaskaskin kas lun kain in met su tuku an Jerusalem. Tokin ma inge, Piter el tuyuk a sramsram nu sin un metu. (Orekma 2:14-36) Oasr pal Piter el sangeng, a oru ma puspus su el tia nunku meet ka. Tusruktu, tokin el eis ku lun God, el pulaik in fwakak peng mwo, fwinne metu elos oru me kalyai nu sel a sapkin nu sel in tui in luti. (Orekma 4:18-20, 31) God el orekmakin ku lal in sang etauk yok nu sel Piter. (Orekma 5:8, 9) A el eis ku in akmoulyeak sie met.​—Orekma 9:40.

7. Me luti fuka lun Jisus Piter el kalem tokin el akmusrala?

⁷ Meet liki len in Pentecost, Piter el kalem ke ma paye puspus su lutiyuk sin Jisus. (Mattu 16:16, 17; Jon 6:68) Tusruktu oasr ma paye saye su Piter el tia etu, a el kalem ka tokin pal in Pentecost mukena. Ke me pupulyuk, Piter el tia kalem la Kraist fwa akmoulyeakyuk oana sie ngun tokin len tolu, a el tia pa kalem la Togusrai lun Kraist fwa oasr in kosrao. (Jon 20:6-10; Orekma 1:6) Piter el tia kalem la metu ku in akmoulyeakyuk a oasr mano oana ma lun lipufan a elos fwa kol in Togusrai in kosrao. Tokin el akmusrala ke ku lun God in Pentecost a sulosolla in moul nu in kosrao, pa na inge pal Piter el kalem ke me luti inge lun Jisus.

8. Etauk fuka met akmusrala a sip ngia ku in eis?

⁸ Tokin met tuma lutlut lun Jisus elos eis ku lun God, elos ku in kalem ke me luti su elos tia kalem in pal meeta. Ku lun God kasru met sim puspus lun Ma Simusla ke Kas Grik in akuteye ma paye mwolana ke akwuk lun Jeova. (Efesus 3:8-11, 18) Ke pal inge, met akmusrala a sip ngia elos ku in lutlut a kalem ke ma paye sepana inge. (Jon 10:16) Ya kom sang kulo ke kasru lun ku lun God in oasr etauk a kalem yok ke Kas lun God?

Poul el Sessesla Ke Ku lun God

9. Mea Poul el ku in oru ke kasru lun ku lun God?

⁹ Apkuran yea se tokin Pentecost yea 33, Soul, su tok el eteyuk pa oana Poul, el akmusrala pa ke ku lun God. Ku lun God sang nu sel Poul ku in oru ma puspus su srakna ku in kasre kut ne ke pal inge. Ke me pupulyuk, ku lun God kasrel in simusla buk 14 lun Baibel. In oana ke inkanek su ku lun God kasrel Piter, ma inge kasrel Poul in kalem pa a simusla ke fwinsrak ke moul ma patpat in kosrao su tia ku in musalla a kulamwi. Oayepa ke inkanek lun ku lun God, Poul el sisla lipufan koluk puspus, akkeyela met mas, a akmoulyeak kutu met! Tusruktu Poul el eis ku ke inkanek lun ku lun God in oru kutu ma su arlana yok sripe. Met kulansap lun God elos eis ku in oru orekma oapana ke pal inge, fwinne elos tia eis ma inge ke inkanek lun mwenmwen.

10. Fuka ku lun God kasrel Poul in kaskas?

¹⁰ Poul, su tingtingi ke ku lun God, el pulaik in kaskas in lain met lokwalok lun alu paye. Met kol lulap lun an Cyprus el loang akmwoye ke me sramsram nukewa. El engun na paye ke ma Poul el fwak a el lulalfongi ke ma paye. Baibel el akkalemye la mokul se inge el “lut ke me lutlut lun Leum.” (Orekma 13:8-12) Kalem la, Poul el etu la ku lun God mukena ku in sang nu sel ku in kaskaskin ma paye ke pulaik. (Mattu 10:20) Tok el siyuk sin congregation in an Efesus in pre kel pal nukewa tu “ku in kaskas” fwa itukyang nu sel.​—Efesus 6:18-20, LSK.

11. Fuka ku lun God kolol Poul?

¹¹ Ku lun God kasrel Poul in kaskas, tusruktu kutupal ma inge kutongilye Poul in kaskas in kutu an. Ku lun God kol Poul ke fwufwasryesr lal ke orekma lun missionary. (Orekma 13:2; ridi Orekma 16:6-10.) Jeova el srakna orekmakin ku lal in kol orekma in fwakak peng mwo ne ke pal inge. In oana Poul, met kulansap akosten nukewa lun Jeova elos oru ke ku lalos kewa in sulkakin ma paye ke pulaik a moniyuk. Aok, inkanek su God el orekmakin ku lal in kol kut el siena liki ma el oru nu sel Poul, ne ouinge kut ku in lulalfongi la ke inkanek lun ku lal, Jeova el akpayeye la met nukewa su sumwos insielos elos long ke ma paye.​—Jon 6:44.

Oasr Orekma Puspus Tia Oana Sie

12-14. Ya ku lun God orekma ke oiya sana nu sin met kulansap nukewa lal? Mea kutu inkanek su ku lun God orekma nu sin met kulansap lal?

¹² Paye la me akkeye nu sesr ke pal inge in rid ke oiya su Jeova el akinsemwomwoye congregation lun met akmusrala in pal meeta. Ku lun God sang nu sin met Kristian in pal se inge “me sang” mwomwo. Ke pal se Poul el simusla nu sin congregation in an Korint ke me sang inge, el fwak la oasr kain in me sang, tusruktu oasr ku sefwanna. A oasr kain in oiya puspus, a Leum sefwanna. A oasr kain in orekma puspus, a God sefwanna, su orala kain in orekma inge nu sin met nukewa. (1 Korint 12:4-6, 11) Poul el fwak la ku lun God ku in orekma ke oiya su tia oana sie nu sin met kulansap puspus lun God. Ku lun God kol “u srisrik” a “kutu pa sip,” ku sip ngia. (Luk 12:32; Jon 10:16) Tusruktu, ma inge tia orekma ke oiya sana nu sin kais sie met ke congregation.

¹³ Ke me pupulyuk, met elder srusrngiyuki elos ke kasru lun ku lun God. (Orekma 20:28) Tusruktu tia met Kristian nukewa su akmusrala ke ku lun God elos kulansap oana met elder ke congregation. Kalmen ma inge pa ku lun God orekma ke oiya su tia oana sie nu sin met ke congregation.

¹⁴ Ku inge su oru met akmusrala in etu na paye la elos nutla oana mwen nutin God pa ku sapana su Jeova el orekmakin in akmoulyelak Jisus in moul in kosrao. (Ridi Rom 8:11, 15.) Jeova el orekmakin ku sana inge in orala kosrao a fwalu nufon. (Genesis 1:1-3) Jeova el orekmakin pa ku sana inge in sang nu sel Bisalel lalmetmet yok in oru orekma yok sripe nu ke loom nuknuk in tukeni. Ku sana inge oral Samson in arlana fokoko in oru ma puspus su wangin kutena met ku in oru, a ku inge kasrel Piter in fwasr fwin kofu. Ke ma inge in eis kolyuk lun ku lun God tia oana sie in akmusrala ke ku lun God. In akmusrala ke ku lun God pa sie inkanek mwomwo na su ku lun God orekma nu sin metu. God pa sulela met su el akmusrala ke ku lal.

15. Ya akwuk in akmusrala metu ke ku lun God fwa orek nu tok ma patpat? Akuteye.

¹⁵ Ku lun God orekma pal nukewa nu sin met kulansap oaru lal ke kain in inkanek su tia oana sie. Ma inge orekma nu selos ke lusen yea tausen puspus meet liki God el mutawauk in akmusrala metu. Akwuk in akmusrala metu ke ku lun God mutawauk in orek in Pentecost yea 33, tusruktu ma inge fwa tia orek nu tok ma patpat. Fwinne akwuk in akmusrala metu e fwa tui, tusruktu ku lun God fwa orekma pal nukewa nu sin met lal in kasrelos in oru ma lungse lal ma patpat.

16. Mea met kulansap lun Jeova elos oru ke pal inge ke kasru lun ku lal?

¹⁶ Mea met kulansap lun Jeova elos oru ke pal inge ke kasru lun ku lal? Baibel el akkalemye me top nu ka: “A ku lun God a mutan su akola in marut elos fwak: ‘Fwasru!’ A el su long, lan fwak: ‘Fwasru!’ Kutena met su malu lela elan fwasru; kutena met su lungse, lela lan eis kof in moul, wangin molo.” (Fwakyuk 22:17, NW) Ke kasru lun ku lun God, met Kristian ke pal inge elos suli “kutena met su lungse” in eis kof in moul. Met Kristian akmusrala elos kol in oru orekma inge, a sip ngia elos welulos ke orekma inge. Ku sana inge lun God kol u luo inge. Met su wi ke u luo inge elos akkalemye mwulela lalos nu sin Jeova ke inkanek lun baptais ke inen Papa a Mwen a ku lun God. (Mattu 28:19) A elos nukewa akkalemye fwako lun ku lun God ke moul lalos. (Galetia 5:22, 23) Ke kasru lun ku lun God, elos oru ke ku lalos kewa in moulkin moul nasnas su akinsemwomwoye God.​—2 Korint 7:1; Fwakyuk 7:9, 14.

Kafweang in Siyuk ke Ku lun God

17. Kom ku in akkalemye fuka la ku lun God oasr yurum?

¹⁷ Kom fwin fwinsrak in moul ma patpat in kosrao ku fwin fwalu, Jeova el ku in sot nu sum “yoklanu lun ku” tu kom ku in sruokye na oaru lom nu ke safla. (2 Korint 4:7) Saap metu elos sekulang nu sum a aksruksruk nu sum ke sripen kom wi orekma in sulkakin peng mwo. Tusruktu kom fwin tia lela ma inge in tulokinkomi in oru orekma in fwakak peng mwo, kom akkalemye la ku lun God oasr yurum. Esam la fwin akkolukyeyuk kom ke en Kraist, kom in insemwomwo; meyen ku lun God on fwom.​—1 Piter 4:14.

18, 19. Jeova el fwa orekmakin fuka ku lal in kasre kom? Mea kom enenu in kafweang in oru pal nukewa?

¹⁸ God el lungse in sang ku lal nu sin met nukewa su paye in siyuk ka. Ma inge ku in akmwoye ku lom a akyokye kena lom in oru orekma in kulansap nu sel ke ku lom kewa. “God el orekma in komwos, tu komwos in lungse a oru ma lungse mwo lal.” Ke kasru lun ku lun God, wekunang kafweang lom in sruokye ku “kas lun moul,” fwa oru kom in “orekmakin lango lomwos ke sangeng a rarrar.”​—Filippai 2:12, 13, 16.

¹⁹ Ke ma inge, ke kom lulalfongi yok ke ku lun God, kom in kafweang in akpayeye ma Jeova el siyuk sum in oru, a akmwoye ma inge, a siyuk kasru sel. (Jemes 1:5) El fwa usot nu sum me kasru kom enenu tu kom in kalem ke Kas lal, in muteng ke ma upa nukewa, a in sulkakin peng mwo. Jisus el mwulela: “Siyuk, a a fwa etukot nu sumwos; suk, a komwos fwa konoiyuk; tomwolak, a a fwa ikasla nu sumwos.” (Luk 11:9, 13) Ke ma inge kafweang in siyuk sin Jeova in kasre kom in oana met kulansap oaru nukewa lal in pal meeta a in pal inge, su oasr kolyuk lun ku lal nu selos.

[Footnote]

Ya Kom Ku In Akuteye?

• Ke inkanek fuka kut ku in etawel Mary a eis me insemwomwo?

• Ke oiya fuka ku lun God kolol Poul?

• Fuka met kulansap lun God elos eis kolyuk lun ku lal in pal inge?

[Petsac ke sra 18]

Ku lun God kasrel Poul in kutangla ke me akkoluk lun lipufan koluk

[Petsac ke sra 20]

Ke pal inge, met Kristian akmusrala a sip ngia elos eis kolyuk lun ku lun God